المها
موضوعج رائع واكثر من رائع بعد واحب اشارك بعرض تجربتي وانشالله اكون خفيفه على قلوبكم
انامن هذا النوع من النساء الي تخلي نفسها دايما في نهاية الاولويات وللاسف محد يقدر
كل شي متنازله عنه وكل شي مضحيه فيه صايره انا الام والاب اسوي مسؤوليات البيت كلها حتى السياره اخذها للمصلح واتعامل مع السباك والكهربائي و و و
الياهال انا الي اوديهم المدرسه وادرسهم واذا مرضوا اوديهم الطبيب حتى الخدم انا البي احتياجاتهم واسوي مشاويرهم
يعني اسوي كل الي يخطر على بالج
فوق هذا انا موظفه وراتبي كله يروح واصرفه على البيت وكل شهر اسحب من الفيزا وعمري ماتهنيت براتبي من اشتغلت
طبعا اكيد تتسائلين وين الزوج
طبعا الزوج مدلع نفسه على الاخر سفرات وحده ورا الثانيه ديوانيات نوادي رياضيه قهاوي ومايلبس الا ماركات كل انواع الترف
ولا جيت اطلب منه المساعده بكل بساطه يقول لي مالي مزاج
حتى لما اكون حامل وتعبانه عمره ما يتنزل ويساعدني
وزني زاد بشكل خيالي وهذا تعب نفسيت زياده الزيارات الاجتماعيه كنت اتهرب منها علشان ما اقصر بوقت بيتي وعيالي واذا رحت اكون خجلانه لان لبسي مو بمستوى لبس البنات واقل منهم مستوى لان راتبي ما يتبقى منه شي
دايما احس اني مظلومه وصرت ما احب نفسي
المهم (طولت عليج
)
حملتي الاخيره كانت مثل الطراق على ويهي لان ما كان خاطري احمل بهالوقت بسبب الدراسه ولكن الحاح زوجي دمر نفسيتي وحتى الحمل ما كان راضي يصير بسبب النفسيه التعبانه وهذا الشي لخبط الهرمونلات عندي وارتفع هرمون الحليب وعالجت علشان اداري خاطره واحمل ومريت بتجربة اجهاض وكل هذا وانا شايله كل اعباء البيت وبدون مساعده
لحد ما جاء اليوم الي قعدت قعدة صراحه مع زوجي وبدا معي موال جديد بانني مقصره في حقه ومشغوله بالاطفال فقط وانني لم اعد نشيطه وحيويه كما السابق
تخيلوا انه يتهمني بالخيانه لان ةوزني قد ازداد عن اول ايام الزواج! اليسىت هذه ضريبة الحمل والابناء
وبين لي وجهة نظره في الرجل الذي يتزوج من اثنتين انهغير ملام لان الزوجه تكون فقدت بريقها!!
ويقول لي ان شكلي مو حلو وان انا ما البس ماركات!! تخيلوا من وين اييب فلوس للماركات وراتبي كله يروح
يا الاهي كم هو اناني
كل هذا وانا حامل بالشهر الثامن التوقيت جدا سيء
هنا انتبهت لنفسي واخذت قرار باني ان ولدت وقمت بالسلامه ان شاءالله ساغير من نفسي ليس من اجله وانما من اجل نفسي التي ضاعت ولم اعد اعرف ملامحها
من بعد الولاده ايضا مريت بضروف صعبه جدا منها تعرض مولودتي للخلع بيدها وانها ما تحرك يدها ابدا ليومنا هذا(ادعوا لها بالشفاء) تخيلوا وقع الصدمه علي وانا نفسه ووراي دراسه وابنائي ايضا يحتاجون للرعايه والتدريس ومولودتي تحتاج 3 جلسات اسبوعيا للعلاج الطبيعي وما حد يساعدني وزوجي الي سواه انه سافر علشان يقدم امتحاناته بالخارج من دون ما يفكر انا اشبسوي بالحوسه الي انا فيها
ولكن بفضل الدعاء وقراءة الاذكار وشرب ماء زمزم يوميا قررت ان ابدا في خطة تغيير نفسي وعدم الاستسلام للحزن
اولا
كل الهدايا النقديه الي اخذتها من اهلي بنفاسي خصصتها لنفسي وقلت ما راح اصرق منها فلس واحد لاحد\ غيري
جهزت نفسي جهاز كامل مثل العروس الجديده وكنت كل ما يعجبني شي ويكون سعره غالي اتعمد اشتريه واقول علي بالعافيه لدرجة اني وصيت اختي وهي تتسوق معاي انها تزفني اذا استبخلت على نفسي
سويت نيو لوك كامل من تنظيف بشره وصبغ وقص للشعر وسويت رجيم قاسي لدرجة انه لما رجع من السفر انصدم(بس ليلحين متينه ا :no: دعوا لي اضغف بالصحه والعافيه يا رب)
اشتركت بنادي صحي من بعد ما كنت اتحسف على الوقت الي اعطيه لنفسي
يعني سويت وايد اشياء ما كنت اتجرا اسويه من قبل
خلاصة التجربه
انا ما اقول اني حليت كل مشاكلي معاه فانا لا ازال اقوم بمعظم امور البيت وحتى الان لم احظى بالاستقلال المادي
وليلحين اييني الشعور بالذنب اني مقصره وليلحين احس اني احمل نفسي فوق طاقتها
وانا بحاجه ماسه للمشاركه في حملتكم
وبحاجه اتعلم اكثر اشلون احب نفسي وادلل نفسي
ومحتاجه احيس بدعمكم ومشاركتكم
بس الحمدلله نفسيتي صارتاحسن من الاول
وفهمت معلومه ان الريال ما يجب المره المتذمره المهمله لنفسها بل يعشق المره الي تهتم بنفسها وتكون له صديقه قبل ما تكون زوجه وهذا الشي يصير لما تحبيتن نفسج انتي بالاول وهذا الي ابي اتعلمه معاكم
وادعو غي كل يوم ان الله يسلعدني ويسخر لي زوجي ويسهل اموري
وان شالله مع الايام تصير حالي للاحسن
واسفه على الاطاله
