~ في ظل غياب الرقابة .. اعاني لوحدي ~

[الكوثرالمهدور]

محبة الطاعات وينج يمعوده؟؟؟

 

[محبة الطاعات]

بسم الله الرحمن الرحيم

و انتظرت و انتظرت و انتظرت و كان عالمي صامت و لكن اللي كسر هالصمت هو صوت ضحكة كانت قوية لدرجة اني من كثر خوفي من هالصوت نفضت و بدقيقة لقيت نفسي واقفة جنب السرير و لازقه بالجدار و شوي شوي استرجعت استيعابي و عرفت انها امي اللي تضحك طيب لو كانت معصبة علي ليش تضحك و على طول ما عطيت عقلي فرصة يحط افتراضات ركضت على الباب و فتحته بكل قوة عطاني اياها ربي و شفت امي قاعدة بالمجلس مع عبد الرحمن تسولف و تضحك و ظليت مبحلقه فيها لغاية ما حست ان فيني شي و قالت لي بصوت مليان بالغضب :"هنوووووود شفيج؟؟؟" هزيت راسي باستغراب و قلت لها :"ما فيني شي" رحت جمب الكمبيوتر و لقيت الوضع على ما هو عليه و لليوم انا مو عارفة هل فتحته او لا؟؟ بس اتوقع ان لا لأن لو درت عني كانت قتلتني, طبعاً سكرت الجهاز و رحت غرفتي اصلي سجدة شكر لله على هالموضوع.

صار المغرب و جات نوف مع امها كالعادة يزورنا و اول ما جاوا بيتنا على طول انا سحبت نوف على غرفتي بقول لها على الي صار
​

* هند: نووووووف لحقي علي انا تهورت و صار شي ما تتوقعينه.
* نوف(مو عارفة شنو صاير): شنوووووو؟؟ شصار؟؟؟ شسويتي؟؟؟؟
* هند: تهورت و قلت خلاص انا بقول حق وليد يجي يخطبني لأني بجد تمللت انا محتاجة حب ابي احب ابي كلام حلو لي متى بصبر. <<<<< و كانت اول مرة تقول هالكلام حق احد
* نوف(مصدومة): اووووووو من صجج؟؟ يعني استسلمتي و خلاص تبين تحبين, بس تعالي هني ما لقيتي الا وليد ويييييييييع هنودة حبيبتي تركي هالأنسان عنج في وايد غيره الله يهداج بس .. انزين قولي لي شنو اللي تهورتي و سويته؟
* هند: فتحت مسنجري القديم و دورت اسمة و دورت و دورت و ما لقيته شفتي حظي الحلو و قبل ما ادور اخر مرة دخلت امي و بدل ما اسكر الكمبيوتر سكرت الشاشة.
* نوف(قاطعتها و بخوف باين بعيونها): من صجج؟؟ يمااااااااااااااا و شصار بعدين؟؟؟؟؟؟؟
* هند: اقول لج ركضت على الغرفة و على سريري على طول بس الحمد لله الله ستر.
* نوف(ارتاحت): اووووووووووووف الحمد لله, خرعتيني يا الدوبة.
* هند: انا بغيت اموت من الخوف اقول لج بس الحمد لله, الله ستر على اخر لحظة و ربج عداها على خير.
* نوف: الحمد لله بس شوفي انتي ما ينفع معاج جي انتي الحين في خطر هالوضع ما ينسكت عليه لو تبين تحبين صج في اشياء لازم تسوينها صح عشان تضبط امورج.
* هند(متحمسة): علميني و انا من ايدج هذي ليمن ايدج هاذي.
* نوف: اول شي و اهم شي يبي لج نيو لوك انتي جي ما تنفعين.
* هند(بعصبيه): شفيه اللوك مالي بعد؟؟
* نوف: قــــــــديـــــــــــم وايد وايد وايد يبي لج تجديد + ميك اب + تكشيخ على الأخر وله شلون عيل بتصيدين الرجال المناسب.
* هند: انتي غصدج اسوي نفسج؟
* نوف: يعني نوعاً ما بس الفرق ان انتي ما بتقولين حق الماما نفسي.
* هند: بس انا ابي اتزوج و ابي احب عن طريق الحلال يعني ابي احب زوجي مو اي واحد يقط علي كلمه اروح اركض له. <<<< تغصد نوف
* نوف(متنرفزة): شغصدج يعني؟؟
* هند: يعني لو ابي احب ابي احب زوجي و الوحيد اللي مستعد يتقدم لي هو وليد. <<<< غيرت رايها لانها ما تبي تتغير و خافت من ربها
* نوف: تدرين مالت عليج و على وليد فوقج هذا جزاي اللي ابي اساعدج.
* هند: لا مشكورة ما ابي مساعدتج.
* نوف: الله يا الدنيا توها من ايدي هذي ليمن ايدي هذي بس قلت لها عن الميك اب عصبت و هبت فيني و صرت انا الغلطانه .. على العموم مو مشكلة بس تحملي تسوين هالحركة مرة ثانية لان امج ممكن تطب عليج, هذي المرة سلمتي المرة الجاية ما بتسلمين.
* هند: اي يصير خير ان شاء الله.
* نوف: و تدرين تبين نصيحتي كلمي وليد بالفون احسن لأن بالفون ممكن تترقع و تقولين انها صديقتج او انها انا و انا برقع لج بس بالنت المحادثات موجودة و محفوظة و ممكن تنصادين يا حلوة.
* هند(سرحت): ايييييييييي صح تصدقين كلامج مضبوط.
* نوف: شفتي عشان تصدقين ان قلبي عليج مو مثلج كله تجرحين فيني على شي مو غلط انا اسوية.
* هند: خلاص حبيبتي فديتج انا, تدرين اول ما يجي يخطبني وليد في يوم النظرة الشرعيه محد بيحط لي الميك اب الا انتي شرايج؟؟
* نوف(فرحانه): وناااااااااااااسه اكيد موافقة تعرفيني احب احط ميك اب و حدي فنانه بهذا الموضوع, مشكورة يا الغالية.
* هند: العفو يا الأغلى.
​

و قعدنا نتخيل انا ونوف لو اني تزوجت شنو بنسوي و شنو الأشياء اللي لازم اجهزها حق زواجي و شلون بيكون شكل وليد يوم الخطوبة و احلام وردية كثيرة اججت موضوع الزواج في بالي و ولدت في عقلي فكرة جديدة و هي فكرة الزواج و اني اتعرف عشان الزواج يعني بهذي الطريقة بيكون تعرفي لغرض شريف و بكون ناوية الزواج مب الدمار و اكيد اكيد ربي بيوفقني و طبعاً شلت من راسي وليد لأن نوف طول القعدة كانت تكرهني فيه و بتصرفاته و تبين لي ان لو تزوجنا زوجنا ما بينجح.

في هذا اليوم نمت و انا افكر في هذا الموضوع و شلون ممكن اتعرف على صبيان من النت و تكون علاقتي معاهم بالفون و قعدت افكر و افكر لغاية ما خذاني عقلي لفكرة شيطانية جديدة و هي الحل الامثل و الحل اللي بيريحني لكن قبل ما اقول لكم على الحل و قبل ما اقرر اني اسوية قلت في قلبي بعطي اهلي فرصة اخيرة و بطلب منهم كلام حلو و بدون لف و دوران و لو رفضوا خلاص انا هالمرة بكون اقوى و نوف بتساعدني و بتكون هذي اهي القشة اللي بتقسم ظهر البعير.

و بعد مرور اسبوع و انا كنت طول هالوقت افكر شلون افتح الموضوع حق امي :8: و كنا تحديداً جالسين في السيارة ننتظر العشا اللي كنا طالبينه من مطعم و ما ادري شلون (وقتها كنت افكر في الموضوع و شلون ابتديه مع امي و متى اقولة لها) فتحت الموضوع و بدون شعور تكلمت و انا وقتها ما كنت حاسة بنفسي
​

* هند: يما انتي تحبيني؟؟؟
* ام أحمد(منصدمة): اكيد .. و له بذمتج في ام بالعالم ما تحب بنتها.
* هند: طيب تحبين اخواني؟؟؟
* ام أحمد(تايهه): اكيد احب اخوانج انتو كلكم عيالي معقولة يعني بحب ناس و بخلي ناس اكيد احبكم كلكم.
* هند(للحين تتكلم و هي مو حاسة بنفسها): طيب من تحبين اكثر؟؟
* ام أحمد(توترت): انا احبكم كلكم مثل بعض.
* هند: بس انا اشوف معاملتج لأحمد و عبد الرحمن غير عني انتي تحبينهم اكثر مني.
* ام أحمد(بعد سكوت لمدة 5 دقائق): تبين الصج .. اي احبهم اكثر منج.
* هند(فاقت و بدت تستوعب): و انا؟؟؟؟؟
* ام أحمد: انتي احبج لكن اهم اكثر بشوي تدرين ليش؟؟
* هند(مصدومة و بتصيح بس ماسكة نفسها): ليش؟؟
* ام أحمد: لأنهم يسمعون كلامي و ما سووا الشي الي انتي سويته يعني بصراحة عقب اللي انتي سويته انا ما اقدر اقول لج انج للحين في قلبي مثل اول ما اقدر اجذب عليج.
* هند(نزلت على خدها دمعه صامتة و لزمت الهدوء و قعدت تطالع السيارت من الشباك و لكن في قلبها كلام وايد): ..... <<<<<< و خيم السكون على المكان


​

رحنا البيت و اتذكر اني كنت اتوعد في داخل قلبي اني ارجع بحاله اردى من اول و هالمرة بنية الزواج و مراح اتنازل الا و الدبله بأيدي و يا انا او امي و دامها ما تحبني خلاص اهي قالت كلمتها الاخيرة و انا بعد رح اقول كلمتي الاخيرة و اخذت السالفة عناد مثل اول مرة.

و في اليوم اللي بعدة و بعد ما صار المغرب امي قالت لي انها بتطلع مع اخواني و بيروحون السوبر ماركت بيجيبون اغراض و حسيت في هالمرة ان هذي هي فرصتي عشان انتقم و اللي اتذكرة ان كان في بالي وليد و اني اكلمة بالفون, و بالفعل امي طلعت مع اخواني و بدت رحلتي.

انتظرت خمس دقايق عشان اتأكد ان محد بيرجع و دخلت الغرفة و رحت في الزواية و كانت هذي اول مرة اكلم فيها ولد بعد الحادثة اللي صارت لي و مسكت التلفون و ايدي ترتجف و انا اتذكر اثار الضرب اللي امي ضربتني اياه و اخذت نفس عميق لما طيف ذكريات اللي صار لي مر على بالي و لكني كنت معانده و مصممة و اتصلت على وليد و دقايق الا يقول لي ان الرقم غلط و غير متوفر بالخدمة استغربت و رجعت اتصلت مرة ثانية و نفس الشي قلت معقولة شنو صاير له يا ترى؟؟ و قررت اني ارجع للنت و رحت على جهازي و فتحت المسنجر القديم و دورت حساب وليد و لكني ما لقيته و دورت و دورت لكن صادني احباط مو طبيعي و بأخر لحظات اليأس تذكرت الفكرة الشيطانية اللي جاتني قبل و قلت حان موعد تنفيذها بما ان وليد غير متاح اذاً انتقل للخطة البديلة, و كانت الخطة البديلة هي الشات الشي اللي طول عمري كنت اسمع عنه انه مو زين و ان ممنوع علي اني استخدمة و ان و ان و ان و ما ادري كيف جاتني الجرئة و كتبت في قوقل شات و طلعت لي مواقع و غرف الدردشة الكثيرة و لكني دخلت على واحد معين و ما ادري ليش هذا بالذات مع انه ما كان الاول بالبحث و اتذكر نك نيمي كان وقتها " توتة " و اول ما فتح الشات حسيت بقلبي بيطلع من ظلوعي من كثر ما كان يدق و يدق و بلا شعور طلعت من الموقع و حطيت ايدي على قلبي ابي اهديه شوي و كلها دقايق و رجعت دخلت و بنفس النك نيم " توتة " و دخل علي واحد بالخاص و ظل يسولف و يسولف و يسولف و انا معاه لكنة ما طلب ايميلي او رقمي او اي طريقة تواصل استغربت منه و لكن الوقت سرقني و كان لازم اطلع اخاف امي تجي و تطب علي و استأذنت منه و طلعت.

و عقب ما طلعت امي ما جات الا عقب بربع ساعه ما اكذب عليكم ندمت على الـ 15 دقيقة اللي قعدت فيهم بدون شي :8: و لكن قلت مو مشكلة بعوضها وقت ثاني , و كلها كم يوم و بعد امي طلعت مع اخواني و خلا لي الجو و دخلت الشات مرة ثانية و بعد لقيت هالشخص و جلست اسولف معاه و لكن سوالفنا كانت عادية يعني شوفي فلان شنو يقول بالعام و شوفي فلانة شنو ردت عليه يعني اشياء بسيطة ما فيها امور خاصة, و انا اطالع العام شفت واحد اسمة امير القلوب انصدمت و قلت معقولة يكون هو لاني كنت اشوف وحدة تقول له خالد انصدمت و ما كنت مصدقة و على طول دخلت معاه خاص

​

* توتة: انت اسمك خالد؟
* امير القلوب: اي نعم امريني اختي؟
* توتة: ما يامر عليك عدو اممم انا اتوقع اني اعرفك.
* امير القلوب: يجوز لأني ادخل الشات هنا كثير.
* توتة: طيب انتي ايميلك ......@... ؟
* امير القلوب: لأ ليش؟؟
* توتة: متأكد؟؟
* امير القلوب: اكيد متأكد ليش؟
* توتة: لأن هذا ايميل واحد اعرفة ساكن في المنطقة الفلانية و عمرة ..
* امير القلوب: لا اختي اكيد انتي غلطانة انا مو الشخص اللي قاعدة تتكلمين عنه.
* توتة: اها. <<<<< شاكه فيه
​

ما طولت معاه و كانت محدثتنا جداً قصيرة لانه كان قليل الكلام و لكني كنت اكاد اقسم انه هو خالد اللي انا اعرفة لاني بكل بساطة كنت صغيرة و اشوف العالم من منظار البرائة و ان ما في ناس نفس خالد وايد, المهم ظليت اسولف مع الشخص الثاني و بعدين طلعت قبل ما امي تجي و طبعاً انا ما قلت حق نوف عن النت و عن الشات لأني كنت للحين خايفة من ردة فعلها, و في المرة الثالثه بعد كلمني هالشخص و لكن كلمني معاه واحد اسمة حمد, حمد هذا كان يدرس علم نفس و بصراحة انعجبت فيه لدرجة اني نسيت هذاك الشخص اللي كل مرة اكلمه و قعدت اكلم حمد ويوم جيت بطلع ما جاني قلب اني اطلع بدون ما اتواصل مع حمد و طلبت رقمة عشان نتواصل مسجات و هو ما مانع على طول عطاني الرقم بكل رحابة صدر و في هاليوم اول ما طلعت من النت و دخلت الغرفة ابي احفظ رقم حمد بتلفوني سمعت صوت الباب تسكر و كانت امي, على طول حفظت الرقم و خبيت الورقة اللي كتبت عليها الرقم في شنطتي و ما رسلت لحمد مسج و طلعت اسلم على امي و جلست اسولف معاها و بعد كم دقيقة رجعت الغرفة و ظليت واقفة و محتارة ارسل لحمد وله لا و شنو ارسل له يا ترى؟؟ و بعد صراع مرير بين اي و لا؟ ارسلت له


هلا حمد انا هند اللي كلمتك مساعه بالشات على فكرة انا ما قلت لك تراني دبة و اذا الوضع مو عاجبك امسح رقمي من فونك و لا كأن صار بينا شي

يا ترى شنو صار مع هند؟؟

بتستمر مع حمد وله بتدور لها واحد ثاني؟؟

احداث مثيرة في الجزء القادم ان شاء الله انتظروني:37:

​

 

[حصاد الالم]

استمري والله معاك

مدري احس هنوده بدت تدخل عالم غريب عنها عشان كذا راح توقف بس بالوقت الغير مناسب

يعني بعد فوات الفوت

الموهيم عندي سؤال كان يقرقع في بطني كثيييييير من يوم بديت اقراء القصة

ذكرتي ان هند كانت مريضه وماتقدر تلعب جمباز وبعدين اشتدت حالتها وسوت عمليه

هنا السؤال وش نوع مرضها او وش كان مرضها ؟؟؟

هههههههه حرييييييييييييم لازم نعرف

 

[حلا شرقي]

لا حبيبتي ليش يصيبك احباط القصه عاجبتني وعاجبني هبل هنووووووود بس انا الفترة اللي طافت مشغوله يدوب اقرأ البارت اللي تنزلينا فقررت اني اعلق بعدين......
وهند هذي ماتوب ماكفاها اللي صار وبصراحه هم امها غلطانه يعني البنت ناقصها حنان مولاقيته لا من أبوها ولا من أمها والبنت اللي ماتشبع حنان عندهم بالبيت بتدور عالحنان بره البيت.........
ها عزيزتي راح الاحباط ألحين.......

 

[محبة الطاعات]

بسم الله الرحمن الرحيم

السلام عليكم و رحمة الله و بركاتة

​

حصاد الالم

هههههههههههههههه و الله اني سؤالج ضحكني مع اني كنت متوقعة في احد بيسألني اياه

بس يوم قريت ردج قعدت اضحك

عسى ربي يسعدج

المهم انا ما اقدر اقول شنو المرض بالضبط بس

هو مرض بالبطن و بسببة ما تقدر تشيل شي ثقيل

او تلعب رياضة بقوة اتمنى اكون رويت فضولج:5:
و مشكورة على المرور حبيبتي :37:

​

حلا شرقي

ريحتيني الله يريحج الصراحة كنت وايد متحمسة ابي اعرف

يعني انا برايي انه هند غلطانة بس مهما يكون احسها في ذاك الوقت كانت مراهقه

و المراهقات بطبعهم متهورات و مشكلة اذا البنت لقت الدافع و هو معاملة امها

انا معاج 100%

و مشكورة على مرورج غاليتي :5:

​

بحاول انزل اليوم بارتين او 3 و يمكن انقطع بعدها

لاني مثل ما قلت لكم بننتقل بيت جديد و النت بينقطع

و ان شاء الله اول ما يرجع النت بكمل الراوية و اليوم اخر يوم اقدر استخدم فيه النت

السموحة منكم عزيزاتي​

 

[نبضة فرح]

محبة الطاعات ... زادك الله حباَ في الخيرات...
صراحة لاأخفيك أنني دائم أرى روايتك في المقدمة ...
وينتابني الفضول لقرآءتها ...
وأخييييييييييييييييييراً وصلت لكم ...
رائعة كروعة أناملك ...
مشوقة كتشويق أسلوبك...
بالإنتظار ...
والله ينزلكم المنزل المبارك ....

 

[عشق الفراق]

محبة الطاعات تبين الصراحة انا سجلت في المنتدى خصوصي لروايتك ..​

احب اشكرك على التميز في الطرح و سلاستك في اختيار المفردات << بصراحة رواية و لا اروع ​

تسلم اناملك على هذا الكم من الابداع​

و الى الامام دائما :icon26:

​

 

[محبة الطاعات]

بسم الله الرحمن الرحيم

السلام عليكم و رحمة الله و بركاتة

​

نبضة فرح

مشكورة حبيبتي على مرورج اللي بعث فيني الروح الأيجابية

و ان كانت رواياتي فالمقدمة فهذا بسببكم انتو

يا عضوات مملكة بلقيس

و بسبب ردودكم اللي تشجعني و ترفع لي الموضوع​

محبة الطاعات ... زادك الله حباَ في الخيرات... <<< أجمعين يارب
​

مشكورة حبيبتي اسعدني كلامج و اسعدتني بصمتج في رواياتي :37:​

عشق الفراق

وااااااااااي :5:احراج :5:

الصراحة ما اعرف شقول لج صج صج انعقد لساني

مشكورة يا الغالية على مرورج الي اثلج صدري و الله يسلمج يارب :37:

آسفة جداً جداً لاني ما وفيت بوعدي وياكم

و ما قدرت انزل حتى لو بارت صغيرون بس

صج صج كان بيتنا حوسه اخر يوم و كان عندي شغل حق الجامعه و للأسف ما قدرت اكتب شي مخي كان موقف

على العموم انا داخله من كمبيوترات الجامعه الحين و بحاول انزل لكم الي اقدر عليه

لغاية ما يرجع النت في بيتنا و السموحة منكم يا الغاليات :37:​

 

[محبة الطاعات]

بسم الله الرحمن الرحيم

رسلت المسج و انا مثل الحلمانه و كنت حاسة انها كلها دقايق و بفوق و بالفعل كلها دقايق و فقت على صوت رنة فوني معلن وصول رساله جديده, فقت على واقع يديد و على بداية يديدة بداية لمشوار الضياع و الأستهتار, لا شعورياً هزيت راسي بالنفي و قلت في قلبي:"بشوف المسج و بمسحة و بمسح رقم حمد انا مو جي انا بنت محترمة" و يوم شفت المسج


هلا و الله هنود نور تلفوني برسالتج الغالية بس عندي تعقيب بعد اذنك احنا ما صار بينا شي للحين عشان تقولي انسى اللي بينا, و بعدين حلوة الصراحة يعني بخصوص انك دبدوبة ترى على فكرة هذا الموضوع ما يهمني اهم شي عندي اخلاق البنت و بما انك صريحة معي انا بعد بكون صريح معاكي من البداية ترى انا اعرف بنات كثير و انتي وحدة منهم, انا قلت لك مو عشان شي .. بس عشان اني بحكم دراستي احب اتعرف على نفسيات الناس و في الختام احب اقولك اذا انتي الي حابة تكملي معي ردي لي مسج و اذا مو حابه ما ابغي اضغط عليك تراكي عزيزة و غالية


بيني و بينكم كلامة كان كبير و كان يخفي معاني كثير بين السطور بعدين فهمتها لكن مثل ما قلت لكم تراني بعدني خام في هالعالم الكبير, في البداية بعد ما قريت المسج خفت و قلبي دق بقوة و لكني بكل غباء و جهل قلت في قلبي:"اكيد بقدر اغير وجهة نظره و بخليه يكره البنات خصوصاً و ان موضوع الوزن مو هامه يعني خلاص انا بقدر عليه" و رديت عليه


مو مهم تعرف بنات و له ما تعرف, مثل ما انت تهمك الاخلاق فأنا ام الاخلاق كلها و بعدين لا تنسى ان احنا اصدقاء لأن مثل ما قلت لك ما في بيني و بينك الا مسجات يعني ممنوع اكلمك بالفون و الأصدقاء هم اللي يتراسلون بالمسجات اما اللي يحبون بعض هم اللي يتكلمون بالفون و الصراحة انا حاسة نفسي بعدني على الحب


و كلها دقايق الا يرسل لي


ههههههههه قوية يا هنود, هههههه على العموم بمشيها لك .. الا تعالي هنا معقولة وحدة زيك لسه ما حبت و لا جربت الحب؟؟؟


انصدمت لأنه فهم المسج المبهم و لو ان الموضوع كان واضح بس ما ادري ليش كنت متوقعة انه ما بيفهم على العموم ظليت اسولف وياه بالمسجات و سبحان الله حسيت بشعور بالآمان او الاستهتار ما ادري بس تفكيري وقتها كان في امي كنت حاسة اني مو خايفة منها و ابي اتحداها و طلعت عند باب غرفتي و ظليت اسولف و اسولف وياه و في لحظة رفعت راسي و شفت امي مارة علي بسرعه و داخله الغرفة خفت و انرعبت و ضميت تلفوني بقوة لصدري و كلها دقايق الا يرن تلفوني (مسج جديد من حمد) صرخت و رميت التلفون على الارض و امي طلعت لي تركض

​

* ام احمد(خايفة): شفيييييييج؟؟؟؟
* هند(تحاول تاخذ تلفونها بسرعه):لا .. لا و لا شي.
* ام احمد(تايهه): عيل ليش صرختي؟؟؟
* هند(ترقع): طاح تلفوني و خفت ينكسر لأنه طاح برا الغرفة. <<<< برا الغرفة كانت الارضية رخام
* ام احمد: ههههههه الله يخس بليسج ما انتي ياما طاح تلفونج بالأرض هذي مو اول مرة.
* هند: بس هذي اول مرة يطيح برا الغرفة.
* ام احمد(بعصبيه): و ليش واقفه عند الباب تطرين مثلاً(تطرين=تشحتين)؟؟؟؟
* هند: ههههههههههه اي مو انا شحات الغرام قاعدة اطر حب ممكن تعطيني شوية حب لو سمحتي.
* ام احمد: الله يشفيج!!!
* هند: يماااااا صج صج ضميني اريد حباً و حناناً.
​

ما قصرت امي و دزتني(دفتني) و انصدمت بالجدار على خفيف و ظليت اضحك و اضحك و اضحك لأني لأول مرة بحياتي ما اخاف من امي و انا قاعدة اسوي شي غلط و من يومها ما قمت اخاف منها و هذا هو السبب في تهوري و بعد هالحادثة ما قمت اخاف من امي و قمت اقعد اكلم حمد و هي قاعدة جمبي بالمجلس و ظليت كل يوم ادخل الشات المغرب و امي تكون قاعدة بالمجلس معاي بس انا كنت متهورة و بايعتها من قلب و بعد يومين على هالحال قررت اني اغير رقمي(خط التلفون) و اشتري لي رقم حلو و هذا اللي صار و وقتها كان ابوي جاي البحرين زيارة و كان طالب يشوفني يبغي يتطمن علي بعد العملية و كانت هذي اول مرة اشوف ابوي فيها بعد غيبة طـــــــويــــــلـــــه
و امي حددت الموعد, المهم في الفترة اللي غيرت فيها رقمي و قبل ما اروح حق ابوي كنت ارسل مسجات حق حمد و ما كان يرد علي و ما كنت اقدر ارسل من رقمي القديم لأن ما كان عندي رصيد و ظليت محتارة و لكن في اليوم اللي قبل ما اروح فيه لأبوي

وله تدرون خلوها لغاية البارت الجاي

السموحة منكم على البارت الصغير و ان شاء الله اعوضكم المرة الجاية بس انا الحين بالجامعه و ما اقدر اكتب اكثر :37:


​

 

[ديم..]

قصه رووعهـ واسلوب ارووع
تسلم الانامل

في انتظارك....

 

[حلا شرقي]

مبروووووووووك
السكنه الجديده والله يجعلها سكنه مباركه وبانتظارك ولاتظغطين على نفسك احنا عاذرينك وماورانا شي ...

 

[عشق الفراق]

محبة .. الله يرضى عليك ليه كذا، حرام عليكي ؟؟

عالعموووم ما الجزء الا مواصلة لابداعك

واااضح انك انسانة ذوووق هذا الشيء باين من طريقة سردك للاحداث ..الله يخليك

لا تظغطين على نفسك كثير خذي راحتك و احنا ايش ورانا ننتظرك حبيبتي

اتمنى لك التوفيق و السعادة و ان تنالي رضا الله في الدنيا و الاخرة

​

 

[سمراء بلادي]

محبة الطاعات يالغالية ربي يجعل عتبة السكن الجديد عتبة مباركة وان شاء الله تشوفون كل الخير بوجوهكم وبالنسبة للقصة احنة بالانتظار ومن رائع الى اروع وتسلمين

 

[ديم..]

مبروووووووووك السكنه الجديده والله يجعلها سكنه مباركه وبانتظارك لا تتطولين الغيبه

 

[قطوه قطر]

مبدددددددددددددددددعه من قلب واسلووووووبه كلمه روعه شوي عليه
بانتظارج

 

[محبة الطاعات]

بسم الله الرحمن الرحيم

في اليوم اللي قبل ما اروح فيه لأبوي كنت متضايقة لأن صار لي كم يوم ارسل لحمد و هو ما يرد علي و كنت خايفة انه يكون زعلان علي مع ان اخر مرة كلمته فيها كان مو زعلان و ما كنت عارفة السبب و من كثر التفكير زهقت و قررت على المغرب اني اضيع وقتي عالشات كالعاده.

و هاليوم كان غير عن كل الأيام لأن في هذا اليوم تعرفت على واحد اسمه ناصر و جنسيته سعودي, خلوني اوصف لكم ناصر شوي لانكم بتعيشون معاي و معاه مدة طويلة شوي ناصر كان اسمراني, و شعرة طويل لغاية رقبتة و لونه اسود, و عيونه وساع و لونها بني, و قصير, و جسمة رياضي, و خشمة طويل ,و كان وسيم و حلو .. طبعاً اول ما كلمته كنت زهقانه و باسلوبة شدني ناحيته في البداية ما وصف لي كل هالأوصاف كان وصفه لنفسة قليل مقارنة مع اللي قلته لكم توني المهم مع السوالف انشديت له و حسيت ان حمد ولا شي تحته كان عليه اسلوب يخلي اي بنت تسوي له اللي يبغيه, و شوي شوي جرني ناحيته لغاية ما اخذ رقمي و اتذكر اني عطيته رقمي الجديد و انا وافقت اني اعطية الرقم لأنه قالي انه خاطره تستمر علاقتنا اكثر و هو علاقتة بالنت مو قوية و ان اللي خلاه يدخل الشات هو ولد عمه اللي جالس جنبه الحين و هو اصلا ما يستخدم النت كثير و كان كلامة صحيح لأني بعدين اكتشتفت انه ما يعرف يفرق بين الأيميل و الشات, المهم انا عطيتة رقمي و طلبت منه ان تكون علاقتنا مجرد مسجات لأني ما ابي اكلم اولاد و هو احترم رغبتي و وافق على طلبي اتذكر اني كنت فرحاااااانة ان اهو اللي طلب رقمي مو انا اللي طلبت رقمة نفس حمد و اتذكر اني اول ما طلعت من الشات و سكرت الكمبيوتر و لقيت رنته شهقت من كثر الفرحة, نسيت اقول لكم شي هالمرة ما نطرت اني اخذ رقم ناصر عشان اصارحة بموضوع اني دبدوبة مثل ما سويت مع حمد لا, اتذكر اني من عقب ما سولفت معاه بالشات شوي على طول قلت له:"شوف تراني دبة و ما ابي اخبي عليك الموضوع من الحين لو ما يعجبونك السمينات او بتقولي بعد ما تستمر علاقتنا مدة ضعفي من الحين اقول لك مع السلامة" حسيت انه فهم كلامي غلط في البداية بس بعدين غير نظرتة لي.

كنت فرحانة بعلاقتي الجديدة و اتذكر يومها اني سولفت مع ناصر طول الوقت و بصراحة ما اخبي عليكم ناصر سرق عقلي نساني امي و ابوي و اخواني و العالم كله و حسيت لأول مرة ان قلبي دق لأنسان و حسيت اني حبيته اكثر من اي شي بالعالم و اني ما ابي افقدة المهم نمت في هاليوم و كنت سعيدة و حاسة نفسي اجمل و اسعد وحدة بالكون كله, و معرفتي بناصر خلت عندي ثقة مو طبيعيه بنفسي.

صبحت اليوم الثاني و فتحت تلفوني و اتذكر يومها كان اجازة و استغربت يوم سمعت مسج جديد واصل لي و يوم فتحت المسج انصدمت كان مسج من ناصر يصبح علي فيه و كان المسج فيه كلام حلو و قلت في قلبي
​

* هند: معقولة يكون حس فيني و حس اني حبيته :5: .. هذي اول مرة واحد من اللي عرفتهم يرسل لي مسج من الصبح فيه هالكلام الحلو هذا, غريبة .. ايه عليه فديته نصوري, بيه هنود اصحي اكيد انا صار لعقلي شي اي حب و اي خرابيط و انا ما عرفته الا من امس.​

رديت عليه بمسج حلو و يوم وصل له المسج رد علي


صباح الورد و الفل على عيون حبيبتي شخبارك يا عسل ان شاء الله امس نمتي كويس مع اني الصراحة ما قدرت انام بس المهم عندي انتي كيفك؟


خفت عليه و حسيت بقلبي قام يرقع بقوه من الخوف و على طول رديت عليه


حبيبتك ؟؟؟ نصوري تكفى شفيك ما قدرت تنام لا تخرعني عليك؟؟


رد علي​

فديتهم اللي يخافون علي انا, سلامتك يا قلبي من الخوف كل ما في الموضوع ان في وحدة كانت شاغله بالي امس و من كثرة التفكير فيها ما جاني نوم بس هذي القصة و الحكاية كلها


عقب كلامة هذا تطمنت عليه و حسيت نفسي ارتحت و رجعت اسولف معاه عادي و طلبت منه انه ما يرسل لي مسجات في الوقت اللي بكون فيه عند ابوي و يوم سألني عن السبب قلت له اني بكون عند صديقتي.

و في الوقت المحدد رحت عند ابوي ما اخفي عليكم كنت حدي متحمسة اني بشوفة و كنت طايرة من الفرح مع اني كنت حاسة اني ما بتهنى بالشوفة المهم على المغرب تكشخت و رحت مع امي لأبوي و كان ابوي ساكن في فندق فخم و خمس نجوم كنت مو عارفة شنو اسوي كنت حاسة روحي اني لو كنت عروس ما بكون خجلانة مثل خجلي في ذاك اليوم :5::5: و صلنا عند الفندق و امي اتصلت على ابوي عشان يجي ياخذني لأني ما ادل و هو ما يعرف شكلي لو كنت بنتظرة بهوول الفندق, و عقب ما اتصلت سكرت تلفوناتي لأني ما كنت ابي ازعاج من اي احد وقتها نسيت حمد و ناصر و العالم كله و تركيزي انصب على باب الفندق.


و كلها دقايق الا يطلع واحد من الباب اول ما شفته فز قلبي و قلت في داخلي:"اي هذا اهو .. هذا هو حبيبي .. هذا اهو اللي حفظته من صورة بدون ما اشوفة .. هذا العزيز الغالي .. هذا عزوتي و ناس و اهلي كلهم .. هذا اللي عمري ما بقدر انساه كفاية اسمة اللي مصاحبني بكل مكان هند بنت ..... وه فديت هالطول و هالعرض" كل ما كان يقرب من سيارتنا خطوة كان قلبي تزيد دقاتة ما ادري ليش وقتها كنت حاستة بياخذني باحضانة مثل ما اي اب لما يسوي حق بنتة لكني انصدمت يوم شفته تقدم بخطوات ثابتة ناحية شباك امي و طق على الشباك و قال لها بصوت كله رجوله و خشونة:"هلا و الله بالغالية, الا وين هند؟؟"

آآآآآآآآآآآآآآآآآآآآآآآآآآآآآه يا قلبي الي انكسر و اي كسر؟؟ كسر للحين ما ترمم منه كيف ابوي و ما يعرفني ما عندة احساس ما عندة شعور انا بجن ابيه و هو مطنش عادي عنده لهذي الدرجة و الله و الله و الله وقتها كنت مستعدة ابيع حمد و ناصر و كل اللي عرفتهم لو انه قال لي بس حبيبتي ما ابيه يضمني ما ابيه يبوسني ما ابيه يمسك ايدي ما ابي يسوي لي اي شي كنت عطشانة ابي حب ابي حنان ابي عاطفة حرام عليكم و الله حرام تراني بشر, و بدون شعور شهقت و صرخت بفرح:"بــــــــــيــــــــه" بيني و بينكم للحين كان عندي امل, يمكن يكون للحين ما انتبه لي او ما شافني .. التفت علي ابوي بنظرات باردة و سريعه و كانها رصاص انغرس في قلبي و قتلتني و قال ببرود العالم كله:"اي هلا هلا" و لف وجهه ناحية امي و كمل كلامة:"يلا نزلوا و عطوني مفتاح السيارة عشان يركنونها لكم" آآآآآآآآآآآآآآه معقولة لأول مرة بحياتي احس روحي يتيمة و امي و ابوي عايشين تحطمت و كلمة تحطمت شوية على شعوري اللي حسيت فيه انا كنت مهشمة بقايا انسانة, انسانة انحكم عليها تشوف كل اللي حواليها سعيدين الا هي اخواني عندهم امي و انا امي ما تحبني و الحين ابوي, ابوي الأمل اللي كنت عايشة عليه سنين و كنت اكذب على نفسي و اقول انه يحبني طلع كل هذا اوهام و احلام و انا في ضياع و حيره سمعت امي تقول له:""انت مو تبي تشوف بنتك؟؟ هذي بنتك اخذها و لما تخلص خبرني عشان اجي اخذها" قال لها بصوت مليان بالصدمة:"و انتي ما بتنزلين؟؟؟" لما سألها هالسؤال تذكرت كلام امي و خالتي سعاد لما قالت لها ان ابوي يبي يرجع امي و انه قاعد يتحجج بأي شي عشان يكلمها و امي كانت رافضة لأن ابوي راعي حريم و مغازلجي و انه لأنه صار غني مو هامه شي بالعالم يسافر وقت ما يبي و يرجع وقت ما يبي بايعها بالمختصر ما تبيه وقتها قلت في نفسي:"معقولة اكون انا اي شي اللي تتحجج فيه يا يبا افا و الله ما توقعت اني اكون بالنسبة لك اي شي" و صحيت على صوته يناديني انزل عشان اروح معاه و قبل ما انزل مشى عني و انا لحقته بسرعه و امي مشت و خلتني معاه.

معاه حسيت نفسي ولا شي و كاني هوا بالنسبة له كان يمشي و ما يلتفت يشوفني وراة و له لا و لما وصلنا عند المصعد وقفت جنبة و التفت علي نظرة سريعه و رجع ينتظر لما دخلنا المصعد رجع يناظرني بهدوء و قال بصوت واطي:"عيونج مثل عيون جدتج و اسنانج نفسي" و ابتسم و انا ابتسمت له بهدوء و رجعت اطالع الأرض و طول ما احنا بالمصعد كان تجي لأبوي مسجات بالتلفون و وصلنا غرفتة و اول ما دخلت الغرفة كان شكلها غرفة فخمه و كان في على الطاولة اول ما دخلت تفاح

​

* ابو احمد: هند البيت بيتج حياج استريحي و انا بروح اغسل ايدي لأني توني ماكل تفاح لو تبين تاكلين الصحن موجود على الطاولة.
* هند: اوكي.​

و تأخر ابوي بالحمام و كنت اسمع صوت تلفونة شغال بالمسجات و قعدت شوي الا طالع ابوي بملابس ثانية و قال لي

​

* ابو احمد: شرايج نروح الكافية اللي جنب الفندق نتفسح شوي؟؟
* هند: اوكي.​

بيني و بينكم انصدمت يعني هو ما قال انه يبغي يفسحني هو قال انه يبغي يتطمن علي و يسولف معاي و انه بنقعد بالفندق, المهم رحنا الكافية و طلبنا قهوه و جلسنا على طاوله و ابوي مسك التلفون و ظل يرسل في هالمسجات و المسجات تجية و انا حالي من حال الكراسي و الطاولات و عقب شوي قالي ابوي شوفي شوفي كانت في وحدة قاعدة بالطاولة الي جنبنا و كانت لوحدها شغل ابوي من تلفونه رنه تصفير و كان يتحرش فيها و يضحك حسيته طفل عندة 10 سنوات طاح من عيني و ما كنت متوقعته جي و ظل يتحرش في هالحرمة لغاية ما تركت المكان و رجع لمسجاته و عقب شوي دخلت وحدة و جلست وراي حسيت فيها و كانت مواجهه ابوي و رفع ابوي راسة ناحيتي و كأنه يطالعني لكنة كان يناظر الحرمة اللي وراي و يتبسم لها و يرسل مسجات ما ادري ليش حسيتهم متواعدين لأن يوم جينا بنمشي الحرمة لحقتنا لغاية الفندق و جلست بالهوول, طبعاً احنا صعدنا للغرفة و ابوي اول ما دخلنا بدون ما يستشرني اتصل على امي و قال لها تجي تاخذني.

و الصدمة يوم يطردني ابوي من الغرفة قال لي:"هند نزلي انتظري امج بالهوول و اول ما توصل اتصلي علي" و اخذ رقمي و عمل لي رنة و انا فتحت تلفوني و حسيت بحزن عميق و بهم ما يعلم فيه الا رب العالمين و نزلت الهوول و انا قاعدة انتظر اكتشفت ان ابوي كان مخطط انه يشوفني انا و امي و يحاول فيها و يخليني اضغط عليها انهم يرجعون لبعض بحكم اني بنت و بحكم اللي صار لي من مرض بس لان امي ما نزلت غير مخططاته و راح الكافية يشوف صديقته و انا افكر شفت الحرمة اللي كانت في الكافية رايحة ناحية المصعد و صعدت انا انصدمت بس توقعت هالشي و كلها دقايق الا امي واصلة و اتصلت على ابوي و كلها ثواني الا هو فوق راسي و قال لي يلا و اخذني عندها انا صعدت السيارة و وقف ابوي يكلم امي و يشكرها انها خلته يشوفني و هم يسولفون انا فتحت تلفوني القديم و شفت مسج.

المسج كان من حمد


كذا يا الخاينة تنسيني و تنسين حمد افا بس افا انا تنسيني بس هين انا اراويك


انصدمت من الطريقة اللي مكتوب فيها المسج و لا ارادياً رديت عليه من تلفوني القديم لأن كان فيه رصيد لمسج واحد بس


انا غيرت رقمي و الله ثم و الله اني ارسل لك كل يوم و انت اللي ما ترد على العموم رقمي الجديد +973.........


و رسل لي مسج على تلفوني الجديد


طيب يعني اذا انتي ما تبين تعطيني رقمك الجديد ليش ترسلين هذا المسج؟؟؟


و عرفت المشكله يوم رسل لي مسج على تلفوني الجديد انا كنت حافظة رقمة غلط و المسجات كانت ما توصل له من جي ما كان يرد علي و رديت عليه من رقمي الجديد بعد ما صلحت المشكلة


اولا انا كنت ارسل لك و لكني الحين اكتشتفت اني كنت حافظة رقمك غلط لما رسلت لي انت و الرسايل ما كانت توصل ثانيا شنو هاللهجة الي قاعد تكلمني فيها؟؟؟


و رد علي


كذابة و مراح اصدق لو ايش تعملي لأنك تحبيني و اللي تحب واحد تسوي المستحيل عشان توصل له و بعدين انا ما ارد عليك المفروض تعرفين ان في مشكلة مو تخليني كذا يمكن مت


عصبت يوم قالي كذابة و الصراحة فكرت في ناصر و قلت اني بقطع علاقتي فيه و خلاص بستمر مع ناصر احسن لي من هالانسان اللي ما عندة ريحة الأدب


و انت شدراك اني احبك؟؟ شنو هالثقة ؟؟ و بعدين قلت لك احترم نفسك و لا تكلمني جي


و رد علي


أحترم نفسك كمان .. طيب انا بثبت لك انك تحبني و بخليك تحفين وراي شوفي انا ما ابي اشوف رقمك بجهازي مرة ثانية فاهمه و لا ابي اسمع طاريك زين وله لا؟؟

عصبت و انقهرت حسيت روحي منحطة اللي اكلم هالأشكال و يوم وصلت البيت بعد ما تلاقت علي الاحزان و الهموم جلست على سرير حامل همومي و بكييييييييييييت لغاية ما نشفت دموعي لكن قلبي كان يغلي و كان لازم اسوي شي ثاني يبرد علي لاني بجد كنت حاسة روحي بنجلط

يا ترى شنو سوت هند؟؟

انتظروني في الجزء القادم احداث مثيرة في الطريق:37:​

 

[مسك الشهادة]

أسأل الله ان يجعل سكنك الجديد
فاتحه خير عليكِ​

 

[ديم..]

يؤيؤيؤ كملللللللللللللللللي فدييييييييييييتك

 

[محبة الطاعات]

بسم الله الرحمن الرحيم

السلام عليكم و رحمة الله و بركاتة

ديم

فديتج انا

الله يبارك فيج حبيبتي و مشكورة على المدح احرجتيني

و البارت الجاي في طور الأنشاء :26:

مشكورة حبيبتي على مرورج منورة الرواية :37:

حلا شرقي

الله يبارك فيج يا الغالية

اسعدني تواجدج و مرورج :37:

عشق الفراق

مشكورة حبيبتي و اجميعن ان شاء الله

و على فكرة انتي الذوق كله

و مشكورة على المرور حبيبتي :37:

سمراء بلادي

فديتج انا يا الغلا

و الله يبارك فيج يا رب

و مشكورة على المرور حبيبتي

قطوة قطر

فديتج انا حبيبتي

و ردودج اللي فيها الابداع كله

يسلمو حبيبتي على المرور :37:

مسك الشهاده

امين يارب

و مشكورة على المرور حبيبتي :37:

​

 

[محبة الطاعات]

بسم الله الرحمن الرحيم

ما ادري كيف ما حسيت بنفسي الا و انا قاعدة اتصل على ناصر و اول ما رن التلفون جنيت و سكرت الخط و قلت


* هند: انا ما ابي اكلمه لازم انتظر لو كلمته اكيد بيقول عني ما صدقت, لازم اتريث شوي مو زينه العلاقات السريعه و كفاية حمد توني متخانقة معاه و تركتة خلني اصبر على هذا شوي لغاية ما اطيحة بشباكي .....


و قبل ما اكمل كلامي رن تلفوني و قبل ما ارد او حتى اشوف من المتصل على طول سكرت الخط بوجه اللي متصل و خبيت التلفون تحت المخدة لكن كلها ثواني الا واصل لي مسج و شوي شوي رفعت التلفون بشوف المسج


شفيك يا قلبي تتصلين و قبل ما ارد عليك تغيرين رايك و تسكرين الخط بوجهي و يوم اتصلت عليك ما رديت و سكرتي الخط بوجهي على العموم انا اسف لو ازعجتك


و المسج كان من ناصر استوعبت وقتها ان ناصر كان جنب التلفون يوم اني اتصل عليه من جي كان رد فعله سريع ما ادري ليش حسيت بالندم و كتبت له مسج


لا حبيبي بالغلط انا كنت قاصدة اتصل على صديقتي و اتصلت عليك بالغلط السموحة و ترى يوم سكرته كنت احوس بالتلفون ادور رقم صديقتي باتصل عليها و انت اتصلت من جي تسكر


و كلها دقايق الا يرد علي


هههههههههههه الله يرج بليسك يا هنود ليكون حاطة اسمي بفونك باسم بنت عشان كذا خربطتي ههههههههههههه على العموم حصل خير, بس تدرين انا بصراحة خاطري اسمع صوتك تسمحي لي اتصل عليك الحين؟؟


لما شفت المسج قلت في داخلي شنو هالنشبة مع اني كنت ابي اكلمة و محتاجة احد اسولف معاه بس الخجل كان غالبني و قررت اني افضفض له


وي فديتك خلاص وعد باجر اخليك تكلمني بس اليوم ما اقدر لأن نفسيتي تعبانة شوي


و رد علي


افا عليك بس .. جعلني اروح فدوة لعيونك, وش فيك يا قلبي طمنيني لا تخليني خايف عليك؟؟


و رديت عليه



لا و لا شي لا تخاف الموضوع مو مستاهل بس مشاكل مع الاهل و الصراحة انا بقول لك اليوم انا قطعت علاقتي بحبيبي قل ادبه علي و انا تهاوشت معاه و قال لي مسحي رقمي من تلفونج


ادري اني كنت غبية و الكلام هذا المفروض ما ينقال بس انا كنت متضايقة و هو الوحيد اللي كان متاح جدامي و يوم قلت جي كان بنيتي اني افرد عضلاتي عليه و ابين له اني ابيع بسهوله عشان ما يغلط علي نفس حمد و قلت له سالفة حمد و شلون تعرفت عليه بس لعبت بالتواريخ شوي و طولت مدة معرفتي بحمد و على اساس اني احبة و اليوم تركتة و رد علي ناصر


احسن اللي ما يقدرك لا تقدرينة و بعدين حبيبتي تبغي الصراحة انا تضايقت يوم عرفت انك كنتي على علاقة بواحد قبلي بس الحمد لله ان علاقتكم كانت بس مسجات و الصراحة انا حاط عيني عليك و بودي تكوني نصي الثاني و اعيش الحب معاكي, تسمحي لي؟؟ بس شوفي لو وافقتي انا من الحين اقول لك انا عندي شروط اهمها انك تكوني لي لوحدي و لا حد يشاركني فيكي و لو وافقتي اتمنى انك تشتري دبلة و تلبسيها عشان محد يفكر فيك, ايش رايك؟


انصدمت من كلامة و ما كنت متوقعه ان علاقتنا بتتطور بهالسرعه هذي كلها و بكل سرعه رديت عليه و بدون تفكير قلت


موافقه


و رد علي


فديتج انا ههههههههههه شفتي كيف صرت اتكلم بحريني لأجل عيونك, على العموم حبيبتي بعد في شي ثاني انا ابغي اللي اخاويها تكلمني بالفون انا ما اقدر استمر كذا.


و رديت عليه


طيب بس انا قلت لك اليوم نفسيتي مأساة خليها بكرة ان شاء الله وعد اني بالليل اتصل عليك و اسمعك صوتي .. راضي عني؟؟


و رد علي


اتم الرضى يا حياتي اتم الرضى


و ظليت اخطط كيف اني اكلمة باجر بالليل بدون ما احد يشوفني و نسيت حزني و همي و ظليت اخطط.

و في اليوم اللي بعدة على الساعه 11 الكل كانو نايمين و انا لوحدي صاحية و استعد اكلم ناصر اتذكر اني اول شي تأكدت ان البيت كله فاضي و شوي شوي تسحبت على المطبخ و سكرت انوار المطبخ عشان اخذ راحتي و اتصلت له رنة و سكرتة من الخوف و لكن كلها دقايق الا يتصل علي و كانت ايدي ترجف و وجهي احمر و لكني ضغطت على زر الرد و سمعته يقول بصوت رجولي ناعس و فيه بحه :" الوووووو" انا هني حسيت برجولي ترجف و ايدي ترجف و ما قدرت اوقف و طبيت على الأرض و ما قدرت اتكلم و ظل هو يردد:" الووووو .. الوووو" و سكر الخط و رسل لي مسج

هنود وينك ليش ما تردي علي؟؟؟


و انا طنشتة اتذكر اني من التوتر اللي كنت فية كنت حاسة نفسي مو مركزة بشي ابد و رجع اتصل و هالمرة رديت بسرعه و قبل ما يتكلم سبقته و قلت
​

* هند: الووووووو.
* ناصر: يا بعدي هالصوت و الله .. يا لبى قلبك انا.
* هند(بخجل و دلع العالم كله و بصوت مو مسموع): آسفة.
* ناصر(بنفس الصوت الناعس المليان رجوله): على ايش يا حياتي ما حصل الا الخير.
* هند(بنفس الوضع اللي قبل+رجفه باينه): هذي اول مرة اكلم فيها ولد و عمري ما سويتها صدقني انت اول واحد بحياتي.
* ناصر(بصوت مطمن): يا قلبي عليك .. باين مو لزوم تأكدين فديتك انا بس يا ريتك تعلي صوتك شوي ماني سامعك كويس.
* هند: ما اقدر اخاف احد يصحى من اهلي.
*ناصر: اها طيب اذا كذا المهم اني سمعت صوتك خلينا نرجع للمسجات .. اوكي؟؟
* هند: اوكي.
* ناصر: طيب طلب اخير قبل ما اقفل الخط.
* هند: امر؟؟؟
* ناصر: ابيك تقولين لي احــــــــــــبـــــــــــك.
* هند: ههههههههههههه ......
* ناصر: انا قلت احبك مو اضحكي جعل هالضحكة اللي ذوبتني دوم.
* هند: ما اقدر لا تضغط علي قلت لك هذي اول مرة اكلم فيها ولد.
* ناصر: طيب و انا مالي غلا في قلبك؟؟ ابي اسمعها تكفين.
* هند: طيب .. طيب, بحاول ... أ حـ ـبـ ـك.
* ناصر: هههههههههه طيب جمعيها الحين و قولي احبك احبك.
* هند(بقمة الانوثة و الدلع): نـــــصــــــوري.
* ناصر: لا لا ماني متنازل لا تحاولين تغريني بصوتك الحلو هذا قولي احبك يلا.
* هند: هههههههههه طيب (و بصوت واطي و متوتر قالتها) احبك.
* ناصر: يا لبى قلبك انا اوكي الحين سامحتك يلا يا قلبي خلينا الحين بالمسجات.
* هند: طيب.
* ناصر: يلا مع السلامة و انتبهي على نفسك.
* هند: الله يسلمك يا الغالي.

​

و سكرت التلفون و ظليت اتكلم معاه مسجات و على فكرة نسيت اقول لكم اني طول المكالمة كنت كل شوي اطل بالمجلس في احد صحى وله للحين نايمين و ما تتصرون شقد كنت متحمسة و خايفة في نفس الوقت و ظليت اتكلم وياه وقتها لي الساعه 3 الفجر و كنت متفاعله معاه لأخر حد.

في اليوم الثاني جات نوف بيتنا و قلت لها على كل شي من الألف للياء و قلت لها اني قررت اني اشتري لي دبلة مثل ما طلب مني ناصر و لكن و احنا قاعدين نسولف و ندردش جاني مسج


افا يا هنود ما توقعت قلبك قاسي كذا علي انا حمودي حبيبك تعملي فيني كذا على العموم كنت بخبرك اني تعذبت كثير بفراقك بس يلا الله يصبرني و اتحمل ما بقى


كان المسج من حمد و انا كنت حدي مقهورة عليه من جي لقيت فرصتي اني ارد له اللي سواه فيني و رديت عليه بمسج


يريتك تطلع من حياتي تراني انخطبت


كنت مصدقة كلام ناصر لأخر درجة و مصدقة اني صرت نصيبة من جي قلت له اني انخطبت على اساس ان كلام ناصر امس كان معناته خطوبة و رد علي حمد


معقولة بهالسرعه على العموم الله يسعدك و انا خلاص بطلع من حياتك خلي الي خذاك يتهنى بك و عليكم بالعافية


و كان هذا اخر تواصل بيني و بين حمد لكن في مرة و بعد مرور سنتين على تعرفي بحمد جاني منه مسج فاضي و اتذكر اني كنت وقتها متضايقة و ملانة و رديت عليه:"هلا و الله بحمد الغالي شخبارك و شعلومك؟؟" و هو طنشني شكله كان حافظ رقمي بتلفونة و رسل لي بالغلط و انا ما صدقت على طول رديت عليه.

نوف يوم قلت لها عن ناصر فرحت لي وايد و قالت لي اني اقول لها كل شي اول بأول لانها كانت تبي تعيش الجو معاي و هذا اللي صار .. و كثرت الاتصلات بيني و بين ناصر و لكن عقب اسبوعين من علاقتنا بديت امل من سالفة الشرف و الأخلاص هذي و حبيت اني اكلم واحد ثاني يسد مكان ناصر لما يكون ناصر مو موجود و اتذكر اني دخلت الشات وقتها و تعرفت على واحد اماراتي اسمة خليفة و هذا بعد بقول لكم شوية معلومات عنه لأن بعد بتعيشون معانا فترة طويلة شوي, خليفة كذااااااااااااااااب من الدرجة الأولى و كان اصغر مني هو مواليد نفس الشهر الي انا فيه و الفرق بيني و بينه 15 يوم و طبعا في البداية كان قايل لي ان عمرة 22 و شوي شوي صغر لغاية ما وصل في اخر يوم كلمتة فيه اصغر مني بسنتين, خليفة كان حنطي و عيونه سودا, و شعره اسود مرة يطولة و مرة يقصرة, و كان ضعيييييييييييييف, اما الطول فما اقدر احكم عليه, فاشل دراسياً و يعيد السنين عادي, و كان يحب بنت خالته فاطمة و قال لي هالشي من عقب شهر من معرفتي فيه و حاول يخليني اتأقلم مع الوضع المهم اخذت رقم خليفه بعد الحاح مو طبيعي منه و ما كنت ادري انه مرقم نص بنات الشات و كلامة مع البنات شي عادي بعد ما اخذت الرقم سوا لي خليفة رنة و كان هذا وجه الضيف لغاية اسبوع كامل ​

​

يا ترى شنو صار بعد اسبوع؟؟

و شنو التطورات اللي بتصير مع خليفة و ناصر؟

احداث خطيرة في الجزء القادم انتظروني:37:​

​