[you] اذا انتي موظفه ومتزوجه محتاجينك هنا

لا غير متزوجة
 
الحمد الله ريلي ما مقصر وياي لاني ما اشتغل من البدايه قالي زوجي اذا بتشتغلي انا ما بصرف عليج وشكرا ع الموضوع
 
انا موظفه ومتزوجه
ساعدت زوجي في بنا البيت ودفعت الاضعاف واخلصت حيث كنت ابيع ذهبي علا دفعتين والنتيجه بعد ما سكنا البيت كشر عن انيابه وصار دايم يقول ادفعي( اذا طلبت للبيت شي مثل قطعة اثاث) واذا اطلبو عياله منه شي قال روحو لامكم فلوسها كثيييييييييييييره رغم انه راتبه اكثر مني
هل هذا هو جزاءالاحسان؟
مااقول الاحسبي الله ونعم الوكيل
 
بالنسبة لي الحمد لله .. متفاهمين في مصاريف البيت ...
يعني هو اللي عليه فاتورة التيلفون والكهرباء ومير البيت وكل شي تقريبا...وانا ما استخدم راتبي الا للاشياء الكمالية .. العاب مكياج كريمات يعني اشياء تخصني واحيانا تخص عيالي حتى فاتورة تيلفوني هو يدفعها..
ونحن متعودين لما ينزل الراتب ما نستخدم الا راتبه ولما يكون عدا نص الشهر وما فيه مصدر نبدا نستخدم راتبي بس عالخفيف.. ويفضل منه للشهر الثاني الحمد لله...
انا اتوقع انه كله بايد الحرمة .. الزوج بيزعل مرة مرتين بس قوليله هالشهر لي انا.. بدلع نفسي وعيالي...مثلا.
 
اكبر نصيحة اقدر اقو لها اطلبي نفقة شهرية من زوجك من اول حياتكم حتى لو كان مبلغ قليل لان الرجل يحب الزوجة الي محتاجته ماديا لانه يحس برجولته وحقولكم السبب لاني موظفة ما اطلب من زوجي اكتفي بأن يعطيني فلوس للعيد فقط وما كنت ادري اني بتصرفي خليته يدور طالبة تحتاج عطور ملابس بطاقات شحن جولات لاب توب انا المغفلة ريحته ماديا فشعر بالنقص فصرفها على خويته حتى يحس برجولته بس لما تتطلبين افلوس اطلبيها بدلع وبوس ومن ها الكلام بيعطيك الي في جيبه كله هذا بالنسبة لزوجي كريم جدا لهذا صرف افلوسه على خويته وسلامتكم
 
السلام عليكم حبيباتى البلقيسيات
انا ام سيف و فرح واجابة على سؤالكم انا موظفة وكذلك متزوجة وكما هو واضح من الاسم الذى اخترتة لنفسى لدى طفلان سيف و فرح
 
اخواتي الغاليات راح اقول لكم تجربتي مع الوظيفه والراتب والزوج اخواتي نحن بطبعنا عاطفيات ونفكر بقلوبنا والي يؤثر فينا اكثر هي المجامله الي متعبتنا في حياتنا انا كنت موظفه وراتبي كان جدا مرتفع وزوجي كان رجل اعمال مرموق ويسافر كثير بحكم عمله وكان رجال صالح ولله الحمد وما كنت اوفر اي مبلغ حتى لو كان بسيط يخلص راتبي قبل لا يخلص الشهر وكنت انا من حملت على نفس الاعباء بالصرف على البيت والاولاد ونفسي وراتب الشغاله والسواق والفواتير وكل ما يخطر على بالكم حتى زوجي بالرغم من امكانياته الماديه العاليه يطلبي مني دائما وكل شهر مبلغ معين وانا الطيبه كنت اسارع وبكل فخر وسعاده تلبية طلبه دون ما اخذ اي اعتبار والمصيبه اذا صار نهاية الشهر وطلبت من زوجي مبلغ صغير للبيت سمعني كلام الله يعلم فيه مثلا وين راح راتبك او انت ما تعرفين تتصرفين بالراتب او انت من تاخذين الراتب على طول رحتي للسوق وتشترين اشياء انت مو بحاجتها
حتى مرت 9 سنوات وانا بالوظيفه ولم اوفر في البنك ولو مبلغ صغير وبعدين قررت ان اقلل مصاريفي واخلي زوجي يشاركني بمصاريف البيت لكن مع الاسف ما قدرت لانه تعود انا الي اصرف وفي الاخير قدمت استقالتي حتى احصل على راحتى وحرية واعيش على كيفي لان الوظيفه تقيدني وهذا الي الله كتبه علي وانا راضيه بقسمة ربي ولله الحمد بس ظروف زوجي وعمله بدات تسوء الى ان تعرض الى خساره ماليه كبيره وجعلته تحت الصفر حتى انه دخل للسجن بسبب الديون المتراكمه عليه وهذا الكلام كله كان قبل 15 سنه وكل هذا لم استفد من تجربتي السابقه وبدات اشتغل في بيتي واعمل حاجات وابيعها وبدا يصير لي مدخول بسيط ونافع ومع هذا رجعت مره اخرى وحملت نفسي فوق طاقتها وهنا زوجي طبعا عجبه الوضع كثر جلوسه بالبيت وولدي الكبير تخرج واشتغل براتب ممتاز وهذا كله ادى زياده الى تكاسل زوجي ولم يحاول ان يبحث عن وظيفه على اساس كرامته ما تسمح بعد ان كان رجل اعمال مرموق يكون الان موظف وله راتب طبعا زوجي فيه نوع من الكبر والغرور وانه ما يحب احد ان يامره بشي هو الي يامر ولا يؤمر عليه الحمد لله الذي عافاني ممن ابتلاه واستمريت فتره طويله على هذه الحال وبدا يشتغل زوجي بالاسهم وكان دائما يخسر حتى اصبح لديه فراغ روحي وعاطفي وانعزل عن الناس وتفرغ للنت حتى وقعت الكارثه واصبح لديه عشيقه عن طريق النت والجوال شوفوا المجامله ومداراة الزوج الزايده عن حدها لوين وصلت بعد ما احتويت الموقف ورجع زوجي لي ان شاء الله بدات اتغير مره اخرى الى ان رفعت يدي عن مصروف البيت نهائيا وجعلته في وجهه زوجي والنتيجه الثانيه من المجامله هي ان ولدي بلغ من العمر 29 سنه وهو غير قادر على الزواج لانه لا يستطيع ان يصرف على بيتين طلبت منه ان يواجهه ابوه او ان يضعه امام الامر الواقع وان يعطيه جزء بسيط من راتبه لانه يريد الزواج ابني لحد الحين مو متقبل فكرتي لان ولدي حنون جدا وبار بنا والله يحفظه من كل شر واذا كلمت زوجي عن زواج ابني قال خليه يتزوج من الي مانعه هوالي مايمسك راتبه الله واكبر طبعا زوجي من النوع الي يصعب شلون تقنعينه بفكره معينه وكل ما حاولت معه افتح له معه موضوع الشغل قال انا كبرت وانا تعبان وانا وانا وانا -------- الاسطوانه المعهوده فاصبح زوجي كسول جدا ويحب راحته ونفسه ولمن رفضت في احدى المرات ان اشتري له باكيت دخان وقلت له ما عندي فلوس جن جنونه وزعل علي مدة 20 يوم بس ظليت صامده وخاصه انا على حق وبعدين من كيفه ورجع لي بس انا قررت اني اظل على موقفي ولم ولن اغير راي بعد اليوم لانه هو الرجل وهو الي مسؤل عني وعن البيت والعيال وانا احاول مع ولدي ان يتخذ مثل موقفي لان زوجي ولله الحمد في اتم صحه وعافيه ويستطيع العمل وتصدقون الحين زوجي ما يطلب من ولا قرش حتى انه يتجنب الحديث معي عن الماده اسفه لقد طولت عليكم الحديث وكان قصدي كله ان تستفيدون من تجربتي ابعدوا عنكم المجامله ولا تحملين نفسك فوق طاقتها تقولين علشان اكسب زوجي واتقرب منه ممكن تساعدينه باشياء معينه مثل مصروفك كمساهمه منك له اوضعي خط احمر بحث لا يتعداه زوجك ولا يتدخل في راتبك والمفروض انك لا تعلمينه كم راتبك لان هذا من خصوصياتك ضعي في البنك جزء من راتبك كل شهر وانسيه خليه للزمن اجعلي جزء ولو بسيط من راتبك للصدقه الجاريه لان هذا الجزء البسيط هو الي راح تلقينه في الاخره لو متي بعد عمر طويل تلاقينه قدامك اخواتي الراتب ملك لك انت لوحدك فلا تفرطين فيه الا بالحق ولا تكونين عاطفيه جدا مع زوجك فراتبك من تعبك وجهدك فهذا رايي ان كان صوابا فهذا فضلا من الله علي وان كان خطأ فمني ومن الشيطان هذا والله اعلم واستغفر الله واتوب اليه
 
الله يرحم حالي واحوال المسلمات ماادري كيف اقوله
 
يابنت الحلال .... الحمد لله اانك موظفه ومعك فلوسك ... اصرفي ع نفسك وعيالك وبيتك ... أهم شي لا يتدخل ويقول لا تشترين اواعطيني ... واهم شي اذا طلبتي منه وعطاك فالحمد لله لكن اذا رفض هنا المشكله ...
(وحدة زوجها يهددها عطيني راتبك او بطلقك ...)؟؟؟؟؟؟؟؟؟؟؟؟
 
عزيزاتي البلقيسات اذا كنتي موظفه او غير موظفه الرجل هو الي يصرف عليكي انتي والعيال اما اذا حبيتي تصرفين على نفسك شوي من راتبك ممكن وعلى بيتك واولادك لكن بشرط لا تخبري زوجك بهذا فالثرثره مع الرجل عما لديكي من اموال وكم تصرفين هذا هو الخطا بعينه فالسريه مهمه جدا لتكوني امبراطوريتكي الماليه عزيزتي
 
كيفية جعل الزوج يصرف على الزوجة الموظفة

مرحبا حبيباتي 000 اولا اشكركم على هذه الدعوة للمشاركة 00وثانيا انا متزوجة من18 سنة وموظفة من 13 سنة اي خمس سنوات من زواجنا كان زوجي يصرف علينا من راتبة البسيط اللي كان نصه ديون لبناء البيت وما قصر عنا وبعد ما توظفت حبيت اني اعوضة عن حرمانه فكنت اصرف على نفسي والعيال والبيت من طيب خاطر و بدون ما اطلب لين حسيت انه مسك يده عن البيت نهائي بعدها بديت اطلب وما استحي لين خليته يصرف كثر صرفي على البيت وما اغبي عليكم 000 الصراحة انا مبذرة وما اعرف امسك او اوفر جزء من راتبي:blow:
 
اسفه حبيبتي
انا ماني موضفه
ولا متزوجه بس انا لو موضفه
ومتزوجه ما اصرف عليه
لان المفروض الرجل هو الذي يصرف على المراء
وليس المراء التي تصرف على الرجل
وراتبي اصرف بيه على نفسي
ما اطلبه علشان ما تبدا المشاكل
 
السلام عليكم ورحمة الله وبركاته...

خواتي المفروض بكل زوجه من بداية حياتها تقول لزوجها راتبي لأمــــــــــــي اللي ربتني وتعبت علي ..
وتفتح حساب وتحول راتبها عليه وتكذب عليه تقول هالحساب حساب امي ...وانا مارح آخذ منه ولا ريال..طبعاً تجمع فلوسها في هالبنك ..عشان حساب اليوم الأغبر الله لايجيبه...يمكن يطلقها والا يتزوج عليها ويطين عيشتها فتستفيد من فلوسها وتغني نفسها عن الناس..
(والرجال على ماعودتيه عليه)..
عودتيه على انك تصرفين خلاص رح تصرفين طول عمرك اما اذا عودتيه على انه هو اللي يصرف بيتعود وينسى انك موظفه...
وفهميه انه مجبر يصرف عليك مصاريفك كامله حتى لو انتي غنيه..ولا تدفعين في البيت ولاريال حتى لو متوا من الجوع...عشان يتعود ...


واذا كانت الوحده قضت نص عمرها في صرفيه على هالرجال وبيته فتشوف لها حل ...تحاول تخفف من المصاريف شوي شوي وتدريجياً لين تقطعها نهائياً...

واذا والله مافي أمل خلاص تصرف على نفسها بس مكياجها وملابسها واغراضها الشخصيه والباقي هو يتحمل مسؤوليته...والا على ايش فاتح بيت؟؟؟!!!!!!

عالعموم انا لاموظفه ولا متزوجه ..دعواتكم خواتي........
 
فديت زوجي نحن الحمدلله متفاهمين ورواتبنا وحده .....
 
بصراحة انا موظفه وزوجي يسألني عن كل صغيرة وكبيرة في راتبي وانا دائما اسيء التصرف في المال
لاني اشتري كل اللي احتاجه وكل اللي بيتي يحتاجه واعطي زوجي من غير ما يطلب مني
لما تعود هو ان هذا واجبي ان اصرف راتبي على الآخرعلى هالامور ادلع نفسي بالصالونات اشوي وطبعا هو يوفر لنفسه عشان في الصيف يسافر مع ربعه ويخليني مع العيال
بس تدرون شنو سويت عشان اجبره يصرف علي انا واعيالي ؟
اخذت اجازة صحية من غير راتب لاني تعبانه وبعدين اخذت اجازة امومة نصها من غير راتب فانجبر يصرف علينا
لكن الشي الغريب انه رغم ان يصرف كل راتبه علينا الا انه وفر له مبلغ وسافر وتركنا كالعادة
والحين انا استفدت من هالدرس وبخلي راتبي لي فقط واخلي كل شي على ايده حتى لو مااعجبه
 
لو لقيتوا جواب تعالوا افيدوني

بالنسبة لي اعطيت وقدمت بطلب منه وبمساهمة مني في بعض الامور مع الوقت صار يتطلع لمشاركتي
اضطريت اتوقف عن العمل بدون راتب قووم الدنيا على راسي ولاقعدها حسبي الله عليه
وماكلف على نفسه يجيب حتى طلبات البيت الاساسية يعني بخللاخر حد علياا وكريم عند نفسه وبقووة

عشان كذا انا التزمت الصمت ومن يومها سياستي تغيرت اصرف على نفسي لحد ما ارضيها وهو بالطقاق يدبر عمرة لاني اكرة الانانية
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل