قصة شعيبية

[ام ايساف]

واخيرا خلصت القراءه صراحه كلمه روعه قليله عليها

 

[جيانة]

ورب الكعبة داعسة خشتي بالشاشة وأنا تافختها حتى إن زفيري كل شوي يطير شوشتي خخخخخخ

تو بعلي مستلعن علي مالت عليه خخخخخ​

لكن بسم الله عليك نططتي البسمة من خشتي غصب​

حسيت جدتكم حاشرتكم بالقرنة ويايول اللي تنفس خخخخخ​

إلا ليش هالطبع في العجز ياويل اللي يغلطها وكلامها المغبر واللي موب لم سنع هو الصح
لايكونن العجز شماليات شرقيات خخخخخخخ​

جيانة/

ياحبنيلك ( قلب ينبض ويقوطر دم خخخخ)​

هلا دلوعة...
أخاف بعلتس فيه شوي من طباع جدتنا!!
:31:

 

[مجبور اعيش]

جداا رائع استمري
احس انو كل حقيقي
ما ادري احساس غريب
اتمنى لك ابداع اكثثثر

 

[honey heart]

مبببببببببببببببببدعه ماشا الله استمري لاحرمك الله الاجر

 

[جيانة]

ررررروعه وأكثر من رووووعه وين انا عنها من زمان ياليت تكمليها والله انها جناااااااان كلها ضحك ووووناسه بليززززززززززززززز كملي يلا يابنات صوتوا معاي نريد التكمله ولا نريد ايقاف القصه....
جيوووونه انتي قومرررر وسوكررررررررر...

وإنتي عسل مصفى..
بس مدري ليه...كل ماجيت أكمل تعصلج معاي المسائل وماأقدر أشحذ ذهني!!

 

[جيانة]

مبببببببببببببببببدعه ماشا الله استمري لاحرمك الله الاجر

بإذن الله بعد دقائق سأضع الأجزاء الجديدة

 

[جيانة]

رجعت لكم...مستوعبين؟!
غبت عنكم وقلت أتغلى..وصابني ملل وقلت نسوني الحلوات..لكن آثاري الدنيا هذي مازال فيها خير!!
المهم يالقماري مرت الأيام وطلعت ضي من المستشفى وتوافدوا الزوار..وماحد أكلها على راسه إلا أنا!!
شافوني أحب البنية لزقوها فيني طول الليل والنهار وأنا أفتر فيها عشان تسكت!وأرضعها وأتَرِعها..وععععع!
و ضي وش عليها متمددة وكلن يهتم فيها وفي أكلها ووصفات وخرابيط النسوان اللي تفننوا فيها أمي وجدتي..كل مادخلت الغرفة على ضي صكت الريحة راسي حشا تقولون قاعدة بـ عطارة!!من ريحة البخور واللهوم والحلبة..والقائمة تطول!!
وجدتي مو مقصرة تمريخ وتطبيب في ضي..يلا أهم شي لقيت شي تتسلى فيه..
والزوار أشغلونا البيت فتحناه مَضافة لعيونهم!
ومرت 3أسابيع على ولادة ضي وإحنا لابدين في البيت وجاني جميع أنواع الزهق
وقلت لأمي:هالحين ضي ولدت..أنا...وش ذنبي تعاقبوني بالحبس؟!
أمي:وش حبسه؟
أنا:كل هذا وتقولين وش حبسه؟لي أسابيع ماطلعت من البيت وحشتني ريحة السيارة والبنزين!
أمي:تحمدي ربك..البيت مايخلى من الزوار وكل يوم يجون ناس يباركون ويونسونا..
أنا:مالي شغل..ودي أطلع!
أمي:وعلى وين العزم ان شاء الله؟؟
أنا:أي مكان...المهم أطلع!
أمي:مالي شغل فيك..قولي لأبوك!
وأروح أركض على أبوي ولقيته قاعد مع جدتي ويوم دخلت عليهم سكتوا الإثنين وقام عقلي يودي ويجيب!
قلت:خير؟إذا عندكم مشروع خطبة علموني خل أطلع!
أبوي(يمزح):ايه..الله يسلمك هذي جدتك تبي تدور لي عروس من ديرتنا!!
أنا:نعم؟؟ماشاء الله!!عطيناك فرصة تمارسين هواية الداية على أختي ضي..وهالحين رجعتي لهوايتك المفضلة ورديتي تشتغلين خطَّابة؟!!امعصي وحاشا وكلا تخطبين له!!
أبوي:وانتي اش عليك؟أنا راضي!
أنا:وتبيع أمي عشان وحدة من عرايس جدتي؟لا..وليتها وحدة مودرن..إلا أكيد وحدة ريحة زيت الخروع تفوح من بين جدايلها على بُعد ميل..ووجهها مدهون بـ سمن غنم!!
أبوي:هههه وشفيه سمن الغنم؟الوالدة حلوة ومايجي منها إلا كل شي حلو..
ناظرت بجدتي وعيوني تقدح شرر!!
وقلت:هالحين خلصوا عيال خلق الله يوم تتركينهم وتجين تخطبين لأبوي؟!
جدتي:زين الرجال أبوك..ليش مانخطب له؟!
أنا:خلي أبوي بحاله تراه شايبٍ أصلع.إن بغيتي الحق أمي بعدها بشبابها اخطبي لها أحسن!
أبوي(بعصبية):شعيبـوه بلا!!
أنا:أجل وش تسمونه هذا..أمي القمر العسل ودك تعرس عليها؟!جزا المعروف سبع كفوف يعني؟!
أبوي:يالقشرا نمزح..نمزح!
جدتي:ايه نمزح..وياليتها موب مزحة..ودي تاخذ لك زوجةٍ ثانية وتنقل عندنا الديرة وزوجتك خلها تقعد هنا تخيس مع بناتها وولدها الخبل زيادوه!!
أنا:ايه يبه..على طاري زيادوه الخبل..تراني زهقت حيل وودي أطلع معاه أتمشى وأشم هواء!
أبوي:اقعدي بالبيت وساعدي أمك وخواتك!!
أنا:تكفى يبه تراني مليـــــــــــــــت!
أبوي:اسمعي الكلام..لا أفك عليك جدتك شعيبية تكفخك!
وخرجت من الغرفة وقلبي مكسور ودمعي تحدر على خديداتي

!
شافني زياد بالصالة وقال:هلا شوشو..مين طقك يابنت؟!!
أنا:ماحد طقني إلا الزهق ودي أخرج وأتنفس أحس إني مخنوقة!!
زياد:نو بروبليم شوشو..البسي عباتك والحقيني!
أنا:موب راضي..موب راضي أبوي!
زياد:ياشيخة ماعليك من أحد البيت بينترس بعد شوي زوار وماحد بيدري عنك..جيبي عباتك وأنا بأروح أشغل السيارة..
ومدري شلون جازت لي الفكرة الشيطانية هذي وطلعت أركض لغرفتي أجيب عباتي وأطلع مع زياد بالدَس!!
عدنا إليكم..
مثل ماقلت لكم طلعت مع زيادوه بالدس وأخذت احتياطاتي..قفلت باب غرفة النوم حقتي لأوهم الجميع بأنني نائمة!!
وفلسعت مع أخوي الحبيب قبل المغرب..
وإحنا بالسيارة..
زياد:شوشو؟!وين ودك تروحين؟
أنا:إلى أقرب مدينة ملاهي ياأخي العزيز في خاطري أغامر وأطامر وأطلِّع جنان وصرقعة مستقرة فيني من حزة ماطبت جدتك شعيبية البيت!
وماقصر زياد وداني الملاهي وفليناها فله ودجينا دجة وصارت الساعة 8 العشا..
وآثاري الزوار في بيتنا بدأوا يتوافدون وأخواتي على بابي يدقون على بالهم إني نايمة..
وانتهيت من اللعب وجلسنا أنا وزياد بمقهى ومابقي مشروب إلا وشفطناه ولاحلى إلا وبلعناه..
زياد:هاه ياشوشو؟؟ارتاحت الجنانوة اللي براسك؟
أنا:اسكت ياأبوالزيد..الود ودي ماأرجع البيت إلا بكرة..بس أكيد بيفتقدوني لذا خلنا نرجع
ورجعنا وكانت الساعة 9..يعني تغيبنا عن البيت 3ساعات تقريباً..
وصلنا بيتنا ووقفنا السيارة داخل القراج ورميت عباتي داخل سيارة زياد عشان ماحد ينتبه لي وأنا داخلة...
والحمدلله لقينا الوالد مو موجود وأمي مشغولة بالضيوف..
وأنا طالعة بالدرج صادتني ريفان وسحبتني من كتفي..
ريفان:تعالي يالسوسة..لي 3ساعات أدق الباب وماتفتحين لي ليش؟!كل هذا نوم؟
أنا:ايه كنت بسابع نومة!أحد درى؟
ريفان:ايه أبوي بغى يكسر باب الغرفة ويدخل عليك لكني أشغلته!!
أنا:يووه الحمدلله ..
ريفان:لا أمزح معاك..بس تعالي هنا وجهك مو باين عليه آثار النوم..وبعدين وش هالشنطة اللي معلقتها بيمينك؟!
أنا:ولاشي ولاشي..ورحت أركض على غرفتي وفتحت الباب ودخلت وحمدت الله إن ماحد كشفني..
لكن تجري الرياح بما لاتشتهي السفن!!
زياد قعد مع زوج ضي بالمجلس..وبعدين طلع لغرفته وأخذ دُش بارد بعد اللعب في الملاهي..
والحريم راحو بعد ساعة والوالد أقبل من برة وبغى شي من سيارة زياد ويوم فتحها لقي عباية نسائية تفحفح عرق!!مرمية على المقعدة!!
ودخل البيت وعيونه تلمع وصاح بعالي الصوت فينا:وين زيـــــــــــــــــــاد؟!!
رند:شفته قبل شوي كان يتروش وبعدين دخل غرفته!!
أبوي:هين يازيادوه!
وطلع أبوي يجري في الدرج وكلنا نناظره باستغراب وفتح غرفة الزياد اللي كان متسطح على السرير وقاعد يقلب صفحات اللاب توب!
وقام أبوي يفتش الغرفة فوق تحت..وزياد مستغرب..
أبوي(بغضب):وينها؟؟
زياد:شِنهي؟!
أبوي:لاتستهبل!المزيونة اللي قاطة عبايتها بسيارتك!
زياد:أي مزيونة؟
أبوي:أقول لاتخلي ابليس يلعب براسي أهلك كلهم قاعدين بالبيت وماحد طلع منهم وإنت بسيارتك عباية مرمية على المقعدة الثانية أعطيني تفسير وبسرعة!!
زياد:صدقني ماأدري وش السالفة!
قام أبوي ومعط زياد من أذانيه وسحبه لين تحت وأخذه للقراج وإحنا نطالعهم باستغراب مو فاهمين شي!
طلع أبوي العباية من السيارة وقال:عباية مين هذي يازياد؟؟؟
زياد:مدري!
أبوي:لاياشيخ!يمكن هي قطت نفسها بسيارتك!
زياد:والله مدري..كل شي وارد!
ورحنا كلنا ووقفنا معاهم في الحوش..
أمي:وش جاب هالعباية في سيارتك يازياد؟؟كنت بحفلة تنكرية الله يصلحك؟!!!
زياد:مدري صدقوني..
جدتي:ايه ماتدري يالهيس!!قلت لك ياخلف ولدك هذا صايعٍ ضايع ومايربيه إلا عيشة الديرة وماسمعتني!!
رند:أفا يازياد لايكون خاطف لك وحدة!!شباب هالزمن ماتنضمنون أبد!بس وين مخبيها؟!
أبوي:قول لي ياولد..هالعباية المعطرة وش اللي حطها بداخل سيارتك..لاتجنني!
زياد:أي عباية معطرة بس؟؟إنت بس شِمها وراسك يفتر سبع دورات من ريحة العرق اللي فيها.هذي عبات شعيبية!!
طالعوا فيني كلهم..وأنا حمرت وصفرت!
أبوي:وش تسوي عباية إختك بسيارتك؟؟
زياد:كانت معاي بالملاهي..دجينا ولجينا والله ياهي وناسة كان ودي لو جدتي شعيبية معنا توسع صدرها وتستانس على الأجواء!!
طالع فيني أبوي بنظرات حاقدة:صدق اللي يقوله أخوك يابنت؟!!
أنا:اممم آه ه و....
أبوي(يصارخ):انطقي!!
أنا:ايه صح!
شهق الجميع!!
أبوي:ومين سمح لك تطلعين من غير إذني؟؟
زياد:ياأبوي هذي شعيبية لابغت تطلع ماتحتاج إذنك ولا عينك!!
أبوي:إسكت إنت!!ليش طلعتي من وراي؟هاه ؟؟علميني!!ماعندك أب تستأذنين منه؟؟
أمي:ماشاء الله ياست شعيبية..وإحنا اللي على بالنا نايمة وصاكة الباب على نفسك آثاريك برة تناقزين في الملاهي؟!!
ريفان:هلا هلا وأنا أقول وش ذا الشنطة اللي معلقتها..آثاريك راجعة من برة؟!
وابتدأ التهزيء من جميع الأطراف...وأنا ساكتة وعيوني تقطر دموع..حسبي الله على أباليسهم خربوا علي فرحتي بالخرجة للملاهي..بس اش أسوي؟على قولة أجاثا كريستي مافي جريمة كاملة!!
جدتي:الشرهة موب عليك ياخلف..الشرهة على أمٍ ماعرفت تربي بنيتها!!
أنا:حرام عليكم أنا اش سويت يعني؟؟طلعت مع أخوي ورديت..صار شي؟!
جدتي:انطمي عمى!اليوم تطلعين مع أخوك وبكرة مايندرى مع مين تطلعين ياشويشة!
أنا:ياسلام..يعني أنا الغلطانة وزياد ماحد يلومه؟ترى هو اللي ساق بي السيارة!
زياد:إنتي طلبتي!
أنا:بس أنا ماغصبتك!
أبوي:عظيم عظيم..ماشفناهم وهم يسرقون وشفناهم وهم يتقاسمون!!من اليوم ورايح اللي يدق في هالبيت مسمار من غير علمي لايلوم إلا نفسه!!
وسحب مفاتيح السيارة من زياد!
وأنا كلن يتشمت فيني من جهة..
دخلنا داخل وحكوا لضي ماصار..
ضي:ياجماعة تراكم مكبرين السالفة..إخت وطلعت مع أخوها وين الغلط؟؟
أمي:الغلط إنها طالعة بالسرقة كأن ماعندها أم وأب تستشيرهم..
ضي:عادي عادي..تحدث في أحسن العائلات..
رند:وشفيك تدافعين عنها ياضي؟عشانها تهتم ببنتك؟؟عجيبة الدنيا كيف صارت مصالح!
أنا(وبعد ماضمنت إن جدتي وأبوي راحوا ينامون):طيييب أنا أوريكم.. تشوفون...تسحبون مفاتيح زياد؟؟؟ إن ماجاء يوم أركب فيه السيكل ورا الحارس وأخليه يفلسع بي الهند ماأكون شعيبية!!
رند:عادي..مجنونة وتسوينها!هذا إن ماجاء يوم ولقيناك على قناة الهند تسوين اعلانات عن زيت دابر أملا!!أصلاً طول عمرك بايعتها!
00000
رجعت لكم...
مرت الأيام ثقيلة بالبيت بعد الحبسة لي ولزياد أفندي..وكملت ضي شهر عندنا بعد ولادتها وأخذها عادل زوجها ورجعوا بيتهم..
و حَزَّتها فرحت وقلت:أخيـــــــــراً إفراج!
لكن كالعادة تفاجئنا جدتنا شعيبية بمخططاتها..
وذات يوم وإحنا باركين على سفرة العشاء نلتهم مالذ وطاب وسادين خشومنا في نفس الوقت!!

وهذا بسبب جدتنا المصون اللي اشتهت على غفلة مرقة كرش وسِبْلة!(ولاأحد يسألني وش معنى سِبْلة)!
وفجأة قالت:يـــــــــاخلف!
أبوي:سمي يمه..
جدتي:أنا عزَّمت(وحُطوا تحت كلم عزمت مية خط يعني قصدها قررت من فوق خشومكم وغصب عنكم!!)إننا نروح بكرة للعمرة!!
أبوي:ونِعم الراي يمه بس ترى المشوار طويل والسفر يبيله تجهيز..
جدتي:وش يعني؟!هذا إنت يوم بغيت تحضر الزواج إنت وزوجتك ماقلت المشوار طويل!!
أبوي:هذا لأننا سافرنا بالطيارة..بس روحتنا لمكة لابد تكون بالسيارة!
جدتي:عادي..ولدك له مدة محبوس في البيت مثل الفار الأجرب يمديه ولهان على سياقة السيارة وريحة البنزيم!!(يعني بنزين)..
وبعد مشاورات ومحاورات قررنا السفر إلى مكة..
وباليوم التالي انطلقنا وطول الخط وجدتي شعيبية تهذري علينا وتضرب لنا الأمثال بعيال أعمامنا وبناتهم وكأن لسان حالها يقول:مالت عليكم ماتجون بظفر واحد منهم!!! وبعد ساعات من التخضخض والترضرض في السيارة وصلنا إلى مكة واستأجرنا ذاك الفندق الراهي المُطل على الحرم...
ولما دخلنا كل واحد فينا رمى نفسه بـ صوب من التعب..
أما جدتي صاحت في أمي:يــــابدرية!
أمي:سمي..
جدتي:اطبخي لنا كبسة!
أمي:شلون أطبخ؟وحِنَّا قاعدين بفندق؟
جدتي:وش قصدك قاعدة بفندق؟على رجليك نقش الحنة؟!
أمي:لا بس مثل مانتي شايفة مافي مطبخ!
جدتي:إيييييييييش؟شقة من غير مطبخ؟!غشوك ياخلف وإنت راقد!عطوك بيت من غير مطبخ..شلون ناكل حِنَّا الحين؟!
أبوي:ههههه..ماعليك يمه بنطلب من الفندق غداء..
طلبنا غداء وأكلنا واسترحنا لين صلاة العصر ونزلنا الحرم..
والحقيقة كانت عُمرة فريدة من نوعها فيها آكشن كثير..
صلينا العصر ثم اتجهنا للطواف...
وعرض أبوي على جدتي إنه يحطها على كرسي متحرك ولكنها صاحت فيه:لييييييييييش؟شايفني عجوز؟!!
أبوي:لا سلامتك من العجز!بغيت أريحك بس!
جدتي:أقول قودني إنت وزياد...وإنتي يابدرية وبناتك وشغالتك امشوا وراي وياويل أحد يتعدانا!!
وبالفعل تعنزت جدتي على أبوي وزياد وهم يقودونها ويطوفون بها والله لايوريكم تمشي على أقل من مهلها أبطأ من أبطأ سلحفاة على وجه الأرض!وإحنا وراها..بغيت أنجن!
قلت لأمي:يمه وش هذا؟لين متى وإحنا بنتم على هالحال؟الناس اللي حولنا صاروا بالشوط الرابع وإحنا مازلنا بالأول!
أمي:وش تبينا نسوي؟جدتك تبينا نمشي وراها!
أنا:ليه؟تنابلة السلطان؟وش أحكام قراقوش هذي اللي ماصارت؟!حِنَّا لو نطاوعها عز الله مابننتهي من هالعمرة إلا الفجر!!!
وعطيتهم مقفاي وسبقتهم..
رند:يالهبلة تعالي..ودك تسوي لك فضيحة بوسط الحرم؟!
لكني ركبت راسي وتجاوزت أبوي وزياد وجدتي وقمت أطوف بكل اجتهاد وماحسيت إلا بعصا على رقبتي بطرفها المعكوف تسحبني!بغيت أختنق!
جدتي:أنا وش قلت؟ماقلت امشي وراي؟
أنا:ايه قلتي قلتي..
جدتي:وليه ماسمعتي الكلام عسى رِجلك العوق؟!
ورجعت بكل خيبة ورا مع أمي وخواتي وهم يضحكون علي..
ريفان:تستاهلين ياأم راس يابس..طيعي جدتك واكسبي الأجر..
وإحنا نطوف مرينا جنب شلة إيرانيات تفوح منهم رائحة الزعفران الإيراني ويدعون بلهجتهم دعوات بصوت عالي يصم الآذان والله العالِم هي دعوات ولا لعنات على من اتبع ملة محمد!!
قالت جدتي:صمخ!وش يبربرون هاذيل؟!
أبوي:يدعون يمه..
جدتي:حتى أنا بأدعي..
وقامت جدتي تدعي بصوت أعلى من أصواتهم:حسبي الله على من ظلمني..
حسبي الله على كل من شافني ولاذكر الله..
حسبي الله على مِن سبني ولاحبني!
أبوي:يمه يمه..وشفيك الله يهديك..ادعي ربي لاتدعين على أحد.
جدتي:ماشاء الله ياولد بطني..حتى الدعاء بتختاره لي؟!أنا حرة وعقلي براسي!!
ويظهر إن شلة الايرانيات انفقعت مرارتهم من بطء جدتي في المشي فقاموا يبربرون عليها ويدفونها..
لكن جدتي مامشتها لهم قمعتهم بعصاها لين قالوا ربنا وربكم واحد!
جاء العسكري وقاموا الايرانيات يولولون..قال زياد:أقول لايكثر هرجكم إنتم غلطتوا علينا وقمتوا تدفون جدتي
العسكري:ماينلامون..جدتكم معطلة حركة السير وأنا مراقبها من أول!
زياد:ياويلك ياجدة!العسكري يبي الرخصة حقتك!
جدتي:أقول يالعسكري خذ هالإيرانيات وإقلعهم بعيد لاخلصت من طوافي علمتك!
العسكري:هذول معتمرين حالهم حالك ياخالة ولهم الحق يطوفون الحين..
جدتي:عجييييييب البيت بيت أبونا والقوم حاربونا!!!!!!!!!!
أبوي:يمه الله يصلحك أي بيت أبونا؟هذا بيت الله ومن حق كل مسلم..امشي امشي الله يغفرلنا جميع..
أما إحنا جانا البلا وصارت حالتنا حالة وإحنا نمشي بالقطَّارة!!
أمي بهمس:خلف...خلف..
أبوي:نعم..
أمي:إرحمنا الله يرحم والديك وجيب لأمك كِرسي..الوقت قاعد يضيع وحِنا باقي في الشوط الثالث..اللي بدوا عمرتهم معانا انتهوا خلاص!!
وقام أبوي وأرسل زياد يجيب كرسي وبعد اقناعات استسلمت جدتي وقعدت على الكرسي......
زياد:ياجدة تكفين ادعي لي..
جدتي:الله يرزقك بالعقل..
زياد:الحمدلله عندي..قولي دعوة ثانية
جدتي:الله يشغلك بدل هالهسهسة ويرزقك بزوجة مدرسة..
زياد:حِنَّا وين والوظيفة والزواج وين؟!
جدتي:والله يعطيك لين يغنيك ولأهلك يخليك ويبتلشون فيك!
انتهينا من الطواف وانتقلنا للسعي وزياد مازال يدف جدتي ويسرع بها أما أنا تعبت كل مامشيت أخذت لنفسي فاصل لأواصل!
وجدتي تهاوش:قومي ياشويشة!وإنتي رفلتن كسلانة حتى عن الطاعة!
أنا:ايه وش عليك..ياامبراطورة زمانك قاعدة ومرتاحة وأخوي يجري بك والهوا يهفك هفهفة!!
جدتي:عز الله إنك حسود..قطيعة في شبابك اللي ماينفعك بريال ماغير تسدح وتبطح على غير سنع!!اتركني يازياد خل شويشة تسوق بي الكرسي!
زياد:ممنوع السواقة للحريم ياجدة!
أنا:تنكِت إنت ووجهك؟بأنادي الشغالة تدفك ياجدة أنا رجولي تعبت!
جدتي:يمين مايدفني إلا إنتي..
وقمت أدفها ورجولي ماعاد تشيلني وأمي وخواتي يتابعوني من بعيد ويتضاحكن وأبوي وزياد يمشون مع بعضهم..
وقامت جدتي تدعي بصوت مسموع:يارب إنت تدري إن البنات هَم وعلى أهلهم غم فأسألك مايجي الشهر الجاي في مثل هذا اليوم إلا وبنات عيالي كلهم متزوجات ومرتزات في بيوت عيال الحلال وعقبها بشهر حوامل بأولاد اللهم آمين...!!!قولي آمين ياشويشة..
أنا:لا ماني بقايلة..وش هالدعاء اللي تقولينه؟!
جدتي:يارب استجيب دعاي كله إلا شويشة خلها تطلع من الحسبة وتقعد بحلق أهلها!!
أنا:أقول جدة؟وشفيك تتعدين على الله بالدعاء ترى ماحد يجوز له يتشرط على ربي ويحدد مواعيد..الدعاء له آداب..
جدتي:وأنا عاد قليلة أدب؟! لابارك الله في إبليسك من بنت..انقلعي ونادي أختك ريفان تدفني..
ورحت أنادي ريفان وقامت تدفها..
جدتي:ادعي يابنت وأنا بأعيد وراك..
ريفان:اللهم اجعل في قلوبنا نورا..وطهرها من الأثام..وجنبنا الوقوع في الحرام..اللهم اغفر لنا ذنوبنا وامحو عنَّا خطايانا..
وجدتي تعيد وراها وتقول آمين..
جدتي:وراك يابنت ماتدعين لنفسك؟
ريفان:دعيت الحمدلله..
جدتي:ماسمعتك تقولين يارب زوجني واسترني..
ريفان:هذا أنا قاعدة في بيت أبوي ومستورة والله يغنيني إن شاء الله..
جدتي:وإنتي تحسبين أبوك دايم لك؟يابنتي اسمعيها مني البنت مثل الشوكة في البلعوم مايرتاح أبوها لين ماتضف وجهها عنه لبيت زوجها!!
ريفان:هذاك بزمنكم ياجدة يزوجونكم أهاليكم عشان يفتكون بس حَنَّا غير أهلنا يحبونا!
جدتي:لا ياشيخة؟!يلا يلا ضفي وجهك والحقي أختك شعيبية ونادي رند!
وأقبلت رند هانم تدف عربية جدتي...
جدتي:أقول يارنيدة لاتزوجتي وين بتروحين؟
رند:تقصدين بشهر العسل؟
جدتي:وش يطلع ذا بعد؟
رند:شهر بنسافر فيه أنا وطروق خطيبي لماليزيا!
جدتي:بل ماليزا بلا خراط ياحبكم لديار الفُنس وشفيها ديرتنا ماتجينها وتعرفين علوم أجدادك؟!فيها من كل ماتشتهي النفس والعين..
رند:ايه صدقتي فيها بقر وغنم وثيران ومين يدري بعد يمكن قرود!!
وانتهت الأشواط على خير وصلينا ووقفنا نقصر من شعورنا وتركب جدتي راسها وتحلف على زياد إنه مايحلق شعره إلا على الزيرو!!
توسطنا جميعاً عندها:ياجدة ياحلوة ياعسل ياقشطة ياتمر هندي لكن أبد مافي فكة..أصدرت عجوزنا أوامرها وقالت بالحرف الواحد:قسم لو مايحلق ولدك راسه ياخلف لأكون متبرية منكم في وسط الحرم!!
ولو تشوفون زياد أبوكعشة جنان كيف راح مكسور الخاطر وحلق شعره تحت قهر السلطة الشعيبية وضغط الوالد!!
سبقناهم على الفندق وصارت علوم بالأصانصير اللي بينه وبين جدتي عداوة متأصلة..
وشوي وأقبلوا زياد وأبوي وروسهم تلمع مثل البطيخ الطازة!!
مسكنا ضحكاتنا على زياد مراعاة لحالته النفسية..
لكن جدتي قالت:ههههه إنت وذا الراس الأصمع والوجه الأمرد ماعاد يندرى وين وجهك من قفاك!
-----

 

[جيانة]

هلا وغلا...
قعدنا بمكة يومين زرنا فيها بعض الأقارب..
ورجعنا لبيتنا سالمين غانمين..
ومرت الأيام وجدتنا الله يحميها مازالت موجودة عندنا والحقيقة هذه أطول زيارة منها لنا..
أقول لكم نظام بيتنا تبدل ولأول مرة في تاريخنا المجيد صرنا ننام بدري ونصحى بدري في عِز العطلة!!
مدري ليه أحس الإجازة مايصير لها طعم إلا بالسهر!!(بس شنشوي حكم القوي على الضعيف)!!
وعاد أبوي مستانس على الأكشنات اللي تسويها جدتي شعيبية كل يوم ويقول:أحسن!جاكم من يربيكم!!
حتى زياد ماخلته بحاله لاعاد يُخرج ولايُدرج مثل قبل..
لين ماجاء يوم وإحنا قاعدين في العصرية نشرب الشاي وقام زياد يهمس لي:أقول؟أشوف العجوز جازت لها القعدة عندنا!أخاف تطلع لنا بكرة بسالفة وتقيم إقامة دائمة!!
أنا:شي عن شي يهون ياأبوالزيد..تقعد هي عندنا..ولاتنقلنا عندها!
زياد(يكلم جدتي):أقول جدتي؟!مااشتقتي للديرة؟!
فهمت جدتي قصده وردت بدهاء:ليش؟ودك تردني لها ياوجه العنز؟!
زياد:لا الله لايقوله..بس غريبة ماحنيتي لبيتك وأحفادك وذكرياتك المُتوجة بريحة مخلوقات الطبيعة..
قامت أمي تغمز له عشان يسكت..!
أنا:يظهر إن جدتي حبتنا وحبت القعدة معانا!
جدتي(بكبريائها المعهود):ماقعدت عندكم حُباً فيكم...لكن شوقاً لولدي خلف..وإلا إنتم رفلات ماصخات لالون ولاطعم!
أنا:حتى أبوي مبسوط عليك أتوقع لو تقوليله قوم الحين ودني الديرة بيطير معاك!
ساعتها حمرت أمي عيونها وأشرت لنا نقوم وراها..
وقمنا وراها للغرفة الثانية وصاحت فينا:إنتم الإثنين!
أنا وزياد:سمي يمه!
أمي:في حياتي كلها ماقد شفت اثنين قليلين الأدب وعديمين التربية مثلكم!
زياد:صدقتي يمه..الغلط عليكم ليش ماربيتونا؟!
أمي:اسكت إنت!!!صحيح لاحيا ولاحشيمة..إنتم ماتفهمون إن جدتكم إنسانة كبيرة ولها حق وواجب إنكم تحترمونها وتقدرونها؟مو تحسسونها إنها قاعدة على قلوبكم!
أنا:يمه هذا الكلام قوليه عن أحد ثاني..جدة شعيبية ماخذة حقها بلسانها وعصاتها وكلامنا مايأثر فيها بالعكس..أحس إنها تستانس على مناقراتنا وردودنا!
أمي:يابنت عيب عيب عليك..هذي حرمة كبيرة ماهي وحدة من ربعك المهابيل.مهما قالت وسوت فيك تحطين لسانك بحلقك وتقومين بواجب الضيافة لها..مفهوم؟!
أنا(على مضض):مفهــــــــوم
أمي(تكلم زياد):وإنت يادلوعة البيت مفهوم؟!
زياد:ايه محفوظ!!!!
أمي:نعم؟وإش يطلع محفوظ هذا؟
زياد:أخو مفهوم!
أمي(بعصبية):ضِف وجهك يلا إنت وإختك يلا..
رجعنا للصالة وقامت جدتي تناظرنا أنا وزياد بنص عين وقالت:يارنيدة؟
رند:نعم ياجدة..
جدتي:كم بقى على زواجك؟!
رند(بلهفة):شهر وأسبوع و3أيام!!
زياد:ماشاء الله..حاسبتهم ياالجنية؟!وكم دقيقة وثانية؟!
طقته رند بذيك التشميقة المعتبرة الصادرة من أعماق العين!!
جدتي:إيه هانت..أنا إن شاء الله بقعد عندكم لين ماأحضر الزواج وأشوفك عروس!
طالعنا فيها أنا وخواتي وفَغَرنَا!!
أما أمي قالت:عاد ياخالتي نبي منك قصيدة حلوة عشان عروستنا!
جدتي:إيه القصيدة زاهبة في راسي مِن قبيل..
أنا(بهمس لرند):هههه ياحليلك يارند ياويلك إن طلعت جدتك على الكوشة واستلمت المايك..يمين لاتقوم الحرب بينها وبين الطقاقات!!
رند(وهي تزمزم شفتيها!):الله يعدي ذيك الليلة على خير!
------ومرت الأيام تليها الأيام وإحنا نجهز لزواج أختي رند وكل يوم وإحنا بسوق أو بمشغل نسوي بروفات لفساتيننا..وكل مرة نتقسم في الروحة للسوق عشان لازم أحد يبقى مع جدتي في البيت..
وطبعاً كل مارجعنا نخبي نص المقاضي اللي جبناها!!لأننا بناخذ عليها موشح ومحاضرات طويلتن عريضة عن التبذير من جدتي اللي مسميتنا أخوات الشياطين!!
وعاد خذوا من التتريق والتطنز على الذهب اللي شرته رند..
ماتسمعون جدتي إلا تصيح وتقول:وين الرشرش؟(معنى الرشرش يابنت المُدن المثقفات السلسلة الطويلة العريضة اللي تغطي صدرك من الرقبة إلى ماقبل الصُرة وكأنها صديري لفارس مقنع أيام العصر الحديدي!!)خوش تشبيه!هههه
وين البناجر..وطبعاً جدتي مايملا عينها إلا لبس البناجر بالدرزن أو اللي يسمونها كاسات اللي تجي إسورة عريضة كأنها علبة حليب نستله ولها مصك من الجنب!
وين الحزاااااام؟؟؟وين الهامة؟؟(الذهب اللي ينحط على الراس!)
أمي:ياخالتي الله يسعدك ماعاد أحد يلبس هالأشياء بذي الأيام؟
جدتي:إيه..لأنكم وجيه فقر!تبون تفشلونا قدام الناس!
رند:أي فشايل ياجدة؟أم زوجي لو تشوفينها شلون متشببة وأنيقة ماتقولين إلا بنت عشرين مع إن عمرها 48 سنة بس..
أمي:وبعدين ياخالة لو قلنا فرضاً إننا بنشتري هالحزام والرشرش والهامة والبناجر اللي قلتي عليها..كم بتكلفنا؟!!!حليلهم بنات هاليومين وش هي مهورهم؟؟!يادوب تكفيهم...
قيمة فساتين السهرة هالأيام أغلى من قيمة الذهب!
جدتي:أقول إنتم بقر هايت ماتدرون وين ربي مسرِح بكم!!ناظروا ببنات عمكم بالديرة شلون الوحدة الذهب كاسيها من راسها لرجليها وتلِق تِلِق لاإله إلا الله!!
رند:ايه الوحدة تِلِق كأنها نجفة ولافتحتي دولابها مافيه غير قطعتين من أبو عشرة وغرشتين عطر أبو فقسة!!
الجميع:ههههههههههههههه
جدتي(وهي تطالع في أمي):ايه وتضحكين مع بناتك يابدروه؟!ماتنلامين..لاعاد البلا في الراس أجل ماأشره على باقي الجسد!!
-------
هلا وغلا..
حان وقت العُرس ..وقبلها بأيام أقبلوا أهل أبوي من الديرة وصار بيتنا يشبه ملعب الكورة من كثر الجماهير اللي فيه!عفواً أقصد الضيوف!
اللي كانوا من مختلف الأحجام والألوان والمقاسات والأعمار!
أما أهل أمي غيـــر... فديتهم حجزوا شقق وفنادق وراحوا فيها..
أما بيتنا فعلاً أصبح حراج.. أعمامي وبناتهم وأولادهم ونسوانهم..نايمين عندنا انكسرت ظهورنا وإحنا نكرف بالمطبخ طول اليوم صرنا مطعم والخدمات24 ساعة..
شاي ..قهوة..فطور ..غداء...عشاء
وماضاع فيها إلا رند اللي صارت تحلم بالخصوصية عشان تنتف وتسوي خلطات وتنقش أياديها والخ....
بس عاد إش نسوي كل الغرف فوضى ومحجوزة حتى غرفتي وأنا بعز نومي صحيت الساعة 10الصبح وأسمع صوت شخير وخرير تحت السرير ظنيته عفريت اسم الله علينا ولكني لقيته المهبول (ردَّاد)ولد عمي عمره 8سنين لكن جني لاإله إلا الله!!
سحبته من شوشته الناشفة النافشة وقلت:هييييه
صحي وقال:خييييييييير ؟!
قلت:إنت اللي خير!وش جايبك تحت سريري ياقليل الحياء؟!
رداد وهو يتمغط:مشبب أخوي أرسلني!!
أنا:عشتوا!!وإش يبي عساه الهم؟!
ردَّاد:قال لي خلك ورا شعيبية وجيب لي علومها!
أنا:أي علوم وأي رياضيات لابارك الله في إبليسك وإبليس شرلوك هولمز اللي راسلك...يلا فارق وإن شفت رجليك هنا حشيتهم حش!
واخترع الولد وراح يجري...
إلا صحيت ثابتة بنت عمي وكانت نايمة على مرتبة بالأرض وجنبها 4مراتب ثانيات نايمات عليهم 4 من بنات أعمامي..
وقالت:خير ياشعيبية؟وشفيك خرعتي الوِرع؟!
أنا:تصوري نايم تحت سريري وقال إيش؟ مشبب راسله يراقبني!!
نطت غالية أختها من الفراش وقالت:إيش؟مشبب؟فديته!!
أنا:وجع!وشفيك تقولينها برومانسية؟من زينه عِرة الشباب؟!
غالية:حرام عليك ياشعيبية..مشبب هذا حلم العذارى بديرتنا!
أنا:أي حلم العذارى واللي يرحم والديك؟طول بعرض وخشن ينقال غوريلا بسم الله علينا!
فزت دعجاء وصاحت فيني:وشفيه لاكان خشن؟هذا الرجال ولابلاش؟وإلا إنتي مايملى عينك إلا المتنعمين من طقة أخوك زياد؟!!
أنا:نعم نعم ياروحي؟؟والله يازياد يسواكم ويسوى شباب ديرتكم كل أبوها..الوحدة منكم تتمنى نظرة منه ولاتطولها!
غالية:ياشيخة لايكثر هرجك..زياد لو تنط قدامه جرادة قعد يصيح ساعة مايعرف شلون يذبحها!!
أنا:ليش؟ناوية تنطين قدامه؟!
الجميع:ههههههه
ثابتة:الحق ينقال مشبب نخوة وشهامة ماشفتيه شلون يذبح الخرفان في العيد والقلب جامد..
غالية:وإلا يوم ينسدح تحت البقر ويشرب حليبها يهبل كأنه طفل صغير!!
أنا:الله الله وش هالمواقف الرومانسية المُعطرة بريحة البقر والخرفان؟!قوموا قوموا الله يلوع أكبادكم خل نسوي الفطور للنسوان قبل ماتاكلنا جدتي شعيبية..واللي منكم خاطرها بمشبب تاخذه عليها بالعافية ماأبيه..بس لازم تلصق بجدتي شعيبية وتطلب رضاها لأنها اشتغلت خطابة بالعائلة الكريمة
وليت الزواجات اللي على يدها موفقة وتفلح!!!!
ردت صهباء:وليش ماتفلح؟ هي اللي خطبت أختي عالية لساهر ولد عمي وهذا هم مبسوطين وعندهم خمس من العيال...وخطبت هَبوب لـ متمم ولد عمنا والحمدلله عندهم هالحين ست وراعين!!
دعجاء:ولاتنسين بعد إنها خطبت لأبوي وزوَجَته وحدة ثانية على أمي ليش إنها ماتجيب إلا بنات!والثانية يوم إنها تسوي مشاكل ...جدتي شعيبية نصحته وقالت:أدِب النسا بالنسا وخذ الثالثة!وخذا الثالثة وكلنا عايشين ببيت واحد تصدقين عددنا 19 أخ وأخت وأبوي مرات ينسى أسمائنا؟!!
أنا:ماشاء الله!ومبسوطة يختي على كثرتكم؟!
دعجاء:إيه والله الأخوان عزوة!قبل كان يسمون أبوي أبو البنات..وهالحين عنده أولاد وبنات عقبال عمي خلف مايعرس!!
أنا:لاتفاولين على أبوي لايجيك شي مايسرك!ويلا ننزل تحت نفطر!!
نزلنا كلنا وريحة البيت ريحة أكلات شعبية وسمن وعسل وبهارات قهوة وتحاويج تقولون بيت عجوز معمرة!!
وكانت الساعة عشرة ونص وآثاري حريم أعمامي وبناتهم وأمي وجدتي قد فطروا من أول وصاحيين من الساعة 8..وأول مادخلنا عليهم المجلس صاحت جدتي شعيبية!!
جدتي:توكم صحيتن يالرفلات؟!أفسدتكن شعيبية؟!
أنا:أقول هم فاسدات من أول بس مالقيوا من يعطيهم وجه ماغير ارتاحي ولاتزعلين نفسك!!
قعدت جنبي ريفان وقالت بهمس:عاد لاتستعرضين مواهبك قدام الضيوف ولاتطولين لسانك على جدتك خلينا مبسوطين قبل الزواج!
أمي:قومي ياشعيبية وياريفان وجيبوا سفرة الفطور عشان اللي توهم صحوا ياكلون..
ويوم جبنا السفرة الا هي زاخرة بجميع أنواع الأكلات الشعبية اللي تنفع للفطوريزينها سمن الغنم وريحة الحلبة والرشاد!
وبما إني لاأحبذ هذا النوع من الأكلات نقزت للمطبخ وجبت لنفسي كيس توست وعلبة جبن ودهنت وأكلت!
زوجة عمي(أم مشبب):ورا ماتاكلين من عيشتنا ياشعيبية؟!
أنا:لأني ماأحبها ولاولفت عليها!
أم مشبب:بكرة إن شاء الله بتولفين عليها لاجيتي الديرة!!
بصراحة بغيت أغص بالساندويتش اللي أكلته!!
همست ريفان بإذني:يظهر إن الجماعة معزمين ياخذونك لمشبب سمعتهم يتكلمون عن هالموضوع!
أنا:على كيفهم؟والله لأسوي فيهم البطيط!وأمي إش قالت؟؟
ريفان:مسكينة وش بتقول قالت:اللي فيه النصيب هو اللي بيصير والبنت بعدها صغيرة..لكن جدتك ماتركت لأحد مجال وقالت البنت هذي دواها الزواج!
أنا:حسبي الله على إبليس!أحد شكالها من العنوسة جدتك هذي؟!ياناس أنا مبسوطة وشفيها كأني قاعدة على راسها؟!

ريفان:أصصصص..قصري حسك لايسمعونك!
------
وقامت أباليس تتنطط براسي وصرت أفكر:لايكون جدتي راسمة خططها وبتوهقني في الزواج غصب عني؟!
ولايكون أبوي بيطاوعها؟أدري به بار فيها ولايمكن يرفض لها طلب!
فقمت أرسم خطتي المتواضعة وقلت بأتغدى بهم قبل لايتعشون بي!!
وبالليل وأنا قاعدة مع بنات العم بالصالة والحريم قاعدين بمجلس الحريم داخل والرجال مجتمعين بالحوش وزياد ومشبب يشوون دجاج ولحم في الهواء الطلق!لمعت بذهني فكرة!!
لمحت ردادوه يحوم حولنا بالصالة ويقزني!!ماكأني هددته في الصبح!
ناديته وجاني يمشي بحذر..
أنا:وشفيك؟تعال لاتخاف!
همست له:وين الورعان؟!
رداد:يلعبون في الحوش جنب الرجاجيل..
أنا:زين بغيت أسألك..منهو أشين واحد فيهم؟!
ردَّاد:وقَّاد أبو خشة أشينهم كلهم!
أنا:ليش تسميه أبوخشة؟!
ردَّاد:لأن خشته تشبه خشة سعيدان اللي بـ طاش!
ابتسمت ابتسامة مكر وقلت:زين جيبه لي!!ولايحس فيكم أحد!
وبالفعل دخل علي (وقَّاد) الله يعافيه ولايبتلينا وعليه سِحنة اللهم ياكافي نص أسنانه وضروسه طالعين برة ولا مِن اهتمام نصهم سوداء ومأكولة من السوس وريحة الفم واصلة المريخ والشوشة خارجة من تحت الكوفية الي أطرافها مصفرة!! وحالة كرْبْ!
سحبته وأخذته لغرفتي فوق وردَّاد يركض ورانا!!
أنا:إسمع ياردادوه..إنت انتظرنا هنا برة في الصالة أنا عندي مهمة بأخلصها مع وقَّاد!!
ردَّاد:وش بتسوين فيه؟أخاف بتاكلين ولد عمي؟!
أنا:لاأعوذ بالله الخوف علي أنا لاياكلني بضروسه!
أخذت وقَّاد وكان عمره لايتجاوز الـ10 سنوات وقلت له:إسمع بأحط على وجهك شوية ماكياج وبعدها بأخليك تروح!!
وقَّاد:إيش؟أقول إنتي مهبولة!
أنا:المهبول إنت!تحسبني بأمكيجك بلاش؟أكيد بأعطيك فلوس!
طالع فيني وقَّاد ولعابه يسيل:فلووووووس؟!
أنا:إيه بأعطيك 30 ريال..وش قلت؟!
وقَّاد:موافق!
وأخذته ورسمت له حواجب بالقلم العريض الأسود فوق حواجبه ووصلتها وطلع شيفة!!وحطيت له روج عووودي وبلاشر وردي فاقع وكحل برسمة فرعونية خطيرة ولبسته فستان من فساتيني وجزمة كعب وشعره فضيحة لذلك لبسته طرحة وخرجت من تحتها شوشته!!
وأخذت كاميرتي الخاصة اللي توصلونها بالجهاز وتحمض الصورة فورياً وصورته!!!
ومانسيت أرمي كل مستحضرات التجميل اللي استخدمتها له لأنها صارت ممتلية بقنابل من الجراثيم على ماأعتقد!!
وبعد ماانتهيت من مهمتي الإجرامية قلت له:إمش ياولد وإغسل وجهك!
وكانت دورة المياه بداخل حجرتي ووقف مسكين قدام المراية والمغسلة يغسل وجهه واخترع من خشته البهية وقام يصيح:وااااااااااااااع وااااااااااي!
أنا:ياولد إغسل وجهك وتحمد الله..غيرك بلاه أعظم!
وقام مسيكين يغسل وجهه وهو مخترع من شكله وقمت أفرك وجهه أبيه يخلص قبل ماأحد يكتشف السالفة..تصدقون إن الولد صار لونه أسمرفااااااتح؟!
آثاري وجهه عليه طبقات من القَلَح الأصلي..ماركة الجودة!!
ورجع كل شي لطبيعته وعطيته فلوسه وفتحت باب الغرفة ولقيت بنات عمي(غالية ودعجاء)واقفات عند الباب!
قامت دعجاء تناظرني بنص عين وقالت:إش كان وقَّاد يسوي عندك بغرفتك؟!
أنا:كل خير!
غالية:حذرتنا أمي من بنات المدن بس ماصدقناها!!
أنا:أقول لايروح مخكم بعيد!صرصور بغرفتي وناديته يذبحه..فيها شي؟!!يارداد!
رداد:نعم...
أنا:تعال!!
وخذيته لغرفتي وقفلت الباب..مسكت الصورة اللي صورتها لوقَّاد وحطيت معاها ورقة كتبت فيها:مرحبا مشبب..أنا شعيبية وهذي صورتي!وحطيتهم بظرف وقفلته!!
وناظرت من الشباك لقيت مشبب واقف يشوي اللحم والدجاج وقلت لرداد:اسمع ياولد هذا الظرف تاخذه وتعطيه لأخوك مشبب وإياني وإياك أحد يدري مفهوم؟!
رداد(بخوف):مفهوم!
وعطيته 10 ريال وخرج من الغرفة..
إلا لقيت دعجاء وغالية مازالوا واقفات عند الباب ويطالعوني بنظرات ذات مغزى!!
غالية:هاه؟وش بغيتي من رداد بعد؟يذبح البريعصي اللي بغرفتك؟!
دعجاء:الله يقطع المدن ويكفينا شر بنات المدن!
أنا:ويكفينا شر عقليات بنات القُرى!تعالوا!
دخلوا غرفتي وعطيتهم نص عطوراتي عشان يسكتون وبغوا يطيرون من الفرحة..
دعجاء:هذي رشوة ياشعيبية؟؟ماعليه مقبولة منك!
غالية:قولي شكراً وإنطمي..لو تفحطين سنين ماشرالك أبوك مثلهم!
دعجاء:صَدَقتِي!!
-----وبالحوش
راح ردَّاد يركض على أخوه مشبب اللي كان واقف ينتبه للشوي وجنبه زياد!!وعطاه الظرف..
مشبب:وش ذا؟
ردَّاد:افتحه وإنت تعرف..
يوم فتح مشبب الظرف وطالع في الصورة كنت أنا أراقبه من الشباك فوق..تصدقون مسكين إلتفت لليسار وتفل تفلة قوية؟!(بيني وبينكم ماينلام التلاعب بوجه وقَّاد كان خطير والمفروض إني كتبت تحت الصورة تحذير:ممنوع مشاهدتها لمرضى القلب والسكري)!!!!هههه
زياد:مشبب؟وش السالفة؟!
مشبب:أبد شفت صورة لوحدة مو من قبايل الإنس!
زياد:هات أشوف!
رداد:لا لا تشوفها شعيبية وصتني!
زياد:وشهو؟شعيبية أختي راسلة لك ظرف؟!
مشبب:إيه بس خلها بيني وبينك لاتفشل أختك قدام الرجاجيل!
وسحب زياد الصورة من بين يد مشبب بكل غضب وقرأ الكلام وفهم قصدي وبغى يموت من الضحك لكن كتم ضحكته!
مشبب:زياد؟يعني السموحة بغيت أسألك سؤال ولاتؤاخذني فيه!
زياد:تفضل..
مشبب:الحين أختك شعيبية هذا شكلها؟!
زياد:إيه وأخس من كذا وأنطل وتراك شايفها بالصورة وهي متزينة وكاشخة كيف عاد لاشفتها على الطبيعة؟!!!بس اش رايك إنت؟!
مشبب:استغفر الله العظيم خلقة الله حرام نعيبها.
زياد:إيه..أجل ليش تحسب جدتك شعيبية قاعدة تخطط تحطها بحلقك وتربطك فيها؟هاه؟هذا لأنها دارية إن مافي أثول بالدنيا بيرضى ياخذها إلا إنت!
مشبب:تِحرم علي ليوم الدين!أنا أبي أتزوج عشان أستر نفسي وأستر بنت الناس ماهو أفضح عمري قدام مخاليق الله!
زياد:أجل إستر ماواجهت ولاتعلم أحد بالسالفة..
مشبب:أفا عليك ياولد عمي..هذي بنت عمي واللي يمسها يمسني وعهدٍ علي ماحد يدري باللي صار بيني وبينك!بس أتذكر إني قد شفتها زمان بالديرة ماكان هذا شكلها؟!
زياد:ياخي البنات بسبع وجوه..كل ماالوحدة كبرت وصارت مَرَة..تغيرت معالمها!
مشبب:إيه صح..كل شي جايز بهالزمن!!
-------
إتصل علي زياد وقال:قابليني عند الباب الخلفي للمطبخ!
وحطيت يدي على قلبي وقلت:خير اللهم إجعله خير عساه درى بالسالفة!
ويوم قابلت زياد إلا استقبلني بضحكة مجلجلة وهو يقول:فديت قلبك ياشوشو ليتك مسوية نسخة ثانية من هالصورة ومعطيتها ليقظانة بنت عمي رهجان عساها تكرهني طول العمر!!
أنا:هههههه ليه وش قال مشبب؟!
زياد:مسكين اخترع وهذا وجهي إن ماصابه عُقم من الصدمة!!
أنا وزياد:هههههه
--------
اش رايكم؟!

 

[أحساسي كتلوني]

هع هع هع هع
الله يخليها لكم ان شاء الله
والله اعطيتينا فرفشة اشوي

تسلمين يالغلا​

 

[**نور النهار**]

مررررااااااا عسل ياعسل والله أنا قريت كل اللي كتبتيه مررره يجننوا وبالأخص أسمهان وعبدالرحمن تحفه وننتظر التكمله لاتطولي علينا <<<<<<<طماعين ماصدقنا تحني علينا *_*

 

[تويتي فوشي]

مشكووورهـ حلوين مرررهـ

 

[خط وردي]

هي نذاله وش سركم مع النذاله والله دخلت جو مع القصه وووووواع ووووواع

 

[جيانة]

هي نذاله وش سركم مع النذاله والله دخلت جو مع القصه وووووواع ووووواع

لا مو نذالة ولاشي جربي تكتبين قصة طويلة وشوفي كيف بتكون صعوبة التأليف واختلاق الأحداث وصياغة السيناريو...
أشكر لك ذوقك

 

[جيانة]

مرااااااحب​

ليلة ماقبل العرس بدأت حالة الاستنفار في بيتنا جميع البنات قاموا يتسنعون..
رند وريفان قافلين غرفتهم والنقَّاشة(الحناية) تحنيهم...
وأنا قاعدة أسوي ماسك وأحطه على وجهي..وبنات أعمامي يفركون أسنانهم بالديرم يقولون يبيض الأسنان ويحطون مخلطات زيوت على شعورهم!
شفت غيفة نزلت المطبخ وقعدت تحوس بالثلاجة وبعدين أخذت علبة مايونيز وفتحتها وجابت ملعقة وقاعدة تغرف!!
أنا:الله يحوِم كبدك بتاكلين مايونيز سادة على الصبح؟!
غيفة:لا يالخبلة ماأحبه..بس صديقتي بالمدرسة تقول يلمع الشعر وينعمه!
أنا:يختي مستحضرات الشعر مالية الصيدليات والأسواق وإنتي قاعدة تلعبين بنعمة الله؟!
غيفة:كل شي طبيعي أزين!وبعدين من زين طعم الماينيز يوم تاكلونه!خل أستغله بشي مفيد أحسن!
وعاد زوجات أعمامي محنيات أياديهم من يوم هم بالديرة..لكن جدتي شعيبية بعدها ماتحنَّت..وأشغلتنا:حنوني حنوني!
وبنات عمي جايبات طاسة كبيرة وعاجنين فيها حنة وقاعدات يحنون أصابيعهم ومن زود الكشخة يسوون دائرة بنص الكف!! لا وحاطين ديتول مع الحنة!
أنا:الله الله..ديتول مع حنة؟!ليش؟تعقمونها يعني؟
ثابتة:لا يالذكية عشان الحنة يغمق لونها!
أنا:ياسلام..طيب وشب الحنة ريحتها فايحة كذا؟
دعجاء:حطيت عليها دواء الحنة..
وأخذت نفسي ورحت غرفة ريفان ورند ولقيت المنقشة تنقش أياديهم..
همست لرند:غريبة غيرتي رأيك وحطيتي نقش؟مو كنتي تقولين بأركب أظافر في الصالون؟!
رند:عاد إش أسوي؟طارق إتصل فيني مخصوص وقال أبي أشوف الحنة بأياديك!
ريفان:تنقشي معانا..
أنا:لا يختي..أحسه مايناسبني أبد!تخيلي عاد ألبس بناطيل وتي شيرتات وإيديني منقوشة؟ماتركب أبد!!
رند:شلون بنات أعمامنا مونسينك في الغرفة؟!
أنا:أي وناسة؟إلا ياحظكم إنتم قاعدات لوحدكم تنتفون وتتدلكون أنا غرفتي مقلوبة فوق تحت فيها درزن والدرازن الباقية قاعدات في صالة فوق والبزارين والأمهات تحت!الصراحة وحشوني بنات خالاتي وخوالي ودي لو إنهم هم اللي معانا..
ريفان:يلا هانت.. بكرة العرس وعقبه أكيد الكل بيسافرون..
أنا:ياحليلك يامتفائلة إنتي..هذا إن مالزَّم عليهم أبوك وحلف يقعدون أسبوع زيادة!
رند:وااااي تحزنون إنتوا الثنتين أنا بكرة بتبدأ حياة الحرية عندي وأفارقكم وأنبسط مع طروقتي!!
أنا:طبعاً وش عليك ياعروس؟قاعدة ومرتزة و لك شهر ماشلتي منديل عن الأرض حتى!أما أنا لو شفتوا غرفتي كل شي تصادر فيها يستخدمون عطوراتي ويتقايسون ملابسي ويحطون من ماكياجي!!آه بس ياحسوفتي على مكياجاتي اللي رميتهم أمس بعد وقَّاد!!
طالعوا رند وريفان ببعض باستغراب وقالت ريفان:وش علاقة وقَّاد بمكياجك؟!
حكيت لهم السالفة وقعدوا يضحكون حتى النقاشة ضحكت معاهم..
رند:هههه يازينك ياشعيبية إنتي وسوالفك بتوحشني مغامراتك يابنت..لكن إنتي شدي حيلك وتخَرَجي من الثانوي وأنا بأتوسط لك عند طارق يغصب أخوه الصغير (ماجد) يجي ويخطبك!!
ريفان:لاحرام لاتغصبونه دُفوه بكم فِلس وهو بيجي يخطبها على طول!
الثنتين:ههههه
أنا(باستهزاء):ههههه..لاتتطنزون عندي إحساس قوي إن حظي بيكون فوق فوق وبآخذ واحد له ثقله ووزنه!!
رند:أثقل من مشبب؟!ماظنتي بتلقين!هههههههه
عطيتهم مقفاي ورجعت غرفتي لأجد روايح تكتم الأنفاس غالية وصهباء تحمموا وأقبلوا يتعطرون بمخلطات مادري من أي بلد جابوها!
أنا:وش هالروايح؟ الله لايحرمنا من ريحة الجنة!
دعجاء:تقصدين ريحة الحنة ولاالزيوت؟ولا المخلطات؟!
أنا:وش دراني عنكم وإنتم خلطتم الحابل بالنابل!يلا يلا شيلوا قرابيعكم وإنزلوا تحت غرفتي يبي لها شهر عشان تتهوى وتتعقم!
أخذوا طاسة الحنة ونزلوا عند الحريم يكملون..
شافتهم جدتي شعيبية وقالت:وش جابكم؟!
صهباء:هذي شعيبية طردتنا من غرفتها تقول كتمناها بريحة الحنة!
جدتي:عشتوا!من زين ريحة البلا اللي تدهن به أظافرها ثم تشيله ببلا ثاني ريحته أخس وأنطل!نادوها!!
نزلت أشوف وش تبي جدتي الحبيبة..
ناظرتني بنص عين والمجلس مليان بنات وحريم أعمامي..ومدت رجليها وقالت:بنت ياشويشة؟!
أنا:هاه!!
جدتي:هوا يرفعك ثم يرمي بك!قولي نعم!
أنا:نعم ياجدتي..
جدتي:وش تشوفين قدامك؟
( وتأشر على رجولها)
أنا:أبد سيقان حلوة مقاسها إكس إكس لارج وزايدها حلا سروال خط البلدة المخطط بألوان الطيف!
جدتي:ماأتكلم عن سيقاني(وقامت تأشر على أقدامها بعصاتها)!
أنا:تقصدين أقدامك؟اشفيهم؟تبين أهمزهم لك؟!
جدتي:لامشكورة..لكنهم متقشرات ومحرشفات وأبيك تحنينهم لأجل يطرى الجلد ويبرد!
(نضرة) بنت عمي:أنا بأحنيهم لك ياجدة مثل دايم!
جدتي:اقعدي يابنت إنتي ضيفة حلفت مايحنيني إلا شعيبية!
أنا:معليش ياجدتي بس تدرين ورانا عرس وأبي أحافظ على نظافة يدي عشان بأركب أظافر بكرة..
جدتي:وش علي أنا من سوالفك؟هاه؟تعالي وحني جدتك وشمي ريحة الحنة وش زينها أحسن من المصايب اللي بتحطينها على مخالبك!!
قامت أمي تغمز لي بأن أطيعي أوامر جدتك..
أنا(بصوت خافِت):يمه بينعدم لون يدي من الحنة ماعندنا قفازات؟
أمي:مايخالف لاانعدم لون يديك انقعيهم بكلوركس!!وقفازات ماعندنا!
وبالفعل قعدت أحني رجلين جدتي اللي كانت بقمة الخشونة ومتقشرة حيل..وماصدقت إني انتهيت وجيت أقوم..
إلا صاحت فيني:ياشويشة!تعالي وحطي لي قبضة!
أنا:وشهي قبضة ذي؟!تقصدين أعطيك كسوة؟!ماعندي إلا الفَلَس ترى!
والمجلس يضحكون علي!
جدتي:تستهبلين إنتي وخشتك؟ماأخس من زياد إلا انتي! تعالي يابنت خذي قبضة من الحنة وحطيها بقبضتي وأنا بأصك إيدي عليها!
أنا:وليش عاد هالخزعبلات؟لايكون في السالفة خرافات ومعتقدات؟!
قاموا يضحكون علي ..
وحدة من حريم أعمامي:ياحليلها بنتك يابدرية جيبيها عندنا الديرة نعرفها بكل شي..
جدتي:ياالثولة بأتحنى قبضة يعني كأنك بتعطيني مُد رز..
أنا:وليش عاد؟الحقي على منقشة رند وهي تزين أياديك..
يقظانة:الله يقطعها منقشتكم ذي بغيتها تنقش أيادي ورجلي قالت الرجلين بـ50 واليدين بـ 50!!
كم وحدة من حريم أعمامي:يووه وش هالأسعار؟على بالهم الفلوس نغرفها من بحر؟!
غيثاء(بنت عمي):إن شاء الله لارحنا معاك بكرة للكوافيرة كم بندفع؟!
أنا:إيش إيش؟ماسمعت!مين اللي بيروح معانا بكرة؟بكرة أنا وأمي وخواتي بس اللي رايحين...الصالون زحمة وحنا حاجزين عندهم من شهر..أما إنتم الله يقويكم شوفوا لكم صالون ثاني!
وحدة من زوجات أعمامي:حِنا مثل ماتشوفين ياشعيبية كلنا لابسات على رووسنا الشيلة ومانحتاج كوفيرة ولاخرطي ووجيهنا الله مغنينا بالإثمد نكحل به عيوننا وندهن وجوهنا فازلين وتصير تلِق مثل النجفة!
جدتي(وهي تناظر بأمي بنص عين):والجمال رباني ماشاء الله ماهو مثل بعض ناس زوجوا بناتهم وباقي لهم نفس يتصبغن ويتلونن!
وحدة من زوجات أعمامي:بنرسل بناتنا معاكم يابدرية يتصلحن بس بـ كم؟!
أمي:الصالون اللي حنا رايحين له يسوي التسريحة والماكياج بـ500 ريال!
شهقوا حريم أعمامي وبناتهم شهقة جماعية تقولون متفقين؟!
جدتي:يوووووووووووه وعسى خلف ولدي اللي بيدفعها؟!والله مايحط فيكم ريال..ادفعيها من راتبك يابدرية ولااقعدي في البيت إنتي وبناتك أبرك لكم!
عاد أمي تعرف طباعهم لذلك تطنش كل مايقال وتشتري راحة بالها..بس أنا أبد كل ماقالوا كلمة حسيت إني أشتب!
أنا:وخير لادفع ولدك خلف ياجدة؟أبونا وملزوم فينا!!!
جدتي:وأنا مازوَجته أمكم عشان تِطيِر فليساته..لو تحبونه صحيح توفرون عليه وتحافظون على ماله لكن ماش!!لاعقل يفقه ولاإذن تسمع!!
أنا:والله هذي أسعار المدن..
جدتي:واللي يسمعكم يقول من زين الخشش اللي بتطلعون بها على الناس...باقي يطلعون بنات أعمامك وزوجاتهم قماري جنبكم وإنتم اشبعوا فشيلة!!
-----
----------الله المستعان!:30:

​

 

[خط وردي]

فديتك جياانه يابعدهم والله بس بقوووه دخلت جو
أنا اكتب قصص زيك بس روايات طويله وماعندي وقت انزلها خلصت وحده وبأديه بالثانيه الأولى 1000 صفحه وعليها والثانيه توني ب300 صفحه
حلو شعوور الكتابه وقصصك شيء دووووم مو يوووم​

 

[**نور النهار**]

خطيـــــــــــــــــــــــــره أستنى التكمله


فديت قلبك تجنني أنت وحكاويك

 

[الحور العين - 1]

ههههههههههههههههههههههههههههههه

تسلمين جيونة

ضحكتيني وأنا ما فيني حتى إني أضحك

 

[**نور النهار**]

وووين التكمله بنات بليز صوتوا معاي عشان جيونه تكمل القصه مره حمستني بليـــــز

 

[جيانة]

عُدنا والعودُ أحمدُ وعبدالعزيز وسالم!!
مرت اللحظات وأهم مافي الموضوع إن جدتنا شعيبية تحنَّت وعليَّ ماحنَّت!!
والبيت معفوس نستعد لبكرة يوم العرس..
واجتمعوا أعمامي وأولادهم بمجلس الرجال وأحيت الجلسة جدتنا الموقرة اللي دخلت عليهم كاشخة بحنتها.. ومتروشة وشيلتها تفحفح بريحة البخور!
زياد(البكاش)قام يرحب فيها أمام الجميع:هلا والله ومية هلا وش هالكشخة ياجدة ظنيتك العروس!!
جدتي:قسم إني أحلى من عروسكم اللي مخططة إيديها بـ نقوش كأنها ثعابين متسلقة شجر!!
وقعدت معاهم وألقت محاضرتها الشهيرة اللي كان أهم ماجاء فيها:
(كل واحد منكم ياعيالي عنده فرقة من البنات والأولاد...وهم البنات لين الممات وأما الأولاد فخر وأمجاد!ماأنصفتينا ياجدة من زين ورعان العيلة مدري وش صنعوا من أمجاد!!
وجمعتكم هذي جَمعة خير واللي يبي يخطب لايرده إلا لسانه!)
قام عمي(أبومشبب) يتلفت وقال:بغينا بنتكم شعيبية لولدنا مشبب ياخلف!
وقام أبوي يبلع ريقه وجاء يرد لكن مشبب سبقه وقال:الله يرزقها باللي يصلح لها أما أنا ماأبيها!!
ضج المجلس بالأصوات...
عمي أبومشبب:وإش هالكلام ياولد؟السالفة لعب عيال؟!
مشبب:لاالسموحة يايبه بس ماأبي أتزوج من بنات المدن!
عمي أبومشبب:إن كانت شعيبية من بنات المدن ..فأبوها خلف اللي تربى وعاش في الديرة يآكل الكبد الني والحنش وهو حي!!
مشبب:وأنا قلت ماأبيها ولا أبي غيرها!!
عمي أبومشبب(بعصبية):وتكسر كلمتي ياولد؟!!
أبوي:أقول إقصروا الشر..تتعازمون على بنتي وأنا قاعد؟!!
جدتي:وليش ياخلف؟عندك راي ثاني؟بنتك مهبولة ومايناسبها إلا مشبب يأدبها ويعلمها السنع!!!
مشبب:ويوم إنها مهبولة ياجدة تبين تقطينها بحلقي؟!يمين ماآخذها!
أبوي:أنا بنتي مهبولة؟!مايخالف...مادام هذا رايكم فيها فأقسم لكم إني ماراح أزوجها أي شاب من شباب العايلة!
جدتي(وهي تأشر بعصاتها):موب على كيفك!بناتك كلهم زوجتهم من عيال المدن وصاروا ماصخات فاصخات مايعرفون ديرتهن ويستعرن منها..فخل ختامها مسك وعَطْ شعيبية لـ مشبب!
مشبب:قلت ماأبيها..
أبوي(يبي يتهرب):علم ٍ يوصلكم ويتعداكم شعيبية خاطبها واحد له ثقله وأنا وعدته خير..ومثل ماقلتي يمه كل واحد عنده فرقة من البنات ومشبب ماقدامه إلا يطب ويتخير من بنات أعمامه الثانيات!
مشبب:صح لسانك ياعم..بنات أعمامي الثانيات يكفِن ويوفِن!!
وقام عمي يقظان يطالع في زياد بنص عين وقال:وإنت ياولد مانويت تخطب؟!
زياد:ليش بسم الله؟تو الناس!مابعد كملت دراستي؟!
جدتي:لا هذا اغسلوا إيدكم منه..خله جنب أمه يرضع!
ضحكوا الجميع عليه وتضايق ثم طلع الحوش واتصل فيني..
زياد:شوشو؟تعالي إنتي وأخواتي من باب المطبخ الخلفي صار لكم وحشة ماعاد جلست معكم من يوم أقبلوا ضيوفنا وانحرمت من غرفتي وصرت أنام مع العيال بالملحق!
أنا:ابشر..
وجمعت خواتي وطلعنا من الجهة الخلفية للحوش وقعدنا مع زياد وكانت معانا ضي هي وبنوتتها الصغيرة...
أخذها زياد وقام يلَعِبها...
زياد:وشفيك ياشعيبية ريحتك فايحة؟وش ذا؟
أنا:هذي طاسة كلوركس بعيد عنك وناقعة يدي فيها!
زياد:وع ياريحته..ليش؟
أنا:لأن إيديني صار لونهم برتقالي عقب ماحنيت يدين ورجول جدتك وبكرةالزواج!!
زياد:على طاري جدتك فاتك وش صار!
أنا:وش صار؟!
وحكى لنا زياد عن أحداث المجلس..
أنا:فكة من هالمشبب...وقالوا عني مهبولة؟!خلهم يقولون عشان ماحد يتجرأ يوطوط على باب بيتنا منهم ويخطب..بس ماقلت لي منهو هالعريس الراهي اللي بيخطبني؟!
زياد:مافي لاعريس ولايحزنون..هذي تصريفة من الوالد...
ضي:ياحليلك ياشعيبية ودي أشوفك اليوم قبل بكرة عروس..ماني متصورة منهو هالمضروب على عينه اللي جماعته داعيين عليه عشان ياخذ وحدة مثلك!!
أنا(بعصبية):زين قولي آمين..
ضي(ببراءة):آمين..
أنا:جِعل بنتك شهد تقعد بحلقك وماتلقى أحد يتزوجها إلا ولد مشبب في المستقبل!!
ضي:وااااي حرام عليك!
رند:صدق لاقالوا العرق دساس وشفيك يابنت صار كلامك ومزحك كله ماينطاق كأنك صورة مصغرة من جدتك؟!
ريفان:على الأقل جدتي ينقبل حكيها لأنها متأثرة بجفاف البيئة المحيطة لكن إنتي ياشعيبية بنت المدن والمدارس المفروض تكونين هينة لينة!!
أنا:أشوف قلبتوا علي؟!ترفقوا فيني تكفون... بكرة المعركة جاية في الطريق!!
الجميع:أي معركة؟!
أنا:معركة جدتي شعيبية معانا في العرس!!
زياد:هههه الحمدلله..إنها ماتقدر تدخل قسم الرجال..يلا خليها تسوي لكم شوية آكشن في العرس!
------
ملحوظة:إن تيسرت أموري كتبت عن جزء زواج رند..
وإن ماحصل خليها بعد العيد..
بس بالله لاتنسوني...

 

[جيانة]

هلا من جديد...
أقبل يوم العرس وصحى البيت كله جاب أبوي ذبيحة للضيوف اللي تارسين البيت تغدوا وبعد الظهر تجهزت أنا وأمي وخواتي للذهاب للصالون..
جدتي:وين رايحة يابدرية؟هالحين من صدقك بتتركين ضيوفك بالبيت عشان تترسين وجهك صباغ؟!!
أمي:ماعليه ياخالة البيت بيتكم وقهوتكم جهزتها ..والشاي الشغالة مابتقصر فيه...وبأحاول أخلص بسرعة وأرجع لكم..
جدتي:خلي وحدة من بناتك على الأقل..
أنا:لااااااا؟أقول جدة..ترى الليلة عرس إختنا ونبي نكشخ ونفلها فالله يرضى عليك لاتخربينها!!
طالعت فيني جدتي بنظرة حسيت من خلالها إنها تقول بصدرها:هي خاربة خاربة لكن اصبروا علي في العرس....أحوسكم حوس!!!
رحنا وتسنعنا وتضبطنا تصدقون يوم طالعت نفسي بالمراية ماعرفت مين أنا؟!
الحقيقة حسيت نفسي عروس ولكن ينقصني العريس اللي يستاهل هالجمال الرهيب!!
خلصونا المغرب وبقيت رند قالت الكوافير إنها على صلاة العشا بتكون جاهزة..انتظرت معاها بالصالون كمرافقة وأمي وريفان رجعوا البيت وضي بعد رجعت بيتها..
وبعد سويعات كنَّا في طريقنا لقاعة الأفراح...
أصروا أعمامي نسوي موكب بالسيارات لين نوصل القصر لكن أبوي قال لهم ماله داعي إحنا بمدينة وبنلفت الأنظار!!لكن لاحياة لمن تنادي ارتصت جميع السيارات ورا بعض وسدوا الشوارع وأزعجوا خليقة الله بالبواري:طاااااط طيييييييط طوووووط طمبروط!
(حلوة طمبروط صح؟هذي من عندي)!!!!
المهم سووا ضجة مافرقهم إلا عساكر المرور الله يحفظهم!!
واحد من أعمامي:ورانا عرس ونبي نزف عروسنا وأنا بن عفيسان وش دخلكم؟!
العسكري:ياخي منت بأحسن من الملك!اللي لامشى بموكب ماسمعنا صوت الطوطوة حقتكم!!تسهلوا!
ووصلنا بعد جهدٍ جهيد للقصر وأنا أصيح في السيارة ارفعوا المكيف تسريحتي وماكياجي بتخرب!!
رند:اسكتي بالله أنا العروس وماتكلمت!
ووصلنا ونزل الجميع وجينا ندخل للقاعة ولكن جدتي وقفت عند الباب ومنعت الدخول بعصاتها!!!
أمي:وشفيك ياخالتي؟ابعدي خلنا ندخل!
جدتي:ماحد بيدخل لين يكتملون الجميع ثم ندخل على الناس!!
أنا:وليش إن شاء الله ندخل على أهل المعرس فوج؟تبينهم يخترعون؟!!
جدتي:والله مابيخرعهم غيرك إنتي ووجهك الملون مثل حلاوة العيد ياكافي!
همَسْت لريفان:بدأت بطولات جدتك!
ريفان:لا وإنتي الصادقة بتبدأ بعد شوي لاشافت فستانك!!
وتخيلوا وقفنا كلنا في مدخل القاعة وأهل العريس يبونا ندخل ورند مسكينة واقفة معانا ودها تطع لغرفتها المصورة بتوصل في أي لحظة وماودها إن الناس يشوفونها إلا بالزفة لكن جدتنا مسوية حظر تجول!!وبعدها طلعوا الطِيران حقتهم وقاموا يطقون!
وعاد جدتي قايدة الفرقة هم يطقون وهي تقصد مافهمت منها غير كلمة:يالالا يالالا!!
ودخلنا داخل واكتملوا زوجات أعمامي وبناتهم وبزارينهم اللي قلبوا القاعة ساحة رياضية لممارسة الركض بين الطاولات ولعب الغميمة وواحد طش تحت الكراسي!!!وأخذوا جولة على الطاولات يفكون الصحون وياكلون مابداخلها ويتركونها...بس ماعليكم أنا أعجبكم طرت وراهم وطِحت فيهم تقريص وتفريص!!
وفشلونا من أهل العريس اللي كانوا ذوق!
وعاد بنات أعمامي 7 منهم مشترين طاقة قماش ومفصلينها نفس الموديل ينقال كشخة!!وفاردات شعورهم وحاطات روج أحمر وبلاشر وردي فاقع لاوفساتينهم مشجرة بجميع الألوان الموجودة على الكورة الأرضية ماعدا اللون الأحمر والوردي!!!!!!!!
وكما تدين تُدان التفريص اللي فرصتهم إياه رجع فيني من جدتي!!
فستاني كان مكشوف من فوق بس معاه شال....
نادتني أمي:شعيبية..استري كتوفك وراك حاطة الشال ديكور؟الله يرضى عليك أنا مو ناقصة ألسنة زوجات أعمامك ودعاوي جدتك علينا!!!!
أنا:إن كان على زوجات أعمامي فما عليك منهم.. بناتهم لو أحد معطيهم وجه كان طلعوا من ملابسهم!!وأما دعاوي جدتي فلاتخافين منها ..أصلاً جدتي وش عندها طول اليوم من شغلة غير تدعي على الجميع وإلا تخبطهم بعصاتها..والحمدلله إن دعاويها مو مستجابة وإلا كان لقيتي نص العيلة عندهم عاهات مستديمة!!
أمي(بغيظ):الله يعين ويعدي الليلة ذي على خير!!
ومامداني ألتفت وراي إلا تستلمني جدتي بذاك التفريص والتقريص في كتوفي ويديني!
وهي تقول:أخذ الله أمٍ جابتك وماعرفت تربيك!خارجة علينا عارية ياقليلة الدين؟!!
أنا:ياجدة حرام عليك أنا وش بان مني غير كتفي ويديني؟!!
جدتي:هاه؟أجل وش تبين يبان أكثر يالنسرة؟ودك تطلعين علينا بكراعينك؟!!
أنا:بس ياجدة أنا ماسويت شي...شوفي الناس اللي بالقاعة شلون لابسين والله إني أستر منهم!!
جدتي:وش علينا منهم الله يخسف بهم؟إنتي بنتنا وملزومين فيك!!
تركت جدتي ورحت لريفان اللي واقفة مع بنات خالي ويضحكون علي من بعيد!
نجود(بنت خالي):هههه ياحليلك ياشعيبية تكسرين الخاطر إنتي وهالكدمات اللي بيدينك!!
ريفان:ماعليكم شعيبيةاستجلدت وتعودت على علقات جدتي!!
بنات أخوالي:هههههه
وبدأت الطقاقة تطق والصوت يلج بأنحاء القاعة وجدتي تصرخ:خل هالمغنية اللي تنبح علينا ترخي صوتها!!
ونادتني جدتي:روحي لهالعنز وقولي لها تراك أزعجتينا إخفضي صوتك!!
أنا:وشهو اللي أخفض صوتها على بالك تلفزيون؟؟والا بأروح أقول لها جدتي منزعجة هَدِّي اللعب؟!
جدتي:إلا فيه ناس باطين كبدي وشكل العصا بتلعب على ظهورهم بعد شوي!!
ونادت أمي...
أمي:نعم ياخالة؟!
جدتي:قولي للي قاعدة تدندن فوق رووسنا تحط لسانها بحلقها وأنا وحريم العيال بنطلع ونطق طيران ونقول قصايد!!
أمي:لا لا جزاكم الله خير ومجملين ومشكورين خليكم بمكانكم...هذي المطربة مدفوع عليها فلوس وجايبينها أهل العريس مايحق لنا نتشرط عليهم..
ع