يوم في دار المسنين

[راجيه الرضا]

من فترة كنت فى زيارة لــ دار مسنين
لقيت اللى بينادى عليا بتقولى يامحمد يامحمد !! أنت جيت ؟؟ روحتلها !! واحدة ست عجوز فى السبعينات من عمرها قعيدة الفراش -- انت اسمك محمد ؟؟ ايوه يأمى !! أصل أنا محمد اخويا جبنى هنا وبقالوا فترة كبيرة مجاش سأل عليا !! واحشنى اوى -- هما هنا بيعاملونا حلو بس أنا نفسى أشوف أخويا أصل واحشنى --- فضلت اتكلم معاها شوية -- واأنا ماشى انت هتيجى تانى صح ؟؟ طيب ابقى هاتلى حاجة حلوة معاك
واحدة تانية لقيتها بتعيط -- روحتلها مالك يأمى بس مين مزعلك ؟؟ مفيش حد يابنى أنا " أمل وحشتنى "-- كانت مالية عليا الدنيا -- وتاخد نفسها بعياط شديد -- ومفيش غير كلمة واحدة انت فين يأمل وحشتينى -- لما سألت عرفنا إنها بنتها واتوفت من فترة ’ وكانت البنت ونعم البنت البار وهى من ساعة ما ماتت وحالتها كده
واحدة تانية حكتلى عن مرات ابنها اللى مستحملتهاش عشان مرض فى عنيها -- وابنها جابها على الدار وبقاله خمس سنين مزرهاش مرة
النهاردة كان يوم وجع القلب بالنسبالى -- يوم عرفت فيه قيمة االصحة اللى راحت من كل ام فضلت تسهر االليالى تربى فى ولادها وتتعب عشانهم -- يوم شوفت فيه الأيدى المرتعشة اللى كانت بتأخد بايد ولادها وتعلمهم المشى -- شوفت فيه شفايف جافة كانت بتغنى لولادها عشان يناموا ويهدوا لما يعيطوا ’ شوفت فيه زمان اتغير -- ووشوش كانت مليانة بالشباب -- العجز هدهم -- وكأن الزمن لما بيكبروا بيلغيهم ’ شوفت فيه جنة تحت رجلين آمهاتنا ضيعناها -- ومكنش فى غير سؤال واحد وانا مروح فى عقلى -- اذا كان الاب والام بيساعدوا ولادهم فى اول خطوة ليهم فى الحياة ’ فــ ليه الأبن مش بيقدم الدعم لابويه فى آخر حياتهم ؟؟
ايه الجريمة اللى عملتها الأمهات دى عشان ميلقوش من ولادهم غير الدموع والوحدة ؟؟
تقريبًا الناس بتنسى إن هما دلوقت ابناء- وبكرة اكيد هيبقوا أباء -- واهى العجلة بتدور
أحدهم قال " أسرع الذنوب عقوبة كفر المعروف " ومعتقدش فى ذنب أكبر من عقوق الوالدين الا الشرك بالله

##فضالى