يــارب تفـــرج هـــم كل وحـــدة تدلـــــني على الصواب

[حيااة]

مدري من وين ابدا
والله والله والله اني سجلت بس عشان اكتب مشكلتي ابي اشوف رايكم في اللي صار لي

اولآ..زوجي شرقي..غيور..(قصدي انه يمثل انه غيور)..بااارد يعني مو عصبي

فبل يومين كنت جالسه معاه وقالي اني بروح ل(الكترو)محل الالكترونيات...اذا تبين تروحين معاي البسي عبايتك...لبست عبايتي واخذت اولادي ورحنا...دخلنا المحل قبل الاذان بربع ساعه..وراح عند كونتر الصيانه لانوبيصلح كاميرا ماخذينها منهم..كنت واقفه معاه...
بعدها رحنا انا والاولاد نتفرج على الجولات..كاميرات..اشرطه..صار كل واحد بمكان..بعد 6دقايق صرت اتلفت ادور على اولادي وزوجي...مالقيتهم..رحت يمين يسار..شسالفه وين راحو...وانا ادور عليهم..قالوا لي انو اذن لصلاة العشاء..بمعنى اطلعي..طلعت وانا انتظر زوجي والعيال يطلعون...بس محد طلع...سكر المحل!!!!
رحت على طول لمكان السياره وكانت بعيده...والصــــدمه..مـــالقـــيـتها...بسم الله الرحمن الرحيم..وينهم..وين راحوا...رجعت عند بوابة المحل..بس برضوا ماحصلت احد...(اكيد احد سحرهم)والا كيف يروح ويخليني..تذكرت الجوال..وانا ارتجف..دقيت طوووط..طووط..طوط...محد يرد....(اي اكيد ناسي الجوال في البيت)..قعدت اسمي بالرحمن..طار عقلي وينهم...بديت ابكي وامشي وادور..واروح لمكان السياره...وادق على جواله ومحد يرد........
........................................
لحد مااقتنعت انه...راااااااااااح وخلانــــــــــي..

اي بس ليه!!شسبب..!ليه يتركني في ذا المكان لوحدي ولا يرد علي...حتى يوم ننزل كنا زي العسل...(بس حتى لو متهاوشين)مايحق له انو يروح ويخليني
دقيت على اختي الكبيره..وعجزت اتكلم من البكا،،قال:شفيك!قلت:راااح وخلاني...قالت:وينك فيه!قلت:عند الكترو..قالت:هاااااااه وليه راح وخلاك..انتي شمسويه!!قلت:مـــاسويت شئ..قالت:انتي متسترة قلت:اي وربــي متسترة..مدري ليه مدري عن شئ..
دقت عليه اختي مرة وثنين مــــايرد...دقيت انا المره المليون..مــــايرد
قالت اختي:دقي على ولدي يجي ياخذك
وانا بدق.....شفت سيارة زوجي جــــايه..واقوم ررركض لها..وافتح الباب..وانا ابكي:ليه شفيكم!ليه رحتوا وخليتوني..ووو..رد علي بكل برود:اقول بس يالله اركبي بسرعه
وانا ابكي بصوت عـــالي كنت مرعووبه خـــايفه..قالي بكل برود:انا كم مره قلت لك اذا صرنا ف مكان ماتروحين بعيده عني..قلت انا كنت عندك..قريبه منك اتفرج...قال:لا انا دورت عليك..ومـــاحصلتك...قلت:حســبي الله ونــعم الوكــــيل فيــــك..حسبي الله ونعم الوكيل
خــــــاف ووقف عشان يصلي..واخذ الاولا د معاه..
يوم رجع...بكل برود اعصاب يقول:شرايك نروح كوفي..انا رجعت ابكي...وقعد يبرر..ويتفلسف..وان اللي سواه صح..مـــارديت عليه
من نزلت من السياره...الى الان وانا ســــافهته..لا اكلمه ولا اجلس معاه ولا غدا ولا شئ

بنــــــات بلييييز حطوا مكانكم مكاني..شلون بتصرفون
والله انو كان بيني وبين الجنون شعره...حسبي الله عليه
لاتقولون ناقشيه..لانه دائما صح ولايعترف بالغلط

 

[متى تشرق شمسك]

حسبك الله وكفى,,,,,,,,,,,,,,,,,
لو بنته ماتركهاااااااااااا لكن انتي بنت النااااااااااس

 

[@ and @]

حسبي الله ونعم الوكيل
معليش أنا لو مكانك اروح الكوفي واناقشه أني خفت واني كنت رح اطلب اهلي ياخذوني وانك خفتي عليه وعلى الاولاد

 

[اماني امين]

انا سواها فيني زوجي قبل كذا مزاح على اساس
بس لما لقيته اخيرا جلست اضحك واخذتها اني مزحه رغم اني قبلها كنت ميته غيظ
استهدي بالله وصلي على النبي,الموضوع مو مستاهل اهم شي انو رجع ياخذك

 

[بطلتي هيبه]

اكيد الموقف صعب واذا كنتي حاسه انه قاصد شي مو زين من ورى الحركه هذي
تصرفي معه بجديه وحزم شويه
واذا الموقف هذا هو الوحيد وانه دايم معك ادمي واخلاق يعني مريت معه بمواقف زينه كثير
واكيد في موقف بحياتك يشفع له
سامحيه واعتبريه مقلب وانه سوى كذا لانه ماتحمل تكونين بعيده عنه
الله يوفقك يالغلا

 

[اوفر]

استغفر الله العظيم
وينج يابنت دانة الخليج
شرايج بهالاشكال
استغرب اللي اتقول روي الكافي وناقشيه المرة نشف دمها ....انا نشف دمي وانرعبت وانا مجرد اقرا شلون هي مسكينه والا اللي تقول ضحكي حبيبتي موقفج غير عنها
هذا قاصد مو يمزح
لو اني منج خبرت اخواني يتفاهمون وياه ومااااعديها ابداااا
الله يكون بعونك

 

[احتويني بحنانك]

يالله يررررررفع الضغط صدق تافه في احديخلي زوجته وراه ويروح والله قهر
ماادري ايش اقولك نفسي مااشحنك زياده عليه بس انتي قلتي لوو انتم مكاني ايش تسووا
طبعاانالو منك مااركب معه لماجاءادق على اي احد ويجي ياخذني واسويهازعله يعني مالقاكي يروح ويخليكي ؟<<عذر اقبح من ذنب
الله يعينك
استغفرالله واتوب اليه​

 

[نبراس الدعوة]

قسم باالله لو مكانك لصير مجنونه

 

[النفوس الحائره]

بصراحه هذا شي ماينسكت عليه وشلون يترك ويروح وخير ان شاالله واذا بعدت شوي وعيالك معك يعني ماانت لحالك يدعي الغيره حضرته لوكان صادق ماسوى هالشي بنات الناس ماهي لعبه

 

[ام عبادي123]

الله يغينج ما أدر ي هذا من صجه صج تافه والله صرنا بزمن قلة فيه الرجوله الحمد لله الذي عافانا لا تسكتين اليوم خلاج بسوق باجر العلم عند الله وين أعرف وحده زوجها وداها المقبره يعني بعاقبها وطلع مو صاحي وتطلقة منه ديري بالج على نفسج هذا مو طبيعي

 

[ام بندر 1]

بصراحه موقفه سخيف جدا لوانا منك رايحه لاهلك او اختك ولاتعلمينه خليه يدور لين ينجن ويتوب بعدها

 

[الشتاء الدافئ]

حسبي الله ونعم الوكيل كيف يتصرف بهالطريقه الحقيره مافكر بنفسية اطفاله على الاقل اللي سواه مايبي له تطنيش وسفه يبي له تأديب وتقريع وقدام العيال عشان يعرفون انه اخطأ ..خليه يعتذر لك قدامهم ويبوس راسك وبينكم لاترضين عليه الا برضاوه قيمه وقولي هالمره باعديها لكن اي تصرف اهوج غبي في حقي مايردني الا ابوي واخواني ولو يدرون عن تصرفك قطعوك ..فار دمي منه باسم الله عليك ياعمري اقري على نفسك بعد هالروعه

 

[ღ اُمـ رامي ღ]

زوجي عنده نفس السوالف الله يعينا
الي سويتيه عين العقل طنشيه و خليكي زعلانه و اصري على موقفك​

 

[الزوجه الاولى]

الله يعينج عليه

 

[حيااة]

الله يوفق كل وحده ردت علي
كان بودي لو اتصرف معه تصرف ثـــاني...ولكني
اشوف نـــفسي اعقل واثـــقل منه...
وانا افكر شسوي معاه...تذكرت انو مسوي قبل شهرين نفس الحركه ب(أبنته)..كنت رايحه المستوصف ف رحنا لمدرستها عشان ناخذها يمكن الساعه11كذا...ولاطلعتها المعلمه رفضت..فعصب طال عمره...ومشـــى بالسيـــارة بســـرررررررررعه..وهو يحلف انو مايخذها اليوم وخليها تنطق في المدرسه....
طـــيب بنتي شدخلها ف السالفه..واذا انت ماجبتها مين يجيبها...

........تصدقون وربي اني تعبت بس من تذكرت الموقف...
الله يصبرني عليه...ويجعل كيده في نحره

 

[فضفضه]

الله يعينك ماأقدر افتيك زوجك انتي أدرى بطبعه اذا كان مازح او صادق
هو طبعا أكيد يشوف هالتصرف صحيح 100% للتأديب يمكن متأثر من شخص معين او كان يحصل له نفس الموقف وهو طفل !

الله أعلم.
الله يهدي سرك ويريح بالك ويسخره لك
وادعي له بالهدايه هذي ساعة استجابه..

 

[نقآآآء]

حسبي الله ونعم الوكيل
انا اتكلم عن نفسي لو صار لي هذا الموقف والله ما اعديها له بسهوله
الله يعينك حبيبتي

 

[mooon]

يابروده اعصاب اللي قالت كان رحتي الكوفي
ذاك الوقت بالله ينفع معها الكوفي ولا شي
البنت نشف الدم منه وانتي تقولين كوفي
والله لو يسويها فيني اخليه ينزلني عند اهلي
خييير والله اهلج مقطوج عشان يقطج هو
والله انه قاهرني والله زين ماطار عقلج بذاك الوقت
وكلام الشتاءالدافئ عين العقل
والله يعينج عليه اوووووف احس
انه قاااااااهرني

 

[rihana]

لاتكلميه الين يتادب ويعرف غلطه ولو اتعابط هدديه انك تشتكيه لابوكي او اي احد يقربلك

 

[دلوعةزوجي]

الله لا يبلانا