زوجي ما يحترمني ... ابي حل ؟؟؟

[عاشقة المجد]

السلام عليكم جميعا

المشكلة اللي مأرقتني وسببتلي ضيق نفسي إني دايما احس ان زوجي مايحترمني
هذا مو احساس أو وهم هذا واقع
يوم بعد يوم يتاكد لي هالشعور من خلال وايد مواقف اخرها اليوم
تخيلوا اليوم صارت مشككلة بسيطة بالكمبيوتر انا مالي دخل فيها بس لاني انا اخر وحده استعملته
قاعد يصرخ ويتأفف جان يقعد يقولي انتي بومة كل ماتمسكين شي تخربينه وقاعد يكررها
بومة بومة بومة بومة ....
بصراحة هالشي واااااايد حز بخاااااااااااااااااطري وضايقني
ولما حقرته جان يعصب ويقول لا والله بعد موبس بومة انتي آفة
حدي مو طايقته ولا طايقة اشوفه او اسمع سيرته
ساعدوني شسوي معاه ودي انفصل عنه انا مو محتاجته بحياتي ​

 

[2010 lulu]

بما اني اول وحدة رديت عليكي اقول لك الحمدلله ان ربي اعطانا الصحه والعافيه وعلى طول ان شاء الله مانحتاج الرجال في اي شئ طالما انتي مقتنعه انك ماتحتاجيه انا انصحك ان تتركيه واستخيري ربي وان شاء الله يبدلك خير منه اقول هذا الكلام وانا مثلك والله طالبه الطلاق لاسباب كتير ومن ضمنها هذا السبب والله معايا ومع الجميع ماراح ينسانا ان شاء الله

 

[شجون دبي]

عزيزتي
لاتفكرين انج تنفصليين حرام حاولي تتفاهمين معاه وتفهمينه
الله يهديه بس

 

[عنقود عنب]

لا تكبري الموضوع يااختي

في كثير من الرجال يكون لسانهم سليط ...ولكن قلبهم ابيض

انت بيني له ضيقك من اسلوبة في الكلام ..وان شاء الله مع الوقت يتغير

 

[بدور التماسي]

مانصحج بالانفصال بالعكس قعدي وياه اتفاهمي وياه وخبريه انه من حقج الاحترام

وان هالشي يضايقج وقخبريه انج انتي تحترمينه فلازم يبادلج الاحترام ....

واذا ماجا وياه الكلام حاولي تغيرين اسلوبج وياه بس بكاء بحيث يحس فيج وانه غلطان بالي واه

والله يهديه ياااارب ويسره لج وعليج بقيام الليل والاستغفار .....والسموحه منج.....وان شاء الله نسمع اخبار حلوه منج

 

[masterpiece]

حبيبتي حاولي تكسبينه يعني اذا عصب عليج و غلط ردي بابتسامه و قوليله اشدعوه و مايصير خاطرك الا طيب و صدقيني بيستحي .

 

[هواجسهـ]

ليه الاستعجال بقرارات مثل هذه

يمكن هالتلفظ من اطبااع زوجك حتى مع امه وخواته وربعه


يعني بالنسبه له .. متعووود


وانتي طبعا مو متعودهـ


فحلوووو تزعلي بصمت واذا سألك قولي له .. انت يمكن قلتها ماتقصد بس بجد حاااازهـ بنفسي انا مااحب كذا


ومع كم دمعه دلع تأدبيبنه



غير انك تحرمينه من كذا شغله يحبها كم يوم




ع العموم انتي ادرى بزوجك ونقاط ضعفه وقوته


موفقه

 

[عـسوووولـه]

يا اختي لو كل حرمه زعلت من زوجها وطلبت الطلاق علشان كلمه قالها بحاله غضب كانت الدنيا خرررررررربت..


تعوذي من ابليس اختي.

 

[اماراتية دلع]

انا اقولج بصراحة هالحالة تجي ريال يوم يمل من الحرمة صدقيني
شكلج من زمان ما وقفتي وياه وقفة محترمة
يعني ازعلي زعلة و حتى لو يريد يصالحتج لا تعطينه ويه
خليه يتربا شوي عشان ما يعيد هالكلمة

 

[@باونتي@]

في لحظة الغـــــــــــضب..الكلام لايحتســـب

 

[فجرالشمال]

حبيبتي استخيري وحاولي تجلسين معه وفهميه يغيراسلوبه معك زوج اختي لسانه دائم بذي بس قلبه طيب واصبري

 

[رحيل الوقت]

امراتيه دلع قالت ووفت صراحه لابد توقفينه عند حده

 

[كل العناد]

وسعي صدرك وحاولي تتذكرين محاسنه وما يمنع انك تحطين حد بس مو تطلبين الطلاق الله يسخره لك

 

[مسرعه بشويش]

ليش الطلاق لموضوع مايسوى ونا اختك زعل وقال هالكلمة
وخلص ابتسمي واسكتي يعني لو قال بومة صرتي بومة كبري عقلك عنه ونا اختك

الله يفرج همك

 

[الغربه تأكلنى]

الاحترام بين الزوجين اهم شئ ممكن تحتاجه الزوجه
لازم تقفي موقف جاد في هذه الامور
زوجك لا يحترمك لانك اعطيتيه هذه الفكره عنك
لازم تجبريه على احترامك من كلامك العذب وعدم الغلط فيه
تحدثي في هذا الامر مع كبيرك واجعليه يتحدث معه بشكل حازم
انت اخذت بنت ناس ولازم تحترمها لانها مو بنت شارع لازم توقرها والا مالها داعى وجودها عندك
احنا نأتمنك على بنتنا عندك ولكن اذا كنت لا تصون الامانه يبقى ناخذها احسن
هذا كلام العقل ​

 

[الـمـكـسـوره]

اهيء اهيء اهيء

والله حالتي نفس حالتج زوجي ما يحترمني بتاتا امس بلي سكر التلفون بوجهي وليما اليوم ما كلمني ولا عبرني..

والله اني صرت اكره نفسي بسبته..

لانه رخصني وانا احس باني رخيصه بسبب معاملته لي..


وعلى فكره زوجي طيب بس مو معي للناس واصدقائه واهله وانا لاااااااااااااااااااااء..


وانا وبكل صراحه لما اطلب منه الطلاق ما يرفض يقول لي روحي لبيت اهلج وبطلقج..


شوفوا كيف وصلت وقاحته !!


مه اني احبه واايد وما اقصر عليه بشيء واراعيه بكل شيء..


المهم احس اني طولت عليكم ..

اختي ... انا ما ابي اخرب بيتج بالعكس استحملي وكثري من الاستغفار وربي يفرجها لج..

 

[حلوه بعيونه]

اختي حاولي توضحيله عالعيب فيه وتفاهمي وياه يمكن يسمعلج بهدوووء وتنحل مشكلتج بس انا نفسج

ما احب هالنوع من الرياييل الله يهديه حقج

 

[المتغيرة للأفضل]

ازعلي عليه ولاتكلميه الى ان يشعر بالجرح الذي سببه لك وعندما يحاول يراضيك بيني له انه يجب ان يحترمك ولايتلفظ معك بالفاظ غير لائقه لان الكلام صفة المتكلم

 

[عاشقة المجد]

بما اني اول وحدة رديت عليكي اقول لك الحمدلله ان ربي اعطانا الصحه والعافيه وعلى طول ان شاء الله مانحتاج الرجال في اي شئ طالما انتي مقتنعه انك ماتحتاجيه انا انصحك ان تتركيه واستخيري ربي وان شاء الله يبدلك خير منه اقول هذا الكلام وانا مثلك والله طالبه الطلاق لاسباب كتير ومن ضمنها هذا السبب والله معايا ومع الجميع ماراح ينسانا ان شاء الله

شكرا على مرورج
والله يساعدج ويساعدنا

 

[هبوب النسيم]

منو قال انه الحياه كلها عسل وسعاده بالعكس لازم يوم حلو ويوم مر ولازم تمر مشاكل بين الاثنين

يعني كيف تبين تحسين بطعم الفرح اذا ما حسيتي بالحزن

حتى الواحد يمل اذا كل يوم يكون بسعاده

صبري وحاولي تتقربين منه هذا طبع الريايل دفش والا كيف يكون ريال تدلعي عليه يعني قالج بومه قوليله اذا انا بومه انت بعد بومه والا كيف بني ادم يأخذ بومه

يعني خذي الموضوع بمصخره وضحك لا تكبرين الموضوع