في البداية لايسعني إلا شكر كل عضوة شاركت بقراءة قصتي أو بردودها التي أثارت في نفسي الحماس لإكمالها!!(حيث إنها سابقة تاريخية أن أحاول إكمال قصة!وراح يفهمني من تابع قصتي جدة شعيبية والدكتورة خرافة الأزلي وتوهقوا إني ماحطيت لها نهاية!!!) والله لاأخفيكن سراً.. إلى هذه اللحظة وأنا أتساءل ماالذي أعجب العضوات في هذه القصة تحديداً؟؟ لذلك عندما رأيت الاقبال عليها يتزايد حاولت أن أبذل جهدي في تغيير مسار الأحداث من دون خروج عن الشرع والعرف بقدر الاستطاعة.. وخير شاهد على نجاح القصة عدة نقاط: 1-انهمار الرسائل علي كالمطر منذ أن بدأت أكتبها وحتى بعد اغلاقها تضاعف العدد كثيراً.. وكانت الرسائل تحمل الكثير من الكلمات مابين عضوة مؤيدة وعضوة رافضة ومنتقدة لها..ولايسعني سوى شكر الجميع..إذ أننا كلنا بشر منَّا من يخطيء ومنَّا من يصيب... 2- السرقة الغير طبيعية للقصة وجدتها في حوالي12 موقع بأسماء مختلفة وكل عضوة تسرقها تقنع بقية الأعضاء أن القصة لها وهي من ألفها شخصياً!!(اللهم عليك بكل سارقة أسألك أن تنتقم منها في أعز ماتملك!!)وأرجو عدم لومي على ذلك فقد قضيت ساعات طوال لأخرج لكم بهذه الأجزاء التي أنهكتني ذهنياً لتأليفها ووضعها بين أيديكم..في حين إن ناس لايملكون من الخوف من الله مثقال ذرة يأتين وينشرنها على أنها نتاج مجهوداتهم الفكرية!!!وقصصي السابقة لم تسلم أيضاً من السرقات..مما حدا بي أن أمنع أي عضوة من نقلها بتاتاً سواء باسمي أو باسمها!! 3-لابراء الذمة أنا أكتب بإسم( رماح ردينية) في منتدى عالم حواء+الفراشة.. من أعظم المنن التي وجدتها في الكتابة بمنتداكم أو غيره من المنتديات أن رزقني الله بأخوات يرشدوني بكلماتهم إلى الصواب ويسعين جاهدات لإبعادي عن الخطأ... وأكثر شيء كان يدخل البهجة على قلبي هو كمية الدعوات التي كنت أجدها بين الردود لم أتوقع أن أجد عضوات كثيرات بيننا يعانين في حياتهن أشد أنواع الضغوط وكانت بعض موضوعاتي وقصصي كالمتنفس لهم وكما يقلن انها تدخل البهجة على أنفسهن وتنسيهن الهموم..وهذا من فضل الله علي.. يعلم الله إنني أبذل مافي وسعي لكي أجعلكن مسرورات ضاحكات عند قراءة كل موضوع أكتبه حتى لو كان فيه نقد لبعض العيوب فأنا أغلفه بقالب فكاهي حتى أسمع ضحكاتكن من خلف الشاشة!!هههههههههه ولاأنتظر شكر من أحد بقدر ماأتمنى أن لاتنسوني وأبنائي من دعائكن..فخير مايفعله المسلم للمسلم دعوة في ظهر الغيب وبإذن الله يقبلها الله منه... هذا الرابط القديم للقصة: http://www.niswh.com/vb/showthread.php?t=213613 أما اليوم فبإذن الله سأكمل هنا بقية الأجزاء... و هنا الردوووووووووووووووووووود فضلا لا أمرا
بعد فترة بدأت اختبارات الترم الأول واسمهان وقفت ريجيم وقالت لرانية: رنو أنا وصلت للوزن اللي أبيه وماعاد راح أكمل معاك!! رانية:أنا لسه مشواري طويل وراح أكمل لحالي.. وشدت اسمهان حيلها بالامتحانات هي وصاحباتها...لين ماطلعت النتايج وكانت حلوة.. ========== بدأت الاجازة... عبدالرحمن:بهذه المناسبة الحلوة يامدام اسمهان لازم نجتمع بالعائلة ونطلع طلعة حلوة مع بعض! اسمهان:هيييييه..بس وين؟؟ عبدالرحمن:المكان اللي يعجبك... اسمهان:بخاطري أحجز صالة بفندق وأسوي حفلة نجاح كبيرة!! عبدالرحمن:على هونك..ياحلوة..أنا قلت نطلع طلعة عائلية مو نسوي خساير!وبعدين انتي لسه ماتخرجتي باقي الترم الثاني وشهوله التكاليف؟ إحنا مقبلين على زواج عبدالمجيد وعبدالرحيم وأبي أمسك فلوسي عشان أتساعد معاهم! اسمهان:وش لي في أخوانك؟ودي أنبسط واستانس! عبدالرحمن:أولاً:عيب تقولين وش لي في اخوانك!انتي صرتي وحدة من العائلة وهم بمقام اخوانك.. ثانياً:انتي تقولين وش لي بأخوانك وأنا ماسويت مثلك بالعكس فكرت في طلعة عائلية وقصدت أهلك وأهلي!وبعدين لما أقول لك إحنا مقبلين على زواج اخواني فإنتي المستفيدة من توفير فلوسنا!أكيد بتطلبين فستان وملحقاته وكوافير وخلافه+هدايا للعرايس..يكون على الأقل في مبلغ لك على جنب!! اسمهان:يوووووه سامحني مدري شلون أرمي كلام من غير ماأفكر! عبدالرحمن:أنا في خاطري نحجز شاليه كبير بمسبح للحريم وواحد ثاني للرجال ونعزم أهلك كلهم وأهلي وننبسط لمدة يوم.. اسمهان:واااااااي فكرة تهبل!بس تكفى لاتنسى خالتي نوال وزوجها وبناتها تراهم يونسونا دايم بمسابقاتهم ومحاضراتهم! عبدالرحمن:أنا بأحجز وبأعزم أبوك وأقول له جيب كل من يعز عليك.. ========= بالنسبة لتركي اتصل عليه أبوأفنان قبل الامتحانات وأعطاه الموافقة على الخطبة وحدد الملكة قبل الزواج بيومين عقب التخرج من الثانوي يعني عقب شهور!!! تركي:وليش ياعم بين الملكة والزواج يومين؟متى يمدي البنت تجهز نفسها؟ أبوأفنان:هي وحدة من اثنين أنا أعطيها فلوس وتجهز بها نفسها ومتى ماجبت انت المهر ترجع لي فلوسي..أو انك تعطيها المهر قبل الزواج بشهر عشان تجهز نفسها.. تركي:زين ومتى النظرة الشرعية؟ أبوأفنان:لايا الحبيب..مااتفقنا على كذا! تركي:تقصد إنك بتزوجني بنتك من غير ماأشوفها..؟؟؟ أبوأفنان:ووين المشكلة؟كل بنات العائلة تزوجوا بنفس الطريقة! تركي:بس إنت ياعمي راعي دين وتعرف كلام الرسول صلى الله عليه وسلم في هذا الموضوع وأكيد مو خافية عنك قصة الصحابي اللي خطب امرأة ونصحه الرسول يشوفها لأنه كما قال(إن في أعين الأنصار شيئاً) أبوأفنان:معلوم ياولدي هالكلام ومو خافي علي..بس عاداتنا في عائلتنا ان العروس ماتشوف العريس الا بيوم الملكة أو الزواج.. تركي:بس مو معقول كذا..إنت لاتحسبني يوم بأشوفها ..بأشوفها عشان أقيس جمالها!بالعكس أنا واثق من ذوق أهلي..بس عشان أشوف مدى الارتياح لها!!! أبوأفنان:والله إن كنت ملَزِّم بأخليك تشوفها على غفلة!! تركي:شلون يعني؟مافهمت؟ أبوأفنان:يعني تكون جالسةبالحوش مثلاً وتجي انت وتشوفها من بعيد من غير ماتحس!! تركي:ياسلام..يعني أسمح لنفسي أشوفها وهي لا؟؟من حقها تشوفني هي بعد وتقول رايها!أنا لو باغي شوفتها عشان أعرف شكلها بس!كان طلبت منكم صورة وشفتها..بس أنا طلبت النظرة الشرعية اللي هي من ديننا عشان نعرف في بيننا وفاق ولا لا؟ إلا دق باب المجلس وكانت أم أفنان تبي أبوأفنان ياخذ الشاي.. أم أفنان:خير ان شاء الله؟ليش أصواتكم عالية؟ أبوأفنان:العريس الله يهديه مُصِر يشوف البنت! أم أفنان:ووين المشكلة؟ أبوأفنان:انتي تعرفين تقاليد العائلة عندنا كيف! أم أفنان:الدين المفروض يكون حكمه أقوى علينا من العادات!وابن الناس ماقال شي غلط..وبعدين ماراح نكون إحنا أحسن من اخواني خريجين الدراسات والعلوم الشرعية لما خلوا أختي مشاعل تشوف خطيبها عبدالمجيد!! أبوأفنان:يعني قولتك أخليه يشوفها؟ أم أفنان:ايه توكل على الله..وابن الناس موب قاعد يلعب معانا حتى نخاف منه إنت تعرفه من قبل وهو عنده رغبة جادة في الخطبة..إذن وين المشكلة؟ أبوأفنان:إذن نادي بنتك بسرعة وبلا زبرقة وبلا كلام فاضي من عند الباب توقف ثواني وتمشي!! أم أفنان:تم.. راحت الأم وبلغت أفنان وزعلت أفنان:يمه اش هذي الشوفة؟ حرام عليكم..كل البنات يكون عندهم خبر قبلها بمدة..وأنا تبون المسألة تتم كذا؟ أم أفنان:يابنتي زين من أبوك تنازل ورضى..روحي الله يرضى عليك بدلي هدومك واطلعي.. وراحت أفنان تلبس ودمعتها على خدها وبعد مالبست وقفت قدام باب المجلس والحيا شاقها نصين!بمظهر أقل من عادي!لامة شعرها ببكلة ولابسة لبس بسيط جداً وعيونها بالأرض..انذهل تركي لأن الأب ماعطاه فكرة انه وافق على الشوفة!! تركي:ماشاء الله تبارك الله..شلونك؟ جاوبت أفنان بدمعة!وظلت ساكتة تركي:الله يوفقك بامتحاناتك ان شاء الله خجلت أفنان وعطتهم ظهرها ودخلت عند أمها... طالع تركي بالأب:انت متأكد ان بنتك موافقة علي؟؟؟؟ الأب:هههه ايه بس بنتي خجولة أول مرة تطلع قدام شخص غريب وش تبيها تسوي يعني غير البكاء من الخجل؟؟ تركي:إذن على بركة الله..ونعم الأخلاق فيها.. أبوأفنان:اسمع ياتركي ياولدي حِنا نشري الرِجال ومانبيع بناتنا لذلك أنا ماأشرط عليك بأي شي..المهر اللي تدفعه إحنا راضيين فيه..وإن حصل منك قصور فأنا رقبتي سدادة لبنتي ومابأقصر عليها بشي..وترى الملكة بتكون بسيطة وعائليةوفي البيت ..راس مالها ذبيحتين.. تركي:جزاكم الله خير... واتفقوا انه كل شي يسير نهاية السنة يعني بعد شهور.. تركي وهو بالسيارة قال بنفسه:سبحان الله..على قد ماكانوا أهل عبير متكلفين ومسرفين..على قد ماهذول الناس بسيطين ومتواضعين! =========
بعد ماعزم عبدالرحمن أمه واخوانه وأخته أحلام وزوجها بالإضافة إلى أخوات اسمهان وأزواجهم وأمها وأبوها وأخوها محمد..وخالتها نوال وبناتها وأولادها وزوجها.... استعد الجميع للذهاب للشاليه من بعد المغرب..وعلى مااكتمل عدد الضيوف كانت صلاة العشا انتهت ...كان المكان رائع عبارة عن فيلا دورين بواجهة زجاجية بالأسفل تطل على حديقة صغيرة فيها مسبح..وعن يمين شاليه النساء كان شاليه الرجال.. كان موقع شاليه النساء بالنص بين شاليهين عن يمينهم شاليه الرجال وعن يسارهم شاليه لـ ناس.. وبدأت الجلسة بشرب القهوة وصواني الحلى والضحك والفرفشة والسواليف. الخالة نوال:يالله ياحريم ويابنات نتثقف شوي من كتاب الله اللي مازلنا نجهل فيه الكثير من المعاني.. سؤالي الأول:وردت كلمة النجدين في القرآن..مامعناها؟؟ أسماء:طريق الخير والشر.. نوال:سؤالي الثاني(ماهي الؤتفكات؟) أم اسمهان:مدائن قوم لوط.. نوال:ماهو العهن؟؟ أم عبدالرحمن:الصوف المصبوغ.. نوال:من هو الأكمه؟ هيفاء(بنتها):الشخص المولود أعمى.. نوال:ومن هم الأيامى؟ سماح:من لاأزواج لهم من الرجال والنساء.. نوال:ماهما المكاء والتصدية؟ وبعد تحاور وتشاور جات الاجابة:التصفير والتصفيق..مثل ماكانوا كفار قريش يفعلون حول الكعبة كانت عبادتهم تصفيق وتصفير !! وفجأة والحريم قاعدين يسولفون حول المسبح بالحوش الا الشاليه اللي جنبهم ارتفع فيه صوت استيريو بأغاني غربية وبدأت شلة شباب وبنات يرقصون في البلكونة أمام الملأ بشكل فاضح!! أم اسمهان:الله لايسامحكم..ادخلوا يابنات... نوال:قال الرسول(كل أمتي معافى إلا المجاهرون)اللهم لاتؤاخذنا بما فعل السفهاء منَّا... أسماء:الله يصيبكم ياكلاب!!! نوال:لايابنتي وش هالكلام؟الله يعافيهم ولايبتلينا..ماتت قلوبهم حسبي الله ونعم الوكيل.. أم عبدالرحمن:بالله مايخافون هالبحر اللي حولهم يهيج وينطبق عليهم؟؟ وقاموا الحريم يلمون أغراضهم ويدخلون داخل الشاليه.. انتبهوا لهم الشباب اللي قاعدين يتفرجون عليهم من البلكونة!! قال واحد:على فين ياهووه؟؟تعالوا شاركونا!!!!!! الثاني:تعالوا حتتبسطوا مرة! لكن الحريم ماردوا دخلوا الشاليه وقفلوا الستارة على الواجهة الزجاجية وبدأت أصوات الاستنكار تتعالى من الضيوف.. نوال:استغفر الله العظيم كنت أتمنى أعيش وأموت وأنا ماشفت هالمنظر المخزي! أم اسمهان:وين هيئة الأمر عنهم بس؟ ابتسام:مساكين هيئة الأمر..موب كل مكان مسموح لهم يدخلونه.. وبدأوا الحريم يغيرون الموضوع لكن أصوات الاستيريو والضحكات الماجنةبدأت تتعالى من الشباب بطريقة مستفزة!! وصل الصوت من قوته لاستراحة الرجال أحمد زوج أسماء:معقول هالصوت جاي من شاليه الحريم؟؟ أبواسمهان:أعوذ بالله...مستحيل .. بناتنا ونسواننا يخافون الله..يمكن من سيارات واقفة برة.. ولما صار الصوت يخرق الآذان اتصل عبدالرحمن على اسمهان يستفسر.. اسمهان:هذول الأنذال اللي بالشاليه اللي جنبنا يرقصون ويضحكون وقالوا لنا كلام سيء لدرجة اننا حرمنا نفسنا من جلسة المسبح ودخلنا... عبدالرحمن:زين ماسويتوا..بأشوف أنا اش السالفة.. وقال عبدالرحمن للرِجال:أنا بأروح للشاليه اللي جنب النساء هذا الصوت المزعج جاي من هناك.. زوج الخالة نوال:تكفى ياولدي..قول لهم مايصير هاللي يسوونه هنا في عوائل محترمة.. وبالفعل راح عبدالرحمن لحاله وطق باب الشاليه.. فتحت له الباب بنت لابسة بنطلون برمودا وبلوزة شفافة وشعرها أشقر وباين من هيئتها انها مو عربية.. عبدالرحمن:لو سمحتي نادي لي أحد من الشباب اللي داخل.. البنت(بلهجة عربية ركيكة):اش تبقي هبيبي؟ تعالي معايا نسهر شوية..ومسكت يده..!!! دفها عبدالرحمن بأقوى ماعنده وقال:ابعدي يامنحطة! سمعهوه الشباب بالداخل وجوا ركض.. الأول:مين سمح لك تمد يدك على صاحبتي؟؟ عبدالرحمن:بالله ماتستحي على وجهك وانت تقول هالكلام؟ الثاني:انت اش تبغى بالضبط؟ عبدالرحمن:إحنا عوائل محترمة شلون تتعدون على محارمنا بالنظر والأفعال الفاضحة؟؟ الأول:مرحبا والله بعوائل محترمة!سلم لي على المحترمين.. البنت:هادا وحش دربني أون ماي فيس! عبدالرحمن:أنا دفيتك بس..ولو ضربتك على وجهك يحق لي!! الشباب:الحقوا ياشباب هذا النذل يضرب تينا!! واجتمعوا الشباب على عبدالرحمن وضربوه ورفسوه ضرب شديد لدرجة انه تألم من بطنه ألم شديد وماقدر يقاومهم ورموه خارج الشاليه ورجعوا بكل بساطة يكملون حفلتهم!! قعدوا الرِجال ينتظرون عبدالرحمن يرجع لكنه مارجع لما استغربوا.. قال أبواسمهان:اشفيه عبدالرحمن تأخر؟عسى خير؟روحوا شوفوا شالسالفة؟؟ وراحوا محمد وعبدالرحيم يدورونه بشاليه الشباب..ولقيوه ممدد على الأرض والدم ينزف من فمه ووجه كله كدمات!! انصعق عبدالرحيم من منظره وقال:اشفيك اش اللي حصل لك؟ محمد:أكيد علق مع أصحاب هالشاليه..تعال نأدبهم! عبدالرحمن:لاتكفون لاتدخلون لهم هذول صيع مايخافون ربهم.. وبدأ عبدالرحمن يغيب عن وعيه ونقلوه من مكانه على المستشفى ومن ربكتهم مااتصلوا طمنوا الرِجال!! زوج ابتسام:هي اش السالفة بالضبط؟كل ماراح واحد منهم مارجع؟ أبواسمهان:أنا قلبي مو متطمن!حاس إنه فيه شي قاعد يصير!قوم معاي ياأبومجاهد نشوف اش السالفة! أبومجاهد(زوج نوال):يالله توكلنا على الله.. لما راحوا للشاليه..قال أبواسمهان:أكيد انهم داخل مادام مافي أحد منهم برة! ودقوا باب الشاليه.. فتح لهم واحد سكران!!وقال:يهلا ومرحبا تفضلوا معانا! أبواسمهان:احنا جايين نسأل عن عيالنا..وينهم؟؟ السكران:ههههه تلاقيهم في الشارع يفحطوا بالدراجات..روح يابويا ماعندنا عيال! وقفل الباب بوجهم... أبواسمهان:انت شايف اللي أنا شايفه ياأبومجاهد؟؟ أبومجاهد:شايف ياأبومحمد..ماأقول غير يارب عفوك أبواسمهان:تعال نكسر بابهم وندخل نوقفهم عند حدهم! أبومجاهد:أعوذ بالله ياشيخ..لايمكن أسمح لنفسي بدخول أماكن مشبوهة مثل هذي..الله يسترنا دنيا وآخرة..بس تعال نبلغ ادارة الشاليه عنهم.. بلغوا ادارة الشاليه اللي كانوا حريصين على عدم اثارة مشاكل! أبومجاهد:نقول لك عالم سكرانة ويرقصون ويغنون ومعاهم بنات تقول لي مانبي مشاكل؟!! الادارة:إحنا مو مسئولين عن تصرفات الزباين...مادام ماأزعجوا أحد...!!!! ثار أبواسمهان واتصل بولده محمد وخبره محمد بالسالفة!!! أبواسمهان:هذول ناس تعدوا بالضرب على زوج بنتي والحين هو بالمستشفى! الادارة:أكيد هو غلط عليهم وأخذوا حقهم منه! أبواسمهان:ماأقول غير حسبي الله عليكم...ونتقابل معاكم عند الشرطة!! الادارة:نصيحتنا لكم ماتتورطون معاهم بمشاكل هذول أولاد عوائل وتراهم مسنودين!!! أبومجاهد:إذا عيال العوائل يتصرفون كذا أجل اش يسوون عيال الشوارع؟؟ وخرج الاثنين من الادارة وهم بقمة غضبهم ورجعوا لباقي الرِجال وقال أبواسمهان:حياكم الله عندي جميعاً ببيتي نكمل السهرة والعشا هناك.. الرِجال:خير؟اش اللي صار؟ أبواسمهان:مشكلة بيننا وبين راعيين الشاليه والادارة ماتبي تتدخل! وماقالوا لأحد عن سالفة عبدالرحمن!!!! اتصل أبواسمهان على زوجته وقال:ياأم محمد اعزمي الضيوف كلهم على بيتنا هذا الشاليه مايناسب العوائل!! وبالفعل عزمت الجميع...واسمهان مو راضية تروح إلا مع عبدالرحمن!!لكن مايرد على جوالها أبد! استسلمت للأمر ورجعت مع أهلها لبيتهم والقهر ذابحها من تطنيش عبدالرحمن لاتصالاتها!! وأم عبدالرحمن رجعت مع عبدالمجيد لبيت أم اسمهان وهي بقمة الاحراج وتقول:ياجماعة حِنا اللي عزمناكم ماني قادرة أفهم ليش انقلبت العزيمة ببيتكم وأولادي عبدالرحمن وعبدالرحيم مايردون على اتصالاتي!!!
طبعاً طول الجلسة ببيت أهل اسمهان والضيوف كلهم يسولفون ويضحكون ولكن اسمهان بعالم ثاني!! ماسكة جوالها وشغالة رسايل عتاب لعبدالرحمن!!!! بعد انتهاء السهرة وتناول الجميع للعشا..كلن سرى بيته.. وبقيت اسمهان واخواتها يسولفون اسمهان:أنا بأنجن من عبدالرحمن!كيف تاركني كذا من غير سؤال؟ الأم:حتى أنا مستغربة يابنتي إنه ماحضر على العشا! ابتسام:لايكون تهاوش هو وأبوي عشان شباب الشاليه؟؟ سماح:هالحين يجي محمد وكل شي يبان! ======وشوي دخل محمد عند أمه وخواته وزوجته بعد انصراف الضيوف.. وملامحه متغيرة ويتجنب نظرات اسمهان! اسمهان:محمد علمني..زوجي وين طس؟100 اتصال اتصلته ومالقيت رد!! ظل محمد ساكت..والكل يناظر فيه.. الأم:صحيح وينه؟لايكون متهاوش مع أبوك؟؟ اسمهان:إنت ليش تطالعني بنظرات غريبة؟؟محمد علمني اش اللي صاير؟؟ ومحمد سااااااااااكت.. سماح:أف منك يامحمد!ياشينك وإنت تلعب بأعصابنا!وين زوج اسمهان؟؟ محمد(بضيق):بالمستشفى! ارتحتوا؟ اسمهان(وهي مو مصدقة):اش يسوي بالمستشفى؟؟ محمد:متنــــــــــــــوم! اسمهان(بانهيار):ليــــــــــش؟اش اللي جرى له؟ حكى لهم محمد اللي صار... اسمهان(وهي تبكي وتصرخ):وليش تخبون عني؟وكيف ماخليتوني أروح أشوفه؟ماراح أسامحكم! دخل أبوها عليهم وقال:خير يابنتي ليش تبكين؟ اسمهان:معقول يايبه كانت العزيمة عندك أهم من وقفتك مع زوجي؟ الأب:بدل ماتقولين جزاك الله خير يبه إنك قمت بالواجب وماحسست الضيوف بشي؟؟ اسمهان:زوجي أهم من الضيوف هاذيل كلهم..أنا لازم أروح أشوفه الحين!!!!!! الأب:انتي صاحية يابنتي؟زوجك تعبان ويمديه نايم الحين والساعة صارت2 بالليل وأخوه عبدالرحيم مرافق معه..كيف تبين تروحين؟؟ محمد:اجلسي مع البنات واسمري وبكرة نوديك له تزورينه.. اسمهان:ماني سامرة مع أحد خلوني بروحي!!!!!! وطلعت غرفتها اللي كانت تنام فيها قبل زواجها وجلست تتأمل فيها كل شي بالغرفة باقي على حاله..وكل ركن فيها يذكرها بذكرياتها مع عبدالرحمن أيام الخطوبة!!! في هذا المكان كانت تجلس تكلمه...وهناكانت تحط هداياه وفي هذا المكان كانت تجلس وتؤلف أشعار له!! كل شي حولها يذكرها فيه والدموع تنهمر من عينها بغزارة! ======== وبالصالة رجعوا محمد وأبوه للمجلس عند أزواج ابتسام واسماء يكملون حديثهم... أسماء:ياحليلها هالسمهونة آثاريها تحب دحومتها من قلب؟؟ الأم:طبيعي..مو زوجها؟؟؟ أسماء:بس أنا أتذكر قبل 3سنوات لما طلع زوجي للبر مع اخوانه ولعبوا كورة..انكسرت رجله!ولما وصلني الخبر ماحزنت عليه!حزنت على نفسي! ابتسام:عجيب أمرك!زوجك انكسر.. تحزنين على نفسك ليش؟؟ أسماء:لأني أنا اللي بأتوهق في خدمته ياعمري! قعد 3 أسابيع وهو غاثني جيبي وهاتي شيلي وحطي!واشتغلت له نيرس وخدامة لين ماقام على رجوله وافتكيت من طلباته!!! سماح:ههههه دايماً انتي غير الناس!! الأم:ماحد طلع لي من بناتي في تقدير الزوج إلا ابتسام واسمهان! أسماء:تقديرك لأبوي يايمه ماجاء من كيفك!إلا من خوفك منه وعصبيته!!! الأم:يازينك وانتي منطمة وساكتة! ============= ثاني يوم كان الجمعة واسمهان مازار عينها النوم لحظة!! ونزلت قعدت بالصالة..لحالها والبيت كله نايم ماعدا كاتيا الشغالة قاعدة ترتب البيت واسمهان بس تبكي... كاتيا:مدام اسمهان دو يو هاف ابروبليم وذ يور هازبند؟؟ اسمهان:الله يرضى عليك خليني بحالي..مالي خلق أتكلم!!
أم عبدالرحمن مادرت بسالفة ولدها إلا عقب مارجعت للبيت اتصل بها عبدالرحيم وخبَّرها وظلت ساهرة طول الليل تدعي له وتدعي على من ظلم ولدها!!! ======== جلست اسمهان بالصالة تبكي على زوجها ونزلت أمها وقالت:السلام عليكم.. اسمهان:وعليكم السلام.. الأم:خذاني النوم بعد سهرة أمس وماصحيت بدري..وأحس جسمي متكسر بعد ضيوف أمس والقومة والقعدة.. لكن اسمهان ماعلَّقت ظلت تبكي بصمت.. الأم:واضح إنك مانمتي..صح؟ اسمهان:ومن وين بيجيني النوم يايمه وزوجي طايح بالمستشفى ومايندرى عن حاله؟! الأم:ان شاء الله تشوفينه وتتطمنين عليه..أنا بأروح المطبخ أسوي فطور خفيف لي ولك وأكيد ابتسام وبناتها بيصحون الحين يفطرون معانا.. وراحت الأم للمطبخ..وشوي إلا الأب كان نازل من الدرج.. الأب:السلام عليكم ورحمة الله وبركاته.. اسمهان:وعليكم السلام..يبه وين رايح؟؟؟ الأب:رايح لخطبة الجمعة..ليش بغيتي شي؟؟ اسمهان:يبه ودي أروح لزوجي! الأب:بالله هذا وقت مناسب تزورينه فيه؟ان شاء الله العصر أروح أنا وانتي وأخوك!مع السلامة وخرج الأب مستعجل يبي يلحق الخطبة واسمهان تذرف دموعها وتقول بنفسها(من وين يجيني الصبر لين العصر؟؟) ولحظات إلا دق جوال اسمهان وسحبت جوالها بلهفة ترد على بالها عبدالرحمن!!بس طلع المتصل أم زوجها! اسمهان(بلهفة):هلا خالتي شلونك؟جاك خبر عن عبدالرحمن؟ أم عبدالرحمن:ليش؟ أهلك ماقالوا لك؟ اسمهان:اش يقولون لي؟ أم عبدالرحمن:انه متنوم بالمستشفى.. اسمهان:إلا قالوا بس مدري عن أخباره هو زين؟وشلون صايرة صحته؟ أم عبدالرحمن:ان شاء الله إنه مافيه إلا العافية..أنا اتصلت على عبدالرحيم وطمنني انه بخير..بس انتي ماودك تزورينه اليوم؟؟ اسمهان:وشلون ماودي؟إلا ودي بهاللحظة أشوفه!بس مين بيوديني ياحسرة؟أبوي يقول في العصر نروح!! أم عبدالرحمن:أنا بالنسبة لي بأروح الحين.. بيحطني عبدالمجيد عنده ويروح لصلاة الجمعة..تبين أَمُرْ عليك؟؟ اسمهان:ياليت ياخالتي ياليت.. أم عبدالرحمن:أجل تجهزي ودقايق وأكون عندك.. وبالفعل قامت اسمهان وتجهزت ودقايق ووصلت أم عبدالرحمن.. اسمهان:يمه هذي خالتي بتاخذني ونروح للمستشفى أزور زوجي..تغدوا انتوا بالعافية ولاتنتظروني.. الأم:روحي في حفظ الله وسلمي لي عليه.. وراحت اسمهان وبعد أقل من ساعة رجع أبوها وزوج ابتسام ومحمد من صلاة الجمعة.. دخل الأب الصالة وقال:وين اسمهان؟؟ الأم:راحت تزور زوجها.. الأب:ومين وداها؟ الأم:مرت عليها أم زوجها.. الأب:ماشاء الله وتروح من غير ماتستأذن مني؟ الأم:وشلون تستأذن منك وانت في الصلاة؟ماقصرت استأذنت مني أنا وراحت.. الأب:هالبنت شكلها تحبه أكثر مننا! الأم:ماتنلام.. طالعة لي!من يوم ماعرفتك نسيت أهلي كلهم!!!! الأب:ههههههه ورجع للمجلس مع الرِّجال! وحضرت اسماء للغداء عند أهلها وزوجها راح لإخوانه يتغدى معاهم. ========= نرجع لاسمهان اللي ركبت السيارة وقالت بصوت منخفض:السلام عليكم ورحمة الله وبركاته.. وردت أم زوجها السلام.. أم عبدالرحمن:شلونك يابنتي؟وشلون أهلك؟ اسمهان من الحيا تأشر لخالتها إنه ماودها تتكلم قدام عبدالمجيد! أم عبدالرحمن:لا..ماعليك يابنتي..خذي راحتك..عبدالمجيد فديت روحه مايسمع أبد!! وتطمنت اسمهان وخذتها السوالف مع أم زوجها إلى أن وصلوا للمستشفى.. ولما نزلوا صار عبدالمجيد يخاطب أمه بلغة الإشارة إنه بيمر عليها عقب صلاة الجمعة.. لما دخلوا غرفة عبدالرحمن لقيوه قاعد فوق السرير ويصلي الظهر..قامت أمه توضت وصلت هي بعد ..أما اسمهان اللي كانت معذورة عن الصلاة ظلت جالسة على كرسي وتتأمل وجه زوجها بحزن اللي كان وجهه فيه بقع زرقاء ووحدة من عيونه وارمة وفمه بعد والكدمات والرضوض واضحة على ايدينه ورقبته.. وبعد ماانتهى من الصلاة التفت لليمين وقال(بصوت واضح فيه التعب):هلا اسمهان شلونك؟ اسمهان:بخير ياقلبي.. أم عبدالرحمن:أشوف مالاحظت إلا وجود اسمهان بس!خير؟؟ عينك الثانية خرشوها لك؟؟؟؟ عبدالرحمن:هههه هلا يمه هلا.. وسلمت عليه أمه..وبدأوا يسألونه بالتفصيل عن اللي صار وحكى لهم.. الأم:أعوذ بالله..معقول ببلادنا قاعد يصير شي مثل هذا؟؟ عبدالرحمن:يايمه ابليس موجود بكل ديرة..ومايفرق بين عربي وعجمي!! اسمهان:الله ينتقم منهم..هالمجاهرين... أم عبدالرحمن:طيب مااشتكيتهم للشرطة؟؟ عبدالرحمن:من غير ماأشتكي الدكتور أساساً لما شاف حالتي أمس قال لعبدالرحيم انه ضروري المستشفى تتخذ اجراء وتبلغ الشرطة عشان ينعرف سبب الحادث..وبالفعل ماقصروا أخذوا أقوالي ومدري وش سووا! وكملوا سوالفهم وكانت أم عبدالرحمن جايبة غدا معاها في حافظات وجهزت هي واسمهان الغدا وقعدوا الثلاثة يتغدون.. وشوي وجاء عبدالرحيم..ومن ورا الستارة سلم على الجميع وقال:عندي لك أخبار زينة ياعبدالرحمن جاني اتصال قبل شوي من الشرطة..بلغوني فيه إنهم داهموا موقع الشاليه فجر اليوم ولقيوا الشباب بحالة سُكر وأوضاع ماتسر وقبضوا عليهم! وسألوني إن كان ودك تتنازل عن حقك أو لا؟ أم عبدالرحمن:ايش اللي يتنازل؟الا هذول حقهم ينرمون بالسجون سنة على الأقل!زين ماكانوا شايلين معاهم سكاكين والا كان ذبحوا أخوك!! عبدالرحيم:تصدقون انه بعضهم مسنود ومن عوائل معروفة بس الشرطة يقولون انها مو أول قضية يمسكونهم فيها عشان كذا هالمرة لابستهم القضية لابستهم! عبدالرحمن:الحمدلله.. أم عبدالرحمن:أسألك يارب في هذا اليوم الفضيل إنك تنتقم منهم أو تهديهم وتردهم لأهاليهم تايبين عبدالرحمن:جزاك الله خير يمه.. عبدالرحيم:يمه أنا وعبدالمجيد بنروح مطعم قريب من هنا نتغدى فيه..لو احتجتينا اتصلي.. أم عبدالرحمن:ان شاء الله.. واستمر الوقت بالسوالف.. أم عبدالرحمن:شوف ياعبدالرحمن هذي الشنطة فيها غيارات وهدوم لك وكل شي تحتاجه بأخليها لك في الدولاب.. اسمهان:أنا في خاطري أرافق مع عبدالرحمن اليوم ياخالتي.. أم عبدالرحمن:ليش يابنتي؟عبدالرحيم مابيقصر! عبدالرحمن:اسمهان صادقة يمه..وترى عبدالرحيم عنده بكرة عمل في النهار..خليه اليوم يرجع البيت يرتاح.. أم عبدالرحمن:مثل ماتبين..بس مالك هنا أغراض.. اسمهان:ماعليك ..أهلي جايين يزورون عبدالرحمن في العصر بأقول لهم يجيبون لي أغراضي.. وشوي وراحت أم عبدالرحمن بيتها وبقيت اسمهان مع عبدالرحمن.. قام عبدالرحمن يتأملها وهي تناظر بالأرض... عبدالرحمن:صارحيني! قلقتي علي؟؟ اسمهان:إلا حقدت عليك بصراحة!دقيت عليك مية مرة ومارديت وأرسلت لك مية رسالة وماعبرتني ومادريت بسالفتك إلا آخر الليل ماحد علمني من وقتها.. عبدالرحمن:مو عبدالرحيم أخذ جوالي وحطه على الصامت عشان مايزعجني أحد..بس سمهونتي تخيلي لو إني مت!! اسمهان(بانفعال):أعوذ بالله بعيدالشر عنك!عساها بقلب اللي يكرهونك! عبدالرحمن:ههههه ليش؟لهاالدرجة أنا غالي؟؟؟ اسمهان:مايحتاج تسأل إنت عارف! ومضى الوقت بسوالف واسترجاع ذكريات ماضية.. اسمهان:تدري يادحوم طيحتك هذي بإيش تذكرني؟؟ عبدالرحمن:لا..بإيش؟؟ اسمهان:بروحتنا للعمرة,,لما ضربك المكيف وتعب ظهرك وصرت تصلي وانت قاعد...هههههه عبدالرحمن:هههه وأنا كل ماتذكرت منظرك وانتي مادة راجلك للأندونيسية تمرخها قدام خليقة الله في المسعى ينتابني ضحك وأقول هالبنت مو صاحية! اسمهان:هههه ولا ضياعي التاريخي ذاك اليوم يوم رحت الحرم لحالي..وخليتك بالفندق! عبدالرحمن:ليش انتي ضعتي؟؟مو تقولين كنتي في السوق تتسوقين؟؟ اسمهان:هاه؟؟ ============ وفي العصر بدأت الزيارات تتوالى على عبدالرحمن..كل الضيوف اللي كان عازمهم الليلة السابقة جوا زاروه وجت أم اسمهان تزوره بعد وبعدين رجعت للبيت ولما الغرفة صارت مليانة ضيوف خرجت اسمهان وجاء في بالها تروح لحضانة المواليد! ومن خلف الشباك الزجاجي ظلت اسمهان تراقب المواليد بأجسامهم الصغيرة وهي مبتسمة وعيونها غرقانة دموع.. انتبهت لها الممرضة وخرجت تسألها:مدام..اش اسم بيبي إنتَ؟ اسمهان(بحزن):أنا ماعندي بيبي بس حبيت أتفرج عليهم.. الممرضة:مئليش مدام ممنوء وقوف هنا!!!! وتركتهم اسمهان بحسرة.. وخطر في بالها تتسلى بزيارة المرضى لين مايروحون الرِجال من عند عبدالرحمن وراحت اشترت مجموعة ورود كل وردة مغلفة لحالها.. وراحت لقسم الأطفال..دقت باب غرفة من الغرف..وكانت المريضة طفلة صغيرة عمرها6سنوات وأمها مرافقة معاها.. سمحت الأم لها بالدخول.. اسمهان:أنا جاية أزور المرضى وأدعي لهم بالشفاء.. أم الطفلة:جزاك الله خير..تفضلي البنت الصغيرة غطت وجهها بشرشف وقالت:ماما هاتي قبعتي!! ناولتها أمها القبعة ولبستها البنت على راسها وبعدين كشفت الشرشف عن وجهها! اسمهان:اش اسمك ياقمورة؟ الطفلة:دانية.. اسمهان:وكم عمرك ياترى؟ الطفلة:ستة سنين. اسمهان:ماشاء الله..قد بنات إختي اسمهان تخاطب الأم:سلامتها..اشفيها؟؟ أم الطفلة:بعيدالشر عنا وعنك عندها المرض الخبيث(السرطان) وحالياً تتعالج بالكيماوي.. وخفضت الأم صوتها وكملت كلامها:ماتشوفينها يوم شافتك غطت وجهها بشرشف ولبست قبعة؟؟ماتبي أحد يشوفها من دون شعر!شعرها طاح كله مع العلاج!!
تكملة ياحلوين(جزء المستشفى).. وفي غرفة الطفلة(دانية)مريضة السرطان.. ظلت اسمهان تراقب حركات الطفلة البريئة وهي تلعب بعروستها وتضحك.. واسمهان حزينة..فدعت للبنت بالشفاء واستأذنت من الأم انها تطلع.. ولما جت خارجة.. الطفلة دانية:ياأبلة..ياأبلة..ممكن تاخذي شوكولاتة عشان خاطري؟؟ ابتسمت اسمهان وقالت:ممكن ياقمر.. الطفلة دانية:عروستي تقول انك مرة حلوة ممكن تبوسيها؟؟ اسمهان:أكيد ممكن.. وباست البنت وعروستها وقالت للأم:الله يحفظ لك بنتك.. وغطت اسمهان وجهها وخرجت من الغرفة تبكي!! وبعد ماكفكفت دموعها..فكرت تدخل غرفة ثانية يمكن تلاقي شي يشرح صدرها.. دقت الباب وجاوبها صوت منهك:تفضل! دخلت اسمهان وتفاجئت بصوت طفل يأن من الألم وأمه جالسة جنبه على كرسي وآثار السهر والاجهاد واضحة عليها.. اسمهان:مرحبا..أنا زائرة وجاية أزور مريضكم وأدعي له بالشفاء.. أم الولد:جزاك الله خير..تفضلي.. جلست اسمهان وصبت لها الحرمة قهوة وارتشفتها اسمهان بهدوء وسألت:سلامته ولدك..من ايش يشتكي؟؟ أم الولد:له ثلاثة أيام من يوم سوى عملية الاستئصال بس شوفة عينك مازال يأن ويتألم.. اسمهان:عملية استئصال الزايدة؟؟ أم الولد:لا...عملية بتر الساق واستئصال الأجزاء المتعفنة!!!!! شرقت اسمهان بالقهوة وصارت تكح.. اسمهان:ليش؟اش صار معاه بالضبط؟ أم الولد:والله يابنت الحلال إحنا عائلة عندهم تاريخ وراثي لمرض السكر..بس دلالي الزايد لولدي خلى المشكلة تزيد خصوصاً انه أول طفل أجيبه عقب 9سنوات من عدم الانجاب!! اسمهان:سبحان الله!9سنوات ماأنجبتي؟؟ أم الولد:مو هذي هي المشكلة..المشكلة كانت في دلالي الزايد له..كل شي يبيه أجيبه له وكان يبالغ في أكل الوجبات السريعة والحلويات لين مااكتشفنا انه يعاني من ارتفاع في السكر وبدأنا نسوي له حمية ونعطيه إبر يومياً..لكن هذا طفل ومو سهل السيطرة عليه..إن قدرت أضبطه في البيت ماقدرت عليه وهو بالمدرسة وغايب عني ومدري اش ياكل ظل السكري في ارتفاع والولد كل يوم والثاني تجرح ساقه من لعب الكورة وخبرك بمريض السكر ماتتخثر جروحه بسرعة ويظل ينزف ولاتلوث الجرح يتعرض لغرغرينا وتعفن وهذا اللي صار لدرجة انه الحل الوحيد كان بتر نصف الساق.. وقامت الأم وكشفت اللحاف عن الولد وقالت:شوفي.. غطت اسمهان عينها من الخرعة كان الولد بنصف ساق والعملية مغطاة بضمادات وشاش... حست اسمهان بـ غصة وخرجت من عند الأم وهي تدعي لولدها بالشفاء ======== بعد بحر الدموع اللي سكبته اسمهان قررت انها تنظر للحياة بتفاؤل وتروح قسم الولادة وتزور أي حرمة والدة وتستمتع بشوفة المواليد.. وبالفعل وصلت لغرفة وطقت الباب.. المرافقة اللي مع أختها الوالدة:نعم؟ دخلت اسمهان وبكل أدب قالت:تسمحولي أدخل؟أنا زايرة وجاية أبارك.. الحرمة الوالدة:ياهلا فيك تفضلي.. أما المرافقة اللي تصير أخت الحرمة الوالدة صارت تطالع بنظرات شكك لاسمهان!!! اسمهان:مبروك..ماشاء الله اش جبتي؟ وكانت الوالدة ماسكة ولدها وهوبحضنها:وقالت جبت ولد.. اسمهان:واش سميتوه؟؟ الوالدة:لؤي.. المرافقة:وانتي متعودة دايماً تزورين المرضى؟؟ اسمهان:لا هذي أول مرة.. وبدأت المرافقة تسأل اسمهان أسئلة ماتريح!وحست اسمهان انها بمكان غير مناسب واستأذنت تطلع.. وهي خارجة من الغرفة الكبيرة كان في سيب بنفس الغرفة بنهايته الحمام دخلت اسمهان تغسل يدها اللي تدبقت بالتمر وتطلع.. فظنوها الحرمتين انها خرجت خلاص.. المرافقة:والله هالأشكال مايريحون أبد! الوالدة:حرام عليك دخلت باركت وخرجت ماسبب لنا أي أذى.. المرافقة:لأنه من حظك يالشاطرة إني مرافقة معاك!تخيلي لو ماني فيه كان سرقت ولدك وهربت!كنتي بتقدرين تلحقينها وتجرين وراها؟؟؟ الوالدة:يمه منك خوفتيني..صحيح الدنيا مافيها أمان! سمعت اسمهان حوارهم كامل وطلعت من الحمام وناظرت فيهم نظرة لها معنى وخرجت من غير ماتتكلم بكلمة!من القهر والصدمة!!! الوالدة:يافشلة!اثاريها سمعتنا!! المرافقة:ومن وين طلعت هذي؟على بالي خرجت خلاص!! =========== ضاق صدر اسمهان وفكرت ترجع لعبدالرحمن..واتصلت به ولقيت ان ضيوفه كلهم راحوا..ودخلت عنده وحكت له عن كل شي صار لها ماعدا حكاية الحرمتين!!!
لما رجعت اسمهان للغرفة ودخلت عند عبدالرحمن وبعد التحية والسلام.. سألها عبدالرحمن:ماشاء الله وين كنتي هالوقت كله؟؟ حكت له اسمهان عن كل شي.. وقالت:ماتتخيل ياعبدالرحمن شوفة المرضى ومعاناتهم على سرير المرض قدر إيش صعبة!آثاريني بغفلة كبيرة!أنا لوقعدت يوم بالبيت وحسيت بزهق...صار عندي احساس بإنها نهاية العالم! عبدالرحمن:طبعاً إحنا بغفلة عيادة المرضى واجبة في الدين الاسلامي لأنه لها فوائد كثييييرة تفيد المريض في إنه يحس بالفرحة في اهتمام من حوله فيه +ادخال السرور والبهجة على قلبه+التخفيف من معاناته وتفيد الشخص الزائر بإنها تذكره بنعمة الصحة اللي ربي أنعمها عليه فيجتهد انه يشكر الله ويحمده عليها..وترقق قلب الواحد على اخوانه المسلمين ويتذكرهم بدعاءه.. قامت اسمهان تبكي!! عبدالرحمن:سمهونتي؟عسى ماشر؟تأثرتي بكلامي؟؟ وماردت اسمهان استمرت تبكي.. عبدالرحمن:وبعدين يعني؟إنتي جاية المستشفى تونسيني وتنسيني أوجاعي..ولاتضيقين خاطري بدموعك؟؟؟ اسمهان:لا ..انت مادريت اش صار لي مع الحرمة الوالدة يوم رحت أزورها!! عبدالرحمن:ماشاء الله انتي وصلتي لقسم النساء والولادة؟؟على بالي رحتي لقسم الأطفال بس! وقامت اسمهان تحكي له عن كلام الحرمتين عنها وعن شكهم في نيتها لزيارتهم... عبدالرحمن:شوفي يازوجتي العزيزة طالما إنك قمتي بواجبك وسويتي اللي عليك فلايهمك أحد!خل اللي يتكلم يتكلم والرسول اش قال؟؟؟قالإنما الأعمال بالنيات وإنما لكل امريءٍ مانوى) والله عالم بنيات خلقه..وبيني وبينك الجماعة ماينلامون ترى كثير من الجرايم صارت تتم ورى مسمى فعل الخير!!!! اسمهان:شلون يعني؟ عبدالرحمن:يعني فعلاً حصل انه صارت جرايم اختطاف مواليد بالمستشفيات عن طريق زيارة امرأة مجهولة لغرفة وحدة من الوالدات وهي مستترة ورا فعل الخير وأداء الواجب!وبعد لحظات تخطف الطفل وتطلع ولايبان لها أثر!وغير كذا من حقهم الناس يشكون لأنه زماننا هذا صار زمان عجيب وفعل الخير صار شبه نادر عند البعض!يعني مين يجي في باله بهالوقت انه يروح لمرضى مايعرفهم عشان يواسيهم ويخفف عنهم؟!!بس ماأقول غير الله يجزاك خير إنك فكرتي بغيرك ودعيتي لهم بالشفاء.. وفجأة دق باب الغرفة.. عبدالرحمن:تفضل... وقامت اسمهان تغطي وجهها وراحت ورى الستارة.. وكانت الزائرة الخالة جوهرة ومعاها زوجها.. سلمت على عبدالرحمن وتحمدت له على السلامة وسولفت معاه شوي بعدين انتقلت للطرف الثاني من الغرفة وجلست تدردش شوي مع اسمهان.. وكانت زيارتها مختصرة وخرجت هي وزوجها.. وثواني إلا جاء لعبدالرحمن اتصال من تركي اللي وصلته الأخبار عن طريق أخته سماح.. بعد انهاء المكالمة قال عبدالرحمن:الله يعينك يااسمهان راح تنطردين من الغرفة مرة ثانية! اسمهان:ليش؟؟ عبدالرحمن:تركي وناصر بيجون يزوروني الحين.. اسمهان:ماني طالعة لو تنهبل!زهقت..تدري ؟بأحبس نفسي بالحمام!!! عبدالرحمن:ياسلام..وافرضي أحد منهم احتاج الحمام؟وش السوات؟ اسمهان:زين الله يعين..بأطلع أتجول لين ماينتهون واتصل فيني علمني لاطلعوا!! خرجت اسمهان وصارت تفتر بالمستشفى مو عارفة وين تروح! وفكرت لو تجلس تحت بقسم انتظار النساء تتسمع بكلامهم! دخلت قسم الانتظار ولقيت الغرفة مزحومة وسمعت وحدة تقول للثانية:انتي موعدك عند دكتورة مها؟؟ الثانية:لا عند دكتورة فايزة.. الأولى:سلامات..اش فيك؟ الثانية:مدري عندي الام شديدة بصدري و الدكتورة سبق و سوت لي فحوصات واليوم بأستلم النتيجة..احتمال يكون عندي ورم!! الأولى: قولي خير ياشيخة..ان شاء الله مافيك الا العافية..وحدة من زميلاتي كان يجيها الام بصدرها وطلعت السالفة انه عندها خُرَّاج وعملية موضعية بسيطة وشالوه لها! قامت اسمهان من جنبهم وقعدت جنب غيرهم..لقيت حرمتين يسولفون.. الأولى:تعبت تعبت من المستشفيات والدكاترة كل يوم وأنا عندهم مابقى شي ماسويته ومابقى قرش إلا وصرفته كله عشان أحمل بس ماانكتب لي نصيب... الثانية:طيب مافكرتي تسوين طفل أنابيب؟ الأولى:سويتها مرتين وفشلت! الثانية:مالك الا الصبر والله يكون بعونك.. الأولى:كل ماصبرت..لقيت أم زوجي لي بالمرصاد!تصدقين ودها تخطب لزوجي؟؟بس هو مو راضي!! الثانية:يووه الله يكفيك شرها! تضايقت اسمهان من السواليف..وكانت بتقوم بس الحرمة اللي قاعدة جنبها من الجهة الثانية قالت لها:انتي موعدك عند أي دكتورة؟؟ ماعرفت اسمهان بإيش ترد وقالت:اااا عند دكتورة فايزة!! الحرمة:ليش ياساتر؟انتي وشفيك بالضبط؟؟ اسمهان:لو كنت أدري كان علمتك!بس اليوم بتطلع نتيجة الفحوصات!عن إذنك!! وطلعت اسمهان من الغرفة وهي متضايقة من السواليف اللي قاعدة تسمعها! وصارت تتمشى بالأسياب ولقيت لوحة معروض عليها صور الدكاترة اللي بالمستشفى وتخصصاتهم وطاح عينها على اسم الدكتورة فايزةولقيت هالعبارة مكتوبة: د.فايزة:تخصص علاج الأورام وسرطانات الثدي!! اسمهان:أعوذ بالله..ياشين الكذب يااسمهان!! ============ وفي غرفة عبدالرحمن دخل ناصر وتركي عليه..وناصر شايل باقة ورد وتركي شايل سبت شوكولا.. ناصر:ياهلا بالدحمي حبيب قلبي!ياهلا باللي انضرب واندبغ! عبدالرحمن:ههه خوش ترحيب يانصور.. تركي:السلام عليكم..شلونك ياعبدالرحمن...وسلم عليه.. ناصر:جبت لك الورد عشان تشمه وتقوم بالعافية يامال العافية!!وتركي مسوي نفسه كشخة جايب شوكليت بقيمة فاتورة الجوال!! تركي:وش عليك يالقعيطي؟دافع من جيبك شي؟؟ ناصر:لا من جد ودي أشوف هذا اللي اخترع سالفة الورد والشوكليت للمريض وأكفخه!بالله المريض لاطاح بفراشه واش يبي بالشوكليت؟؟المريض محتاج ياكل لحم ومرق يرم عظمه!!أنا أقول لو يخترعون سبتات فخمة ويحطون داخلها كبدة وكرش ويغلفونها نهديها للمرضى أفضل!!! تركي:أنا قاري من قبل انه فكرة اهداء المريض نباتات وورد نابعة من فايدة مهمة وهي انه النباتات تمتص ثاني أكسيد الكربون من الجو وتعطي الأكسجين وهذا سبب في تعقيم غرفة المريض وتنقية أجواء الغرفة .. عبدالرحمن:ومنكم نستفيد.. ناصر:فديتك أنا وفديت هالخرايط اللي صايرة بوجهك الله الله وش هالكشخة وش هالزين شي أحمر وشي أزرق وشي بنفسجي! بالله ياتركي تصورني أنا وياه بجوالي!! تركي:أقول يامثبت العقل والدين! انت ناسي نفسك يوم تقلبت بالدباب؟ياوجهك شلون كان صاير تقول مفحط به على اسفلت؟!!! عبدالرحمن:هههههههه..الله لايحرمني من سواليفكم الماصخة! ملحوظة:
لما رجعت اسمهان لغرفة عبدالرحمن في المستشفى كان مبسوط ويضحك..سألته عن السر قعد يحكي لها عن كل سواليف ناصر وعن مقالبه فيهم أيام العزوبية!! اسمهان:ههههههه تصدق ناصر هذا يذكرني بـ مين؟؟ عبدالرحمن:بــ مين؟ اسمهان:بصديقتي رانية!ياحبها للمزح والتريقة..بس الله يسعدها تونس الصدر.. وقامت اسمهان تاكل شوكليت..بشراهة!!!!!!! اسمهان:اش هذا كله يادحوم؟ شكلنا بنفتح محل شوكليت! عبدالرحمن:بالله انتبهي لنفسك!ماصدقنا وزنك ينقص!! واستمرت السواليف..لين ماجاء وقت النوم.. دخلت الممرضة وبما انه عبدالرحمن تعبان من الألم اللي بإيديه ومايقدر يرفعها..قامت الممرضة بتناوله الحبوب في فمه!!!!!!!!! وتجيكم اسمهان طايرة من بعيد! وتسحب الدواء من يد الممرضة وتقول:هيه يالحبيبة!تلقمين المريض الدوا بـ فمه هذاك في الفلبين ياحلوة!هنا ..إحنا موجودين والله لايحوج رجالنا لكم!!! وأخذت الحبوب وحطتها بـفم عبدالرحمن وشربته الدوا! ويوم خرجت الممرضة قال عبدالرحمن:كفو والله باسمهان بنت الرِجال!!!! اسمهان:وش عقبه يالفاغر؟كنت بتفتح فمك لولا إني لحقتك بآخر لحظة!!!!!! ============= مرت الأيام وخرج عبدالرحمن من المستشفى وسووا أهله عزيمة له وعزموا كل معارفهم وأقاربهم.. وقبل المدارس بيومين كان عبدالرحمن له مراجعة بالمستشفى واسمهان قاعدة بالبيت تكوي ملابس... اتصلت عليها سماح وبعد السلام والتحية.. سماح:سوسو؟انتي في البيت؟ اسمهان:ايه بالبيت.. سماح:أنا كنت بالمستشفى قبل شوي كان عندي موعد متابعة حمل وتوي طالعة من المستشفى فكرت لو أمر أسلم عليك أنا ومحمد..اش رايك؟؟ اسمهان:ياهلا فيكم..أنتظركم.. وبعد أقل من ساعة كانوا محمد وسماح عندها.. وبعد السواليف المعتادة والسؤال عن عبدالرحمن... اسمهان:هاه بشري هالحين صرتي بأي شهر؟ سماح:في بداية السابع.. اسمهان:وماعرفتي اش ببطنك؟؟ محمد:ماكان واضح .بس اليوم قالت لنا الدكتورة إنها بنية!!عاد اجتهدي وجهزي الهدية من هاالحين! اسمهان:من عيوني! محمد:لأني معزم أسميها اسمهان رضت سماح ولا انرضت!..البنت اسمهان يعني اسمهان!!!!! سماح:أفا عليك ياحمود..أساساً لو إنت ماتبي تسميها اسمهان كان أصريت أنا أسميها..وياليت لو تطلع بجمال اسمهان وحلاوتها وبرائتها! محمد:لا مادامك أمها أكيد بتطلع عليك!! سماح:بدينا في السماجة؟؟ سوسو ترى سر زيارتنا غير اننا نبي نشوفك كان ودي أسألك سؤال!! اسمهان:تفضلي.. سماح:صديقتك رانية مخطوبة.أو محجوزة لأحد؟؟ اسمهان:لا..ليش؟؟ سماح:الصراحة أمي ودها تخطبها لناصر ولد عمي! اسمهان:هههههههههههههه ههههههههههههه سماح:واشفيك؟قلت شي يضحك؟ اسمهان:لا بس الصراحة عرفتوا تختارون!وافق شنٌ طبقة!! عساها بس توافق! سماح:وش دعوى ماتوافق؟ناصر وإن كان راعي دجة ولجة بس تراه انسان طيب.. محمد:صادقة سماح..هو صدق منَّسِم شوي!لكنه رقيق مثل هب النسيم!! وبعد السوالف عطتهم اسمهان الرقم... اسمهان:بس ترى أنا ماراح ألمح لها بالموضوع ودي أشوف ردة فعلها بعد ماتخطبون!!انتوا متى ودكم تتقدمون؟؟ سماح:لسه.. بداية الدراسة نتصل على الأم..وإن رحبت فينا حددنا يوم ورحنا لهم! ============ وكلها يومين وجاء أول يوم بالترم الثاني... اجتمعوا الشلة بشوق يتبادلون أخبار الاجازة.. وكانوا(اسمهان+نجلاء+أفنان+مرام) ورانية لسه ماجت... مرام:العادة رانية أول وحدة تداوم وينها اليوم ماجت؟؟ماحد فيكم اتصل عليها أمس؟ الشلة:لا... نجلاء:تلاقينها زادت بعد الريجيم أضعاف وزنها ومفتشلة نشوفها!! اسمهان:مع إنها كلمتني بالإجازة وقالت إنها مازالت مستمرة! أفنان:ياحليلها..يمديها تمزح معك! وشوي وهم واقفين بالسيب يتكلمون..كان فيه شلة واقفة يسولفون ومعاهم بنت جديدة ومعطيتهم قفاها..والشلة أول مرة يشوفونها.. أفنان:شايفين البنت اللي واقفة تضحك هناك؟؟ مرام:ايه قصة شعرها خقاااااااق! اسمهان:الصبغة كلاااااام! نجلاء:أقول يازين الرشاقة..حتى المريول طالع عليها أنيق..بس تهقون هذي أولى ثانوي؟؟ أفنان:لو إنها أول ثانوي ماكان قعدت تسولف مع الشلة اللي بـ صفنا!يمكن منقولة جديد من مدرسة ثانية! اسمهان:بس شكلها وهي تسولف كأنها تعرفهم من زمان.. وفجأة استدارت البنت وتقدمت بخطواتها تجاه الشلة وشعرها القصير الهفهاف الناعم مغطي نص وجهها!!! واستغربوا الشلة وصاروا يقولون:هذي وش تبي فينا؟؟؟ أفنان:شكلها اجتماعية يمكن ودها تكسب صداقات! وأول ماقربت منهم رفعت قصتها عن وجهها وقالت:هااااي شلة!! الشلة وهم فاتحين أفمامهم من الدهشة:راااااااااااانية؟؟؟؟؟؟؟؟؟؟
بعد ما الشلة فتحوا أفمامهم من الدهشة وقالوا بصوت واحد:راااااااااااااااااانية؟؟؟؟؟؟؟؟! رانية وهي ترفع قُصتها عن جبينها بدلع:عشتوا! ايه رانية..ماعرفتوني؟ أفنان:ماشاء الله تبارك الله شكلك اختلف 180 درجة! رانية:لـ للأسوأ ولا للأحسن؟ نجلاء:للأحسن طبعاً..مايبيلها سؤال..إش إش..وش هالزين كله؟وإحنا لنا ساعة نتغزل من بعيد على بالنا طالبة جديدة!!!! مرام:لا من جِد رنو ياقلبي شكلك صار وااااااو! اسمهان:يابنت لايكون شاركتي ببرنامج التغيير الجذري وإحنا ماندري؟الصراحة؟أغبطك على هالإصرار والتحدي!بس كم صار لك مسوية ريجيم؟؟ أفنان:وكم كيلو نزل وزنك؟ رانية:لي شهر ونص من قبل الامتحانات وواصلت المسيرة بالإجازة ومسكت نفسي..ولليوم صرت نازلة 14 كيلو.. نجلاء:بس لاإله إلا الله يارانية من شافك ظن إنه نزل منك شخص ثاني!!! الشلة:هههههههههههههه مرام:طيب اش شعورك بعد الرشاقة؟ رانية:الصراحة صرت أحس نفسي خفيفة مثل العصفور لدرجة إني يوم أمشي أحس إني من الخفة صرت أفقد التوازن ولاجيت بأرقص أحس الأرض ثابتة من تحتي ماتتفاعل معي مثل قبل!!!زمان كنت كل مارقصت أحس الأرض تفرح وتهتز تحتي!! اسمهان:إلا تبكي وتنتفض من ثقل ما شالت!!!هههههه مرام:صراحة أحسنتي في اختيار قصة الشعر من جد روووووعة! نجلاء:ياولد ياحركات ولابسة عدسات بعد!! اسمهان:والصبغة مرة حلوة ومناسبة كثير للون بشرتك.. مرام:حواجبك خطيييييييييييرة! رانية:ثانك يو! أفنان:بس ماهقيتها منك يارانية تنمصين حجاجك! رانية:حرام عليك..أنا مو نامصة حواجبي أنا مشقرتها...وبعدين راسمتها بالقلم.. اسمهان:بس ياحلوة حتى التشقير اللجنة الدائمة للإفتاء أصدرت فتوى تحرم حتى التشقير! نجلاء:والله احترنا..فتاوى تقول حلال وفتاوى تقول حرام.. أفنان:بس ياحلوات كثير من الشيوخ اللي أفتوا بالجواز تراجعوا عن فتواهم..لما تبين لهم الوضع.. اسمهان:فعلاً..الشيوخ اللي أجازوا التشقير في البداية توقعوا انه المسألة تغيير لون الحاجب فقط مثل صبغ الشعر!بس لما صاروا المستفتيات يوضحون للشيوخ انه النتيجة النهائية مشابهة للنمص تماماً بالإضافة للأضرار اللي يسويها التشقير للعين مع الوقت ..فتم تحريمه...لأن العلة في التحريم هي تغيير خلقة الله ومايخفى عليكم التغيير الرهيب اللي يضفيه التشقير للملامح! أفنان:وبيني وبينكم التشقير تدرج للوقوع في اللي أكبر منه!اليوم تشقرين وبكرة شعر الحاجب يقسى ويخشن ويصير شكله أكثر فتضطر الوحدة تخففه أو تقصه وتدخل في مسألة اللعن!! نجلاء:الصراحة..(دع مايريبك إلى مالا يريبك).. رانية:ومنكم نستفيد..بس ترى ماكنت أدري عن الكلام اللي تقولونه على بالي حلال مية بالمية!! مرام:لا بس حقيقي يارانية عيني عليك باردة ماشاء الله شكلك راااائع.. رانية:ياناس ماأقدر أنا على كذا!طايحين فيني تغزل من الصبح! واسمهان بينها وبين نفسها تقول:أما ناصر لو يشوفها بالشكل الجديد بيطيح عندها!!! ==================== وفي الظهر رجع تركي من العمل وبعده بشوي جاء ناصر يتغدى معاه.. دخلت أم تركي وقعدت معاهم(على فكرة أم تركي من القواعد من النساء اللاتي لايرجون نكاحاً..فمباح لها الظهور أمام ناصر من غير زينة)... أم تركي:أقول ياناصر؟ ناصر:سمي ياعمتي... أم تركي:أشوف الأيام قاعدة تضيع وإنت موب جايب طاري لموضوع الخطبة!خير؟؟اش السالفة؟؟لايكون هوَنْت؟؟؟ ناصر:لا ماهونت..وان شاء الله زواجي بيكون مع تركي بعد طوايفي بنفس الليلة! تركي:عز الله بأشيب وأنا قاعد أنتظرك يالخرَّاط!! ناصر:لا أنا جاد..بس الله يهديك ياعمة انتي ماسألتيني وشهي مواصفات زوجة المستقبل؟؟؟ أم تركي:اطربني..غَرِد! ناصر:أبيها بنتٍ عيطبول .. وغير إبشر ماتقول! ورعبوبةٍ خرعبة وخلوقةٍ مؤدبة!!! وشنباء عرْهرةَ..ماتحب مباهاة وفشخرة!!! وسلهبة هنَّانة موب خدبجة وَهْنانة! وشَمُوعٍ عروبٍ رصوف موب برمادة ضايعة الوصوف!!!! تركي:وإنت عاد من زينك يوم قاعد تتشرط؟!! ناصر:وليش ماأتشرط؟هذي وحدة بأعيش معاها مؤبد وبأدفع فيها دم قلبي إن ماكانت على الهوى فخلها تاكل هوا!! أم تركي:بس هذي اللي قلت مواصفاتها تراني أبشرك إنها باقي ماانخلق مثلها على وجه الأرض! وإن كان فيك خير اتقي ربك وصوم و صل وبتلقاها في الجنة تضحك مع الحور العين!!!! ناصر:اشفيكم قمتوا علي؟هذا وأنا اختصرت كثير من المواصفات!أجل تدرون؟مدام طلبي موب عندكم فـ يازين العزوبية زيناه! أم تركي:تراك لعَّاب يانويصر!وموب على كيفك تقول تم..وترجع بكلامك والبنت بأكلم أهلها هالأسبوع وأشوف وش بيقولون! تركي:ولايكثر هرجك..ترى الوالدة ذوقها حلو ومابتختار لك إلا اللي يرضيك!!! ناصر:الحمدلله إنه في شي اسمه نظرة شرعية!! =============== واليوم الثاني اتصلت أم تركي على أم رانية وقالت:سمعنا عنكم كثير وودنا نجي ونتعرف عليكم! من غير ماتجيب طاري الخطبة ورحبت بها أم رانية.. وراحت أم تركي هي وسماح يوم الثلاثاء.... وأم رانية طلبت من بنتها تجي تساعدها في تقديم الشاي والقهوة..عشان فيه ضيوف جايين ظنت رانية انهم صديقات أمها!! ولما وصلوا دخلت عليهم وسلمت وتفاجئت!!!!! وحست انه الموضوع فيه خطبة...وجلست.. أم تركي:إلا ياوخيتي..وينها بنتك رانية؟؟ سماح تأشر لأمها وأم تركي مو فاهمة!! أم رانية:ههههه هذي بنتي رانية.. أم تركي:لا ماهي بهذي أنا أقصد ذيك الدبة خفيفة الدم!! أم رانية:ههههه يابنت الحلال أنا ماعندي إلا ولدين وبنتين رانية الكبيرة وروان بصف أول ابتدائي وهي آخر العنقود...بس يمكن شكلها اختلف عليك يوم نحفت شوي!! قامت أم تركي فتحت الشنطة ولبست نظارتها ونادت رانية:تعالي فديتك.. جات رانية وهي تضحك.. وقامت أم تركي تتمقل في وجهها زين..وبعد دقايق قالت:إلا والله إنها هي !!!! سماح وأم رانية:هههههههه رانية:الحمدلله ياخالتي..يعني طلعنا براءة!! أم تركي:بس يابنتي تغيرتي..وش نَحَتِك كذا؟؟؟ رانية:عاد حركات بنات..حبيت أسوي نيولوك!! أم تركي:وش يطلع ذا؟؟ سماح:ههه يمه تقصد مظهر جديد أم تركي:والله إنك كذا صرتي مثل القمر..وش تبين يابنتي بكثر اللحم؟يازين الرشاقة والخفة.. وخرجت رانية من الغرفة تبي تجيب القهوة..وفتحت أم تركي موضوع الخطبة وعطت أم رانية نبذة عن ناصر.. وأثناء رجعة رانية للغرفة سمعت أطراف الحكي ووقفت تتسمع عند الباب..وانبسطت جداً!!!! وقالت بنفسها:اعقبي يااسمهانوه!آثاريني مادخلت مزاجك إلا عقب مانحفت؟!! لذي الدرجة كنت بعينك شينة؟؟ وبعد انتهاء الزيارة..قالت أم رانية:الصراحة بنتي لسه صغيرة وماأقدر أوعدكم بشي.. أم تركي:يابنت الحلال بناتنا صغار بعيوننا حتى وإن كبروا وحِنَّا لو نطاوع أنفسنا ماكان زوجناهم لليوم!! ============= ملحوظة: معاني الكلمات:عيطبول:المرأة طويلة العنق.. رعبوبة:البيضاء اللون الرطبة.. شنباء:رقيقة الأسنان في حسن واستواء.. خرعبة:حسنة القد لينة العصب.. خدبجة:السمينة الممتلئة الذراعين والساقين برمادة:سمينة ترتج من سمنتها.. وهنانة:التي بها فتور عندما تقوم من السمنة عرهرة:عظيمة الخلق مع جمال شموع:لعوب ضحوك هنانة:الضاحكة خفيفة الظل سهلبة:خفيفة اللحم..
طبعاً رانية حست من كلام أمها مع أم تركي إنها مو موافقة على مبدأ الزواج وبغت رانية تنجلط!! وبعد ماراحت سماح وأمها قامت رانية تستهبل! رانية:يمه؟غريبة زارونا هالضيوف!وش يبون؟؟ أم رانية:جايين يخطبون! رانية(بـ تغابي):يخطبون مين؟؟! أم رانية:يخطبون أختك روان لولدهم!! رانية:يمه روان بصف أول ابتدائي! أم رانية:أقول كافي استهبال!يخطبونك ياالفهيمة! رانية:وانتي اش كان ردك؟؟ أم رانية:طبعاً ماني موافقة! رانية:ليش يمه؟؟ أم رانية:وتقولين ليش بعد؟؟صدق إن مافيك حيا!روحي نامي وراك مدرسة ياتلميذة المدارس..خلي الزواج لبنات الجامعات والخريجات! دخلت رانية غرفتها والألم يعتصر قلبها والدمع مدراراً وبينها وبين نفسها تقول:وش نحفتي له يارانية؟!!! لما جاء أبوها طلب العشا وجلس بالصالة وظنوا انه رانية نايمة فأخذت الأم راحتها بالسوالف وحكت له عن الناس وعن مواصفات العريس وعن عدم رغبتها بتزويج رانية!! ورانية فاتحة الباب وتسمع السوالف!! الأب:اللي أعرفه إنه كل أم تتمنى بنتها تتزوج اليوم قبل بكرة..أما انتي غريبة وشفيك معارضة!! أم رانية:البنت بعدها صغيرة ياولد الحلال وقدامها فرص كثيرة لين ماتتخرج! الأب:الشرع يقول إذا أتاكم من ترضون دينه وخلقه فزوجوه..وبنتك عقلها كبير..وانتي لين الحين عجزتي تفهمينها! أم رانية:شلون عجزت أفهمها؟ الأب:يعني مالاحظتي اهتمامها الشديد بحضور الأعراس والتصبغ والتزبرق؟؟إذا أمي اللي هي جدتها فهمتها وقالت بنتك زَوِجها ياسلطان..تحب تستعرض قدام النسوان وترقص!!انتي ماقدرتي تفهمين قصد بنتك؟!! أم رانية:بس رانية راعية وناسة وموب حقت زواج أبد!! الأب:وانتي اش دراك؟أحسن وحدة في بنات اخواني هي!فيها عِرف وواجب من صغرها!والكل يحبها وينبسط على سواليفها..طبخ وتعرف تطبخ..جمال وموب قاصرها شي..تربية والحمدلله بنتي أخلاقها عالية...وبعد كم شهر بتتخرج ونفرح فيها..وش اللي باقي؟؟؟ أم رانية:أقول لك الجماعة يبون يزوجون العريس مع ولدهم عقب 5شهور!وإنت تحسب انهم على كيفنا؟؟ الأب:شوفي..انتي مالك شغل بالسالفة كلها..أنا أدرى ببنتي! انتي لاشاورتيها ولاشي وتفتين من راسك وهذا شي مايجوز لك أنا أبي أقابل العريس بنفسي وبأعطي كلمة في الموضوع!وانتي إذا بتظلين تلفين وتدورين فاطلعي من الموضوع كله!! أم رانية:تصطفل إنت وبنتك! وجمع أبورانية معلومات عن اسم العريس ومقر عمله من أم رانية.. وصباح الأربعاء قرر يزور ناصر شخصياً في العمل من غير مايكشف هويته له!!!!!!!! وكان ناصر يشتغل بشركة مقاولات وتخليص معاملات وتراخيص البناء.. وراح أبورانية كـ عميل يبغى استشارة!....وسولف مع ناصر شخصياً وارتاح له ولخفة دمه وبساطته... ولما رجع البيت نادى رانية..وكانت توها راجعة من المدرسة ولافتحت فمها بكلمة عند اسمهان وباقي الشلة عن طاري الخطبة!!!!!!!! أبو رانية:رانية؟ رانية:سَمْ يبه... أبورانية:تقدم لك عريس..وبغيت أعرف رأيك؟!! رانية:الأهم رايك إنت يبه.. أبورانية:الصراحة أنا أشوف إنه انسان مناسب..وإنك بنت مؤهلة للزواج..إلا إن كان لك رأي ثاني؟!! رانية:لا مالي رأي ثاني!!كل صاحباتي بيتزوجون ماعدا أنا!وِقْفَت عليعاد؟؟؟؟ أبورانية:هاهاها..ياحليلك..يازين الصراحة يابنتي!! أمها وهي واقفة وراها:إلا ياشين الشفاحة!! أبورانية:خلاص اتصلي بالجماعة وقولي لهم أبوها مستعد يقابل ولدكم وخلهم يشوفون يوم يناسب العريس يجيني فيه! أم رانية(بغيظ):آمــر!!! ================== غداً صباحاً بإذن الله نستكمل الأحداث...
اتصلت أم رانية على أم تركي وقالت لها إنه أبورانية مستعد يقابل العريس..وتم تحديد يوم في الأسبوع اللي بعده..وراح ناصر لبيت رانية وكان قاعد يفكر طول الطريق: ياترى شلون بيكون أبوالعروسة؟ شايبٍ أقشر؟ولا قطعة سكر؟!!! ولما وصل للبيت استقبله أبورانية و(مشاري)أخو رانية الكبير.. وانصدم ناصر يوم شاف أبورانية!! وقال:مو إنت اللي...؟؟؟ أبو رانية:إيه أنا اللي!!! وتم اللقاء وكان لقاء حلو وبسيط وانبسط ناصر يوم لقى عائلة رانية تشابهه!!الأب والأخ كلهم راعيين وناسة وسعة صدر وارتاح لهم وارتاحوا له... وكلمهم عن نفسه بالتفصيل.. وعن رغبته بالزواج بعد 5شهور تقريباً مع ولد عمه(تركي) .. وبآخر اللقاء.. أبورانية:شوف ياناصر..حضور أخوانك الكبار معك المرة الجاية مهم لي..وبعدها نتفق على النظرة الشرعية..وعلى الملكة والزواج..وأهم شرط لي إن بنتي تظل ساكنة بجدة!مو تجيني بيوم من الأيام وتقول أنا قدمت على نقل!!!!!! ناصر:لا لا ان شاء الله..ماأرضى بغير جدة بديل..وأنا انولدت وقضيت عمري فيها..وبيتي اللي أنا عايش فيه مِلكي يعني لايمكن أفرِّط فيه بكل سهولة!! واستأذن ومشى... وكانت رانية فرحانة لأبعد مدى!! أما أمها فماهي راضية عن الموضوع تمام الرضى!!! ================ أما اسمهان فكانت يوم الأربعاء من نفس هالأسبوع معزومة عند زوجة صاحب عبدالرحمن ولأول مرة بتروح لها.. لما راحت للحرمة(وكان اسمها عزة) وبعد مااستقبلتها وسولفوا مع بعض.. عزة:ماشاء الله عليك يااسمهان بعدك صغيرة؟؟بصراحة توقعت عمرك 26 أو27 ماتخيلت أبداً إنك طالبة بالثانوية العامة!!!على كذا الفرق بينك وبين زوجك13 سنة تقريباً؟؟؟؟؟ اسمهان:إيه تقريباً! عزة:الله يعينك!!أنا زوجي أكبر مني بأربع سنوات بس والاختلافات بيننا هاالكثر!أجل شلون انتي؟؟ اسمهان(ببراءة):لا الحمدلله..إحنا مرة متفاهمين.. عزة:ياحبيبتي لأنك بعدك عروس وماصار لك من تزوجتي إلا شهور!اصبري لين تكتمل سنة وتشوفين بعينك شلون بينقلب عليك!!! اسمهان:طالما إني طيبة معاه اش اللي بيخليه ينقلب علي؟ عزة:الرِجال كذا هذا طبعهم!كل ماشافوا الوحدة طيبة وساكتة لهم ركبوا على راسها واستخذلوها!لكن المفروض تكونين ذكية من البداية وماتخلينه يمَشِّي كلامه عليك!!ولا انتي على بالك أخذ وحدة صغيرة ليش؟؟مو عشان يبرمجها على كيفه؟؟ اسمهان(وكأنها بدأت تقتنع بكلام عزة!):هو فعلاً من وقت ماتزوجته وهو يحاول يغير فيني أشياء كثيرة بس ماخطر ببالي لحظة إنه يسوي كذا من باب الاستخذال وعشان يركب على راسي!!! عزة:بكرة تقولين عزة قالت!!الواحد منهم يحب يسوي نفسه الناصح المخلص ويتفلسف عليك بكلمتين جابها من كتب!!على باله مثقف!عشان يحسسك إنك انسانة سطحية فاشلة وهو الوحيد اللي يفهم!بس الذكية هي اللي ماتترك له مجال وتفرض رأيها عليه بالطيب أو بالغصيب... اسمهان:سبحان الله كأنك تتكلمين عننا!! عزة:هذا عشان تعرفين إن الرِجال كلهم نسخة من بعض!! اسمهان:طيب عطيني من نصايحك دامك متزوجة من 9سنين!ترى أنا مالي خبرة بـ شي! عزة:لازم يحس إنك موب هينة!وكل شي تعرفينه!مو كل ماحاول يجيب لك سالفة تسوين نفسك مو فاهمة!ولازم تحسسينه إنك مثل ظِله وتراقبينه من قريب وبعيد عشان مايظن إنك غافلة وهبلة وتاركتله الحبل على الغارب!!وماتتركين له أي مجال يآمر وينهى عليك بالعكس! انتي اللي افرضي رأيك وشخصيتك عليه!!ولاتكلمينه عن أخبارك الخاصة خليك عالم من الغموض بالنسبة له مايدري عن ظاهرك من باطنك!! اسمهان(بشغف):وتحسين هالأشياء نجحت معاك؟؟؟ عزة:طبعاً ياحبيبتي!هالحين مايقدر يحط عينه بعيني!ويحسب لي ألف حساب! وبعد مامر وقت واكتملت دروس التحريش !!وانتهت الزيارة.. وفي السيارة... عبدالرحمن:هاه؟شلون لقيتي زوجة يوسف؟؟ اسمهان:طيبة مرة!! عبدالرحمن:غريـــــــــبة!طول الوقت كنت حاط يدي على قلبي ومتأكد إنها مابتعجبك!بس اضطريت أجيبك عندها عشان يوسف نشب بحلقي إلا ألَّبي دعوته!! اسمهان:وإنت اش دراك إنها مابتعجبني؟؟ عبدالرحمن:من كلام زوجها عنها!تصدقين من يوم ماعرفت يوسف وهو كل يوم والثاني متهاوش معاها وموديها لبيت أهلها!!مابينهم وفاق!حرمة تموت بالنكد بشكل غير طبيعي!! اسمهان:وليه مايكون هو اللي منكد عليها؟؟ عبدالرحمن:لا بالعكس يوسف طيب وابن حلال! اسمهان:طبعاً انتوا الرجال ماتشوفون عيوبكم وتحامون لبعض!ودايماً الحرمة هي السبب! عبدالرحمن:وانتي اشفيك معصبة؟هو لو انه انسان مافيه خير..كان رماها من أول مشكلة ببيت أهلها وطلقها وافتك منها!لكن الشي الوحيد اللي مخليه يستحملها.. عياله المساكين.وش ذنبهم؟؟ اسمهان:احترت مين أصدِّق!فُضها سيرة!!! ============= اليوم الثاني راحت اسمهان زواج بنت عمها نوف.. ويوم الجمعة كالعادة اجتمعت مع أهلها في غداء عائلي.. وراحت سماح وحكت لها عن خطبة رانية.... اسمهان:ومتى رحتوا لبيت رانية؟؟ سماح:الأسبوع اللي فات يوم الثلاثاء..وهذا الإثنين ناصر راح لهم بـ روحه... اسمهان:اعقبي يارانية النذلة!ولافتحت فمها لي بـ سيرة!مع إنها مو متعودة تخبي عني شي! سماح:بس ياليت يتم الموضوع على خير..الصراحة انذهلت يوم شفتها تغيرت بشكل غير طبيعي بس صراحة صايرة تههههههههبل! حتى أمي فشلتنا ماعرفتها قامت لبست النظارة ونادتها وتمقلت فيها زين بعدين تأكدت إنها هي!! اسمهان:هههه..فعلاً كلنا تفاجئنا يوم شفناها..ماتوقعنا هالاصرار كله..خاصة اننا تعودنا عليها من سنين وهي بـ ذا الوزن... أسماء:لينة تبكي ياسوسو تعالي إعطيها جرعة حنان! اسمهان:واااااااي ياناس..فديت عمرها هااللينة.. وشالتها اسمهان وضمتها بقوة.. أم اسمهان:ذكرتيني بالذي مضى يااسمهان!حملت فيك بعد انقطاع دام سنين..ويوم ولدتك كأني بكرية وأول مرة يصير عندي عيال!حبيتك وتعلقت فيك مرة وكنت كل يوم أضمك شوق بمثل ماضميتي لينة توِك..... اسمهان:يارب يرزقني بطفل يملى حياتي كلها فرح.. أسماء وسماح والأم:آميييين.. =============== راحت اسمهان السبت للمدرسة وبقرارة نفسها فكرت إنها ماتكلم رانية عن موضوع الخطبة لين مارانية تبدأ الأول!!! لكن رانية ماجابت خبر أحد! ومر الأسبوع بروتين غريب ولامن جديد... ونهاية الأسبوع راح ناصر مع اخوانه الكبار اللي حضروا من الشرقية لبيت أبورانية وتقدموا رسمي وتم تحديد يوم النظرة الشرعية الأسبوع اللي بعده..وعلى أساس ماراح يصير في النظرة ينبني عليه تحديد ملكة أو لا... =============== أما عبدالرحمن عرضت عليه قبل فترة إحدى الجرايد السعودية اللي تصدر بشكل يومي إنه يكتب بزاوية مخصصة فيها بعد ماشاهدوا الاقبال الكبير على مقالاته بالمدونة اللي في النت...ووافق وصار منهمك على طول بإعداد موضوعات ومقالات متنوعة يومياً.. وبيوم من الأيام...صاحت اسمهان:يوووووه عبدالرحمن!الصراحة هذي ماصارت عِيشة!كل يوم وانت تقضي ساعات بغرفة المكتب تخترع مقالات وأنا قاعدة بروحي أحاكي الجدران! عبدالرحمن:زين انزلي لأمي تونسي معاها شوي!! اسمهان:أنا متزوجتك إنت موب أمك!! عبدالرحمن:وش هاللهجة الله يهديك؟؟زين روحي اتصلي بأهلك بصديقاتك أو اقعدي على النت! اسمهان:ياسلااااااام!أقول لك مليت! عبدالرحمن:أجل اش تبين؟؟ اسمهان:أبي أطلع من البيت! عبدالرحمن:وين تبين تروحين؟؟ اسمهان:أي مكان..السوبر ماركت مثلاً..ناقصتني مقاضي للمطبخ! عبدالرحمن:خلاص..بإذن الله نص ساعة ونطلع..ارتحتي؟؟ وفرحت اسمهان وتجهزت وغيرت ملابسها ولبست عباتها وجلست تنتظر..وبعد ساعة دخلت عليه المكتب وعيونها تناقز شرار!! اسمهان(تصرخ):النص ساعة..صارت ســـــــــــاعة ياعبدالرحمن!وإنت باقي لازق بالكرسي؟؟؟؟؟ عبدالرحمن:ياالله..مر الوقت ماحسيت فيه.. وقام يلبس ..وطلعوا الاثنين وراحوا للسوبرماركت..وهم يتجولون ومعاهم عربيتهم ويشترون أغراض أقبلت عليهم بنت عشرينية ولابسة عباية مزركشة وطاقة بوجهها كيلو ميك أب!!وكاشفة وجهها وجزء من شعرها!! وقالت:إنت الأخ عبدالرحمن الفلاني؟؟؟ عبدالرحمن:إيه نعم! البنت:أنا من أشد المعجبين بكتاباتك الاجتماعية الدينية اللي في جريدة...!!.... عبدالرحمن:شكراً جزاك الله خير.. ورمت اسمهان من يدها الشوكولاتة اللي كانت تبي تحطها بالعربية وجت منطلقة على البنت ووقفت قدام البنت وقالت:نعم؟خير؟ البنت(باستغراب):أبداً كنت أتكلم عن اعجابي الشديد بمقالات كاتبنا الأخ عبدالرحمن! اسمهان:نعم يختي؟؟أقول روحي يالحلوة غطي وجهك واستري نفسك وبعدين تعالي تفلسفي! البنت:وي..ياأخ عبدالرحمن؟هادي زوجتك؟؟ عبدالرحمن(وهو منحرج):ايه نعم! البنت:والله ياحبيبتي المفروض تكوني متوقعة انو كاتب بحجم زوجك لازم يكون له معجبات كَتير! اسمهان:سألتك باللي خلقك؟انتي تفهمين كلمة من اللي تقرأينه؟والا المسألة عندك رزة وجه وبس؟يلا يلا عطينا مقفاك ودرب يسد مايرد!! وعبدالرحمن من الاحراج ماعرف اش يقول فقال للبنت:المعذرة ياأخت عن إذنك... وقامت البنت وعطت اسمهان تشميقة معتبرة ومشت وهي تقول لنفسها(معقولة المُسقَف الوسيم دا متجوز الغجرية دي؟؟؟) عبدالرحمن:وش هااللي سويتيه ذا؟فشلتينا قدام الناس؟؟ اسمهان:لا ياشيخ؟؟ناقص تحب إيدها بعد وتعتذر لها!! عبدالرحمن:مهما كان البنت ماغلطت جات تعبر عن مشاعرها! اسمهان:لا والله!وعادي عندك؟؟أجل حتى أنا بأروح للهندي اللي واقف يرص الكراتين هناك وأعبر له عن مشاعري واعجابي بإخلاصه في عمله!!!!!!! عبدالرحمن:أنا ماقصدت ان اللي سوته صحيح!بس هي من وجهة نظرها تشوفه شي عادي..كان طنشتيها ومر الموضوع بسلام! اسمهان:أقول الشرهة علي يوم طاوعتك تكتب مقالاتك بالجريدة!لو براسك عقل ماتحط صورتك فوق المقال!واش استفدنا من صورتك غير تجميع هالأشكال حولنا؟؟أتحداها فاهمة شي من مقالاتك..تلاقيها مايعجبها شي في مقالك الا صورتك اللي فرحان فيها ورازها فوق!!! عبدالرحمن:استغفر الله.. اسمهان:استغفر الله منك ومن فعايلك ..ومقاضي ماني شارية وبأرجع للسيارة! وراحت اسمهان تمشي بأسرع ماعندها خارج السوبر ماركت وعبدالرحمن يناديها ولاترد!! وقعدت تنتظره بالسيارة..وآثاريه ماجاء بسرعة قعد يحاسب عن الأغراض اللي بالعربية! ويوم زهقت اسمهان قامت تدندن بصوت عالي بالسيارة وتغني لأنها متطمنة انه ماحد سامعها وصارت تغني وتقول مَوَّال:
وآثاري الشباك الخلفي الجانبي اللي وراها مفتوح شوي!!وصوتها طالع برة!! وكان فيه شاب ماشي من جنب السيارة ودخل راسه من الشباك وصاح في اسمهان:إن أنكر الأصواتِ لـَصوت الحمير!!!هههههه وقامت اسمهان من الخرعة تبكي وشوي وجاء عبدالرحمن ولقيها تبكي بصوتها!! عبدالرحمن:لاحول ولاقوة إلا بالله..انتي باقي زعلانة؟؟؟ اسمهان(وهي تنوح):لاااا..بس اكتشفت إن صوتي ماهوب حلو!!!! ============
إنما الأعمال بالنيات وإنما لكل امريءٍ مانوى)