♡ من زواج فاشل الى زواج ناجح ♡

احصائياتى
الردود
13
المشاهدات
2K

~UniQuE~

مراقبة أقسام الأستشارات الزوجية ،الأنماط الشخصية
معلومات ~UniQuE~
إنضم
11 يونيو 2013
المشاركات
2,548
مستوى التفاعل
928
النقاط
113
الإقامة
دار الأمان
♡ من زواج فاشل الى زواج ناجح ♡
السلام عليكم ورحمة الله وبركاته

هذا النقل عبارة عن تجربة شخصية لأخت فاضلة تداركت نفسها وحسنت من علاقتها بزوجها للحفاظ على بيتها... سأنقل الموضوع كما هو بدون أي تصرف ...


اسمعوني يا بنات ويا متزوجات انا واعوذ بالله من كلمه انا حبيت اعطيكم خلاصه تجربه زواجي الي استمرت ست سنوات وإن شاء الله تستمر طول العمر وبحاول اني ما اطول عليكم بس بنات انا اكتشفت اكتشاف هام هام هام جدا جدا الي هو ( الرجال مهما يحبك ويحترمك ويموت فيكي ممكن تفقدينه بكل سهوله ) واذا حبيتوا افيدكم انا مريت بتجربه زواج تدرجت بين الفشل الذريع خصوصا بعد اول سنه زواج ومرت بفترات فتور ومعارك ومشاكل لدرجه اني بديت احس انه يكرهني خخخ وانتهاء بزواج وربي وربي ويشهد علي الله انه صار زواج مثالي وانه تمر علينا الشهور تعرفون ايش معنى شهور بدون ما يكون بيننا صراخ او مناقشات حاده ممكن نقاش بسيط وينحل في وقته!

المهم نبدا
بسم الله الرحمن الرحيم

بقسم لكم حياتي قبل الزواج وبعد الزواج ( زواج الفاشل وبعدين الزواج الناجح ) عشان نكون مرتبين في الكلام المهم يابنات انا بكلمكم بشكل تلقائي عفوي لا بحاول انتقي الكلمات ولا الجمل يعني بكلمك بكل صراحه وكاني اخت لكل وحده فيكم ونفس الشي وربي ما كتبت هذا الكلام الا لسبب واحد وهو انه يمكن سبحان الله يكون في قصتي فايده او مغزى يخلي ولو وحده تعيد النظر في حياتها الزوجيه

انا يابنات كان زوجي قبل لا يتزوجني يموووووووووت فيني تعرفون ايش معنى يموت فيني يعني من كثر ما كان يبيني كنت ثاقله ثقل ما لا صار ولا استوى وهو كان متمسك فيني لابعد درجه يعني هدايا غاليه وعطور وكلها تجيني عن طريق امي لانها خالته ========>> امها واسطه العلاقه الغراميه خخخخخ يعني في هذيك الفتره كنت اتوقع اني لو تزوجته بيعيشني اميره وملكه متوجه على عرش قلبه وبالفعل تمت الخطوبه وربي كان يكلمني بالتلفون من الساعه 12 بليل لين الفجر وكان زواجنا بيكون بعد يومين ===========>> امها منعتها بعدين تقول خليه يشتاق لك ياهبله ترى الزواج بعد بكره ههههههه

المهم صار الزواج يا بنات والتم الشمل وبصراحه لو اقولكم اني عشت معاه احلى شهر عسل في حياتي كلها لدرجه انه كان يتفرج علي وانا نايمه جنبه وبعدين يخبرني الصباح يقول مو مصدق انك صرتي ملكي =========>> كانت تستحي تخاف تكون شخرت ولا سوت شي يفشل وهي نايمه خخخخخخخخخخ

جلسنا اول شهرين ما يطلع مع احد غيري واي شي بالتلفون لدرجه ان الكل بدا يتكلم علينا اللهم زياره ضروريه ولا عزيمه ما نقدر نعتذر عنها يا بنات ما اقدر اوصف لكم وربي وربي ماكان يخليني اسوي اي شي وانا الحين قاصده اخبركم بالتفاصيل عشان تقارنوا ايش الي صار بعدين انتبهوا يعني نتيجه لهذا الدلع المفرط من قبل زوجي حبيبي تعودت انا على هذي الحياه يعني اي كلمه منه تزعلني وتبكيني فيضطر يعتذر =======>> تحولت الى آله بكا خخخخ

تعرفون ايش الي صار في البدايه حاول فيني وكان يراضيني بكل الطرق ويتاثر معاي وبعدين صار يحاول فيني بس وهو متضايق وبعد سنتين تقريبا صار اذا بكيت يطنشني ولا كاني موجوده وبعد مرور فتره صار يبين انه ماصار يقتنع بمبرراتي واني دلوعه واني واني .....

المهم يا بنات الي اريدكم تفهموه من هذي البدايه انه الرجال يمل ويزهق ويطفش مهما كان يحبك ومهما كان يموت فيكي لانه الرجال بطبعه يحب الحرمه البشوشه يعني قدرتهم على التحمل مو مثلنا يعني اول فكره اريد اوصلها لكم يا حلوين هي :

1- لا تفتعلين مواقف للزعل والبكا الا للضروره القصوى لانه كثره البكا والتذمر مو صالحك ابدا واذا سألنا انفسنا ليش لانه زوجك يطلع مع رجال دايما تذكري هذي النقطه ويتشكون لبعض وفي بالعكس الي يمدح في زوجته فهو بيقول في باله ايش من بلوه هذي الي معاي بالبيت يا ربي

قلت لكم انا الي صحاني هو طلاق اخوي وبنت عمي وملاحظتي لحياته الجديده مع زوجته وحياه بنت عمي مع زوجها بديت افكر واسترجع شريط حياتي كامل يعني بعد ما كنت حبيبه زوجي ومدللته وكنت زوجه جميله ناعمه هادئه تحولت الى وحش كاسر خخخخخخ

بس وربي صح نادر مااهتم بنفسي وتقمصت دور الضحيه الي العالم كله ضدها في لحظه


قلت Stop

اختاري اما تكملي بقيه حياتك في نكد وجحيم والله اعلم ايش بيصير من زوجك او انه لازم تتغيري

لااااااااااااااااااااااااااااا ازم تعرفون ايش اول تغيير سويته بحياتي هو


تغيير في شكلي لا تقولين لي ترى ما ينتبه لي تعدلت ولا ما تعدلت هذا كلام مردود عليه لانك مادمت زوجتك لازم بيلاحظك حتى لو ما تكلم وبالعكس عاده الرجال ما يتكلم الا لما يشوف سلبيه في شكلك

يعني يقول هذي التسريحه مو حلوة او غير هالفستان هذا كله دليل على انه يشوف ويلاحظ وانا اذكر سمعت قصه قديمه ==========>> من قصه لقصه بيقتلوني البنات خخخخخ

هذي القصه تقول انه في بنت تشتكي لامها تقول زوجي ما يعلق على لبسي ولا زينتي ولا شي , عاد الام لما سمعت كذا عطت بنتها سلسله ذهبيه على رقبتها والسلسله هذي حطت فيها حشرة صغيرونه (قمله ههههه)

المهم البنت راحت لبيت زوجها وكل من شاف السلسه يمدحها الين جاء زوجها اول ما طالعها قال ايش الحشره الي على السلسله حقتك , عاد البنت راحت تبكي لامها ليش يمه سويتي فيني كذا , ضحكت امها وقالت ها ايش رايك زوجك يلاحظك ويطالعك ولا لا ؟؟

فهمتوا يا حلوات مغزى القصه انا من جوني العيال التهيت فيهم وبالبيت يعني احط نفسي باخر القايمه وهذا اكبر خطأ تعرفين ليش لانه في النهايه ماحد بيقدر ولا بيلاحظ هذا الشي

يابنات الرجال ما يهمه رتبتي بيتك ولا اهتميتي باولادك بقدر ما تهتمين به وبنفسك يعني لا تتخيلي لو رجع من الشغل ولقى كل شي متعدل في البيت الا انتي بيرضى بالعكس عشان كذا لازم اول شي تهتمي بنفسك البسي وتعطري واكشخي

وعشان اختصر لك الموضوع حطي في بالك شي واحد انك عروس ابديه مهما كان سنك ووزنك وشكلك ترى الاهتمام والاناقه تخفي كل شي , وانا عن نفسي في البدايه زوجي كان يستغرب ويقول ايش الي صار او من التعليقات الي تغث بعد شوي شوي صار يعلق علي ايش هذا الجمال ايش اللبس الحلو هذا ===========>> الوحش الكاسر تحول الى غزال وما يصيدونه خخخخخخخ


لانه يا بنات الانسان يخزن في عقله اخر صورة للانسان الي شافه يعني زوجك اللحين لما تخطرين على باله ما يتذكرك بفستان الزفاف ولا لما كنت عروس يتذكر اخر صورة لك شافك عليها وانتي شعرك منكوش ووجهك يلمع من كثر الزيوت الي فيه وبشكلك المعصب , او انه يتذكر بنت حلوة مرتبه مسويه شعرها تفحفح عطور وبخور ودايما الابتسامه على وجهها

وانتي اختاري اي الوجهين تريدين زوجك يتذكرك عليه خخخخخخخخخ اتفقنا على هذي النقطه , نروح للي بعدها

يتبع ...
 

~UniQuE~

مراقبة أقسام الأستشارات الزوجية ،الأنماط الشخصية
معلومات ~UniQuE~
إنضم
11 يونيو 2013
المشاركات
2,548
مستوى التفاعل
928
النقاط
113
الإقامة
دار الأمان
اتفقنا على هذي النقطه , نروح للي بعدها ----

2- كوني ضعيفه

ايش معنى هذا الكلام يابنات بقولكم شي مهم جدا
الرجال يكره الحرمه الي تتحداه مهما كان حتى ولو على نقطه عاديه يعني حتى لو تناقشتوا في موضوع معين وانتي متاكده من صحته لا تظهرين قدراتك وتتفلسفين لا قولي له يمكن بس انا سمعت كذا

يمكن وحده بتسالني يعني نلغي شخصياتنا قدامهم بقولك ايوة تعرفين ليش لسبب بسيط الي هو انك اقوى منه يابنات ترى الرجال طفل بس big size خخخ يعني على حجم كبير يعندي لو عندك طفل صغير بتعانديه اكيد لا معناه من الحين ورايح زوجك راح يكون الطفل الثاني او الرابع او مهما كان عدد اولاد هو بيكون منهم

انا زمان كنت اقول يا سلام وليش انا الي اتنازل وليش وليش اخر شي اكتشفت انه الخسران الوحيد من هذا التحدي وفرض الشخصيه هو انا لانه هو يطلع ويروح وانا اجلس في البيت اندب حظي وتذكري دائما انه التنازل بين الزوجين دليل قوة وليس ضعف المهم عشان ما اطول عليكم وما ازود في الموضوع بعطيكي خطوات تتبعينها لما يحصل لك مثل هالمواقف

اوكيه التغيير الي صار لي ماصار بين يوم وليله ولا في شهر ولا شهرين جلست سنه كامله وانا في محاولات للتغيير لو مرة فقدت اعصابي او رجعت لطبيعه النكد اتذكر الهدف الي انا حطيته والي يتمثل في تغييري معناه حياه افضل لي ولزوجي ولاولادي والحمدلله اختي ساعدتني كثير تشجعني وتنصحني دايما حبيبتي عسل وكل الي بيقرا الموضوع


اريد أأكد على شي ترى التغيير ياخذ وقت ومجاهده دائما حطي في بالك هذي الجمله تعب سنه ولا تعب حياه باكملها يعني صح بتتعبي شوي بس لما تشوفي النتايج على شوي شوي اول حاجه بتستفيديها انك تكبري في نظر نفسك يعني يابنات في البدايه راح تنصدمي برده فعل زوجك حتى يمكن ما يشجعك تعرفي ليش لانه بيقول في باله مصيرها راح ترجع ريما لعادتها القديمه يعني هو خلاص ماعاد يثق فيك انك فعلا بتتغيرين , عشان كذا نصيحتي لا تقولي له انا خلاص بتغير ولا عاد بقول ولا بنكد عليك , كل خطوات التغيير سويها بدون ما تقولين له بقولك ليش لانك لو قلتي له بيحاسبك على كل كلمه او غلطه وبيتم يعايرك انتي ما قلتي بتغير حتى انتي تنفجرين وترجعي نفس اول

واليك بعض الخطوات الي ممكن تتبعينها في حال حصول شي من هالمواقف

1-ممنوع المحاكمات الصوريه (هذا النوع من المحاكمات يتم فيه اتهام المتهم والحكم عليه ويحرم حق الدفاع عن نفسه )


الي اقصده يابنات انه مثلا لو زوجك طلبتي منه شي وماجابه تروحين انتي المحقق كونان تفكرين وتقولين هذا مو مهتم فيني لو مهتم ماكان نسى وبعدين يطلع الحكم انه هاملك ولا يبي يجيب لك شي وانه ما يحبك وغيره من الاحكام الجائره ,, ابدا يبنات وحطي في بالك لا تحكمي عليه نتيجه فكره انتي تخيلتيها وووافقتي عليها لازم تساليه بالاول وبعدين اخرجي بالحكم الي تبينه

2_ لو زوجك من النوع الي يطلع دايما مع اصحابه هل هذا مؤشر انه طفشان منك ويبي الفكه ؟؟


الاجابه لا والف لا مو لازم يكون هذا هو السبب بالعكس هذي تركيبه زوجك يحب اصحابه وبالتالي انتي لا تحرمينه من هذا الشي , بالعكس انتي ممكن تدفعينه انه يتمسك بخروجه اكثر واكثر عشان كذا اذا قالك انا بطلع سوي الي بقولك عليه :

أ-ابتسمي على طول وقولي الله يسهل طريقك حبيبي ولا يا بو فلان ولا تسالينه متى بيرجع ولا مع من بيروح ( اذا كان ولابد اساليه بهدوء ولطف بتتاخر حبيبي او بتروح قريب او غيره من الاسئله الناعمه ) يعني حكايه مد البوز متر والرد عليه بدون نفس لا لانه بهذي الطريقه كانك بتشجعيه وبتقولي له ايوة اطفش زياده لانك دايما بتلاقيني بهالشكل الي يقطع الخميره من البيت .


ب-اذا رجع كمان ابتسمي كوني مستعده لقدومه باحلى لبس واحلى كلام واساليه عسى ارتحت مع اصحابك ( اذا كنتي من النوع الي ينضغط زياده من هالحركات اقل شي ابتسمي له وقولي له تبي شي اذا قال لا خلاص قالك ايوة سوي له الي يبيه )اهم شي يابنات لا تضغطي على نفسك بمثاليات واشياء تحسين انك ماراح تقدري تستمري فيها حاولي الوسطيه في كل شي .

ج-اذا تبين تطلعين مكان وهو مرتبط مع اصحابه لا تقلبينها نكد مشيها هالمرة بس تقولين اوكيه خلاص مو مشكله انت روح ونحنا بكره مثلا او خذي منه موعد وياخذكم فيه .

د-بيني له انه مساله خروجه مع اصحابه شي يفرحك مدام يفرحه بس بالمقابل لازم هو يكافئك على تفهمك لطلعاته

ه-اذا في يوم ما طلع من البيت او هو من نفسه قالك تبون تطلعون حسسيه بفرحه كبيره وبيني له انك سعيده بوجوده انه هذي الليله حلوة كثير لانه موجود فيها مو تستغلين الفرصه وتشرحين ظروفك ومشاكلك مع عيالك ولا مع امه واخواته لالالالالالا والف لا , انتي فكري ليش هو يطلع اصحابه يضايقونه يشكون له ينتقدونه لا الانسان عاده ما يجلس الا مع الي يحسسه بقيمته واهميته ويحس بالسعاده معاهم فاستغلي وقت وجوده معاك ان شاءالله الساعه الي يكون معاك فيها قبل لا ينام او الساعه الي يكون معاك فيها بعد الظهر تكون احلى ساعتين عنده في اليوم كله وصدقيني على شوي شوي بتطول ساعات وجوده معاكي في البيت

و-راعي زوجك لما يجي من برا وما يبي يتكلم لا تغصبينه انه يتكلم ولا تعيدي له اسطوانات لو كنت مع اصحابك كان تغير الوضع وغيره وغيره , بالعكس يابنات احيانا سكوته معناه انه ماخذ راحته في بيته لانه هو برا مضطر يضحك ويجامل ولما يوصل المكان الي يحس انه مو مقيد يتصرف بحريته ياما بالسكوت اوغيره في كل الاحوال خلك متفاهمه ظروفه


3- لو حصلت مشكله بينكم كيف تتصرفين ؟

يابنات فديتكم وربي اعرف انه الضغط عليكم ماله حدود ويمكن الوحده تفكر ليه دايما نحنا الي لازم نسايس وليش وليش بقولك ليش , لانه انتي لما تزوجتي خلاص حصرتي حياتك كلها بزوجك واولادك مالك غيرهم , بينما زوجك عنده بدايل اخرى ممكن يتزوج ثانيه ممكن يطلع خارج البيت ممكن يلهي نفسه باي شي عشان كذا لازم تقاومي وتصري اكثر واكثر انه توصلي باسرتك لاكبر درجه من المثاليه والسعاده بحسب ما تقدرين ولا تنسي الاجر من الله سبحانه وتعالى وايضا اولادك ونفسياتهم واستقرارهم ترى بيتك كلها انتي اساسه فلو الاساس قوي وسليم البيت كله بيقوى ولو ضعيف وهش البيت كله بينهار انا مااراح ابالغ واقول الحين ما تحصل بيننا نقاشات او مشاكل لو قلت كذا بيكون كلامي كله ادعاء ومبالغه لا خير فيها تحصل مشاكل وتواجهنا صعوبات بس بإذن الله تنحل في وقتها ===========>> زمان تجلس بالاسبوع زعلانه ولاحد يعبرها

يتبع ..
 

~UniQuE~

مراقبة أقسام الأستشارات الزوجية ،الأنماط الشخصية
معلومات ~UniQuE~
إنضم
11 يونيو 2013
المشاركات
2,548
مستوى التفاعل
928
النقاط
113
الإقامة
دار الأمان
انا مااراح ابالغ واقول الحين ما تحصل بيننا نقاشات او مشاكل لو قلت كذا بيكون كلامي كله ادعاء ومبالغه لا خير فيها تحصل مشاكل وتواجهنا صعوبات بس بإذن الله تنحل في وقتها ===========>> زمان تجلس بالاسبوع زعلانه ولاحد يعبرها

هذي خطوات تتبعينها في حاله وجود مشكله :

1- اولا وقبل كل شي فكري في السبب الاساسي للمشكله , بمعنى لو زوجك منعك من الخروج او زياره اهلك , لا تزعلين وتطلعي له الجديد والقديم والي صار والي كان ونقاط ضعفه وغيره وغيره لا ركزي في المشكله نفسها ايش هي المشكله ليش منعني ؟ فهمتوني

2-ناقشيه بهدوووووووووووووووووء , يعني لما تصير مشكله لا ترفعين صوتك لانه لو رفعتي صوتك تاكدي تمام التاكيد انه زوجك خلاص راح يبدا بالدفاع عن نفسه بالتمسك برايه وبيقول في نفسه يالله بنشوف من منا الرجال انا ولا انتي ومن الي بيمشي كلامه انا ولا انتي , تذكري انك انثى يعني رقه مرونه هدوء طيبه ( فكري في طريقه تعاملك مع غير زوجك وفكري كيف يكون اسلوبك قمه في الرقي والاحترام ياهل ترى زوجك ما يستحق يكون مثل غيره ؟ )


3- حاولي تقنعيه بالعقل رفض تدلعي عليه حبيبي فديتك خلني اروح هالمرة تراني متحمسه وكذا , ماشي فايده لا تحمرين له عيونك وتبدين في اطلاق صواريخ سكود الهجوميه وتخلينه ما يسوى شي وتنزلين عليه نزله تخلينه يكره نفسه ويكره اليوم الي شافك فيها .اقنعتيه وانحلت المشكله تكون انحلت بهدوء ورضا والحمدلله

4- زوجك عنيد مافي فايده من اقناعه تعرفين ايش احسن حل سمعي كلامه بكل هدوء واحترام ( وفي فرق بين انك تسمعين كلامه بنفس راضيه بس مع توضيح حزنك الرقيق ودموعك الناعمه , وفرق انك تسمعين الكلام مرغمه وبنفس شينه في ذيك اللحظه بيقول في نفسه انشالله تنفقع مرارتك من الزعل غلبتك يالدبه عشان مرة ثانيه لا تتحديني )

صدقيني بيتغير زوجك : وفعلا انا مجربه ترى زوجي عاندني كثير واخذ فتره لين تعود وتاكد اني تغيرت , مع مرور الوقت لما يشوفني اسمع كلامه =========>> حزينه وجميله وهادئه خخخخخخخ يبدا يتغير يعني يبدا يبرر لك سبب رفضه او انه يبدا يعوضك بطريقه ثانيه اما يحسن من طريقه معاملته لك ومع مرور الوقت يلين معك صدقيني لانه عارف انك في النهايه بتسمعين كلامه فما تفرق عنده يوافقك ويسمع كلامك هالمره فهموتوني اخواتي العزيزات المرة الجايه بكلمكم عن شي مهم جدا الا وهو ليش زوجي دايما يعاندني ؟!

ليش زوجي يعادني ليش كل ما اقول يمين يقول يسار , اقول هنا يقول لا هناك ؟!!!

بقولك انا ليش لانه ينتقم لنفسه ويثأر لكرامته ولرجولته منك بطريقه غير مباشره , بتقولي كيف , لانه يابنات في حاله حصول نقاش بينكم وخرجتي منه انتي منتصره , يعني وافق على موضوعك او الشي الي تريدنه غصب عنه واتقاء لشرك تأكدي انه بيرد لك الصاع صاعين , وانه بينتقم منك هذا الانتقام راح يجيك في تفاصيل حياتك اليوميه واهمها العناد والتطنيش مثلا ؛

1- اطلبي منه شي ضروري راح يقولك مو اليوم بكره وانتي عارفه ومتاكده انه يقدر


2-راح يتحول الى تمثال ابو الهول في بيتك يعني صمت مميت , وعاد انتي تكلمي وتكلمي في الاخير بيرد ويقول ايش قلتي اسف ما انتبهت

3- اولادكم وسيله انتقام فعاله تبرد قلبه , يعني لو العيال ما سمعوا كلامك او كنتي تطلبين منهم شي ورفضوا , او علووا صوتهم عليك , بتشوفين اسنان زوجك كلها وبتعدينها وحده وحده من وسع الابتسامه بيرتاح للي يسوونه فيك وانتي عاد بتموتين قهر ولما تطلبين منه يكلمهم راح يقولهم عيب يا عيال بس الصيغه في كلامه تقول عفيه على عيالي بردوتوا على قلبي الله يبرد على قلوبكم والعيال ترى يفهمون انه ابوهم مو صادق ولا جاد في كلامه

4-بيكون جاهز ومستعد لانتقادك في اي لحظه يعني بيصير قناص لكل غلطه او هفوه تسوينها شفتي كيف نتايج فرض الرأي بالقوة لها عواقب وخيمه ولا ؟ يعني يا بنات لكل فعل رده فعل حطي في بالك دايما انه زوجك رجاااااااااااااااااااااال يعني ما يرضى بالهزيمه حتى لو من زوجته ولازم ينتقم لنفسه باي طريقه

 

~UniQuE~

مراقبة أقسام الأستشارات الزوجية ،الأنماط الشخصية
معلومات ~UniQuE~
إنضم
11 يونيو 2013
المشاركات
2,548
مستوى التفاعل
928
النقاط
113
الإقامة
دار الأمان
سألتني اخت وقالت انا عصبيه كيف اقدر امسك اعصابي ؟

انا بقولك كيف ... اولا انا عن نفسي كنت ناااااااااااااااااااااار اذا عصبت ماعاد اعرف من الي قدامي لدرجه والله العظيم رميت بجوال زوجي على الجدار بكل قوتي لين انكسر ==============>> وربي تتفشل من هذا الموقف تعرفون ايش رده فعل زوجي ياريته صرخ علي ولا نازعني لا طالعني بنظره وربي تمنيت الارض تنشق وتبلعني وتعبر لي عن مدى احتقاره لاسلوبي وطريقتي معاه بس لما فكرت يا بنت بايش فادتك العصبيه انا متاكده انكم كلكم معاي انه عواقب العصبيه تأثر فيكي انتي قبل زوجك واولادك

1- اولا تكرهين نفسك بعد نوبه العصبيه وتحسين بندم هذا الندم بس ممكن يحطمك نفسيا


2- تصيرين في موقف ضعف تعرفين ليش لانك تضطرين تتنازلين وتراضين زوجك او تحسنين صورتك باي طريقه يعني ما استفدتي شي بالعكس زوجك هو المستفيد

3- تحسين انك فقدتي كل معاني الانوثه والرقه وتكرهين النظرات الي يطالعك فيها زوجك وانتي بهالحاله

4-فديتهم عيالنا هم الطرف الخسران في عصبيتك , يعني لو فكرتي في لحظه عصبيتك ايش يدور من خوف وقلق وحيره وانهيار نفسي لابنك او بنتك حتى لو بعمر السنه وربي وربي ما كنتي فكرتي تعصبين يوم من الايام على الاقل قدامهم

يا بنات تعرفون ايش اكثر شي غيرني؟ اني صرت موضوعيه يعني ماصرت افكر بقلبي وهذا اكبر خطأ نحنا نقع فيه , يعني فكري؟:

1- البكا بيخلي زوجك يحبك ؟


2-النقد والشكوى الدائمه بيحسن زوجك ؟

3- فرض الرأي والسيطره على الزوج بيفيدك ؟

4-اهمال نفسك وجمالك وجعل نفسك باخر القايمه بيحلي زوجك في نظره ؟

5-مقارنه نفسك بالاخريات والنظر الى مافي يد غيرك بيوصلك للي تبيه؟

يعني حبيبتي فديت قلبك فكري فكري كل الي تسوينه بايش بينفعك حركتك خطوة قدام لحياه سعيده مع زوجك واولادك؟؟ لالالالالا بالعكس هذي كلها اشياء ترجعك لورا تخلي زوجك يدور غيرك او على الاقل يعيش معاك وهو يندب حظه إن شاء الله المره الجايه بجاوب على سؤال مهم جدا من اختي الحبيبه كيف قدرتي توفقين بين بيتك وزوجك واولادك ؟!!

المهم قررت انا اتغير وكان بدايه التغيير بعد ولاده ابني وكنت عند اهلي الاربعين كله في هذك الفتره بديت اشتغل على كريمات ومقشرات وبقولكم برنامجي للاستفاده :

1- كنت ادهن جسمي كله زيت الزيتون واخلط معاه ليمون وانام عليه للصبح والصبح اغسله واوادهن جسمي بجرجنز (الصبار والخيار)

2-كنت احط بوجهي اكسترا ديرم رقم ثلاثه وعلى طول بعدها كريم ايديال (بعدين سمعت انه مضر بالبشره )=======>> جلست اول اسبوعين وجهها طماطمه حمره

3-قللت الاكل في الاربعين لاني اصلا عاده اضعف بعد الولاده وانتفخ بعد خمسه سته شهور من الولاد ه اما بعد الولاده بشهرين ثلاثه اتم رشيقه ========>> بس الكرش رفيقتها في الحياه سواء رشيقه او متينه خخخخخ

المهم ماخلص الاربعين الا انا عروس وكل من يشوفني يتجنن علي وعلى فكره يابنات ترى اهتمامك بنفسك وانك تشوفين نظرات الاعجاب بنظر غيرك وربي وربي تحسن حالتك النفسيه 100 مرة , وانا دايما اشدد واقول انه اي امرأه في العالم مهما كان شكلها ولونها وجسمها فيها جمااااااااااااااااااااال ولازم تستغله وتحاول تركز عليه ( والدليل على ذلك انه عندي صديقتي سمره بشكل غير طبيعي ======>>يعني هي تطلع عندها زبده

المهم هذي صديقتي عندها اصرار وتصميم انها تكون بيضه ومن النوع الي تهتم بكل شي في جسمها تعال شوفوها الحين وربي وربي اني الحين صرت استحي احط ايدي عند ايدها ههههههههه

بس هي من النوع الي عندها مبدأ انه اي كريم يبيض تستخدمه مهما سمعت عليه من اضرار وانا دايما احذرها بس بدون فايده , بس الله يبعد عنها الامراض وكل الي تسويه يصير لها جمال وبياض وحلا )

============>> مخلصه الاربعين وصارت في بيت زوجها لما وصلنا البيت كنت مسويه تسريحه ولابسه وكاشخه وانا اشوف ابو الشباب صارت حالته حاله وانا كان الولد يبكي فوقي ======>> والبنت خليناها في بيت اهلي على الاقل نفتك من وحده خخخخخخ تعرفون ايش سويت تعطرت بنفس عطر وبخور ليله العرس وكنت محنيه ايديني ورجولي , حتى هو لاحظ وقال الله رجعتيني لايام العرس بس الله يسامحه البيبي كان كل شويه يبكي ماهنانا خخخخخخ

المهم انا كانت فيني عاده سيئه , اني اذا اشتغلت شي ولا سويت شي بالبيت احب انه يمدحني او انه يساعدني ========>> كانت يرتفع عليها الضغط اذا بتشتغل في البيت وهو حاط رجل على رجل يتفرج على التلفزيون

ففكرت قلت يابنت هذا شغلك انتي ليش تزعلين وايش ذنبه مسكين , وعلى فكره يابنات اي مجهود بذلتيه ولا اشتغلتيه وتعبتي فيه بس كان مرافق له نظرات العتاب والزعل لزوجك والله ابدا لا يشكرك عليه ولا يحس فيكي عشان كذا انا قررت انه اي شي اسويه اسويه بطيب نفس والي يتعبني زياده ما بطلع حرتي في زوجي فكرت في فكره ساعدتني كثير الا وهي ........... يتبع ....


 

~UniQuE~

مراقبة أقسام الأستشارات الزوجية ،الأنماط الشخصية
معلومات ~UniQuE~
إنضم
11 يونيو 2013
المشاركات
2,548
مستوى التفاعل
928
النقاط
113
الإقامة
دار الأمان
عشان كذا انا قررت انه اي شي اسويه اسويه بطيب نفس والي يتعبني زياده ما بطلع حرتي في زوجي فكرت في فكره ساعدتني كثير الا وهي

-----
بنك الحسنات ------

ايش هو بنك الحسنات , شوفوا يا بنات ويا متزوجات ويا اي انسان يعاني من مشكله في حياته , كلنا نفكر الحين انا مثلا عندي مشكله اتفقنا هذي المشكله انا حاولت احلها بكل الطرق بس مافي فايده , بيكون عندي طريقتين اتبعهم :

1 - اني اندب حظي وانفعل واكتئب واكره حياتي وانكد على زوجي او على نفسي او على الي حولي والسؤال المهم هذي الطريقه حلت مشكلتك ؟؟؟؟؟


2- الجأ لبنك الحسنات بعد الله , هذا الحساب افتحيه من الحين سوي لنفسك دفتر توفير سري ماحد يعرفه غيرك , اي مشكله صادفتيها مع زوجك او في حياتك بدل ما تفقدين اعصابك وتتعبين نفسك لا احتسبيها لله , يعني اليوم عصبتي على زوجك لانه طلع وما اخذك للمشوار الي وعدك ياخذك له , كل مشاعر الغضب والاستياء جمعيها وحوليها لحسنات , تصدقين وربي راح تفرحين بمرور الوقت لانك استفدتي من مشكلتك بفايده كبيره ومهمه وخالده الا وهي لاخرتك شفتوا كيف ممكن ضبط النفس والهدوء ممكن يتحول لشي يساعدك في حياتك انا في متابعتي لاحد الدكاتره سمعته يقول انه طاقه الانسان تجذب الاشياء الي هو يريدها ايش معنى هذا الكلام معناه شي واحد بوضح لك اياه بمثال


مش احيانا تستغربين في وحده تعرفيينها تقولين ياربي هذي الحرمه متوفقه بكل شي مع انها اقل منك بكثير اشياء بس تلاحظين انها دايما سعيده ومرتاحه في كل شي؟؟؟ بقولك ليش , لانه هذي الحرمه طاقة جسمها متفائله عشان كذا ينجذب لها كل شي حلو بالدنيا ( مو مثل حالتنا نتفنن في جذب الاكتئاب والنكد والحزن لحياتنا لانه طاقتنا سلبيه فتجذب اي شي سلبي في الحياه ولعلمكم يعني وهذا شي بيني وبين كل الي من نوعيتي (الكئيبات ) ترى اذا ماحصلنا شي يزعلنا ندور على اي شي بس يرجعنا للدور الي نحن نحب لا اراديا نعيشه ) !!!!

يعني باختصار: اذا اردتي انك تعيشي سعيده راح تعيشين سعيده برغم كل الظروف ولو اردتي الحزن والكآبه ولا يهمك بتجيك الكآبه من المكان الي تريدنه ولو كنتي في قصور ونعيم وأنهار ومجوهرات وكل متع الحياة بتلقين سبب تنكدين على نفسك فيه !

فديت كل وحده حزينه وتقضي لياليها ودمعها على خدها بس والله العظيم هذي حقيقه يابنات الي تريد تقدر تغير حياتها بتقدر ( على فكره حتى الي مش متزوجه وتقول انا شكلي ما بنخطب ليش انا كذا وتشاءمت ترى تتعقد حياتها اكثر واكثر ) يابنات ترى الحياه سهله سهله ونحنا الي جالسين نصعبها اعذروني حبيباتي وربي جالسه اكتب وابني فوقي ما خلا فيني شعره من الطفش خخخخخخخخخخخ يبيني افضى له ( حتى الاولاد الصغار انانيين الله يعيننا على الرجال بكل انواعهم واحجامهم هههه)

يابنات انا ابي اقولكم وااكد على نقطه مهمه جدا جدا الي هي الوسطيه في كل شي

يعني انا لما بديت احاول اغير من اسلوبي وحياتي كنت ابالغ كنت خلاص احاول ارضي زوجي اربع وعشرين ساعه واضغط على نفسي كثير , المهم انه يرضى , يعني ما اكون على طبيعتي الين اخر شي انفجر مرة وحده وارجع لطبيعتي , ومع مرور الوقت فهمت الطريقه وبلخص لكم اياها في عده نقاط :

1- انا قلت لازم تهتمي بنفسك، صح؟؟ , بس هذا مو معناه انك اربع وعشرين ساعه كاشخه وكانك في عرس !!, انا اقصد انك تحافظي على اكبر قدر من الترتيب , يعني جيتي من الدوام ووجهك من مكياج الصباح ذايب وحالتك حاله تبدلين ثيابك وعلى طول لزوجك لا حاولي تلبسي شي خفيف ومناسب , وعلى الاقل تغسلي وجهك وتحطي حتى ولو بيبي باودر ورشه عطر وخلاص .


2- لا تبالغين في الاهتمام بزوجك وانتي اصلا مش من النوعيه الصبورة , يعني لما تجي في راسك وتتحمسي وتقولي انا خلاص بتغير تروحين تسوين اشياء انتي تعرفين انك مستحيل مع مرور الوقت تستمرين فيها ( يعني مثلا تغسلين رجلين زوجك كل يوم لما يجي من الدوام , او تعودينه وتقولين انا الي بسوي لك كل شي بنفسي وانتي اصلا ماعندك امكانيه لكذا فهمتوني ) ؟

3- ارجع وأأكد يابنات على التغيير الداخلي يعني حتى لو انتي نويتي في داخلك انك كل خميس مثلا تسوين ليله رومنسيه لزوجك , لا تقولين له حبيبي انا قررت اسوي لك كل خميس ليله رومانسيه , ترى الانسان لما يكلف نفسه بشي ويعلنه قدام الغير يصير مطالب به واذا ماقدر يسويه يصير تقصير منه وينلام على تركه , يعني اي شي حلو سويه بدون ما تقولي انا بسوي وانا قررت , لانك اذا افترضنا بيوم ما قدرت ماحد يقدر يحاسبك ولا يعرف اصلا انك ناويه تسوي كذا .

تعرفون يابنات انا اكثر شي حبه زوجي فيني ايش في هذا التغيير ؟؟ كل شي يقول صرت احب ادخل البيت يعني ادخله وانا مرتاح ومتشوق لاني متاكد بلقى انسانه بشوشه . (مع العلم اني زمان لما كان يدخل البيت وربي وربي ما كنت اقدر اطالع فيه اصلا من الزعل ليش تاخر في الرجعه للبيت ) وصارحني قال وربي فتره من الفترات ندمت اني تزوجت وكرهت حياتي بسبب المشاكل الي بيننا , (وترى تأكدي إن هذا شعور زوجك إن كان بينكم هواش ومشاكل على الطلعة والدخلة وامور تافهه) بس الحمدلله تغيرنا وصرنا في احسن حال , يعني لما يجي دايما اكلمه واضحك واقول له بسوالف العيال الي تضحك ( مو الي تنكد خخخ) والله يابنات اذا شفته يضحك من قلبه ومرتاح اتاكد اني نجحت في حياتي .

وعلى فكره يابنات كل شي يجي بالتعود , يعني بمرور الوقت يصير عندك الضحك والبشاشه عاده وماعاد تحسي بنفسك الا وانتي مبسوطه ومرتاحه .

و اريد أأكد على نقطه انه مو معناه انك تحبين زوجك وتسمعين كلامه تتنازلي له عن حقوقك !

مثلا لازم تطلبي منه فلوس عشان السوق ( لا تقولي اخاف اذا طلبت يبتعد عني او يزعل ) يعني يابنات خذي منه كل الي تريدينه بس بدل ما تكوني زعلانه ومعصبه وتاخذين الشي غصب عنه, لا تكوني ناعمه وهاديه وطيوبه بهذي الطريقه مو تاخذين الي تبينه وبس الا زياده .

انا عن نفسي والله لما تغيرت والله صار يعطيني ويسوي الي اريده بكل نفس راضيه لانه عرف وفهم اني انا نفس الشي صرت اتنازل له وانه في النهايه الكلمه الاولى والاخيره له (وهذا حق الزوج والقوامة له بأمر الدين بس الشيطان وعقولنا الناقصة أحياناً تقنعنا إنه ظلم وتسلط يكون القرار لزوجي ولو ما كنت مقتنعه وراضيه !) ...

فهذا الشعور يخليه يعطيك ويسوي لك الي تبينه لانك تمديه بشعور الحاجه اليه , دائما حسسيه انك محتاجه له حتى لو عطاك ريال واحد خذيه , ولو قالك ايش هذا الجمال وانتي عارفه انه مو من قلبه بس يضحك عليك انتي حسسيه انك انبسطتي من قلبك وانك فرحانه , هو اذا شافك كذا بيقول يالله مسكينه كلمه مني فرحتها كذا , وبيحاول كل مرة انه يمدحك ويثني عليك .

انا بقولكم بقصه صارت لي قبل يومين , جاني زوجي الظهر وقال لي انا العصر بسافر شغل ضروري , لو زمان وقال كذا تعرفون ايش كنت بسوي ببدأ اعزف سمفونيه العذاب والنواح والحزن , انت ما تهتم فينا المهم شغلك وليش ما تخبرني من قبل وليش وليش ...

سويت حاجه بسيطه جدا انتقمت لنفسي منه بس بطريقه حلوة , قلت يابنت هذا بيروح يعني لازم تعويض واستفاده , رتبت له الشنطه وجيت عنده قلت الله يرجعك بالسلامه اهم شي شغلك وعملك الله يعطيك الف عافيه والرجال المسكين مرتاح , بعدين قلت بس ابيك قبل لا تروح تشتري اغراض للبيت وانا عارفه ومتاكده انه ماشي وقت يروح السوبرماركت قال بس ماعندي وقت وهو حاس بالذنب قال انا بعطيك كم تحتاجين للاغراض حددت مبلغ كبير انا هههههههههههههههههههه يعني اضعاف عن الي يحتاجه المطبخ , ضحك قال هذا اسمه استغلال طالعته بنظره كلها دلال وخبث ودلع وقلت له حبيبي ترى الي بتعطيني اياه هو بدل سفر وتعويض عن ايام غيابك وانت تعرف كيف صعبه ايامي بدونك , وربي ضحك مني ضحك قال يالعياره خلاص تستاهلين وعطاني الي ابيه وفوقهم بووووووووسه هههههههههه ========>> إن كيدكن عظيم خخخخخخخ


يعني لو وقت ثاني كان جبتها على بلاطه وكان قلت له يالله عطيني مبلغ كذا مو انت تروح مكان ما تبي انا انتظرك مثل الشغاله , وما بفاصله ولا بدلع له لانه بشوفه واجب عليه وغصب عنه ويطلع من البيت زعلان مني وانا تعبانه من الي سويته صح ولا لا ؟؟

يتبع ...
 

~UniQuE~

مراقبة أقسام الأستشارات الزوجية ،الأنماط الشخصية
معلومات ~UniQuE~
إنضم
11 يونيو 2013
المشاركات
2,548
مستوى التفاعل
928
النقاط
113
الإقامة
دار الأمان
شي ثاني يابنات ابي منكم شي مهم جدا جدا الي هو

-----
الصبر -----

يعني ابي اطلب منك طلب لما تلاقي من زوجك برود او عدم استجابه لاسلوبك الجديد اصبري عليه , لانه تاكدي انه يختبرك ويثبت وجوده وينتقم لنفسه كل هذي الاشياء اللي حصلت بينكم في السابق , يعني لما ما يرد عليك او ما تلاحظين تحسن معاه بالعكس تحسينه تمادى ولا طلع فيها اعرفي انه يبي يشوفك فعلا انتي بتتغيرين على طول ولا لا , وايضا ينتقم لنفسه يعني تاكدي في البدايه انه بيعاندك ويمكن اكثر من المعتاد لانه بيحس انه ممكن يفرغ الي مر عليه من نكد وتعب وهذا ياخذ وقت فانتي خليه واستمري على الخط الي انتي ماشيه عليه يابنات

ترى نحنا لو ما كنا اذكى من الرجال واقوى منهم ونقدر عليهم ما كان قال الله سبحانه وتعالى ( إِنَّهُ مِن كَيْدِكُنَّ إِنَّ كَيْدَكُنَّ عَظِيمٌ) , ولا كان الملوك والامراء تنازلوا عن عروش ممالكهم عشان امرأه , ولا كانت قامت المعارك والحروب والسبب فيها تحريض امرأه ( حرب البسوس استمرت اربعين عام بسبب امراه خخخ)

حتى في المخابرات اذا يبون يراقبون واحد يرسلون له جاسوسه مو جاسوس هههههههههه وتلاحظين انه البنات الصغار يحبونهم الناس اكثر من الاولاد لانه البنت بطبيعتها خبيثه تقدر تاثر على الي حواليها حتى ولو عمرها سنه , يعني انا بنتي وهي عمرها 4 سنين اذا تبي شي من ابوها تجلس على حجره وتلعب بشعره وما تقول له ابيك تشتري لي كذا تبدا وتقوله بابا والله انا احبك اكثر من الناس كلهم انت تحبني ؟ =====>> البنت اخبث من امها هههههه

عاد هو لما يسمع كلامها يذووب قبل ما تطلب اصلا وربي وربي انها ممشيته على كيفها باسلوبها وانا استغرب منها واي شي يسوي لها يسويه وهو يضحك ( كل خوالها وخالاتها يستغلون هالشي اذا يبون شي منه يقولون ياريم ودك تتعشين بيتزا تقول ايوه يقولون اوكيه كلمي بابا تتكلم البنت يجي بابا طيران بالبيتزا للبنت عند اهلي ويهجمون عليها خواني وخواتي هههه)

اعذروني يابنات دخلت لكم في سوالف وقصص البيت بس وربي عشان اوضح لكم كيف الحياه تكون حلوة بدون نكد ومشاكل ياليت تكونوا فهمتوني واقتنعتوا بكلامي ملحوظه : اسمحوا لي يابنات اذا ما قدرت ارد على تساؤلاتكم ترى اذا قدرت ادخل النت مجرد اكتب الي ابي اقوله لكم واطلع ماعندي وقت فديتكم بس لما ادخل واشوف كيف البنات متحمسين ويدعون لي اصمم اني اعطيهم كل الي اعرفه واستفدته اخوتي الحبيبات اريد ابدأ كلامي بدعوه اتوجه بها لله عز وجل انه يسعد كل وحده فيكم وينولها الي في بالها ويصلح حالها وحال زوجها واولادها , ويعينها على الصبر والطاعه ويسهل لها الامور وتعيش في الدنيا مرتاحه وفي الاخره تتهنى بالجنه اميييييييييييييييييييييييييييي ييين يارب العالمين احب ابدا كلامي بالتعليق على كلام الاخت ........

والتي تتكلم عن نومها في غرفه و زوجها في غرفه ثانيه

( من ردودكم يابنات اكتشفت اكتشاف هام جدا والي هو اننا الحريم مهما اختلفت بيئاتنا وعادتنا وتقاليدنا كلنا نتعامل مع المواقف الي تواجهنا بنفس الطريقه ونفس الاسلوب لانه يمكن كلنا نفكر بعواطفنا اكثر من عقولنا ) اختي الحبيبه انا لما ولدت بنتي كانت بكايه وما تنام فصرت انام انا وهي في غرفه ثانيه ( عشان اخذ راحتي معاها سواء اشعل الاضاءه او اطفيها او اغير لها ) واستمريت على هذي الحاله سنه تقريبا , المهم الاخ الي عندي تعود وارتاح كلما دخل غرفته يفتح المكيف ويشخر مع العلم انه في البدايه كان معارض فكره نومنا في غرفه ثانيه , المهم لما كنت اتكلم مع اختي وخبرتها حذرتني وقالت ترى هذى اخطر شي على علاقتكم لازم ترجعين وتنامين عنده , وهذي بنته مثل هي بنتك , وانا اقتنعت بكلامها


في نفس الليله جبت اغراض البنت وحولنا الى غرفتنا الاصليه , اقولكم يابنات لما دخلت الغرفه , اشوف لكم ابو الشباب منصدم وقال ايش تريدي ؟؟؟؟؟ ( كانه شاف وحده ما يعرفها داخله تنام عنده , حتى الي ما يعرفها بيرتاح انها جايه تنام عنده اكثر مني وجه جديد يعني خخخخخخخ )

المهم (هذا صار ايام الحروب والمعارك بيناا خخخ) انا لما شفته كذا رمقته بنظره هههه وقلت له لا تخاف اقسم بالله العظيم اني ما اكل حد تطمن يعني مش من اكله لحوم البشر , كل ما في الامر اني رجعت لغرفتي , قال مو مشكله واشوف لكم الرجال يريد ياخذ الغطا ماله بيطلع فسالته وين ؟ قال بنام في غرفه ثانيه ========>> حست بعافريت الدنيا بتتنطط قدام عيونها خخ

قلت له والله العظيم ما تطلع من الغرفه ولازم تنام عندنا ومع مرور الوقت تعود , على ولاده ابني خلاص صرت اعقل ========>> على طول على الغرفه الرئيسيه هههه

ولا ناويه اخليه ينام مرة ثانيه لوحده وبعدين يابنات الانسان اصلا يتعود يعني تخيلي نفسك اول قبل ما تجيبين العيال تنامين براحتك وتقومين براحتك , ولما صرتي ام ما تضايقتي من السهر وبكا الطفل وغيره , فالانسان على ما تعود عودتي زوجك يكون وحده باستمرار يتعود , عودتيه دايما على صوت عيالكم وعلى انه هذيلا عياله نفس الشي بيتعود ,

يعني يااختي نامي عنده في الغرفه وان تضايق في البدايه وخلي يظهر الفرق في انتقالك عنده يعني زيدي اهتمامك بالغرفه وبخريها وحطي لمساتك عليها , يعني يحس فعلا في التغيير الايجابي فيها ولا تناقشينه ولا تصارخين عليه فيها بهذي الطريقه يشوف انه وجودك بجنبه زياده في المشاكل فهمتنيني وعلى شوي شوي بيتعود وما بيعرف ينام الا اذا كنتي موجوده جنبه ...




المهم يابنات تعرفوا اريد اوضح لكم شي مهم

الانسان الي يوقف ضد التيار بيتعب وفي الاخير بيستسلم بس بعد ايش بعد ما ينهد حيله وخلاص يصير ماهو قادر ...

انا اقصد بهالكلام انه انا استسلمت لزوجي بعد سنوات من العذاب والمشاكل وفي النهايه عشان اعيش بامان استسلمت (يعني صرت اتبع طرق ثانيه غير التحدي وفرض الراي ) وبامانه ارتحت وحسيت باستقرار وامان وحسيت بحب زوجي وباهميتي عنده مع العلم انه القرار الاول والاخير صار له . انا الي استغرب فيه انه في حريم يفهمون قضيه الاستسلام حتى ولو الظاهري للزوج ( تسمعين كلامه بس بطرقك تقدرين تسوين الي تريدينه ) من بدايه الزواج وبالتالي ما يعانون من اي مشاكل !

انا اذكر انه انا وصديقتي تزوجنا في نفس الفتره فلما نتقابل بعد فتره وفتره كانت هي تحكي لي عن هناها وراحتها وانه ما في بينهم مشاكل ( وانا في داخلي اقول ايالعياره على بالك بصدقك خخخخخ) وانا اشكي مشاكلي وغيره وبامانه هذي الصديقه مااقدر اوصفها من ناحيه الجمال عاديه جدا بس من النوع الانيق والرقيق بس من ناحيه الاخلاق والادب والاحترام عمري ما شفت حد مثلها قمه قمه ..

ومرت السنوات وصرنا ما نتقابل الا بعد فترات طويله , وحصلتها قبل فتره اقسم بالله يابنات انها حلفت لي انه حتى الحين لا زال نفس الاسلوب والرقه بينهم مع وجود طفلين معاهم وكانت زمان فديتها تحاول توضح لي الطريقه وتعقلني بس انا كنت مسكره اذني ( مستمتعه بدور الضحيه خخخخخ) المهم لما خبرتها بالتغيير الي صار فرحت وقالت انا من زمان وانا احاول اوضح لك واقول انه العنف والعناد ما يولد الا عنف وعناد من الطرف الثاني

بالمقابل يابنات كانت عندي اخت وصديقه ثانيه هذي تقمصت دور المظلومه والضحيه وزوجها صار يتهرب منها ودايما تشكي لي والى الان دايما معاها مرة اسبوع اسبوعين تتغير وبعدين ترجع مرة ثانيه بس صارت تتحسن اكثر من اول مع العلم زوجها يحبها كثير وهي ما شاءالله حلوة جدا الله يهديها ويصلحها


يابنات الرجال ما في شي يخليه ينهار ويذوب مثل الرقه لازم نتعلم كيف نكون رقيقات , يعني لا تحسسيه وهو يكلمك كانه يكلم صاحبه ولا صديقه , يعني ما تعامليه ند لند , والله ان تعاملتي معاه كانك رجال مثلك ماراح يفيدك خليكي انثى بكل معنى الكلمة انكسار الأنثى وضعفها ودمعتها أقوى سلاح يهزم الرجل لكن المرأة اللي تستقوي بالصراخ والعناد والاستكبار بالأخير هي الخاسر الوحيد الرجل بيده حلول كثيرة بكره يطلقك أو يتزوج اللي تدلعه وتبسطه وتلاقين نفسك تندبين حظك

 

~UniQuE~

مراقبة أقسام الأستشارات الزوجية ،الأنماط الشخصية
معلومات ~UniQuE~
إنضم
11 يونيو 2013
المشاركات
2,548
مستوى التفاعل
928
النقاط
113
الإقامة
دار الأمان
---- الخاتمة ----

وفي نهايه كلامي يابنات اتمنى اني اكون ساعدت ولو بقدر بسيط في حل مشكله او لفت نظر اي وحده فيكم ع شان تتدارك الاخطاء الي انا وقعت فيها , او انها تصحح مسارها في حياتها

ترى يابنات والله والله زوجك واولادك ما يستاهلون منك الا كل خير لانه بوجودهم انتي صار لك كيان صرتي زوجه وام , وبدونهم حياتك راح تكون فراغ قاتل , فحافظي على مملكتك

وحاولي بدال ما تكون موقع معارك من النكد والكآبه والحزن تكون حديقه للسعاده ترفرف عليها كل انواع المحبه

والنتيجه بتكون اسره سعيده متماسكه صحيحه نفسيه وصحيا واطفال قادرين يواجهوا الحياه بدون مشاكل اجتماعيه او نفسيه تاثر عليهم

وخلي دائما زوجك يتذكرك بكل خير مهما صار بينكم وانا دائما يأثر فيني بيت شعر يرثي فيه شاعر زوجته الي ماتت كان يحبها وتحبه واقول يارب دائما زوجي يتذكرني بخير سواء في حياتي ولا مماتي

والبيت الي يرثي فيه الشاعر زوجته يقول

لولا الحياء لهاجني استعبار *** ولزرت قبرك والحبيب يزار

يعني لولا الخجل والحياء من الناس لبكا عليها بقوة وعنف و لكان زئرا دائما لقبرها من كثر اشتياقه وافتقاده لها وفي النهايه سامحوني على الخطا او الزله

وأرجوكم يا بنات لا تنسوني بالدعاء انا واهلي سبحانك اللهم وبحمدك ، أشهد أن لا إله إلا أنت ، أستغفرك وأتوب إليك

 

رهف 88

Well-known member
معلومات رهف 88
إنضم
15 يناير 2017
المشاركات
2,649
مستوى التفاعل
1,708
النقاط
113
يونيك جزاك الله خيرا على القصة الرائعة
لاكون صريحة طالعتها رؤوس اقلام فقط لانشغالي لكن عجبتني النصائح اللي فيها .. نصائح قيمة بجد وان كنت في البداية متحفظة قليلا بشأن القصة فأنا ضد أن نتغير من أجل الزوج .. عموما نصائحها مقنعة تنفع لكل زوجة تريد حياة هادئة سعيدة
اجدد شكري لك على النقل الرائع
 

~UniQuE~

مراقبة أقسام الأستشارات الزوجية ،الأنماط الشخصية
معلومات ~UniQuE~
إنضم
11 يونيو 2013
المشاركات
2,548
مستوى التفاعل
928
النقاط
113
الإقامة
دار الأمان
اهلا حبيبتي @رهف 88 بالنسبة لتحفظاتك لو قريتي موضوعها كاملا بتفهمين مقصدها لانها شرحت بشكل مفصل مثلا عن التزين هي وضحت انه الزوجات ما يبالغون و يتخذوا اسلوب الوسطية و كذلك بالنسبة لنقطة الضعف هي شرحت و قالت انه هذا مو يعني انك تتنازلين عن جميع حقوقك و فيه نقاط اخرى ذكرتهم مهمين ...

@راضية بالمولى

اللهم آمين و لك بالمثل و زيادة ...
 

دانسميز

Well-known member
معلومات دانسميز
إنضم
17 أكتوبر 2011
المشاركات
2,472
مستوى التفاعل
2,567
النقاط
113
شكرا لك يونيك قصة رائعة فيها الكثير من الفوائد...
لكن أريد أن أضيف شيئا... لايمكن أن تضمني الرجل متى يتغير.. ومتى يخون...
لذا أنا أرى على كل امرأة أن تكون ذكية وتؤمن مستقبلها كمايؤمن الرجل مستقبله ... حتى إذا جاء يوم وتركها لاتذل ولاتحتاج أحد...
اذا كانت تستطيع أن تجعله يشتري لها منزل ويسجله باسمها اذا كان وضعه المادي جيد...
ان تدخر لنفسها من الذهب والمجوهرات اذا كان يحب أن يشتري لها.. لاتقول له(لاياحبيبي لااحب المجوهرات) بل تشتري في كل فرصة...
اذا كانت موظفة ان تدخر من راتبها دون اخباره...
 

سماء عالية

متميزه بالنمط الشمالي
معلومات سماء عالية
إنضم
13 أكتوبر 2015
المشاركات
2,477
مستوى التفاعل
150
النقاط
63
قصة جميلة ونصائح تكتب بماء الذهب..


ما ادري ياختي عندي احساس انها قصتك... هههه
الأسلوب والمعلومات كلها تشير إليك


اشتغل المحقق كونان:cool::cool:
 

ميرا??

New member
معلومات ميرا??
إنضم
7 أكتوبر 2021
المشاركات
25
مستوى التفاعل
15
النقاط
3
حبيييييت
بارك الله فيك
فعلا الواحد يتعلم ويحسن من نفسه قبل كل شي علشان يكون مرتاح نفسيا ويريح غيره.
 

من نحن ؟؟

موقع نسوة : هي شبكه عربيه تهتم بكل ما يخص المرآه وحياتها اليوميه يعمل منذ سنوات لمساعدة والمساهمه في انجاح كافة الامور الحياتيه للمرآه العربيه