السلام عليكم ورحمة الله وبركاته ،،،
انا عندي مشكلة وماني عارفة شلون اتعامل معاها .. حاولت باكثر من طريقة واستشرت ناس وايد متخصصين ومعارف اصحاب خبرة بالحياة بس احس للحين ما لقيت احد يفهم معاناتي .. ابي ارتاح واحس اني اتصرف صح ومو غلطانة او مقصرة بحق احد.. ارجوك يا اخت ناعمة تساعديني باسرع وقت
انا عمري 31 سنة ومتزوجة من 11 سنة وعندي بنت عمرها 10 سنين وولد عمره 8 سنين والحين حامل الحمدلله ..
في بداية زواجي عشت 3 سنين حياة زوجية طبيعية فيها الحلو وفيها المر .. زوجي طبعه قليل كلام وما يعرف يعبر عن مشاعره بس كان يحاول ويتفاهم معاي وكنت مرتاحة معاه ..وكان يصرف على البيت
عقبها دخل مجال الاسهم والبورصة وتغيرت احواله .. طول الوقت تفكيره ووقته واهتمامه فيها ولا يحس فيني ولا في عياله ... كنت اتحمل واتغاضى ومرات انفجر لانه قام ما يهمه ازعل ارضى ارتاح اتضايق .. بس كنت متحملة وحتى ساعدته ماليا بقروض لتسديد ديونه .. علما انه من دخل هالبورصة ما قام يصرف علينا ولا اشوف أي ارباح من شغله فيها .. كله خساير وديون ...
من اكثر من 3 سنين انصبوا عليه بقضية شيك بدون رصيد وانحكم 5 سنين .. بس هو سافر برا قبل صدور الحكم .. اول شهرين راح هناك كان يدق علينا ويتواصل وكنت ابعث له فلوس لانه ما عنده .. اهله كانوا مو راضين عليه ولكني تدخلت واجبرتهم يتحملون مسؤلية القضية ومعيشته هناك .. وكنت احاول اضغط عليه انه يرجع وينفذ الحكم ولكنه رفض وقاطعني وصار بيننا قطيعة .. وكنت بين كل فترة اكلمه عشان يرجع بس كان يرفض ويقطع عنا ..
بعدين سعيت انه نستأنف الحكم ونحاول نظهر البراءة وكنت انا اللي اتابع القضية مع المحامي واهله وهو ولا يهمه اذا ما كنت ادق واقوله الاخبار ما يسأل .. وللحين القضية ما انتهت ...
هذا مختصر الوضع .. بس انا اللي مضايقني انه مو مستعد يتحمل مسؤلية اللي سواه .. تخيلي صار لي اكثر من 3 سنين عايشة بروحي مع عيالي بالكويت وهو برا متحملة كل شي على راسي.. وهو لا يدق ولا يسأل واذا دقيت عليه ما يرد او ما يبي اكلمه او اعاتبه على قلة سؤاله او اهماله .. انا ما انكر اني مرات اقول له كلام جارح واتنرفز بس من حر ما في قلبي والله .. تدرين انه ما نشوفه الا مرة بالسنة لمدة اسبوعين لا واحنا اللي نروح ونحرص مو هو .. ومن نرجع من السفر يرد على المقاطعة .. انا تعبانه وايد .. ابي احس اني متزوجة حالي حال الناس .. اوكي زوجي مسافر بس في طرق وايد الواحد يقدر يتواصل فيها .. بس هو لا يبي يتواصل ولا يرد علي ...
ودي اعرف ليش يعاملني هالمعاملة ؟؟ انا ماسكة بيته وعياله وقضيته ... وكل شي متحملته في سبيل انه يحس ويفهم .. انا مو من حقي اعاتب او ازعل من هالمقاطعة ؟؟ ياربي انا ماني حاسة ان امراءة متزوجة .. وللحين ماحنا عارفين متى تخلص القضية وهو بيقعد على الحال .. انا خلاص ماني قادرة اصبر .. جدام الناس انا متزوجة ومستانسة والله يعلم اللي فيني .. ماحد يدري من الناس بالقضية لاني متسترة عليها واحاول اتظاهر ان حياتنا عادية وماكو شي صاير ...
ارجوك دكتورة ناعمة ساعديني .. ادري في تفاصيل وايد ما ذكرتها .. بس مادري شاقول شاخلي
اذا في مجال احصل استشارة هاتفية او عالموقع بس تشرحيلي الطريقة
وجزاك الله خير والله يفرجها علينا وعالمسلمين
