تبين الشمالي يساعدك ف البيت ويلبي طلباتك؟تعالي اقولك

[سماء عالية]

السلام عليكم ورحمة الله وبركاتة


كيفكم حبيباتي زوجات الشمالي؟؟
من خلال معاشرتي لشوشو اهتديت لطريقه تخليه يساعدك بالشغله الي تبغينها بدون تسويف..

طيب كيف؟؟

تعالي اقولك..
اول شي اختاري الوقت المناسب ومزاجه يكون رايق ..
وثاني شغله تجهزين الاغراض المطلوبه وتجين لين عنده وتطلبين منه المساعده او تنادينه يساعدك لانك ضعيفه وهو المنقذ وراح يساعدك بعضلاته:17:
اغلب الحريم شو تسوي؟؟
وهم قاعدين على التيفي او يبغي ينام تقوله حبيبي انت الحين فاضي يلا قوم صلح اللمبه او قوم نغير الاثاث وهي قاعده مكانها

مثلا تبغينه يساعدك بتغيير مكان الاثاث او غرفة النوم
انا شو اسوي فكرت بالوقت امم لما يرجع مسوي رياضة بيكون لابس لبس عملي وما راح يتعذر كالعاده باعذارة الي ما تخلص..
وقتت قبل لا يوصل بعشر دقايق عفست الغرفه وسحبت شوي من الاثاث ولما دخل انصدم انتي شو تسوين ووو
قلتله يلا حبيبي نغير لانه المكيف على ولدنا وطبعا هو مافي جدامه اي حل غير انه يفرد عضلاته ويغير الاثاث..مع اني كنت شهر ازن عليه يغير وهو كل يوم يقول باكر..:38:

طريقه ثانيه تبغينه يجيب لك غرض كل الاخوات قالوا انك لازم تزني على راسه وبيني له حاجتك له..كيف؟؟
مثلا انا تقريبا سنه ظليت ازن عليه ابغي مكنسه حق الحوش ما ادري شو تسمونها(شاكوش) مع انها رخيصه<<وكنت اقدر اشتريها بنفسي بس لازم هو يجيبها علشان لا يتعود>>
هو كان يجيب عامل ينظف الحوش ومن تحت الزرع وتنظيفه كان زفت وكنت انظف بوحده ثقيله ومتعبه يتكسر ظهري بسببها
ولما طلبت منه يسوف كل العاده <<طبع الشمالي يشوفه مومهم >>
الين جا اليوم الي كثرت فيه الحشرات بسبب الامطار وجا وقتها طبعا انا عرفت سبب الحشرات بس ما خبرته :25:
طبعا شفته لابس يبغي يطلع يسوي رياضه وكنت باديه بالشغل قبله بعشر دقايق وناديته شوي لانه شوك ومسكته يشيلها واكتشف انها ثقيله ومتعبه قال اف الحشرات قلتله شفت ان العامل ما ينظف عدل ياخذ فلوس ع الفاضي وقال هذي ما تشيل عدل متعبه راح اشتري غيرها..
وانا اقوله ايوا وايد متعبه ووو وازيد عليه..

طبعا استفدت من هذي الحركه انه ساعدني
وانه جابلي الشغله الي ظليت سنه كامله ازن عليها واخر شي جابها بنفس اليوم...:26:
وبالاخير ما انسى اني اشكرة وامتدح شغله علشان يتحمس للمرة الجايه..

طبعا كل وحده تكتب تجاربها علشان نستفيد ونفيد بعض..
:34:

 

[رومنسية100%]

مشككورة حبيبتي امتن جهودك والله جات في وقتها الله يخليكي

 

[ذات الوشاح المخ]

ههههههه شدني العنوان مشكورة يالغالية

 

[غيووومه]

والله ي آختي لما يجي من النادي بيكون تعبان ومتهد حييييله
ماتسوى علي آجازف هالمجازفه ويساعدني

مستحييييل يسويها زوجي والله بيدور آقرب اريكه ويتسطح عليها بيقول عديمة احساس جاي من النادي وترهقني آكثر



طبعا انا تبعي شماالي غربي

 

[rwdaoo2000]

قلتى اللى بخاطرى غيومة

 

[سماء عالية]

هههههه
انتي لاتقولين له انك كنتي تنتظرينه..حسسيه انك كنتي تبغين تسوينها بنفسك بس ما قدرتي

 

[غزاله ناعمه]

مشتركه جديده
اعاني من الشمالي شرقي
موضوعك رائع عطيتيني فكره حلوه
انشاء الله نجرب

 

[سماء عالية]

عزيزتي غزاله كلنا معاك واحنا هنا ف المنتدى نفيد ونستفيد من بعض والشمالي تراه سهل لو فهمتيه..

 

[غزاله ناعمه]

عزيزتي غزاله كلنا معاك واحنا هنا ف المنتدى نفيد ونستفيد من بعض والشمالي تراه سهل لو فهمتيه..

مرحباً دلوعه
كيف سهل لو فهمتيه؟؟؟؟؟ ً
وهو يوم تكوني فهماه وعشره تحسيه غريب عنك
عندما يشعر بتغييري وأكون رسميه معه يحاول جذبي له بشتى الطرق وما ان أبادر بشيء او انزل من الرسميه يبدأ يثقل ويتغير ..... اذا طنشته يطنشني خاااااالص واذا اهتميت فيه يحقرني واذا كنت بين البينين يكون رائع معي لكن يعمل كل ما بوسعه لكي اخضع له وابتعد عن الرسميه فينسحب ويدخل عالم صمته الرهيب ونظرته الحاده
حاسه حالي فدوامه مع الشمالي

 

[سماء عالية]

عزيزتي اهو يحط لك طعم علشان تبطلين الثقل وترجعين لعادتك هو يختبرك هل انتي تغيرتي فعلا او لا؟؟
لازم تكونين منتبهه لتصرفاتك معاه ومع التعود راح يصير طبع فيك ومهما يسوي ما بيقدر يجيب راسك..
اعتبريه تحدي لك..

 

[غيووومه]

مرحباً دلوعه
كيف سهل لو فهمتيه؟؟؟؟؟ ً
وهو يوم تكوني فهماه وعشره تحسيه غريب عنك
عندما يشعر بتغييري وأكون رسميه معه يحاول جذبي له بشتى الطرق وما ان أبادر بشيء او انزل من الرسميه يبدأ يثقل ويتغير ..... اذا طنشته يطنشني خاااااالص واذا اهتميت فيه يحقرني واذا كنت بين البينين يكون رائع معي لكن يعمل كل ما بوسعه لكي اخضع له وابتعد عن الرسميه فينسحب ويدخل عالم صمته الرهيب ونظرته الحاده
حاسه حالي فدوامه مع الشمالي

هههههههههههه

ترى شوفي هو يسووي كذا عشان يرجعك لنفس طبعك
يعني بس تتغيرين عليه يحاول يرجعك غصب طيب بطريقته
كشري بوجهه ينسفك نسااف ههههههههه

اذا انا تعبانه شووي ولا ابتسمت له
هذا اقوول لك تعبااانه يقول شفيك مبوزه خخخخخخخخ


ياعمي تعبااانه هههههههه
صدقيني جاااريه ولك الآجر والثواااب


نمط زوجس شمااالي غربي
ويفرق عن الشماالي الشرقي من باب التوضيح

 

[الحنين للجنان]

احس مساعدة الزوج في البيت حسب الظروف النفسيه

 

[سماء عالية]

بس بعض الازواج ف كل حاللتهم ما يحبون شغل البيت خصوصا الشمالي يحب يكون مخدوم ف بيته وانه سي السيد..خخخخ

 

[ريمة 2]

انا زوجي يشبع ضحك على لي يعمل في البيت

 

[سماء عالية]

وانا زوجي مره جاي يضحك على جارنا شافه ينظف برا بيته وقعد يتمصخر قلتله شو فيها لا عيب ولا حرام الرسول كان يساعد اهله ويخيط ثوبه..وسكت

 

[ام ادم بن]

انا بللعكس انا زوجي شمالي شرقي بكل الوصفات و الله لكن يساعدني مرات و خاصة مع
الولد لكن تناقشت معه بالموضوع قبل الزواج و هو لما يعطي كلمة يشد ،فيها

 

[سماء عالية]

معك حق وانا نفس الشي يساعدني بالاولاد خصوصا بالليل يريحني لكن احيان تحتاجي مساعده ف اعمال البيت خصوصا الشاقه ولما تكوني مريضه..!!!

 

[سماء عالية]

مثلا تبغين غرض خاص فيكي وانتي تشوفينه ضروري وهو مطنش كيف تتصرفي؟؟

كل وحده تقول تجربتها خلونا نجمع افكار!!هاها
وعقب بخبركم طريقتي

 

[ام ادم بن]

مثلا تبغين غرض خاص فيكي وانتي تشوفينه ضروري وهو مطنش كيف تتصرفي؟؟

كل وحده تقول تجربتها خلونا نجمع افكار!!هاها
وعقب بخبركم طريقتي

ذ

انا لما اريد شيئ ضروري هو يقول لا ما تسحقيها .....و انا لا اعاند لانوا هو راح يعاند اكثر و يحب كلمتوا تمشي
بعدين اتركه مدة شوي و لما بشوفوا يريد احم احم ههه ادلع شوي و اقول له و اله يا حبيبي لو كان عندي شيئ هذا خير و اتركه و في بعض الاحيان اقول له انا ما بحوس هذا شيئ لي بل لك عشان خير لك او إلنا اولسعدتني......بعدين يفكر و بيرضى :14:

 

[سماء عالية]

حلووو يا ام ادم ولو كانت شغله بسيطه غرض بسيط احيان الشمالي يماطل ف بعض الاغراض وكثير من الزوجات يشتكون واحيانا اغراض بسيطه للبيت ..كيف تتصرفين؟؟