خلاصة تجربتي من زواجه علي ونصايحي للزوجات الاوليات (زوجات ناجحات)

سامحوني غالياتي على التأخير

واتمنى اني قدمت ولو شئ بسيط من الطبطبه للاخوات الاوليات الزوجات الرائعات الصابرات لقضاء الله وقدره

ابكتب لكم الليله بعض من الاشياء الي تذكرتها

قبل معرفتي بزواجه وخيانته وكل الاشياء الي حصلت

خواتي غالياتي ..

انا يا اخواتي كنت احلم احلام مزعجه جدا

خصتا بالسنتين الي فاتوا

اول ما نقلت لبيتي هذا الي انا ساكنه فيه وان شاء الله ربي ييسر لي واطلع منه

ان شاء الله على خير واستقر بمكان ثاني

لاني عن جد اول ما جيت هالبيت بديت احلم وبدى زوجي يتغير علي

وبدوا اهل زوجي يناظرون وش عندي وش ما عندي

وقلت زياراتهم لنا اول الشهور

وبعدها زوجي اصر انهم يجون وانا كمان كنت اعزم واوجب

ولما يجون احس ان عيونهم على كل شي

عيونهم تتجول على الاثاث على الحديقه على الحوش الكبير

على الغرف الكبيره والمساحه الي فعلا كان بالنسبه لي تغيير

بعد الفقر الي كنا عايشين فيه ببداية حياتنا الزوجيه

اللهم لك الحمد والشكر

بعدها صرت احلم بأحلام مزعجه

ابتدت تقريبا بعد ما جاب لي شغاله

وهالشغاله طلعت عيوني الين ما جابها

من كثر ما طلبت وتعبت بالبيت وكبر البيت

حاولت مرارا وتكرارا انه يوافق وبعد مده طويله

جابها بعد ما اقنعته ان هالشي لمصلحت عياله

واي شي لعياله ما يرده ابدا كنت ابي ادرسهم واهتم بدراستهم

اما لما كنت امرض ما كان يوافق

مرت الشهور

وحلمت اول مره ان فيه حرمه ما اعرفها

طالعه من قبر بوسط حوشي

ووقتها كان الحوش تحت الصيانه اقصد ان كنا مخططين

اننا نعمله حديقه وكذا ..

المهم المرأه هذي لما طلعت من القبر كانت معفنه

وشعرها ووجها شي يروع بصراحه

وانا شفتها بالحوش وجت دخلت علي البيت

وانا كنت خايفه واصرخ بالحلم

وكنت افكر بعيالي

ماني عارفه اطلع من الباب الثاني للحوش واشرد واهج من البيت

او اني ارجع لعيالي واشيلهم معي وهم كانوا نايمين

كنت بحالة رعب

بالنهايه كنت احاول اني افتح الشباك مدري ليه ما جه ببالي الباب اني اطلع منه

وكنت خايفه ومرعوبه

وقمت من النوم

بحالة ما يعلم فيها الا الله

حلمت هالحلم ثلاث مرات متتاليه

ورابع ليله كنت بنام وزوجي جمبي حس اني خايفه

قال لي وش فيك قلت له خل الابجوره لا تطفي النور

الين ما انام

ونام هو وانا اناظر وجهه وغمضت

حلمت فيها لكن كنت بين الصحوه والغفوه

فتحت عيني

وغيرت نومتي للجهه الثانيه وانا اتعوذ من الشيطان

حسيت بنفسها عند اذني

صحيت قعدت ابكي وش قاعد يصير فيني

في شي اكيد في شي

ما نمت الين الصباح

اتصلت على شيخ وقلت له

قال لي في شي بالبيت مو مريحك استغني عنه

وفي شي راح يحصل بيتغير حياتك

فلا تجزعي وان الله مع الصابرين واحمدي الله كثير

واقراي سورة البقره

فجت الشغاله ببالي

ومشيتها وعطيتها لناس اعرفها حتى ما اظلمها واسفرها

ومشت ..

واختفى الحلم

وواصلت على سورة البقره

وكل الي قاله لي الشيخ

الين بعد اسبوع

كانو جايين هنود يشتغلون

بالحوش ولما راحوا شفت المنظر براا

قبل ما يخلصون لان كان باقي لهم لسه ما خلصوا شغلهم

لما شفت المنظر براا

كان نفس الحلم بالضبط

الارض منقلبه والرمل متناثر و المكان نفس المكان الي هي طلعت منه الحرمه

خفت تعبت بكيت والله مدري وش صار فيني غير انهيار واعصاب


اكمل يالغاليات بكره استحملوني تراني ليلحين بالمستشفى
 
الله يعطيك الصحه والعافيه ويفرح عيالك وزوجك برجعتك لبيتك سالمه ويعظم اجرك في الجنه ومن يقرا آمين ~
 
والله ذكرتيني بذكرياتي المؤلمه اشياء غريبه صارت لي قبل زواجه ما فهمتها الا بعد زواجه
 
بصراحه عورتي قلبي وانا من النوع اللي جدا غيووووووور بس مجرد التفكير انه يتزوج علي احس اني قاعده اموت عالبطيء وماراح اتخيل كيف راح يكون وضعي ,آآآآآآآآآآآآآآآه الله يعين لكني مهيئه نفسي للوضع لان صار عندي انه مافيه رجال يظل مخلص لزوجته لوتشعل اصابعها له لابد يلف بذيله ويجدد على قولتهم ..لكن والله العظيم اني دائما ادعي للي اتزوجوا ازواجهم من قلبي ان الله يغرس في قلوبهم الحب والرحمه والالفه لان كثييييييييييييير ينقلبون بعد الزواج الثاني طبعا انا ما اظلم الزوجه الثانيه لان موهي اللي جته هو اختارها واذا مااخذها اخذ غيرها لكن ادعي انها تكون بنت حلال وتتفرعن عالاولى كانها هي اللي جايتها ...تقبلوا مروري وشكرا
 
صباح الخير حبيباتي اكمل معكم ..

وقت ما شفت الحوش كيف ان صاير نفس الحلم بالضبط

بوضعية الرمال والاحجار خفت ويمكن صار لي فتره ما كنت

طايقه البيت ونفس الوقت احس بالخوف من الوحده

احس ان لمجرد اني اكون لحالي ان بيطلع لي شي

وله بشوف شي وبيوقف قلبي

كنت دايما احس بسرعة بدقات القلب من الخوف والقلق والرعب

استمريت على سورة البقره

الين ما الله فرجها علي بعد يمكن شهر او اكثر بشوي

على ايد وحده الله يجزاها الجنه

داقه الباب بفترة الظهريه

وهالحرمه انا ما اعرفها لكن جت ببداية سكني بالبيت

والجارات كانوا يقولون عنها انها محتاجه وعندها يتامى

الله يخليهم لها

فلما دقت الباب لأول مره

قلت لها تمر علي كل شهر اعطيها الي الله كاتب لها من المقسوم

وفعلا كانت جايه بالظهر

ورحت لزوجي قلت له ابي صدقه

قال لي اخذي كثر ما تبين من محفضتي

وفتحت محفضته ولفت انتباهي

شي ملفوف لف زي جلد الحيه

بكيس نايلون مربوط بالخيط الابيض

ولان الوقت كان ضيق والحرمه تستناني

فخذت الفلوس وعطيتها وتيسرت الله ييسر لها امورها يا رب

لو ما الله ثم هالحرمه ما شفت الي شفته

المهم اني رجعت لزوجي سألته

قال لا هذا لواحد عطاني زي الحرز عشان العين والحسد

قلت له وش يدريك يمكن انه يكون عمل

قال لي والله هالشخص الي عطاني ما في منه بالطيبه انا اثق فيه

برضوا ما اقتنعت

من متى يكون الواحد يرقي نفسه من العين ويحفظ نفسه بجلد الثعبان

رحت اخذته وقلت له تراني حرقته

وانا كنت لسه محتفظه فيه

قوم الدنيا وما قعدها يومها سكت وسكت

الين اول فرصه لي ازور صاحبتي

الي زوجها شيخ واستشيره بأكثر اموري سواء بالاتصال المباشر

وان كانت الامور محرجه اخليها هي تكلمه بالموضوع

عطيتها الجلد الملفوف وقلت لها ولي يعافيك

شوفي زوجك خل يشوف وش الي فيه

وناداني وتغطيت ودخلت المجلس مع زوجته وجلست

وقعد يقرأ

وبعدها فتح الكيس ثم الخيط ثم فك الجلد الرقيق وكأنه كان مجفف

وبعدها بان كل شي

ورقه مرسوم فيها مربعات وكل مربع فيه حروف وطلاسم

حسيت اني دخت من الفجيعه

قال لي الشيخ

يا بنت الناس

أمكن زوجك ما يدري بإلي فيه

قلت له قول وش مكتوب وش فيه

قال مكتوب عندي بنهاية الورقه وخلاني انا بنفسي اقراه

مكتوب كتابه حمراء والله العالم ان كان بدم الحيض ام لا

لكن ريحة الورقه كانت مقرفه

مكتوب ان انعمي وما اشوف عيوب زوجي واداري عن اخطاءه

او يمكن المقصود اني اتغاضى عن كل شي من خيانه او شك

اما هو مكتوب انه يحط عينه على عيوبي ويشوف كل زلاتي

بكيت

قال لي الشيخ توكلي على رب العالمين

خلاص ربك فرجها وعسى ان كل امورك ان شاء الله طيبه

قلت له ان صاحبه عطاه

قال لي ان بعض الظن اثم

ولكن السحر هذا ما يسويه الا حرمه

لان تبيه يجي ويروح معها وانتي غافله عن تصرفاته ويكرهك من عيوبك

حتى لو شاف منك كل زين ما يقدر يميز الا عيوبك

قلت حسبي الله ونعم الوكيل

اللهم ومن ارادني بسوء فأرده ومن كادني فكده

الدليل الثاني ان الخط يمكن مكتوب بدم الحيض لان كان واضح

ان مو بماء الزعفران ولا بقلم والريحه مره قويه ومعفنه

يا رب سترك

اللهم احفظنا من كل شر وبلاء

رجعت البيت

وانا فكره وحده بس ببالي

من بالدنيا يبيع اخرته عشان شهواته الحيوانيه

عشان غايه ممكن ان الله يرد له بمليون عاقبه بالدنيا والاخره

من بالدنيا ياخذ غير الي مقسوم له

وين العقول وين الضمير

بكيت على حال الدنيا والناس اكثر من بكائي على حالي

بكيت على الي وصلنا له من هالبشر اكثر من مصيبتي بزوجي

اعتقد بعد هالشي حصل لي الكثير الي غير حياتي

صحيح ان بدى عندي شي يخليني اشك بتحركاته بتصرفاته

لكن كنت اسكت وما اقول

وان طفح الكيل كنت اقول اشياء هو يفتح عينه ما يدري وشلون عرفت

مثلا كنت اشوف الهدايا مثلا يجيبه لنفسه

كنت اقول له عليك بالعافيه عندها ذوق والله

كان يقول لي تعوذي من ابليس

يالله يا زوجي يا حبيبي كيف اتعوذ

وابليس انت الي خليته يحلي لك مجالسة هالحرمه

كيف كان احساسك لما تجيب لك عطر وتتعطر وتدخل معي الفراش

كيف كان احساسك وانا اطقم لك ملابسك مع الساعات الي كانت تهديهم لك

كيف هنت عليك وكيف هانت عليك العشره

كيف تقول لي اذكري الله واستغفري تراك ظالمتني

ما خفت من رب العالمين انك انت الي قاعد تظلمني

ما خفت ان وقت ما تنطق بنصايحك لي اني اتعوذ واذكر الله ان

بنفس الوقت الله ياخذ حقي منك وانت واقف

وش اقول بس حسبي الله ونعم الوكيل

حللتك يا زوجي انك ابتعدت عن طريق الزنا وتزوجت وصنت عورتك

حللتك على كلام الناس عني اني اكيد اكون مقصره رغم ان الله يشهد بعكس هالشي

لكن ...

ما احللك ولا ابيحك على كل ساعه ودقيقه خنت العهد الي بينك وبين رب العالمين

ما احللك على كل دخله علي وانت بنجاستك جاي من عندها

ما احللك لما كنت اغسل ملابسك الداخليه الي قضيت فيه بالحرام معها

ما احللك اني كويت وبخرتك قبل كل طلعه عشان تشوفها وتقعد معها

الجرح عميييييييييييق

والاستغفال الي حصل لي وحصل لكل انسانه صانت العهد بينها وبين ربها قبل

ما تصون الزوج والبيت والاهل والعيال

ليه ؟؟

ليه ما جه بباله بلحظه ان ممكن انكسر لو عرفت

ليه ما جه بباله لحظه ان ما استاهل هالشي

على كل الي كتبته لكم احس والله ثم والله

لسه بقلبي احساس ودي اترجمه بس ماني قادره كيف

اوصف لكم ...

بعد فك السحر

صار تغير فيني بشي سبحان الله خيره من رب العالمين

صرت احب حب مو طبيعي للعباده للسهر مع ربي

مو عشان اطلب ان الله يحفظني وبس

ما كان هالسبب الرئيسي الخوف من السحر

لا والله ما ادري كيف تغير حالي

صرت انتظر بفارغ الصبر الاذان

صرت انتهز اي فرصه واصلي واختم بالمرات

مدري كيف تغيرت

قبل كنت اصلي كل صلاة بوقتها صحيح

وكنت اختم كل شهر الحمدلله رب العالمين

واستغفر على الاقل مية مره ولله الحمد

لكن تغيرت والكل استغرب

غيرت اشياء كثيره بحياتي

ولما اعتمرت زاد هالحب زاد الارتباط

واخر يوم لي بالحرم

بكيت من قلب

خفت اني ما ارجع واشوف الكعبه مره ثانيه

والله ان ما اروح الفندق الا وقت النوم

اقعد اشوف الكعبه وابكي طول اربع ايام

رجعت وواصلت حبي الجديد الي طغى على كل آلامي

واختفت احلامي المزعجه الي بين فتره والثانيه كنت احلم فيهم

الين العمره الثانيه والحمدلله رجعت وانا اقوى

العمره الثالثه كنت رايحه مع عمي ابو زوجي وحماتي

وحماتي كانت مشغوله مع زوجها لان كان معنا بعد

انا كنت لحالي بأغلب الاوقات مع الحريم الي معنا

وتعرفت على وحده الله يذكرها بالخير

حبيتها حسيتها امي الي فقدتها

كبيره بالسن لكن افكارها وطريقة حديثها

جذبني انها تعرف كيف تتعامل مع الي اصغر منها بالخبره وبالعمر

وبنتها الي كانت معها كانت بسني

قالت لي انا زوجه اولى

فتحت عيني قلت لها لا اااا !!!

قالت ليه مو مصدقه

قلت لها رغم انك ام وعندك بنت على قدي

بس ما شاء الله شكلك ما يوحي انك بالعمر ذأه

واخلاقك ما شاء الله

والله ان احلى عمره لان فعلا ساعدتني هناك كثير

علمتني اشياء كثيره خلال 13 يوم تكلمني عن محاضرات

وعن اسماء كتب وعن اشياء كثيره

ومن بين سوالفها كانت تذكر جارتها زوجة زوجها بكل خير

قالت انها ساكنه معها بنفس البيت

هي لها تحت والثانيه فوق

قالت لي انها كانت رايحه العمره مع اخوها

ولما كانت هناك حلمت ان زوجها تزوج عليها

فرجعت البيت ونست الحلم

الين يوم فتحت دولابه وشافت ثوب جديد

معطر وروائح عجيبه غريبه وكأن ثوب عرس من التعطير والتبخير

تقول انا عرفت ان الحلم تحقق

راحت له قالت له جزاك الله خير

تعرف اني انسانه مؤمنه واعرف ربي

وما حلل ربي شي الا لاسباب كثيره

ربي يسعدك معها تقول حست بنار بقلبها

لكن كتمت الين ما الله هداها لسجادتها اكثر واكثر

وجت جارتها وصارت تعاديها بالبدايه وكانت الاولى صابره

الين ما جابت اول طفل لها فالاولى ساعدتها بالنفاس

وهنا كانت البدايه انها قدرت تكسبها

تقول حاليا هاجرني وهاجرها

يا دوب المصروف يوصله لنا

خسر الثنتين بسبب انانيته

وتزوج الثالثه وخلاها بعيده عنهم

لان عرف ان الثنتين شايلين بعض وصارو على قلب واحد
تقول رغم انه بعيد وهاجر صار له اكثر من اربع سنين

الا اننا انا وهي يوم علي بالطباخ ويوم علي بالغسيل

والبيتين صاروا مفتوحين على بعض عيالنا صارو ينادونا

انا وهي بأمي

تقول لو كان لسه بينا كان بيصير مشاكل يمكن بالغيره

وكان هو يساعد على هالشي ان يجيب هنا وما يجيب هناك

عشان يصير بينهم مشاكل ويرتاح باله ببيت وحده بس ويهجر الثانيه

مدري والله الرجال وش يحس فيه لما يسوي هالحركه بالذات

يقهر وحده منهم لغايه بدون اسباب

وحده تقول يمكن ان فيها خراب يروح للثانيه

طيب وش دخل الخراب بالعشره بالجلسه بالاكل

ليه هل عقول الرجال لمجرد ان الوحده توسعت او فيها خراب

ما يقدر يقابلها قلنا انه يمكن ما يرتاح بالنومه معها

لكن وش دخل الجلسه وش دخل العشره الطيبه والمعروف الي الله

سبحانه وتعالى ونبيه وصى فيه امة محمد

كلام مو منطقي حنا الحريم نقنع نفسنا فيه

عشان بس نطلع بنفسنا العيوب

ياما في رجال تموا سنين يشتمون حريمهم

يعني جت على هذي ما قال لها انتي خراب سوي لك حل

بيداري على مشاعرك مثلا

ابد والله انهم ما يخجلون لو كان لهم شي بخاطرهم اكيد بيطلعونه بعز القهر والمشاكل

راجعه اكمل غالياتي ...
 
الحمد الله على السلامة ياالغالية
أنا مستمرة معك لأني بديت مثلك وحابة أكمل نفس المشوار والحمدالله الله هداني لج علشان تساعديني أكثر الحمدالله رب العالمين
يارب يفرج عنج ويقويج زيادة وزيادة يارب
 
قرأت موضوعك كللللللللللللللللللللللللله
صراحة دمعت عيوني بحرقة
تصدقين أنا مريت بأشياء إنت ذكرتيها
زوجي دايم له علاقات.................
وألحين أشك إنه متزوج مسيااااااااااار أو شيء من هذا
بدأ يهتم بنفسه و مظهره....
له سفرات غريبة الله يستر
كمان أنا حسيت بمرارة شكك...
إن شاء الله مايتزوج علي...
ويبعده عن الحراااااام
الله يكفينا الشر والأشرار...
ويهدي ضال المسلمين...
ويرحمنا ....الله يشفيك يا(كنت أحلم )
الله يثلج صدرك... ويذيقك حلاوة الإيمان....
لا ننسى أن التعدد حلال أكيد فيه خير لنااااااااا
​
 
حمدلله على السلامة يا قلبي والحمد لله على رجوعك لنا سالمه
وان شاء الله اخر الاوجاع
ننتظرك على احر من الجمر
والله استفدت كثير من قصتك ولله الحمد والمنه على الصبر
وان شاء الله راح نحصله بالاخرة
 
موضوع رائع

الله يصبرك حبيبتي ويصبر جميع المسلمات
 
بكيت غصب عني مع اني ماقريت غير اول صفحتين
الله يجبر كسرك ويحفظزوجي ومايشوف غيري
جرحي هالمره عميق وخيانته دمرت كل مشاعري
الله يثبتني ويلهمني الصواب
وتوقف لحد هنا وماتصير بكره زواج
 
الله يسعدك لاتتنكدين هو يتزوج وينبسط بعروسته ويستانس ويفرح واحنا ننهار ونبكي ومانام ونتعب والصحه تتدهوروالاولاد تتاثر نفسيتهم عشانو في ستين داهيه خليه يصرف على العيال ويوفر لك متطلبات الحياه واشغلي وقتك بطاعة الله وهوياتك المفضله والثقل على مين على هووطالبي بحقوقك الله معكي
 
صباح الخير غالياتي

حبيت اوضح بعض الامور حبيباتي

لان بعض الردود من العضوات تعتقد

ان حياتي قد انتهت او اني يئست من انتظاري له

توضيح هام ..

لكل زوجه اوليه

الي مرت بنفس حالتي واكتشفت بزواجه السر

وهو خايف من المواجه او ان ما جاك وقال لك ابتزوج

تراا حالتك مره اسهل من حالة

الزوجات الاوليات الي ازواجهم يقولون بكره ملكتي ولك خيارين

يا انك تبقين ببيتي وبعدل ولا راح اقصر معك

او انك تطلبين الطلاق

الحاله الاولى الي هو السر اسهل ليه

لان واضح وضوح الشمس

انه خايف من المواجهه خايف من خسارته لك

فيعتقد ان مواجهتك برغبته بالزواج صعب ولكن اخفاء الحقيقه اسهل

والعكس الصحيح

ان استغفال الزوجه لوقت من الزمن خلال الزواج السر جدا يجرح المشاعر

اكثر من زواجه المعلن ..

ليه لانك انتي بذاك الوقت الي هو يكون متزوج ويسهر برااا البيت ويبات احيانا عندها

او وقت ما يكون هو يمشيها ويعطيها حقوقها الجنسيه كامله

تكونين انتي لسه قاعده تبذلين الجهد ببيتك وناسيه نفسك

هالشي يجرح بشكل مو طبيعي

ووقت ما تشوفين انه متغير

راح تبذلين الجهد مرات ومرات مضاعفه لارجاعه وللفت انتباهه

وناسيه نفسك وكل تفكيرك انك تعيديه لك لانه محبوبك الوحيد الي ما تتخيلين

يوم من الايام تخسرينه بالتالي انقضاء فترات طويله ويمكن سنوات

وانتي على هالحال

وقت ما تعرفين الحقيقه راح تتذكرين

كم بذلتي من مجهود اكثر من زواجه عليك

وبداية معرفتك بالحقيقه راح تحسين ان كل شي تغير

نومك اكلك حياتك بيتك عيالك وجوده كل شي تغير

وبغمضة العين يرحل قدامك كل معالم الراحه

لدرجة راح تفكرين وودك ترجعين زي قبل قبل يومين بس

كيف كنتي تبذلين كل هالجهد والآن انتي كسيره

مو قادره ترجعين الروتين بحياتك مو قادره تعيشين مثل السابق

تقومين تحطين تهتمين تراعين

كل هالاشياء بالبدايه ما راح تقدرين تسوينه

وكل الي ببالك حرب حرب بين العقل والقلب

قلبك يقول لك انه يبيه وعقلك يقنعك ان خانك وخان العشره

او انه تزوج وفرح وانتي كنتي زي المغفله تعطين وتسوين له

دام هو خلااا زواجه سر

فأنتي بتكونين المفضله عنده ليه ؟؟

لو ما كان يداري مشاعرك ومو حاب انه يجرحك كان ما سواه بالسر

لو ما كان يخجل انك مو مقصره معه كان ما خلاه بالسر

اشياء كثيره هو يعتقد ان الحل ان يكون بالسر

ولكن احنا بتفكيرنا نقول هذا ظلم لنا

فالجائزه الاولى حصلتي عليه
انك بتكونين متأكده من تخوفه الشديد انه يخسرك

الثانيه : ان راح تقدرين تحطين شروطك له وراح اذكر بعدين وش قلت من شروط الي خليته يدور حوالين نفسه

لان حلف لي على القرآن وخليتها هي ايضا توافق على شروطي حتى ما يكون يوم من الايام انا الملامه على موافقتهم

ثالثا : لا تكسرين نفسك وتطلعين بنفسك عيوب ابدا

اكثر النساء يقولون ان لو ما كان فيه قصور كان ما تزوج

او يمكن من خراب المرأه بعد الولاده

اجل ليه الزوج يتزوج وله يخون لما ما يكون عنده عيال ويكون حتى ما كمل سنه وله سنتين متى صارت خراب

او ان عندها طفل واحد بس ...

هذي مو اسباب مقنعه بكل الاحوال ممكن بحالات معينه فقط مع تكرار الولادات الكثيره ممكن تشكين وتعدلين هالشي فيك

الشي الاهم من اسباب الزواج

ان بعض الازواج يتزوجون علنا او سرا

لاسباب تخصهم

تغيير بالجنس وهالشي حلله ربي بالحلال لو ما الله يعرف ان الرجال ما يقدرون يمسكون نفسهم عن الحرام كان ما حلل التعدد

فأنتي مالك ذنب ابدا ولا فيك شي هالشي الله حلله لاسباب نعلمها ولا نعلمها منها صون نفسه عن الحرام وووو

واشياء مثل للزوجه نفسها مثلا الزوجه الثانيه مطلقه ارمله او لم يسبق لها الزواج فالله سبحانه وتعالى سخر هالامر حتى تتزوج هي ايضا وتكون اسره

رغم الالم يا حبيباتي للزوجه الاولى بهذا الشرع المحلل

الا ان الزوجه الاولى لها نصيب الاسد بالاخره

لانها صبرت على مصيبتها فتقاسم الزوجه حبيبها مع انسانه اخرى شيء صعب

ولكن صبرها و عطائها ومجهودها للمواصله الله سبحانه وتعالى بيعوضها بعيالها و اخرتها ان شاء الله

فافضل طريقه للصبر مثل ما قلت نسيان انه متزوج

الشي الثاني بعد

ان مهما يحصل يالغاليه بعد اكتشافك لسره وزواجه

راح يداري مشاعرك راح يصبرك راح يوقف معك كثير

وانتي تقدرين بنفسك تستغلين بعض الفرص ان تقربينه وتحببينه فيك

اعتبري نفسك بفترة ملكه تعرفي على زوجك من جديد

وهذي اكثر الزوجات الاوليات يقولونها

ان الزوجه تحس نفسها جديد رغم انها الاوليه

ليه لان زواجه يخلي الزوج يقارن بين العشره وبين الزيجه الجديده

مهما تسوي حركات دلع ببداية حياتها معاه

مهما تسوي ليالي رومانسيه

انتي كمان تقدرين تسوين لكن مو ببداية زوجه عليك عطيه مجال يستوعب حزنك وتضحيتك بالبدايه

لكن انتي عندك شي اقوى يربطك فيه

العشره ...

هي تسوي وما تسوي هي لسه ببداية حياتها معاه يختلفون ويتصالحون

لان لسه ما تفاهمو لسه ما عرفوا بعض

فما بالك انها داخله وهي تدري ان لها النص فقط

اكيد بتكون بحرب نفسي

لكن انتي بوضعك رغم القهر والالم

عندك فكره وش يحب وش يبي كيف تجين له باسلوب الي ينفع معه

خواتي الي تقول عيشي حياتك وانسيه وهو فرحان بحياته

كلامكم صحيح يالغاليات

لكن هالشي ما ينفع كليا

لان وجوده بحيات الزوجه الاوليه

يخليها تواصل مسيرة الحياه الزوجيه

وتواصل اهتماماتها ايضا

لا تعيشي بوهم ان راح استغني عنه مثل ما استغنى عني

لان هالشي يغضب الله سبحانه وتعالى وكأنك تقولين ما ارضى على نصيبي

المفروض الزوجه بما انها لم تختار خيار الانفصال

انها تجاهد في سبيل اسعاد اسرتها كما السابق

ولكن مع تغيير بسيط جدا انها تهتم ايضا بنفسها

وانها تغير من اسلوبها

الصمت والغموض والصبر يخليها اقوى بنظره

راح ينجذب للانسانه الي تغيرت ويحاول يجدد العلاقه من جديد

اما المشاكل والصراخ ما ينفع وانك تلتهين كليا عنه بحياتك بس

هالشي اساسا وكأنه طلاق ولكن بشكل اخر

لو كان انفصال بالطلاق كان بنيتي حياتك مع شخص اخر يمكن يكون من نصيبك

لكن لو تميتي معه لمجرد مصروف والسلام فانتي ظلمتي نفسك لانك تحتاجين ايضا الاهتمام العاطفي

وكمان خسرتي عيالك اهم شي بحياتهم

كيف تبينهم يعيشون حياتهم الطبيعيه الخاليه من العقد

وانتي من ناحيه مهتمه بس فيهم وبنفسك

ومن ناحية الاب الي يجي بس لتأدية واجب الزياره

المفروض يشوفونكم مع بعض زي قبل واقوى كمان

عشان ما يأثر عليهم

وانتي مع الايام راح ترضين تدريجيا

ولما هو يشوف انك راضيه وصابره ونفس الوقت غامضه بصمتك وشخصيتك الجديده

راح يواصل عطائه العاطفي والنفسي معك

وبما ان الرجل يحصل على الهدوء النفسي ببيت وحده من زوجاته

اكيد راح يفضلها على الثانيه بوجوده

حبيباتي راجعه اكتب لكم شروطي لعل بعض الاخوات يستفيدون

بس لحد يقول عني شريره بشروطي

لان انا اشوف ان من حقي هالشي رغم ان فيه قسوه
 
وااااااااااااو كملي

الله يرجع لك زوجك زي اول واحسن

آمــــــــيــــــــــــــــــــــــــــــــــــن
 
والله يا اختى كانك تحكين حكايتى بالضبط الله يتمم شفاك ويصبرنا جميعا ولكنى مش عارفة انزل حكايتى حتى تشاركونى بردودكم اللى تعرف تقول لى الله يبلغها مرادها
 
قبل ما اكتب شروطي بكتب الاسباب الي خلاني اتخذ هالشروط وسيله لارجاع حقي وايضا لي غايه

واحد : سنتين خيانه

اثنين : معاشره بالزنا

ثلاثه : قضاء الوقت معها بالليل اكثر مني قبل الزواج وبعده ايضا

اربعه : قصور بالعاطفه وسبق ذكرت اني لما اقول له ليه ما تقول لي احبك يقول كبرنا وهو هايم فيها بالحرام

خمسه : قصور بالجنس من حقي كزوجه اني اتمتع فيه ليس لمجرد الجنس ولكن هالجنس له دور بإرتباط عاطفي بين الازواج

سته : ما كان يمشينا وهو لاهي معها من مطعم الى سينما من سوق الى مجمع

سبعه : هجره لي حتى لو كان معها على خلاف وكأن انا السبب فجازاني شر مجازاه على استغفالي

ثمانيه : ترك واجباته الاسريه وصرت انا الرجال بالبيت من المقاضي الى المستشفيات الى ....

تسعه : اخذه سيارتي الي عطاني اياها هديه لعدميلادي وصار يقضي مشاويره معها يا قوي قلب الرجال

عشره : عيالي ما شافوا ابوهم الا مرتين بالاسبوع الخميس والجمعه لان اجازه مدرسيه باقي الايام ينامون قبل وصله الميمون

اكمل وله يكفي

اعتقد الصوره توضحت

شروطي : .......

واحد : عدم المبات عندها نهائيا يكفي ما اخذته من حقوقها بالحرام وجاء الوقت لتعويضي لمدة سنتين وبعدين يصير خير افكر وما عطيتهم امل بالموافقه

اثنين : عدم الخروج معها نهائيا حتى لو للمستشفى يكفي اني كنت اشيل نفسي وانا مريضه واروح مع اي احد للمستشفى وهو تاركني اتحمل مسؤليات مرضي ومرض عيالي ..وللمعلوميه شفت لها روشتات طبيه انه كان يوديها مستشفيات خاصه وغاليه ووقتها ما كان زوجها وانا اروح الحكوميه وانتظر الين اسمي الين ما ينهد حيلي

ثلاثه : عدم استأجار شقه لها لان زواجه اساسا كان بالسر وهي عند اهلها وبما انها لم تكن يوما محل ثقه لأهلها وعملت عمايلها بالزنا وغيره فأعتقد ان الشقه مو من حقها دام زوجها ما يبات معها وش بتسوي لحالها تقعد عند اهلها استر لها

اربعه : شراء سياره جديده وعلى ذوقي

خمسه : مصروف شهري خاص فيني غير عيالي ما كان مقصر سابقا بالبيت بالنسبه للمصروف ولكن حددت الامور بما ان زواجه ممكن يكسر ميزانيته الجديده فخصصت لي مصروف يكفيني لاكثر من شهر وايضا لعيالي وغير المقاضي وووو

سته : اعطائي مبلغ خاص لإبتداء مشروع عمري الي ياما فكرت فيه وقلت له ان ما تبيني احط بالي على طلعاتك

وجياتك من عندها خلني انشغل بمشروع الي كنت احلم فيه وان شاء الله جاري تحقيقه على ارض الواقع بإذن المولى عز وجل

سبعه : لها الوقت المخصص لزيارته لها فقط بوقت البريك لعمله عنده بريك لمدة ساعتين باليوم وقت الغداء فقط

ثمانيه : مالها شغل بالويكند لا اتصال ولا مسجات ولا هم يحزنون والاهم انه ما يطلع نهائيا الا معنا وتخصيص برنامج اسبوعي لطلعاتنا مع العيال وتمشيتهم

تسعه : ما يجيب سيرتها نهائيا عنها لا بالخير ولا بالشر

عشره : اسرار بيتي ما يطلع من بيتي حتى لو سألته وش اخبار العيال يقول لها مالك شغل فيهم

احدى عشر : اي مسج منها وان منه لها ما ابي اشوفه بتلفونه لاني لو ما مسكت نفسي وفتشت ما الاقي شي يعور قلبي وصرت اشوف وخالف شرطي هذا فكسرت التلفون ثم الثاني ثم الثالث وقف من هالحركه وصار يمسح اول بأول مسجاتها وكل مسجاته لها فأرتحت ادري ان يمسحهم لكن اهون علي من ان اشوف وش كاتبين لبعض

وصرت انا ارسل مسجات على راحتي وصار تلفونه مليان مسجات الحب حقي مني ومنه لي وبس

اثنى عشر : ملاحظه لكم عزيزاتي هالشروط اخذتها نفس ما قلت لكم للاسباب المذكوره ولكن السبب الرئيسي لان هو لمجرد ان عرف اني ابي الطلاق وابي اترك البيت جن جنونه وقال اي شي تبين بس لا تبعدين عني فكان هالشي سهل علي امور اتخاذي هالقرارات ومن اهم القرارات الي اخذتها الرجوع لدراستي الجامعيه ان شاء الله من السنه الجديده القادمه

سبب اني خليتها توافق على شروطي بنفسها وقدام وجهي

لاني انسانه اخاف من رب العالمين

هالشروط اخذتها لاسباب وذكرتها فيه لما كانت جالسه معي

ووافقت لان من حقي المهضوم خلال كل هالسنين الي فاتت

وكمان لو يوم مت ورب العالمين واجهني فيها تكون هي موافقه على شروطي بعدم العدل

من البدايه لانها مسيار لا بيت ولا غيره

والحمدلله انها تاخذ مصروفها الشهري منه وهالشي ما تدخلت فيه ولا حطيت له حد معين

وايضا ان زوجي كان يبي يطلقها ولكن هي السبب الرئيسي انه تهدده بالموت والانتحار

فكانت موافقه تماما والاهم عندها انها ما تتطلق

وكل ما زوجي يكلمني ببداية الايام عن الشروط كنت اقول له

بكل عناد ان هو وافق ان كان ما يبي هالشروط فطلاقي اسلم الطرق

فمع الايام اقتنع بعنادي وثقلي وعرف اني فعلا جاده

حتى لو هي ضغطت عليه قال لي كم مره ببداية الايام انه

قال لها انتي الي وافقتي روحي تفاهمي معها

وهي طبعا ما لها جرأه انها تتفاهم

اكيد يوم من الايام بتاخذ حقوقها بالانصاف بيني وبينها

لكن بالاول اكون انا وقفت على رجلي بمشروعي

عقليتي ليست ماديه بكثر معنويه

ابي ابني روحي واوقف على رجولي

وكمان وقتها علاقتي بزوجي بتكون اقوى

وعيالي بيكبرون والامور بتتعدل ان شاء الله

ودوام الحال من المحال

ولكن الاهم وقت ما ابادر بتغيير شروطي

ابي اكون بالطريق الصحيح الي يخليني اكون مرتاحه

واكون بأوج نجاحاتي الاسريه والعمليه والدراسيه
ولكن انا ما بينت لهم اني يوم من الايام ممكن اتنازل عن شروطي

ولكن بيني وبين نفسي اقول راح اعطيها لاني اخاف اظلمها

وزوجي تارك الخيط والمخيط بيدي

فأنا راح احسم الموضوع ولكن ما راح اظلم نفسي وعيالي ابدا

كفايه ظلم وغدر وطعن كل هالايام والشهور الي عانيت فيها مع خيانتهم


وللكلام بقيه

​
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل