قصة شعيبية

[nana9379]

حمدلله على السلامه ,, والله يبارك لك ..

 

[جيانة]

مراحب..
الله يبارك فيكم...
المهم ياحلوات كأن جدتي ماراقت لها القعدة بالزواج والأصوات العالية والطق والرقص وقررت تنسحب ولكن ليس بهدوء!!
وسوت مظاهرة في القاعة تزعمتها.. وزوجات أعمامي من خلفها!!
أمي:خير خير اشفيكم؟!
جدتي(وبكل ثقة):قومي فزي يابدرية انتي وبناتك وإلبسن عباياتكم ويالله على البيت!!
أمي(وهي متفاجئة):ليش؟وش صار؟
جدتي:اللي صار إن هالناس ماعندهم سالفة..صمَّخوا أذانينا بهاالبومة اللي جايبينها تنعق فوق أذانينا من أول الليل وأهلكونا جوع وبطوننا قامت تقرقر!!
أنا:وش يعني ياجدة؟!بتعلنينها عليهم مقاطعة؟!
جدتي:انطمي ياشويشة!ياراعية الدجة والتنقز والترقص قدام المخاليق.. لاخستي في بيت أبوك بكرة..قولي جدتي قالت!!يالله على البيت..
أمي:ياعمة كيف نخلي عرس بنتنا ونرجع البيت؟وش يقولون علينا الناس؟بعدها الزفة ماصارت والعشاء ماجاء وقته..
جدتي(وهي حاطة يدها على حواجبها وكأنها تتقي حرارة الشمس في عز القيلة):لاياشيخة؟!وش تنتظرين؟يحطون عشاهم لاأشرقت الشمس؟!!أقول دقي دقي على خلف خل يردنا البيت..وخلي السهر تالي الليول لك ولبناتك!!
أمي:عيب عيب ياجماعة تتركون العرس وتطلعون هذي فرحة بنتنا...
جدتي:عجيــــــــــــــــب!!والله وصرتي تعلمينا العيب يابدرية يابنت سعد!!
أمي:لاإله إلا الله..زين اصبري شوي لين يجي العشاء و كلي وبأكلم زياد يرجعك على طول..
جدتي:قلت لك ماني قاعدة!!
أمي:زين استريحي شوي وبأروح اتصل بـ خلف..
ورحت ورا أمي...أنا وضي وريفان..
أنا:يمه؟إنتي من صدقك بتخلينهم يرجعون البيت؟
أمي:وش أسوي فيها؟راكبة راسها!
ريفان:بس فشيلة الصراحة زوجات أعمامي وبناتهم يطلعون من العرس..الحين الناس بيحسبون فيه مشكلة صايرة بيننا..
أنا:لا لا يمه تكفين بنات أعمامي لايرجعون قبلنا البيت!!
أمي:ليش؟
أنا:تبينهم يستفردون بغرفتي ويحوسون بأغراضي؟! ذا اللي ناقص!
اتصلت أمي بأبوي ولكنه قال:مادام رغبة أمي إنها ترجع البيت؟خلها ترجع السهر يتعبها..
أمي:بس ياخلف أمك ماتعشت..
أبوي:ارسلي الشغالة معاها تجهز لها عشا بالبيت وبأكلم زياد يوصلهم..
وبالفعل راحت جدتي والشغالة مع زياد وجلسوا زوجات أعمامي في العرس على مضض!!
وآثاري أخونا في الله زيادوه أخذ جدتي ووصلها البيت وكانوا راكبين جيمس وخبركم الجيمس مقعدته عالية ولما دخلوا الكاراج في حوش البيت استعجلت جدتي بتنزل ومعلقة رجل فوق والرجل الثانية بالأرض وزياد رجع بالسيارة لـ ورا وزلقت جدتي شعيبية زلقة محترمة وزأرت زئير يشيب له راس البعير!!
وأخذت تدعي وتسب وتسخط على زياد..
وورط المسكين وحاول يرفعها ويدخلها البيت بعد جهد جهيد واتصل بضي..
ضي:هلا زياد..وصَّلت جدتي؟!
زياد:ايه وليتني ماوصَّلتها!
ضي:هههه أكيد قعدت تذم وتسب في ذا العرس صح؟
زياد:ياشيخة ماهي هذي المشكلة
..المشكلة إنها وهي نازلة رجعت بسيارتي ورا ورجلها معلقة بالسيارة وطاحت طيحة شينة أخاف سببت لها عاهة مستديمة!
ضي:وااي ياعمري عليك يازياد أكيد نتفت شواربك؟!
زياد:أي نتفت شواربي؟إلا رسمت براسي خرايط بعصاتها!!عجزت أقدر أشيلها أنا والشغالة من الأرض!
ضي:أجل وش سويتوا؟
زياد:جبنا زولية(بِساط)وفرشناها على الأرض وحطيناجدتي فوقها وسحبناها لين البيت..
ضي:هههههه
زياد:ياشيخة ماهو وقتك تضحكين..أنا ورطان لشوشتي مدري وش أسوي..
ضي:ودها للمستشفى أخاف تضررت..
زياد:أي مستشفى الله يصلحك هالحزة؟أقول لك طلعت عيوني لين قدرت أدخلها البيت تبيني أرجع أسحبها وأركبها السيارة من جديد؟ليش؟مستغني عن نفسي؟
ضي:أجل ارجع للعرس ولاكأن شي صار يمكن الاصابة بسيطة وأكيد هي بتنام..
وجاء زياد للقاعة وكمَّل العرس..
وأما ضي عشان لاتوَتِر أمي اتصلت على البيت وكلمت الشغالة وقالت لها:سوي لجدتي مساج..
وراحت الشغالة تِفزَع لجدتي وتمسجها لكن جدتي ماقصَّرت قمعت الشغالة على راسها بالعصا لين أفقدتها الذاكرة!!

 

[ملكة الـ ـشوكلت]

ماشاء الله حكاااايه فوق الخيال خخخخ
بصراحه أنا ماقريتها كلها بس ...من أولها ...ومن دحين ...^_*
بس .........بسم الله ما شاء الله عليك.......قدعه....^_^
الله يحفظك

 

[وردة تركواز]

يا شيخة

رحمة انها رجعت البيت ما كملوا الفرح <<< بلا نكد


مكملين معاك

 

[جيانة]

ياهلا فيكم..​

مر العرس وأهم شي إن العروس طلعت قمر والزفة حلوة..والحقيقة زوجات أعمامي أول مرة يحضرون عرس بالمدن غير زواج ضي وريفان السابق..ولما إنزفَّت مع عريسها وتغطى كل الحريم بالقاعة وانطفت الأنوار صارت كل وحدة من حريم أعمامي تصيح على بناتها تغطوا زين!غطوا عيونكم!يابنت غطي يدينك!
أنا:أقول استريحوا..القاعة مظلمة والأنوار مسلطة على العروسين بس..
وحدة من زوجات أعمامي:الستر زين ياشعيبية تبين زوج أختك يقز بناتنا؟!
أنا:نعم؟بالله من صدقك عاد؟العريس بيترك أختي القمر ويقعد يقز بناتكم؟!من زينهم عاد؟!بس صَدق المثل اللي قال:القرد بعين أمه غزال!!
ناظرت فيني زوجة عمي بنص عين وقالت:الله يعافيك ولايبتلي بناتنا!
وجاء وقت العشاء ودخلنا على البوفيه وأكلنا وشربنا ووصلنا البيت متأخرين ويوم دخلنا جميعاً إلا ونسمع صيحات الاستغاثة!!
جدتي:آآآآآآآآه ياعفيسان واويلااااااااااه يارحمة الله....الله يرحمك يابوي...ياصبر أيوووب!!
دخلنا جميعاً عليها وماحنا دارين وش السالفة والأخت ضي رجعت لبيتها ولاعلمتنا بسالفة جدتي مع زياد!!
وأبوي قد طلع ينام ورحت أركض عليه وقلت:يبه يبه إلحق!
أبوي:وشفيك؟!
أنا:جدتي شعيبية خرَّفت!!
أبوي:عيب عليك..جدتك أذكى مني ومنك!
أنا:أجل تِحْتَضِر!!
أبوي:أعوذ بالله منك..جِعل يومك قبل يومها!!وش قاعدة تخرفين؟
أنا:أقول لك قاعدة تصارخ وتنادي جدي عفيسان..
أبوي:زين شوفي لي طريق خل أدخِل عليها..
ونزلت وخليتهم كلهم يطلعون عشان أبوي بيدخل عندها..ودخل أبوي وأنا وأمي وريفان معاها..
أبوي:خير يايمه؟عسى ماشر؟
جدتي:الله ياخذ زياد!وأم زياد..
أمي:لا لا ليش الغلط ياعمتي؟
جدتي:تستاهلون..ولدك النشمي كسَّر رجولي وظهري الله لايعطيه عافية..
أبوي:شلوووون؟وش سوى فيك؟
جدتي:طيحني من سيارته وجرجرني على الأرض..وااويل قلبي ويلاه!وينك ياعفيسان تشوف ماصار ودار!
أبوي(بعصبية):روحوا نادوا لي زياد وجيبوه من تحت الأرض!
وطبعاً زياد مسكين غرفته تصادرت من يوم ماأقبلوا قرايبنا وصار ينام بالملحق مع عيال عمي لذلك اتصلت فيه وقلت له قابلني عند باب المطبخ الخلفي.
وجانا..
ريفان:الله يقطع إبليسك إنت وش مسوي في جدتك؟!
زياد:ايش.علمتكم ضي؟
ريفان:وضي وش علاقتها؟
زياد:أنا علمتها بالسالفة من يوم ماكنتوا بالعرس..
ريفان:شوفوا النذلة!ماقالت لنا شي..
وقام زياد يحكي لنا عن الطيحة وكيف إنه ماقدر يشيل جدتي وحطها على زولية وسحبها هو والشغالة..
أنا:زيادوه؟حط عينك بعيني..إنت متعمد؟
زياد:أي متعمد ياالثولة؟الحادث صار قضاء وقدر..
أنا:والله مدري عنك..عموماً ياويلك من أبوك تراه معصِب..
ودخل زياد وحكى السالفة وسحبه أبوي مع أذانيه وقال له:وليش ياقليل المُروة ماكلمتني من وقتها وخبرتني باللي صار؟!الحين يمكن السالفة فيها كسور مُضاعفة...لا وتسحب جدتك بعد على البلاط عساك بمن يسحبك للقبر!
زياد:لو سمحت يايبه أنا ماسحبتها على البلاط..أنا حطيت تحتها زولية!
أبوي:لاااا نشمي ياروح أمك...يمه بنوديك للمستشفى.
جدتي:أي مشتفشى؟!ماني متحركة من مكاني لين أطيب..
أبوي:من وين تطيبين وهذا حالك يمه..لازم يشوفك دكتور ويقول لنا وش فيك..
جدتي:وافشيلتاه!!تبي رجال يشوفني ياخلف؟ماتغار على أمك ياولد بطني؟
أبوي:يايمه الله يهديك هذا مو وقت غيرة يعني الدكتور وش بيسوي لك؟بيفحصك ثم يعالجك..
جدتي:قلت لك ماني رايحة معك والله مايطببني إلا بِن معصوم!
أبوي:ايييش؟بن معصوم الشايب اللي في الديرة؟
جدتي:ايه نعم..
أبوي:لاإله إلا الله..وهو باقي عايش؟وبعدين بن معصوم حجَّام وشلون يعالجك؟
جدتي:ايه حجَّام وحلاَّق وختَّان نسيت إنه ختن وطهَّر كل عيال الجماعة؟
زياد:أبي أفهم أنا الحين.. إنتي تشقلبتي من السيارة بتروحين لـ بن معصوم يحلق شعرك مثلاً؟
جدتي:لا يالأثول بأروح له يكويني!
أنا:وبن معصوم ماهو رجَّال ياجدة؟!
جدتي:إلا لكنه أعمى!
زياد:ماشاء الله..يعني شايب وعمره 100 سنة وأعمى بعد وبتروحين له يكويك؟!نِعم الطبيب ونِعم العلاج!!
أبوي:يايمه الكي زين لأمراض معينة..وش علاقته فيك؟
جدتي:لأني يوم طحت طحت على جوع ودخلني هوا..وظهري راح مرق!!
أبوي:يايمه مين قال أصلاً إني بأسمح لك تسافرين وانتي في ذي الحالة؟يلا يلا بنوديك للمستشفى..
جدتي(بعناد):ماني بـ رايحة.. خذ ولدك هالمهبول للمشتفشى يمكن يعالجون عقله!
أبوي:يايمه بأخليه يشيلك على ظهره وسامحيه..
زياد:أشيلها على ظهري؟ليش؟لهالدرجة تكرهني يبه؟ماهقيتها منك والله!!
جدتي:ومين قال إني بأخليك تشيلني؟لو فيني حيل كان رفستك في ظهرك وبطنك لكن الشكوى لله فيك ياولد خلف!
حاول أبوي وأمي يقنعونها تروح المستشفى أو يطلبون لها الاسعاف لكن أبد عاصبة راسها ومنسدحة وتصرخ طول الوقت ماندري وش يألمها بالضبط هو ظهرها ولاسيقانها ولافخوذها ولاأقدامها ولاراسها!!
نمنا جميعاً وصحيت ولقيت أعمامي كلهم عندها بالغرفة يتغدون معاها..ومعزمين يسافرون لكن أبوي أقنعهم يقعدون أسبوع ووافقوا!!!
وهنا رحت أطير لغرفة ريفان..
أنا:ريفان ريفان الحقي..
ريفان:خير..لايكون صار بجدتي شعيبية شي؟
أنا:لا أنا اللي بيصير فيني شي...أبوك مسك في أعمامك يقعدون أسبوع ووافقوا!
ريفان:الله يبشرك بالخير..على الأقل نحس بـ ونس في البيت بعد فراق رند الله يسعدها..
أنا:قطيعة..وأنا مافكرتي فيني؟
ريفان:خير..وانتي اش فيك؟
أنا:مافيني شي لاتفكرين فيني..بس على الأقل ارحمي أبوك اللي ملزوم يصرف ميزانية دولة على هالجيش! ارحمي الحوش اللي صار مكب نفايات للبزارين..ارحمي أمي اللي نزلت كم كيلو من القومة والقعدة والطبخ والنفخ للضيوف!ارحمي غرف البيت اللي ممتلية بنات وبزارين تقولين علب بهارات معشش فيها السوس!!ارحمي الشغالة اللي تكرف طول الليل والنهار وآخرتها قمعة على الراس خلتها تنسى اسمها!!
ريفان:عادي..يعني اللي يسمعك مايقول كل يوم انتي وبنات أعمامك سهرانين للفجر تضحكون وتستهبلون.
وفي العصر مرت علينا رند تودعنا لأنها مسافرة بعد المغرب لـ تركيا...واستقبلناها بالدفوف والغطاريف زوجات أعمامي يدقون وإحنا البنات نرقص وأنا استهبل وجدتي شعيبية تقول قصيدة وهي مسدوحة على فراشها!!مافهمت منها شي إلا كلمة عفيسان وعفيسان!!
أنا:وش عفيسان وماعفيسان ياجدة.الحين مو جدي مات من سنة إسكُت؟
جدتي:وإذا مات؟أنساه خلاص؟ماهو جدك اللي بعد الله كان السبب في وجود أبوك؟ولولا وجود أبوك ماجت رند؟
أنا:آه..صح نظرية!
ورقصنا وطقطقنا لرند وقعدت أطامر من أول المجلس لآخره والبنات يضحكون علي وأمي تقول اركدي يابنت وأم مشبب تقول الحمدلله ولدنا مايبيها هذي من يطالع فيها وهي لاعقل ولاثقل!
وجدتي تقول: صح لسانك هي وزياد فيهم بلا ويبيلهم قراية عند المطوع!
ورند تضحك وتقول:كل هذا فرحة بشوفتي؟
وريفان تقول:إلا انهبلت بعد فراقك!​

 

[اخت حمودي وهنود]

الـــــــــــــف مبروكــــــ جيونه ,,,,,
مشكورررررره مررررررررررره اللله يعطيك العافيه

 

[it's me**]

يسلمووووووووووووو يا قمر انتي ويسلم هالزووووووق الحلو الي كتب القصة
لا تغيبي علينا كثير اكيد بنشتقلك يا جيونة *_^

 

[جيانة]

مرحباً مليون...
شايفتك ياأم يوسف!
مرت الأيام وجدتنا مكانها جبنالها دكتورة لين البيت تفحصها وتسوي لها تحاليل وترسلها للمستشفى وطلَّعت فيها أمراض الدنيا!!
وجدتي تقول:أبد..والله إنها كذَّابة تبي تسترزق من صحتي!!
----
وكالعادة لااحتجت زياد قابلته في الحوش من باب المطبخ الخلفي..
زياد:هاه..ياشوشو؟وش بغيتي؟
أنا:بغيتك تودينا السوق أنا وبنات عمي والله القعدة بالبيت تضيق الخُلق!
زياد:ماشاء الله ماقصرتي..بتودينهم السوق؟هالحين أنا سامع اشاعات طالعة عنك عند أعمامي يقولون إنك صرتي خطر يهدد أخلاق بناتهم وتبين تكملينها بالسوق؟
أنا:ليش؟أنا وش سويت؟
زياد:يقولون علمتي بناتهم شلون يستخدمون الكومبيوتر ويتصفحون النت..ويتحومرون ويتبودرون(الترجمة:يحطون بودرة وروج!!)ويصلحون كلوب ساندويتش وياكلون اسكالوب بانيه!!
أنا:ياسلام!خيراً تعمل شراً تلقى!
وشافني واحد من أعمامي وأقبل يسألنا وش نتكلم فيه...
وقال له زياد عن رغبتنا في الطلعة للسوق..
عمي:اييييييييش؟مابقى إلا هي!تطلعون للسوق وجدتك تعبانة؟!
أنا:وخير جدتي تعبانة؟الله يشفيها..عددنا بالبيت صك ال47نفر مابين حرمة وبنت وبزارين وشنبات نحبس أعمارنا كلنا عشان جدتي مريضة؟!!!
عمي:ايه نعم هذي كبيرة البيت!وبعدين وش تروحين تسوين في السوق؟اللي تبينه خل أخوك يجيبه ماعندنا بنات يروحون الأسواق!!
أنا:ماعندكم بنات يروحون السوق؟!!أجل بعذرهم بناتكم لابسين هدوم من عام الفيل!
عمي:يعني من زين لباسكم يابنات المدن..بناتنا معززات مكرمات توصلهم أغراضهم لين عندهم..
أنا:ومين يجيبها لهم؟راعي البقالة؟!
عمي:لا..أخوانهم!
أنا:وش درى الرجال بملابس الحريم؟
عمي:وملابس الحريم وش يبي لها من فن..الأولاد يشترون طاقة القماش ويعطونها أمهم وأمهم تروح لجارتنا الخياطة تفصلها وسمع الله لمن حمده!
أنا(وأنا قاعدة أتميلح):ليش؟وشفيه السوق؟تمشية وتسوق و سعة صدر..فك العقدة ياعم فكها الله يشفي أمك إن شاء الله!!
عمي:ايش؟اذلفي يابنت داخل اذلفي!
وراح عمي وهو مكشر لمجلس الرجال ونقل كلامي لأبوي...
أبوي:هههه..وهي صادقة البنات يحبون يغيرون جو وقعدة البيت مللتهم وأنا من رايي نطلعهم..
عمي:نعم؟تبي بناتنا يصيعون ويضيعون ياخلف؟تربية السنين نجي نضيعها عندكم بأيام؟!
أبوي:لاإله إلا الله..وانت ليش مكبر السالفة؟بنخليهم يروحون مع أمهاتهم..
عمي:من غير رجال؟!!
أبوي:مايحتاج رجال هم مجموعة كبيرة ماشاء الله وماينخاف عليهم!
عمي:هذا اللي ناقص!مايطبون سوق إلا ومعاهم الأولاد على الأقل..
أبوي:وشفيك ياخوي..يعني إنت تخاف على حريمك وأنا لا؟
عمي:هذا العلم اللي جاك..من غيرأخوانهم مايروحون!
أبوي:زين مايخالف..بأكلم زوجتي وأقول لها..
وجاء أبوي وقال لأمي بسالفة السوق..
أمي:وشلون نطلع وأمك تعبانة؟
أبوي:بعض زوجات أخواني موب رايحات خليهم يقعدون معها وجهزي لهم قهوتهم ..وانتي روحي مع البنات..
وبالفعل راحت أمي وثلاث من حريم أعمامي وبنات أعمامي وكان عددهم تقريباً 9بنات أما الورعان والبزران خليناهم في البيت لأني حلفت يمين لو رافقونا بهالطلعة ماأروح معاهم!!!(هاه!أجل إيش؟تبون بريستيجي يخرب؟!!!)
ولكم أن تتخيلوا تقسمنا في 3سيارات..وبعض أولاد أعمامي معانا..ولما نزلنا المول نزلنا فوج تقولون رايحين نحج!!
ووقف مشبب عند بوابة المول وقال إيش مسوي نفسه مُنظٍم رحلات!!وقعد يوزعنا تقولون طابور صباحي!
أخته نضرة:يامشبب خلنا ندخل كذا ماله داعي هالصفوف!
أنا:الصراحة ماينشره عليه أخوك متعود يقود الغنم والبعارين!
وماشاء الله زياد وأولاد عمي وعددهم ست كانوا يمشون قبلنا وإحنا وراهم مثل قطيع الخرفان..وكل مابغينا محل دخلوا معانا!!!!(يعني ذحين من كبر المحل يوم ندخل كلنا فيه؟! حتى أصحاب المحلات يخرعون من عددنا!!والفشلة إننا لما نخرج من المحل نخرج خاليات اليدين!)
ناديت زياد وقلت له:ياخي وش هالخبال اللي إنتم فيه؟!خذ عيال أعمامك وانثبروا بإحدى الكافيهات خلنا نتنفس شوي!
زياد:وش تبيني أسوي؟هذي أوامر البلاط الملكي!عمك موصينا مانفارقكم!
أنا:ليه؟؟خايف علينا من الانحراف؟أقول فارقوا ترى كِثر الكبت يولد الانفجار!!
وراح زياد كلَّم أولاد أعمامي ووافقوا إلا مشبب قال:ماني تارك النسوان لحالهم روحوا انتم!
وجاني زياد وقال:مشبب بيقودكم!!أقصد بيمشي معاكم وإحنا بنقعد في الكوفي شوب.
أنا:وش نبي فيه هالمشبب؟بيقعد يستعرض عضلاته قدامنا؟ايش؟مايثق بأمهاتنا؟هو اللي بيحرسنا من عيون الذئاب البشرية عاد؟!
وبالفعل راحوا الأولاد للمقهى وإحنا النسوان مشينا بقيادة المايسترو مشبب!!!اللي ذبل كبودنا وبلشنا كل مامر شاب من جنبنا مسكه مشبب من كعشته وصاح فيه:لاتطالع حريمنا لأحوس وجهك!
وياحرام الشباب ماحد طالع فينا كلن ماشي بحاله وإن حصل وطالع فينا أحد فماهو من زين أشكالنا إلا استغراباً من عددنا الكبير!بس هذا مشبب وهذا عقله!!
وبصراحة لما شفته زودها يخانق خلق الله ويتهمهم إنهم يناظرون فينا وفي أخواته نزعت برقع الحيا وتصديت له بعد ماسرى في عروقي الطاقة الشعيبية!!!
وقلت بعالي الصوت:إنت وبعدين معك؟هالحين من زين خواتك يوم يطالعونهم الشباب؟ناظر فينا زين هذي أشكال كفو واحد يطالع فيها؟!!
اخترع مشبب!!
أم مشبب:يافشيلتاه!يابدرية..بنتك تخانق ولدي؟؟واعيباه!
أمي:شعيبية؟؟ اسكتي عيب عليك!
مشبب:آآه انتي شعيبية؟والله إنك صادقة مين بيطالع فيك؟!!هههه
آثاريه تذكر النذل الصورة اللي أرسلتها له تتذكرونها؟!!!
وانكتم بعدها ماعاد قال شي..بس صراحة يقهرني هالتعقيد كلنا نازلين للسوق ومغطين وجوهنا ولابسات عبايات مسترة وفوق هذا كله مو إحنا اللي نلفت النظر ماحد يلفت النظر إلا تصرفات مشبب و عينته!
00000

 

[umm yusuf]

تشوفك العافيه يااحلى جيوووووونه

ربي يحفظك ويحفظ لك كل غااالي


يارب امين بهذه الساعه المباركه

 

[umm yusuf]

مشبب:آآه انتي شعيبية؟والله إنك صادقة مين بيطالع فيك؟!!هههه
آثاريه تذكر النذل الصورة اللي أرسلتها له تتذكرونها؟!!!



ايه ايه نذكرها خخخخخخخخخخخخخخخخ

اتخيلها مثل دي بس بشوية روج وميك اب

 

[اخت حمودي وهنود]

تسلمي جيونه ,,,,

 

[وردة تركواز]

ام يوسف فجعتيني بالصووووورة


جيانة ماشاء الله عليكي القصة من رائع الى اروع

متابعين معاك

 

[جيانة]

جزء جديد لعيونكم...

رجعنا لكم:32:​

وإحنا بالمول...
قمت أكلم بنات أعمامي:وشفيكم يامال الفقر صار لنا ساعات ندور بالمول وماشريتوا شي؟!
صهباء:الصراحة؟أسواقكم غالية بالحيل!
أنا:إيه الغالي للغالي!
صهباء:هذا إنتي قلتيها..يعني نلبس ملابس غالية لـ مين بديرتنا؟والكل حاله من حالنا...
دعجاء:الله يخلي أم غازي الخياطة:23:كل ملابسنا نفصلها عندها..
غيفة:بس والله ملابسنا صايرة تفشل!يازين لبس أهل المدن ماشفتوا الناس بزواج رند وش لابسين؟!
دعجاء:أقول يازين القناعة..وشفيها ثيابنا؟ذوق وحشمة!
غيفة:لاتكذبين على نفسك..ثيابنا كأنها كُرت جدتي شعيبية بس مطورة شوي!!
أنا:طبعاً..ظالمات أنفسكم وإنتم شابات..مايخالف البسوا ملابس حشمة بس تكون ستايل..ذوق..
دعجاء:اسكتي ياشعيبية الله يعافيك..هذا اللي تعودنا عليه..
أنا:وافرضوا وحدة منكم جاء نصيبها بالمدن..تتزوج ولد الناس وتتفشل قدام أهله لالبس صاحي ولاسنع؟!
صهباء:ايه والله إنك صادقة..
غيفة:الـــــــــــلــــه كان زين يجي نصيبي بالمدن..تكفين شعيبية لابغى زياد يخطب لمحي له يخطبني!!!!!
قاموا بنات عمي صاحوا في غيفة وقالوا:استحي يالهبلة نسيتي إن زياد محجوز ليقظانة بنت عمنا رهجان؟!!!!
أنا:نعم نعم إنت وهي؟!بأمر مين إن شاء الله؟!
البنات:بأمر جدتنا شعيبية!
أنا:أقول روحوا اشربوا البحر ياحفيدات جدتكم شعيبية اللي مخططاتها كلها فاشلة!!
ثابتة:تقصدين إن هالكلام ماراح يصير؟!
أنا:طبعاً ماراح يصير..وإذا يقظانة قاعدة تحلم بزياد؟قولوا لها تصحى من النوم!!
صهباء:اسكتي ياشعيبية لاتسمعك!
وطبعاً الأخت يقظانة كانت قاعدة على الطاولة اللي قريبة مننا مع الجزء الثاني من بنات عمي..
أنا:خليها تسمع!أجل تحلم بزياد وهو مابينه وبينها أي تشابه؟يقظانة المسترجلة أم لسانين؟ماتشوفوني متحاشيتها من يوم جيتوا؟حتى صديقاتي يسألوني يوم زواج رند مين ذيك؟وأقول لهم مدري يمكن تشتغل بالقاعة!!!! بالله ودها في زياد دلوع العايلة ربيب العِز يتزوجها؟؟؟ يقظانة اللي يدينها محرشفة من حياة الشقا؟يقظانة اللي ريحة عرقها تسبقها؟!
ومادريت إلا و يد على كتفي وصوت يقول:وشفيها يقظانة؟!
ويوم التفت إلا هذي يقظانة طول بعرض تقولون باب بسم الله علينا!لا ولا الصوت قصة ثانية..جيمس يفحط!وعاد ياهي ملسونة وعربجية!!
يقظانة:بنات عطوني غرشة عطر!
أنا:ليش؟تغطين بها ريحة العرق؟ماينفع!!
يقظانة:لا وإنتي الصادقة بأفتح بها راسك!هالحين أنا وش قاهرتك فيه تتمسخرين علي من أول وأنا ساكتة؟من زينك يالعصلةالمصلة؟!ولا كل هذي غيرة يوم إني بأصير زوجة أخوك؟!
أنا:نعم ياروح أمك؟!بعيد عن شواربك تصيرين زوجة أخوي!
دعجاء وهي تقرصني وتهمس:عيب تقولين شواربك هي بنت مو رجَّال!!
أنا:إلا شوارب ونص!هذي ماعندها شوارب في وجهها بس!إلا بكل مكان من جسمها!!
وهنا مسكتني الأخت يقظانة وكفختني قدام خليقة الله :33:وأقبلوا الحريم يفارعون وانتبهوا لنا الأولاد وأقبلوا...
وعرفني زياد من شنطتي وعباتي وأقبل فديت قلبه يفض الاشتباك وابتعدوا البنات كلهم ماعدا يقظانة الخبلة قاعدة تكمل تكفيخ..عاد زياد مايدري إنها بنت عمي على باله تكرونية أو شحاتة وتهوشت معانا قام زياد مسكها من ايدها وكفخها ومن الخرعة بغت تطيح مكانها!!!
إلا أمي وزوجات أعمامي مقبلات يسألون عن القصة...
وعاد زياد متحمس ويخاصم يقظانة:اطلعي برة ياحجة لاأنادي لك السكيورتي يسحبك من شوشتك ويرمي بك برة!
والتفت زياد لي وهمس:خير؟وش سالفتها هذي؟!
أنا:هذي يقظانة بنت عمي رهجان تهاوشت معها وكفختني!
زياد(وهو مبقق عيونه فيني):سوَّد الله وجهك ياشعيبية!ليش ماعلمتيني؟تشوفيني أكفخها وساكتة؟!
أنا:أحسن تستاهل!أجل تبغى تصير زوجة أخوي بالقوة؟!!!
زياد:أفااااا من صدقك هي قالت كذا؟!!
أنا:إيه قَسَم!
زياد:أجل تستاهل ماجاها!!
وعلى الجانب الآخر تهاوشت أمي وزوجات أعمامي لأنهم ظنوا إني اتفقت مع زياد نضرب يقظانة!!!
وصاحت فينا أمي:أظن بعد اللي صار مالنا قعدة هنا!مشينا على البيت!!
وطول الطريق صمت وبس دخلنا البيت مسكتني أمي أنا وزياد وسحبتنا لغرفتها ومابقي سبة إلا وقالتها!!!
أمي:الله ياخذكم إنتم الاثنين ويريحني منكم!وش قلة الأدب اللي فيكم تضربون بنت عمكم بوسط السوق تخلون اللي مايشتري يتفرج؟!وين أودي وجهي الحين من الناس؟هاه؟!
قمت شرحت لأمي سبب الهوشة.
أمي:لاياشيخة!!عذر أقبح من ذنب!وش يعني لاقالت تبي تتزوج زياد؟كلام وفي الهوا!أحلام مراهقة!يعني أخوك هالرمة هذا يصلح لزواج؟!
أنا:يمه..يعني أنا اللي قلت لها تعالي طقيني؟!هي خفيفة شمايل بس سمعت طاريها جات تفرد عضلاتها!!
أمي:تستاهلين!انتي اللي استفزيتيها وانتي تدرين إنها راعية مشاكل وسبق وحذرتك من قبل لايجون إنك ماتتكلمين معاها..هالحين لاوصلت السالفة لأبوكم وش أقوله؟!
زياد:بسيطة!قولي إنك ماشفتي شي!وأنا بأقول الصدق ظنيتها تكرونية تخانق أختي فـ جيت أدافع!!
وطبعاً على بال مانزلنا تحت كانت السالفة قد انطبخت زين ووصلت للرجال!!
والأخت يقظانة قاعدة تتبكبك!(الله أكبر!!! من ذاك الساع ماجفت دموعها؟!ليه سيول جدة؟!!!)أما صحيح ضربني وبكى وسبقني وشكى!!!
وناداني أبوي ونادى زياد وصكنا بمحاضرة وصكنا بكفوف بعدها ياسلام سلِّم!!
أبوي(بكل عصبية):تضرب بنت عمك يا....تتمرجل على هالضعيفة يا....أعمامك كلهم زعلانين وبيسافرون بكرة بـ سِبَتك إنت وأختك يا....!!
طبعاً الفراغات السابقة فيها كلمات غير صالحة للنشر!!
حاولنا نشرح له الموضوع لكنه قال أبداً ومايرضيه إلا إني أنا وزياد ندخل المجلس ونبوس راس أعمامي ورجولهم لين يرضون!!!
وفعلاً دخلت أنا وزياد على أعمامي ومسكناهم سِرى واحد واحد نبوس رووسهم وأقدامهم!بغينا ندوخ من الريحة!
زياد:شعيبية أنا خلصت الصف هذا تعالي دورِك!!
وجيت وسلمت عليهم كلهم وتوجهت خارجة من الباب!!
عمي رهجان:تعالي تعالي يابنت!وين رايحة؟إحنا باقي ماخلصنا!
أنا:خير ان شاء الله؟فيه أحد منكم نسيت أبوس له إيد ولا رجل؟!!
عمي رهجان:ايه نعم!!يازياد!
زياد:يالبيه!
عمي رهجان:إذلف برة في الحوش مع الأولاد...يقظانة بتدخل هنا!
وبعد ماخرج زياد مادريت إلا بيقظانة هانم داخلة المجلس ومازالت دموعها تصب مثل السيول!!أي سيول جدة؟إلا فيضانات باكستان!!!
وسألوا عن سبب الهوشة وقامت تتمسكن وتقول إني قاعدة أسمم أفكار بناتهم وأناديهم للتحرر والانفتاح والانشكاح!!!
أنا:يمه منك يمه ماأَكذَب لسانك!!
يقظانة:شعيبية تتمسخر علينا وتستهزيء بجدتي شعيبية وشايفة نفسها أحسن منَّا!!
أنا:الله أكبر عليك..
يقظانة:وشايفة روحها إنها أجمل وأنظف منَّا!!
أنا:ايه في هذي معاك حق ماكذبتي!!!
يقظانة:وترى هي تبي بناتكم الله لايبلانا يسهرون معاها يتفرجون على القنوات اللي موب زينة ويقعدون عند الكومبوتر وتقول لهم ليه ماتلبسون بناطيل وتطلسون وجيهكم أحمر وأخضر وتشترون جوالات ؟!!
شهقوا أعمامي!!!وشهقت معاهم!!
واحد من أعمامي:إمحق من تربية ياخلف إمحق!!
عمي رهجان:إن كان راعي البيت قطوة...فلا تقولون من وين أقبلت الفيران!!!
قام أبوي يتنحنح...وقال:هاه يابنت اش تردين على بنت عمك؟!
أنا:بأقول لها إنتي كذابة بوسط وجهك!صدق إني أختلف مع بنات عمي في أشياء لكن ماقد سعيت إني أخربهم بأفكاري!
يقظانة(النمامة ياويلها من ربي):أنا ماأكذب شفتك بعيني تأشرين لهم على أصحاب المحلات وتضحكون!!
أنا:والله ماأشرت لهم على أصحاب المحلات كنت أأشر على البضايع اللي على الفاترينات بس وش ذنبي إنك حُولَة؟!!!
يقظانة:ايه تذكرت حتى مشبب رديتي عليه وطولتي لسانك..الله يستر علينا شكلك والفة تسولفين مع الرجاجيل!!!
أنا:ايه بدليل إني قاعدة أسولف معك!!
عمي:بنت؟وش قلتي لمشبب بعد؟!
علمتهم بالسالفة...
عمي:بلا يبلاك!!! ودك تنفلتين على راسك..هذا جزات ولد عمك يوم إنه يخاف عليك؟!
عمي الآخر:تبرأ منها بنتك هذي هي وأخوها بكرة يجيبون لك مصيبة ويجرونك وراهم للأحداث!
أنا:أقول وشفيكم علي ...تقاعدت جدتي عن دورها مع هالمرض واستلمتوا الوظيفة بدالها؟!
أبوي:انطمي لابارك الله في عدوك
يقظانة:تراني قلت لكم... شعيبية أفسدت بناتكم وعلمتهم الانحراف وانتم وضميركم!!
أنا:المُباهلة المُباهلة يامسلمين!هذي المعتوهة تقذفني بشي مو فيني وإنتم تصدقونها؟؟!!
أبوي:أقول انطمي لاعاد أسمع لك صوت و حبي راس بنت عمك!!
أنا:ماني حابة راسها!
عمي رهجان:بتحبين راس بنتي وانتي ماتشوفين الطريق!
أنا:قلت ماني حابة راسها خلها تتسبح بالأول!
عمي رهجان:لابتحبين راسها لاأسافر الحين وأقاطعكم طول العمر أجل تضربون بنتي وتستخسرين فيها حبة راس ياالبومة؟!!
أنا:والله أنا ماضربتها ياعم زياد اللي ضربها..ناديه وخله يحب راسها هو!!!
وهنا عج المجلس بالصياح وضربني عمي رهجان وخرجت أجري عند الحريم مثل الفار اللي لدغته أفعى!!
----
بالله اش رايكم بها اليقظانة؟!​

 

[اخت حمودي وهنود]

واو تسلمي جيونه والله انك في قمة الرووووووعه
وهدا اليقظانه مدري النايمه يبقالها كم كف,,,وليه شعيبه مااتعلمهم انا يقظانه تبا زياد علشان كدا ضارات المظاربه...

 

[وردة تركواز]

يالله يا جيانة


انا اقول خلاص

الا ماشاء الله في قصص مثيرة بتنزل


معاك يا عسل

 

[ورده مملوحه]

ما تسيحي تبلت شعيبه ازياده
عينك كنت عينك ياكثرهم الي كذا
ويكفينا شرهم مشكوره وكملي حنا
متابعينك ياعسل

 

[ام براءة]

هلا يا عمري جيونة

كملي انا تحمست ياتري زيادوا بيدخل يحب راس يقظانوا ههههههههههههههههههههههههههههههههههههههههههههه

مساكين بنات المدن كله مظلومات

 

[ام براءة]

حبيبتي قراءة قصة أسمهان و عبد الرحمن كلها حركات تهبل في قمت الروعة
وعاد انا سويت دعاية هيهيهيهي كل ما إلتقت مع صديقاتي و بنات العائلة اكلمهم عن قصصك و ابداعاتك
وفي البنات تحمست وسجلت وبداءت تقراءه القصة والكسلانات عاد صرت انا كل ما اقراءة احكي لهم الاحدات هاهاهاهااهه
وهم بعد جده شعيبية حلو وتهبل وفكاهية وكلة مناقرات كل ما كنت اقراءه كنت اموت من الضحك
اخاف زوجي اذا شافني يقول الحرمة تخبلت ااااااااااااااااااااااااااااااااااااااااااههههههههه

 

[بنوته غـــير]

هههههههههههههههههههههههههههههههههههههه

ههههههههههههههههههههههه

يقطانه دي موب هينى


يسلمو حبيبتي على القصه



كملي نحن في انتطارك حبيبتي جيونه كملي لاتنسي​

 

[جيانة]

جينا ياصبايا!
دخلت الصالة وكانوا البنات قاعدين فيها, أما الحريم داخل مجلس النساء مع جدتي شعيبية اللي منسدحة على طُراحتها(المَرْتَبة) في الأرض..
وقمت أولول وأتهدد وأتوعد...والبرنسيسة يقظانة داخلة وراي تلوحُ ابتسامة النصرِ في مُحيَاها!!
وإلا ريفان جاية وقالت:جدتي تبيك..وتقول وش هالصياح كله؟!
دخلت مجلس النسا...
جدتي:هاه ياشعيبية؟وش هالعلوم اللي تسوِّد الوجه عنك؟!
أنا:أي علوم؟وأي رياضيات؟هالحين مايكفي هاليقظانة كفختني وفرَّجت علي خليقة الله جاء أبوها يكمل الناقص وضربني!وش تنتظرين إنتي ياجدة بعد؟!بتكملين جميلك وتشحطيني بعصاتك؟!!
جدتي:لا...بس زياد ماقصَّر بعد..أخذ لك بحقك وضرب بنت عمك عشانك..يعني متخالصين..وشهوله زعلانة؟!!
أنا:وش متخالصين؟حتى عمي رهجان طقني!
جدتي:وش تبين ياقليلة الحيا عشان ترضين؟ نطق عمك رهجان؟!
أنا:ماأبي ولاشي...أبي كرامتي ترجع!
جدتي:أي كرامة ياأم كرامة؟!من يوم عَرَفتك وكرامتك ممسوح بها الأرض إنتي وأخوك!فضحتونا لابارك الله في إبليس!
أنا:عاد حب الفضايح وراثة في ذي العيلة بعيد عنك!!
إلا يقظانة داخلة علينا...والمنافقة رايحة لجدتي تبوس راسها وايدينها!!
بس عجبتني جدتي الله يسعدها صدَّت عنها وقالت:ترى ريفان وأمها حكوا لي عن سبب الهوشة...عيب يايقظانة البنت تقط نفسها وتقول بأتزوج فلان...وعيب الوحدة تضرب بنت عمها قدام الناس!
يقظانة:وش أسوي فيها ياجدتي قهرتني!!
جدتي:مايخالف..اضربيها!بس في البيت مو قدام الناس!!
أنا:ايه احشيها ماهي ناقصة!!حق من خلاَّك تشيلين جدتك شعيبية على ظهرك يايقظانة وتلفين بها حول فيلتنا 10 مرات!!
صاحت جدتي على النسوان يطلعون برة وقالت:نادوا لي خلف!
وجاء الوالد...
جدتي:أنا سمعت إن خوانك زعلانين من اللي صار ويبون يسافرون الصبح صحيح؟!!
أبوي:ايه صحيح!
جدتي(وهي تناظرني أنا ويقظانة):الله أكبر..ماعاش مين يفرِق بين عيالي يالخايبات!اسمع ياخلف من بكرة الصبح تنزل السوق وتشتري ذيك التيوس الراهية وتسوي ذبيحة لأخوانك تراضيهم فيها!!!
أنا:يــــــاسلام!هالحين وش دخل التيوس الضعيفة بالموضوع؟!من يوم ماجوا أعمامي وأبوي كل يوم يخترع مناسبات عشان يذبح لهم ذبايح!وش هالأعمام؟مايشبعون لحم؟!
جدتي:شيلوا هالبنت مِن قِدامي لاأذبحها ماكفاني طيحتي في الفراش بسبب أخوك..تجين إنتي بعد وتسمين ابدني!!وتصالحوا إنتي وبنت عمك عيب عليكم كل وحدة منكم ياكبرها بس عقلها مثل اللي في رِجلها!!!!!!!!!
وخرجت قعدت مع بنات أعمامي اللي انقسموا فريقين فريق معاي وفريق مع يقظانووه!!
تعشينا...وقعدنا نشرب الشاي..
ويقظانة تناظرني في القومة والقعدة..وأنا متربعة وقاعدة على الأرض وماغير أقط عليها حكي ودعاوي على نظام إياك أعني واسمعي ياجارة!!
مثال:جِعل الذي يظلم ماتنام عينه!
ياعسى الضيم يذوقه كل حِسَّادي!
ياعسى من بغى لي السوء يرجع كيده بـ نحره!
ريفان:بسم الله!وشفيك انتي صايرة مثل عجوز السوء..متربعة على الأرض وتدعين على مِن راح وجاء؟!!!!
أنا:مِن حر مافيني...يلا يابنات تعالوا نطلع فوق..
إلا فريق الأخت يقظانة قالوا:خذونا معكم ياشعيبية!!
أنا(باستهزاء):استريحوا!ترى أنا منحرفة وراعية علوم بطَّالة!خلكم مكانكم لاأصيبكم بـ عدوى!!
يقظانة(تتمسخر):الحمدلله إن بعض الناس عارفين قدرهم!
وطلعت أنا وغيفة ودعجاء وصهباء وثابتة للصالة فوق أما الباقيات قعدوا مع الأخت يقظانة..
وبالصالة وإحنا قاعدات كنت أتابع برنامج أجنبي مترجم(ماني قايلة اسمه لاتحسبونها دعاية!!)
طالعت فيني دعجاء باستغراب وقالت:هالحين إنتي فاهمة وش يقولون؟!
أنا:أكيد..ماتشوفين الترجمة مكتوبة قدامك؟
دعجاء:إلا شايفتها بس الله يقلعهم يشيلونها بسرعة!!
ثابتة:شكل شعيبية فيها جني!كيف تقرينها بسرعة؟!!
أنا:بالله ماتستحون هذي أعماركم وقاعدين تتهجون الترجمة حرف حرف؟!!!
غيفة:لاتلومينا ياشعيبية!إنتي ربك مِنعِم عليك بأهل عطوك الحق تكملين تعليمك..بس حِنا لنا الله من تتخرج الوحدة منَّا من الابتدائي يسحبها أبوها ويقعدها بالبيت ويقول كافي عليك تفكين الخط وتعرفين الحساب!!!
الصراحة كسر خاطري كلامها!
واستكملت غيفة حديثها:بس بإذن الله أول ماأرجع الديرة بأركب راسي لين مايخلوني أرجع للمدرسة وبأكمل تعليمي وأدخل الجامعة بعد!
أنا:انتي لو تخرجتي من الكفاءة فهذي معجزة!لاتسبقين الأحداث..
صهباء:غيفة صادقة ليش يحرمونا من التعليم؟عمي خلف أخو أبائنا ومتربي معاهم ببيت واحد..واشمعنى هو مخلي بناته على كيفهم وإحنَّا لا؟!!
أنا:هييييييييه انتم!بدينا في الحسد؟!
صهباء:لا مو حسد..بس ماحد أحسن من أحد..المفروض ندرس ونتعلم مثلنا مثل غيرنا
أنا:قوموا قوموا الله يقطع ابليسكم لاتسمعنا يقظانة وشِلَتها ويحسبوني أسَلِطكُم!!
دخلنا غرفتي..قالت دعجاء:تكفين شعيبية افتحي الكومبيوتر علمينا شلون تستخدمينه
وفتحته وقمت أشرح لهم شلون استخدم الماسنجر وأشوف المسجات في الإيميل من صديقاتي..
وعاد هم يتابعوني بشغف وأنا منشكحة ومستانسة مسوية نفسي أستاذة عليهم وأقوم وأفتح لهم اليوتيوب وأشغل لهم مقاطع مضحكة وتركتهم شوي ورحت دورة المياه آثاري الملقوفة ثابتة ضغطت على مقطع(كذا وكذا الله لايبلانا!!!) وانفتح معاها وجيت ولقيت الصمت يسود الأجواء وعيونهم مبحلقة برعب للشاشة ويمكن الوحيدة اللي أحسن منهم دعجاء مغطية عيونها بإيديها ومسوية فتحة تهوية تتفرج منها!!
أنا(بانفعال):الله ياخذكم وش تسوون؟!
غيفة وعيونها تدمع:والله العظيم موب أنا هذي ثابتة ضغطت وطلع لها هالمصيبة!!
إلا ثابتة قعدت عند رجلي وقالت كأنها تِشحذ:تكفين شعيبية تكفين لاتعلمين أحد أبوس إيديك!!
أنا:إلا أنا اللي بأقولكم تكفون لاتعلمون أحد وأروح فيها هالحين بتركب السالفة علي صدق ويقولون شعيبية راعية الدشرة والفساد!!!
صهباء وهي تبكي:قوموا نستغفر لايصيبنا سخط من ربي قوموا...
طفيت الكومبيوتر ولطفت الأجواء وقمت أونسهم بسواليفي ومواقفي الطريفة مع زياد وتذكروا هم سالفة المول...
ثابتة:ياحليلك ياشعيبية كسرتي خاطري يوم كفختك يقظانة!
أنا:لو فيكم خير كان فرعتوا بيني وبينها لكن ماش كل وحدة قالت نفسي نفسي!!!
دعجاء:وهالخبلة مِن يقدر عليها فيها عافية لاإله إلا الله...
أنا:اسكتوا بس لاتِذَكروني...من قوة الطق الكابتشينو اللي شربته طلع من خشمي!!
صهباء:يلا زين سوى فيها زياد أدبها تأديب..ياحظك وراك أخو يدافع عنك..أنا لو تعرض لي أي أحد أظن أخوي بيجي ويضربني معه!!!
-----وبعد السوالف أخذنا النعاس ونمنا ..وصحينا وقت الغدا!!
وكانت ذبايح..رضاوة لأعمامي ووداعية بنفس الوقت لأنهم قالوا إنهم بيسافرون فجر اليوم التالي..
وبعد الغداء جات الدكتورة وطمنَّت جدتي إن نتايج الأشعة تقول إن مافيها كسور..ومافي الا شوية كدمات بظهرها من أثر الطيحة..
وفي العصر نادت جدتي أبوي...
جدتي:أقول ياخلف ضاق صدري من قعدة البيت...ويازين الديرة زيناه هوا ربي يهفني كل ساعة!!
أبوي:ااااها!انتي وش تلمحين له بالضبط؟لاتقولين بتسافرين مع أخواني بكرة؟ترى مابأخليك ...ودي فيك شهر ثاني تقعدينه عندنا!!
ووقتها كنت أشرب الشاي الأخضر ومكيفة عليه بس يوم سمعت كلام أبوي جاني شَرقَة!!
جدتي:بنت ياشويشة لاتموتين علينا!افرحي بكرة بأسافر الديرة...بس ودي اليوم ياخلف نطلع جميع ونروح البر!!
أبوي:يايمه الله يهديك ودك تطلعين وهذي حالتك؟!!
جدتي:وشفيها حالتي؟!ماسمعت الدكتورة وهي تطمني؟!بنروح البر اليوم يعني بنروح البر سمعت؟؟ولا أرفع صوتي؟!
أبوي:لا لا سمعت...بس البر انتم شبعانين فيه بالديرة خل نوريكم بحرنا بتستانسون..
جدتي:على هواك..أهم شي نطلع من البيت!
ومن فرحتي رحت طيران أبشر البنات إنَّا بنطلع...وقابلت زياد في المكان المعهود الباب الخلفي للمطبخ..
زياد:هاه..ياشوشو؟وش عندك؟!!
أنا:أبشرك..بنطلع كِل ابونا للبحر!
زياد:ماعندي عِلم..أنا متفق مع أولاد أعمامي نروح للنادي..
أنا:أي نادي الله يسامحك؟بالله أولاد أعمامك وجيه نوادي..هم والكوافي اللي يلبسونها على رووسهم والثياب اللي أكل الدهر وشرب عليها؟!
زياد:وش عليك انتي؟أصحابي ينبسطون عليهم..يقولون أولاد عمك دبج!بس خفيفين ظل وعلى الفطرة!!
أنا:المهم بغيتك تروح وتشتري لنا شوكولاتات وحلويات عشان ناكلها مع القهوة إذا رحنا البحر..تدري في الخرجات ومع الهواء العليل الواحد يلقى شهيته مفتوحة غصب عنه...!
زياد:ابشري..ولاتنسين.اعتذري لي من يقظانة على علقة أمس!!!!
أنا(بعصبية):ايش تقوووول؟!
زياد:أقول اعتذري لي منها وقوليلها زياد يقول السموحة منك على تكفيخة أمس ولو درى زياد إنك يقظانة كان ضَاعف الجُرعة!!
أنا وزياد:هههههه
---------
واستعدينا ورحنا البحر...وإحنا بنطير من الفرحة التغيير حلو ومطلوب...
فرشنا على الأرض والنسوان جلسوا بصوب وإحنا البنات جلسنا قريب منهم بس على فرشة ثانية والبزران أول ماشافوا البحر انفلتوا كأنهم مسعورين...وأما أعمامي فتفننوا في التصكيك علينا ومحاصرتنا بسياراتهم!!!
قال إيش:نخاف على حريمنا!حشا صار شكلنا كنا قاعدين بغرفة من أربع جدران مابقى إلا يجيبون لنا هليوكوبتر من فوقنا وتصير سقف!!
ورحت سحبت الفرشة وفرشتها ورا وحدة من السيارات وقلت للبنات:ترانا جينا نشم هوا مو نختنق!!
إلا أسمع واحد من أعمامي ينادي:شعيبية؟!
أنا:نعـــــــــم..
عمي:والله إني داري مافي مخالفة إلا ولك إيد فيها!!ارجعوا!
أنا:لا مو راجعة..ماحولنا أحد..والعيال بعيد ويلعبون كورة..وهذا إحنا بـ عباياتنا...
----
نستكمل غداً بإذن الله مع الحلقة الأخيرة..