السلام عليكم..انا اختكم **القمة**..محتاجه مشورتكم في سفر زوجي مع عروسته !!

[الم وامل وحيره]

من ايميلي
خايفه زوجك يتزوج عليك ..إسمعي كلامي ..بإذن الله ماتطلعين ندمانه ..

الموضوع حساس للآخر ..

حاولت قدر الإمكان أختار ألفاظ تتناسب مع حساسية الموضوع ..

الرجاء من كل عضوه ..أن تحمل العبارات على محمل حسن ..وأن لاتشك بقدراتها ..او بنفسها ..

فأنا لااقصد أحدآ بعينه ..وأنما أتحدث بعموم الحال ..وأكتب مايمكن أن ينفع عضوات عالمنا الوردي ..

فرجائي كل الرجاء ..من زوجات المعددين خاصه .

أن يقرأن الموضوع بعقلانيه بعيدآ عن العاطفه ..وبحياديه تامه ..فوالله لاأريد الا الإصلاح ماأستطعت ..

>>بلاش الله يخيلكم شغل المحقق كونان ..وأيش تقصدين ..ومن هذا الكلام ..علشان نبقى حبايب ..دووووووووم ويووووووم ..



بعد المقدمه التحذيريه هذي ..

أكيد بتقولون حره ..عندها شيء خطير ..

وخايفه تتكلم وتجيها قنابل أرض جو ..

والا يفجرون بي ..واروح بخبر كان ..>>ياحسافه مايسوى عليك تكون نهايتك بسبب هالموضوع ..!

بس أعذروني من كثرة المشاكل ..والهجوم الغير مبرر بين العضوات ..صرت أخاف اكتب ..أي كلمه ..وتجيني بعدها ردود أنا في غنى عنها ..


وأتمنى قبل نرد على هذا الموضوع ..ننسى تمامآ فكره ثانيه ..ورابعه ..وعاشره ..ونعيش كلنا مع بعض كزواجات وحيدات ..

هدفنا السعاده الزوجيه ..الدائمه والأبديه ...في ظل طاعة الرحمن ..

ماننكر أن أمنية كل زوجه مننا أنها تعيش هي الوحيده في قلب زوجها ..

وتملك حياته ..ويغمرها بحبه وعطفه ..وحنانه ..ولاأحد يشاركها فيه ..

هذي غريزه فينا كلنـــــــا ..وماأحد ينكرها ..

حتى زوجات المعددين أنفسهم ..ماينكرون رغبتهم الحقيقه ..في الـــــزواج من أعزب ..بدون وجود شريكه ..لكن قدر الله وماشاء فعل ..

ماني بصدد مناقشة ليش المرأه تقبل تكون زوجة معدد ....

هذي الإسطوانه ملينا منها ..ووالله تشبعت وحفظت الإجابات عن ظهر قلب ..من كثر ماقرأتها ..

اللي يهمني وأعتقد يهم كل إنسانه تحب بيتها وزوجها هو كيف تحافظ على أستقرار حياتها الزوجيه ..وسعادتها ..

اللي عليك الآن ..كزوجة رجل غير معدد ..إنك تنتبهين لحياتك ..,وتستفيدين من تجارب غيرك ...
..من يدري بعد كم سنه ..شو بيكون وضعنا ..!؟

حاليآ نبغى نستمع بكل لحظات .حياتنا.ونتوقف عن التفكير السلبي ..والخوف من التعدد ..

وننظر لحياتنا الزوجيه بشكل إيجابي أكبر ..ونخطط لها بشكل صحيح ..ومدروس ..بحيث نمتع أنفسنا ..وأزواجنا ..

وناخذ العبره ..من تجارب زوجات المعددين ..وناخذ من قصص الأزواج المعددين ..اللي يهمنا ..

ونتجاهل الأشياء اللي ترفع الضغط ..وتأثر على حياتنا ومشاعرنا بشكل سلبي .. ..!

لو ندقق الملاحظه ..في الحياه العاديه مابنشوف الا جزء مثالي فقط ..يظهر أن كل زوجه هي المثاليه ..وهي من تملك ..زمام قلب زوجها وعقله ..

ويظهر أن كل زوج سواءآ معدد أو أعزب إنه سعيد ..وعادل ..وشاطر ..وبطل .!

ولأني أبغى أفيد نفسي وأصحح مسار حياتي ..وأتجنب أخطاء غيري .....وأسعد زوجي ...أولآ ..وأخيرآ ..

صرت أبحث عن إجابات شافيه ..غير اللي يتشدقون فيه الرجال والحريم في الحياه العامه ....والأسطوانه المثاليه اللي نسمعها كل مره ..

لاحظت أن الرجال كثير مايتحاشون التحدث عن أسباب التعدد من ناحيتهم ..وأسباب تفكيرهم بالزواج ..!

واغلب الرجال يصرف الموقف بإجابه مثاليه ..وهذا الشيء ماكان يريحني ..وكان يخليني أعيش دوامة قلق ..وخوف ..وتفكير مستمر ..في التعدد ..

وحتى الزوجات نفس الشيء ..ماكنت ألاقي منهم اللي أبغاه ..

والحمد لله لقيت اللي أبحث عنه ..بعد بحث طويل ..وتعاون من بعض الزوجات الواعيات ..واللي تجردوا من الأنانيه ..وصار عندهم حب لنفع النــــــــاس ..

طبعآ كل اللي راح أكتبه هنا ..ماهو الا إجتهاد بسيط ..وتبقى الأسباب بيد مسبب الأسباب ..وكل مايحدث في حياتنا ماهو الا بقدر الله عزوجل ..ومايرد القضاء الا الدعاء ...

ماأقولك راح تكونين أسعد إنسانه لو طبقتي هالكلام ..

لكن ممكن تعيشين حياه وسطيه ..وماتخافين أحد يهضم لك حقوقك في يوم ما ..

وراح تكون حياتك ماشيه على خطى واضحه ..وثابته ..,ومستقره ..بإذن الله ...

بعطيكم ملخص كامل للأشياء اللي أستفدتها من حياة المعددين ..

الكلام الي بقوله يهم زوجات الغير معددين كثيرآ ..وأرجوا من الله عزوجل إنه يترك أثر إيجابي في كل زوجه ..

وبسم الله نبدأ ..



أول شيء ..في حياتك الزوجيه عمومآ ..تعاملي مع زوجك على إنه رجل معدد

قدمي واجباتك كزوجه على هذا الأساس ..وطالبي بحقوقك على هذا الأساس ..>>بتصفق لووووووووووول ..!

وانا والله اجزم لكم بتعيشون براحه نفسيه عجيبه بعد هذا القرار ..وحتى زوجك راح يسعد بك ..!!

أكيد بتقولون الله يرحم والدينك حنا ماتحملنا الحلم أنه تزوج عاد نتعايش مع الفكره ..!!

لكن والله ..أنا أقولك إنك بتعيشين مع زوجك بتوزان ...كييييييييييييييف ..أنا أقولكم ..

راح يتوقف مسلس العطاء المستمر بدون مقابل ..

راح يتوقف مسلسل الإهمال الزوجي ..

راح يتوقف مسلسل اللامبالاه ..

راح يتوقف مسلسل الثرثره الغير مفيده ..والسواليف الماصله ..

وراح يتوقف مسلسل التنازل عن الحقوق ..

وراح يتوقف مسلسل التحقيق المستمر فين رايح ..من فين جاي .

وشغلات كثيره راح تتغير ...شيء منها لصالحك ..وشيء منها لصالح زوجك ..


وراح أسلط الضوء على أهم الشغلات راح تغيرينها بحياتك ..



الأمر الأول : أهمال المظهر

لو كان زوجك معدد ..هل راح تهملين جسمك مثلآ ..!؟

بصراحه شعورك الآن أكيد لأ ..بتحاولين تخففين وزنك لو كنتي سمينه ..
بتحاولين تخفين أثار الحمل والولاده من جسمك ..

بتحاولين تعدلين بشرتك ..وتغطين عيوبها ..( صنفرات ..وكريمات تقشير ..وكريمات تفتيح ..) ..
شعرك ..اسنانك ..ملابسك ..إستايلك عمومآ ..ليه ..؟؟؟

لأن زوجك عنده شريكه غيرك ..ممكن يزهد فيك ويقبل عليها ..بسبب أهمالك ..وهالشيء راح يؤدي الى هظم حقوقك ..!؟

طيب وأذا زوجك مو معدد بالمعنى الحقيقي ..فأعتبري إن كل نساء العالم كلهم ضرايرك ..

لأن زوجك موأعمى ..ولاغبي ..بيشوف نساء حوله وحواليه في كل مكان ..
محارمه نساء ..خواته نساء ..في الشارع نساء ..في التلفزيون نساء ..

ولو ماشاف ..فهو يسمع ..,أصحابه يتكلمون ..أخوانه يتكلمون ..أهله يتكلمون ..
والكارثه الأدهى والأمر لما أنتِ بعد تتكلمين عن النساء ..وكأنك تفتحين عيون زوجك على عيوبك ..!

( رحنا لفلانه وطبخها لزييييييييييز ..(وأنتِ طبخك ماشي حاله )..وفلانه بيتها نظيف ( وانتِ بيتك حوسه ..)
وفلانه جسمها يهبل ..وفلانه شعرها ..وفلانه أسلوبها ..وفلانه مزحت وقالت ..وفلانه خفيفة دم ...وزوجك مشنف آذنه يسمع ويتخيل فلانه ..!؟ويتحسر على حضه ..ويندب نصيبه اللي جمعه فيك ..!!

وأنتِ مبسوطه على الآخر على بالك هو مستمتع بسواليفك ..!
وكل مارجعتوا من خرجه يسألك عن فلانه وعلانه ..وأنتِ نفس السيناريو يتكرر ..بأختلاف الأسماء ..!





الأمر الثاني : تغلبي على الحالات المزاجيه ..والإهمال واللامبالاه ..والفتور ..

بصريح العباره ..مافيه أنثى كامله في الوجود ..حتى أنا ..تكذب من تدعي الكمال ..

والمرأه منا تعتريها ..حالات مزاجيه متقلبه ..( حمل ..وحام ..نفاس ..دوره ..) ..تتتغير فيها الهرمونات ..ومزاجها يكون متعكر ..,مالها خلق ..حق اللبس والإهتمام ..والدلع ..

وأحيانآ يعتري الزوجه ..كسل ..ملل ..وفتــــــــــــور ..نقدر نقول غفله ..عن هذي الأمور

وهذي الفترات أحيانآ كثيره ..تكون مساحه خصبة لأنتشار أفكار سلبيه عن الـــــــزوجه ..وكثير معددين مالقيوا فرصه للزواج على زوجاتهم الا بمثل هذي الفترات ..!


للأسف صمت الزوج وسكوته على الوضع الغير مرغوب فيه .....يدخل الزوجه في دائرة الأمان ..وزوجي ماينتبه ..وزوجي مايدري .. اللين تكتشف إنه متزوج ..ويمكن هالساكت مقطع لحمها تقطيع بين الناس ..!

زوجتي مهمله ..زوجتي ماتلبس ..زوجتي ماتعرف تهتم .... ترى الساكت أخططططططططططر ..!

فلاتنتظرين اللين يفكر زوجك بالتعدد علشان تتصلحين ..وتنفضين غبار الكسل ..وتخرجين من دائر الملل والفتور ...وتبدأين .تعدلين من الأشياء اللي كنتِ مهملتها ..

خليك متهمه بنفسك طول العمر ..علشان لايجي يوم ..وتسمعين منه كلمه ..ماتعدلتي الا لما تزوجت ..

ترى محد بيقول ياحرام ماكان يعلمها ..ماكان يذكرها ..ماكان ينبهها ..الكل بيقول هي مهمله ..هي فاشله ..!؟






الأمر الثالث : الحقوق ..والواجبات الزوجيه ..

أعطي زوجك حقوقه كاااااااااااااااااااامله ..لاتقولين ..هذا مايدري ..مايعرف ..(يخب عليه )..مايملأ عينه ..!؟

الرجل وأن كان ساكت ..أو مايطلب ..ماهو دليل رضى عن سلوكك ..يمكن هو الآخر يتوقعك جاهله ..وماتعرفين ..

علشان كذا يسكت عنك ..ولايتكلم ..ولايطالب ..بينما تتفاجأين إنه ممكن بلحظة خطب وبيتزوج ..!

هذا دليل إنه فاهم بس كان صامت ....في هذا الزمن مافيه رجل بسيط ..الرجال البسطاء ..أيام جدي وجدك ..اللي كان همهم يدخلون البيت يلاقون لقمه ياكلونها ..وفراش ينامون عليه ..

الآن الرجال يبغون وحده تستقبل بحفاوه ..وتودع بحراره ..وتشارك الفرحه ..بحواسها كلها ..وتشاركه الحزن بحواسها كلها ..

يبغون أنثى ..أنثى حقيقه ..مش ديكور ..ومظهر ..ومقاسات معينه ...لأن أسلوب الحياه الآن تغير عن أسلوب الآباء والأجداد ..وصار وظيفة المرأه أكبر ..والحمل زاد عليها أكثر من قبل ..

قرأت لرجال يتكلمون عن حاجتاهم ..,ورغباتهم ..وأنا اجزم أن ولا واحد فيهم صرح لزوجته فيها ..!

وكل مطالبهم كانت عاديه ..وممكن أي زوجه تسويها ..لكن ...؟؟؟؟؟؟





الأمر الرابع : أشبعي الحقوق المتمثله في الفراش ومايتعلق فيه

الرجل ماتزوج الا للعفاف ..فلاتبخلين على تعلم كل مايسعد زوجك و يريحه من هذا الجانب ..
لاتقولين مايطلب ..مايبغى ..مايعرف هذي الحركات ..ممل ..موجريء ..مايفهم ..أستحي ..!

لاياقلبي ..انتِ أستعدي ..أنتِ رغبيه بنفسك ..أنتِ إجذبيه لك ..أنتِ تغلبي على خجلك ..

الرغبه الأساسيه في زواج كثير من الرجال هو الجنس ..وهذا الكلام والله ماأقوله الا لما سالت بنفسي ..

وسمعت من رجال ونساء ..إن الجنس هو السبب الرئيسي في دخول فكرة التعدد لحياتهم ..
الرجل يبغى التجديد ..يبغى الجرأه ..يبغى الإعجاب ..يبغى الإشباع ..

ولاتربطون الموضوع بضيق ووسع وخراب ..لأن الأمر أكبر من ضيق المنطقه أو توسعها ..

والإشباع يشمل كم ..وكيف ..ركزي عند هذي العباره كثير ..
مايهم الرجل الكثره ..بقدر مايهمه الكيف ..والعكس صحيح ..

أذكر لكم إسم كتاب جميل جدآ يتكلم عن الفراش ..,كيف كان سبب دمار كثير من البيوت ..
والمؤلف عرج على ملاحظات وقصص والله يمكن تافهه في نظركم ..ولو قرأتوها أكيد بتقولون معقول في الألفيه

الثالثه ..ومحد يعرف أبسط هالبديهيات ....لكن الغفله والإهمال صعدتها ..ووصل للطلاق ..

الكتاب إسمه ( التربيه الجنسيه في المجتمعات السعوديه ..) الكتاب أذكر يوزع من المشروع الخيري أو لجنة الإصلاح الأسري بعنيزه ..

مالقيته في الإنترنت والا كنت بحاول أرفعه على الموقع ..علشان تستفيدون منه ..








الأمر الخامس : ..حقوقك كزوجه ..

شفت أزواج يتزوجون على زوجات مثاليات ..ولاتستغربون ..

والله واقسم بالله أنها مثاليه من كل ناحيه ..في التربيه ..في الأخلاق ..في التعامل الزوجي ..في العطاء في التعاون ..ماكانت تقصر على زوجها بأي شيء يسعده ويريحه ..

لدرجة إنها تمثل دور الزوجه والزوج في نفس الوقت ..ومقدره إنشغال الزوج بعمله أو دراسته ..,وقائمه حتى بدوره تجاه الأبناء ..

لكن بالمقابل ..حاجتها وحقوقها وأمنياتها ..وطموحاتها اللي كانت في أمس الحاجه لها ..كانت متغاضيه عنها ..بإعتقادها إن هذا تقدير منها لزوجها ..وإن هالشيء ممكن يكبرها في عين زوجها ..

وماكانت تبغى تشغل الزوج بمطالبها ..ولاتطلب منه يشاركها في واجباته تجاه بيته وأطفاله ..!؟

كون الزوجه مرت سنوات عليها وهي متنازلة عن شيء من حقوقها ..من باب تقدير للزوج ..ولوضعه المادي ..ومن باب التفاني في خدمته ..هذا أغلب الزوجات يشكرون عليه ..
لكن أعطي زوجك دوره الحقيقي في بيته ..

وخذي أنتِ دورك الطبيعي ..وخليه يشارك في واجباته كزوج وأب ..

رعاية الأبناء ..تربيتهم ..متابعة دروسهم ..خليه يشاركك كل شيء ..ترى الأب مو صرافه فقط ..!؟

لاتحملين نفسك فوق طاقتها ..

لاتنتظرين اللين زوجك يتزوج ..وتبدئين تطالبين بالشغاله اللي لك سنوات محتاجتها ....

والمصروف اللي لك شهور ما أخذتيه ....والسفر اللي كنتي محرومه منه ....
ويغير لك غرفة النوم المكسرة .. ..والثلاجه الخربانة ..و المكنسة المحروقة ..!

و تطالبينه يتابع عياله ..اللي مايعرف بأي مرحلة دراسية هم ..!
لاتنتظري أنثى تجي تصحيك من سباتك ..

وتذكرك إن لك حقوق أنتِ ساكته عنها من سنوات ..!
وإن لك فلوس أبو العيال إستلفها منك من سنوات ..ولارجعها ..
وإن ماعندك ملابس خروجات زي باقي الحريم ..ولاعطور ..
ونص علب المكياج مخلصه ..وكريمات الترطيب ماعندك منها شيء ..!

لاياقلبي ..أصحي لنفسك ..وأحسبي لكل شيء حساب ..

ماأقول حملي زوجك فوق طاقته ..وخليه يتسلف ويتدين ..لاوالله ..
لكن أنتِ تعرفين زوجك ..واللي وراه واللي قدامه ..مايمنع يعطيك حقوقك اللي ربنا فرضها لك ..بما يستطيع ..
( لينفق ذو سعة من سعته ) ..ولاتتمللين من تكرار الطلب ..أطلبي مره وثنتين وعشر ..اللين يقبل ..

والحيله ..وكيد الحريم ..كفيله إنها تخدمك بهذا الموضوع ..




الأمر السادس : .. ..زوجي يحبنـــــــي ..إيه نعم يحبك ..ويموت فيك ..

ولو تسألين أي زوجه معدد هل زوجك كان يقولك أنا أحبك ..بتقول لك ياما ..وياما ..شبعني حب وغرقني فيه ..

ووالله ولاحده منهم كانت تتوقع أن زوجها يتزوج عليها بيوم ..من الحب والألفه اللي بينهم ..!

ويمكن بعضهم الى الآن مازال والله يحبها ..ويعشقها ..وبينهم موده ..ورحمه ..

لكن لاتعتمدين على الحب وحده وتقولين خلاص بما إنه يحبني فماراح يفكر يرتبط بوحده غيري ...
..وهذا الشيء اللي تعلمته من الرجال ..أن الحب ماهو دليل كافي أنه متشبع منك ..!

إيه نعم الحب شعور يعطي بالأمان ..

لكن لاتتعدى هذي المشاعر الى الثقه العمياء ..علشان لاتنصدمين ..

ماأقول لك أن الرجال خونه ..ومجرمين ..ومن هذا الكلام اللي أسمعه من العضوات ..

لاو الله ..لكن زوجك زي مايحبك ..فهو يحب نفسه ..وهذي كلمه للأمانه تعلمتها من الأستاذه ناعمه الهاشمي ..

شهوة الرجل تغلب عاطفته ..!

إيه نعم يحبك ..لكن حاجته لأنثى غيرك ..تسدد النقص اللي في حياتكم ..( ممكن يكون نقص بسيط) ..راح تحجب عاطفته ..وراح يفكر يشبع النقص ..

ماأقولك إن هذا التصرف ..أنانيه منه ..والانذاله ..والا خيانه ...لأن شرع الله حكيم ..

وأنتِ بعد عامليه بالمثل ..حبيه ..بيديك ورجليك ..بكل جوراحك ..لكن حقوقك ..,وحاجاتك ..لاتنسيها ..

الحب وحده مايوكل عيش ..>>>دايم أقولها ..






الأمر الأخير : ....لاتهملي أنتقاد زوجك لك ..( رجاءآ لمصلحتكم لاتهملون هذي النقطه )

الرجل بطبعه جدي ماعنده لف ولادوران ..والشيء اللي مايعجبه يقوله بشكل مباشر ..

بعكس الشيء اللي يعجبه ..( مايعرف يمدح ..لكن يعرف ينتقد ..لأنه ماتربى على الكلمه الحلوه لاتلومونه ..)

أحزن كثير لما اشوف زوجه ..زوجه إنتقادها بشيء..والعضوات يقولون لها ..ماعليك منه طنشيه ..

أزعلي منه علشان مره ثانيه مايعيدها ..هذي النصيحه بحد ذاتها خرااااااااااااااااااااااااااب البيوت ..!

زوجك لما ينتقدك ..فهو جاد في كلامه ..وخذي كلامه على محمل الجد ..وترى أغلب الرجال مايعرف أسلوب التلميح ..

لما يقول أنتِ فيك كذا وكذا ..يعني فعلآ أنتِ فيك كذا وكذا ..!

لاتكابرين عن تقبل نقده ..ترى مع الأيام يبطل ينتقدك ..وانتٍ تفرحين على بالك أنه تأدب ..وصار يحترمك ..

لكن للأسف راح تكتشفين أنه أنعدمت بينكم لغة الحوار و الصراحه ..وصارت حياتكم واجبات وحقوق فقط ..

ويصير هو يعيش معاك على مضض ومجامله ..وفي يوم وليله ..تصحين على خبر ..إنه متزوج ..!

طيب ليييييييييييييش ..!؟

لأنك كممتي فمه ..أخرستيه عن الإنتقاد ..صار يحس إنه مضطهد ..مقهور ..مكبوت ..موقادر ينتقد ولايعلق على شيء .... مهما شاف منك أشياء ماتعجبه ..مايقدر يصارحك ..

لأنك بالعربي تزعلين ..,وتضربين البوز ...وتسوين مشكله ..أصبح هو يلجأ للمجامله ..لأجل تستمر الحياه شكليآ..!

وبنفسي سمعتها من أكثر من رجل ..يقول هالكلام ..أن المرأه ماتفهم رغباتهم ..والسبب ردة فعلها تجاه نقدهم ....

بصريح العبارة أحدهم يقول زوجتي ...ماراح تفهمني ..وتزوج عليها ..!

تقلبي نقده لو ماعجبك ..وأوعديه خير ..لو ماراح تنفذين ..المهم تعرفين رغبات زوجك ..وأمنياته ..وخذي منها اللي يناسك ..وتجاهلي اللي مايعجبك ..





وأخيرآ ..




في الإنترنت تعلمت ان العطاء الغير محدود والغير موزون ..ممكن يأثر على الحياه الزوجيه بشكل سلبي ..!

في الإنترنت تعلمت أن الرجل الشبعان لايمكن أن يلتفت للخارج ..( طبعآ شبعان من كل النواحي ) ..!

في الإنترنت تعلمت إن السكوت عن المطالبه بالحقوق الزوجيه ..والتنازلات المستمره ..تخفض مستوى تقدير الزوج لحاجات زوجته ..!

في الإنترنت تعلمت ..أن الرجل يعرف مايريد ..ويعرف يحدد رغباته بدقه ..وحاجاته ..وراح يبذل المستحيل في سبيل توفير حاجاته ..وأي شيء ممكن يسعده ...أما المرأه تعرف بشطاره شو يبغون الناس منها ..!!؟؟؟( للأسف فشل ذريع للمرأه سببه التربيه ) ..

المرأه تنظر للمجتمع أولآ ..وردة فعله ..ثم حاجاته هي ..!

بينما الرجل يفكر بحاجاته أولآ ..ثم يفكر بالمجتمع ..وأحيانآ مايقيم للمجتمع وزن أصلآ ..!

وهذا الفارق بينهم ..

لاحظوا لما الرجل يفكر يعدد ..مايشيل هم أبدآ لكلام الناس ..أو نظرتهم ..أو شو بيقولون عنه ..!

بينما المرأه حتى لو تبي تشتري لها فستان ..أو تغير قطعة أثاث في بيتها ..فهي تفكر بالناس ..أولآ ..وشو ردة فعلهم ..ونظراتهم ..وكلامهم ..!


هذي حاجات أستفدتها من الأنترنت ..

فشكرآ للإنترنت ..
من ايميلي

صح لسانك وسلمت اناملك وحرم الله وجهك عن النار والله قلتي وقولك حق

كل كلمه ونصيحه كتبتيها حقيقه وواقع مانقدرننكره ابدا

جزاك الله كل خير

 

[رازيا]

رفع للمساعدة

 

[**القمة**]

سبحان الله وبحمده سبحان الله العظيم

 

[احساس صعب]

سامحيني أختي قمة يشهد الله اني ما أردت اني أجرحك أو أسبب لك الألم ولكن من إبداء المشورة وسامحيني إن كنت أخطأت عليك


وما علمت بأنك مجروحة منه وما دام ذلك فلك كل الحق بأن تأخذي بحقك الشرعي منه



وأكثري أختي من الإستغفار بنية تسهيل أمورك



وأسأل الله أن ينزل على قلبك السكينة والطمأنينة ويرزقك من حيث لاتحتسبين

 

[**القمة**]

احساس صعب
لاتعتذري ياقلبي
من يجهل ظرفي ماعليه ملامه
صحيح ان اخلاقه الان تغيرت كثيررر
صار متسامح اكثر..صار حنون اكثر...صار يعاملني برقة ولطف...
لاكن انا احس بالالم لانه تغير بعد مانوى يتزوج
فين كان خوفه من الله يوم كنت زوجه وحيده تحت يده...
سنة كامله فاتت كان يدور على زوجه وانا لا اعلم
نفسي لا تحتمل مجرد فكرة اني اسامحه في يوم من الايام
ايش سويت فيه حتى يعملني هكذا معامله...
بس لاني كنت سبب قوي لأثارة غيررررررررررته وشكه
كنت احاول دوما ألا اثيرها كنت اتحاشا دوما كل مايدعوا الى أثارتها
لاكنه هو هكذا معي....
في ليلة من الليالي حضرت عرس ويوم اتصل قال تجهزي انا جاي...تجهزت...واتصل ماسمعت الجوال اول مره...رديت وقلت له والله ماسمعته..توقع اني تجاهلته
او انه مايحب يواجه احد من اقاربي...يغار منهم ..او يكرههم..وممكن الاثنتين ( انا وهو من قبيلتين مختلفتين)
المهم خرجت بعد ماطمنت اهلي ان زوجي جاي ياخذني.....وكانت الصدمه مالقيته...مو موجود....راح وسابني...الساعة 2 بالليل
رجعت بسرعه للقاعه ادور امي واختي...والحمدلله لقيت اختي ماخرجت وعلمتها...قالت يلاه معايه..
ورحت معاها على اساس اننا متأخرين ماجاء ولدها إلا متأخر...رحنا متوجهين لبيت امي لان مامعي مفتاح ولاني زعلت من تصرفه يعني لو مالقيت احد من اهلي كيف اتصرف
اشحذ الناس...
المهم مادريت الا وهو متصل عليه...ويصرخ فيه..فييييييييييييينك يالحيوانه الله يلعنك ويلعن ابوك..( ثاني مرررره يلعن ابوي الله يرحمه فترة زواجنا) ارجعي للبيت ارجعي...
اختي وولدها حسوا انه في شيء...ورجع مسكين ولد اختي ورجعني البيت...
مريت الليله هذه بهدوء وفتحت معه الموضوع اليوم الثاني...ولانه يخاف يواجهه اخواني حاول يعتذر..وانه كان غضبان ومدري ايش
قلت له..طيب لو مالقيت اختي ايش كان سويت اركب مع اي احد؟؟...تصرفك تصرف غريب...كيف تروح وتترك اهلك اخر الليل




وياما وياما....الحمدلله وبس
اسال الله الواحد الاحد ان ينصرني عليه نصر عزيز مقتدر...ويكتب لي ربي ان اسجد له يوما قريبا من الفرحه وانا اهلل واكبر بنصره
حسبي الله فيه ونعم الوكيل


زرع فيه انواع الخوف والقلق والاكتئاب وكره الدنيا وماعاد لأي شيء سعيد فيه سعاده او له فرحه

مجنون مجنون
تصوري تعيشين طول عمرك مع انسان مريض
مصاب بالوسواس القهري
غيره وشك وحب مجنون

ااااه ياربي ان قلبي مكلوووووووووووم فانتصر

 

[**القمة**]

في ليلة من الليالي حضرت عرس ويوم اتصل قال تجهزي انا جاي...تجهزت...واتصل ماسمعت الجوال اول مره...رديت وقلت له والله ماسمعته..توقع اني تجاهلته
ما انتظر حتى ولا دقيقه...ايش عمل..؟؟,,,,,رااااح وتركني
ماحب ينتظرني حتى مايقابل احد او يسلم عليه احد اعرفه يكره جماعتي (ممكن غيره منهم )
سقطت هذه الجمله سهوا
او انه مايحب يواجه احد من اقاربي...يغار منهم ..او يكرههم..وممكن الاثنتين ( انا وهو من قبيلتين مختلفتين)
المهم خرجت بعد ماطمنت اهلي ان زوجي جاي ياخذني.....وكانت الصدمه مالقيته...مو موجود....راح وسابني...الساعة 2 بالليل

 

[**القمة**]

سبحان الله وبحمده سبحان الله العظيم

 

[تراتيل الحزن]

الله ينصرك عليه يارب ان شاء الله حياته مع عروسه تكون اتعس مما يتصور قطعتى قلبي اكثر شئ يؤلم لما يكون يعاملك معامله سيئه ويغير معاملته عشان الزواج الله لايهنيه حزنت عليكى مره ومو عارفه شقول لاحول ولا قوة الا بالله حسبي الله ونعم الوكيل فب كل زوج ظالم يتفنن في تعذيب شريكة حياته لمجرد انه مل وحاب يغير اكره الرجال كره ظلمه ما يخافون الله الله يفرج همك حبيبتي ويسعدك في حياتك ويعوض عن سنين الشقي انه قادر علي كل شئ

 

[المنتقبه]

الله المستعان احترت...
اسيبهم يسافرون واذا رجع يعوضني
ولآ...ارفض يأخذ من ايامي والزم يعدل بيننا بعد اليوم السابع...

شوفي مسألة العشر الايام بسهوله يحجك فيها لو يقولك هي مشروع لها سبع ايام كعروس وابدا من عندها القسمه واعطيها قسمتها ثلاث ايام وارجع من السفر واعطيك قسمتك ثلاث ايام ولو تشاكلتم عليها بيسال شيخ ويقوله الشيخ اعطها سبع ايام ثم ابدا اعدل بينهم وبيقول له بايهم تشاء ابدا او بيقول له اقربهم منك مسافه وانا سمعت شيخ يقول العروس يعطيها سبع ايام ثم يزيد لها كبدايه للعدل كم يوم حسب مايرغب ثم يعطي الاخرى قسمتها وقالو بايهم يبدا العدل قال الشيخ هو مخير بما شاء منهم يبدا لكن كون العروس جديده فمن المستحسن يبدا منها
وانا هنا اوضح لك الصوره حتى لاتحسي انك انضلمتي لو زوجك نفذ كلامه ولا تتهاوشي معاه على شي في الاخير لو يصر عليه يكتشف فيه انك انتي الغلطانه عليه
واهم شي خلك مرنه ولا تشدي الا على حقوقك بس عشان ماتكوني بننظره انسانه شرسه وتخلينه يتقرب للعروس الجديده ويهرب منك بقسوتك عليه وتشددك في مسائل ليس لك الحق المطلق فيها كوني مرنه الا في حقوق الواضحه​

اختي اذا كلامك هذا صحيح ...امنت بالله..ماباليد حيله

لا حبييبتى لا يجوز شرعا ان يبدأ بيها فى القسمه بعد السبع الا بأذنك
اسئلى وتأكدى من كلامى

 

[قهوة ومطر]

ربي ييسرلك امرك يااااارب

 

[اللهم ازل همي]

اعتقد انه كان يقسي عليك عشان مايقولوا اهله ماخذ من برا وتتحكم فيه

 

[احساس صعب]

أختي قمة فرج الله همك ربي سبحانه بينصرك وهو بزواجه الثاني بداية نصره وصدقيني كثير من الرجال ما يعرف قدر زوجته الأولى إلا إذا تزوج ثانية يرجع للأولى صاغر ويتمسك فيها ويعرف انه كان في نعمة ولكن هو ما قدرها


كوني قمة اسم على مسمى وعاملي ربي أولاً قبل خلقه وربي ان تأتيك الدنيا صاغرة وحافظي حبيبتي على كثرة الإستغفار


أسأل الله أن ينزل على قلبك السكينة ويصلح أحوالك

 

[احساس صعب]

أقصد بداية نصرك أنتي

 

[**القمة**]

امين..
الله يسمع منك
والله اني ما اتمنى شقاااء لبنت الناس
لانها لو هي ما انحدت تاخذ واحد متزوج وكبير ما كانت اخذته..بس هي ممكن تكون مضطره..
وأسال الله ان كان في قلبها تكيد المكائد..فأسأله ربي ان يرد كيدها في نحرها ويكفيني شرها بما شاء
اما زوجي...فأسأل ربي ..رب الارباب وملك الملوووك ان ينصرني عليه نصر عزيز مقتدرا يارب العالمين



لاكن لايصيبه سوء من اجل اطفالي...

 

[بيرو]

^
^
السلام عليكم
معليش القمة مع تقديري لوضعك ... لكن احب اقولك ان مو كل وحده كبيرة ترضى بمتزوج ولا كل وحدة صغيرة تاخذ عزابي هذي كلها تقادير مالنا غير الانصياع لها والايمان بالقضاء خيره وشره
انا اعرف بنتين وحدة ملكت من فترة وحده يوم الخميس القادم وكلياتهن تجاوزن 35 سنة وسبحان الله قدر لهن الزواج من عزابيين ... واخرى قريبتي زواجها بعد شهر اصغر منهن بعدة سنوات والصراحة تيعش في جو طيب ومكتفيه ماديا وليست بحاجه وتقدمولها 2 من اولاد عمتها ورفضتهم وهما عزابيين وتقدملها واحد متزوج اصغر من قريبتي ذي وفي نفس الوقت متزوج من وحده اكبر منه 10 سنوات ورفضت وتقدملها واحد يقربلنا من بعيد ووافقت عليه علما انه تقدم لها قبل لايتزوج زوجته وسبحان الله اكثر من 15 سنة مرت على خطبته لقريبتي وبالنهاية اخذها اكيد مو تخطيط منهم او سبق اصرار وترصد وانما قدر ونصيب , ولما سئلت ليه وافقتي عليه قالت اولا دخل مزاجي وشخص يجيني للمرة الثانية معناه شاري من غير اني ماحب اغلب نفسي يومياااحب يكون لي مساحة خاصة بي اتفرغ فيها لشوؤوني ودرساتي من غير االطمانية التي بادية على محياها ومستقبلها مع هذا الرجل حيث تقول لما اترردت في اول الامر قال لي والدي استخيري 3 ايام وانظري مايحصل معك وتقول فعلا رات انه يهديها غصن اخضر فسروه لها بحياة طيبة مديدة ,,,,,,,,,,,,,,,,,,,,و اريد ان اقول من خلال هذا الكلام ان العبد في التفكير والرب في التدبير

وهذا قدر مقدر على الجميع ان انتي في نعمة بزواجك المبكر قد تحرم منه ابنتك او حفيدتك او قريبة غالية على قلبك حينها ستتمنين ان تتزوج ولو من معدد خوفا عليها من هذا الزمن وحرصا على دينها وعفافها في زمن لا يقدر هذه القيم فكل زمن ببلاويه........ احتسبي الامر كله عند الله وتجاوزي عن الهين من الامر وسفاسف الامور يغنيك الله من فضله الكثير

 

[**القمة**]

بيرو
شاكره لك مداخلتك ومشاركتك في موضوعي
بكلمات ما اعتقد لها صله بمشكلتي
اللي تبي تتزوج عزابي او معدد فكله نصيب ومقدر
واكثر البنات اللي يوافقن على المعدد هم فعلا من غلبهن الوقت وفات عليهن سنين العشرين وتتخطى الثلاثين
وهذا واقع...حبيت ارد عليك ... ولآ انا ما حستفيد من مداخلتك في حل مشكلتي بشيء
سوى الكلمتين هذه..( احتسبي الامر كله عند الله)

 

[بيرو]

ولو ياقمة يسعدني اكون ممن يذكر المؤمنين
ومداخلتي حبيبتي ليست لتغيير واقع احد هي تصف الواقع وحسب دونما تحامل على احد احببت اذكر نفسي واياكي والجميع ان الامر حتى لو بدا مصيبة فهو تقدير مقدر من قبل ان نخلق ونسأل الله ان يهون الامر علينا ان كان مكروه وان يبارك لنا فيه ان كان امرا طيبا ,,,,,, اذكر محاظرة لاحدى الداعيات تقول بعض المذاهب تصر على نشر سم بين النساء وهو موضوع التعدد وبالذات الزوجة الثانية وتصويره بصورة وضيعة او تحاول ان تلبسه شكلا غير مقبول وذلك للنيل من السيدة عائشة ام المؤمنين رضي الله عنها كونها كانت زوجة ثانية لذا سرت احرص كثيرا في كلامي حتى لاجر على نفسي ذنبا او اكون مستحقة لحنق الخالق علي لذا ياخيتي انا فقط انصح انصح نفسي اولا لاني ممكن باي يوم يجي زوجي ويقول ابي اتزوج لذلك سرت اهون الامور على نفسي واهونها على غيري بالتذكير بجزاء الصبر فلست اسمح لنفسي ان انتقص من غيري كونها زوجة ثانية او حتى ثالثة بانها لم تجد من يتزوجها او لانها كبرت فاسارت تلتقط الفرص التقاطا وكانها هي من تقرر عن ربها قدرها او ان السنوات سرقتها وصحت لقت نفسها عانس هذي كلها اسباب يعني مثلا لو تزوجت بالعشرين كان راح يتغير قدرها !! دام ان الله كاتب لها قدر فلن يتغير وستراه وتعيشه مثل ماريت انتي قدرك وعشتيه ثم والله ياليت المعددين يتزوجون كبار كان ارحم لا اغلبهم يشترطونها عشرينية -زوجي مثلا يقول اريد ان اتزوج بنت 18 سنة ليه يقول انتي يوم تزوجتك كنتي كبيرة كان عمري 22 سنة ويشوفني كبيرة !! اكيد اني ماحب اشوف زوجي يتزوج علي لكني اخاف ان اتعدى حدودي وارفض المبدا واذكر نفسي دائما ان هذا كله تقدير من العزيز الحكيم ومن انا حتى اعترض كان ممكن لاتزوج زواجا مبكرا او يتوفى زوجي او اطلق لاسمح الله وقتها راح اتبنى موقف اخر غير موقفي وانا في نعمة لماذا لاني سرت من اللواتي امتحن الله صبرهن لذا يردن على الاقل المعيل ... وانصحك اختي بمجالس الذكر وحلقات تحفيظ القران الكريم والله انها تدخل على النفس سرور لا يدانيه سرور ,,,وانتي امراة ناضجة ستعي الخير الكثير في هذي المجالس الطيبة.
ولاحول ولاقوة الا بالله

 

[رازيا]

http://www.niswh.com/vb/showthread.php?t=247051 عزيزتي القمة انصحك افتحي هنا وراح ترتاح نفسيتك

 

[همس الفيافي]

اخيه اعانك الله وثبتك على مبتلاك ورزقك الصبروالثبات من عنده سبحانه فحتسبي الاجرمن عند الله وحده ولزمي اخيه الاستغفار في جميع احوالك و الله يعوضك خير

 

[ريماس 22]

اخت ميرو انتي دخلتي بمحاضره عن الزوجه الثانيه ا احنا لم نعترض على الزوجه الثانيه ولم نكيد لها المكائد انما نريد ان يتحقق العدل للزوجه الاولى فقط والا هي لايحق لها العدل وتدبير امورها بعد زواج زوجها عليها ..اكيد لااحد بيعترض على القدر حتى لوكان سيء....اما اخيتي القمه والله ان قلبي معك واتمنى من الله سبحانه ان ينصرك نصر عزيز مقتدر ويفرج همك ويرد لك زوجك ردا جميلا ....اسال الله ان يدخل السرور والطمانينه على قلبك ....انا جلست افكر في استشارتك هل يحق لزوجك ان يسافر ...اكيد لا فمن شروط سفر الزوج المعدد القرعه فلا يجوز له ان يسافر بغير قرعه او بغير رضاكي الزوجه الثانيه االبكر لها سبعة ايام والثيب لها ثلاثة ايام بداخل مدينتكم اما سفر لآلآلآلآلآلآلآلآلآلآلآلآلآلآيجوز الا بقرعه اوبرضا من الزوجه الاولى وهذا شرع الله عندما شرع التعدد حددله قيود وحدود فسبحانه اعلم بعباده ,,,,,بمعنى من ترضى المتزوج لابد ان تعرف ان هناك قيود وحدود شرعها الله سبحانه وتعالى ولا يجوز التعدي عليها والا دخلنا في دائرة المحرمات وهذا لايجوز ...انا هنا اتحدى انك لو تقولي لزوجك ان سفرك لايجوز الا بقرعه او برضاي فانه لايعلم بالحكم اكيد اغلب الرجال لايعرفون الا ان التعداد حلال مابعد التعداد لايعرفونه اقرائي كتاب(((((أحكام التعدد في ضوء الكتاب والسنة))))))في الكتاب اذا خرج الزوج بغير قرعه اثم ولزمه القضاء ,,,,,,,,انصحك ان تشتريه وبعد ماتقرائيه وتعرفي ايش فيه ممكن ان تهديه لزوجك فهو مفيد مبين من فهرس الكتاب انا لم اقراه ولكن اطلعت على الفهرس فقط من الدرر السنيه واذا رجع من سفره يبتدي من عند الاولى وجوبا اتمنى ان اكون افدتك ((((((وأما إذا سافر بغير قرعة بواحدة منهن ، فقد مال إليها . وهذا ظلم لا يحل )))))هذا مخصص للزوج المضطر للسفر وليس للنزهه وقضاء شهر العسل بمعنى انه حيكون الظلم في هذه الحاله امر وادهى ,,,ياعمري ثقفي نفسك في القراءه عن التعدد والشي الذي يجوز والشي الذي لايجوز للمعدد بمعنى حجيه بالادله ممكن تلاقي كل المذاهب وكلن له قوله .....خذي مايناسب مذهبنا السنه والجماعه واتركي باقي المذاهب فكلن له رايه حسب مذهبه والله اعلى واعلم