[you] اذا انتي موظفه ومتزوجه محتاجينك هنا

انا ماني موضفه بس برائي الموظفه لازم يصرف عليها زوجها وهي اللي تعوده من البدايه وترسم حدود لكل شئ
 
السلام عليكم....

الغاليه انا كنت موظفه والحمدالله هو كان يصرف علي عادي ما يقصر. وانا بعد كنت اصرف واشتري اغراض لنا ول عمتي من فلوسي حتى انه يدللني واايد. يعني الوضع كان الحمدالله ماشي عدل مافي اي نوع من الحساسيه

لكن اول ما استقلت صارلي شهري هو وقف يصرف علي وخلاني في بيت هلي ويقول خلهم يصرفون عليج. ويسال متى رح تنزل نهاية الخدمه كم رح ينصرف لج؟؟؟؟ كم رصيدج في البنك؟؟؟؟ متى رح تاخذين ورث ابوج؟؟؟؟؟

وفوق هذا كله رافض اني اشتغل مره ثانية بحجة انه هو الرجل ؟؟؟؟؟؟؟ ويريد يتزوج وحده ثانية؟؟؟؟؟

كيف لحد يسالني لاني صدج ماعدت افهم تفكيره ولا اقدر احلل شخصيته. وهو مديون لحد شعر راسه عليه تقريبا 400 الف درهم اماراتي للبنك (سلفية اخوه, سيارتة،بيت امه الجديد، العرس (العرس بس 70 الف))

الله المستعان
 
هلا وغلا اختي انا انسانه موظفه وزوجي موظف وظيفه محترمه وراتب راقي وبصراحه انا ماابخل على نفسي بشئ وهو مو مقصر متفاهمين الحمدالله هو متحمل ومكفل بكل شئ انا نفسي وبس اما بالاعياد يحط ويدفع لعياله ويزيد لي مصروفي لان راتبي بس 6 الاف ريال وصراحه بالمناسبات ماالحق وهو كل شئ يتحمله مصروف البيت والشغاله وكل شئ الله لايغير عليه ويسخره لي اما المراه اللي مو موظفه لازم الزوج يصرف عليها لان ماعندها دخل والله يسخر ازواجكن جمعين ياحي ياقيوم
 
اهلين حبيباتي البلقيسيات انتوا دائما تدقون على الوتر الحساس
الزوج يحب الإتكال على زوجته لما تكون موظفه ويحاول يسحب نفسه شوي شوي من تحمل المسؤلية لحد ماتشوف نفسها المسكينه متورطة في مصاريف البيت والعيال وغير الواجبات اللي عليها واهلها
لكن انا رأيي وعن تجربة مؤلمة ان الوحدة لازم تشيل نفسها من الصرفية والبذل الزائد عن حدة وتطالبة بمصروفها ومصروف البيت والعيال ولاتخلي على نفسها قاصر مادام هو في خير وعندة امكانية انه يسافر مع اصحابه ويتكيرم مع الناس فهي واولادها وبيتها اولى
اما الهدايا الخاصة فيها مثل صديقاتها واهلها تتحملها بنفسها..واما اللي يخص اهله فهو اللي يدفع
وتحاول المرأة تدخر لنفسها من راتبها في حساب خاص مايدري عنه وحتى لوسألها ماتخبره عنه ولاكم عندها
لازم الوحدة تكون مستقلة بنفسها وعندها اسرار ما يعرفها زوجها حتى زوجها يخلي لها قيمة
تقبلي مروري ودمتي بود
 
اهلين اخواتي طبعا ماقدر افيدكم في هذ الموضوع تدرون ليش ؟؟لاني ماسنعت نفسي
انا موظفة ومايصرف علي واغلب حاجات اولادي علي حتى لو طلبنا منه يتحجج انها غير مهمه او مامعه (وهو معه وانا ادري )وكل مرة نتناقش بالفلوس نتخانق والاهم انه يقول وين تودين راتبك انتي ماتصرفين شي زي اللي كذب كذبه وصدقها
بس الحق يقال انا مااقصر على نفسي او عيالي لكن لايمكن اعطيه فلوس بيده او اقسط سيارة او ابني معه بيت لاننا في زمن الله اعلم فيه الرجال مالهم امان وانا اعرف كثير تزوجو عليهم في بيوتهم اللي بنوهم يعني الجرح اكبر​
 
المسك والعود قال:
انا متزوجه وموظفه وراتبي بيد زوجي ولا يهمني المال بس المهم انه يرضى واعيش بسلام
أنقر للتوسيع...

لايا حبيبتي هذا الكلام ما ينفع ان شاء يكون راضي عنك دائما... لكن موعلشان راتبك بيدة
الرضى شيء والخصوصية شيء ثاني
الله لايغير عليكم ويسعدكم دائما مع بعض.... لكن انتبهي لنفسك وراتبك بيدك مو بيده
لأن الرجل غدار ويمل ويحب يغير ويحب يشوف زوجته مستقله بنفسها مو تابع له
لكن نصيحة اذا نويتي على التغيير فيكون بالتدريج مو مره واحدة وتصير مشاكل انت في غنى عنها انت ادرى بزوجك
وتقبلي رأيي بصدر رحب ...... دعواتي لك بكل خير
 
الحياه كفاح وتعب ولابد من التنازلات ، يعني اذا المرأة موظفه مافيها شي اذا جابت اشياء لبيتها واولادها ولكن بحدود ، لان المرأة بشكل عام ضعيفه ولاتستطيع ان تزعل اولادها وطبعا الرجل مايصدق ، بس لازم في حدود دائما ، انا زوجي كريم مع اولاده ولايبخل عليهم لكني معاي حسب المزاج ، وانا مااطلب شي لي منه الا نادرا لاني موظفه ، احيانا بالحيله وبالاسلوب الدلع اذا كنت معاه بروحنا اسوي نفسي ماجبت فلوس ونفسي في هالشي مثلا قميص نوم حلو او شنطه حلوة وهو مايقصر ، لكن مع الاولادد مااقدر أدلع واطلب ، وانا مع اولادي مااقدر اقولهم لا اشتري بحدود اللي تناسبني من ملابس والعاب وو ، اذا اشتريت حق نفسي او لاهلي مااخبر زوجي كم صرفت بالضبط على نفسي عشان مايحط في باله ان عندي فلوس وميزانية ، لكن لما اشتري للاولاد اقوله بكم اشتريت وكم صرفت عشان يعرف اني موبخيله مع اولاده ولااقصر معاهم ... يعني خير الامور الوسط ، الاشياء الكبيرة للبيت مسؤولية الزوج والاشياء البسيطه ممكن ان تسهم فيها الزوجه العامله حتى تمشي السفينه ؟
 
للاسف يالغالية كثير منا واقعات فيهذه المشكلة ومانعرف كيف نحلها يالييييييييييت كون بينا استشارة متمكنة تساعدنا ويكون ذالك في موازين حسناتها
 
السلاااااااااااااام عليكم,,,,,,,,,
تجربتي الشخصية في هالموضوع,,,,,,,
كانت تربيتي ولله الحمد في بيت نعمة يعني ما نفكر هذا بكم أو هذا غالي يعني اللي أبيه أحصله بالنسبة لي تزوجت ومباشرة توظفت وما كنت أحرم نفسي يعني ما أدقق الفلوس مين يدفعها (بس لما ذهبت السكرة وجات الفكرة)
عرفت أن موكل شي يدوم يعني الرجل يمكن في لحظة غضب ترخصين عنده وما يفكر أن مساعدتك له في الصرف على نفسك وأولادك تضحية بل يعتبره واجب ضريبة الخروج من المنزل
فقلت يابنت لازم تضعين حدود للمسائل المالية
يعني الأكل والشرب والابناء ما أجيها وبالنسبة لي أطلب من حين لاخر
لاني بعد مدة (ان كان لي عمر بتقاعد)فأبغى يكون لي شي أصرف منه
وغير هذا ما ألوم نفسي لو لاسمح الله صار لعلاقتنا أي كدر
ولكل مجتهد نصيب
أرجواني أضفت للموضوع لاني ما قدرت أقرأكل الردود
وسلاااااااااااااااااااااامتكم
 
يا الله انا ويني عن هالموضوع من زمان
انا متزوجه من شهور بس
واشتغل ف وظيفه محترمه الحمد لله وزوجي بعد
ف اول شهر من زواجنا عطاني مصروف حلو
عاد انا مالت علي قلت له لا شكرا ما محتاجه
قال لي اعرف انك ما محتاجه بس انا زوجك وهذا حقك
قام حط المبلغ ف الدرج وتم المبلغ مكانه اسابيع وانا ما خذته
عاد تصدقون بعدها ما تكرر الموقف
يعني نحن للحين ما عندنا عيال
وهو ما مقصر ابدا عالبيت
بس انا تصرفي اول مره من خجل وغباااااااااااااااء بس
اخاف يتعود
ويقول خليها تصرف على نفسها من راتبها خلاص
 
صراحة موضوع حساس ويحتاج الطرح واباء الرأي فيه والمناقشة ...
اول ماقريت الموضوع تذكرت مقولة قالها لي احد الاقارب (ان الرجل يظل يتطلع لما في يد زوجته لو انها 1000 ريال وهو راتبه 30000)وانا من واقع تجربة اجد ان الرجال يتشابهون في كثير من الامور على اختلاف بيائتهم
والله ازمة ..اشتغلت فترة طويلة من الزمن..وكل هذا على حساب نفسي واولادي..ولما جلست في البيت وطلبت منه يمشي لي شي ثابت وافق في البداية وبعدها وقف وقال ما يحتاج اذا بغيتوا شي اطلبوا ..قلت طيب ..ولما اطلب ..تعالوا اسمعوا المواويل اللي ماتنتهي ...وانا بطبعي اكره ان احد يعد علي..واكره اكرر الطلب اكثر من مرة ..لانه ماهو من النوع اللي سريع في تلبية الطلبات ...بعدها رجعت للوظيفة مرة ثانية والله انها ما تستاهل ولاحتى راتبها يغطي شي..ومع ذلك يسأل وين راح وش قضيتيه ...وانا عندي التزامات ...الخ الخ الكلام اللي ما يخلص ..على العلم اني اصرف راتبي كله على البيت والاولاد ولاادخر منه شي لنفسي ..وشي مؤسف انه كل هذا العمر وما عندك شي يفيدك ....وصرااحة تعبت معاه من هالناحية غيري يلاقيها جاهزة(اهله)وانا يعد علي...عشان كذا ودي اجلس عند عيالي احسن لي...والا وش رأيكم ....
 
انا متزوجة واتمنى انى اتوظف عشان اساعد زوجي وماراح اقصر عليه بشي لإنه بصراحه مو مقصر علي بشي وانا استغرب من الموظفات الى تبخل على زوجها طيب ليش هو يتحمل دوامها وغيابها عن البيت وتركها اطفالها عند الخادمه عشان اخر شئ تقول مالك حق براتبى
 
هذه مشاركتي الأولى في هذا المنتدى الرائع
أرى أن المرأة التي اختارت العمل أن تساهم في رفع اقتصاد الأسرة خاصة في هذا الوقت الذي أصبح فيه كل شيء غال وضروري في نفس الوقت ولا تنسى أن تخصص لها مبلغا ترضي به نفسها
 
اود ان انوه عن شئ
لكل عضوة
ليس هناك موضوع باسمك شخصيا ولكن عندما تدخلين باسمك يكون اسمك ع الموضوع
وحين تدخلين دون تسجيل يكون الموضوع باسم ضيف
ذلك اولا
ثانيا انا متزوجه ولست متوظفه
ومتردده هل العمل افضل من جلوس بالبيت ؟
مع العلم اني معي طفلين ويستحيل اجيب خادمه لاني بامريكا ومرتباتهم من اعلي المرتبات
هل يمكن التوفيق بين البيت والاطفال
هل المراه العامله مقصره مع اسرتها
هل ست البيت حياتها افضل
زوجي مرتبه جيد لكنه حريص
من كتر ماقعدت بالبيت خلاص مالي نفس للشوبينج وماني مشتهيه شئ
ايه رايكم في حالتي
 
بصراحه انا مو موظفه \بس اشوف اخواتي الموظفات ازواجهم شايلينهم عن الارض بعكس الاخريات سفر \بيوت\زينه \ اثاث يغير بستمرار0وسوق \عفوا ما اايد كلامكم000 وشوف ان الموظفه محترمه عند زوجها ويحقق لها كل طلباتها 0
 
السلام عليكم ورحمة الله وبركاته
انا موظفة ولسى باقي شهروادخل عالم المتزوجات
ودخلت هنا لاستفيد منكم يااخواتي العزيزات
وتقبلوني بينكم.... والله يعطي صاحبة الموضوع كل خير
لانه فعلا موضوع حساس ومهم جدا
ودمتم بووود
 
صراحه انا معاكم انه لما يكون للمراء راتب شهري خلاص الزوج يشيل مسوليته عنها اناجربت الش هذا يوم كنت طالبه ولي مكافئه بس الحين لا
 
هلا حبيبتي
انا بصراحه كافيه خيري وشري ومعاشي يالله يكفيني وساعات اطلب منه اذا ماكان عندي ومرات يعطيني ومرات لا وبصراحه ماهتميت شلون اخذ منه او لا .....
​
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل