ॐख़ख़ღ في الغــربة التــقينــا ღॐख़ख़

الحالة
مغلق و غير مفتوح للمزيد من الردود.
صحيح نورة زعلها ماله داعي بالمرة.. فيصل جنوبي لقطة ( على راي المصريين).. مايتعوض...
 
قصة جدا رائعه

عجبتني شخصية نورة وايد مع انها ما تحسن التصرف في كثير من الاحيان

لكنها عفويه بشكل كبير

ويارب يستر من الي بتسويه دانه

متابعه بكل حب وتفائل
 
قصة فعلا رائعة والاحداث وااااااااايد مثيرة حبيبتي في الانتظار التكملة لا تتاخرين علينا
 
اشكركم على التابعة بنات، بصراحة شوي تعبانة و عندي حرارة مرتفعة شوي بس احس بتحسن راح اكمل لكم ان شاء الله..
 
ألف سلامه عليك يحبيبتي ماتشوفين شر يالغالية
طهورا ان شاءالله

الا بسألك حبيبتي انتي من وين في امريكا
 
يعطيك العافية عالقصة الرائعة
وطهور ان شاء الله
 
ليلى تدق على نورة .. يؤ ردي .. أهلين يا قشطة ..

نورة : هلا والله ..

ليلى : أبشرك دانة بتجي ..

نورة : حلوووووووو اشوى تكثرنا ..

ليلى : ايه أشوى اخيراً.. يالله ما أشغلك ..

نورة : مع السلامة ..

نورة وهي تبتسم دانة بتجي ..

فيصل " يبتسم ":والله انتم البنات تخلون السالفة إلا سالفة وإذا جت يعني !!

نورة "تبتسم ": تونا متراضين مالها داعي أرد صح ..

فيصل " يبتسم " : إيه .. صح ..

نورة : حرام تجي تجي وتتبهذل إذا وصلت تذكر وشلون تبهذل نركب مع تاكسي ومادري كيف !! وش رايك نجيبها من محطة القطار ؟

فيصل : لاااااا والله بعيدة خليها تجي هي ..

نورة : والله فشلة الله يخليك ..

فيصل : أقول وش اللي فشلة خليها تجي مع تاكسي يعني حنا عادي نتعب وهي لا خليها .. ملكة ؟

نورة : مستحية منها وهي حطت عندنا خبر ..

فيصل :واضح قصدها بتعلمكم إنها بتجي .. أنا بدق على خالد بشوف وينه نطلع نتمشى ..

نورة : لا لا دام الوقت توه أبي أطلع أنا وياك شوي نتمشى تحت ..

فيصل : فكرة حلوة يالله قومي ..


طلعوا يتمشون على الدارلنق هاربر ..


نورة : تعال فيصل أبي آيس كريم ..

فيصل "يبتسم": لازم بيذبحك الجو بارد ؟

نورة : لاااا أبي الله يخليك .. عادي مايجيني شي إن شاء الله ..

فيصل "قرب لنورة وهو ماسك يدها ويبتسم ": قولي لي بإذني اللي تبينه بهدوء..

نورة "استحت وقربت " : أبي آيس كريم حبيبي ..!!

فيصل " يأشر على عيونه " : من عيوني يابعدهم أنت ..

× دق جوال فيصل .. يطالع برايفت مين ؟

نورة : أكيد اللي دق عليك ولا رديت ..

فيصل " يضحك " : هلا هلا حمود كيفك ؟

محمد : تمام أنت كيفك وكيف استراليا ؟

فيصل : زينة .. ياقلبي أنت ..

محمد : فيصل كمبيوتري خايس تقدر تجيب لي متى ماجيت ..

فيصل " يتنهد " : شف ترا الكيبورد بتصير حروفه انجليزي عادي ..

محمد : يعني ما يكتب عربي ..

فيصل : لالالالا يكتب بس الحروف تصير انجليزي وتقدر تغيرها أظن وأنا ما أدري بالسعودية ..

محمد : خلاص إذا قدرت جب لي تكفى ..

فيصل : من عيوني خلاص ترا هذي هديتك ماتغثني ..

محمد "يضحك " : خلاص .. يالله مع السلامة

فيصل : هلا وسلم على أبوي وأمي وكلهم ..

محمد : يآصل ..

× سكر فيصل ..

نورة : ياحبي له .. يبي كمبيوتر ؟

فيصل "يضحك " : إيه يحبه .. بشري له وأرتاح خلال الأسبوع إن شاء الله ..



تمشوا شوي وضحك وسواليف .. !!

فيصل : نورة اجلسي على الكرسي ..

نورة " تضحك " : ليييش ؟

فيصل : شوي بروح وأرجع مواعد واحد هنا ..

نورة " استغربت " : جاااد ..؟

فيصل "يأشر براسه" : إيه جاد .. اجلسي وجاي .. ماراح ياكلونك ..

نورة "جلست " : روح يالله ..
فيصل طالعها شوي وراح واختفى عنها ..!!






خالد وليلى يتمشون بس هم راحوا السيتي سنتر ..

ليلى : لاااا أكيد تصالحوا عشان كذا ما دقت إيه أحسن خلهم شوي لا تدق على فيصل ..

خالد "يضحك " : يعني قلتي لي بروح أدق أنا ؟؟؟

ليلى : لا بس أخاف تدق تخرب .. أعرفك أنت ..

خالد : وش دعوى ؟؟ أنا راعي الحركات هذي ..

ليلى : ههههههههههه ياربي منك يا ابو المقالب الله يكفينا شرك بس ..





نورة تنتظر فيصل له أكثر من ربع ساعة رايح ومخليها لحالها .. !!
نورة يااالله وين راح هذا ؟؟ ياااربي منه ..!!






دانة في القطار .. يااااارب أشوفه زين ياااارب أمل منه .. مع إنه شوفته ما تملل .. !! دانة تشوف الشجر .. والمناظر اللي تجنن .. يااالله متى أجتمع أنا وياك .. ونروح سوا بالقطار .. ياااااااارب يتحقق حلمي ..


والله إني طموحة .. واحد متزوج يعني بتزوجه اقول بالحلم .. بس يالله يكفيني شوفته ومابي من الدنيا إلا شوفته .. يا بعد عمري ..
دانة طلعت دفتر تكتب ..



قد لا نلتقي !!
وقد يصير ذكرى !!
ومن الصعب أن أنساها !!
أحببته !!
ولن أهدي سواه قلباً صادقاً ينبض بالوفاء والإخلاص ..!!


........




دانة تتنهد .. يارب ياحي ياقيوم تدلني على الصح .. يارب أنا أجهل وش قاعد يصير ويارب تهديني ياااارب ..
دانة طيف فيصل مايروح عن بالها ..!!






نورة شافت فيصل جاي .. يبتسم ..

نورة "تطالعه ": احلف ؟

فيصل : ههههههههههه ليش أحلف ..؟

نورة : تأخرت علي طفشت وأنا هنا .. جالسة كأني خبلة ..

فيصل : ماعليه تحمليني شوي ..

نورة : يالله خلنا نتمشى ..

فيصل " يطالع بعيد " : نورة تشوفين المكان ذاااك اللي ما عنده أحد ..؟

نورة : إيه وش فيه ..

فيصل "يبتسم " : تخيليه على غروب الشمس ومنعكس الغروب على النهر .. ؟ وش رايك ؟

نورة " تطالعة وتبتسم .. يعني تبي نروح نجلس هناك للغروب ؟

فيصل : إيه .. ونرجع نصلي المغرب وبعدين نرجع مره ثانية مع خالد ..

نورة يالله ومشوا راحوا للمكان ..والطلة الحلوة ..

فيصل جلس ومسك يد نورة وجلسها جنبه .. وحطت راسها على كتفه ..

فيصل " يبتسم " : حبيبي ..

نورة : عيونها ..

فيصل : بسولف واسمعي ..

نورة : طيب ..

فيصل "بحماس وهدوء " : تشوفين جسر مرفأ سدني ..

نورة : إيه جسرهم المعروف ..

فيصل : إيه .. هذا عام 2000 احتفلوا بمرور 75 عام على إنشاءه وطبعاً احتفال كبير ..

نورة : أصلاً اللي محلي سدني هالجسر ..

فيصل : إيه بس تدرين أغلب سكانها بريطانيين وايرلانديين .. و عاد الآسيويين كثير .. لكن يوم سووا احتفالهم هذا ..

نورة " متحمسه " : ايييه ..

فيصل : تخيلي .. ربع مليون سكان سدني محتفلين.. والحلو خلوا الأطفال يمشون على الجسر ومرت طيارة فوقهم بالدخان الأبيض والسماء زرقاء وكتبت عذراً ..!!

نورة : ليش عذراً ؟

فيصل : تشوفين الأطفال اللي مشوا أخذهم رئيس استراليا غصب من أهلهم يحتفلون بس أختار اللي جذورهم إسترالية .. واعتذر للأهل بالطيارة .. والله حركة ..

نورة " تضحك " : أعجبتك الفكرة لأن الإعتذار أكثر شي تسويه بحياتك ..
فيصل : هههههه تصدقين بسويها لي مره ..

×دق جوال نورة .. وهي حاطة راسها على كتف فيصل .. يوووه مالي خلق أرد والله مرتاحة ..

فيصل : لاتصير أمك ياويلك ..


نورة "فتحت الشنطة ": لا هذي دانة .. أهلين دانة ..

دانة : أنا بالفندق متى أشوفكم ,, ؟؟

نورة : أنا الحين مع فيصل شوي وراجعين ونطلع سوا عادي تتنظرين ..

دانة "وقلبها يرجف " : إيه عادي ياقلبي ..يالله ما أشغلك ..

نورة : مع السلامة .. أشوفك ..


سكرت نورة .. ييوووه فشله البنت بالفندق ..

فيصل "بهدوء " : يااااه حبيبي يالله حطي راسك بس قلتي لها شوي خلي نقعد ..

نورة " حطت راسها وسكتوا شوي "

نورة: فيصل تحبني ؟

فيصل "يتنهد " : والله العظيم أحبك .. وشايل هم سفرتك .. اللي جد أفكر أكنسلها ..

نورة " تبتسم ": بس محتاجين نبعد .. وأنا مشتاقة لأمي وعبود ..

فيصل " يتنهد " : الله يعينني .. ياااالله أحبك يا أحلى وأغلى إنسانة ..

نورة "ابتسمت " : الله يخليك يارب ..

×فيصل طلع من جيبه علبه صغيرة وحلوة مره .. قلبي ..

نورة "منزله عيونها تشوف النهر " : هلا حبيبي ..

فيصل : ارفعي راسك شوفي وش معي ؟

نورة "مستغربة " : يااااحياتي.. هدية ؟

فيصل "فتح العلبة " : عطيني يدك ..

عطته يدها ..
فيصل "ماسك يدها ويربط السوارة " : ياحلو السوارة عليك..

نورة "احضنته " : ياااااااحياتي والله تجنن ..

فيصل "يبتسم " : أعجبتك ؟

نورة : مرررررة حياتي مشكوووور ..

فيصل : تدرين قبل شوي يوم أقول اجلسي انتظريني جت فبالي الفكرة ؟

قلت لازم إذا رجعت نورة السعودية ما تنساني ولا لحظة .. وما لقيت غيرالسوارة هذي عجبتني .. وأبيك تتذكرين اللحظة هذي ومنظر الغروب وتتذكرين كل كلمة قلتها لك وخاصة " أحبك " ..

نورة "طاحت دمعتها " : فيصل أنا ادري مقصرة معاك .. وأدري إني عصبية وغبية .. بس والله قدرت تملك مشاعري كلها ..

فيصل " يبتسم " : طيب حبيبتي يالله عشان نصلي .. وروحوا لصديقتكم ..
وقف فيصل .. ومسك يد نورة .. وراحت معاه ..

وقت ممتع ..قضوه مع بعض ,,





راحوا للفندق .. ودق فيصل على خالد وتواعدوا يطلعون بعد مايصلون ..




فيصل ونورة .. بالغرفة ..

فيصل : اقعدي شوي بطلع أجيب أوراق من السيارة وأجي .. دام خالد ما دق ..

نورة : أوكي أنتظرك .. وإلا إذا دقت ليلى طلعت معها ..

فيصل : عاد دقي قولي لي حبيبي طيب ..

نورة : أوكي ..

طلع فيصل .. ونزل يجيب الأوراق ..






في السعودية وتحديداً في المستشفى الصباح .. دخل الدكتور على أبو دانة ..

أبو دانة كان صاحي .. الدكتور الحمد لله إنك مو نايم ..

أبو دانة : وأنتم تخلون الواحد ينام والله على أعصابي ..

الدكتور جلس "وبهدوء" : والله يا استاذ فهد التحاليل طلعت ..
أبو دانة : والنتيجة ؟

الدكتور : عند فيروسات في كبدك .. وخطيرة جداً الحمد لله إنك في البداية ..

أبو دانة "مستغرب " :بداية ايش ؟

الدكتور : الحمد لله والشكر على العافية .. بس أنت عندك فيروسات سببت تليف بالكبد .. وسببت المرض والله يشفيك ..

أبو دانة "انصدم " : يعني يا دكتور فيني الخبيث ؟


الدكتور "بهدوء" : أنت في البداية .. وفيه طرق لعلاجه وبإذن الله راح تشفى منه لأنك في البداية ولكن تحتاج شوي وقت ..


أبو دانة " بنبرة حزن " : وشي الطرق طيب ؟


الدكتور "يتنهد " :استئصال الجزء المصاب وغالباً ما تفشل هذه الطريقة ومن ثم تفشل الكبد .. الطريقة المنتشرة والناجحة بإذن الله زراعة الكبد وذلك من شخص ميت أو حي وهذه أثبتت نجاحا كبيرا في علاج هذا المرض ولكن يجب إن يتم ذلك بسرعة حيث إن سرطان الكبد قد ينتشر خارج الكبد إذا لم تتم الزراعة مبكرا.



وقف الدكتور : الله يشفيك .. وادع ربك ..


أبو دانة "دمعة فعينه " : الله يعين ..

طلع الدكتور وأبو دانة كل شي جاء فباله .. وأول شي بنته الوحيدة وخاصة إنها مالها أخو ولا أحد غير عمانها اللي أخوان أبوها من الأبو .. !!!!! ومو ذيك العلاقة .. أبو دانة قرر يسوي المستحيل ولا يروح ويترك بنته وزوجته !!!! يتنهد وطاحت دموعه (يااااارب يااااااااااارب )








دخل فيصل الفندق ومعاه الأوراق جايبها من السيارة ....
دانة شافته وابتسمت وارتبكت مررررة .. فيصل شافها وابتسم ..
دانة "وقفت " وراحت لفيصل .. أهلين فيصل ..


فيصل : هلا والله كيفك ؟

دانة : تمام الحمد لله .. وين نورة أجل أنا أنتظرهم هنا ..

فيصل :هذاني بروح لها .. بودب الأوراق ذي وأرجع ..عشان نطلع ..

دانة "تبتسم وعاد اتبسامتها تجنن ": عطني الأوراق أنا أروح لها ..

فيصل : هههههه لا لا أنا أروح اجلسي أنت والحين يجون ..

دانة "تتنهد " :أوكي .. أشوفك ..


×راح فيصل ورجعت دانة جلست وهي خلااااااص موب قادرة تمسك نفسها .. ياااااربي وش ذا ؟؟ يااااازينك .. يابختك يانورة ..يااالله هذا بشوفه كثير هاليومين وش راح يصير فيني ؟؟؟!!! بموت .. ياااارب تخليه يارب ولا تحرمني شوفته .. لاااا والصوت يدوخ بعد .. ياااربي ..



طلعوا كلهم مع بعض .. دانة وليلى ونورة مع بعض .. وفيصل وخالد مع بعض ..


راحوا يتمشون .. ويتقهوون .. ووناسة وأجواء ما توصف أبداً ..






دانة الأرض مو شايلتها من الوناسة لأنها تشوف فيصل .. وتحس إنها قربت له أكثر ..

ليلى مرتاحة مع زوجها الطيب .. ومرتاحة مع نورة اللي حست إنها أخت لها في الغربة ..


نورة اللي عرفت إن فيصل مافيه منه بالدنيا وقلبه كبير وفتحت قلبها له ..
وتبي ترجع عشان تحس بالشوق وعظمة شعور الحب اللي راح تحس فيها إذا فقدت أغلى الناس .. قدر ينسيها الدنيا كلها ..




جلسوا البنات ..

نورة دق جوالها .. يؤ برايفت يارب أمي .. نورة تضحك : أهليييين يالقاطع .. ولا يقول لي أخت ..أوريك ..

عبد الله : ههههههههههههههه ياحبي لك اعذريني والله أشغال مو قادر أحك راسي منها ..كيفك وكيف استراليا ؟

نورة "تتنهد " : والله ما تزين إلا فيكم ,, الحين حنا بسدني ومبسوطين مررررة وأجواء تجنن ..

عبد الله : ليت من عطاكم من حرارة الشمس شوي .. ياالله شي مو طبيعي الله يعين ..

نورة : الله يعينكم .. كيف أمي ؟

عبد الله : تمام تسلم عليك ..لو أجيب طاريك بأي شي .. ياوليدي إذا كلمتها سلم عليها ..

نورة : يااااحياتي هي .. هاه متى الزواج .. والله صرت عانس أنت ..ههههههه

عبد الله : ههههههههههههه يالله على يدك هذا أمي تدور والله يسهل ..
نورة : فيه احد فبالك وإلا مواصفات ؟

عبد الله : لالالا أبد على ذوقكم ..

نورة : عندي وحدة معنا .. تبيها ..؟

عبد الله : جد ؟

× دانة تطالعها استغربت ..!!!!!

نورة : إيه جد أجل أمزح ؟ لا وعسل بعد وتجنن .,!!

عبد الله : يالله تدرس هي ؟ وإلا سياحة ؟

نورة : تدرس وتوها يبي لها وقت ..

عبد الله : لا والله أجل بتعب معها إلا إذا تنازلت ..

نورة "تكلم دانة " : هاه تنازلين عن الدراسة ..وتزوجين أخوي ؟

دانة : هههههههههههههههههههههه تاج راسي دراستي ما أتركها عشان واحد ههههههه

نورة "تضحك " : رفضت تتركها ..

عبد الله : ههههههههه الله يوفقها ويرزقنا .. يالله قلت بشوف أخبارك وش مسوية وسلمي على فيصل اللي ما كأن له ولد خاله يا زوجك ذا شايف روحه قولي له يدق علي لا أجي أطب في بطنه ..

نورة : هههههههههههه شوي شوي عليه ما يتحمل ..

عبد الله : يالله وخري أنت وياه وسلمي عليه ..

نورة : يآصل مع السلامة وبوس أمي ..

عبد الله : إن شاء الله ..

×نورة تتنهد ..

ليلى : مشتاقة ؟

نورة : مرة مرة مررررة قد الدنيا اشتقت له هو بالذات ..

دانة : وأخوانك اللي غيره مالهم مكان ؟

نورة : مالي أخوان بس عبد الله .. الله يخليه ..

دانة : جد ؟

نورة : إيه والله أبوي متوفي من زمان ..الله يرحمه ..

دانة : تقريباً مثلي أنت بس أنا امي وأبوي الحمد لله عايشين ..صار لبابا حادث ولا قدروا يجيبون غيري ..

نورة "استغربت " : طيب وعادي جاية تاركتهم ؟ ولا تشتاقين وأنت لحالك وأكيد مدلعة بعد !!

دانة "تتنهد": خليها على ربك اشتقت لهم مررررة ..بس هم يبونني أدرس واللي أبيه آصل له بنفسي,,تعرفين إذا صار ماعندك أخوان أوخوات كل شي تسوينه بنفسك ..وتعلقت بالعلم والثقافة .. وحلمي أشتهر وأسوي المستحيل عشان أصير مميزة ..ويقولون لي الدكتورة دانة مابي شي إلا أصير دكتورة ومشهورة وناجحة وشي ثاني فبالي ..

ليلى : ههههههههه وشو الثاني ؟

دانة :ههههههههههه أشياء موب شي ..

نورة : يا حبي لك .. جد حركات أنا ما أحب أدرس .. أنت مثل فيصل .. يووه يعشق يتعلم ويتثقف ..

×دانة داخت .. ياحظي والله ..

دانة : حلو طيب تكسبين منه أنت بعد .. ويربي عياله صح .. ولو تكملين دراستك بعد تصيرون شي ..

نورة : لالالالالالا أبداً مافكرت ..خليني كذا والحمد لله معجبته كذا ..
×انقهرت دانة ,,

دانة "بقهر" : ايه بس حتى ولو الدراسة أهم شي ,,

نورة : يمكن .. بس أنا قناعاتي غير عنك ..

ليلى : جبتوا لي الإكتئاب أنتم وكلامكم .. خلونا نفرفش شوي .. بلا كلام ماله داعي ..

×طلع فيصل من الكافي اللي كان فيه عشان يدخن .. شافته دانة .. لأن نورة وليلى معطينه ظهورهم ..

دانة : تبيننا نفرفش يا ليلى ؟

ليلى : إيه .. والله جيبوا سواليف حلوة ..

دانة : أنا معي كاميرا بصور للذكرى .. (طلعت دانة كاميرتها ..وتصور الأماكن بكل مكان وأخذت صورة لفيصل بس موب واضحة لأنه بعيد .. )

نورة : انتبهي لا تصورينني والله يذبحني فيصل ..

دانة "استغربت " : يؤ ليييش ؟ أبيها ذكريات ..

نورة : لا فيصل مايبي ..

دانة "تبي تقرب لفيصل" : أنا أستأذن منه الله يخليك أبي صورة لكم ,,

ليلى "قاطعتها" : يالله صوريني أنا ..

×دانة تصور ليلى .. عطيني ابتسامة حلوة ,,

دانة : قمر ,, ليلى ..

ليلى : ههههههههه الله يجبر بخاطرك ..

نورة : هههههههههههه

دانة : يالله نورة بصورك ..

نورة : والله يزعل فيصل يخاف مايبي أصور إلا أغبيها عندي ,, ما يضمن ,,

دانة "وقفت وتطالع فيصل " : بروح أقول له ..

نورة "التفتت " : يؤ فيصل هناك ؟

دانة "مشت " بروح أقول له ..

نورة : روحي إذا وافق ..



× راحت دانة وأصلاً هي أصرت على نورة عشان تروح يوم شافته .. فيصل استغرب يوم جته دانة ..

فيصل "وهو ماسك الزقارة ويبتسم ": اللهم اجعله خير ..

دانة "وهي معها الكاميرا" : أهلين فيصل ..

فيصل " يطالعها " : أهلاً ..

دانة " بدلع " : ليش ماتبي نورة تصور ؟

فيصل : أخاف عليها .. زوجتي ..

×دانة حست بقهر يوم قال زوجتي ..

دانة "بدلع " :الله يخليك .. بصورها والله أبيها ذكريات ..

فيصل " يبتسم ويمزح " : صوريني أنا .. أحسن أنا وياها واحد ..
×انقهرت دانة وبنفس الوقت فرحت ..


نورة : كل هذا عشان الصورة ماقلت لك زوجي متخلف بعض الأحيان ..

ليلى : يمكن تقنعه شكلها عندها أسلوب ووافق شن طبقة ..


دانة "بدلع " : smile..

فيصل "يضحك " : هههههههههههههه وش سمايله وخري بس ..(تجرأ شوي )

دانة صورته وهو يضحك .. وأخذت له صورة ثانية وهو ماسك الزقارة بيده ..

دانة "تضحك " : شوف الصور تجنن ..

قرب فيصل يشوف الصورتين .. والله حركة الصور .. كاميرتك رهيبة بعد ..

دانة : ماشاء الله أنت محليها ..

×فيصل استغرب كلمتها وسكت شوي ..

× دانة تشوف الصور بالكاميرا ..

فيصل "يطالعها " : خلاص روحي صوري نورة بس ياويلك تطلع الصور وإلا تورينها أحد بالسعودية ..

دانة : يعني لو السعوديين يجون استراليا عادي أوريهم الصورة بس بالسعودية لا ؟؟ وش التخلف هذا ..(قاصدة تقهره عشان يطول النقاش )

فيصل " يطالعها ومستغرب " : أي تخلف ؟ كل مجتمع له عادات وتقاليد ..
ما أفرض عاداتي على أحد ولا يفرضون عادتهم علينا لو يجون السعودية ..طبعاً والدين قبل كل شي ..


×قامت نورة ,,

دانة " تبتسم " : صح .. معك حق .. بس شوي أنا متحسسه من الموضوع ..

فيصل "يطالع نورة وهي جايه " : يااااااهلا وغلا نور المكان ..

× دانة ماتت قهر ..

نورة "مستغربة " : طولتوها ؟

دانة "تبتسم " : أقنع زوجك أصورك .. بس شفتي خلاص بصورك ..

نورة "قربت لفيصل وحطت يدها ورا ظهره ومسكته " : يالله صوريني معاه ..

×دانة بينها وبين نفسها ياليتني مكانك يانورة ..

فيصل .. انبسط .. عشان نورة قربت .. لأن خلاص قلبه بدا يرجف إذا شاف نورة .. وبدا يحبها ويدعي ربه يتمم هالحب عليهم .. بس يمكن ما يكتمل ..!!!

×ورتهم دانة الصورة ورجعت لليلى ..

ليلى "تبتسم": أشوفك صورتيها ؟ إن كيدهن عظيم ..

دانة "تبتسم " : جد جد كيدهن عظيم .. (تقصد نفسها )


نورة : مبسوط ؟

فيصل "يطالعها " :أصلاً السفرة هذي عشانك وربي .. (فيصل طلع زقارة )
نورة "تشوفه ومستغربه " : توك مدخن ؟ بعد مره ثانية ذبحك وربي ..
فيصل "يبتسم " : بلوى وش أسوي ..؟؟

نورة : الله يكفيك شره يارب ..

فيصل : طيب قربي بضمك وأنت بعيده شوي .. وبعدين دانة ذي جرئية أحسها ..

نورة "تبتسم " : كل شخص وله طريقته وهي عسل وحبوبه "تضحك " لاااا بعد مثلك تحب تتعلم والثقافة وماأدري كيف ؟

فيصل "يطالعها " : جد والله متعلقة ؟

نورة "تبتسم " :مررررة شكلها ..

فيصل "وهو يبتسم " : تصدقين كان شرطي الأساسي وحدة مثقفة ..

نورة "أبعدت عنه وتطالعه " : طيب ؟ وإذا ما عندها ذيك الثقافة مثلي يعني .. وتزوجتها ايش راح تسوي ؟

فيصل " يضحك " : هههههههه خلاص راحت علي ما أبدلك أبد .. حبيتك أنا وتمكنتي .. لأن قلبك طاهر اكتشفت الشي ذا فيك ..

نورة "رجعت " : إيه أشوى على بالي .. هههههههه


×دانة تشوفهم من بعيد واصله معها .. ياااربي ليش قدامي ..!!



طلع خالد وراح لليلى ودانة وجلس ..

خالد : السلام عليكم ..

ليلى ودانة : وعليكم السلام .. وش فيك ..

خالد : فيصل قال بطلع شوي وطول .. وهذه مرته ..

ليلى : إيه .. الله يوفقهم ..

خالد : هاه دانة ناقصك شي .. أبوك كلمني ويقول أنتبه لك ..

دانة : الله يسلمك والله ماقصرتوا معي ..

ليلى : والله إذا احتجتي شي قولي ..

دانة : ياحبي لكم والله ماقصرتوا كأنكم أهلي ..




رحلة سدني .. كانت ضحك ووناسة .. وتمشي وراحوا لأماكن معروفة بسدني .. فيصل ارتاح مع نورة وبعد ذيك المشكلة ماصار شي ..دانة كأنها تجرأت مع فيصل أكثر وصار لها مواقف كثيرة وحتى فيصل شاف فيها شي مو طبيعي ونظراتها كمان مو طبيعية !! .. نورة الطيبة البرئية ..ما انتبهت طول الرحلة لأي شي تسويه دانة .. ليلى وخالد كانت رحلة ممتعة لهم ..
فيصل أبرز مافي الرحلة أهدى نورة سوارة للذكرى .. لأنه خلاص بيفترقون أكثر من 6 شهور مدة مو قصيرة أبد ..فيصل اللي يوم عن يوم يكتشف إن طيبة القلب أهم بكثير من المواصفات اللي طلبها في المرأة ..



بعد ما ارجعوا لنيوكاسل .. كانت رحلة موفقة للجميع .. دانة اللي تعلقت اكثر وأكثر وأكثر بفيصل وقررت تصرح بحبها بأي شكل حتى لو على حياتها لأنه مايفارق بالها ولا قادرة تنام وخاصة إنها تملك له صور وعلى طول تشوفها !! ..




نورة بعد ذي الرحلة مر الأسبوع عليها بسرعة وكانت تخدم فيصل لأنه آخر أسبوع لها وتبيه يفقدها إذا راحت وكلمت اهلها وقالت بجي أمها حطت يدها على قلبها لا يصير بينها وبين فيصل شي .. عبد الله انبسط عشان تدور له بنت .. ام فيصل مثل اختها خافت إنها الرجعة هي الرجعة كلهم حاطين يديهم على قلوبهم وش القرار المفاجئ وهو بالواقع قرار من الإثنين عشان يتفاهمون أكثر !!!!!


فيصل ونورة وهم بينامون ..!!
نورة " تمسح دموعها " : والله بفقدك فيصل والله العظيم بموت ماتوقعت إني كذا أحبك ..
فيصل : يووووه نورة تكفين خلاص والله ماني قادر أتحمل ولا مصدق بكرا بتروحين والله شايل هم كبر الدنيا ولا قادر انام حبيبتي .. (يمسح دموعها ..
نورة "نامت ودموعها على خدها " .. فيصل موب قادر ينام .. يااااه يانورة والله غالية .. إذا جاء الجد يافيصل طلع اللي عندك .. أحبها والله أحبها ..



ادعيـ علي بالموتـ وإلا سمنيـ !!
بس لا تفارقني دخيل الله وتغيبـ !!
طاري السفر يابعد عمري هدنيـ !!
شلون أودع في المطار أغلى حبيبـ !!













أشرقت شمس الرحيل ..!!
وقد يفترقوا للأبد من يدري !!
أو قد يزداد قلبه عشقاً !!
من يدري !!


نورة " تطلع أغراضها " : لا مو كل الأغراض بشيلها يمكن أرجع وإذا مارجعت اشحنهم قبل تجي بس رتبتهم بشنط لك عشان ماتتعب ..

فيصل : فكرة ممتازة .. طيب أخذتي لي لبس .. حق يومين بس والله يعين على التعب والإرهاق .. أبقعد اكثر من 3 أيام موب على بعضي..

نورة : الله يعينك .. يالله شل الشنطة هذي ثقيلة ..

×دق جوال نورة .. يوووه من اللي على هالصبح يدق .. ايه دانة ..
فيصل :ردي ..

نورة : اهلين حبيبتي ..

دانة : هاه مشيتوا ؟

نورة : للحين هذانا نشيل الأغراض ..
دانة : تآصلين بالسلامة يارب .. الله يحفظكم سلمي على فيصل ..
نورة : يبلغ مع السلامة ..
دانة : مع السلامة ..


دانة وقلبها يرجف يارب ترجعة سالم يارب .. والله مادري وش أسوي نورة طيبة والله حرام أخونها .. ياااربي بس شسوي قلبي أكبر منهم كلهم وشي مو بيدي ..








نورة وفيصل شالوا الأغراض وراحوا لمطار سدني .. !!


فيصل ونورة جالسين في المطار يشربون كافي ...
نورة "وهم في المطار" : يوووه بتصير رحلة متعبة .. قرف الله يعيننا عليها ..
فيصل "يبتسم " : وش أقول أنا اللي برجع بعد .. يالله ربنا يسهل ..
نورة : يوووه أمي خافت تحسب فينا شي أو متزاعلين ..
فيصل : هههههههه الله يستر .. أنا من ناحيتي ارتاحي ماراح يصير الشي ذا أبد إن شاء الله ..
نورة "تبتسم " :إيه ومابيننا مشاكل ومتفاهمين ..حتى في اصعب الأمور متفاهمين ..
×أعلنوا عن الرحلة .. !!

فيصل "وقف " : يالله حبيبي ..

× راحوا فيصل ونورة .. ..!!!!



رحلة فعلاً متعبة معنى الكلمة .. وطويلة ومملة ..




بالطيارة .. فيصل "بهدوء" .. يكلم نورة نورة حبيبي نايمة ؟

نورة " بتعب": لا بس مصدعة شوي بغيت شي ؟

فيصل : نورة مرة شايل هم وماني قادر حتى أفكر إيش راح يصير لي والله الغربة صعبة للرجل لحاله الله يعين دراسة وتعب..

نورة : حبيبي أصلاً خلاص أنا قررت بقعد فترة وأجيك .. ماراح أطول ..

فيصل : صعبة وأسعار التذاكر والله مو سهلة علي .. تحسبينها خذني جيتك ..


نورة : أدري أدري بعدين .. بعد 3 أربع أشهر والله أعلم ..
فيصل "يتنهد " : الله يسهل يارب ..





راح اليوم ونص تقريباً المتعب والممل بنفس الوقت .. ووصلوا .. أراضي الوطن السعودية ..

نورة بالطيارة يوم وصلوا المطار وخلاص بينزلون "طاحت دموعها " : يااااالله مشتاقة مشتااااقة ودي أنزل من الطيارة أبوس أرضها !!

فيصل " يتنهد " : الحمد لله على السلامة حبيبي ..

نورة : الله يسلمك " تمسح دموعها " ياااااربي مشتاااقة مشتااااقة والله مادري شسوي إذا شفت أمي وعبود ..

فيصل " وقف " :يالله حبيبي .. قومي ..


× نزلوا وأخذوا الشنط والأغراض .. بعد وقفه يمكن مدتها نص ساعة ونورة على قلبها لأن عبد الله وعلي ينتظرونهم..


نورة " تضحك والدموع في عينها " : شف عبود هنااااك .. يالله بروح .. ( راحت وهي طايرة من الفرحة ..


عبد الله "يضحك " : ياااااااااااااااااااهلا والله نورت الرياض والله العظيم نورت ..


نورة "احضنته وتبكي " : الله يخليك والله اشتقت الله مرررررررره اشتقت ..

عبد الله "يضحك " : ياحبي لك ..

× سلمت على علي ..

علي "يبتسم " : الحمد لله على السلامة نورة .. نورتوا ..

× جاء فيصل .. وشاف علي .. وحضنوا بعض وسلم على عبد الله ..
فيصل "يضحك " : يا شينكم طلعت مشتاق لكم وأنا مادري ؟؟

علي : الحمد لله على السلامة .. يالله يالله تعالوا الأمهات على نااااار مجتمعين بعد ..

عبد الله "ماسك يد نورة " : لااااا ومن اليوم يدقون وصلوا وإلا لا .. هههههه ؟

×دق جوال عبد الله ..

× مشوا كلهم وهم يمشون يسولفون ..

علي : هههههههههههههههههههههههه يالله رد ..

عبد الله "يضحك " : ايه ايه وصلوا شوي وجايين ... هههههههه الله يسلمك ,, لالا بيجون الحين كلميهم إذا دخلنا وجهاً لوجه .. مع السلامة هلا والله


عبد الله " يضحك " : هذي أمي .. صاحت على طول يوم قلت وصلوا ..
فيصل " يضحك " : ياحبي لها ..





شعور غريب حب الوطن !!
وشعور رائع عندما نرى ناس أحبتهم قلوبنا بعد مدة طويلة !!




بعد السواليف بالسيارة ونورة مرة مبسوطة .. أما فيصل كان مرهق وشايل هم الرجعة بكرا !!

وصلوا لبيت أبو فيصل ..

كان أبو فيصل أم فيصل وأم عبد الله ومحمد ومنار جالسين ينتظرونهم ومبسوطين ..

دخلوا .. كانت لحظات حلوة ,, الأمهات أكيد بكوا ,, وأبو فيصل انبسط بشوفتهم .. ومحمد ومنار ..

جلسوا وسولفوا .. حوالي ساعة وشوي ..

أم فيصل : والله ياوليدي شكلك تعبان ..

فيصل "وشكله مرهق " : والله تعباااان وبكرا عندي رحلة .. وراسي بينفجر ..

نورة "وقفت " : يالله فيصل تعال نرتاح تسمحون لنا .. ؟

أبو فيصل : أكيد روحوا ارتاحوا ومتى ماصحيتوا جلسنا مع بعض ..




× فيصل جلسته يوم .. يعني وش راح يسوي بذا اليوم كأنه ثانية مر عليه ..!! ماشاف أصدقائه ولا قدر يشوف غير أهله ..


راح اليوم بسرعة وبغمضة عين .. وفيصل يلبس بيطلع ..

نورة " تبتسم " : ببتأخر على المطار ..

فيصل " يبتسم " : يالله هذاني جهزت ..

نورة " تطالعه وطاحت دموعها ": فيصل بفقدك .. والله ..

فيصل حضنها وباسها على راسها .. وأنا أكثر .. وربي
نورة "تتنهد" : يااارب ترجع لي سالم ..

فيصل " يبتسم " : امسحي دموعك .. وإن شاء الله بأقرب فرصة بجي متى ماقدرت ..

نورة " تبكي " : ياحياتي أول ما تآصل دق علي ..

فيصل "يتنهد " : يالله حبيبي بفقدك وربي وسامحيني على كل شي .. يمكن ما انبسطتي معي في الأشهر اللي راحت ..

نورة " تبتسم " : مسامحتك وأنت سامحيني ..

فيصل "يطالعها وضمها " : مسامحك حبيبـي يالله مع السلامة ..
نورة "وكأنه حرارة بجسمها وبكت ": مع السلامة ..

×طلع فيصل ...



" نورة ودعته ودموعها على خدها .. واسترخت على السرير وتبكي .. والله مادري وشلون بعيش بدونك ..


" فيصل شايل هم ومو على بعضه ودع الكل وطلع .. ومن جواه جمر مايبي يروح .. بس في باله إن اللي يسويه عشان نورة ودراسته عشانها وعشان تكون أسرتهم أسرة ناجحة ..


" نورة جلست أكثر من ساعة لحالها ..وتبكي !!

فمان الله يا مسافر ..

عسى الله يسمح دروبك وترجع بالسلامة ..













رحل ..
وترك قلبي يحترق ..!!

أحبك يا أجمل الرجال ..
وأصدقهم حباً ,,
أحبك وأعشق حتى تعذيبك ..

لن ترحل دام قلبي لا يعشق سواك ..
لن ترحل يا من رحلت عن ناظري ..


قريباً سوف نلتقي ..
وقريباً سوف أرسم أجمل لوحة حب ..
بطلها " فيصـل " ..


أحبك
فهل تقبل قلبي بين ضلوعك ؟,,



 
دانة في شقتها .. ومسترخية على السرير وتراجع بعد ماارجعت من الجامعة .. تركت الكتاب .. وسرحت مع فيصل .. هالحين وشلون بدري إنه وصل !! وصعبة أدق على نورة ..خلاص لازم أنهي علاقتي معها !! إيه صح أكلم ليلى .. لكن أكيد الحين ماوصل أنام أحسن وبكرا يحلها ربي ..



فيصل بعد التعب والإرهاق .. في مطار سدني .. !! وخلاص تعبااان وباقي رحلة القطار ساعتين .. وشكله مره مرهق ..






في السعودية في بيت أم عبد الله ..

نورة "بهدوء " : يمه وش راح يصير بيني وبينه بس اشتقت ومتفاهمين حنا ,,

أم عبد الله "تتنهد " : الله يستر عليك ويوفقك ولو بينك وبينه شي قولي لي أنا أمك وأعلمك وش تقولين له .. وشلون تحلين المشكلة .. مافيه أحن من قلب الأم وأصدق منه ..

نورة "تبتسم " : ياحبي لك .. الله يخليك ولا يحرمنا منك يالغالية .. ×دق جوال نورة ..


نورة "وقفت " : أهلين ..

فيصل "صوته تعبان " : هلا نورة كيفك .؟

نورة "وهي تمشي " : والله تمام ومبسوطة ..

فيصل : أنا وصلت والحين بروح في القطار لنيوكاسل ..

نورة "مبسوطة " : الحمد لله على السلامة يالله روح ارتاح .. وصوتك تعبان ..

فيصل " يتنهد " : تعبااااااااااااااان .. والله يعينني يالله مع السلامة ..
نورة : مع السلامة ..



قفلت نورة "تتنهد " تجنن حتى وأنت تعبان .. نورة فتحت قلبها مررررة لفيصل ..


رجعت نورة وجلست مع أمها .. دخل عبد الله ..

عبد الله "يضحك " : السلام عليكم ..

الأم ونورة : وعليكم السلام ..

أم عبد الله : اجلس سولف معنا ..

×جلس عبد الله ,, وهذي قعدة لعيونكم ..

عبد الله : كيفكم ؟

نورة : الحمد لله أنت كيفك ؟ وكيف الشغل ..؟

عبد الله : الله يعين بس متى أتزوج وتجي المرة تعدل نومي وتعدلني كلي خطأ بخطـأ ..

أم عبد الله : الله يرزقك .. وبعدين وش مستعجل عليه .. على الغثى والمسؤولية ..؟

عبد الله "مستغرب " : هههههههههه يمه غريبة أنت كل الأمهات يبون عيالهم يعرسون .. وش فيها .. أجل اكيد ما دورتي لي صح .؟

نورة " تضحك " : أنا أنا بدور لك .. خلاص .. لا تشيل هم ..

عبد الله : والله قهر كل خوياي تزوجوا إلا أنا .. ومكون نفسي من زمان وكلهم متوقعين إني أتزوج أول واحد ..

نورة : إيه اصبر شوي وندور ..

عبد الله : هذا بعد سلمان ولد عمي أمه تدور له ..

نورة " حست بشعور غريب " : سلمان يدور ؟

عبد الله : إيه هو قال لي إن أمه تدور له ..

× سلمان اللي كانت تحبه نورة قبل الزواج ..


أم عبد الله "عصبت " : خلاص غثيتنا ياكره سواليفك .. ندور لك وخر بس .. والله يوفقهم .. عاد مقرودة حظ اللي بتزوج ولد حصه ..

نورة "تطالع أمها " : يمه حرام تجيبين طاريهم خلاص شي بيننا وبينهم والحين مالهم دخل فينا ..

عبد الله : يا بثره سلمان إذاجاء للإستراحة معنا أتفشل ,, بثر يسمع بالهسترة وخفة الدم..

نورة "عصبت " : خلاص وش فيكم ؟؟؟ حرام عليكم ..

أم عبد الله "تتنهد " : إي والله حرام علينا .. وماشاء الله هم يعرفون الحلال والحرام ..

نورة : ياااااااازين الراحة في بيتي ما أسمع شي ولا أسمع مشاكل ولا شي ..

عبد الله " يطالع نورة مستغرب " : ارجعي لبيتك مسوية مهمة يعني ؟,, والله مشكلة الناس إذا صدقوا أنفسهم ..

نورة " تستهزء " : ههههه وشلون تبيني أضحك ؟؟ كذا .. وإلا أجيب ضحكة أحلى ..

عبد الله : هههههههه أقول نامي بس ..



× نورة قامت ترتاح .. لأن الخبر ما كان عاجبها وكانت تحب سلمان طول عمرها .. لكن فيصل قدر ينسيها هذا الحب .. وهي حست بشعور غريب يوم سمعت إن سلمان يدور بنت .. وعارفة قبل مستحيل يتم زواجها من ولد عمها لأن بينهم مشاكل عائلية لذلك ما أصرت على رفض فيصل وفيصل ولد تتمناه كل بنت .. دخلت نورة غرفتها واسترخت .. وفتحت درج كانت تحتفظ بخواطر تكتبها عن سلمان .. قررت ترمي كل شي يذكرها فيه .. لأنها عرفت إن فيصل ملك كل شي فيها .. نورة طاحت دموعها شوق لزوجها ..وقهر على عمرها اللي قبل كيف ما عرفت ولد خالتها الطيب !! وكيف ترددت بالموافقة عليه .. كل شي يجي فبالها .. لأن فيصل صار بالنسبة لها كل شي !!






في المستشفى .. وفي غرفة أبو دانة ..

أم دانة " تطالعه مستغربة " : هم قالوا لك مافيه شي أبد .. بس والله أنت مو طبيعي أبد ..ووجهك مو طبيعي

أبو دانة " يتنهد " : لا إله إلا الله .. الحين ليش ما تسمعينني ولا تجين ولا أشوفكم خلوني هنا ..

أم دانة "تطالعه " : ليش نخليك وش فيك أنت ؟

أبو دانة : يابنت الحلال قالوا لازم نخليك عندنا فترة وخلاص لاتجين لأن الرجال داخل طالع وأنت جالسة ..

أم دانة " تبتسم " :ماشاء الله من متى يهمك ..

أبو دانة : لا أنت تكشفين .. ولا أبي كل الرجال يعرفون إنك تكشفين خلاص الله يخليك لا تجين فترة بس ..

أم دانة " تتنهد " : أنت فيك شي والله العظيم كلامك غريب ومن اليوم تقط ألف خيط وخيط .. ماني فاهمه شي !!

×سكت أبو دانة .. وسكتت أم دانة ..

أبو دانة " بهدوء " : أنا مريض ومرضي صعب علاجه ..

أم دانة " سكتت شوي... لا حول ولا قوة إلا بالله العلي العظيم .. " طاحت دموعها ..

أبو دانة " بهدوء " : ارتحتي الحين .. وشوفي يا مريم دانة مابيها تدري ..

أم دانة " وهي تبكي " : طيب وين ؟

أبو دانة " ودمعة فعينه " : بالكبد .. والله يعين ..

أم دانة : طيب الله يشفيك يارب "قامت وعطته بوسه على راسه " .. طاحت دموعها ..

أبو دانة : إن شاء الله فيه أمل كبير أنا الحمد لله بأول شي وطمني الدكتور وقال إذا في أول شي يصير فص صغير بالكبد ويستئصال وعندي امل كبير

أم دانة " تتنهد " : ياااااارب تشفيه ياااارب .. ياحي ياقيوم ..

أبو دانة : دانة يا مريم لا تحس بشي .. وأنا قريب بسوي العملية ..
× طالعته .. وبكت ..

أم دانة ما توقعت الشي هذا يصير .. وخافت تفقد أبو دانة .. ويصير واحد من عمانها اللي مايعرفونها ولي أمرها ..!! كل شي جاء في بالها ..







في بيت أبو فيصل .. بالصالة ..

أم فيصل "تسولف مع بنوتتها الصغيرة " : هم قالوا خلينا نتعرف على أمك ..

منار "متحمسة " : إيه قالت خلي أمك تدق علي بكرا أبيها حرام حنا قريبين عند بيتكم وجيرانكم ولا نعرف بعض ..

أم فيصل : إي والله حرام .. وطيبة أم صديقتك ؟

منار : إيييه بس عجوز شوي و روان صديقتي أصغرهم .. وبعد عندهم عيال متزوجين ..

أم فيصل : أهااا وعندها بنات وإلا لا ..

منار "بحماس مره " : إيييييه عندها بنات ماشاء الله كثيرين .. عندها بنت مخلصة من الجامعة .. ووحدة بالجامعة وبعدهم ولد وبعدين روان ..

أم فيصل : هههههههههههههههههه ياحبي لك عارفتهم كلهم ..

منار : وش أسوي يمه ما عندي أحد وروان حليله معي .. وتكفين بروح معك إذا رحتي ..

أم فيصل " تبتسم " : إيه يا أمي تروحين الحين تروحين لحالك وشلون وأنا معك .. خلاص أدق عليهم وأِشوف .. وأوسع صدري بعد ..

× دخل علي .. هلا يمه ..

أم فيصل : هلا أبوي .. وينك ورا ما تدخل تنام الساعة 11 وعندك جامعة بكرا ..

علي : إيه هذاني جاي بنام .. بس وين محمد بشوف لاب توبه اللي جاب له فيصل ما استخدمته ..؟

أم فيصل : لا تصحيه ما صدقت ينام ..

علي : إيه خلاص أشوفه بكرا .. يالله يمه "قرب وعطها بوسه على رآسها " تصبحين على خير ..

أم فيصل : تلقى خير .. ×طالعت منار .. يالله يا أمي روحي نامي أنت لا تقومين وأنت دايخة ..

منار : طيب تصبحين على خير يمه .. وشوفي دقي الساعة 10 وإلا 11 تقول أمها ..

أم فيصل "تضحك " : طيب أمي .. روحي ..







في استراليا الساعة 5 الفجر .. صحى فيصل يصلي الفجر .. وهو مرتاح ويحس بالنشاط بعد النومة الحلوة .. يطالع الفراش !! ياااالله وينك ؟ أبي بس أشوفك لو أنت نايمة ..


صحت دانة تصلي .. بعد ما خلصت مصلية .. النوم طار من عيونها .. وشلون بيجيني النوم وأنا عندي احساس إن فيصل واصل وبشوفه عند الشاطئ .. وأول لقاء بعد نورة .. ولا عندنا أحد يضايقنا ..
ياااارب .. أشوفه .. جلست دانة موب قادرة تنام من الوناسة .. وافتحت اللاب توب تتصفح ..



فيصل صلى وطلع للمطبخ يسوي له كافي .. يوووه الله يعين أنا بغسل الصحون والأكواب وكل شي لااااا يالله .. !!
سوا كافي وجلس بالصالة .. فتح التلفزيون .. !!




راحوا الساعتين بسرعة ..كان الجو معتدل وحلو .. فيصل طلع لحديقة البيت وشاف الجو مرة حلو .. وقرر يروح للشاطئ ويمشي وخاصة إن له أكثر من 3 أيام ما مشى .. طلع جزمة المشي وبدل ملابسه وطلع ..



دانة جالسة تتصفح النت .. شافت الساعة ع الـ 9 يوووه تأخرت .. بطلع يارب أشوفه يارب ..





فيصل يمشي .. !!
دانة وصلت .. وطالعت مافيه أحد جلست بمكانها اللي تجلس فيه دايم وطلعت روايتها .. إيه شكله ماجاء من السعودية أنا وشلون راح أدري أخاف أدق على ليلى نايمة ؟؟!! ومستحية منها هالوقت ..

جلست شوي حتى الرواية اللي طلعتها ما افتحتها .. دانة وحست بالضيقة والملل .. وقامت بترجع ..




وعلى وقفتها جاء فيصل "يضحك " ..

دانة ارتبكت .. وقلبها يرجف .. فيصل أهلين الحمد لله ع السلامة ..

فيصل " جلس " : الله يسلمك ..

×ماصدقت دانة ورجعت جلست .. !!!

فيصل " يتنهد " : يووووه تعبت والله عوضت حق 50 يوم ..

دانة " بدلع " : ههههههههههههه

× فيصل سكت شوي ..

دانة " تبتسم " : بروح أجيب لك ماء ..×وقفت ..

فيصل " يتنهد " : تسوين فيني خير ..

×راحت دانة تشتري له ماء ..

فيصل "كان يطالعها وهي جاية " : الله يعطيك العافية .. دولارين ؟؟

دانة " تضحك " : أقوووول وش دولارين خير ؟؟ خلاص اشرب والحمد لله ..

×جلست دانة ..

فيصل : كيفك دانة ؟

دانة "تبتسم " : الحمد لله .. كيف نورة عساها بخير ..؟

فيصل "يضحك " : نورة !! الحمد لله بخير ..

دانة " تطالعه ": ليش تقول نورة !! باستهزاء ..

فيصل : ياحبي لها بس والله فقدتها ..


× دانة انقهرت مررره ..

دانة " وهي مرتبكة " : فيصل أنا لازم أروح .. × دق جوالها وقطعت كلامها ..


× تدور الجوال بالشنطة يووه وينه هذا !! وطلعت الرواية على الطاولة .. وبعدها طلعت الجوال ..


دانة : هلا ليلى ..

ليلى : أهلين يا عسل صاحية أشوى قلت أخاف إنك نايمة ؟

دانة " تبتسم " : إيه من زمان من صلاة الفجر عاد ماتجي الساعة 8 إلا وأنا نايمة ..

فيصل " أخذ الرواية " ويطالع دانة وهي تكلم !!!!

ليلى : الله يعينك وش مصحيك من 5 ؟

دانة " تبتسم " : والله ماقدرت أنام .. وحتى كلمتني أمي الساعة 5 ونص وصوتها مادري وش فيه ؟؟

ليلى : يالله الله يعينك .. ويوفقك بس قلت بشوف وش تسوين ..؟

دانة : أوكي أشوفك ..مع السلامة ..

ليلى : مع السلامة ..

×دانة ماحبت تقول لليلى إنها على الشاطئ خافت تجي ليلى !!

فيصل "يطالعها " : أنت مثلي ما قدرت أنام صحيت الساعة 5 ..

دانة " مرتبكة وموب قادرة تمسك نفسها ": هههههههه القلوب عند بعضها ..
فيصل "يبتسم ويطالع الرواية " : على فكرة قراءتك للروايات باللغة الإنجليزية تخليك شي باللغة ..

دانة : وغير كذا خلقه أحب أقرا الروايات ..

فيصل " وقف ومعاه الرواية " : ماعليه آخذها بقراها..

دانة " تضحك " : وش دعوى تفداك ..

فيصل "يضحك " : ما أدري حسيت ما لي داعي جيت وجلست معك .. أحرجتك والله ؟

دانة " تبتسم " : الله يحييك بأي وقت .. وبصراحة أنا ارتحت لك وحسيت إنك أخو لي ..

فيصل " يطالعها ويبتسم " : بتجين بكرا ؟

دانة " تطالعه " : أكيييد أعشق المكان هذاوأحب أقرا هنا ..

فيصل "يقاطعها " : بس الرواية معي ..

دانة " تضحك " : هههههه عندي غيرها ..

فيصل "يتنهد " : يالله بروح أحل الواجب الله يعين ..

دانة "تطالعه" : الله يوفقك ..


× راح فيصل ....

دانة " تنهدت " : ياااازينك .. وياحلو كلامك .. وحتى عفويتك .. إيه مره أحسك مثل أخوي والله تسوى الدنيا كلها ..

×جلست شوي دايخه يوم شافته .. وانبسطت .. والأرض مو شايلتها ..


×تذكرت دانة .. لاااااا ياربي .. الرواية فيها ورقة أنا حاطتها !!!فيها خااااطرة لاااااااااااا ياربي وشلون بجيب الرواية منه !!

× لحقته دانة .. بس شافته حرك السيارة ..

دانة "خافت " : يااااااااااااااربي وش أسوي .



× دخل فيصل للبيت .. وترك الرواية على طاولة الصالة ..


× دانة رجعت لشقتها .. وعلى أعصابها ..


والله فشله يادانة ياغبية .. وشلون ما جاء فبالي .. بس يالله أحسن خليه يدري إنه في أحد في حياتي وليته يعرف مين.. عشان يهتم ..


× فيصل فتح اللاب توب ودخل بيحل الواجب .. !!





× راحت الساعات بسرعة .. ودانة تفكر فيه .. موب قادرة تشيل فيصل من رآسها .. مستعدة تسوي المستحيل عشان تآصل له ..


× دانة وهي تشيل أغراضها بتطلع للجامعة العصر .. يارب يقرا الخاطرة ويرد لي بكرا يارب ..!!




× فيصل طالع وهو يركب السيارة طالع للجامعة .. ×دق جواله ..

نورة : السلام عليكم ..

فيصل " يبتسم " : وعليكم السلام .. يااااااااااهلا والله وغلااااا

نورة " بصوت هادي " : كيفك ؟

فيصل "بصوت عالي ومزعج " : الحمد لله ياااقلبي مبسوط ورتاح .. ومشيت اليوم وعال العال ..

نورة : باين عليك مبسوط .. أنا هه توي صايحة نمت بدري .. وصحيت ياربي عاد مافيه احد بيعطيني وجه الحين ..

فيصل " يضحك ": الله يرحم أيامك يا استراليا أجل هاه ؟

نورة " تضحك " : صادق أنت ألقاك أي وقت مثل الجني ..

فيصل " يضحك " : هههههه هيه أسوق قولي ماشاء الله لا يجيني شي ..

نورة "تضحك " : ماشاء الله .. فيصل ..

فيصل " يضحك " : عيونه ..

نورة : بروح للمستشفى اليوم ..

فيصل " استغرب " : وش فيك ؟؟







في السعودية .. في بيت أبو فيصل .. منار توها داخلة من المدرسة .. وأمها جالسة بالصالة ..

منار " دخلت تأفف " : أوف بس يمه حرررر والله حر ..

أم فيصل "تضحك " : تعالي عطيني بوسة أول .. وين أبوك أجل ؟

منار "قربت وعطت أمها بوسه " : أبوي الحين يجي يقول بروح أجيب الجرايد ..

أم فيصل : إيه .. طيب روحي بدلي يالله وصلي الظهر ..

منار : طيب كلمتي أم صديقتي ..

أم فيصل : إيه يا حبي لهم تقول تعالوا العصر .. لا تنامين عشان تروحين معي وادرسي أول ..

منار "تضحك " : الله الله بروح أصلي وأجي أكلم روان ..

أم فيصل "استغربت " : هه توك جايه منها وشوله تكلمينها ..

منار " وهي تقعد شنطتها " : إييييييييه بس ما تدري إني أبجي ..

أم فيصل : يالله طيب روحي سوي اللي قلت لك ..






× نورة جالسة بالصالة مع أمها ...

أم عبد الله : لا قبل شوي مكلمة خالتك تقول بطلع العصر تعالوا بعد العشاء ..

نورة "تتنهد " : أحسن بعد عشان أروح للمستشفى وأنت قلتي إيه أروح معك أمس ..

أم عبد الله : إيه وأنا عند كلمتي .. نروح بعد شوي ..بس ياليت عبد الله يجي ونفسيته زينه ..

نورة "تضحك " :والله بهالحر مافيه أحد بيجي نفسيته زينه ..




× فيصل جاي من الجامعة وجالس على الكمبيوتر يتصفح .. جلس شوي وقام مر الصالة وأخذ الرواية بيروح ينام .. الساعة حوالي 8 ونص .. صلى العشاء .. واسترخى على السرير .. فتح الرواية .. وحس بوسطها ورقه فتح صفحات الرواية بسرعة.. وطلعها .. ويقرا الخاطرة ..


في الغربة التقينا ,,
وفي الغربة قد أرسم أجمل وأصدق المعاني للحب ..
لا يعلم ما يخفيه قلبي من عشق !!
ولا يعلم أنني أتعذب من أجله ..
***
سمعت عن الحب !!
وسمعت عن العشق ..!!
وبل أقرأ عن أروع التضحيات من أجل الحب !!

***
أحببته من أول لمحة ..
وفتحت له باب قلبي دون أن يطرقه !!
جعلت حرفه يجمل كل صفحاتي ..
وصار لا يفارقني .. أبداً ..
***
أحبك
فهل تقبلني الحبيبة !!
أحبك
فهل أبحر في قلبك ..
أحبك
يامن علمتني فنون العشق ..
وعلمتني أن الحب أسمى ما في الحياة ..
أحبك
***
شكراً لك أيها الرجل
جعلت قلبي يشتعل شوقاً ....
همسة في إذنك حبيبي
"وعلى الشاطئ نلتقي"





فيصل " يتنهد ": وعلى الشاطئ نلتقي .. وفي الغربة ؟؟؟!!!! والله البنت خطيرة ؟؟ ×فيصل يفكر .. مين على الشاطئ نلتقي ؟؟؟ ومين في الغربة !! والله غريبة ..


رجع يقرأ الخاطرة أكثر من مرة .. لالا أكيد فيه أحد ثاني .. وشلون تحبني بس !! على أي أساس .. بس خذني جيتك .. والله البنات مو صاحيات أبد .. وما تعرف إني متزوج .. لا لازم أبعد عنها .. أنا ما صدقت أستقر شوي ..وماصدقت أعدل نورة .. !!


× فيصل ما قدر يرتاح وده يدري وماوده .. ونام وهو يفكر .. !! وقلقان ..




× نورة داخله ومبسوطة .. الحمد لله ياربي .. لازم أدق أبشر فيصل ..

أم عبد الله " تضحك " : بصير جده خلاص والله وكبرتي يا أم عبد الله ..

عبد الله " يبتسم " : أنا أحس إن شكل خطأ وأنا بصير خال وعععع لازم أعرس لازم ..

نورة " تضرب كتفه " : وش دخل العرس .. وخر بس بدق على فيصل أبشره ..

× راحت نورة .. تدق .. تدق مايرد ..× رجعت للصالة ..

أم عبد الله " تضحك " : انبسط ؟

نورة " زعلانة " : قهر ما يرد ..

عبد الله : أحسن .. خليه آخر واحد يدري ..

نورة " تبتسم " .. طيب يمه ما تبين نروح لخالتي لو حنا رايحين على طول أحسن ..

أم عبد الله : لا ما جت أنا دقيت على البيت ويقولون ما جت ..

عبد الله "وقف " : أنا بروح ما راح أودي أحد ..

أم عبد الله " عصبت " : من يودينا أجل أقول اجلس ساعة ونطلع كلنا ..





× في بيت أبو فيصل ..أم فيصل وعلي ومنار بالصالة ..

أم فيصل " تطالع منار " : الحين بتجي خالتك .. وبتجي نورة تحبك أكيد مشتاقة لك ..

منار "فيها نوم " : بس يمه دايخه والله تكفين بنام ..

علي "رحمها " : روحي نامي .. خليها تنام يمه ..

أم فيصل " عقدت حواجبها " : تونا يا وليدي والله موب زين كل الوقت نايمة ..

منار : تكفين بنام .. الله يخليك يمه ..

أم فيصل " تتنهد " : الله يصلحك وأنا قبل شوي أمدحك عند أم عبد العزيز وأقول محظوظة بنتك ببنتي ..


منار : طيب بنام شوي وصحيني ..

أم فيصل : خلاص قومي نامي .. والبسي بيجامتك قبل ..

منار " وقفت " : طيب ..

علي " يضحك " : ههههههههه والله رحمتها من اليوم وهي تبي تنام ..

أم فيصل : الله يصلحها بس .. × رن الجرس ..

أم فيصل : قم افتح هذي أكيد خالتك ..




× عند باب الشارع .. أ م عبد الله تكلم نورة ورا أخوك ما نزل روحي قولي ينزل يسلم على خالته ..

× راحت نورة .. عبود تقول أمي انزل سلم ..

عبد الله " يتنهد " : لا إله إلا الله .. مستعجل .. عندي أشغال الدنيا يالله وخري بمشي ,,

نورة : كيفك ..

× رجعت نورة .. ودخلت لأن علي فتح الباب وطلع ..

×سلموا واجلسوا ..

أم فيصل : الله يحييكم والله توسعون صدورنا ماغير أنا ومنار وصرت ألعب معها بعد ..

أم عبد الله : هههههههههههههه

نورة " تضحك " : خالتي عندي لك بشارة ..

أم فيصل : سمي ..

نورة : بتصيرين جدة ..

أم فيصل : والله ؟

أم عبد الله : إيه تونا جايين محللين له ..

أم فيصل " بكت " : يااااالله ياوليدي بيصير أبو .. ياليته فيه ..

أم عبد الله : إي والله ياليته فيه ننبسط ..

نورة " تضحك " : حاسة من زمان والله .. بس خفت وترددت ..

أم فيصل "أخذت منديل تمسح دموعها " : والله أحلى خبر سمعته .. الله يبشركم بالخير ..ياليته عندي × تبكي..

أم عبد الله "طاحت دموعها " : يالله الله يرده بالسلامة يارب ..


نورة " ماتحملت وطاحت دموعها " ... بينها وبين نفسها وش أقول أنا اللي أتمنى إني أبشره .. وأشوف ملامح وجهه وأنا أبشره .. آآآآه يافيصل .. فقدتك ..


أم فيصل : أنت اللي بتقولين له .. طيب حنا ما راح نقول له شي ..

نورة " تضحك ومبسوطة : إ ن شاء الله خالتي ..

أم عبد الله : أجل وين رحتي اليوم العصر ؟

أم فيصل : إيه رحت لجارتنا أم عبد العزيز بنتها صديقة منار وقالت خلينا نتعرف على أمك .. منار دايم أخليها تروح عندهم ..

أم عبد الله : إيه ..

أم فيصل : وماشاء الله شفت عندها بنات ومقدمين لي أنواع المعجنات والحلى والله تقديمهم يفتح النفس هذي وحدة متخرجة عمرها 24 ماشاء الله مزيونة وسنع .. والثانية 21 عمرها .. والله سنعات .. كلهم .. أنا أول ماجاء فبالي عبد الله .. موب تقولين أشغلك ؟

أم عبد الله : خلاص أشوف عنه .. ونسأل عنهم بعد ..

أم فيصل : يا بنت الحلال جيراننا والله ما قد سمعنا عنهم إلا كل خير .. وماشاء الله يقول أبو فيصل أبوهم طيب مره .. وأمهم والله أحلى من العسل وما تدري وين تحطك ؟؟ بس لا تفوتين البنات وخلي اللي عندك ينبسط ..
أم عبد الله : أوووف غثني ليتني أفتك منه .. طالع داخل يبي مرة الله يجزاك خير يا أخيتي والله ريحتيني الله يكتب اللي فيه الخير ..
نورة "وقفت " : بروح أجيب القهوة ..




× فيصل صحى الفجر .. وكانت الرواية جنبه .. والخاطرة مخليها برا الرواية .. " يتنهد " ياااالله صباح خير .. أخذ جواله .. شاف برايفت نبر .. يوووه أكيد نورة .. نورة هذي بتشغلني على بالها المكالمات الدولية ببلاش .. !! الله يصلحك .. وهو منسدح بفراشه ..


دق على نورة .. أهلين نورة ..

نورة "تضحك " : هلا حبيبي شكلك نايم ..

فيصل : لا توي قايم بصلي الفجر ..

نورة : ياااااااااي تونا هنا ..

فيصل " ماله خلق أبد " : يقاطعها أنت اللي داقه ؟

نورة : إيه .. بقول لك ,,

فيصل " عصب" : نورة أنا مو بالشرقية ولا القصيم .. أنا بنيوكاسل .. مو تدقين علي كل شوي .. من رخص المكالمات الدولية ..

نورة " ضاق صدرها " : طيب طيب شوي شوي ..

فيصل " معصب ": لا جد آخذه الدنيا ببساطة أنت تعرفين إني طالب وعلى الله ثم هالراتب منين أجيب أضرب الارض وإلا عساك تبينني أقول لأبوي حول لي .. شوفي بعد 3 سنين بالكثير كيفك كلمي اللي تبين ..

نورة " انصدمت وطاحت دموعها ..

فيصل " يتنهد " : لا إله إلا الله .. جد تقهرين عليك حركات كأنك بزر بعض الأحيان يالله منك ..

نورة " وهي تبكي انقهرت مرة " : خلاص خلاص مع السلامة ..
فيصل : مع السلامة ..



× فيصل منقهر من الخاطرة أشغلت باله وماله خلق أبد .. !!


× نورة المسكينة .. بغرفتها .. ومنسدحه على السرير يااالله يافيصل وش سويت تسوي فيني كذا ..!! كل ما زانت معي شوي خربتها .. ليش ؟؟ و نامت من القهر وهي تبكي ..

آآآه يا جود الحزن وياي وبالفرحة .. شحوح !!

ضايعٍ بهمومي الغبرا بوسط المعمعة ..

أشتكي لوسادتي دنياي وأسمعها تنوح ..!!

كنها بعضي وبعضي وين هو ؟؟ ومن هو معه !!








× فيصل جالس بالصالة .. يااالله وش قلت للمسكينة أنا حطيت فيها حرت اللي قريته والله رحمتها .. أدق عليها ؟؟ وإلا أخليها .. يالله طيوبة ترجع تكلم ..



× دانة صاحية .. وشلون راح أدري إنه قرا الخاطرة وإلا لا ؟؟ ياربي منه .. بروح على الشاطئ .. وأنتظره .. / أخذت أغراضها وطلعت ..




× صحت نورة من النوم بالليل وعيونها متنفخة من كثر البكي ولا قدرت ترتاح في نومها أبد !! على طول جاء فبالها فيصل × تفكر × تفكر وبعد نص ساعة كذا ..قررت ترسل له مسج تحسسه فيها .. وتعلمه إنها حامل ..


(فيصل حبيبي .. ماتوقعت إن شوقك لي ترده بالطريقة هذي ..على كلٍ أنا مسامحتك وعمري ماراح أشيل في قلبي شي .. بس حبيت أبشرك بشي ولا عطيتني فرصة حتى أعبر لك بفرحتي المهم راح يصير بحياتنا شخص ثالث يقربنا أكثر لبعض .. ومشكور يالغالي )




× فيصل وصله المسج .. فتحه .. .. لالالالالا ما أصدق ياااااااالله ودق
عليها على طول .. فيصل : نورة ..

نورة "بهدوء " : هلا فيصل ..

فيصل " مبسوووط " : جادة والله ؟

نورة " ضحكت " : والله ..

فيصل " يضحك " : ياااااااااااااالله بصير أبو .. يااااحبي لك يانورة ألف ألف مبروك حبيبي ياليتني عندك .. أضمك وأضمك وأضمك ما أمل منك ..

نورة " تضحك " : سبحانه ..؟؟

فيصل : آسف آسف آسف ,,, لعيون اللي في بطنك ..

نورة " تضحك " : ياحبي لك انبسطت ..

فيصل : مررررررررررره والله ودي أطلع أفحط ودي أسوي شي ياليتني عندكم .. ياااالله ..

نورة " بهدوء " : طيب وخر ..مكالمة دولية ..

فيصل " يضحك " : ماراح أزعل ولا شي بس يالله مع السلامة يااااقلبي وألف مبروووك ..

نورة : فيصل أحبك ..

فيصل : وأنا أعشقك وأموت فيك .. الله يخليك لي يارب ..ولا تزعلين علي حبيـبي ..

نورة " طاحت دموعها " : ماراح أزعل .. مع السلامة ..

فيصل : مع السلامة ..


× نورة "بكت " : ياااااليتك عندي والله اشتقت لك نفسي أبشرك وأنت قدامي ونسولف عنه وايش راح نسميه !! وكل شي كل شي !!.. ياااالله وش فيني والله صرت أفقدك يا فيصل ..




× دانة على الشاطئ تتنظر وتطالع كل مكان .. ملت وهي تنتظر .. الساعة 10 ولا جاء مو معقول وأنا لي كم ساعة هنا !! والله مو معقول ..



× فيصل غير المكان اللي يمشي فيه .. فرحان والأرض مو شايلته .. بس يجي في باله الخاطرة اللي قرآها .. تردد يروح للشاطئ يمر يشوف دانة فيه وإلا لا !! إذا صارت فيه بيعرف إنها تنتظره لأنها بالعادة ترجع بدري .. أروح وإلا ما أروح !! والله جت فبالي فكرة أعرف إن الخاطرة تقصدني وإلا !! ...

أقول بلا دانة بلا هم خلك بزوجتك .. ويبجيك ولد إن شاء الله .. ينسيني الدنيا كلها .. !!

فيصل متردد ولا يدري وش يسوي !!

بس في النهاية قرر يروح للشاطئ !!



× نزل فيصل من السيارة .. ويدور بكل مكان وخاصة مكانها ما شاف أحد .. عرف إنها رجعت .. وفعلاً دانة رجعت !! فيصل ركب السيارة وانقهر يبي يعرف مين تقصد !! يالله والله البنت المفروض أعطيها شوي جوها !!



× دانة في شقتها .. ليش ما جاء أكيد قرا الخاطرة ياربي معقولة عرف ومايبيني !!



معقول فيصل اهتم بدانة مع الفرحة المفروض ينسى شي اسمه دانة بس أكيد فيه انتظروني !! :cupidarrow:






 
العنا
ام ارجوان
ام شهودي
NicE-GirL

اشكركم على الردود الحلوة... حمستوني اكمل القصة..

:icon26::icon26:
 
يا ربي ياربي متى تكملي القصة

والله ودي اقتل كل بنت تريد تاخذ ازواجنا منا

كملي بلييييييييييييييييييز ( اشرقي يا شمس)
 
تسلمين يالغلا"اشرقي ياشمس"

رواااايه رائعة

دمتـــــــــــــي بود................
 
كمليييييييي
حمستيني مرة
وش بيصير مع دانه وفيصل
 
رواااااااية في قمة الروووووووعة


كملي حبيبتي ،،،



نبي بارت طوييييييييييل ،، بلييييييييييييييييييييييز
 
عن جد قصة واااااااااااايد روعق وهالجزء يحمسنا للمتابعة اكثر مشكورة حبيبتي ع قصة وتستهالين السلامة ننتظرج
 
قصه رائعه
شكرا لك
أنا مع نوره ومقهوره من دانه مرررررره
بصراحه تفاعلت مع القصه
وأنتظر الجديد
 
الحالة
مغلق و غير مفتوح للمزيد من الردود.
عودة
أعلى أسفل