سالفتي سالفه بس والله انها حقيقه

[(مرام)]

السلام عليكم ورحمة الله وبركاته

كيفكم يا بلقيسيات

ان شاء الله طيبين

المهم بدخل في الموضوع على طول

انا متزوجه ولد عمي زواج تقليدي من 21 سنه وكان عمري لما تزوجته 14 سنه
وعندي منه اولاد وبنات ولله الحمد الله يخليهم لي ياارب .

سالفتي ويااه اني في بدايه الزواج ما كنت احبه ابداً كنت اكرهه
الى ابعد الحدود والله يااخوات ما تتصورون وش كنت اسوي عشان يروح لما يجي لعندي ولما اسمع عن وصوله يجيني احساس غريب كأنه عدو مب زوووج المهم هذا لما كنت عايشه مع اهلي وهو والله مب مقصر علي بشئ بس انا مااحبه
جلست مع اهلي قرابه سنتين لان هذا من شروط امي لانهم زوجوني وانا صغيره وانا مستأنسه بالزواج علبالي طلعات وجيات وسوق وسفرات طلع العرس كله خرطي في خرطي مسؤوليه وحمل وولاده وكرف لليل نهار
وبعد سنتين طلعت مع زوجي ورحت معاه بس ما كان مقتدر انه يحط لي بيت بروحي دخلنا مع ناس يقربون لنا وجلسنا معاهم ثلاث شهور وبعدها رحت زياره للاهل ولما جى يبي زوجته قلت لد لنجوم اذا تقدر تمسك منهم نجمه رحت معاك وجلس يحاول فيني وانا اتحجج بالبيت ماابيه اكرهه يا نااس وربي اكرهه قلت ابي بيت بروحي يعني بيت بروحي ايوه نسيت اقولكم في السنتين اللي قاعده فيها عند اهلي حملت وجبيت ولد ولما رحت ويااه تعلق فيه الولد وهو يترجاني يبيني ويبي ولده وانا مصممه على رايي :schmoll:
بكمل الما اشوف تفاعلكم واشكركم وامانه محد يدعي علي لاني لسى صغيره ومب فاهمه وقتها .​

 

[Wise Woman]

كملي ..ولاتطولين يااختي..وحطيها في موضوع وااحد..عشان مانمل من كثر صفحات الإنتظااااااااااار

 

[غدير الكويت]

معاااج على الخط الله يفرج همج

 

[حلى قهوة]

الللللللللللللللووووووووووووووووووووو كملي بنتظارك

 

[(مرام)]

Wise Woman

حلى قهوة

هلا فيكم واسعدني وجودكم محربا مليون وان شاء الله راح اكمل​

غدير الكويت

​

 

[مودّه]

..
هالحين من عمرتس 14 متزوجه
ولكم 21 سنه
يعني عمرتس تقريبن 36 <: وتقولين بعدتس صغيره
وماتفهمين شي بالحياه ، افا ياذا العلم
احتسي غيرها D=
الله يصلحتس بس لزوجتس ويلم شملكم ،
اعقلي باتسر يسحب عليتس ويدور وحده ترضى بحالتوه
وانتي تتغلين خلي التغلي ينفعتس ببيت اهلتس
يلاه الله يصلح عبادوه يارب

 

[وردة ندية]

والله مب حلو حركة ... اكمل بعدين اذا شفت تفاعلكم

حنا مندمجين وننتظر

واذا كثر الصفحات ومرت ايام ننسى السالفة وممكن ما نرجع للموضوع ثانية


الحين ما اخذنا ولاشي من قصتك
لا افدتينا ولا نقدر نفيدك

 

[السندريلا1403]

والله مب حلو حركة ... اكمل بعدين اذا شفت تفاعلكم

حنا مندمجين وننتظر

واذا كثر الصفحات ومرت ايام ننسى السالفة وممكن ما نرجع للموضوع ثانية


الحين ما اخذنا ولاشي من قصتك
لا افدتينا ولا نقدر نفيدك

انا معااااااك وكلامك صحيح...وياليت الاخت تنزل الموضوع كامل

 

[(مرام)]

بسم الله

رديت لكم

<<< الحبيبه مشت كلمتها وما راحت ويا زوجها
وجلست عند اهلي شهرين وكنت حامل ومع ذا كله مستأنسه

ماابي الا فرقاه وما اشتقت له وماابي اسمع طاريه

وامي الله يرحمها ويغفر لها لما تشوفني اداعب ولدي ولا احضنه او ابوسه تقولي يا سلام تحبينه وتكرهين ابوه خووش والله اقولها اماما هذا ولدي وهذاااك ولد الناس وكانت الله يرحمها تكلمني دايماً عن زوجي وتقولي ليش تكرهينه هذا ولد عمج وطيب وياج حرام عليج يا بنتي اتقي الله فيه وتتكلم وكلام كثير احيان اضيع السالفه ماابي شئ يذكرني فيه.

تصدقون يا بنات لما يجي مااستقبله وسوي نفسي مريضه او اسوي نفسي نايمه انواع المعامله اللي مال امها داعي وما قد اشتكى او قال ليش تسوين كذا لا بالعكس كان يصدقني لما اقول آآآآآآآآآآآآآآآآآآي تعبانه

وانا مب تعبانه ولا فيني شئ لا ومب كذا وبس كنت اسوي حركات الله لا يوريكم كنت اخبي نعوله اكرمكم الله واخبي عقاله وفيه اشياء نسيتها ومره كان توه واصل من السفر وتعرفون حركات الواحد اللي مشتاق لزوجته انا لما عرفت انه وصل شردت لخوي قلت ابي اطلع جلبياتي يلا ودني بسرعه وهو توه يدخل اخوي مادرى ان زوجي وصل لانه توه جاي من المدرسه وعلى طول مشيت للخياط وعلى طريقي لبيت اختي وجلست عندها لين العصر لعل وعسى يزعل زوجي المصون ويروح لبيت اهله بس للاسف ما راح لما رديت للبيت لقيته وقلت ااااففففففففففف للحين موجود هذا ما يحس والله انه غبي غبي وتخيلو ما قال ليش تنقلعين يوم جيت او ليش ما استقبلتيني ما كان يعاتبني كان كل كلامه لي بحنان وبلطف يعني وش اقول والله ما كنت استأهل الله يسامحني يارب

وشوي شوي لين احترمته مااقول حب احترام لاني مااحبه لين الحين لا تستغربون لاني والله في حياتي ما ناديته باسمه ولا قلت له فديتك تخيلوا اني استغرب من بعض بنات اخواني اللي سنهم فريب من سني لما اسمع كلامها مع زوجها .

ومشكلتي اللي بسببها كتبت قصت حياتي اللي ما يعلم فيها الا الله هي انياتضاايق حيل من سفر زوجي لما يسافر عند اهله والله مااعرف ليش بس اتضااايق مرررره واحيان امنعه من السفر للعلم اهل زوجي بدوله وانا بدوله ثانيه ماادري ليش امنعه انصحوني الله يخليكم قوولووا لي طريقه يكون سفره عندي عاادي

تدرون اني احيان اقول يمكن هذا عقاب من الله بسبب معاملتي له وكرهي له في بدايه زوااجنا والله اني لما يسافر احس بهم كبير
ماادري وش اقول دلووني الله يخليكم

والمشكله الثانيه اني احس انه يستفزني ببعض حركاته لين اغلط عليه ولما اعصب واغلط عليه ما يرد وامووت قهر لانه ما يرد

ما زال للهرج بقيه وان شاء الله راح ارد لكم

 

[اولادي كل حياتي]

متابعين

 

[هموم الكون]

خلصت القصه
اذاخلصت عادي روحي معه وهو رايح لهله وخليك جنبه
يمكن دعى دعوة واستجاب ربي انه يحببك فيه :c016:

 

[مريوم الحلوه]

كملي ؟؟

 

[جراده شياكه]

الله يحببك في زوجك يارب وتناديه باحسن الاسماء يارب

 

[RedRose]

امممممممم

 

[المتغيرة للأفضل]

يالله......................
انت ياحبيبتي ضحية ,الله يهدي اهلك شلون يزوجوك وانت بهذه السن الصغيره ,طبيعي ماحصل لك اكيد لم تعرفي معنى الزواج ولا واجباتك وحقوقك .
احمدي ربك انه سخرلك هذا الانسانالذي تحمل الكثير من تصرفاتك الطائشه ويمكن بينه وبين نفسه يعطيك العذر لانك كنت صغيرة اما الان فاكيد سيطفش منك ومن حركاتك فعليك ان تغيري اسلوب وتعيديه اليك .
تعلمي من هذا المنتدى كيف تكوني زوجة ناجحة. وفقك الله

 

[(مرام)]

السلام عليكم

رديت عليكم

وبيكون هذا اخر جزء ان شاء الله وياريت استفيد من استشاراتكم وامانه ماابي انتقادات لان كل سلبياتي كانت في الماضي

في باديه زواجي لمده اربع سنوات بس بعدين الحمد لله مشى الحال وياي

الجزء الاخير يتعلق بزوجي وعلاقته في اهله وفي علاقتي وياهم

بقولكم قصه عن اخوه الكبير كان متزوج اختي اللي اكبر مني بـ10 سنوات صارت نفس قصتي معه بس اللهم ان اختي مااستمرت مع زوجها وكان تعبان يعني كان عنده مشكله في العلاقه الجنسيه وتعالج بس ما فيه فايده وصبرت عليه اختي وهو كان يمووت عليها وهي في البدايه كانت زيي ولما راحت معه وشافت طيبته وياها حبته ودخلت مع اهله فتره وهو راح يبي يتعالج وقالت له ابي اروح وياك قال لا انا مب مطول المهم ان اهله كانو يعاملونها معامله سيئه ومن القهر راحت بيت اهلهاا وخبرت ابوي بالقصه وقالت يبه اذا زوجي جى يبيني ترى انا بروح وياه لانه ماله ذنب في اللي يسوونه اهله وهو وش سوى لما رد وما لقاها زعل منها وقال والله مااروح لها اذا هي تبيني ترد او اللي وداها يردها اختي جلست تحراه تبيه يرد وكانت متلهفه عليه بس ما رد وصل لها كلام انه يقول اللي ودها يجيبها وبكت بكاء الله لا يوريكم وكنت انا في هالفتره طفله صغير وكرهت اهل زوجي من اللي شفته في اختي لانها حكت لي كل اللي سووه ويااها
وكرهتهم كرره ما تتصورونه واختي لما سمعت هالكلام اللي وصلها من زوجها قالت يبه طلقني منه ماابيه خلاص انا صابره عليه هالفتره وهذا كلامه وابوي ما قصر قام بالواجب .
انا مماابي اطلع عن سالفتي كثير بس ابي اقولكم سر كرهي لاهل زوجي مع اني والله في البدايه ما سويت لهم شئ بس لما شفت تصرفاتهم وياي ما قصرت وعاملتهم بنفس المعامله
وما كنت اشكي عند زوجي منهم الا قليل ومره كنت ابي اتحنى للعيد قال فلانه هالعيد بنعيد عند اهلنا الله يخليج تحني حنى عادي يعني انتي حني نفسج ماابغى مشكال وبكم تحنت وليش تحنى عند الصالون وماله داعي الخساير هو بكلامه فتح عيوني على اللي يقهرهم وهو ما يدري قلت كذا والله لااتحنى للكووع طبعاً اقوله بيني وبين نفسي بس زوجي قلت له مب قايله لهم شئ بقول تحنيت عند وحده من خوياتي وبس المهم سكت زوجي وانا رحت وسويت الحنى وشريت اشياء شوي غاليه كل ذا ابي اقهرهم بس
وسافرنا لهم او ما نزلنا يسألوني بكم ذا ومن شرااه وانا عاد ما قصرت قلت ابو العيال الله يخليه لي حلف علي ان اتحنى للكوع وانا ما بغيت ارده في خاطره والله يااخوات اني شفت في عيونهم نظرااات قهر وغيره ماله حدوود ابد وزووجي صار وجهه كأنه قووطي مدعووس والله ويسوون له ذيييك الحفله اللي بوزت عليه اليعد وهو حط حررته فيني بس مااهتميت له عاادي كلامه على قلبي مثل العسل اهم شئ اني قهرتهم وبس .
وجلسنا عندهم يوم واليوم الثاني رحت عند اهلي وكان زوجي معصب بس ساكت وقلت له انت ليش معصب طبعاً ناديته هيه انت شبلااك وش عليك من الناس اهم اللي يمشووون معاااشنا او سيفهم على ارقابنا والله انك مسكين وشخصيتك ضعيفه الله يعيييني بس قال والله انك عقرب رمل انا مب منبهج ما تقولين لهم قلت كيييييييييفي كيييييييييييييفي كيييييييييفييييييييييي والله لااسوي كل شئ يقهررررهم لانهم ما يحبووني تقدر تقولي وش سويت لهم وش ضريتهم فيه يبون يسوون في نفس ما سوو في اختي اسفه والله مااسكت لهم لو شو ما صار قال بس تررااج بتخسريني قلت عاادي المهم وصلنا عن اهلي واستأنس ونسى السالفه وجى اليوم الثاني وقال يله مشينا قلت انا بجلس عند اهلي لين نرد لبيتنا لاني ماابي مشاكل مع اهلك قال طيب واخذ ولده الكبير وراحوا وانا جلست عن اهلي مستأنسه واليوم الثاني جاني ياكل حصى واستغربت منه عسى ما شر وش بلاك قال انتي تبين تمشين كلامج علي ومدري ايش
انا انصدمت معقول زوجي طلع له قرووون من متى هذا الكلام ياابو عيالي من من الان فصاعداً قلت اشوى اني متزوجه توني عرفت اني متزوجه لحضه بصك رااسي بالحيط عشان اشوف انا بحلم او بعلم مسكني هو وقال تبين تجربين قلت اتحدااااك قال تحديين قلت اي لاني ببيت ابوي وانت تعرف ابوي زييين هنا قال والله لو مو عمي لا اكسر رااسج اقول مو منك اللي قاعد تقوله وتسويه بس حسبي الله عليهم الله لا يوفقهم واجلس ادعي عليهم وابكي وهو قاعد يقول حرام عليج ليش تدعين على اهلي قلت بس ليش يشيشوونك علي لييييشششششششش انا مااجيهم الا في السنه مره ويسوون كذاالمهم قال ترى انتي ما تسنعتي تسنعي ولا بشووف لج صرفه قلت شووف وش تنتضرر
وبعدها قال يلا مشينا قلت وين قال بنروح نتمشى بس شيلي كل اغرااضج لان احتمال نسافر ما عاد فيه وقت وانا رحت ولميت اغاضي ورحنا وتمشينا وبعدهابيوم رحنا لاهله وجلسنا عنهم يوم وبعدها سافرنا وفي رحله السفر يعني في نصف الطريق اقل لي كلام من عرفته ما قاله لي وانواع الكلام اللي ماله داعي وكله منهم وربي وزاااد كررررهي لهم وللان كل ما يروح لهم يجي منعفس وينتقد وانا اقول الله يادنيا انت تنتقدني الحين.
والشي الثاني اذا جينا اهله خلاص ما عاد يتعرف علي هالكلام من حوالي 5 سنوات ليش ماادري ما عاد يقعد معاي ولا يجلس جنبي ولا ينام عندي ولا يتكلم وياي بس ما قلت له شئ وعاادي عندي الا مستأنسه بعد لاني خجوله بس ابي اعرف ليش يسوي كذا
خواتي انا اسفه على الاطاله الله يخليكم ادعو لي ان الله يسخر زووجي لي ويسخرني له ويخلي لي عيالي ويهديهم اللهم ارزق من دعت لي رزقاًهنيئاً آآآآمين وسخر لها زووووجهاا يارب
واشكر كل من تاابع قصتي وساامحوني اذا فيه اخطاء املائيه.

 

[صبيه شقيه]

الله يسخر زوجك لك ويسخرك لزوجك ويخلي لك عيالك

 

[احترت بخليلي]

ه

متابعينك يا عزيزني والله يوفقك

 

[(مرام)]

جزااااج الله مني كل خير

 

[الأميرة ابتهال]

تقهرين اهله وتحرينهم علشان تنتقمين للاختك !!!