مرت الأيام وجاء اليوم اللي رانية بتشوف فيه ناصر لأول مرة.. وراحت البنت وتأنتكت..وتضبطت وكان ناصر قاعد بالمجلس مع أبو رانية وأخوانها(مشاري)بالجامعة و(مشعل)بالمتوسط.. دخلت رانية بعد وقت من زيارة ناصر بالشاي.. رانية(بكل ثقة):السلام عليكم.. الجميع:وعليكم السلام.. وسرقت نظرة سريعةوناظرت بناصر و رخت عيونها بالأرض...وهي مبتسمة.. وناصر فاتح فمه من الذهول!!ويقول بنفسه(طول عمرك ياناصر منحوس!معقول هالمزيونة بتصير زوجتك؟؟أخاف غلطانين!!) مشاري(يستهبل):أقول رانية لفي يمين ثم لفي يسار..خلي العريس يناظر زين أخاف يحسبنا غاشينه ولا شي!!! الجميع:هههههههه طالعت رانية بمشاري ورفعت حاجبها!! وطال الصمت وناصر يطالع بتعجب أبورانية:إحم إحم!!ودك تسألها شي؟ ناصر(وهو مرتبك):ايه..شلونك؟؟ رانية(وهي مبتسمة):زينة.. ناصر:تدرسين؟؟ رانية:ايه بثالث ثانوي.. ناصر:خلاص! مشاري:علامك؟انتهى الاستجواب؟ ناصر يهمس لمشاري:ايه انتهى..قلبي يعورني! مشاري:انطلقي إلى المكان اللي أقبلتي منه يارنو! وخرجت وقاموا يضحكون... تذكر ناصر الإسورة الذهب اللي جابها بعلبة وقال لمشاري:نسيت أعطيها هديتها!! مشاري:رنو يارنو..تعالي خذي مكافأة من العريس!! أبورانية:الله يقطع ابليسك قوم إنت ودها لأختك! دخلت رانية لأمها وهي زعلانة.. أم رانية:خير ان شاء الله؟؟ رانية:ولدك الدب مشمش!ينكت علي هو ووجهه!هذي مو شوفة ذي مسخرة!مافي احترام ولاتقدير قدام الرجال الغريب!كأني جاية للعرض بس! أم رانية:أهم شي..ارتحتي له؟؟ رانية:ايه..حليو بس شكله مَخَفَة شوي!! أم رانية:مثل أبوك ولا أزود؟!! رانية:ههههههه..حرام عليك يمه..أبوي خفيف دم..بس هالعريس شكله مسيكين وعلى نياته.. أم رانية:يلا..الله يهني سعيد بسعيدة.. وجاء مشاري وناولها الهدية.. رانية:يمه اش رايك؟حلوة الإسوَرة؟ أم رانية:حلوة مابها شي!! رانية:يمه اشفيك تكلميني بجفاء؟ كأنك مو فرحانة؟!! أم رانية:ماعليك مني..أهم شي أبوك يفرح!! وقبل مايروح ناصر اتفق مع الأب على موعد الملكة انه بعد شهر.. ورجع ناصر بيت تركي وفتحت له أم تركي ودخل..وسأل عن تركي أم تركي:أرسلته يجيب لي أغراض من البقالة..شوي ويرجع..بس إنت بشرني..اش اللي صار معك؟؟ ناصر:العروسة تهبل ياعمتي وذوقك لايعلى عليه..بس ماأبيها! أم تركي:وليش عاد؟؟ ناصر:عندي طموح بوحدة أجمل! أم تركي:ومن حلاتك عاد يوم تبي وحدة أجمل؟؟إنت طالع بعصاقيلك وتحمد الله على ماابتلاك!!والله إن رانية تخب عليك! ناصر:وانتي ليش زعلانة؟بنتك هي ولا بنت الناس؟؟ أم تركي:زعلانة ليش إنك لعَّاب!وماعندك نية تتزوج بس قاعد تضيع وقتنا على الفاضي..روح باللي مايحفظك!! إلا تركي راجع من برة ومعاه الأغراض..حطها بالمطبخ وقامت الشغالة ترتبهم ورجع المجلس وسلم على ناصر..ولاحظ إن أمه متضايقة.. تركي:يمه؟عسى ماشر؟ليش زعلانة؟؟ أم تركي:اسأل المقرود اللي جنبك؟؟ تركي:خير يانويصر؟ليش مزعل الوالدة؟؟ ناصر:مدري عن أمك..جيت أبشرها إن العروس معجبتني والملكة بعد شهر و هبَّت فيني وهاوشتني!! تركي:صحيح؟؟مبروك مبروك.. أخيراً نويت تعقل وتركد وتنثبر ببيتك ويصير لك زوجة؟؟؟صدق إننا في عصر العجايب!! أم تركي:أنا يالكذاب هاوشتك على تبشيرك لي؟؟مو إنت كذبت علي قبل شوي وقلت إنك تبي وحدة أحلى؟؟ ناصر:استغفري ربك ياعمة ماحصل!!! أم تركي:تبيني أقوم عليك هالحين وأخنقك بشيلتي يالخراط؟!! تركي:يمه لاتقهرين نفسك عليه..تراه من كثر مايكذب ينسى!ومابين كل كذبة وكذبة يألف عشر كذبات ثانية!! أم تركي:أقول أنا بأروح أرتب الأغراض بالمطبخ وإنت تهنى بـ رفاقة مسيلمة الكذاب!!! تركي:هاه يامسيلمة!يووه أقصد يانصور..مادام الملكة بعد شهر فالمفروض نبدأ من هالحين ناخذ الأمر جد ونحجز قصر ونرتب أوضاعنا.. ناصر:أنا حاط عيني على استراحة الزنبقة اللي بالحي اللي ورانا تنفع للمناسبات.. والعشا نجيب هندي يطبخ لنا قدر مندي بحوش الاستراحة!! اش رايك؟؟ تركي:ايـــــــــــش؟؟صدق إنك ثور!هالحين زواجي الأول سويته بقاعة ليلتي وتكلفت فيه!وتبيني الحين أقط معك عشان أتزوج باستراحة؟صدق إنك وجه فقر! ناصر:ياشيخ يازين التوفير..وش لك بالتبذير والسرف!افرض بكرة بنت الناس طلعت رفلة وماتسوى..تبيني أقعد أتحسر على كل قرش دفعته فيها؟؟؟؟ تركي:يـــــــــــــــــــــــــــمه!! أم تركي:ياااااااااانعم.. تركي:جيبي شيلتك وتعالي!!!
مرت أيام وبدأ أسبوع دراسي جديد في نهايته كانت ملكة مشاعل خالة أفنان على عبدالمجيد أخو عبدالرحمن... ومشاعل مجتهدة تداوم يومياً في المعهد.. ويوم الاثنين قالت لها زميلتها(شروق) الموظفة معاها بنفس المعهد...معهد الصم والبكم.. شروق:مشاعل؟انتي مو هذا الخميس بتملكين؟؟ مشاعل:ايه هذا الخميس.. شروق:طيب ليش ماتاخذين لك اجازة هاليومين؟؟ مشاعل:وش حقه الاجازة؟أنا بأملك بس ..مو أتزوج! شروق:غريبة انتي!العروس أقل شي يبي لها يومين تستعد فيها وترتاح.. مشاعل:صدقيني..أنا قمة ارتياحي وانبساطي أحس فيها لما أكون بين طالبات هالمعهد.ماأتصور اني بآخذ اجازة الثلاثاء والأربعاء وعقبها خميس وجمعة وبعدين أشوفهم!! شروق:ماشاء الله عليك..أما أنا أعد الأيام عد عشان تقبل علي الاجازة..مشاعل؟؟ مشاعل:هلا.. شروق:بأسألك سؤال غثيث شوي..ممكن؟؟ مشاعل:عادي ياقلبي..اسألي.. أنا تعودت على غثاثتك!! شروق:انتي لما وافقتي على هالمعرس..وافقتي عشان أهله أغنياء ومن عائلة معروفة؟؟ ولا عشان تقدم بك العمر وكل زميلاتك تزوجوا الا انتي؟؟ولا شفقانة عليه؟؟
مشاعل:ولا سبب من الأسباب اللي ذكرتيها!!وافقت عليه لأني ارتحت له..ومانظرت له مثل ماغيري من الناس ينظر له!إن كان أصم وأخرس فهذا شي مو بيده ولايقلل من شانه ومن حقه ياخذ فرصته ويعيش مثله مثل غيره..
شروق:بس انتي مافكرتي يامشاعل شلون بكرة بتتعاملين معاه؟يعني مثلاً..أبسط مثال:فترة الخطوبة اللي تعتبر من أحلى الفترات..وشلون بتتواصلين معاه وهو مايقدر يسمعك أو يكلمك بالتلفون؟؟ مشاعل:صدقيني الدنيا ماقامت وقعدت عشان التليفون..ولاقد فكرت في اللي تقولينه.. شروق:طيب حياتكم اليومية بعدين شلون بيكون تعاملك معاه؟ مشاعل:انتي ليش مستصعبة الموضوع وهو ماله علاقة فيك وأنا اللي أعتبر صاحبة الشان مافكرت في أي صعوبة؟!!بعدين أنا لي سنين وأنا أشتغل وأتعامل مع الصم والبكم لين ماكسرت كل الحواجز اللي بيني وبينهم..عشان كذا ماأتخيل انه حياتي معاه بتكون صعبة مثل ماانتي متخيلة!! شروق:مبروك ياقمر..والله يهنيكم ببعض ويوفقكم.. ================= وبنهاية الأسبوع يوم الأربعاء خرجت مشاعل بدري من المعهد وبدأت استعداداتها للملكة.. يوم الخميس كانت ملكتها ملكة بسيطة في استراحة مناسبات وحضرت اسمهان وأم عبدالرحمن اللي كانوا لهم مدة ينزلون الأسواق عشان يجيبون عربية الملكة وملحقاتها من ذهب وبخور وعطورات وتحف وشمعدانات وتغليف في محل خاص وتزيين وتشريع.. ماحضر من الشلة إلا أفنان واسمهان ورانية..أما مرام ونجلاء لا!!! نجلاء باعتبار انه عبدالمجيد خطبها من قبل فشافت انه حضورها ماله داعي أبد!! ومرام لأنه أهل عريسها موجودين وهم أهل عريس مشاعل..فما وافقوا أهلها انها تروح! وحضرت جوهرة خالة العريس وأم اسمهان فقط..وعمات العريس وأهل أبوه وبعض الأقارب واستانس الجميع.. وقامت اسمهان قعدت على طاولة مع رانية وأفنان... ولما رجعت لطاولة أهل العريس وأمها..همست في إذنها أم عبدالرحمن:مين هذيك البنت اللي لابسة فستان موف وجالسة معاكِ؟؟ اسمهان:ههههه..أكيد ماعرفتيها! أم عبدالرحمن:لا ماعرفتها بس كأني مشبهة عليها!! اسمهان:هذيك رانية ياخالتي.. أم عبدالرحمن:مو معقول!!سبحان من يغير ولا يتغير!! ورجعت اسمهان للطاولة وجلست مع رانية.. اسمهان:مبروك ياعروسة..ولو اني كنت أتمنى تبشريني بنفسك!! رانية:مايحتاج أقول لك والعريس جاي من طرفك!! اسمهان:جاي من طرفي؟؟وأنا اش لي علاقة بالموضوع؟؟أساساً عمري مارشحتك لأحد!أنا شخصياً تفاجئت لما قالت لي سماح إنهم يبونك لولد عمهم..ناصر..!! رانية(بانفعال):وليش عيوني عمرك مارشحتيني لأحد؟؟ناقصة إذن ولا عين؟؟ ولا اجتهادك حاطته بأفراد الشلة تكافحين العنوسة فيهم وتاركة أعز وحدة عندك منهم ماتعطينها وجه؟! اسمهان:هههههه وش هالهرج ياحقودة..الحمدلله باقي بدررررري عليهم من العنوسة!وصدقيني ماقد تدخلت في خطبة وحدة منهم.. أهالي العرسان كانوا يختارون ويطلبون مني الرقم فقط! رانية:وأنا ماحد فكر فيني إلا عقب مانحفت!!آثاريني كنت أفَشِّل؟؟ اسمهان:لا ياحلوة..تدرين انهم كانوا حاطين عينهم عليك من يوم شافوك في المستشفى بولادة أسماء؟؟وكنتي دبدوبة!بس خدمتك النحافة إنها حلتِّك بعيونهم زيادة!الا اش رايك في العريس؟؟ رانية:لا ملكت علمتك!! اسمهان:ومتى الملكة ان شاء الله عقب شهر؟؟ رانية:راح من الشهر أسبوع وباقي ثلاث..والله يعين.. اسمهان:ماشاء الله محد قدي كل الفترة الجاية مناسبات!انتي ملكتك عقب 3أسابيع ومرام عقب شهر وأيام..وبعطلة الصيف زواج مشاعل ومرام بليلة وحدة..وبعدهم بأسبوعين ملكة أفنان وعقب ملكتها بكم يوم بيكون زواجها معاك بنفس الليلة!!! رانية:ياحليلها نجلاء..زواجها بعد سنتين!! اسمهان:بس ماتصدقين وش كثرفرحتي!زواجكم راح يقربنا من بعض..وخصوصاً انه مافي أحد مننا بيروح بلد ثاني ويبتعد.. وشوي كانت الزفة وبعدها طلعوا أهل العريس يسلمون على مشاعل.. وتوجهوا بعد السوالف لصالة العشا.. أما مشاعل دخلت على عبدالمجيد ومع انها كانت انسانة عادية جداً في جمالها وملامحها بس انجذب لها عبدالمجيد بشكل شديد ولمس فيها الذوق والعقل والرزانة.. ولما طلع الجميع من الغرفة وصاروا لحالهم..أعطاها عبدالمجيد لوحة صغيرة بحجم برواز راسمها بالألوان الزيتية وكاتب فيها أبيات شعر..سألته مشاعل بلغة الاشارة:انت راسمها؟؟ عبدالمجيد رد بلغة الاشارة:ايه وكاتب الأبيات! مشاعل:ماشاء الله ترسم وتكتب شعر؟؟ عبدالمجيد(بتواضع)وبحركات الاشارة:شوي!! وظل يحكي لها عن نفسه بلغة الاشارة وهو فرحان وهي تتابعه بصمت وتتأمل فيه وبمعنوياته المرتفعة ونفسيته الشفافة البريئة وتتذكر كل أطفال الاعاقات المختلفة اللي واجهتهم بحياتها وكيف دايماً كانت تردد بينها وبين نفسها(سبحان الله..جنتهم بصدورهم)!! دايماً بريئين وسعيدين..وينشرون البهجة للي حولهم.. وحست مشاعل انه ارتباطها بعبدالمجيد أول خطوة صح تتخذها بحياتها وحست انها مو ندمانة على قرارها أبداً على رغم اعتراض كثير من أقاربها على هالزواج الغير متكافيء!!! وأولهم أمها اللي دمعتها مافارقت خدها طول الملكة!!
في الرياض كانت عبير جالسة بالبيت ودق الجرس وراحت تفتح الباب..وكان الحاضر أبوها.. سلمت عليه وحضنته بشوق.. عبير:الحمدلله على السلامة يبه.. الأب:الله يسلمك يابنتي... دخل المجلس..وسألها:وين أخوانك؟؟ عبير:راحوا السوبرماركت مع أمي يجيبون أغراض.. الأب:مين وداهم؟؟ عبير:سواق خالي.. الأب:طيب ليش مارحتي معاهم؟ عبير:عندي اختبار انجليزي بكرة .. الأب:الله يوفقك يابنتي.. شدي حيلك..نبيك تجيبين نسبة عالية عشان تدخلين قسم زين بالجامعة.. وبدأ يسولف معاها بمواضيع مختلفة..... الأب:اسمعي يابنتي مابقى على اجازة الصيف كثير..وأنا فكرت بما إني مسافر للعمل بمصر ولبنان اني آخذك انتي واخوانك تقضون معي الاجازة! عبير(بفرح):صدق يبه؟عسى الله لايحرمنا منك.. الأب:أتا داري زين اني دايم مقصر معاكم ومشغول على طول عشان كذا فكرت أضرب عصفورين بحجر منها أسافر أكمل أشغالي ومنها تتسلون بإجازتكم.. عبير:يبه؟أنا عندي موضوع أفكر فيه من مدة ونفسي أكلمك فيه! الأب:خير ياعبير؟قولي.. عبير:يبه مادام ودك تاخذنا لـ لبنان فليش ماأحاول أعيد تجربة عملية التجميل؟؟ الأب:ياليت إنك تحاولين لكن أدري طول ماأمك وراك مابتستمرين كالعادة!! عبير:لا أنا هالمرة معزمة إذا انت وافقت.. الأب:ماعندي أي مانع..أنا ودي أشوفك اليوم قبل بكرة سليمة ومتعافية مثل أي بنت..وبالإجازة نعرض تقاريرك السابقة على أحسن طبيب تجميل بلبنان.. عبير:بس يبه أنا عندي طلب ثاني! الأب:آمري.. عبير:إن أمي ترافقني! الأب:هذا المستحيل بعينه!تبين أحد يرافق معاك بالمستشفى فأنا أقترح تاخذين معاك وحدة من بنات أعمامك أو عمتك(منيرة) هذي هي أرملة وماعندها عيال ولاأحد يربطها وأنا متأكد إنها ماراح ترفض وتتمنى تخدمنا بعيونها.. عبير(بلهجة خاضعة):مثل ماتبي يبه! ================== ومرت الأيام تلو الأيام..وكانوا جوهرة واسمهان وأحلام مجتمعين ببيت أم عبدالرحمن وبعد السواليف .. جوهرة:ودي أبشركم بخبر..بس عطوني هدية البشارة بالأول! أم عبدالرحمن:صار! بس وشهو الخبر؟؟؟ جوهرة:زوجي لقي عمل.. الجميع:مبرررررررررروك جوهرة:والخبر الثاني إني...... حـــــــــــــــــــــــــــــــــــامل!!!!! قامت أم عبدالرحمن وحضنت أختها جوهرة والدموع مالية عيونها وقالت:مبروك يالغالية..مِن صبر ظَفَر.. أما اسمهان غصب عنها تلاشت ابتسامتها وصارت حزينة على تأخرها بالحمل!! وباركت أحلام لخالتها وقالت:الحمدلله ياخالتي اللي فرجها عليك وعلى زوجك.. جوهرة:الحمدلله..عقبال مانفرح بعيال عبدالرحمن واسمهان! أم عبدالرحمن:آمين يارب.. وبعد ماانتهت الزيارة رجعت اسمهان لبيتها وكان التليفون يرن وراحت ترد..وكانت المتصلة(عزة)زوجة صاحب عبدالرحمن.. بعد السلام والمقدمات المعهودة.. عزة:وش قاعدة تسوين؟عساك مشغولة؟ اسمهان:لا توي راجعة من عند أهل زوجي.. عزة:يعني مشغولة ولا فاضية؟ اسمهان:الصراحة نص ونص!عندي الحين كوي متجمع له كم يوم وودي أكويه قبل لايجي عبدالرحمن.. عزة(بخباثة):خلي شغالتك تكويه! اسمهان:بس أنا ماعندي شغالة! عزة:أفا هذا وعبدالرحمن مقتدر مالياً بخلان عليك؟؟ اسمهان:لا مو بخلان..بس أنا عمري ماطلبته.. عزة:وليه ياحبيبتي ماتطلبين؟انتي ناسية انك بنت عِز؟يعني الشغل مو للي مثلك!وغير كذا انتي وراك تخرج ولازم تجيبين نسبة عالية فالمفروض يكون عندك شغالة! اسمهان:مرات لما يكون عندي شغل أطلب شغالة خالتي وماتقصر تطلعها لي تساعدني! عزة:حبيبتي اسأليني أنا عن أهل الزوج!لأنك عروس بتجاملك ..بس بكرة بتهاوشك وتقول وش هالرفالة اشتغلي بنفسك!ولا يمكن يوصلك كلام ينقال ورا ظهرك إنه ماينظف بيتك إلا بشغالتها!! اسمهان:هههه لا ماأتصور خالتي تحبني..و طيبة! عزة:والله انتي اللي طيبة!هذا لأنك لحالك..بس بكرة يتزوجون عيالها تسيرين قديمة بنظرها ولاعاد تواطنك وتفرق بينك وبينهم! اسمهان:لاتخوفيني! عزة:شوفي..إذا زوجك فعلاً يحبك ويبي مصلحتك فلازم تخلينه يجيب لك شغالة!!إلا إن كان قاصد يخليك تشتغلين بالبيت عشان تضيعين دراستك؟!!لأن الرجال أعرفهم يحبون المره الضعيفة اللي مابيدها شهادة!وبتفيدك الشغالة إنك تقضين مع زوجك أطول وقت ممكن! وهكذا استمرت عزة توسوس لاسمهان وهي منصتة باهتمام.. =========== أتابع بعد سويعات قليلة بإذن الله
طبعاً بعد ماانتهت مكالمة اسمهان مع عزة بـ شوي..رجع عبدالرحمن.. دخل البيت وسلم.. ولقي اسمهان جالسة ومتضايقة.. عبدالرحمن:كيف كانت جلستكم اليوم مع خالتي؟؟ اسمهان:ماشي الحال.. عبدالرحمن:حسافة ليتني لحقت عليها زمان عن أخبارها.. اسمهان:مافي جديد غير ان زوجها توظف..وهي.........حامل!!!! عبدالرحمن(بفرحة):لااااا مو معقول!وش هالأخبار الحلوة..الله يسعدهم ويوفقهم ان شاء الله..بإذن الله بكرة بأمر عليها أبارك لها بنفسي.. اسمهان:عبدالرحمن من غير مقدمات أنا أبي شغالة!! عبدالرحمن:ليش؟؟ اسمهان:من غير ليش!ماشاء الله ظروفك المادية ممتازة ومو قاصرك شي! عبدالرحمن:وعشان مو قاصرني شي لازم اخترع لي شي أضيع فلوسي عليه؟؟؟؟ اسمهان:الشغالة مو خسارة فيني! عبدالرحمن:مو لما نكون محتاجين لها بالأساس؟!وبعدين شغالة أمي تحت أمرك بأي وقت.. اسمهان:شغالة أمك..يعني شغالتها هي مو شغالتي أنا ..وماهي مكلفة تشتغل ببيتين! عبدالرحمن:أنا أبي أسألك:هل حصل وتعبتك بشغل البيت؟أو ضغطت عليك؟ أنا حتى أغلب الأحيان أجيب لك غدا من برة عشان لاتتعبين نفسك وتطبخين! وثيابي أغسلهم وأكويهم برة!!وبعدين من كثر ضيوفنا إحنا يوم نجيب لأنفسنا شغالة؟؟ وحتى مجالسنا دايم مقفولة..مانستخدم من البيت إلا الصالة والمطبخ وغرفة النوم وحمام واحد بس..وشغلها مقدور عليه.إذن وين المشكلة؟؟؟ اسمهان:أنا وراي دراسة وماني فاضية لشغل البيت! عبدالرحمن:طيب انتي من الترم الأول وانتي وراك دراسة وتدرسين وتشتغلين بالبيت..اش اللي تغير؟ اسمهان:خلاص عاد لاتناقشني! عبدالرحمن:مو يااسمهان ياعزيزتي الانسان المفروض مايبحث إلا عن الشيء اللي يكون محتاجه فعلاً بحياته..مثل ماأنا كنت محتاج لوجودك بحياتي وظليت أبحث عن ضالتي إلى أن وجدتها!! اسمهان:جينا للفلسفة والكلام اللي مايوكل خبز!أبـــــــــــــــــي شغـــــــــــــــــــــــــــــــــــالة!! عبدالرحمن:ترى بتجيك تكتم على أنفاسك لاتقدرين تلبسين براحتك ولاتقدرين تقعدين معي براحتك قدامها..وكل ماجينا طالعين مكان نتمشى لازم نوديها لأمي..وهذا إن كانت أمي موجودة..مو بعيدة يكون عندها خرجة وماخذة شغالتها معها!! اسمهان:ياحبك في تكبير المواضيع!! عبدالرحمن:شوفي أنا ممكن أنفذ طلبك..بس ماني جايب شغالة عن طريق مكتب استقدام لأنه مافي حاجة لها أصلاً..ولاعندنا أطفال أوالبيت يحتاج تنظيف باستمرار..بس ممكن أجيب لك شغالة من هنا وتشتغل بالساعة وبعدها تقضب الباب!! اسمهان:ماعندي مانع! ================ ثاني يوم لما راح عبدالرحمن للعمل حكى لصاحبه عن رغبته بتوظيف شغالة عنده... وقال له صاحبه:أنا جايب شغالة أريترية..تشتغل عندي بالساعة لأن زوجتي حامل..فتتساعد معاها لكن ماتبات عندنا..بس ممكن أخلي زوجتي تكلمها وتدور لك عن وحدة من جماعتها تشتغل عندك! عبدالرحمن:ايه تكفى اهتم لي بالموضوع.. وبالفعل كلها يومين وجات شغالة جديدة لبيت اسمهان وإسمها(حليمة).. قالت اسمهان:وااااااي حسبتها أندونيسية! عبدالرحمن:وخير يعني لاطلعت من جنسية ثانية؟كلهم مخاليق الله.. وأخذتها اسمهان وقامت تعلمها بمكان الأشياء وكيف تشتغل ومتى تجي ومتى تروح.. واتصلت اسمهان بـ عزة تبشرها!! اسمهان:أبشرك ياعزة جبت شغالة!!! عزة:بهذي السرعة؟؟؟ اسمهان:ايه..الحمدلله انه وافق! عزة:أكيد جبتي من شغالات بقايا العمرة هذول؟؟ اسمهان:هي تقول إن لها 20 سنة بالسعودية وأهلها كلهم ساكنين هنا بـ جدة.. عزة:وليه مااستقدمتي أحسن؟ اسمهان:ياشيخة زين منه رضى..ومسألة الاستقدام تطوِل! وبعد ماانتهت السوالف قفلت اسمهان السماعة وهي فرحانة بالشغالة الجديدة! ============ ومرت الأيام ولاحظت أم عبدالرحمن انه فيه شغالة تتردد يومياً على بيت عبدالرحمن.. وسألت عبدالرحمن وكان قاعد يتقهوى معاها:عبدالرحمن؟انت جبت شغالة؟؟؟؟ عبدالرحمن:ايه..جبت.. أم عبدالرحمن:ليه؟بشِر..اسمهان حامل؟؟؟ عبدالرحمن:لا مو حامل..بس مو قادرة توفق بين الدراسة والبيت! أم عبدالرحمن:صدقني لو إنها تطلب شغالتي يومياً ماكنت بأرفض..وغير كذا هذول اللي ماعندهم اقامة يخوفون ياولدي..بكرة لو تسوي لكم مصيبة من وين تقدرون تحصلونها وتجيبونها؟؟! عبدالرحمن:الله يكفينا شرهم..بس باين عليها طيبة بحسب كلام اسمهان.. ============== ياحلوات نستكمل غداً بمشيئة الله والآن اعذروني..
مرت الأيام واسمهان مشغولة بدراستها وشاع خبر خطبة رانية بين الشلة وتلقت التهاني.. نجلاء:ماشاء الله زواج اسمهان كان فاتحة خير علينا..انفرطت السلسلة بعدها وكل يوم ووحدة مخطوبة مننا... مرام:طبعاً إحنا مميزات وجميلات عشان كذا حظنا فوق!! أفنان:لا ياقلبي لامميزات ولاشي!يعني بنات خلق الله اللي تارسين البيوت وماجاء نصيبهم كلهم قبيحات ومافيهم ميزات؟؟ الا ظلمتيهم بكلامك..المسألة مسألة حظ ونصيب..وماحد ياخذ الا اللي مقسوم له.. مرام:ماقصدت أظلم أحد..بس إحنا فعلاً مميزات وماينقصنا شي!! رانية: وبالله في ايش مميزات ولاينقصنا شي؟علمينا ياملكة جمال الشرق الأوسط!! مرام:وانتم ليش محقرين أعماركم؟أنا عن نفسي أحس إنه فيني جاذبية!مو غرور..بس فعلاً أحس اني انسانة غير عادية!!! الشلة:ههههههههه رانية:أقول ياشين السرج على البقر!! مرام:أنا بقرة؟؟نسيتي وش كنتي انتي من قبل؟؟أشوى إنك لحقتي على نفسك وصرتي أنثى أخيراً!! رانية:أفا..مصدقة نفسها كوافيرة الهوانم!! اسمهان:بسكم عاد!بتقلبونها مصارعة؟؟عاد أبلة جوهرة فرحانة هذي السنة..تقول إنها أحسن سنة مرت عليها من 3سنين!! نجلاء:ليش؟ اسمهان:لأنها افتكت من مشاكلنا!تقول الحمدلله إن عُقَدكم انفكت بعد ماانخطبتوا..جعلكم بالعرسان اللي يأدبونكم ويمشونكم على الصراط!!! =============== وكانت حليمة شغالة اسمهان مجتهدة بشغل البيت تجي يومياً من العصر وتروح بعد العشاء.. لكن عبدالرحمن صار مايرتاح بقعدته في الصالة أثناء وجود الشغالة وصار أغلب وقته يجلسه بالمكتب وتروح له اسمهان.. وبيوم سوت له اسمهان شاي وكيك..ودخلت عنده المكتب وهو قاعد على الكومبيوتر.. اسمهان:بالله فكني من مقالاتك وخل نجلس ندردش أحسن! عبدالرحمن:طيب اش رايك نختار لعبة من ألعاب الكومبيوتر ونلعب سوى ونشوف مين فينا يفوز؟؟ اسمهان:هيا.. واختاروا لعبة الذاكرة اللي تعرض مجموعة كبيرة من الصور ثم تخفيها واللي يحاول يجمع أكبر كمية صور هو الفايز...وألعاب كثيرة ثانية.. إلا الشغالة دقت الباب.. خرجت اسمهان لها وقالت:نعم ياحليمة؟وش تبين؟ حليمة:التيليفون يرن يامدام.. راحت اسمهان ترد وطلعت المتصلة عزة!!! وبعد التحية والسلام.. عزة:لايكون تذاكرين؟؟ اسمهان(على نياتها):لا جالسة مع زوجي نلعب على الكومبيوتر!! عزة:ياحليله..شكل زوجك من جد مصدق إنك بزرة!!هههههه قال نلعب قال!! اسمهان:واش علاقة بزرة بالموضوع؟حلو ان الواحد يرفه عن نفسه بالألعاب.. عزة:وهو الترفيه يكون بشوية ألعاب على الكومبيوتر؟..اطلعوا تمشوا...اخرجوا!! اسمهان:لا من هذي الناحية زوجي مو مقصر..وماأتوقع فيه أحد يخرج مثلنا..حتى بوسط الأسبوع أيام الدراسة صرت أطلع معاه لو ماكان عنده شفت مسائي! عزة:ووين تروحون؟ اسمهان:البحر..مولات..مطاعم... فنادق.. زيارات..مناسبات..يعني مانخلي على قلبنا شي! عزة:ياحظك!ليتني مثلك!لكن زوجي رابطني بالبزورة!وخرجاتي صايرة قليلة! اسمهان:يمكن لو كان عندي أطفال ماكنت أفكر أطلع كثير من البيت..الجلسة معاهم تونِس! عزة:انتي لين الحين ماحملتي؟؟ اسمهان:لا.. عزة:غريبة!!مع انه صار لك 9شهور متزوجة صح؟؟ اسمهان:تقريباً.. عزة:وزوجك مااستغرب؟؟ اسمهان:بالعكس مو مهتم إلا بدراستي..يقول بعد التخرج نفكر بالموضوع.. عزة:يعني تاخذين موانع؟ اسمهان:ولا قد أخذت شي..ومرة رحت المستشفى مع زوجة أخوي لأنها حامل وفحصتني الدكتورة وقالت كل شي طبيعي.. عزة:وزوجك عمره حلَّل؟؟ اسمهان:لا ماقد حلَّل.. عزة:ولا بيحلل ياشاطرة..لأنه يخاف يطلع فيه بلا وماتتحملينه!لكن انتي انتظري لك كم شهر ولو ماحصل حمل خليه يحلل غصب عليه!أكيد البلا منه! اسمهان:فاولي خير..ان شاء الله مايكون فيني وفيه إلا العافية.. عزة:طيب جربي تقولين له يروح يكشف على نفسه وشوفي اش بيكون رده؟؟ وبعد مااستمرت المكالمة وانتهت. قالت عزة لنفسها:قطيعة!شلون مستانسة بحياتها بالطول والعرض!وأنا مسجونة في ذا القفص..مع زوج كل يوم يقول لي تراني صابر عليك عشان لاينحرمون عيالك منك!!!! ========= أما اسمهان راحت لزوجها وفاجئته بسؤال:عبدالرحمن؟ليش ماتكشف على نفسك عند دكتور؟ عبدالرحمن:بسم الله علي.. شايفتني مريض؟؟ اسمهان:يمكن!إنت مو ملاحظ اني إلى الان ماحملت؟؟ عبدالرحمن:ردينا على نفس الموضوع؟انتي ماتملين؟ يابنت الحلال فكري حالياً بدراستك وبعدها يصير خير!وبعدين مين كنتي تكلمين؟؟ اسمهان:صديقتي!! ==================
في المدرسة..التقت اسمهان بصاحباتها ولما جاء وقت الفسحة جمعت اسمهان فلوس البنات وقالت:رنو حبيبتي تكفين روحي الكافتيريا اشتري لنا فطور على ذوقك والحقينا على الساحة ودنا نقعد هناك.. رانية:من عيوني.. وكان قصد اسمهان تصَّرف رانية شوي عشان تتكلم مع الشلة.. اسمهان:إنتم يالحلوات..نسيتوا إن ملكة رانية في الإجازة الجاية؟يعني باقي أسبوعين بس؟وحِنا مااستعدينا بأي شي! مرام:والمطلوب؟؟ اسمهان:المطلوب هِمتكم!نسيتوا شلون وقفت معاي بملكتي وسوت جو حلو؟؟ نجلاء:تصدقين يااسمهان هالموضوع في بالي من أمس؟لأني اتصلت على رانية أمس وفهمت منها إنها تبي تسوي زفة على الطريقة التراثية القديمة وتقول تبي تلبس لبس تراثي شعبي مطرز والطقاقات من وراها يزفونها على طق تقليدي..وبنات أخوالها يمشون وراها بمرشات الورد والمباخر وأشياء تراثية..ففكرت انه نلبس إحنا الأربع الجلابيات الشيفون المطرزة اللي تنلبس فوق الملابس ونمشي قدام رانية ونرقص مثلاً!اش رايكم؟ اسمهان:حلوة الفكرة تصدقين؟ أفنان:والله هالرانية موب سهلة!حضرت جميع أنواع الأعراس وفي الأخير فضلت الأصالة عن الصرعات اللي طالعة هاليومين! مرام:بس تكفون ماأبغاكم تسوون حركات وخزعبلات طبعاً أكيد خالتي أم عبدالرحمن جاية صح يااسمهان؟؟؟ اسمهان:ايه بتجي.. مرام:إذن أنا ودي أحافظ على برستيجي قدامها لاتروح تقول بعدين خطيبة ولدي استخفت!! وشوفوا أنا راح أعرض على رانية تسوي تسريحتها وماكياجها يوم الملكة بمشغل أختي ماجدة ومجاناً كهدية مني لها! أفنان:وأنا نفسي لو نِساهم مع بعض ونسوي توزيعات دعوية للحضور ولكم علي أجيب لكم الأشرطة الكاسيت والمطويات.. نجلاء:وأنا علي التغليف.. اسمهان:إذن أنا بأشتري الخامات اللي نغلف بها التوزيعات وأطبع بطاقات على الكومبيوتر أكتب فيها مثلاً:هديتي إليكم..والتوقيع:رانية!اش رايكم؟؟ مرام:فكرة حلوة..وأنا أقترح لو تحطون التوزيعات في سلات تراثية وتغلفونها بطريقة يكون داخل فيها أشياء شعبية.. اسمهان:صح بتطلع مرة حلوة.. إلا رانية مقبلة عليهم قاموا غيروا الموضوع! ================= لما انتهى اليوم الدراسي رجعت اسمهان بيتها وتغدت واستراحت وجات حليمة الشغالة بالعصر وقامت بأشغالها..واسمهان قاعدة تذاكر.. رن التليفون وكانت المتصلة عزة!! بعد التحيةوالسلام... عزة:مشغولة؟؟ اسمهان:ايه قاعدة أذاكر.. عزة:طيب منتي ملاحظة إنه صار لنا وقت نتبادل مكالمات ولاتقابلنا؟ اسمهان:اش أسوي مشغولة بالمدرسة.. عزة:زين..اش رايك أزورك نهاية هالأسبوع؟؟ اسمهان:الصراحة أنا مشغولة جداً في عطلة نهاية الأسبوع هذا! عزة:ليش؟اش عندك؟ اسمهان:ملكة زميلتي بعد أسبوعين وودي أنزل السوق عشان أشتري شوية أغراض ليوم الملكة..وبعدين أروح لزميلتي الثانية نغلفها مع بعض.. عزة:ليش؟تقرب لك هي؟؟ اسمهان:لا بس من أعز صديقاتي. عزة:غريبة!العادة الواحد يساعد أقاربه مو الناس الغرب! اسمهان:صديقتي هذي أغلى عندي من أقاربي وماقصرت معاي بملكتي..غير كذا العريس اللي بتتزوجه يصير من أعز أصحاب زوجي..وأنا ماراح أقدم لها إلا شي بسيط.. عزة:الله يعينك!!!طيب اش رايك مدام مشغولة بنهاية الأسبوع أجيك يوم الثلاثاء؟؟ اسمهان:الصراحة بوسط الأسبوع ماأقدر أستقبل لأن ورايا مدرسة اليوم اللي بعده! عزة:وإذا وراك مدرسة؟أنا زيارتي لك بتكون مختصرة..غير كذا إنتي عندك شغالة يعني لابتتعبين ولاشي!!!!!!!!!!!!!!!!!!!! اسمهان:خلاص إذن..حياك الله هذا الثلاثاء.. عزة:الله يحييك...ونتقابل على خير ================== وبالفعل جاء يوم الثلاثاء وطبخت اسمهان غداها ووقفت في المطبخ تستعد بأنواع الحلى والمعجنات وطلبت من الشغالة تجيها بدري عشان تنظف البيت.. عبدالرحمن:ماشاء الله..وش هالاجتهاد كله؟ اسمهان:زوجة صاحبك يوسف بتجيني اليوم..قلت خليني أجهز كل شي من الحين..عشان آخذ لي غفوة بالعصر... عبدالرحمن:الله يهديك..ومالقيتي تستقبلينها إلا اليوم؟؟بكرة عندك مدرسة ولازم تنامين بدري! اسمهان:وش أسوي؟شفتها متعلقة بـ الجية وحزنت عليها قلت بنفسي أكيد ذابحها الزهق!غير كذا هي مقدرة ظروفي وقالت إنها مابتطول عندي.. وبالعصر اتصل يوسف زوج عزة على عبدالرحمن وقال له: عبدالرحمن أهلي بيزورونكم اليوم فإش رايك آخذك معي ونروح لسلمان صاحبنا؟؟من زمان مااجتمعنا! عبدالرحمن:تم.. وبعد المغرب دق الجرس وكانت القادمة عزة..استقبلتها اسمهان وأول مادخلت عزة البيت وشافت بيت اسمهان قالت بنفسها:يحق لك تموتين بزوجك يااسمهان على كل هالعز اللي عايشة فيه! ودخلت المجلس بعد مافسخت عبايتها وجلست وقالت: السموحة يااسمهان..جبت عيالي الثلاث معاي عندك..لو عندي شغالة كان خليتهم عندها!! اسمهان:الله يحييكم جميعاً..بس وين هي شغالتك؟؟أتذكر لما جيت عندك كان فيه شغالة.. عزة:لا هذيك موب شغالتي..هذيك شغالة إختي.. اسمهان:وغريبة مافكرتي تجيبين لك شغالة وإنتي بيتك كبير وعندك أطفال؟؟ عزة:أساساً المرة الوحيدة اللي دخلت فيها شغالة بيتي..أيام ماكنت حامل بولدي الأخير هذا..وظلت عندي سنتين وسافرت بلا رجعة ورفض زوجي نجيب غيرها قال إيش؟؟إني حرمة أنانية واتكالية أرمي عيالي عليها وأطلع! اسمهان:وانتي صحيح تخلين عيالك عندها دايماً وتطلعين؟؟ عزة:ايه..وشفيها؟ من حقي أدوِر على راحة بالي! اسمهان:أنا من رأيي انه الشغالة لشغل البيت بس..أما مسئولية الأطفال فالمفروض تكون بأكملها على الأم.. عزة:تقولين كذا لأنك ماجربتي غثا البزران مثلي!!ساعتها ودك تفتكين منهم بكل وسيلة! اسمهان:صراحة أنا أمي ماتستغني عن الشغالات أبد..بس طول عمري أتذكر إنها ماقد خلت شغالة تلمسنا أو تحممنا أو تأكلنا وتشربنا وحِنا صغار..ولاحتى كانت تخلينا نجلس معاها ولو طلعت من البيت بالعكس كانت تخلينا مع أبوي..مو مع الشغالة.. واستغربت اسمهان من تناقض عزة والحاحها السابق على اسمهان انها تجيب شغالة وهي أصلاً ماعندها!!!!!!!!!! طالعت اسمهان بولد عزة الكبير وقالت:ماشاء الله ولدك بصف ثاني؟ عزة:لا بصف أول ابتدائي.. اسمهان:ليش؟أخرتيه عن الدراسة؟؟ عزة:لا أخرته ولاشي..دخل في السن الرسمي..بس ليش تسألين؟ اسمهان:لأن اللي أعرفه إنه لك 9سنوات متزوجة..يعني المفروض ولدك الكبير يكون عمره 8سنوات! عزة:ايه..بس أنا ماحملت إلا عقب زواجي بسنتين!! استغربت اسمهان للمرة الثانية وقالت بنفسها:غريبة هالعزة!تقول لي خلي زوجك يروح يحلل يمكن فيه بلا عشان كذا ماحملتي!وهي قعدت سنتين من غير حمل!! وأخذتهم السواليف وجاء وقت القهوة دخلت حليمة الشغالة وحطت القهوة وأطباق الضيافة اللي معاها..ناظرت اسمهان بالأطباق وقالت: يووه نسيت أطَّلع الحلى من الثلاجة وأقطعه!!عن إذنك ياعزة أروح أجيبه.. طالعت عزة بشغالة اسمهان وقالت:اش اسمك؟؟؟ الشغالة:اسمي حليمة.. عزة:انتي حبشية؟؟ حليمة:لا..أريترية.. عزة:صبي لي قهوة.. وصبت حليمة فنجال قهوة لعزة.. عزة:وكم راتبك اللي تعطيك اياه اسمهان؟؟ حليمة:600 ريال.. عزة(بنذالة):بس؟؟؟؟؟؟؟حرام اللي مثلك لازم تاخذ أقل شي850 ريال!أنا أخوي عنده شغالة أريترية ويعطيها ألف ريال بالشهر! حليمة:بس هنا مافي شغل كتير,,ومدام اسمهان ماعندها أطفال.. عزة:بكرة يجيها أطفال وتخليك تقعدين معاهم تخدمينهم وتروح هي الجامعة!! إلا اسمهان داخلة بصحون الحلى وخرجت حليمة من الغرفة وراحت للمطبخ.. وبعد السواليف قامت عزة بلقافتها المعهودة وطلبت من اسمهان تفرجها على البيت.. وقامت اسمهان توريها البيت ولما دخلت غرفة النوم,قامت عزة تتأمل بكل شي..وطاحت عينها على برواز صور موضوع على الكومادينة وينفتح مثل الكتاب وفيه مكانين لوضع الصور واحد على اليمين والثاني على الشمال بس اسمهان مو حاطة فيه صور حاطة بالجهة اللي على اليمين ورقة عبدالرحمن كاتب فيها قصيدة لها!!! تقول أبياتها:
كثر الغلا مايترجمه لمسة ونظرات غلاك ساكن بجوف القلــب ومتربع تعجز حروفي تعبر عنه بشعر وأبيات ياللي على الأصل رابـــي ومتطبع (ملحوظة من تأليفي..لاتدققون على الغلطات والتكسير)
وبالبرواز المقابل على اليسار كاتبة له اسمهان أبيات تقول فيها:
غلاتك إنتَ ماتنوصف ببحر كلمات صدقني إنها أسمى ودوم هي أرفع غلاك زايد في قلبي وعمره مامات فاضت لك أشواقي وبالحب هي تنبع (ملحوظة من تأليفي..لاتدققون على الغلطات والتكسير)
قالت عزة:حركات!تكتبون لبعض شعر؟؟ اسمهان:لا مو شعر بالمعنى الصحيح بس كلمات بسيطة ومحاولات..نعبر فيها عن مشاعرنا! عزة:أعذب الشعر أكذبه!! وبعد مارجعوا قعدوا تأخر الوقت وعزة ماخذة راحتها تسولف صارت اسمهان تنعس من التعب! وعزة كل مااتصل زوجها يبي ياخذها تقول له شوي لاتجي الحين!!من غير تقدير لظروف اسمهان اللي وراها مدرسة! عزة:أزواجنا راحوا لسلمان..تعرفين زوجته؟؟ اسمهان:ايه أعرفها جات عندي مرة ورحت لها مرة.. عزة:احذري منها تراها سوسة! اسمهان:بالعكس باين عليها أخلاق.. عزة:حبيبتي..الناس مالك منهم إلا الظاهر..بس أنا أدرى بسواد قلبها! ======== أستكمل معاكم بعد وقت..فيه أحداث جديدة!!
وصار يوسف زوج عزة كل شوي يتصل على عزة ويقول لها تجهزي بأجي آخذك وترفض لين ماصاح عليها بالنهاية! يوسف:استحي على وجهك عبدالرحمن عنده عمل بالصباح وزوجته عندها مدرسة..وانتي قاطة عمرك لاحيا ولامستحى؟؟ وجاء عبدالرحمن لبيته وطلع..وزوج عزة بالسيارة ينتظر وهي لازقة!!لين ماتمللت منها اسمهان..وقالت:ترى زوجك من أول ينتظرك تحت!! عزة:أعوذ بالله منه!كل شي عنده بالغصب! اسمهان:معذور مسكين بكرة عنده دوام بالصبح وأكيد يبي ينام! وخرجت عزة أخيراً.. عبدالرحمن:صدق إن هالحرمة وجهها مغسول بمرق تصدقين إن زوجها اتصل بها 5 مرات وإحنا عند سلمان عشان تستعد ويجي يآخذها لكنها رافضة ودها تقعد!! اسمهان:أنا لو أدري إنها بتتأخر لين هالحزة ماكان استقبلتها اليوم حتى الشغالة جلست عندي لين الساعة 9ونص بس زهقت وقالت:يامدام بكرة أجيك أكمل شغلي ماأقدر أتأخر!ماكنت أتوقع إنها بتلبد لين الساعة 12 ونص!! عبدالرحمن:يلا الحقي نامي كلها 5 ساعات ويأذن الفجر..وبعدها تبدأين تستعدين للمدرسة..وإذا تحسين نفسك مرهقة...غيبي بكرة! اسمهان:مستحيل!بكرة الجدول دسم!وغير كذا أفنان بتجيب لي الأشرطة والمطويات الدعوية عشان نغلفها أنا ونجلاء يوم الخميس..أما بكرة أبيك توديني السوق أشتري الخامات..وبعد العشا ضروري توديني المستشفى!! عبدالرحمن:ليش؟خير؟ اسمهان:بنت عمي سوت عملية الزايدة وودي أزورها.. عبدالرحمن:ان شاء الله..تصبحين على خير!! اسمهان:وإنت من أهله.. ================ ثاني يوم وكان يوم الأربعاء رجع عبدالمجيد من عمله ومعاه كيس كبير جايبه من المكتبة.. فتحته أم عبدالرحمن ولقيته مليان ألوان وفُرَش!! تغدى عبدالمجيد بسرعة وطلب من أمه مفتاح شقته اللي فوق! أم عبدالرحمن(وهي تكلمه بلغة الاشارة لأنه مايسمع):اش تبي بالمفتاح؟؟ جاوبها عبدالمجيد(بلغة الاشارة):أبي أرسم على جدار المدخل.. وطلع عبدالمجيد من الظهر وقعد يرسم على الجدار..وكان مبدع في الرسم جات شغالة اسمهان من الظهر وقعدت تشتغل... اسمهان:حليمة؟حاولي تخلصين أشغالك في العصر بسرعة عشان عقب المغرب وراي طلْعَة!! حليمة:مدام أنا أبغى أقولك حاجة! اسمهان:تفضلي.. حليمة:أبغاكي تزيدي راتبي! اسمهان:أزيد راتبك؟؟ليش؟وكم تبين الزيادة؟؟ حليمة:أبغى 850 ريال!!كل قريباتي ياخدوا كده و أكتر!! اسمهان:بس ياحليمة انتي شايفة بيتي!نادراً ماأستقبل ضيوف..والمجالس مرة وحدة تنظفينها من الغبار في الأسبوع..وغرفة نومي ماأخليك تدخلينها وأنا اللي أنظفها بنفسي..يعني مايصفالك إلا الصالة والمطبخ وحمام واحد وأحياناً غسيل وكوي!وماعندي أطفال حتى أقول إنه البيت كل شوي يتوسخ ويبي له مجهود!! حليمة:بس 600 قليلة عليا أبغى أكتر! اسمهان:هذا ثاني شهر لك عندي وتوِك تعترضين؟؟بعدين أنا من البداية متفقة معاك على هالمبلغ ومااعترضتي!اش اللي تغير يعني؟وتدرين إني لو مستقدمة وحدة أندونيسية كان أوفر لي؟؟على الأقل الأندونيسية تاخذ نفس راتبك بس تعيش معاي سنتين تخدمني ليل بنهار وتطبخ حتى!لكن انتي ماتقعدين عندي يومياً إلا 3 ساعات بس!والجمعة اجازة بعد.. حليمة قولي الحمدلله وارضي براتبك..ودوري شغل اضافي بالصبح إذا الراتب فعلاً مايكفيك.. لوت حليمة بوزها وماعجبها الكلام!بس قعدت تكمل شغلها.. وفي العصر جهزت اسمهان الشاي والمكسرات لعبدالرحمن وراحت تقعد معاه بالمكتب لكن عبدالرحيم أخوه اتصل فيه وقال له:تعال أشاورك في بعض الأمور الخاصة بزواجي.. استأذن عبدالرحمن من اسمهان وقال:أنا نازل لأمي ولعبدالرحيم يبوني..اشربي انتي الشاي بالعافية.. اسمهان:ماراح أشرب برَّاد كامل..خذ الشاي معك واشربوه هناك.. أخذ عبدالرحمن الشاي ونزل..اتصلت اسمهان على أمها وسولفت معاها شوي.. الأم:اش رايك تزورينا بكرة؟؟ اسمهان:لا يمه بكرة بأروح لصاحبتي نجلاء لكن يوم الجمعة أجيكم على الغداء.. وبعد ماانتهت المكالمة قامت اسمهان تاخذ دش.. وكان حمام غرفة النوم بداخل الغرفة!! صكت اسمهان باب مدخل غرفة النوم ودخلت الحمام وصكت الباب وقامت تتحمم.. بعد ماخرجت من الحمام لقيت باب مدخل غرفة النوم مفتوح واستغربت!! وبعد مامشطت شعرها وانتهت راحت تشوف حليمة وش تسوي..لكن لقيت إن حليمة مو موجودة!! واستغربت اسمهان إن حليمة راحت من غير ماتترك خبر ومن غير ماتكمل شغلها فاعتقدت انها راحت زعلانة عشان رفض اسمهان لطلب زيادة الراتب!!! لكن يوم رجعت اسمهان لغرفتها وقامت تدهن وجهها بكريم طاحت عينها على التسريحة وافتقدت صندوق الذهب!! انجنت اسمهان وانهارت وفهمت انه الشغالة سرقتها وهربت!! واتصلت على عبدالرحمن وهي تبكي! عبدالرحمن:اسمهان اشفيك تبكين؟عسى ماشر؟؟ اسمهان:حليمة ياعبدالرحمن حليمة!!الحقني!! قفل عبدالرحمن السماعة وطلع يركض وأمه وأخوه مستغربين!! عبدالرحمن:اشفيك؟؟علميني؟ اسمهان:حليمة سرقت ذهبي!! عبدالرحمن:وانتي وين كنتي؟؟ اسمهان:أتحمم.. عبدالرحمن:وكم قيمته هالذهب اللي سرقته؟؟ اسمهان:هذا ذهبي كله اللي من جهازي وكل الهدايا اللي جتني..قيمته تقريباً40 ألف ريال إذا مو أكثر!! عبدالرحمن:حسبي الله ونعم الوكيل 40 ألف ريال طارت من قدامك ياعبدالرحمن بغمضة عين!! اسمهان:ماعليك بكرة لما تجي تشتغل بأخنقها لين ماتعترف وين ودت الذهب!! عبدالرحمن:أي بكرة؟ضحكتيني!معاها ذهب يسواله 40 ألف وتبينها ترجع تشتغل عندك ب600 ريال؟؟صدق إنك غشيمة!هذي هربت وما في نيتها ترجع!! اسمهان:والسوات؟؟ عبدالرحمن:بأتصل بصاحبي اللي شغالته دلتنا على حليمة وأخليه يجيب لي عنوان بيتها وأنا بأتصرف!! واتصل عبدالرحمن على صاحبه وبعد السلام.. عبدالرحمن:ياجابر طلبتك أبيك تخلي شغالتك تعطيني عنوان شغالتنا نبيها ضروري!! جابر:وشغالتنا من وين نجيبها؟وهي شردت من عندنا اليوم الظهر!لا وسرقت جوال زوجتي واللاب توب حقها!! عبدالرحمن:إذن السالفة سالفة عصابات؟ جابر:ليش؟لايكون انسرق عليكم شي؟ عبدالرحمن:ايه أبشرك.. زوجتي انسرق ذهبها كله!! جابر:أعوذ بالله..صدق من شاف بلاوي الناس هانت عليه بلوِته!!والمشكلة اننا مانقدر نتصرف..لا نعرف لهم عنوان ولاشي..ولو نشتكي للشرطة يسجنونا بدالهم..وبيقولون:مين سمح لكم تتسترون على أشخاص مخالفين للقانون وماعندهم اقامات؟ عبدالرحمن:صادق..القانون لايحمي المغفلين! وبعد ماانتهت المكالمة..حكى عبدالرحمن لاسمهان السالفة وقعدت تبكي متحسرة على ذهبها اللي راح.. عبدالرحمن:مالي وجه حتى أقول لأمي وهي من البداية ماشجعتني أجيب شغالة من هنا..وكأنها حاسة انه بيصير لنا شي!! ولما أذن المغرب استعدت اسمهان للطلعة وراح عبدالرحمن للمسجد يصلي وهو راجع نادته أمه وهو بالحوش ودخل عندها.. أم عبدالرحمن:إنت مو ضايع عليك شي؟ عبدالرحمن:لا..ليش؟؟ أم عبدالرحمن:أبد!شفت هالكيس وقلت يمكن يخصكم! ويوم أخذ الكيس من أمه وفتحه لقي بداخله صندوق الذهب حق اسمهان!والذهب موجود كله بالداخل!! عبدالرحمن:يمه؟شلون وصل هالكيس عندك؟؟ أم عبدالرحمن:شغالتكم وهي شاردة كان أخوك عبدالمجيد نازل من شقته فوق بعد مارسم على الجدار..ولما شافها تركض وبيدها كيس حس إن الموضوع موب عادي وراح يجري وراها عشان يصك عليها الطريق..ومن خوفها رمت الكيس وهربت!! جاب عبدالمجيد الكيس لي ولما فتحته شفت الصندوق وعرفت انه لاسمهان وقلت بنفسي خلني ساكتة لين ماتفتحون الموضوع..بس لقيتكم باردين ولاجبتوا طاري قلت خلني أنا أعطيكم اياه.. سجد عبدالرحمن سجدة الشكر وحمد الله...وطلع لاسمهان اللي كانت لابسة عباتها تنتظره عشان يطلعون.. ودخل وعطاها الكيس.. اسمهان:اش هذا؟ عبدالرحمن:افتحيه.. ولما فتحت الكيس ولقيت الصندوق انهبلت من الفرحة..وقالت:صدق إن المال الحلال عمره مايضيع!!!!!!!!! =============== أستكمل معاكم بعد وقت بإذن الله..
راحت اسمهان السوق يوم الأربعاء تشتري خامات التوزيعات اللي بتسويها لرانية.. وبعد ماانتهت راحت للمستشفى تزور بنت عمها اللي مسوية عملية الزايدة وقابلت بعض أقارب أبوها اللي لهم مدة ماشافوها.. زوجة عمها:هاه؟بشري!إن شاء الله في الكرشة شي؟؟ اسمهان:لا مافي.. زوجة عمها: غريببببة!!مها وابتهال تزوجوا بعدك والحين كلهم حوامل! اسمهان:لأنه مقدَّر لهم يحملون..و ماحد ياخِذ أكثر من نصيبه. وحاولت اسمهان تغير الموضوع وجابت لهم طاري الشغالة اللي سرقت ذهبها والشغالة الثانية اللي سرقت جوال ولاب توب زوجة صاحب زوجها... بنت عمها:الحمدلله إن ذهبك رجع لك..والحرمة اللي انسرق جوالها وكومبيوترها زين اللي عدَّت على كذا غيرها انسرقوا عياله!! وحدة من زوجات أعمام اسمهان:أما هذول الشغالات صرنا نسمع عنهم قصص تشيب الراس..تصدقون إن بعضهم يسرقون الأطفال من يوم هم صغار ويضمونهم لعصابات ويعلمونهم الشحاتة والسرقة!!ومو بس كذا ياخذون الطفل ويشوهونه يا يفقعون عينه يايقطعون ايده أو رجله عشان يشحت ويستدر عطف الناس ويعطونه فلوس!! الزوار:أعوذ بالله.. وحدة من الزوار:غير انهم يحبون الانتقام ويرتكبون جرايم القتل البشعة... وحدة ثانية من بنات عم اسمهان:هذا غير السحر اللي يسوونه الله يكفينا شرهم ..تصدقون صاحبتي لها سنين تعاني من السحر والسِبَة شغالتها..سحرتها بعد مارجعت لبلدها..حقودات حيل أعوذ بالله منهم.. وحدة من الزوار:وأما عن الدعارة والتحرش بالأطفال فحدِّث ولاحرج!! بنت عم اسمهان:لا والمشكلة الوحدة فيهم تجي من بلدها بسجادتها وشرشف صلاتها ينقال وش ذا الالتزام!وتشوفين أفعالها بعدين وتتعجبين! زوجة عم اسمهان:أتوقع والله أعلم إنهم يؤدون الصلاة كعادة مو عبادة!! وحدة من الزوار:إلا عشان هم قاعدين بغربة يستحلون الحرام ولايهمهم!!! بنت عمة اسمهان:أنا الصراحة أشوف إنه المفروض ماحد يستقدمهم إلا اللي محتاج لهم ضروري وعنده ظروف خاصة!لأنه الدارج هاليومين للأسف إنه بعض الناس يجيبونها كمظهر اجتماعي وكماليات! وحدة من الزوار:واللي شغل بيتها كثير ومافيها نشاط تشتغل اش تسوي؟؟؟؟ بنت عمة اسمهان:تسوي مثل ماقال الرسول(صلى الله عليه وسلم)لبنته فاطمة..قبل ماتأوي الوحدة لفراشها تسبح الله ثلاث وثلاثين مرة وتحمد الله ثلاث وثلاثين مرة وتكبر ثلاث وثلاثين مرة خير لها من خادم..وكثير من اللي جربوها قالوا نصحى اليوم الثاني وإحنا نحس بنشاط!!!!!!!! وحدة من الزوار:بس الظليمة شينة..أنا أمي عندها شغالة لها 9سنوات تشتغل وقمة في الإخلاص..وشغالتي لها أربع سنين عندي كل ماجت بتسافر قعدت تبكي علينا كأننا أهلها!!! وحدة من أقارب اسمهان:الخير والشر بكل مكان و فيه منهم الصالح والطالح.. واستمرت السواليف إلى ان انتهت الزيارة.. ثاني يوم راحت اسمهان لنجلاء وبدأوا في تغليف الأشرطة والمطويات اللي أخذتها اسمهان من أفنان في المدرسة.. وكان بـ كل توزيعة كاسيت و3 مطويات..وحدة عن منكرات الأفراح+وحدة عن حق الزوج والزوجة+وحدة فيها 50 حديث تخص النساء.. غلفوا نجلاء واسمهان التوزيعات بقماش سدو وعلقوا مع كل توزيعة مسبحة وميدالية فيها(مبخرة ودلةو جرة) ومن برة علقوا كرت على شكل مهفة(مروحة خصف) ومكتوب عليها.. هديتي إليكم..
رانيـــــــــــــــة
وبالأخير حطوا كل التوزيعات في سلة خصف لبسوها قماش سدو وعلى طرف السلة عروسة سووا لها لبس شعبي ولبسوها شيلة على راسها.. ============= يوم الجمعة راحت اسمهان لأهلها على الغداء كالعادة.. وكانت سماح ثقلانة في حركتها! اسمهان:ماشاء الله صرتي بأي شهر الحين؟؟ سماح:دخلت التاسع!!والله يعين على ملكة ناصر باقي عليها أسبوعين ومدري كيف بأحضر بهالشكل!! أم اسمهان:الله يعينك..أمس كلمتني ابتسام وحتى هي تعبانة وعلى نهاية السابع..وأم زوجها عندها وبناتها بالمدرسة وشغل البيت هالكها..قاعدة تعد الأيام عد عشان تبدأ الاجازة وتجينا! أسماء:يلا هانت..كلها أسبوعين وتبدأ الاجازة.. اسمهان:استعديتوا لملكة ناصر ياسماح؟؟ سماح:ايه كل يوم وهو يتشرط على أمي!!بس ماعلي منه قلت لأمي خذي هند معاك ماني بخلق أسواق..وماقصروا شروا العربية والشبكة وجميع مستلزماتها.. ============= أستكمل معكم إذا تيسرت ظروفي
أقبلت الاجازة وبدأت استعدادات رانية للملكة وفي بالها خيالات وأفكار عن عريس الهنا!! وبيوم الملكة كانت التجهيزات واضحة من مدخل القاعة ..خيمة منصوبة وبداخلها أشياء تراثية..وريحة البخور فايحة وحرمة لابسة ثوب بدوي وبرقع وقاعدة تسوي قهوة على منجل الفحم(المشب) وكل زائرة تدخل تناولها هالحرمة فنجال قهوة! وكانوا قريبات رانية كثيرين جداً وواقفين بانتظار الترحيب بالزوار بالغطاريف..وجدَّاتها جالسين وكل عجايز العيلة.. وصلت اسمهان وأم زوجها وجوهرة وأحلام للقاعة وبعدهم نجلاء ومرام دخلوا القاعة بوقت واحد.. طالعت نجلاء بالخيمة المنصوبة بمدخل القاعة وقالت:وش هذا؟ مضَارب بني عبس؟؟؟ مرام:أقول لو شفتي رانية وهي بالصالون عندنا تقولين بدوية صدق؟؟متحنية ,وناقشة اليدين والرجلين والمكياج البدوي(الغجري) اللي الكحل مركز حول العين وراسمين لها بـدقنها رسومات تقولين مترقمة!! نجلاء:حلو التغيير!! ودخلوا القاعة وكانت الكوشة بديكورات تراثية...
والحلو بالموضوع إنه كل طاقم الضيافة كان لابس لبس موحد خليجي... والطاولات كان فوق كل طاولة صحن كبير فوقه نخلة معلَّق فيها تمر سكري وحول النخلة 3 أبيار كل بير(بئر) بداخله شي مختلف واحد فيه _شوكولا-الثاني بيتيفور-الثالث معمول!!!! وديكور القاعة وتزيين المسيرة كان كله من التراث.. حضروا أهل اسمهان وأهل تركي..تركتهم اسمهان وراحت مع صاحباتها يسلمون على رانية في غرفتها.. كانوا مجموعة من بنات أعمام وأخوال رانية عندها بالغرفة... سلموا الشلة على صاحبتهم..وتفاجئوا بمنظرها!! نقش الحنة
اسمهان:الله الله ياحركات..شكلك تراثي من جِد! بنت عم رانية:رانية دايماً كذا!خالِف تُعْرَف!!! بنت خال رانية:أكثر ناس مبسوطين بهاالأجواء العجنجز اللي برة!!قاعدين يتذكرون الماضي! رانية:يلا..خلهم يرضون عني مرة بالعمر!وهم كل مناسبة ناشبين في حلقي خصام وهواش ومعَايرْ!! وكانت رانية..لابسة ثوب تراثي..وهامة على راسها واكسسوارات شعبية بأحجار ملونة..
نجلاء(تهمس بإذن رانية):ترانا مشاركينك بالزفة!!لا تخرعين لاطلعنا قبلك على الممر! رانية:هههه كنت متوقعة..بس بالله لاتفشلوني وتسوون شي ماله علاقة بـ زفتي!! أفنان:ياترى اش شعورك الحين؟ رانية:لاتسألوني..تصدقون يابنات قلبي يخبط يرقع!! مرام:وياترى اش هي توقعاتك عن العريس؟؟ رانية:أتخيله مثقف و جاد و رزة!! الله يعينه على صرقعتي!! عاد اسمهان تضحك بداخلها وتقول:آه لو درت عن نويصر اش بتقول!!!!! وخرج الجميع من الغرفة وهم يباركون لرانية ويتمنون لها ليلة سعيدة وموفقة.. وقعدت رانية تتصور..وطلبت من أمها تكلم أبوها والعريس يجون يتصورون معاها.. اتصلت أمها بأبوها وجاء وجاب ناصر معاه...اللي جاء كاشخ ببشت!! دخل الأب وناصر الغرفة على رانية الي كانت مثل القمر ومن الخجل حاطة عيونها بالأرض! ناصر:وين عروستي ياجماعة؟؟ أبو رانية(ويأشر على بنته):هذي عروستك! ناصر:لا ياشيخ!جايبين لي عجوز من الجنادرية وتقولون عروستك؟!! كتمت رانية غيظها وسكتت! أما أمها وأبوها ظلوا يضحكون! وقفوا تصوروا بصمت وخرجوا الأم والأب والمصورةمن الغرفة.. التفت ناصر لرانية وقال:مبروك ياعروس! رانية:الله يبارك فيك. ناصر:مبروك عليك ناصر أحلى شاب بالديرة..!! رانية:ههههههه..حلوة ثقتك بنفسك!! قام ناصر يتأمل بوجه رانية بصمت ومن الخجل رانية ذابت!! وشوي قام يرَقِص حواجبه!وبعدين يهز خشمه ورانية مستغربة وقام يحرك فمه يمين وشمال! اخترعت رانية وقالت:اشفيك؟مهبول؟؟؟ ناصر:ههههههه..لا بس بغيت أختبرك وأشوف هل انتي بكامل قواك العقلية؟؟ رانية:لا تطمن..إلى هذي اللحظة أنا بخير! ناصر:عندي سؤال يبي يسدح نفسه غصب؟!! رانية:تفضل.. ناصر:وش قصدك بهاللبس اللي لابسته؟انقرضت الملابس من الديرة؟ولا بتقودين مظاهرة شعبية لحقوق الجدَّات؟! رانية(بغيظ):لا وإنت الصادق ناوية أذكرك بأمك الله يرحمها!! ناصر:لا لاتذكريني الله يرحمها! رانية:إلا أمك الله يرحمها وش كان اسمها؟ ناصر:قل أعوذ برب الفلق!!وانتي ليش تسألين عن اسم أمي؟خُبري ماحد يسأل عن اسم الأم إلا الدجالين والسحرة قبل لايستعينون بالجن!!! رانية(بنفسها):أنا أشهد إن هالرجال موب صاحي! دق باب الغرفة عليهم ودخلوا أخوان رانية مشاري ومشعل.. مشاري:ماحد ناداني أتصور وأسلم عليك ياعروس..قلت أجي بنفسي.. رانية:لما ألبس الفستان الثاني تصور معاي مرة وحدة..هالحين المصورة خرجت شوي مشاري:هي باقي فيها فستان ثاني وثالث؟؟ايش؟ناوية تستعرضين دولاب ملابسك قدام الحضور؟؟وش عليك بنت بطرة وفشخرة على خرطي!!إلا وشلون العروس معك ياناصر؟؟ ناصر:إختك هذي عجيــــــــــــبة!ماشاء الله الله يحفظها!! مشاري:تراني جيت أعلمك بكلمة السر حقتها!لاشفتها معصلجة معاك شوي..فما عليك إلا تشيل الطار(الدف) وتطق عليه ياهي بتقوم تطامر قدامك تقول ساكنها قبيلة جنانوَه!!!! ناصر(بصوت عالي):يانااااااس هاتوا لي طار! رانية:أقول ؟تراني من أول الليل وأنا أتهزأ!قم ضف وجهك واطلع إنت وأخوك..يلا! خرجوا مشاري ومشعل..وجلست رانية على كرسي وقام ناصر يناظر فيها وهي رافعة حاجبها وكأنه موب عاجبها!! ناصر:حسبي الله عليهم! رانية:مين هم؟؟ ناصر:الناس اللي اضحكوا علي! رانية:شلون ضحكوا عليك؟؟ ناصر:قالوا لي البنت لما تجلس مع خطيبها بأول مرة عيونها توصل الأرض من الحيا!بس الحقيقة انتي لسانك هو اللي واصل للأرض!!! رانية:استغفر الله.. إلا أم رانية دخلت وقالت:عفواً ياعريس..الحين صار وقت الزفة الأولى..تقدر ترجع براحتك الحين لقاعة الرجال..وإحنا بنزف رانية عند الحريم.. واستأذن ناصر وراح للرِجال.. أما رانية طلعت من باب يودي لمدخل القاعة..ووقفت ووقفوا وراها فرقة للطق الشعبي وهم لابسين ملابس شعبية...وبنتين من بنات خالها ومعاهم مرشات الورد وبنتين من بنات عمها ومعاهم مباخر.. وبدأت الفرقة بالغطاريف ثم بعالي الصوت:ألف الصلاة والسلام عليك ياحبيب الله محمد!!للللللوش ورانية تمشي ببطء إلى ان وصلت لدرجة المسيرة الطويلة وطلعت وكانوا صاحباتها(اسمهان-مرام-نجلاء-أفنان)واقفين ينتظرونها ولابسين الجلابيات الشيفون المطرزة فوق فساتينهم وعلى روسسهم قلايد ذهبية شعبية.. ولما بدأ الطق قاموا يرقصون قدامها ويمشون وهي تمشي وراهم..وبنص المسيرة وقفوا وقاموا يرقصون رقص اماراتي بشعورهم..ثم بالعصي ويطقون رقابهم.. قامت رانية تهمس لهم من تحت أضراسها:يانذلات عبروني!! انتبهت لها اسمهان وقالت:اش تبين؟؟ رانية:فيني رقصة..ودي أرقص خذوني معاكم!! مسكتها نجلاء من يد واسمهان من يد ورقصت معاهم على خفيف... ولما بدأوا يقتربون من الكوشة بدأ الطق يسير سريع وراحوا الشلة قبل رانية ووقفوا حول الكرسي اللي بتجلس عليه.. وجلست أخيراً على الكرسي... قربت منها اسمهان وسألتها:هاه؟بشري؟اش رايك بالعريس؟؟ رانية:بالله هذا تسمينه عريس؟؟هذا يلبسونه طربوش ويوظفونه بالسيرك أبرك!!! اسمهان:ههههههههه..ليش؟ رانية:ماخذ الدنيا سبهللة..زيادة عن اللزوم!بس دواه عندي! اسمهان:إيه..وأنا أشهد.. رانية:حتى اسم أمه ماقال لي عليه..من زود خفة الدم! اسمهان:اسمها (شَمَّه)! رانية:طيب ياولد شمَّه!الزواج موعدنا! جلسوا الطقاقات وقاموا يطقون..وصاروا البنات يرقصون الشلة على بنات أقارب رانية وقامت رانية معاهم!!!! وطلعت جدتها (أم أبوها)تركض على المنصة وراحت قرصتها في ركبتها وقالت:انثبري يابنت..يازين الركادة!! انحرجت رانية وقالت للي حولها:يقولون اخواننا المصريين(اللي تقرص العروسة في ركبتها تحصلها في جمعتها)يظهر إن جدتي ودها تتزوج!!! البنات:ههههههههههههههههه الجدة:أقول قليعة تقلعك ياأم لسانين الله يرحم جدك ماأرضى به بديل!بس إني خايفة أهل عريسك يشوفون خبالك ويهونُون منك!!! ونزلت اسمهان ومعاها غرشات وتولات عوده تطيب بها الحاضرات..وأفنان تدور بينهم بالتوزيعات الدعوية ومرت اسمهان بطاولة عليها 4حريم وطيَّبتهم بالعودة فقالت وحدة منهم لاسمهان:طاب طيبِك..وعاش حبيبك! اسمهان:من فمك لباب السماء يارب! وتركتهم ومشت.. قامت الحرمة تقول للنسوان اللي معاها:أما بنات هالوقت جريئات وقليلات حيا!الوحدة منهم تسمع سيرة حبيب أو خطيب تلاقونها بتطير من الشفاحة!!! سمعتها اسمهان ورجعت للطاولة وضربت بيدها طرف الطاولة وقالت:للمعلومية..تراني متزوجة!!! انحرجت الحرمة وقالت:يووه السموحة منك على بالي بعدك بنية!ماشاء الله شكلك صغيرة!!! وراحت اسمهان واللي على الطاولة يضحكون.... وهي ماشية لاحظت انه فيه حرمة تناظرها من أول الملكة بنظرات نافذة ودقيقة..صارت اسمهان كل ماتمر من جنبها تقرأ على نفسها المعوذات!!! مرت دقايق ورجعت رانية لغرفتها استعداداً للزفة الثانية..... ولبست هذا الفستان...وكانت تسريحتها من البداية تسريحة بسيطة..لما لبست الفستان أضافت اكسسوار أحمر على شعرها..مناسب للفستان
وكانت الزفة الثانية على شريط بدايته فيه قصيدة ومؤثرات صوتية بشرية...وبعدين أغنية على الدفوف فقط.. والمسكة ورد أحمرطبيعي ومعاه كريستالات..وكانت رانية ماشية لوحدها.. لما وصلت للمنصة..طلعوا سماح وأهلها وزوجات أخوان ناصر وبناتهم يسلمون عليها..والعربية كانت على المنصة..تصورت رانية جنبها! باركوا لها الجميع... ورقصوا لها وبعد مرور وقت وهي على المنصة أعلنت أمها حلول وقت العشاء...أما رانية رجعت لخطيبها بالغرفة اللي قام لبسها الشبكة! ويوم شافها قال:ايه ياشيخة هذا شكل عروس.. مو الثوب اللي لابسته قبل كأنك جاية من متحف التراث!! قالت رانية(بداخلها):صدق ان الثيران..مايعجبهم إلا اللون الأحمر!!! وكانوا سماح وهند واقفين بنفس الغرفة ومتغطيات وبنات أخوان ناصر واقفين مع عمهم ويساعدونه في تلبيس العروسة للشبكة ويطقون له على الدفوف.وأم تركي معاهم وفرحانة لفرحة ناصر.. أم تركي:مبروك ياولدي الله يهنيكم ويوفقكم دايم قولوا آمين.. رانية وناصر:آمين.. ناصر:عقبال تركي ان شاء الله... ومرت الليلة بفرحة..وفي صالة العشا كانت الحرمة اللي مضايقة اسمهان بنظراتها كل شوي تقترب منها وهي قاعدة تغرف أكل من البوفيه!حاولت اسمهان تبتعد عنها وتقعد مع أم عبدالرحمن وجوهرةعلى نفس الطاولة!لكن الحرمة فاجئتها بأنها لحقتها والتفتت لأم عبدالرحمن وقالت:هالمزيونة بنتك؟؟ أم عبدالرحمن:لا..بس تقدرين تقولين حسبة بنتي! الحرمة:ترى أنا ماأحب اللف والدوران عندي ولد وقاعدة أدور له عروس..ومالقيت أحسن من بنتكم..اش رايكم؟؟ أم عبدالرحمن وهي تضحك:شاوري العروس..وإن وافقت عليك بالعافية!!! الحرمة:اش رايك ياعروس؟؟ اسمهان:مدري..بأشاور زوجي وأرد لك!! أحلام وجوهرة وأم عبدالرحمن:هههههههه الحرمة:ايــــــــــــــــــــــــــــش؟انتي متزوجة؟؟قولي والله! أم عبدالرحمن:ايه لها عشرة شهور متزوجة..وترى هي زوجة ولدي.. الحرمة:ههههه آسفة حسبتها خالية..مادريت انها مشغولة..عن إذنكم.. أحلام:هههه مين قدك ياسمهونة؟جاك عريس! وبعد العشا قاموا بنات العائلة يباشرون على الحضور بالتفاسير وكانت عبارة عن صناديق تراثية صغيرة وبداخلها(لبان ومستكة وهيل وقرنفل وحلاوة نعناع) -------------- في نهاية الملكة..لما ركبت اسمهان السيارة... عبدالرحمن:كيف كانت الملكة؟؟ اسمهان:تهبببببل! عبدالرحمن:وش آخر الأخبار؟؟ اسمهان:أبد ...جاني عريس! عبدالرحمن:بأسوي نفسي ماسمعت شي!!!!!!!!
جزء آخر يالغاليات ثاني يوم من ملكة رانية اتصلت عزة على اسمهان!!!!
بعد التحية والسلام.. عزة:إلا متى ملكة صاحبتك اللي كنتي مشغولة فيها؟؟ اسمهان:كانت أمس.. عزة:أفا عليك يالظالمة!وليش ماعلمتيني؟؟ اسمهان:وليش أعلمك؟؟ عزة:عشان أحضر!!خاطري أشوف صاحباتك اللي تحبين تتكلمين عنهم !هم مثل الوصف أو لا!!! اسمهان:لو إنها ملكة أحد من أقاربي كان عزمتك..لكن تدرين هي ملكة صديقتي يعني مالي علاقة.. عزة:يالطيف يارب!يعني أنا بأزيد الزحمة في القصر؟!! اسمهان:معليش..ان شاء الله تجين بزواجها... عزة:وش رايك تزوريني بكرة؟؟ اسمهان:ياليت أقدر..بس تدرين الاجازة كلها كم يوم بس. يالله تكفيني أقضيها مع أهلي وزوجي. عزة:وزوجك هذا ماشبعتي فيه لسه؟؟ اسمهان:اش أسوي ظلمته معاي أيام المدرسة..طول الوقت حاطة حيلي بالدراسة وأنام بدري..هالحين فرصة أعوضه شوي.. عزة:وبكرة يمل منك..ولايسأل فيك احسبي له كم شهر بس!! اسمهان:الله لايقدِّر!! عزة:وشغالتك ليش ماتخلين كل الشغل عليها..وانتي اقعدي مع زوجك! اسمهان:شغالتي هجت ياعزة..بغتني أزيد راتبها وماعطيتها وجه..وشردت وسرقت ذهبي! عزة:كل ذهبك؟؟ اسمهان:ايه بس الحمدلله لقيناه..آثاريها رمته وهربت من الخرعة.. عزة:ماعليك منها..جيبي غيرها! حست اسمهان انه عزة تتجاوز حدودها أحياناً.. فقالت اسمهان:إنتي أولى بالشغالةمني!عندك 3 أطفال ماشاء الله.. إلا عبدالرحمن دخل البيت.. اسمهان:يلا..ما أطول عليك زوجي جاء...مع السلامة.. عزة:مع السلامة.. وقفلت عزة السماعة وقالت لنفسها:والله ونبت لك ريش يااسمهان وصرتي تردين! ---------------------------- في بيت أهل تركي كان تركي قاعد مع أخواته هند وسماح وأمهم تركي:تصدقون؟؟أهل خطيبتي يوم إنهم متواضعين ومايبون يكلفون علي بشي كبروا بعيني! هند:أعظم النساء بركة أيسرهن مؤونة.. سماح:جزاهم الله خير..هذا زواج مو بيعة عشان يسوون اللي سوته أم عبير!!! أم تركي:بالله لاتجيبين طاريهم.. ينقبض قلبي لاتذكرت سالفة السِحر.. تركي:ماعلينا..بس من جد أحس إن أهل أفنان يستاهلون مِين يكرمهم ويقدرهم على تواضعهم..عشان كذا ناوي أخلي ليلة زواجنا أحسن ليلة.. سماح:إلا اش أخبار ناصر بعد ليلة أمس؟؟ تركي:ناصر بيستخف!وِده يطير من الفرحة.. هند:يلا الحمدلله..ان شاء الله يعقل بعد الزواج من الخفة اللي فيه!! تركي:لا لا نويصر مابيعقل!بو طبيع مايجوز عن طبعه!! ------------------------ مرت الاجازة واسمهان كل يوم تزور أهلها..وتجتمع مع أسماء وابتسام..وبيوم اجتمعت معاهم سماح وكان شكلها تعبان ومرهق وتحس بالآم.. أم اسمهان:اشفيك ياسماح؟شكلك مرة تعبانة..لايكون ولادة؟؟ سماح:لا باقي على ولادتي أسبوع... أم اسمهان:بس شكلك مايطمن! سماح:لأني أسهر كل يوم.. وتعشوا كلهم مع بعض وهم ساريين.. مسكت أم اسمهان ولدها محمد وقالت:اسمع ترى زوجتك شكلها مايطمن نصيحة وديها المستشفى قبل ماتروح البيت.. محمد:يايمه سرى الليل..بأوديها بكرة.. أم اسمهان:اسمع مني منت خسران..خل عيالك وشغالتكم عندي وروحوا المستشفى وطمنونا.. وبالفعل راحوا سماح ومحمد للمستشفى.. وبعد فحصها لاحظوا انه نبض الجنين ضعيف..وسماح تحتاج لولادة عاجلة..أعطوها طلق صناعي ومافي فايدة الجنين مرتفع ونبضه يضعف فاضطروا انهم يقررون لها ولادة قيصرية!!! اتصل محمد وخبَّر أمه.. أم اسمهان:قلت لك شكلها موب عاجبني!آثاريها تعبانة المسكينة توكل على الله وسوي لها العملية لايسير بالجنين شي..وعيالك لاتشيل همهم بأحطهم بعيوني..هذا هم نايمين.. محمد:ادعي لها يمه.. أم اسمهان:يارب احفظها ويسر ولادتها واحفظ ذريتها.. محمد:أتصل بأمها؟؟ أم اسمهان:لاياولدي..بتقلقها بهالليل..لاخرجت من غرفة العمليات يصير خير.. وبعد وقت من الانتظار ولدت سماح بنوتة حلوة..سماها محمد(اسمهان)...... --------------------------
بعد ماولدت سماح اتصل محمد وبشَّر أمه وكان وقت متأخر من الليل وبقي مدة قصيرة على صلاة الفجر... أم اسمهان:مبررررروك الله يبشرك بالخير..وكيف صحة سماح والنونو الصغيرة؟؟؟ محمد:كلهم بخير... أم اسمهان:خلك مع زوجتك الحين ورافق معاها وبإذن الله من الظهر بأجيكم... محمد:وأهلها كيف أبلغهم؟ أم اسمهان:وقت صلاة الفجر أكيد بيقومون للصلاة..اتصل بتركي بشره وأكيد هو بيقول لأمه...بس لاتقلقهم ياولدي وتقول الولادة قيصرية..خلهم يعرفون بعدين.. ونفَّذ محمد كلام أمه واتصل بتركي وخبره بولادة سماح.. ونقل الخبر لأمه اللي من قبل صلاة الظهر وهي في المستشفى عند بنتها.. أما اسمهان لما وصلها الخبر طارت من الفرحة..وقالت لزوجها.. عبدالرحمن:مادام سموا بنتهم على اسمك فلابد نشتري لهم هدية محرزة.. اسمهان:أنا في خاطري أهدي المولودة بروش ذهب بإسمها(اسمهان)ويكون مفصص بعد! وفي العصر راحت اسمهان سوق الذهب اللي وعدوها يفصلون لها البروش وينتهي بعد يومين.. فقالت لعبدالرحمن:مو مشكلة أعطيها الهديةبعد ماتطلع من المستشفى..الحين بأشري لها سبت شوكولاتة كبير.. ولما وصلت المستشفى لقيت أهلها كلهم موجودين وأم سماح وأختها هند وبعض أقارب سماح.. وكانت سماح تحكي لهم عن ولادتها وكل وحدة من الزائرات تحكي تجاربها في الولادة.. أم تركي:أقول يازين ولادتنا أيام زمان..لاخياطة ولاتعب..والوحدة من ثاني يوم تقوم ببيتها!!! أم اسمهان:لا حرام عليك..هذا لأنك ماجربتي ولادة المستشفيات ياأم تركي..أما أنا ولدت عيالي كلهم بالمستشفى..راحة وخدمة واهتمام وإن كانت المستشفيات زمان مو مثل الحين!!وبالذات لاكانت حكومي تلاقين أنواع الاهمال من الممرضات!!لكن أفضل من البيت بكل الأحوال.. وحدة من أقارب سماح:المثل يقول(هِين قرشك ولاتهين نفسك) ماعليه الواحد يخسر مبالغ في المستشفيات الخاصة بس على الأقل يلقى رعاية واهتمام من أحسن مايكون.. سماح:فعلاً..حتى التورتة يقدمونها هدية لك بعد الولادة..وممرضة خاصة بالمساج والتدليك تمر على الغرف عشان تخدم المرضى!! هند:ذكرتوني بولادتي الأخيرة بولدي مرت علي وحدة وقالت: أنا كوافيرة تبغي أي خدمة؟؟ قلت لها:بالله أنا فاضية أتكوفر وأسشور وأتمكر وأنا طايحة بالفراش؟؟ردت علي:واشفيها يامدام كوني جميلة في كل حالاتك!!قلت لها:ودك يصْفقُوني الناس بعين؟؟ الزوار:ههههههههه أسماء:فعلاً أنا استغربت مرة من وحدة من سلايفي رحت أزورها بولادتها وكانت ولادتها قيصرية وتعبانة وعانت فيها..بس تفاجئت يوم رحت لها بالمستشفى إنه شعرها مقصوص وملفلف ومضبط والماكياج كامل تقولون رايحة مناسبة؟؟والأظافر مبرودة وممكرة!وفوق هذا كله غصب تتكلم من التعب!طيب وش اللي حادها على الزبرقة؟مدري! سماح:صح غريبة..يعني الزوار مابيجونك إلا وهم متوقعين إنك تعبانة وحالتك ماتسمح لك..مافي مانع انه الوحدة تكون نظيفة وترتب شعرها وتسشوره بس عاد مو لدرجة مكياج كامل ولف شعر!! وحدة من أقارب سماح:هذي هينة..أنا اللي استغربه هالمبالغات والسرف اللي قاعدين نشوفه هاليومين!بدل ماالوحدة تشكر ربها على انه وهبها الصحة والعافية ورزقها طفل وتبادر بالصدقة.......نلقاها تدفع مبالغ خيالية في تزيين غرفتها بالمستشفى وفي الضيافة اللي تقدمها للزوار..تصدقون بعضهم يوصون على شوكولاتات من بلاد الخارج عشان يقدمونها للضيوف لا وتغليفها مكلف جداً!!!! اسمهان:ذكرتوني بوحدة من زوجات أصحاب زوجي رحت أزورها قبل مدة بالمستشفى لقيت الباب مزين والغرفة كلها مدادات وسجادات غالية واللحاف وسرير المولود وعلبة المناديل والدرام طقم!والبالونات مالية الغرفة وجنب الحرمة شجرة كبيرة معلَّق فيها علب مغلفة مثل تغليفات علب الملكة وبداخلها تحفة وحلويات..وبيتيفورات مالحة وحالية مغلفة بنفس ألوان الغرفة..هذا غير الزينات اللي معلقة ونازلة من السقف..وباقات الورد..كلها يومين والوحدة بتطلع اش له هالمخاسير؟الله يبارك لها بس من كلامها فهمت إنها كلفتها مبلغ كبير أم اسمهان:سبحان الله..ناس موب قادرة توفر لقمة يومها..وناس كل همهم التفاخر والفشخرة على غيرهم ومحيرتهم الفلوس اللي عندهم وين يودونها! هند:أعرف حريم أزواجهم على قد الحال ورواتبهم ضعيفة..بس لا حبَّت الوحدة منهم تتفشخر تفشخرت!بالديون أو بتفليس زوجها!أهم شي تطلع قدام الناس بمظهر ثاني!!! واستمرت السوالف إلى وقت صلاة المغرب وبدأوا زوار سماح يروحون وبقي أهلها وأهل زوجها.. دق جوال اسمهان وكانت المتصلة عزة! اسمهان:ياهلا. عزة:انتي وينك؟لي ساعة أتصل على تيلفون البيت وماتردين! اسمهان:أنا مو في البيت.. عزة:أجل..وينك فيه؟ اسمهان:بالمستشفى.. عزة:سلامات.. اسمهان:الله يسلمك..مافيني شي بس زوجة أخوي ولدت. عزة:مبروك..وش جابت؟ اسمهان:بنت.. عزة:وش سمتها؟ اسمهان:سمَّتها اسمهان.. عزة:اشمعنى؟؟ اسمهان:عاجبها الاسم..
طبعاً تتذكرون اتصال عزة على اسمهان وهي بالمستشفى وسلسلة الأسئلة اللي انهالت عليها؟!!!!صح؟ نستكمل.. عزة:غريبة زوجة أخوك عاجبها اسمك؟ مع انه قديم!!! اسمهان:الناس أذواق!وبعدين هي مافكرت في حلات الاسم كثر مافكرت بمعزتي عندها! عزة:لو بالمعزة كان سمَّت على أمِك أولى! اسمهان:اسم أمي قديم! عزة:ليش وش اسمها؟ اسمهان:نبيلة.. عزة:تصدقين اسم نبيلة أحلى من اسم اسمهان؟؟ صارت أسماء تطالع باسمهان بغيظ وصاحت:بـــــــــــــــــــس!! سمعت عزة الصوت وقالت:ماني مطولة عليك بس عطيني اسم المستشفى ورقم الغرفة..خاطري أزور زوجة أخوك وأبارك.. أعطتها اسمهان المعلومات وقفلت الخط... أسماء:أففففففف وش هاذي المحقق كونان؟؟؟؟؟ اسمهان:وش دراك إنها قاعدة تحقق؟؟ ابتسام:ياحليلك كلنا درينا!!! مانشوفك إلا تجاوبين وباين على المتصلة إنها مجتهدة بطرح الأسئلة! أسماء:البلا إن اسمهان معطيتها وجه!! أم اسمهان:أكيد هذي عزة!صح؟ اسمهان:ايه هي..بس ودراك يمه؟ أم اسمهان:لأن هذي ثالث مرة أشوفها تتصل وتسألك مية سؤال!مرتين كنتي فيها عندنا وهذي المرة الثالثة.. اسمهان:عاد مسكينة تتونس على سواليفي..زوجها مايخليها تروح مكان وبينهم مشاكل.. سماح:هو زوجها صاحب عبدالرحمن؟؟ اسمهان:إيه.. سماح:وزوجك اش يقول عنه؟؟ اسمهان:زوجي يمدح فيه وموصله للسماء..بس زوجته تسب فيه ليل ونهار ومنزلته للقاع!! أم اسمهان:ووحدة مثل هذي..ينرجي من وراها خير؟؟ يابنتي بنات الأصول ماياكلون لحم أزواجهم عند الناس..المفروض الوحدة لاشافت من زوجها خير ذكرته وإن شافت عيب سترته.. أسماء:والله العالم عن أسرار البيوت..يمكن زوجها مامنعها من الناس إلا عشان يتقي شرها!! اسمهان:تصدقون؟مرات يلعب الشيطان براسي من ناحيتها!أحس إنها حسودة أو غيورة..ماني قادرة أحدد..ومرات ألتمس لها العذر..وحيدة ومخنوقة..وعبدالرحمن يقول زوجها صابر عليها عشان خايف عياله يتشتتون!! سماح:والله إنك غريبة ياسمهونة!يعني ماصار لها مدة قصيرة من يوم تعرفت عليك..وقامت تعلمك بأسرارها وتسحب أسرارك وانتي باقي تشاورين نفسك..وتتأملين من وراها خير!!نصيحتي لاتوثقين علاقتك فيها.. هند:هذي طباعها مشابهة لصاحبتك السابقة سحر..صح ياسماح؟ سماح:تكفين لاتذكريني ماصدقت أنسى!!أنا ببداية زواجي تعرفت على جارة لي وتصاحبنا مثل الأخوات وكان اسمها سحر..لكن اكتشفت مع الوقت إنها تنقل أسراري للغير وتحاول تقلب الجيران علي!تبيني أكون صاحبتها وحدها بس!واستغلتني كل يوم تطلبني أصناف حالية ومالحة وأنا على نياتي أتفنن وأرسل لها وآثاريها تقدمها لأهل زوجها على أساس إنها هي مسويتها!!وكل مكان أو مطعم أحكي لها إني رحت له..ألقاها من ثاني يوم راحت له..وكل ماشريت شي ألقاها تسابق وتروح تشري مثله!الصراحة انغثيت من غيرتها وكانت تشككني في الناس اللي حولي وتتضايق لما تشوفني مبسوطة مع محمد وتحاول تشيشني عليه..صراحة كل ذكرياتي معاها شينة..لما زادت حركاتها حطيت لها حد..وظلينا كل وحدة بحالها لين مانقلت من شقتها اللي قدامي وافتكيت منها!! اسمهان:حرام عليكم..عزة مو شينة لهاالدرجة..تخيلوا تبي تجي عشان تبارك لك ياسماح؟؟ سماح:الله يعطيها العافية..يمكن لاشفناها نقدر نحكم! أسماء:أقول هي اسمهان هذا طبعها!دايماً مندفعة في علاقاتها..والا شلة الصاعقة هذيك يتسمون شلة بالله عليكم ؟؟من زينهم؟مدري اش عاجبها فيهم؟؟ هند:عاد مانسمح لك تسبينهم ياأسومة!!رانية خطيبة ولد عمي..وأفنان خطيبة أخونا تركي! الجميع:ههههههههههه ================== في منزل عزة... كان يوسف جالس على الأرض ويلعب مع أولاده بألعابهم ويضحك معاهم..وعزة جالسة على الكنبة. عزة:يوسف أبيك توديني المستشفى بعد شوي.. يوسف:ليش؟خير؟؟ عزة:زوجة عبدالرحمن..مرة أخوها ولدت وأبي أروح أبارك لها! يوسف:لاااا؟من متى هالنخوة؟ إذا أختي علياء لها شهرين ونص من يوم ماولدت ولدها ورفضتي ترفعين عليها سماعة حتى!!ذحين بيجي فيك خير وتباركين للغُرب؟؟ عزة:بالله فكني من سيرة أهلك..لازم يعني أقدم لهم يمين الولاء والطاعة؟؟! يوسف:أهلي المفروض تحبين رووسهم لأنهم زوجوك واحد صابر عليك وساكت وليتك فوق هذا كله تحمدين ربك وتشكرينه إلا تتمننين علي بقعدتك عندي..اللهم لااعتراض.. عزة:الحين ليش تطلع من الموضوع؟ يوسف:خلينا في ساعة رحمان..أساساً من متى لك علاقة بزوجة عبدالرحمن وانتي ماقابلتيها إلا مرتين؟عشان يكون لك علاقة بزوجة أخوها؟ عزة:تصاحبت معاها اش المشكلة؟وانت شايف بعينك..ماعاد لي صديقة ولارفيقة! يوسف:إنتي اللي جبتيه لنفسك فرقتي بين كل الناس بلسانك وتدخلاتك..حتى زوجات أخواني ماسلموا من شَرِّك..والحين ناوية على زوجة عبدالرحمن؟؟اقعدي ببيتك أستر لك!! عزة:يعني ملزِّم؟؟ يوسف:ايه..باركي لهم بالتلفون وبس! عزة:دايماً نذل وتحب نفسك!!!! ================== أما رانية فكل يوم يتصل فيها ناصر ويطيح فيها نكت وتعليقات..مرات تضحك ومرات تزعل لأنه أحياناً يمصخها!!!!! في إحدى المكالمات: رانية:وش أحلى خبر سمعته بحياتك؟؟ ناصر:إنه في قرار يناقش السماح للمرأة بقيادة السيارة!!!!!!!! رانية:وليش هالخبر حلو بالنسبة لك مع إنك مو مستفيد منه شي؟ ناصر:عشان تزيد نسبة الحوادث ونفتك من عدد النسوان بمجتمعنا صار عددهم 3 أضعافنا!! رانية:الله لايعطي عدوك عافية!هذا كلام تقوله؟؟ ناصر:وش أسوي؟ من بعد مافتحوا لهم مجالات للعمل صاروا ينافسونا بالوظايف..تلاقين الشاب اللي وده يفتح بيت مو لاقي وظيفة لأن الحريم سبقوه عليها!! رانية:يالطيف يارب!حسودي اللهُ أكبر عليك!! ناصر:ههههههههه ترى إذا بتصدقين كل كلمة أقولها بينشحن صدرك علي!! رانية:احترت في طبعك الصراحة مزحك كذب وجدِك كذب..الله يشفيك.. ناصر:ولايبتليك!!! ============== اتصلت عزة على اسمهان وقالت:اسمهان لاتنتظريني اليوم انشغلت فجأة!!بس بكرة أقابلك بالمستشفى! اسمهان:الله يحييك...... ================= التكملة غداً بإذن الله...
أصرَّت أم سماح تبات معاها في المستشفى...وهند رجعت بيتها وبقي أهل اسمهان بالغرفة.. وجاء محمد ومعاه بنوتته الصغيرة جايبها من الحضانة والممرضة تدف السرير.. محمد:سمهونة الصغيرة جات تسلم عليكم!! قامت اسمهان تجري عليها بشوق وشالتها وضمتها وعيونها غرقانة دموع!! أسماء:أفا ياسمهونة!عَزَّ الله طاح سوق بنتي لينة!!! الجميع:ههههه محمد:لو فيك خير كان سميتي بنتك اسمهان بدل لينة!! اسمهان:ياعمري عليها تجنن..الله يحفظها لكم ويبارك فيها.. محمد:مين تشبه؟؟ أم اسمهان:البنت بسبعة وجوه ياولدي!باقي يتغير شكلها ويختلف هالحين مو باين الشبه.. محمد:عندي احساس كبير إنها بتطلع قمر مثل أبوها!! أم سماح:ليش يالمزيون؟بنتي سماح شينة يعني؟؟ ابتسام:إلا سموحة عسل مصفى بس ماعليك من حمود وسوالفه.. اسمهان:يمه..ماتشبهني وأنا صغيرة؟؟ أم اسمهان:ههههه وانتي على بالك يوم إن اسمها مثل اسمك بتطلع شبهك؟؟ أم سماح:لو تطلع أخلاقها بأخلاقك يااسمهان فهذي نعمة.. اسمهان:تسلمين خالتي.. أسماء:حرام عليك يااسمهان شفطتي البنت هاتيها نسلم عليها. وظلت سمهونة النونو تنتقل من يد ليد وكل من يشيلها يدعي لها بالبركة..إلى أن وصلت أخيراً لـ يد أم سماح... شالتها أم سماح وقالت:من إيد لإيد تكبر وتزيد!خذي بنيتك رضعيها ياسماح... أم اسمهان:عاد إحنا بنستأذن.. مرة طولنا عليك ياسماح.. سماح:بالعكس مرة ونستوني بزيارتكم وسوالفكم.. أم اسمهان:بكرة بإذن الله نشوفك إلا دق جوال اسمهان وكان عبدالرحمن هو المتصل وقال لها:ترى أنا برة اطلعي لي.. محمد:أنا بأوصلكم يايمه لاتتصلين بأبوي.. أم اسمهان:بس ياولدي ودي أبوك يجي ياخذنا عشان يشوف بنتك أكيد بيطير فيها.. محمد:خبرك عتيق!ومين قال لك ماشافها؟كنت أنا وياه بالحضانة في العصر وتفرج عليها لين ماشبع منها.. وخرج الجميع من الغرفة وتقابلت العائلة برة مع عبدالرحمن! محمد:ياهلا بالنسيب! عبدالرحمن:مبروك مبروك ماجاك..الله ينبتها نبات حسن ويبارك لكم فيها.. ووقفوا محمد وعبدالرحمن وأم اسمهان يسولفون شوي.. وقامت أسماء تناظر وقالت لابتسام(بهمس):ياحليله هالدحوم..أثاري شكله صغير مو على عمره!!! ابتسام:أقول غضي بصرك..لاتجيك اسمهان وتزنطك!!! أسماء:ياحبيبتي لو تطلعون وتنزلون مثل أحمد زوجي ماتلاقون ابتسام:ههههه وش ذا؟أغنية جديدة ألفتيها فيه؟غريبة مو العادة تمدحينه.. أسماء:حبيبتي أنا أمدحه في قفاه بس!أما في وجهه لا!تبينه يغتر؟؟ واستأذن عبدالرحمن هو واسمهان وراحوا لسيارتهم.. عبدالرحمن:كيف النونو الصغيرة؟شفتيها؟ اسمهان:إيه تهبل بسم الله عليها. عبدالرحمن:وزوجة أخوك ان شاء الله بخير؟؟ اسمهان:لا الحمدلله زينة..بس بما إنها مسوية عملية قيصرية بتظل بالمستشفى 4أيام.. عبدالرحمن:إلا نسيت أسألك!تدرين انه ملكة أخوي عبدالرحيم على صاحبتك بعد 3أسابيع؟؟؟ اسمهان:ايه أدري من زمان قايلة لي مرام.. عبدالرحمن:مرت الأيام بسرعة..وبعد بكرة المدارس جاية..اش رايك بكرة تروحين مع أمي وأحلام للسوق وتشترون أغراض الملكة؟أفضل لك قبل ماتنشغلين بالمدرسة..وغير كذا انتي أدرى بذوق صاحبتك.. اسمهان:ماعندي مانع بس أخاف أمك تشوفها لقافة مني! عبدالرحمن:لا لقافة ولاشي..هي اللي وصتني أقول لك..وترى بتجيكم بكرة المستشفى تبارك لزوجة أخوك... اسمهان:على خير.. ============= ثاني يوم اتصلت رانية في الظهر على اسمهان تبارك بولادة سماح رانية:مبروك ماجاء لأخوك ياسوسو اسمهان:الله يبارك فيك..بس انتي اش دراك؟؟ رانية:عاد مايبي لها سؤال ياشاطرة!نسيتي إن سماح بنت عم خطيبي؟وناصر هو اللي علمني؟ اسمهان:ههههه صح نسيت.. رانية:صحيح سموها اسمهان؟؟ اسمهان:صحيح.. رانية:تصدقين؟دايماً أقول بنفسي لو جاني بنت بأسميها اسمهان بس ترى مو من زين اسمك!بس لأني أحبك يابنية!!! اسمهان:وأنا بعد أموت فيك وبـ رجتك بس مايطرى علي أسمي بنتي رانية!!أخاف تطلع مشفوحة مثلك!!!هههههههه رانية:تسلم لي رومانسيتك وشاعريتك!!!!! اسمهان:ههههههه بعض ماعندكم ياعسل!! رانية:تراني كالعادة أول ماعرفت الخبر اشتغلت وكالة أنباء وعلمت الشلة أكيد بيتصلون يباركون..وكنت أتمنى أروح المستشفى أبارك لها بنفسي بس عاد عادات مجتمعنا عجيبة!رفضت أمي وقالت:اثقلي يامال الخفة!تروحين للمستشفى تنطين على أهل خطيبك ليش؟؟باركي بالتليفون وبس!! اسمهان:مجملة ومشكورة ياقلبي مايحتاج تتعبين نفسك.. واستمروا بسوالفهم ولما انتهت المكالمة صكت اسمهان السماعة ودق التليفون ويوم ردت طلعت المتصلة مرام.. وبعد التحايا والسلام والمباركة لاسمهان بولادة زوجة أخوها.. اسمهان:لو مااتصلتي فيني يامرام كنت أنا بأتصل فيك..إلا علميني وش لون فستان ملكتك؟؟ مرام:وليش السؤال؟؟ اسمهان(باستغراب):عشان نعرف بأي لون نزين ونشرع لك الصندوق وأغراض الملكة.. مرام:أوووه فهمتك غلط!على بالي لقافة بس! لون الفستان تقريباً موف.. اسمهان:طيب أي طلبات ودك فيها علميني لأني بأنزل السوق مع خالتي وأحلام ونختار الأغراض ومانبي نجيب شي مايعجبك..عاد مين قدك؟؟نشاورك ونطلب رضاك! مرام:العطورات اللي أبيها(؟؟؟؟؟!!!!)(قائمة طويلة!!!!) والذهب اللي تجيبونه ياليت يكون كله ذهب أبيض ماأطيق الأصفر أحسه شعبي!وتنسيق العربية أبيه يكون ناعم مو مدندش مثل عربية رانية!!!والساعات تكون من ماركات معروفة!واش بعد يامرام؟؟؟ آه افتكرت..كل التحف والأشياء اللي راح تضيفونها ياليت يكون لونها فضي!تدرين الفضي مع الموف يطلع شي!!وبعد لو تحطون مثل الدرع ومكتوب عليه اسمي واسم العريس ويكون فخم ومزين بالورد.. اسمهان:ماتبين شاي وطماط وبصل بعد؟؟ الله يقطع إبليسك كل هذي شروط؟؟!!! مرام:و ليه ماأتشرط؟ أنا مرام مو شوية!! اسمهان:أكيد ياسمو الأميرة بنجيب اللي تبينه بس عساه يثمر فيك وتستاهلينه!!ههههههه مرام:أشوف الغيرة بدت؟! اسمهان:حرام عليك..أنا زوجة الكبير يعني العقل والتدبير!وانتي زوجة الصغير اللي تحسد وبس تغير!! مرام:هههههههه بايــــــــــــــــخة!وأهم شي ياسوسو لاأشوف أحد من الشلة يجي يوم ملكتي ويتضبط بمشغلنا..ودي أقول لهم بس ماأتجرأ أخاف يزعلون!قولي لهم انتي! اسمهان:هههه ياحليلك..وعلى بالك مافي مشغل بالديرة إلا مشغلكم؟!أصلاً أسعاركم ناااار! مرام:بس كوافيراتنا شغلهم واااااو تقدرين تنكرين؟؟؟؟ اسمهان:لا..المهم جوالي يرن ومضطرة أقول لك مع السلامة.. وكان المتصل عبدالرحمن...بعد المقدمات المعهودة.. عبدالرحمن:اسمهان تجهزي بأمر آخذك انتي وأمي ونتغدى بمطعم وبعد صلاة العصر نمر على أحلام تطلع معانا ونروح السوق..وعقب المغرب أوديكم المستشفى تزورون زوجة أخوك.. اسمهان:إبشر,,,بأتجهز طيرااااان!! إلا دق تليفون البيت..وكانت المتصلة نجلاء...وبعد السوالف والقرقرة..انتهت المكالمة واتصلت أفنان...ومن ضمن المكالمة: أفنان:تصدقين ياسوسو؟مرات ضميري يأنبني إني وافقت على خطبتي من تركي!!! اسمهان:ليش؟حرام عليك..تركي ولد حلال ومن معدن طيب..انتي لسه ماتزوجتيه حتى تحكمين!! أفنان:لا مو قصدي إنه تركي فيه شي..أنا أقصد أختي سندس اللي تخبرينها..مو هاين علي أتركها واعتمادها بالكامل علي..أحس إنها أنانية مني!!! اسمهان:وش هالكلام ياأفنان؟بتكونين أحن عليها من بطن جابها؟وبعدين مسئوليتها كانت على أمك من يوم ماولدتها انتي ماتوليتي مسئوليتها إلا يوم كبرتي صح؟؟؟ أفنان:صح.. اسمهان:خلاص..الأنانية إنك تتركين نفسك وتفكرين بغيرك وهو ماعليه خلاف..أكيد أمك ماراح تقصر معاها..وبعدين اش اللي خلى هالموضوع يطرى على بالك الحين وانتي مخطوبة من مدة؟؟ أفنان:لأن أمي وأبوي بدأوا يفكرون هاليومين انه يستقدمون لها ممرضة فليبينية..ولما توصل بعد شهرين أنا أدربها على طريقة الاهتمام بسندس..تدرين..أمي صعب عليها توفق بين الاهتمام بسندس والعمل بمعهد تخريج الداعيات بوقت واحد..أضيفي انها ناشطة بالعمل الدعوي وإقامة المحاضرات وماعندها وقت..وسندس يبي لها تفرغ كامل.. عمى وخرس وشلل وضمور كامل! اسمهان:وين المشكلة؟كل شي وله حل!والممرضة بتكون أفضل منك لأنها مدربة على حالات مثل هذي..لو كل شخص بالدنيا عنده معاق بالبيت واعتزل العالم وتفرغ لخدمته بس !كان مالقينا حولنا أحد ينتج ويعطي..بالعكس أحيي أمك على محاولتها التعايش بشكل طبيعي وهي عندها بنت معاقة..لأنه أختك ولدت بهالمرض معاها يعني لازم انكم تتأقلمون مع الوضع..مو تحسون انه أي قرار جديد بيخرب عليكم الدنيا!!! أفنان:مدري ياسوسو أحس إنك أكثر وحدة أرتاح لكلامها..بس بنفس الوقت حاسة أفكاري مشوشة ومو عارفة كيف أتصرف! اسمهان:إلا أنا اللي أحس نفسي مشوشة!وراي طلعة وباقي ماتزهبت ومو عارفة كيف أتصرف لو جاء زوجي وشافني ماسكة السماعة..مع السلاااااااااااااامة!! وقفلت السماعة..إلا عبدالرحمن داخل!! واسمهان باقي لابسة ملابس البيت!! عبدالرحمن(بسخرية):ابشر..بأتجهز طيران!ياشيخة انتي لو رايحة سباحة كان مداك وصلتي!ليش مالبستي لين الحين؟؟؟ اسمهان:خذتني المكالمات..دقيقة وأجيك! ودخلت تتشطف وتبدل هدومها.. عبدالرحمن(وهو يكلم نفسه):الدقيقة في قاموس اسمهان تساوي ساعة والساعة فيها ستين دقيقة والدقيقة فيها ستين ثانية..يوووه أجل بنتأخر!! اسمهـــــــــــــــــــــــــــــــــــــان اخلــــــــــــــــــــــــــــــــصي!!!
