يابنت الحلال اللي مثل كذا ينعاف اصلا..
وش تبين به تركضين وراه مع احترامي الشديد..
شوفي هو يشوف كذا ركضك وقهرك بيزيد ويتغلى..
ترا ماينفع معهم ذا الرجال
واذا جتس الامراض وانهديتي.. والله محد نافعتس..
الله يخليتس لعيالتس ويلبستس الصحه والعافيه..
تراي ماقلت اتركيه وروحي اهلتس ماحب ذا الحلول..
انا اقول بس حطيه على جنب..واسفهيه مثل ماسفهتس...
واعيدي اكتشاف روحتس من جديد.. وش تحبين.. وش ماتحبين..
اطلعي لخواتس.. صديقاتس..لهي نفستس بعيالتس والانترنت اكبر نعمه بالصراحه
باختصار لاتخلينه محور اهتمامتس يابنت الحلال..
تراهم مالهم خاتمه كلهم..
واكثري من دعاء يونس في كبد الحوت (لا اله الا انت سبحانك اني كنت من الظالمين)
واكثري من الاستغفار.. والصلاة..
والله لايجعلهم اكبر همنا يارب العالمين..
الصراحه ماحزنت انه مسافر ومتزوج قد ماحزنت على حالتس ..ليش كذا مسويه بروحستس والله مايستاهلون ابد..
رايح مبسوط.. ولاطق خبر..
وانتي هنا تصايحين وتذبلين وتعجزين قبل وقتس..
بقريح يختي معليش.. لايهمتس ابد..
ولا اشوفتس اذا رجع ماكانه صار شي..
وتصايحين تعاتبين ودموع.. همين بكلمتين ولا كانه صار شي..
لا يختي هو ماسوا اللي سواه الا انه عارف ان ذي ردة فعلتس
ياليت تكونين اقوى شوي..
والله يربط على قلبتس ان شاء الله ويقويتس
موب علشانه لا والله حايمتن كبدي منه..
الا علشانتس انتي وعيالتس..
وطمنينا..
