السلام عليكم ورحمة الله وبركاته
جزاك الله كل خير يا د.شيماء والاخوات أيضا
انا عندي مشكلة بحالي بجد تعبانة منها وخايفة تخسرني زوجي وأولادي، العصبية الزايدة لدرجة الجنون ، بخاف أأذي أولادي لاني بصير بدي اتفشش فيهم خاصة ابني عمره سنتين إلا كم يوم ، المسكين هوي شقي وانا خلقة بحس حالي بقتل دبان وجهي ، ما إلي خلاق حدا ولا إلي خلق اخدم حدا ، نفسي يكونو بخير بس بنفس الوقت ما عندي الصبر الكافي لأبذل لهالشي ، وبنفس الوقت بدي اعيش حياتي وانبسط فيها كأنا ، يمكن أنانية ، بس بجد محتاجة استمتع بحياتي ، عجولة كتير بستعجل على كل شي بدي إياه ، مشتتة مو عارفة شو اكتب بس بجد قرفانة من حالي ، مو عارفة اكون متوسطة بردود فعلي ببالغ بمشاعري الفرح ، الغضب ، الحزن .
هاي مشكلتي باختصار ، نفسي حدا يدعمني ويساعدني بالدعاء والتشجيع لاتحسن ، زوجي بلش يهرب مني ويتجنبني ، انا ما بدي ابقى ضعيفة بس ما بدي ابقى دفشة معاه ، جامدة بمشاعري لاني لما اعبر عنها ببالغ فما بلاقي الرد اللي بتوقعه لإلها . مفكرة الدنيا متل الأفلام والرومانسية ممكن اتكون متل الأفلام بس زوجي واقعي وبيئته غير بيئتي لهيك بحس انه بعيد عني
