خلاصة تجربتي من زواجه علي ونصايحي للزوجات الاوليات (زوجات ناجحات)

صباح الخير غالياتي ..
سامحوني على التأخير ..

نبتدي بعون الله بأمثله عن الذكاء العاطفي ..

..........

وشو هو الذكاء العاطفي

بشكل مبسط :

هو ردود انفعالاتك وتفكيرك
ولكن مزودجه كيف ؟
بما معنى ان ردودك وانفعالاتك نابعه

بين العقل والقلب
وبين الشعور والفكر

تتذكرون لما قلت لكم ان زوجي يكره ذكائي ..

لما اتخذت القرار اني اخفي هالشي واحاول قدر الامكان اني اتغيبى او اني احسسه انه افهم مني ..

طيب هذا نوع من الذكاء العاطفي

مثال :

تغاضيك عن سيئات زوجك او لما يدور عليك الزله

هذا مو برود اعصاب ولكن انتي فعلا

ماشيه على منهج الذكاء العاطفي

انك تتحكمين بعاطفتك ولكن تخلين عقلك يمسك زمام الموقف وتتصرفين بحكمه ..

لو مثلا استعنتي بس بعاطفتك وين راح توصلين ؟

مثال :

خانك تزوج عليك منقهره منه عندك مشاكل معه

طيب خليتي عاطفتك تجرك

دخلتي عليه

صرختي وقلتي كل الي تتمنينه يوم من الايام توصلين له اتهمتيه سبيتيه
وصلتي لمرحله ان ما عاد عندك شي تقولينه وبالنهايه ختمتيها من حالة هستيريا الى حالة انهيار ودخلتي بنوبة بكاء ...

وش استفدتي ..

هل رجع لك حقوقك

هيهات الرجل ما يرجع حقوق الحرمه بالشكل هذا ..

مهما يكون يا انك تعرفين نمطه وترجعينه بالعقل او بالعاطفه

وبكلا الحالتين الذكاء العاطفي

هو الحل الوحيد لحل المشاكل اعتبري هالقاعده قاعدتك الاساسيه بتعاملك مع الجميع مو مع زوجك بس ..

نرجع للهستيريا الي دخلتي فيها قبل اشوي ..

يا خواتي ما في شي يقوي عاطفتك وتقدرين تتحكمين فيه الا بالعقل والذكاء انك تتصرفين بحكمه ..

عموما القرارات الي انتي بتاخذينه بحياتك مع زوجك او مع الناس

ما راح تقدرين تاخذينه الا على اساسين العاطفه والذكاء

الذكاء العاطفي

كلمتين :

اولا الذكاء ::::

غالياتي الذكاء يعني انك تميزين الحقائق بالاحداث وتاخذين وقتك انك تفصلين الامور بعقليه

بعض الغاليات تفسر الامور على حسب تفكيرها

لكن الذكاء فعلا يحتاج انك مو بس تفكرين بالامور الي شاغل بالك ولكن

المطلوب منك تربطين افكارك بالاحداث نفسها كلامك كلامه واقع الحياة الي عايشينها تربطين كل هالاشياء مع بعض

ليه بعض الحريم طايحين بالمواضيع الهادفه للحياة الزوجيه

عشان تتثقف صح وتعيش حياة مستقره مع زوجها تمام

اوكي هذا هو الذكاء لان وقت ما يحصل لك اي ازمه

تربطين امورك والي تشوفينه والي تسمعينه ببيتك مع المعلومات الي انتي قريتيها بنفس الوقت

وقتها بتحسين ان تفكيرك له هدف معين وراح توصلين لنتيجه مرضيه لحل مشكله او ... قرار معين ...

طيب الذكاء فيه انواع

واحد :
الذكاء اللغوي :::

ومنها انك تستخدمين مفردات لها وقع جميل بنفس زوجك مثلا او الشخص الي تحاورينه مو شرط مفردات صعبه ولكن مفردات ممكن يوصلك لهدفك المنشود من غير ما يتأزم الوضع

طبعا تذكرون لما قلت لكم تمرني على الكلام او النقاش قبل ما تتكلمين مع زوجك ...

ليه لأن وقت ما انتي تتمرنين حتى لو بداخلك ترتبين الكلام الي بتقولينه

هذا اولا راح يساعدك انك توصلين الهدف الي تبينه لحل مشكلتك او توصيلك معلومه له ..

حسن الالقاء له دور كبير ان الشخص الي قدامك يسوي لك حساب ويقيم شخصيتك انك انسانه ممتازه وان لك هدف حتى لو كان هدف مو واضح بالنسبه له الا انه يحب انه يستمع لك لان بالنهايه راح توضحين له كل المفاهيم بشكل ممتاز لانك واثقه انك تمرنتي واستوعبتي وشو هدفك وفكرتي بشكل مضبوط اولا بربط امورك مع الاشياء الي تتعلمينه ومع ما يتماشى مع حياتك ومع تمرينك اللغوي قبل ما تجلسين تتكلمين معه ..

أنا قاعده افصل لكم كل شي ..

اكيد بما انكم بلقيسيات

تعرفون ان الرجال في منهم يتأثر بالكلام وبعضهم باللمس وبعضهم بالشم هههههه

تكلمنا بالنسبه للذكاء اللغوي وكيف ترقين نفسك للمستوى هذا جدا مهم راح تعالجين فيه كل مشاكلك بشكل ممتاز جدا ..

النوع الثاني

الذكاء المنطقي :::

ينفع مع الشمالين حلاتي :19:

هو انك تكونين انسانه رياضيه

ههههههه سلامات كيف يعني رياضيه

طيب الذكاء المنطقي انك تتجردين من كل الامور وانك تفكرين بالمشكله نفسها بشكل منطقي

مثال :
اكيد مريتوا بفترات انك لما تفتحين موضوع مع زوجك عشان تناقشينه عن المشكله الي بينك وبينه الآن او الي حصل منه وجرحك مثلا

تجين عاد انتي تفتحين له سوالف قديمه وتربطين الامور كلها مع بعض

هالشي هذا مو بصالحك ..

لان الذكاء المنطقي

انك تتجردين من كل الي حصل بالماضي او الي بيحصل وتقعدين بس على هالمشكله نفسها تفصلينها بالمنطق وتحلينها نهائيا

يعني لو كنتي تحبين الفلسفه وكتب الفلسفه والمنطق ووو فأنتي اكيد انك ناجحه جدا من ناحية الذكاء المنطقي ..

النوع الثالث ::
الذكاء الشخصي ::

هذا الي قاعدين تسوينه الآن بالمنتدى تدورين نمط زوجك صح ونمطك ايضا

الذكاء الشخصي

انك تعرفين نقطة ضعف الشخص الي قدامك لان راح يفيدك شخصيا

اهتماماته كيف تجارينه بالكلام كيف تاخذين منه الي تبينه كله هذا يسمونه ذكاء شخصي يعني مردوده لك شخصيا ..

لما تعرفين نقط القوه والضعف بالشخص هذا ولو كان زوجك مثلا

راح تقدرين تطورين علاقتك معه بالشكل الي يليق معه يعني تفهمين من حركاته من كلامه وما عاد بيكون اساسا انسان غامض بالنسبه لك

المعلومات الي انتي تستنتجينه عن زوجك راح يفيدك كثير انك تحفزين العلاقه الي بينك وبينه وكمان انك تطورينها بشكل افضل ..

اكثر المشاكل الزوجيه مو الخيانه وبس

الا عدم التفاهم اكثر الازواج ما يتقبل زوجته لانها دائما تفهمه خطأ او العكس ان الزوجه تشوف ان الزوج يفهمها بشكل خطأ

واساس المشكله انهم ما استعانوا بالذكاء الشخصي

دراسة الشخصيه مهمه عشان يتوالفون مع بعض ..

زي الشركه لما يأسسونها يعملون لها دراسة كامله

والزواج ايضا يجب على الزوجين دراسة شخصيات بعض محل القوه والضعف واحنا جدا فخورين بالمواضيع الي عندنا بالمنتدى وقليل جدا من الرجال يشدهم هالمواضيع الاسريه الي يخص انماط الشخصيات

بالتالي الزوجه عليها دور كبير انها تتحمله عشان تطور هالعلاقه من الغموض الى توضيح الشخصيات والتركيز على الطوير الذاتي بين الزوج والزوجه ..

..........

والله الذكاء انواع كثيره بس انا كتبت الاشياء الي تفيدك كزوجه ان شاء الله

امثله كثيره على الذكاء

الذكاء الاجتماعي
الذكاء البيئي
الذكاء المكاني
الذكاء الايقاعي
الذكاء البدني

لكن هالامور الي كتبتها يتبعونه اكثر الدكاتره بالخارج لكيفية دراسة الطلاب فيها وما راح اقدر افصلها لان هو خارج الموضوع اساسا ..

.......

باقي اتكلم عن العاطفه ان شاء الله

والعاطفه ما لها انواع ولكن لها سبل كثيره لاستغلالها لبعض المواقف خصتا مع الجنوبي ..

راح اتكلم عن العاطفه

وبعدها راح اربط الاثنين مع بعض

وان شاء الله تقدرين تستعينين بالاثنين من اليوم ورايح عشان تتخذين قراراتك سواء مع الزوج او بحياتك العامه

.....

راجعه ان شاء الله

امممم مدري والله ان شاء الله اضافتي تعجبكم وما يكون فيها كلام غير موضح ..

ان اعجبكم فأتمنى مشاركاتكم
وان حسيتوا ان كلامي غير واضح

وما وفيت بالشرح ياريت تشاركوني بارائكم لعل بعض الاسئله يوضح الامور بشكل ابسط ...

......

الى اللقاء
 
حزن الحياة قال:
مشكوووووره يااختي كنت احلم والله

مدري كيف اشكرك لانك بصراحه معروفك كثيير علينا

بنات دعواتكم لي بكره ملكة زوجي ومش قادره اتخيله يوم يروح لها

يارب تثبت قلبي وتجبر بخاطر كل وحده يزوج عليها زوجها
أنقر للتوسيع...


لا شكر على واجب يالغاليه

وسعي صدرك يالغاليه

ابيك ما تتخيلين شي ابد يروح وله ما يروح لها

وادعي ربك ان الله يربط على قلبك

وانا والله ادعي لك حبيبتي عسى ربي يرده لك ردا جميلا وما يستفيد من زواجه عليك الا انتي ويشوف معدنك الاصلي ولا يرتاح الا معك ويعاملك مو زي قبل الا احسن من قبل ..

واضح يا اختي من رسايلك انه لسه شاريك وان شاء الله يارب ما يتغير عليك بالعكس عساه يتقرب لك اكثر

بس ثقي يالغاليه ان كل الي صار والي بيصير خيره ان شاء الله

وربك ما كتبه لك الا انك قادره تصبرين

الليله موعدي معك وما راح اخليك ان شاء الله

شوفي اضافتي هذي الي تو

وان شاء الله تتحكمين بعاطفتك يالغاليه

لان قريت برسالتك الاخيره شي ما عجبني ولا كنا متفقين عليه

تحكمي بنفسك وبعواطفك

بالنهايه اعتبري زواجه لنفسه مو عليك

من يقول تزوج على راسها وحده

غلطااااااااان فعلا

لأن هالشي مو صحيح لو كان صحيح كان ما جت الثالثه والرابعه


ما تزوج على راسك لأن مكتوبه له مو لك انتي مالك علاقه فيها

ولا بحياته اساسا

بعد الزواج الاولى المفروض انها تعمل فاصل اعلاني كل ما يطلع من عندها

تعتبره مو موجود بحياتها تشوف حياتها وتعيشها طول بعرض

ولا تقصر بعمرها ولا على عيالها بشي ..

لما تكونين على هالمنوال معه

راح يرتبط فيك اساسا ويشوف راحته معك ببيتك

لانك ما تتدخلين بحياته الي يهمك حياتك ببيتك ومعه وقت ما يكون عندك وبس

الكلام يطول ان شاء الله الليله نتلاقى مع بعض

قومي تسنعي وتكشخي من الحين وخلي الباقي على ربك

بخري البيت وجهزي امورك اليوم لقائك خاص مع ربك

افرشي لك سجادتك بمكان ترتاحين له وجهزي القرآن جمبك

وعشي عيالك ونوميهم وادخلي بعالم ثاني مع خالقك

اوعدك ان هالتجربه ما هي الا قربك من الله سبحانه وتعالى

ما نبي شي من هالدنيا بعد ما نرتبط ونحس بحلاوة اللقاءات الخاصه مع خالقنا

لأن بعد كل صدمه عاطفيه من هالنوع

نكون متأكدين ان حب الله طاغي على كل انواع الحب والادمان العاطفي الي يربطنا مع الناس

ولو كان اقرب الناس مثل الزوج ..









 
الله يشفيك ويقومك بالسلامة,انا زوجة معدد واستفدت مع اني الثانية,وصدقتي الذكاء العاطفي جميل جدا للي تتقنه ومع الممارسة كل شي سهل والامور مع المعدد كثير ايجابية ومريحة اذا ركنا العاطفة على جنب بالمقام الاول لك وبالمقام الثاني للزوج ,والحب عمره ما يضيع ايا كان ترتيب الزوجة, فقط نشغل هالمخ شوي اللي انعمنا الله فيه ونقوي ايماننا بالله,وهالدنيا زايلة مايبقى الا العمل الصالح

رزقك المقسوم لك يابن آدم محفوظ من قبل ماتولدك امك فليه القلق ,,
 
اختي كنت احلم لقد استفدت كثيرا من تلك الانامل الرقيقه على ماسطرته من عبارات النصح والارشاد من قلب صادق مثلك يحب الخير للاخرين ولكن تذكرت حديثا مغزاه ان المرأة لايجوزلها ان تجعل زوجها يطلق الزوجة الجديده لاادري عن صحته فهل سمعتي هذا الحديث وفقك الله واسعدك 0
 
دعواتي الصادقة بأن يربط الله على قلب كل زوجة أولى كما ربط على قلب أم موسى وأن يسخر لها زوجها ويجعلها دم قلبه ولب عقله وماء عينه وأقول لها ولكل زوجة يريد زوجها الزواج بأخرى أو أنها لا تستطيع < اؤكد على لا تستطيع فعلاً < العيش مع زوجها وهو متزوج
لقد دلنا رسول الله صلى الله عليه وسلم على أفعال هو لم يأمر بها ولم ينهى عنها
لست مضطرة لكتابة الكثير لأنه بالتأكيد الكل يعرف حادثة زواج علي رضي الله عنه على فاطمة بنت رسول الله صلى الله عليه وسلم
أجزم بأن إتباع هديه صلى الله عليه وسلم في هذا الأمر وفي جميع أمور الحياة يكفي عن المعاناة والظلم والقهر الذي تعيشه بعض الزوجات الأوليات
أيضاً لمن تزوج عليها وانتهى الأمر ولكن الزوجة في هذه الحالة لا تستطيع ترك بيت زوجها لأي سبب من الأسباب فهناك فعل فعله رسول الله صلى الله عليه وسلم ألا وهو التنازل
التنازل عن الحق الشرعي < المبيت < أمر يتم بالإتفاق والتفاهم والرضى بين الزوجين وليس لأحد التدخل فيه ولكنه من جانب الزوجة إذا رأت أنها لا تستطيع تأدية حق زوجها عليها ( الجماع ) فهنا يمكنها القول له بأنني تنازلت عن ليلتي للأخرى
^ تنبيه ^
التنازل عن النهار يتبع الليلة لأنه ليس عدلاً أن تقومي بشؤونه في النهار ثم يذهب ليبيت عند الأخرى
أحب أن أذكّركن أخواتي بأن التنازل سلاح ذو حدين
أهم شيء تكونين واثقة ومتأكدة من إن تنازلكي هو حل إيجابي وأنه ليس له تأثير سلبي على حياتكي ولي عودة بإذن الله للتعليق على طلاق الأخرى
ان المرأة لايجوزلها ان تجعل زوجها يطلق الزوجة
أنقر للتوسيع...
تعليقاً على هذا الكلام
الرجل هو من يتزوج وهو من يطلق
والحديث المقصود هو أن لا تطلب طلاق ضرتها وليس تجعل زوجها يطلق​
 
الحمدلله على سلامتك ولاباس طهور ان شاء الله يا الغالية .........
وكلماتك وحروفك كانت كالبلسم الشافي لي ويعلم الله بأنه كان لكي أثر واضح وجلي على نفسيتي التي أحاول منذ ثلاث سنوات بأن أحسن منها منذ طلاقي من ابن عمي الذي رضخ لامر اهله وبكل بساطة طلقني من غير سبب واضح ويعلم الله باني لا أزال أرتجيه سبحانه وتعالى بأن يزيل الغشاوة من عينية ويبصرة للحقيقة ...وأن يحنن قلبه علي وعلى ابنه الذي لم يكن له أي ذنب حيث حرم من قول كلمة بابا وحسبي الله على من سعى بيننا وفرق بيننا والأسبوع القادم ليلة الخميس زواجه وحتى الآن لم أيأس من رحمة الله فلعل وعسى يكون فيه الخيرة لي بعد هذا الفراق المرير الذي تحملته وصبرت على هذا البلاء الذي انعم الله به علي حيث أصبحت أكثر قرباً منه سبحانه وتعالى والحمدلله على كل حال .......شكراً لأناملك التي سنحت وسطرت لنا هذه المشاعر المتعدده من جميع خواتي البلقيسيات .......
تحياتي وتقديري قلبي النونو’’’’’​
 
أسال الله لكم ولكل من تزوج عليها زوجها الصبر والثبات وبرد العافيه فهذا هو الأهم جعلكم الله في منازل الصديقين والشهداء والصالحين وسهل اموركم ويا جعلها تكون اكبر المصايب @@@@@
 
السلام عليكم و رحمة الله و بركاته

حمدا لله على السلامة غاليتي

شفاك الله و عافاك

أتمنى أن تكوني في أحسن حاااال

أسأل الله ان يشفيك و يبعد عنك عين الحاسدين و الحاقدين

أحبك في الله
 
الله يعطيج العافيه هذي اول مشاركه لي وانا متابعتج من زمان بس على السايلنت واتمنى اني اقدر اكلمج او انج تضيفيني عندج سالفتي طويله​
 
الله يعطيك العافيه ويكشف الضر عنك وعن كل

مسلم ومسلمه
 
لا حول ولا قوة الا بالله..........

الله يفرج لنا ولك يااااارب

والدنيا ماتستاهل.......
 
اللهم فارج الهم ،كاشف الغم مجيب دعوة المضطرين اجعل لأختنا كنت احلم من كل هم فرجا ومن كل ضيق مخرجا ومن كل بلاء عافية انك على كل شئ قدير..
لوتكرمت اختي امة الله ارسلي الرابط جزاك الله خيرا..
 
الله يعين الجميع يارب
انا بعد مريت بتجربه واسال الله الثبات و الصبر يارب والدنيا دار ابتلاء , وربي مايبتلي ال الي يحبها والحمد الله على كل حال
 
بارك الله فيك وشافاك الله وعافاك اللهم امين
متابعينك يالغلا بشغف
استغفر الله واتوب اليه
 
الف شكر لك أختي كنت أحلم الله يسعدك ويشفيك من مرضك ويخليك لعيالك ويجزاك عنا كل خير أفدتيني وأفدتي الكثير
الله يرزقك ع قد نيتك ويسهل دربك ويجبر بخاطرك
أنه عزيز قدير...
 
الحمد لله على سلامتك ياأختي "كنت احلم" والله فرحت يوم شفت اسمك... ومشكوره ع الاضافة الحلوه مثلك... في انتظار جديدك....
واسأل الله العظيم ان يعجل في شفاءك يارب ​
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل