أبسألك بس أبسألك وش هو شعورك وأنت تدفن قلب انسان؟!!!

الحالة
مغلق و غير مفتوح للمزيد من الردود.
الله يهون عليكي
ويعوضك خير يا رب
قلبي معاكي​
 
ربي يعوضك خير اختي الله يخليك لاتأخرين علينا كملي
 
بإنتظارك لاتطولين
ياي مبسوطه لانك رجعتي تكملين
الحمدلله يارب
 
وينك تاخرتي
تكفين نزليها بسرررررررررررررعه..
الله يفرج همك يارب..​
 
يافرح وينك..ياحرف وينك..عشان أقدر أكتب وش اللي أحس فيه وأنا اقرأ قصتك..كملي كملي..وياصبر وينك..
 
أختي " يا فرح وينك "
نحن بانتظارك على احر من الجمر
عسى المانع خير
:33:​
 
حاولت أنام ولاقدرت الأفكار توديني وتجيبني..سمعت صوت امي دخلت البيت وتظاهرت بالنوم..دخلت عندي
:ابتهال نمتي؟
:...
تركتني وسمعت صوتها بالصاله مع ابوي ..نقاش..جدال..أبوي كعادته حتى لوكان غاضب فصوته لايرتفع انما يزداد حده
أمي يعلو صوتها ومره ينخفض
وأنا أرتجف من الخوف والضيقه
..أتضاااايق إذا عشت لحظة يكون فيها ابوي على غير وفاق مع أمي..
نفسيتي تزداد سوء
إذا سمعت نقاشهم
ماكنت أدري بالضبط وش يقولون لكن أكيد عن موضوع زواجي انا وبندر
سمعت أخواني يتدخلون
(أخواني دااائما في صفي)
لكن يحاولون أقناع امي وتقريب وجهات النظر
نظرت لساعة بجوالي 2:30
يالله ولاخلصوا كلام
تضايقت لأن ابوي مريض بالقلب وإذا كان فيه شئ يشغل تفكيره عن أحد مننا فهو ماينام ويشيل هم..الله يعينه علينا
قطع تفكيري وصول رسالة على جوالي
فتحتها:

تقبلي عذري طلبتك تجملي بالذي يكتب حروف الشعر من دمه. هداك الله لوتعرفين غلاك وكم لك مقدار تضيعين بحب من حبك وترمين حالتك يمه .أنا مالي أحد غيرك أحبه وأكتب الأشعار .ولاغيرك سكن قلبي وخلا الحال منسمه .أنا من بعدك بغربة ولو الناس حولي كثار. لك الله ضقت من نفسي ولا أبغي الناس واللمة .ألا يافرحة الدنيا على دربك خفوقي ابتهال رجيتك يابعد عمري تكونين فيه مهتمه .أعيش بقربك بفرحه وفي بعدك أعيش بنار .أنا المهموم من همك وجالك يشتكي همه حياتي شاقني وصلك .رجيتك داخلي منهار على قلبي من غيابك .هموم الكون ملتمه

المرسل رقم مستحيييل أنساه رقم بندر
ما أخفي عليكم سعااادتي وشوقي له
سبحان الله من زواجي أنا وبندر
وزواجي انا وخالد تأكدت أن الحب وتآلف الأرواح نعممممه من الله واللي ماجربت هذا الشعور مستحيل تفهمني
قفلت جوالي
وجلست أفكر خايفه أوافق وأندم وخايفه أرفض وأندم
...
اليوم الثاني مسكتني أمي
:تعالي تقهوي معي في الصالة جالسه لحالي ماكأن عندي بنت
:يمه الله يهديك الحين بجي أنا ظنيتك نايمه
رحت معها لصالة نتقهوى
:الحين أنا موقايله لك ماترجعين لبندر ..وتقولين بستخير
:يمه تكفين خليني على راحتي ترى اللي فيني مكفيني
:وأنتي كل مايكلمك أحد خلوني على راحتي انا مريضه انا مدري وش فيني
:يمه انتي ليش ماتحسين فيني
ليش أحسك دايم بعيده عني
ليش تفكرين بالناس قبل راحتي
:انا بعيده عنك!
:ايه بعيده ماتقربين مني إلاإذا شفتيني طايحه بالسرير غير كذا مشغوله عني
:انا خلاص ربيتك وأهتميت فيك إلين كبرتي
:لايمه الكبير احيانا يحتاج حنان اكثر من الصغير ياليت كان عندي اخت اكبر مني تحن علي وأبكي في حضنها
:وش اللي تبكين في حضنها أنتي لوعندك عيال من بندر كان الحين عيالك كبار
:بدينا في التجريح..شفتي أنك ماتحسين فيني انتي يمه لوتحسين فيني كان سمحتي لي اشوف ولدي<<بكيت
ماكنت ابي ابكي قدام امي لأني عارفه أنها بتضايق وبتقول كلام يضايقني اكثر بس بكيت غصب عني
:لاحول ولاقوة إلا بالله انتي للحين متذكرته ربي بيرزقك غيره ان شاءالله وتنسين
:أنساااه!!والله ماأنساه يمه لوأجيب عشر عيال
تركت فنجان قهوتي ورحت لغرفتي وبكيت وكأني لتوي فقدته مدري ليش كل ماأتذكره أحس الدنيا بعيني سوداااء ولاأحس أن فيه شئ بينسيني
والله وأنا أكتب لكم دموعي نازله..أن لله وان إليه راجعون
نفسي أني شفته ولمسته دايم أفكر أقول لومادخلت غيبوبه على الأقل شفته لوكان ميت
نفسي ألمس شعره وعيونه وأنفه وفمه وخده ويدينه آاااااه نفسي أضمه
أحيانا افكر فيه نفسي أدفنه بداخل قلبي نفسي أني أنا اللي بداخل القبر لوالعمر يهدى لأهديته له
(حبيبي يعلم الله كم من الشوق اجتاحني لك وكم هوالحنان الذي خبأته لك لحين وصولك
كم هي الآمال والأحلام التي رسمتها لك
وحبي لك الذي أمتلأت به الأرض وعانق السماء
أنتظرت وصولك كثيرا
حلمت بقبلة أطبعها على جبينك
حلمت بيديك الصغيرتين
حلمت بنظرة جميلة من عينيك
آاااه حلمت بصراخك..ملابسك
..حليبك..كل شئ لك..
كم هوقاسي والدك ياحبيبي
وكم هي ضعيفة أمك
لقد غادرت دنياي قبل أن أبيح لك بحبي
فسامحني
سامحني يانبض القلب لم أتماسك حتى أسمع صرخاتك
سامحني)

دخلت امي
:ابتهال قومي غسلي وجهك وتعالي عندي
دفنت وجهي على وسادتي
:لامابي اجي
:تعالي عاد تعوذي من الشيطان تدرين كل ماأشوفك تبكين يتقطع قلبي
:طيب يمه بعد شوي بجي
:ترى بنتظرك

بعد ماصلينا العشاء فتحت أمي موضوع بندر
:أنتي وش تبين فيه نسيتي اللي سواه؟!
:لامانسيت بس خيانته ماعادت تألمني مثل قبل
أشياء كثيرة آلمتني اكثر،،اناسامحته
:توك الحين تسامحينه صح النوم
:يمه ارجوك أنا إذا ابي اتزوج أبي واحد مثل بندر إذا تظمنين اي احد وينه وانا ارفض بندر
:وافقي على اللي جاء قبل فترة رجال طيب وملتزم وتوه شباب موكبير
:ومتزوج يمه
:حتى بندر متزوج على الأقل هذا مقتدر ماديا" مومثل بندر مدري كيف بيفتح بيت ثاني
:يمه المادية مومهمه وكل اللي تقدموا لي متزوجين تبيني أدخل على ضرة ويمكن المسكينة ظالمها ويمكن العيب منه وأصير مع نصف رجل لا يطاق
:أدخلي على غريبه ولاتدخلين على بنت خالتك
:بنت خالتي!!! يمه بنت خالتي ماقدرتني ولاقدرتكم ولاقدرت وقفاتنا معهم وأناماأحد حاس فيني أنام دمعتي على خدي والنار في قلبي وأنتي أول وحده لما هدى ولدت أخذتي القهوة لها وحتى في بداية زواجها من بندر كل خالاتي يعزمونها ولافكروا فيني ولافي اللي سوته هدى،،
:بالله كيف بيكون شكلك قدام الناس وأنتي متزوجة واحد زوجته بنت خالتك عيييب ياابتهال
:لا موعيب..العيب اللي هي سوته وخربت علي حياتي
الناس ماراح يقولون شئ وحدة وأرجعت لولد خالتها اللي كان زوجها عادي مافيها شئ.وأساسا" أنا ماهمني كلام الناس..الناس ماحسوا فيني ولاعاشوا معي..أنتي يمه شكلك تكرهين بندر
:أنا أكرهه!!..لاوالله بندر غلاته مثل غلاة سعد بس رجعتك له بتسبب مشاكل لي مع أهلي
:أهلك يمه مالهم شغل فيني..زوريهم كل أربعاء كعادتك يعني بيطردونك عشان بنتك تزوجت!!..وخالتي أم هدى عارفه فعايل بنتها المفروض أنها ماتفتح فمها بأي كلمة
:طيب يمكن ماتحملين عنده
:يمه الرزق من الله رزقي في السماء إذا ربي كاتب لي عيال بيرزقني (وَفِي السَّمَاءِ رِزْقُكُمْ وَمَا تُوعَدُونَ *فَوَرَبِّ السَّمَاءِ وَالْأَرْضِ إِنَّهُ لَحَقٌّ مِثْلَ مَا أَنَّكُمْ تَنْطِقُونَ(
:والله أني خايفه عليك أنتي طيبه وماتحملين وهدى قويه وكيدها عظيم ولسانها حلووو
:لسانها حلو أو شين أنا واثقه من بندر عارفه أن بندر يحبني والقوي الله وأنا دعيت ربي وتوكلت عليه بإذن الله إذا رجعتي فيها خير بتتيسر وإذا شر فربي بيصرفه عني
:فكري ولاتسرعين

دق جوال أمي وردت ..كان سعد أخوي يناديهم فوق في السطح لأنه جالس مع بندر ونورة
دخل ناصر ولد أخوي يركض شايل معه صينية
:عمتي ابتهال خوذي هذا,, خالي بندر يقول تعشي
حسيت راسي يدور من الإحراج وناظرت في أمي
:ماشاء الله عشى !! بس ابتهال!!
:....
:خالي يقول جدتك بتجي فوق,,عمتي ابتهال بتاخذينه
:هاه..حطه بالمطبخ
:لاهويقول سلمه بيدها
:نصوووور خلاااص
لحقته للمطبخ..مسكته مع يده
:ناصر وجع لاعاد تقول شئ قدام أمي تراها بتذبحك وتذبحني
:طيب أنتي بتاكلينه
:ياربي بيجنن هالولد..وش دخلك آكله وإلا لا موشغلك
:خالي بندر يقول شوفها تاكل منه أو لا
:طيب قول أيه خلصت الأكل كله ..يالله توكل روح عني

رجعت لصالة وأنا حدي متفشلة من أمي ونظراتها تراقبني
:يمه ليش تناظرين فيني
:تبيني أغمض
:هههه لا بس أحسك تفحصيني
:لامافيني شئ..يالله بروح فوق عند العيال,,

رحت أركض للمطبخ عشان أتعشى
خاااشة جو وأفكر في بندر..دخلت عندي نورة
: بشويييش لاتاكلين الصحن معه
:اسم الله ..ياربي هذا البيت ماحد ياخذ راحته
:ههههه ليش خربت جوك
:هههه لا
:هههه الناس تهدي ألماسات وأخوي عشى
:كل شئ يجي من بندر أغلى من الألماس
:نععععععم عيدي عيدي ماسمعت زين
:هههه نورة خلاص,, وش اللي جايبك وش بغيتي؟
:لا خلاص مابي شئ عيدي قبل شوي وش قلتي
:ههه نورة خلاص خليني أكمل عشاي
:هههه طيب بشريني خالتي أقتنعت
:يعني
:كيف يعني
:والله مدري تبين الحقيقة أنا أقنعها وأنا بداخلي خايفه من قراري وخايفه من كلام أمي اللي قالته ..يمكن أمي صح وأنا خطأ والله يانورة مدري أحترت
:لاتخافين ولاشئ..خالتي حاطه لناس أعتبار أكبر من حجمهم
:..
:طيب أنتي وش تنتظرين
:أنتظر أيش!
:مدري عنك.. قولي خلاص موافقه فجري الدنيا فيها وتملكي وروحي معه وفكينا منك ههه
:لا بهذي السرعه
:أجل وش متوقعه بعد سنة أو سنتين ..إذا وافقتي خلاص ماله داعي تضيعين وقت أكثر من كذا..أسعدي نفسك وأسعديه..وترى إحتمال يابهلوله تملكين هذا الأسبوع
:نععععم!! أنا قلت لأبوي بستخير شهر
:لا ليش التأخير تراهم الحين جالسين يقنعون عمي لأن إذا طالت السالفة بيتدخل جدي ويمكن عمي يغير رأيه يالخبلة
وأمي بتجي هذا الأسبوع وااااااو وناااااااسه
:الحمدلله أنتي ليش مبسوطه لايكون أنتي اللي بتعرسين
:ههههههه لايسمعك سعد تجيه جلطة اسم الله عليه
:هههه
:تدرين أنا فرحانه لكم أكثر من فرحتي بيوم زواجي وبسوي لكم حفلة خطيرة
:ههه لانورة فكيني من الحفلات..مابي شئ
:طالع هذي لاحبيبتي أنا أخذت أغنية ورحت لمحلات الزفة عشان يضبطونها لي بدون موسيقة ..وبتنزفين عليها رضيتي وإلا مارضيتي
:نعم!! زفة وش قالوا لك..لانورة أساسا بلبس أي شئ من فساتيني الناعمه وبحط مكياجي في البيت..تراني حذرتك لاتدخلين بشئ لأن مالي خلق على هالخرابيط
:أقوووووول بس لاأحد يسمعك..الحمدلله والشكر شكلك أنخبلتي
ألبسي فستان ناعم بس الكوافيرة بتجيك إلين عندك والحفلة بقاعة صغيرونه على قدنا يعني الأقارب فقط
:نورة رجاء لاتوتريني خلاص لكل حادث حديث
:لاحبيبتي ماتدرين يمكن نهاية هذا الأسبوع تطيرين معه
:يووووه يانورة خلاص قفلي الموضوع
:نسيت أقولك ترى خالي فوق عندنا
:صدق!! ليش مامرني يسلم علي
:ههه وش فيك تشرهين كأنك عجيز تشره على ولدها
:ههههه هوقال بيمر خصيصا" عشااااني
:ياعيني على الثقه ..طيب هوبينزل الحين بس لاتجهزين شئ ترى خلاص تعشى فوق عندنا

رحت لغرفتي بعد ماطلعت نورة فوق
أحس أني جالسه في موج بحررر
قلبي تسارعت نبضاته من قالت لي نورة أن ممكن ملكتنا قريبه
أحس بخوووف كل ماأتخيل أني أشوف بندر ويشوفني
مدري ليش ودي الفترة تطووول مع أني مشتاقة له
قد نستطيع تتبع الزلزال نرصد قوته..لكن لانستطيع بأي حال نرصد الإحساس..نبض القلوب حنينها..اشواقنا..ألامنا..
شئ محال في الوجود يقاس..
فقلوبنا مثل اللآلئ..
وعلى القلوب تخير الحراس..
فهناك قلب من حجر..
وهناك قلب قطعة من ماس..
إياك أن تتصور..
أن القلوب تشابهت..
إلا إذا...
يوما"
تشابه شكل كل الناس..

في كل طيف ألمحك
بالرغم من صخب الوجود
وهذه الضوضاء
كأنك..
نغما" جميلا" يستبيح مسامعي
...نبعا" تفجر وأغرق الصحراء...
تأتي طيورك كي تحط بأعيني..
وعلى شفاهي تعزف الأصداء..
ماكنت أعرف كيف إحساس برق
حتى نزلت أنت بكل
ح ب ك بداخلي..
ونطقت أسمك أجمل الأسماء..


سمعت صوت خالي نزل ورحت أسلم عليه قال لي لازم تملكين بسرعه قبل تطلع السالفه وتصير مشاكل من جدي أو من هدى أو من خالاتي وجدتي..آخر كلامه قال: ترى قوية أنه ياخذك على بنت خالتك
حسيت بخوووف ..وسألت نفسي كيف أقدر أدخل بيت جدتي
كيف أقابل خالتي أم هدى كيف أقابل ندى كيف أقابل جدتي
حسيت بخوف وأحراج حسيت أن كل كلامي اللي قلته لأمي مجررررد كلام ..أما الفعل فأنا خوااافه درجة أولى..

أمي أول مانزلت كانت راااضية كل الرضى
سألتها قالت بندر ترجاني أكون راضية وحب راسي ويديني
وقالت بس لااااااااتجين تشكين منه أو من هدى!! تحملي نتيجة قرارك

قال لي أبوي أن السبت لازم أروح للمستشفى عشان التحليل قبل الملكة.. وقال ترى الأسبوع الجاي أول ماتطلع التحاليل الملكه وتروحين معه وقال أن سعد ونورة بيسون حفلة بقاعه صغيره

يوم السبت الصباح قال أنا عندي دوام روحي مع أمك وبندر!!!
:لااااامستحيل
ناظرني بإبتسامة
:ليش مستحيل كلها فترة وتروحين معه
حسيت الدم تجمع براسي
:لا لا مابي أروح خلاص بكره أن شاء الله أروح للمستشفى
:لا لازم اليوم ..طيب.. الشكوى لله بستأذن من العمل وأوديك

بعد الظهر نزلت نورة وأنا في المطبخ
:رحتي حللتي
:ايوه
:بندر من أسبوع محلل
:..
:رحتي مع مين؟
:أبوي
:ههههه ليش مارحتي مع بندر كل هذا خجل
:ههه مدري
:والله أنك خوافه وش بتسوين إذا دخل عندك
:ههه عادي
:أنا لازم أحضر اللقــاء التاريخـــي هههه
:من وين جايبه هالثقه ..مستحيل ألتقي فيه ومعنا أحد..يعني بس أنا وهو..يعني ريحي نفسك
:ههه ابتهال بس أنتي وهو..وش ناويه عليه
:نوووورة ياشين تفكيرك
:هههه وش فيك عصبتي أمزح معك
:...
:على فكرة اليوم لازم ننزل لسوق
:ليش
:وش اللي ليش..يااابردك ياختي
:مدري نورة أحس مالي نفس
:أنتي دايم مالك نفس مالك مزاج..إذا بننتظر مزاجك ونفسيتك بتجي ليلة زواجك وأنتي بخلاقينك القديمه
:طيب روحي أنتي أنا ماودي أروح
:ابتهال وش فيك أنتي موسعيدة
:بالعكس سعيده
:طيب ليش هذا الإكتئاب
:أنا من زمان كذا يعني زواجي ماله دخل
:ياقلبي ياأبتهال لازم تغيرين من نفسك إلى متى حابسه نفسك
:أن شاء الله أوامر ثانيه
:لاسلامتك ترى بعد العصر بنطلع جهزي نفسك
:أن شاء الله

طلعت مع نورة لسوق ولاتركت نورة شئ إلا تاخذه وتصارخ علي شوفي هذا عجبك أو لا!!..والله لأقول لبندر يذبحك أول ليلة ههه

حذرتها قلت أبيض مااااألبس
أبي فستان حلو ناعم (أقصد ليلة زواجي) وأي لون إلا الأبيض
مدري ليش أحس أني كرررهته ولاأبي ألبسه
قالت لي باخذ لك فستان فخم وأنا رررفضت أحس الفخم
بيزيد توتري مدري ليش..

إذا بتتسائلون عن هدى..فهي بكل وقت تنزل لمنطقتنا تجلس عند أمها ومن بيت لبيت لأن معارف أمها كثييييرييين أقصد صديقاتها
وبندر يكون عند نورة أو في بيت جدي
هدى دايم تشكى من عيشتها خارج المنطقه وكل أسبوعين جايه
لأنها متعوده على الجمعة والطلعات ..

خالتي أم فهودي تذكرون كلامها عني لما قالت هي مانعته عن الزواج وخلته يسوي الحرام من وراها
هذي الإنسانه أمي لها الأم يعني قبل زواج أم فهودي ماااتطلع من البيت جدي شديد أمي كانت تشري لها كل اللي تبيه من السوق
إلين جدي أجبرها على الزواج من ولد عمها (كنت أنا في الإبتدائي)
يعني هي كبيرة بس تصرفاتها!!
دايم متذمره مع أن زوجها طيب وعايشه مرتاحه وكانت تغاااار ولاهي مرتاحه لأنها شايفه بيني وبين بندر حب كانت دايم تحرضه على الزواج وتتعمد تمدح عنده البنات..سبحان الله غريبات بعض النساء إذا كانت حياتها خاليه من المشاكل فهي تلاحق الناس
ولاترضى باللي ربي عطاها ولاتشكره..عيونها على اللي عند غيرها..
سبحان الله بعد طلاقي من بندر تغير حالها ..زوجها توظف في مكان مختلط وتغييير عليها..دايم تشكي لأمي منه
إلين مرة كانت طالعه مع أهل زوجها لمنتزة ورجعت معهم لبيتها
ودخلت حصلته مع وحده شكلها من عمال النظافة اللي بمقر عمله
ومع ذلك فهي مستمرة معه لأنها ماتبي ترجع للحياة في بيت أبوها
..
باقي على زواجي من بندر 3 أيام



 
سااااااااااااااامحوني يالغاليات
كنت بنزلها أمس بس والله ظروووووف
الجزء الأخير نزلته من جوالي بعدين رجعت سويت فيه تعديل وإضافة
يعني اللي قرأت الجزء وهوبخط صغير فياليت ترجع تقراه
وبإذن الله ..الليلة بنزل جزء ثاني
 
ياربي فرحتيني برجعتك لبندر انشاء الله تدووووووووووم هالسعاده يارب
 
فرحانه بالمره لرجعوك لبندر الله يسعدكم
ويبعد عنكم عيون الحاسدين
اللهم امين
 
لولولولولولييييييييييييييييش

الحمد لله , والله اني احب النهايات السعيدة يارب تمم على خير.
انا بعتبر اللي صار لحد هنا سعادة في سعادة ريت الفرح اللي تدورينه يجيك وعنك ما يروح.
بانتظارك فلا تطيلي الغياااااااااب.
​
 
الحمد للة بترجعيلة
بس صراحة امك واهلها يقهروي
يعني خايفة علي مشاعر اختها وبنت اختها هدي لا تزوجتي بندر ( قصدي رجعتيلة )
وهم اصلا ما فكروا فيكي لما اخذت زوجك منك وكمان طالعة معها في الشقة وهي ماهي محرم له يعني زانية زانية زانية
ليش يدافعوا عنا وخايفين علي مشاعرها قال اية قال مايصير الوحدة تتزوج واحد اخذ بنت خالتها
اجل يصير الوحدة تروح في شقة مع زوج بنت خالتها علشان تزني معاه
اسمحيلي ولا تزعلي مني ليش هذا الضعف والله لو اني بدالك اقولها في وجهة الكل وفي وجة جدك بالذات انها زانية وخطافة الرجال وافضحها حتي بعد زواجها منه
هذا بدل مايوقفوا في صفك ويربون الصايعة الضايعة هدي
اخ يالقهر
لكن ان شاء الله تكوي المنتصرة في النهاية
و يعوضك ربي بالاجر والذرية الصالحة
وانصحك نصيحة لوجه اللة حقك لا تتنازلي عنة ( وزوجك حقك) واللي يغلط عليكي خشي في عينة


لي رجعة ان شاء الله
 
الله يوفقك ويسعدك يارب ووحطي في بالك شي لاتبحثين في الماضي اللي فات ماااااااااااااااااااااااااات
 
الحالة
مغلق و غير مفتوح للمزيد من الردود.
عودة
أعلى أسفل