~ في ظل غياب الرقابة .. اعاني لوحدي ~

[محبة الطاعات]

بسم الله الرحمن الرحيم​

السلام عليكم و رحمة الله و بركاتة​

​

ها انا اطل عليكم من جديد بحله جديدة و رواية جديدة و اسلوبٍ جديد​

اتمنى بأذن الله ان تحوز على رضاكم ​

في هذه الرواية و بناءاً على طلب العضوة ذكريات صعبة بأذن الله سأمزج بين اللهجة العامية + اللغة العربية الفصحى​

( ملاحظة اتمنى تسامحوني على ضعف لغتي العربية فهذي اول مرة اجرب اكتب فيها :5: :5: :5: :5​

و طبعاً بناءاً على طلب العضوات العزيزات في روايتي الأولى ستكون هذهِ الرواية قصة واقعيه حدثت و بطلتها من اعز صديقاتي و هي اللتي طلبت مني ان اعيش فيها دور البطلة و سأتحدث و كأنني اتحدث عن نفسي

(ملاحظة اخرى: الرواية واقعيه و لكن كالعادة فيها شوي تغير + شوية بهار من عندي :5​

​

دعوني اعطيكم فكرة عن روايتي الجديدة ​

~ في ظل غياب الرقابة .. اعاني لوحدي ~​

روايتي هذهِ هي كابوس كل ام ​

و كل عائله​

و كل اخ​

و الأهم من كل ذلك كل أب​

هي قصة فتاة وقعت من جبال التقوى الى هاوية الضياع فهل يا ترى ستستطيع الصعود و النجاه بنفسها مرة اخرى ​

و كيف سقطت؟ و لماذا؟ و من كان السبب؟​

اسأله كثيرة ستجدون حلولها هنا ​

هنا سأنير الدرب لكل الامهات الغافلات المتخبطات بالظلام ​

سأبدأ من الصفر لأعرض عليكم الأسباب و النتيجة لأساعد كل ام على حماية طفلتها العزيزة و لأنير درب كل ام غفلت او انشغلت عن طفلتها الغالية​

فبطلة هذه الرواية تقول ان كل فتاه وقعت في هذا الطريق بسبب امها و لكن تعددت الطرق و النتيجة واحدة
فاتقي الله في ابنتك​

​

لن اطيل عليكم الحديث و لكنني افتحت هذا الموضوع لأحجز لي مكاناً بينكم و لأعلن عن بداية جديده و ما ان ابدأ بسرد اول جزء حتى ستتوالي عليكم روايتي كما عودتكم في روايتي الأولى ​

​

انتظروني فأنا بالقرب و لن اطيل عليكم بأذن الله :37:​

 

[منى25]

آهلآ بك غاليتي..
وأنا سأحجز أول مقعد لي هنا بين صفحات روآآيتك..
ننتظرك غاليتي...
​

 

[حلا شرقي]

هلا وغلا .....
الحمدلله اني بتابعك من الأول بانتظار روايتك على أحر من الجمر وأكثر ماشوقني لها انها واقعيه أشكرك عزيزتي لأنك لبيتي طلبنا بكتابت روايه جديده وبهالسرعه بالتوفيق ...............

 

[سمراء بلادي]

هلا بالطيبة الغالية عزيزة وشوفتك حلوة ننتظرك ومتابعين وان شاء الله مصحوبة بالتوفيق

 

[مهر الجنان]

هلا و الله
اهلا هلا بكل الهلا
متابعة و ناطرينج بحماس
شوقتينا
الله يعطيك العافية

 

[هدوء أميرة]

سعيدة بعودة كتاباتك مرة اخرى
لكن لي طلب أسلوبج في الكتابة حلووانا افهم عليج وايد وايد ليش تغيرين اللهجة
اتوقع الكل يفهمكم وأنا احب لهجتكم ​

 

[RE78EM]

ياهلا ومرحبا بكل الغلا شرفتينا بروايتج الجديده وأسأل الله لك التوفيق والقبول ومتابعينج بحماس

 

[محبة الطاعات]

بسم الله الرحمن الرحيم

السلام عليكم و رحمة الله و بركاتة
​

منى 25 تسلمين الغالية على ردج

حلا شرقي الصراحة رفيجتي ما تركتيني ما شاء الله عليها تحن من اول ما كنت في اخر بارت في ذيج الرواية لغاية ما خلتني ارضخ لطلباتها ههههههه

و على فكرة انا وعدتكم ان روايتي بتكون في القريب العاجل و انا عند وعدي :22:

شاكرة لج مرورج عزيزتي بارك الله فيج :5:

سمراء بلادي هلا فيج حبيبتي

شوفتج الأحلى عندي و ان شاء الله كلها كم يوم و ابدا في الرواية

احرجتيني بترحيبج الحار و مشكورة على الرد:5:

مهر الجنان

هلا بالمهلي فديتج انا تسلمين على هالترحيب الروووعة و ان شاء الله راح ابدا قريبا
مشكورة على المرور حبيبتي :5:

أهمس فديتج انا رفعتي معنوياتي الصراحة
بس في ناس طلبوا اني اكتب باللغة العربية
و انا بدمج بين العامية و اللغة العربية و اتوقع ان شاء الله تكون النتيجة جونان

بس ما ادري ليش جاني شعور بالأحباط يعني لأن اللغه العربية متعسره عندي شوي الله يستر

مشكورة حبيبتي على الرد :3:

RE78EM

مشكورة ابوي على الرد و ان شاء الله الرواية تكون قد هالحماس كله

و الله يشرفج و يعز مقدارج يا الغالية

اشكركم عزيزاتي كل الشكر اللي تستحقونة و سامحوني لو قصرت في حق احد منكم

وأتمنى من كل قلبي و عندي ثقة كبيرة فيكم ان لو شي ما عجبكم في الرواية تخبروني برساله او برد لأني بصراحة متخوفة من الطريقة اليديدة اللي باتبعها ان شاء الله تعجبكم لأني بجد بجد اكون سعيدة بردودكم

احبكم من كل قلبي :5:​

​

 

[هدوء أميرة]

أهمس فديتج انا رفعتي معنوياتي الصراحة
بس في ناس طلبوا اني اكتب باللغة العربية
و انا بدمج بين العامية و اللغة العربية و اتوقع ان شاء الله تكون النتيجة جونان​

بس ما ادري ليش جاني شعور بالأحباط يعني لأن اللغه العربية متعسره عندي شوي الله يستر​

مشكورة حبيبتي على الرد :3:​

حبيبتي طيب عندي وجهة نظر أهم يفهمون المسلسلات
كيف ما يفهمون ردج اتكلى على الله وبعدين الكاتبه
لها حق تكتب على كيفها طلبتج لاترديني فديتج
:19: ​

 

[حلا شرقي]

بانتظارك عزيزتي .....

 

[ام اسارين]

اهلين وسهلين محبةالطاعات ننتظرك فاسلوبك يجرني للقراءه

 

[محبة الطاعات]

بسم الله الرحمن الرحيم

السلام عليكم و رحمة الله وبركاتة

نظراً لطلب المشرفة ام همس المعطائة راح اقلل من كمية العربي و بيكون العربي جزء بسيط جدا جدا من الرواية

حلا شرقي الحين ان شاء الله بنزل اول جزء

ام اسارين مشكورة عزيزتي عسى ربي يحميج و يسعدج
​

 

[محبة الطاعات]

بسم الله الرحمن الرحيم​

آآآآآآه كم هي هذهِ الحياة قاسية و كم تمنيت لو ارد عليها هذهِ القسوه و اشعرها بما في صدري من آلامٍ و احزان ولكن هل ستحن علي او هل ستبتسم لي؟
و قبل ان اجد الرد على هذا السؤال افقت من غيبوبتي لأكتشف ان ليست هي الحياة من كانت قاسية و انما هو رب العباد يختبرني ليرى هل سأجتاز هذا الاختبار ام سأفشل كعادتي؟

السلام عليكم و رحمة الله و بركاتة

انا هند بنت حلوة (مثل ما يقولون لي الناس)
خلوني اوصف لكم نفسي و انتوا قرروا

انا دبدوبة شعري لونة بني غامق و عيوني عسلية و بشرتي بيضة و صافية طويلة ما شاء الله على قولة امي ( هقلة = كلمة تجمع بين شدة الطول + العقل الخفيف) هادية جداً جداً و اكاد اجزم ان هدوئي هذا مو طبيعي

خلوني ابدأ بقصتي اللي ما ادري اصلاً وين اساسها, المهم انا امي و ابوي مطلقين و فرق شاسع بين شخصياتهم ابوي شخص رومانسي جداً (حسب ما وصلني عنه) جنتل مان (و لكن اشك في هذا الموضوع) و لما قريت في منتدى بلقيس و تعرفت على انماط الشخصيات عرفت انه جنوبي بعكس امي الشمالية و اللي حياتها كلها عمل x عمل خصوصاً ان احنا عائلة فقيرة شوي حياتها خاليه من العواطف بشكل مو طبيعي قاسية جداً + مشغولة جداً و ما عندها وقت لنا انا و اخواني (عندي اخ اكبر مني بسنة و أخ اصغر مني بسنة) همها في الدنيا توفر لنا القوت و كل ملتزماتنا المادية + تربية سليمة صحية بس خاطري اعرف شلون بتكون سليمة و صحية بدون عواطف على فكرة نسيت اقول لكم ابوي انسان ما يحب يشتغل و رامي الحمل على امي و هذا اللي زاد من قسوتها وانشغالها اممم و ترى احنا في بداية حياتي كنا عايشين في دوله خليجية ثانية مب البحرين مع اهل ابوي اللي اصلة مب بحريني و في جزء من اهل امي هناك لأن احنا بأختصار مزيج بين هالدولتين

اول ما انولدت الكل فرح فيني لأني بنت و ابوي يحب البنات و جدتي كانت تموت فيني الله يرحمها لأني نسخة طبق الأصل منها و لاني اول حفيدة لهم كل هذا خلاني المفضله عندهم و للأسف من هذا السبب تفتحت عيون قلوب ملأتها الغيرة مني

في بداية حياتي كانت شخصيتي قوية و عنيدة و للحين تراني عنيدة بس بزياااااااااااادة عن قبل بسبب ظروف الحياة اللي بتعرفونها الحين و عنادي هو سبب بلواي

خلوني اذكر لكم ابشع موقف بدا في صقل شخصيتي الجديدة و صدقوني بمجرد اني اذكره احسه كأنه سكين مغروسة في قلبي و اما قدر اطلعها

مرة من المرات رحنا الصالون النسائي انا و امي و خالاتي و كان عمري وقتها 11 سنه اتذكر ان اللي كانت تسوي شعري كل شوي كانت تمسح بأيديها على رقبتي (لون بشرة رقبتي من الخلف اسمر وايد لدرجة ملفته للانظار و نفس الشي بين فخوذي عذراً على صراحتي الزيادة بس لي غرض الحين بتعرفونه) بعد ما خلصت شعري الحرمة الي سوته سألت عن امي, و عندي خاله فضولية جداً اسمها سعاد ما تتصورون حجم فضولها غير هذا انه تفكير الأطفال احسن من تفكيرها بأختصار انسانة مدمرة هذا غير انها من الحاقدات علي, دلت الحرمة على امي و الحرمة راحت لامي و طبعاً خالتي رازة الفيس تبي تعرف السالفة و ظلوا يتوشوشون مدة طويلة المهم لما وصلنا البيت قالت لي خالتي سعاد انها تبيني بموضوع مهم
​

* سعاد: هنووود تعالي ابيج بسالفة.
* هند: هلا .. امريني؟
* سعاد: تدرين مساعة الحرمة شنو كانت تبغي من امج؟
* هند: لا و الله .. و لا يهمني اعرف. <<< اعرفها فضولية و تحب الكلام الفاضي
* سعاد: لا بس لازم تعرفين لأن الموضوع يخص مستقبلج.
* هند(منصدمة): مستقبلي!!!!
* سعاد: اي مستقبلج شفيج مخترعه؟؟؟
* هند: خالتي شنو الموضوع مالي خلق.
* سعاد: الموضوع بخصوص السواد اللي في رقبتج اليوم الحرمة تقول حق امج انها لازم تشوف لج حل بهالموضوع لأن جي ما بتعرسين.(اكبر غلط تكلمون طفله صغيرة عن الزواج بهذي الطريقة)
* هند: شدخل!!! (منصدمة و متضايقة و منحرجة و المشاعر دخلت في بعضها و تبي تخلص نفسها من هالموضوع)
* سعاد: شنو شدخل .. شفيج انتي ما تفهمين .. كلهم 8 سنين و بتتزوجين و بتروحين بيت زوجج اي رجال يشتهي يطل في وجهج و انتي فيج هالسواد و بعدين شلون بيشهي يسوي وياج شي و انتي فخوذج سوووود ها ردي علي؟؟؟(اكبر غلط)
* هند(بكل برائة): شلون بيشوف فخوذي, هذا جسمي محد يشوفه الا انا!!؟؟؟؟
* سعاد(تضحك بخبث): ههههههههه لا حبيبتي بيشوف كل شي فيج و بيلمسه بعد من الحين اقولج تعدلي و حاولي تسمعين الكلام يعني لما امج تقول لج قومي عن الأكل لازم تقومين عشان تضعفين و تصيرين رشيقة مثلي ما تشوفين ريلي شلون يموت علي وله تبي تتزوجين و انتي كرشج مترين جدام.
*هند(بكل خجل و حياء):طيب طيب انا بقوم.
* سعاد(سحبتها من ايدها):وين رايحة انا للحين ما خلصت كلامي.
​

و في هالوقت دخلت امي و خالتي خافت تكمل لأنها ما تبي امي تسمع حوارنا و انا على طول طلعت و رحت الغرفة و للحين اذكر شنو قلت داخل قلبي.​

* هند: معقولة في رجال غريب بيشوف جسمي؟ .. لأ .. لأ مستحيل امي تقول لا تخلين احد يشوف جسمج شلون يجي رجال غريب و يشوف جسمي و يلمسه بعد!! مستحييييييل!! .. طيب, و لو كان كلام خالتي صح شنو اسوي؟ امممممم ما عندي غير حل واحد انا مستحيل اخلي احد يشوف جسمي و لازم احمية بكل قوة انا مراح اتزوج لو شنو يصير حتى لو تنطبق السما على الأرض .. قال يشوف جسمي قال, انا راح اظل طول عمري دبدوبة عشان ما اخلي اي رجال يقرب مني لأن ممكن السواد الي برقبتي يروح لكن السمنة انا اللي اتحكم فيها.
​

يومها ما قدرت انام و صرت اخاف من كل رجال العالم و صرت لما اروح مكان مثل المول او مكان عام و اشوف رجال غريب و يكون ما عندي احد من اهلي احس برجفه غريبة في جسمي و وجهي يصير احمر و افقد المشاعر و تفكيري يتركز على هالرجال كيف اني ابعدة عني اكبر مسافة ممكنه مع ان هالرجال ما سوا لي شي و بحاله بس سبحان الله

الموقف اللي ذكرته لكم كان بداية فقدي لثقتي بنفسي و خالتي سعاد ما قصرت الصراحة هذا موقف من عدة مواقف اللي حاولت انها تهدم فيها ثقتي و للأسف اقول انها نجحت و بقوة, هذا كله كوم و امي بكوم ثاني لأنها للأسف بقسوتها علي كانت تخليني ابتعد عنها و ما اقول لها عن فعايل خالتي اللي هزتني من داخل امي كانت ملاحظة خوفي من الرجال بس عمرها ما حاولت تتقرب مني او تسألني ليش الا يوم وصل عمري 20 تخيلوا بعد 8 سنوات فكرة انها تسألني, على فكرة ترى امي كانت تضربني لما كنت اقول لها مامي أو ماما غير يما ما كنت اناديها و كانت تضربني بالعصا يوم اني احاول ارتمي بحضنها اتذكر لما كان عمري 12 كلمت صديقة لي عن الموضوع و قلت لها نقلي لي من حنان امج شوي, تخيلوا مسكت ايدها و ضميتها و قلت لها باخذ من حنان امج شوي البنت خافت مني و ركضت و فضحتني عند صديقاتها اللي للأسف ضربوني يومها بكل ما عندهم من قوة لأني خليت صديقتهم تبكي و بسبب هالحادثة ما حاولت ان تكون لي صداقات و قررت اني انعزل بعالمي الخاص

تدرون انا عمري ما كنت ابكي كنت اكتم في قلبي حتى يوم اللي رجعنا فيه البحرين رحنا نسلم على اهل امي و اهل ابوي كان الكل يصيح الا انا و كان عمري وقتها 13 ما بكيت و لما ركبنا الطيارة و تأكدت ان الكل ما يدرون عني بكيت بصمت ما كنت ابي احد يشوفني و للحين فيني هالطبع دموعي ما احب احد يشوفها

على فكرة نسيت اقول لكم ان احد سبب انحرافي هو اني كنت في مدرسة مختلطة قبل ما اجي البحرين يعني علاقة الولد بالبنت بالنسبة لي شي عادي و طبعا امي ما قالت لي انها غلط بس بروحي استنتجت هالشي من كلامها مع الناس

ان شاء الله الجزء الجاي بيبدأ الأكشن الصح

هنودة بتتغير حياتها و بتدخل في عالم غريب اول مرة تدخله يا ترى شنو بيصير لها خلكم وياي :37:

​

 

[حلا شرقي]

ويااااااااك يالغاليه متابعتك وبانتظار البارت الجديد وشكلها بتكون روايه رحلوة ..................

 

[ام اسارين]

حياك اكملي ولاتتاخرين مشان ماانسى التفاصيل لان اختك نسايه درجه اولى

 

[محبة الطاعات]

بسم الله الرحمن الرحيم

خلوني اعرفكم على منى و هي اول من دلني على طريج الخراب

في يوم من ايام المدرسة وقتها كنت في صف ثاني اعدادي يعني كان عمري وقتها 13 سنة وكنت لسه بنت جديدة بالمدرسة لأني مثل ما قلت لكم من قبل في هذي الفترة رجعنا البحرين انا وامي واخواني, و ما كان عندي اصدقاء وكنت منزوية في الصف و ما كان جنبي أحد لأن اتذكر ان صفنا كان عدده فردي فشي طبيعي ان في وحدة بتكون جالسة لوحدها (على فكرة لما رجعنا البحرين كانت مدرستي كلها بنات), اتذكر كانت عندنا حصة اجتماعيات و في عز شرح المدرسة دخلت الأخصائية الأجتماعية الصف و قالت "بنات بعرفكم على بنت جديدة راح تكون زميلتكم ان شاء الله" رفعت راسي و انا في قمة انشغالي بنقل اللي على اللوح و شفتها كانت حلوة جداً وشعرها اشقر مرفوع ونازل منه خصل و عيونها كانت زرقا و بشرتها بيضة و رشيقة و قمة في الجمال كان خاطري تكلمني وبنفس الوقت كنت كارهتها ما ادري ليش يمكن غرت منها لأني كنت حاسة بداخلي انها احسن مني على العموم في ذاك الوقت الكل كانو احسن مني لأني ما فيني ثقة بنفسي, و رجعت اكتب و تفاجأت بأنها جات و سحبت الكرسي الي جنبي حاولت اتجاهلها لكن
​

* منى: السلام عليكم.
* هند: عليكم السلام. <<<< احاول ما ابين لها اني منتبهه لها و خاطري اكلمها و مسوية نفسي مطنشة
* منى: اممم ممكن اقعد هني و له هذا مكان احد؟
* هند(رفعت راسها): لا .. لا حياج.
* منى(و هي تجلس بنعومة): مشكورة فديتج .. انا اسمي منى وانتي؟
* هند(ما كنت مصدقة انها قاعدة تكلمها وفي عالم ثاني): هلأ؟؟
* منى: انا اسمي منى .. وانتي؟
* هند(للحين سرحانة الأخت): شنو؟
* منى(بدت تعصب بس تحاول تخفي الموضوعو رفعت صوتها شوي):انــــا اســـمــــي مـــنى .. و انــتــي؟
* هند(تحاول تنهي الحوار بسرعه): هلا منى .. انا هند تشرفنا. <<<< و رجعت تكتب
* منى(و هي تطالع دفتر هند): شنو قاعدة تكتبين؟
* هند(تقول في خاطرها شنو هالنشبة ذي اوووف): كتبي اللي على اللوح مهم تراه. <<<<< و غطت دفترها كأنها في امتحان
* منى(بعصبيه): اوكي مشكورة .. بس ترى انا ما بغش منج كل شي مكتوب على اللوح.
* هند: لا ..لا بس انا خطي مو حلو ما ابيج تتعقدين ههههههههههه.<<<< تحاول تلطف الجو
* منى(بدلع): هههههههههه لا لا عادي فديتج انا بعد كنت امزح وياج.
​

طبعاً ظلت منى على هالحال طول الحصة تحاول انها تلطف الجو و تكلمني و انا معطتها اكبر طااااااااااااف (طناش) لغاية ما خلصت الحصة و بدت بعدها منى تتلفت حاولينها و تطالع و مرة وحدة التفت على جنبها اليمين
​

* منى: خلووووووووود .. ايه عليج يا عمري انتي. <<< و فزت تبي تسلم على خلود و هند تراقب بصمت
* خلود: هلا و الله مناوي, فديت قلبج انا, من مساعه و انا ابسبس لج و امو مو لج (تقلد القطوة الأخت) و انتي و لا انتي وياي قاعدة تسولفين مع اللي جنبج.
* منى: اي فديتها هنودة طيوبة وخذتنا السوالف. <<<< نصابة
* خلود: من هنودة؟؟؟؟
* منى: تعالي بعرفج عليها. <<< و سحبت خلود عند هند
* هند(اول ما شافتهم جايين عندها فزت ووقفت تنتظرهم او خايفة منهم الله و اعلم): ....
* منى: خلووودة حبيبتي هذي هنودة .. هنودة هذي خلود صديقة طفولتي.
* خلود: هلا و الله بالفتاة الصامتة .. هع هع هع. <<< تستظرف
* هند(في قلبها تقول اوووف يا ملغكم "يعني دمهم ثقيل" بس اشوة طلعوا يعرفون بعض الحين بفتك من ويه هالعله منى و برجع بروحي يا اخي ما احب اكلم احد شنو هالنشبة اللي انبليت فيها): هلا .. هلا اشوة طلعتي تعرفين احد غيري ههههه.
* منى: ههههههه شفتي شلون مع ان انا مو من هذي المنطقة بيتنا في منطقة ثانية.
* خلود(و هي تسحب الكرسي البعيد وتقعد جنبهم): بيت جدتج في المنطقة الثانية لكن بالبطاقة مكتوب هني على عنوان بيتكم.
* منى(و هي تقعد على كرسيها): اييي بس انتي تدري انا طول الوقت مع جدتي و هي اللي مربيتني و بيتنا ما احب اقعد فيه خبرج اخواني كلهم اولاد و انا ما احب اقعد مع الأولاد اخاف اصير بوية هههههههه (و مسكت ايد هند اللي ارتبكت و وجها صار احمر) هنودة حياتي ليش واقفة؟
* هند(و على وجها علامات خجل و خوف من المستقبل و ما هي عارفة شنو تسوي): اكاني بقعد .. يعني انتي من منطقة ثانية؟؟ .. عيل شلون عندج صديقات هني؟؟
* منى(للحين ماسكة ايد هند): لأن انا بطبعي اجتماعيه وايد و احب ازور الجيران وايد وايد و خلودة فديت قلبها جارتنا البيت بالبيت.
* خلود(قاطعتهم): بس لا تفكرين عشان الجيرة باخذج تقعدين يمي ههههههاي No way .. مشي بوزج(كنايه عن الرفض القاطع) انتي بتقعدين هني جنب هند انا الصراحة قاعدة جنب صديقتي و مستانسة هناك.
* منى: ههههههههههه و من قال لج اني ابيج انا ابي هنودة بعد قلبي. <<< و تضغط على ايد هند
* هند(حست ان الأوكسجين باجي له شوي وينقطع عنها و وجها صار احمر لدرجة فاضحة): هاأاأاأ .. اييي حياج الله.
* خلود: هند شفيج؟؟ .. عسى ما شر؟؟ .. ليش ويهج احمر؟؟ منى ماسكة ايدج وله رقبتج هههههههههه.
* مني: بيه يا قلبي عليج هنودة شفيج حبيبتي تبين ماي؟ لحظة لحظة.<<< و تطلع من شنطتها ماي تعطيه هند
* هند: لا .. لا مشكورة بس الجو حار و انا من الحر اصير جي ههههههههه. <<< ضحكت بخجل و هي تقول في قلبها شكلها طيوبة استغفر الله ما ادري ليش كرهتها اول شي

​

بعد هالحوار ظليت انا و منى نسولف كل اليوم مع بعض و تعرفت عليها و حسيتها انسانة على نياته و جداً طيبة

على مدى اسبوع صارت علاقتي بمنى قوية جداً و عرفتني على خلود الي بعد صارت صديقتي و تعرفنا على صديقات خلود و صرنا شله لكن ظلت علاقني في منى مميزة و على فكرة منى صار لها اعداء في هالأسبوع الي بعدين عرفنا ان سبب عداوتهم لها الغيرة

بعد الأسبوع هذا منى صارت لي اعز صديقة وكنت فرحانة فيها ما تتصورون لأي درجة و بعد هالاسبوع كنا انا ومنى قاعدين في الفسحة في الفصل ناكل ونسولف

​

* منى: فديتج هنودة و الله انج طيوبة و ما في مثلج مثل .. على نياتج وايد و هذا الي يعجبني فيج.
* هند(بخجل): وانتي بعد ما تتصورين انا لأي درجة حبيتج.
* منى:حبتج العافية يا الغالية .. اقول هنودة في خاطري اسألج سؤال بس مب عارفة شلون ابدأ؟
* هند: سألي و امري بعد بالطريقة اللي تريحج؟
* منى: انتي ما في قلبج احد؟
*هند(مصدومة و مو مستوعبة): شلون يعني؟؟ .. ما فهمت عليج؟
*منى: يعني ما حبيتي من قبل؟ و لا تحبين الحين احد؟ يعني مالج علاقة بأحد معين؟
* هند(برد هجومي و عنيف): احنا ما عندنا هالسوالف انا امي مربيتني عدل.
* منى: هنودة حبيبتي لا تفهميني غلط ترى البنت قلب و لازم تهتم بقلبها و مشاعرها و له بعدين محد بيعبرها و يتزوجها البنت لازم تحب عشان تتزوج و بعدين انا بعد جدتي مربيتني صح بس ما فيها شي لوحبيت صح وله لا؟
* هند(بعنف و لكن قاعدة تفكر): لا مو صح انتي متربية صح يعني ما تسوين هالأشياء و انتهى الموضوع. <<< و تقول في قلبها اتزوج ههههههاي مستحيل عشان يشوف جسمي و الله لأذبحة قبل لا يفكر بهذا الموضوع
* منى: بس يا حبيبتي انا ما قلت انج تطلعين معاه و تسوين شي غلط انا قلت حب .. حب .. فاهمه يعني شنو حب؟
* هند(بتفكير): انتي شنو تبين توصلين له؟ شنو غصدج؟
* منى: ما ابي اوصل لشي معين بس ابي اعرف انتي تعرفين يعني شنو حب؟ .. ترى الحب بالقلب مب شرط تروحين بالأذاعه وتقولين انا احب فلان لا .. انا اقول داخل قلبج يعني انتي و بس اللي تعرفين بهذا الموضوع.
* هند(تغير الموضوع): مناوي حبيبتي غيري الموضوع و الي يعافيج تراني متضايقة وما ابي افكر بشي كفاية بعد الفسحة عندنا انجليزي والمدرسة مو مقصرة فيها تخرع كل شوي تضرب على الطاولة عبالها احنا سرحانين.
* منى: لا تتهربين من الموضوع شكلج ما تحبين احد صح؟
* هند(بدفاع): ايييي ما احب و لا بحب في يوم من الأيام ارتحتي؟
* منى: هنودة شفيج يا قلبي احنا نسولف ترى ما فيها شي لو انج ما تحبين ترى هذا الموضوع مو عيب بس ترى انا اقول لج من الحين صدقيني بيجي اليوم اللي الحب بيبهدلج فيه و بتقولين مناوي ما قالت.
* هند: انزين انزين يصير خير.
​

و ظلينا نسولف لغاية ما رن الجرس و كملنا الدوام لكن الموضوع ما طلع من بالي.​

​

​

​

يومها لما رحت البيت قعدت افكر بالموضوع و اقول
​

* هند:معقولة منى الطيبة تكون تحب بس الحب الي انا فهمته من كلام امي انه شي غلط و عيب لكن معقولة تكون منى مو زينة و لها علاقات بصبيان .. لأ لأ مستحيل, طيب لو كان صج انا ليش افكر فيها كيفها حبت او ما حبت هذي نفسها و هي حره فيها المهم انا شنو و انا شنو افكر و انا مستحيل اسوي هالشي خلاص انتهى النقاش بهذا الموضوع و انا مراح افكر فيه مرة ثانية منى لها حياتها الخاصة و انا مالي شغل فيها انا ما صدقت تصير عندي صديقة طيبه اقوم اتركها عشان انها تحب كيفها و الله لو تكلم صبيان البحرين كلهم انا مالي شغل فيها.

​

​

​

و استمر الصراع في داخلي هل اللي تسوية منى صح وله لا لكن خلونا نترك المدرسة و جوها شوي في هالفترة تعرفت على بنت خالتي آآآآآآآه من هالبنت كان يوم اسود يوم اني تعرفت عليها لكن امر الله شسوي, و الله لو بأيدي اني اغير التاريخ كان اول شي اغيره معرفتي بهذول البنتين, المهم خلوني اعرفكم على بنت خالتي نوف شعرها اسود خشن و عيونها سودة و جسمها رياضي و بيضة و كان احلى ما فيها جسمها اما الشكل فالله يخلي المكياج, تعرفت عليها بزيارة منزليه كنا رايحين لهم و كانت علاقتها قوية في ولد خالتي الثانية الصغير و كانت تلعب معاه وانشديت لها و لشخصيتها القوية و مع اللعب شركتني معاهم وتعرفت عليها و على ولد خالتي الصغير محمد و صرنا اصدقاء و سبحان الله نوف ومنى تعرفت عليهم في نفس الوقت, منى كانت علاقتي فيها بالمدرسة ونوف بالتلفون و الزيارات المنزلية و بعد شهر على علاقتي بمنى

يا ترى شنو صار عقب شهر؟
تدرون نكمل البارت الياي

اشوفكم على خير :37:​

 

[مهر الجنان]

شوقتينا
ناطرينج الله يعطيك العافية

 

[حلا شرقي]

وراك وراك ,,,,,,,,
متابعتك ..........................

 

[محبة الطاعات]

بسم الله الرحمن الرحيم
السلام عليكم و رحمة الله وبركاتة

ههههههههههه حلا شرقي حسستيني اني شاردة منكم فديتج

يسلمو الغالية على متابعتج لي و ردودج النايس:22:

ام اسارين

ايه عليج اتمنى الجزء الجديد عجبج :32:

و ان شاء الله بنزل الجزء اللي بعدة بعد شوي :5:

مهر الجنان

الله يعافيج حبيبتي

وان شاء الله بعد شوي بنزل الجزء الثالث :37:​

 

[ام اسارين]

الله يخليك حلوالجزء بس ياليت ماتطولين