ولابد من شكوى إِلى ذي مروءة**يواسيك أويسليك أويتوجع@3/4سنين زواجنا(غايب)

  • بادئ الموضوع بادئ الموضوع *وسن*
  • تاريخ البدء تاريخ البدء
الله يسخره لك يارب ويخليكم اسعدزوجين بهالعالم كله
دعواتك انه يقربه لك ويقربك له ويالف مابينكم
 
حنانوو

آمين يا ختي .. الله يقبل منك ..

وياربي يا حبيبي .. جعل المَلَك يأمّن على دعواتك
و يقول و لكِ مثله يا كريم
 

السلام عليكم

كيف حالكم يا بنات

جزاكم الله خير على وقفتكم معاي و دعواتكم الصالحة لي اللهم لايحرمكم الأجر و يجزاكم خير

بقولكم وش صار علي

زي مانصيتكم بالضيقة .. بذكركم بالرخا الحمدلله والشكر ياربي

الحمدلله الذي بنعمته تتم الصالحات .. الوضع في تحسن مستمر

بقولكم وش الاشياء اللي سويتها

- عدت إلى الله و أنبت إليه بالصدقة وتركت الأغاني -كنت مفتونة بالأغاني-
- حاولت اصفي النية -موب عشانه عشان ربي- مع كل احد
- حاولت اخلي اخلاقي حسنة -موب عشانه عشان ربي- موب بس معاه مع كل أحد صغير و كبير

- بعد ما عديت مرحلة قولتي له : (إذا جتنا اجازة مارح أروح من غير محرم , تبي تودينا أهلا و سهلا منتب مودينا بلاش نسافر)
ويوم رد قال : بكيفك وعلى اساس إنه بيسافر و يسفهنا بس رحم عياله وودانا
دخلت له بموال جديد .. قلت له : إذا بتسافر عننا -اثناء ايام اجازتنا- اكثر من يومين 3 مافيه داعي نروح نبيك موجود و الا ليه السفر دامك ما تتواجد -من عادته يودينا و يعطينا مصروف و يهج ج ج – صار يجلس معنا بالاجازة الحمدلله

- أنا صرت غامضة بالنسبة له موب زي أول اي شي ي ي أقوله ..
صار فيه اشياء ما اقولها سبحان الله يحس ان فيه اشياء ما اقولها فبالتالي صرت اشده اكثر

صرت اكثر من السكوت , صار يجهل ردود فعلي

- ما أتعامل بلئامة و أمسك عليه اشياء
لا .. بالعكس .. أكون محددة وواضحة اللي ما يعجبني بتصرفاته اقول له لا أول كنت جبانه
وسبحان الله صار يسمع الكلام ما يبيني ارجع لذيك الطريقة اني اهمله

.. فهم مني اني اذا بتجي على كيفي فانت على عيني و على راسي ادلعك و اضحك معاك و اخليك على ملك
اذا تبي تسوي اللي ما اوافق عليه –من هروب غير طبيعي من البيت- فأنا برجع لهذيك الطريقة البغيضة اللي موب اسلوبي

- صرت مباشرة يا بنات مرة مرة ومحددة –قريت ان الشمالي يحب اللي اذا بغت تطلب تصير واضحة و محددة
مثلا : ابي تجيب كذا و كذا هدية .. بليييز الله يخليك بنغمة كلها دلع

طبعا ناسية الهدايا أنا من سنين ..بس من صرت محددة بدت تتنفذ بعضهن اللهم لك الحمد

ويا بنات ياللي مثلي نسوا الدلع
حاولوا تستعيدون هالطريقة
حتى لو مستحين
عادي بعدين بينسى إنك كنتي مو دلوعة
و استحي من الدفاشة مو تستحين اذا صرتي بطبيعة الواجب انك تصيرينها


اي شي حسيت انه نفعني بعلمكم اياه الله يجزاكم خير​
 
الله يزيدك هناء وسعاده ويسخره لك يارب العالمين
بصراحه انتي انسانه قمه بالاخلاق والرقي وزوجك
انسان فعلا محظوظ فيك
لك كل الاحترام
 
طيب اطلبي منه تروحون معاه ....ينقلكم وتستقرون معاه وتقبلي الحياة معاه في الغربة

الله يسخره لك وجعله يشوفك أجمل النساء بعيونه يارب العالمين
 
وين أروح؟؟؟ قال:
الله يزيدك هناء وسعاده ويسخره لك يارب العالمين
بصراحه انتي انسانه قمه بالاخلاق والرقي وزوجك
انسان فعلا محظوظ فيك
لك كل الاحترام
أنقر للتوسيع...

آمين يا كريم
الله يرفع قدرك ويعز شانك على حسن ظنك فيني
ويسخر لنا ولك و لكل مسلمة آمين
اللهم صل و سلم على محمد
 
الوردهـ الخجوله قال:
طيب اطلبي منه تروحون معاه ....ينقلكم وتستقرون معاه

حبيبتي هو موب مستقر بالغربة .. هو يتنقل بين مدينتين غير مدينتنا اللي حنا فيها

وسبق و قلت له .. طلاما شغلك اكثره بهالمدينتين وهن قريبات لبعض خلنا ننقل لها
رفض رفض تام

وتقبلي الحياة معاه في الغربة
ولو نقل أكيد كنت بتقبل

الحين بحول الله لو اشوفه يطاير زي اول
بعترض و بتكلم و بقول انا رافضة هالطريقة
لازم حل
وارمي الكورة بملعبه
طبعا الكلام بأسلوب مباشر -مافيه استعطاف ولا يتخلله ضعف- وبهدوء و بثبات و اصرار
بقوله انا رافضة لهالطريقة
ابي حل
وكل ماجاني من جهة جيته من جهة
طبعا هو يا اما بتوصل معاي لحل يا اما بيكابر و يقول انا كذا و كيفي عاجبك عاجبك موب عاجبك بالطقاق
اذا اختار الحل الثاني
انظري بعيونه بصمت و اسكتي
لا تعقبي اذا طلب منك كلام قول اوكي .. كذا ؟ اوكي .. خير إن شاء الله

خلاص بعدين شغلي التطنيش -مع القيام بكل واجباتك وبالاهتمام بنفسك وبيتك- بس اعتبريه موب موجود
يعني لو حكى ردي عليه بس لاتبادرين ولا تفلينها مرة !
ولاتحرصين على وجودك معاه

بيمل خصوصا مع نظام الغموض اللي بادية فيه انتي

الله يسخره لك وجعله يشوفك أجمل النساء بعيونه يارب العالمين
أنقر للتوسيع...
آمين يارب العالمين .. جزاك الله خير يالغالية
 
فكرتي تقرون على روحكم الرقيه

؟؟؟

اكيد فيه سبب لبعاده عنكم​
 
اختي
1- إذا اتصل عليكي لاحظي إذا اتصل هو"موانتي تتصلي " تكلمي بغنج ودلع ومياصة زائدة ومو حرام تسويها هذا حلالك !!! ومو كل اتصال تردي عليه يعني اتصال فوتيه واتصال ردي بعد 4 رنات واتصال 3 رنات ومرة ردي بسرعة ومرة كوني متلهفة عليه ومرة لا وإذا تبغي ترسلي مسج ارسلي مسج جنسي بس ها مو كل شوي يعني كل اسبوع واحد
2- إذا جاء لعندك ريحيه من ناحية الجنس وبأمانة وذدمة وضمير هههههه واجلسي في حضنه بعد الجنس عشان تصيري عشيقته وخليكي دائما مبتسمة ولا تكثري كلام ، الرجل لايجب المرأة الثرثارة وينفر منها كل ما قل كلامك طلباتك كانت مجابة خلي اطفالك يستقبلوه في البداية وانتي تكوني محضرة قهوة أو شاي وكيكة أو حلى وقدميه له وخلي جلستكم عا ئلية يعني انتي واطفالك وزوجك وفي الليل شوفي شغلك
3 ثاني يوم اخرجي معاه مع الصباح بدي اقضي من السوبر ماركت والاطفال ناقصهم ملابس أو مستلزمات المدرسة ولا تنسي الشاي أو القهوة معك في السيارة وأنا نفسي في العطر الفلاني وناقصني ماكياج من وجوه او نكتار أو ..أو ... يعني ماركات وبرضو في الليل شوفي شغلك
وهكذا متعي نفسك هو بيركض وراكي
ولا تقولي ..انت بعيد؟؟؟؟؟ ليش تروح عننا؟؟؟؟
قولي .أنا أحب الرجال اللي يهتم في زوجته
انا احترم الرجال اللي يجلس في البيت بالرغم من مسؤؤلياته
يعني غيري انت بـ انا
والله المستعان
 
طيف الروح قال:
فكرتي تقرون على روحكم الرقيه​


؟؟؟​


اكيد فيه سبب لبعاده عنكم​
أنقر للتوسيع...

والله أنا اقرا عادي موب رقية .. والعين حق
بس بعاده موب شي غير طبيعي وصار فجأة
هو صار بالتدريج ..
يعني منطقيا (إذا محد وقف في وجهه و قال له هالشي غلط) بالعقل أكيد بيختار المكان الأكثر هدوء وراحة
الغير طبيعي هو ردة فعلي و انهزاميتي و خضوعي لاهماله
واللي يضيع حقوقه مارح يقدمونه له الناس
جزاك الله خير أختي و القراية أكيد زينة
و أنا كنت أيام الأزمات أنام على رقية الشيخ السدحان واقرا البقرة بجلسة وحدة لأيام متواصلة
 
راحةالقلوب2 قال:
اختي
1- إذا اتصل عليكي لاحظي إذا اتصل هو"موانتي تتصلي " تكلمي بغنج ودلع ومياصة زائدة ومو حرام تسويها هذا حلالك !!! ومو كل اتصال تردي عليه يعني اتصال فوتيه واتصال ردي بعد 4 رنات واتصال 3 رنات ومرة ردي بسرعة ومرة كوني متلهفة عليه ومرة لا وإذا تبغي ترسلي مسج ارسلي مسج جنسي بس ها مو كل شوي يعني كل اسبوع واحد
2- إذا جاء لعندك ريحيه من ناحية الجنس وبأمانة وذدمة وضمير هههههه واجلسي في حضنه بعد الجنس عشان تصيري عشيقته وخليكي دائما مبتسمة ولا تكثري كلام ، الرجل لايجب المرأة الثرثارة وينفر منها كل ما قل كلامك طلباتك كانت مجابة خلي اطفالك يستقبلوه في البداية وانتي تكوني محضرة قهوة أو شاي وكيكة أو حلى وقدميه له وخلي جلستكم عا ئلية يعني انتي واطفالك وزوجك وفي الليل شوفي شغلك
3 ثاني يوم اخرجي معاه مع الصباح بدي اقضي من السوبر ماركت والاطفال ناقصهم ملابس أو مستلزمات المدرسة ولا تنسي الشاي أو القهوة معك في السيارة وأنا نفسي في العطر الفلاني وناقصني ماكياج من وجوه او نكتار أو ..أو ... يعني ماركات وبرضو في الليل شوفي شغلك
وهكذا متعي نفسك هو بيركض وراكي
ولا تقولي ..انت بعيد؟؟؟؟؟ ليش تروح عننا؟؟؟؟
قولي .أنا أحب الرجال اللي يهتم في زوجته
انا احترم الرجال اللي يجلس في البيت بالرغم من مسؤؤلياته
يعني غيري انت بـ انا
والله المستعان
أنقر للتوسيع...

حلوة اقتراحاتك أختي خصوصا الغنج اللي كنت أغفل عنه
وحركة الحركات اللي مع الشاهي و القهوة
وحلوة طريقة الثناء على أطباع أنا أبيها عشان يسويها

جزاك الله خير أختي راحة
 

السلام عليكم

يا بنات رجعت أعلمكم عن مستجدات وضعي

رجع زوجي لسابق عهده و صار مايتواجد بالمدينة اللي حنا فيها

إلا إذا أبوه موجود -مايعمل حساب في الغياب إلا له ..

أو إذا شغله طلبوه

وأنا يا بنات خايفة والله على نفسي إني يجيني شي بصحتي من القهر

فقررت قرار ..

إني أعتبره موب موجود وأغسل مخي من حكاية "إني انسانة ولي حقوق العشرة عليه"

لأنها ما تجي بالاكراه وخصوصا مع زوجي الله يصلحه وجميع شباب المسلمين

وأعيش حياتي ..

وإذا هو ما راعى رب العالمين -سبحانه- في حقوق زوجته وعياله ..

كيف انتظر منه مراعاة !

وهالكلام والتغيير بطريقتي من قريت مقالة الأخت "نورة الفايز" جزاها الله خير

أنصحكم يا بنات تقرونها ..

ترى والله إني جاني انشراح وراحة لما قريتها .. بس اقروها زين زين !

بس طبعا أنا ما أقول عيشوا مسلوبات الارادة .. مجرد الالات لاسعاد الازواج .. لا ..

صحيح إني ما أقدر أتطلق عقب 18 سنة !

بس الشي اللي سويته إني ماني مثل أول !

يعني مثلا .. تكون أختي سهرانة عندي ويجي من السفر (دايم يجي فجأة)

(في السابق من نسمع صوته على طول تروح لبيتها وعلى طول أرحب فيه وأبين فرحي بقدومه)

الحين عقب ما شلته من بالي لا ..

طبعا أتصرف على طبيعتي ماأغير فيها شي ولا أبيّت في قلبي نيات شر أو حقد أو أي شي

واسأله إذا يبي ياكل شي .. وأسوي له شاهي

وأسوي له جميع مظاهر الترحيب (الشكلية) اللي تسويها أي انثى تحفل بقدوم أي زائر ولو كانوا أولادها (يعني زيه زي غيره ..

وإذا تأكدت إنه مايبي شي .. أرجع أكمل سهرتي مع أختي ! ..

ومتى ما طابت روسنا من السهر وراحت .. رحت له

وأي عزيمة تجيني ..

في السابق أرسل رسالة بالليل نصها "إذا جيت نرجع البيت علمني قبل بنص ساعة عشان أرجع"

والحين أكمل سهرتي عااااااااادي ومتى ما قضيت أرجع

وأحاول -اثناء تطبيق ذلك- إني أتجرد من أي رغبة في الانتقام .. لأنه يا خواتي على نياتكم ترزقون

وأقصد إني أسوي اللي أبيه بس عشان أنا راغبة فيه موب عشان أكيده

يعني لو هو موجود وما جا على بالي إني أطلع .. عادي أقعد بالبيت ..

سبحان الله بينعكس كل شي تحسين فيه من جوا عليك

بيحس إنك منتب معاه حتى لو انتي قاعدة معاه

أنا ما أقول صيروا مملات ..ولا تسولفون .. لا عادي سولفوا موب عشان توسعون صدره ..

عشان أنفسكم

وسووا اللي تقدرون عليه لأسعاد أنفسكم و عيالكم

وأرجوكم تقرون موضوع أختنا "نورة الفايز" بتمعن

الله يجزاها خير ووالديها


والله يفرج لكل مكروب من المسلمين آمين يارب العالمين صلى الله على محمد

​
 
لاحظت من اسلوبك
فيني منك اشياء كثيره
====
قصة حياتك ذكرتيني بثلاثة ارباع بنات جماعتنا زوجات العسكر
كل وحده زوجها فديره وهي فبيت اهلها كل بعد اسبوعين يجيهم
وتعالي شوفي
فبيت اهاليهم ومخلفات اولاد والازواج كلن لاهي في اعماله
=========
الشمالي الشرقي مشكله
واتوقع لو زوجي من هالنمط تطلقت من اول شهر
الله يعين زوجات هالنمط
 


هلا أختي شمالية

مرة بنقاش من نقاشاتنا العقيمة .. كنت احذره من مغبة ترك العايلة في مهب الريح

قام ضرب لي مثال بعوايل اقاربنا تطلقوا اهاليهم من بدري وطلعوا عيالهم من أحسن الرجال و الحريم

قلت "هين .. إذا الأبو (مات) أو (انفصل الابوين) .. الوضع يختلف ..

بيكون واقع .. وبيتقبله الابناء .. ويمكن تكون دافع لهم للصلاح و الفلاح

بس إذا هو موجود وحارمهم منه (( بمزاجه )) -موب مضطر هو للسفر هذا- بتختل الموازيين عندهم

لغة الاحتياج إذا لم تجد وجهتها الطبيعية تترجم إلى لغة كريهة جدا ومؤلمة .. الله المستعان


اللي عندي يسافر للترفيه أكثر من إنه عمل !

لكن اللي أزواجهم عسكر ياختي شمالية معذروين .. لقمة عيشهم شغلهم

بس اللي عندي ربي موسعها عليه ..

بس .. ماغير لاهي بنفسه ومتعها تبارك الرحمن الله -يخليه لنفسه ..ما أحب أضر مسلم- ..

و ما أقول إلا .. الله يجعلني صابرة ومحتسبة غير ساخطة على قضاؤه و قدره

جزاك الله خير أختي

​
 
ماشاء الله عليك

قريت موضوعك كامل..


خصوصا الجزء الأخير مررره حلو واعجبني تفكيرك فيه


بس في نقطه يمكن انتي غافله عنها او ما ذكرتيها

عياله وينهم من التأثير عليه؟؟

أعتقد الأولاد نقطة ضعف الشمالي..



الشئ الثاني زوجك اذا ما رجع من رغبه داخليه عنده ما راح ينفع فيه الكلام ولا راح تستفيدين من رجعته مغصوب من أبوه مثلا..




اخر شي لا تنسين الدعاااااااااااااااااء .. وبتفرج عليك من كل باب..



 

أختي واثقة ..

أقولك يطبق الاسبوعين والثلاثة عن عياله بدون سبب تقولين عياله !

عياله لانهم ما تعودوا عليه من يوم طلعوا على وجه الدنيا

فموب حاسين إنهم يفتقدونه

يعني ياحياتي فاقدين الامل

وأنا أخاف إني أحثهم إنهم يكلمونه ويطلبونه يرجع وما يطول عنهم ..

يقوم يصدهم فيصير عندي وعندهم الجرح مضاعف

عموما ما أفكر أقول لأبوه خلاص

لأن على قولتك ما رح يقتنع إذا جا مغصوب

وخايفة إذا تدخل يقعد يحط فيني تهم ..

ما أستبعد إذا انحجر يلجأ لهذي الطرق اللي بتزيد الموضوع عندي بشاعة

الشكوى لله سبحانه

جزاكم الله خير خواتي واثقة والرايقة ووجد المشاعر

​
 
اللهم عبدك قد ضاقت به الاسباب واغلقت دونه الابواب وبعد عن جاده الصواب وزاد به الهم والاكتئاب وانقضى عمره ولم يفتح له باب وأنت المرجو سبحانك لكشف هذا المصاب يامن اذا دعي اجاب ,ياسريع الحساب ,يارب الارباب ,ياعظيم الجناب ياكريم ياوهاب . رب لاتحجب دعوتي ولاترد مسألتي ولاتدعني بحسرتي ولاتكلني الى حولي وقوتي ارحم عجزي فقد ضاق صدري وتاه فكري وتحيرت في امري وانت العالم سبحانك بسري وجهري القادر على تفريج كربتي وتييسير عسري اللهم احيينا في الدنيا مؤمنين طائعين وتوفنا مسلمين تائبين اللهم ارحم تضرعنا بين أيديك وقومنا اذا اعوججنا واعنا اذااستقمنا وكن لنا ولا تكن علينا اللهم نسالك ياغفور يارحمن يارحيم ان تفتح لادعيتنا ابواب اجابه يامن يقول للشي كن فيكون اللهم لاتردنا خائبين وآتنا افضل مايؤتى عبادك الصالحين اللهم ولاتصرفنا عن بحر جودك خاسرين ولاضالين مضلين واغفر لنا ليوم الدين برحمتك ياأرحم الراحمين (اللهم آمين )
الله يفرج همك ويسخر زوجك
امين يااااااااااااااااااااااااارب


 
يجب تسجيل الدخول أو التسجيل كي تتمكن من الرد هنا.
عودة
أعلى أسفل