ولكل احتياج ثمن فانتبه

[راجيه الرضا]

من الكلمات الخادعة جدا، واللي بنستخدمها كتير -بدون وعي- كمبرر لأخطائنا وعاداتنا السلبية، كلمة "احتياج" ...

- بتشوف إباحية ليه؟
= لأن عندي غريزه و احتياج، وأنا مش متجوز.

- خنتي جوزك ليه؟
= لأن العاطفة احتياج، وجوزي مش بيلبيهالي.

- اشتريت عربية غالية بقروض وديون ليه؟
= لأن العربية بقت احتياج، وتعبت من المواصلات.

والمشكلة في استخدام كلمة "احتياج"، إنها بتصورلك إن الحاجة اللي انت عايزها دي شيء مطلق، يجب تلبيته مهما كان الثمن ... والحقيقة إن مفيش حاجة اسمها "احتياج مطلق" ... وإنما العملية كلها عملية توازنات ... حتى في الأكل والشرب!

انت عشان تاكل وتشرب، بتدفع عادة ثمن تقدر عليه، زي إنك تنزل تشتغل وتجيب فلوس ... لكن لو كان الأكل والشرب دول، ثمنهم هما حريتك أو كرامتك أو حياة أسرتك وأولادك ... هل هتدفع الثمن ده بدون تفكير بحجة إن الأكل والشرب احتياج؟

فهي دي الفكرة ... إنك لما بتطلق على حاجة انت عايزها لفظ "احتياج" ... فاللفظ ده، بيخليك تشوف نصف الصورة فقط ... بيخليك تشوف الثمن اللي انت هتدفعه لو ما لبيتش الاحتياج ده ... لكن بيعميك عن بقية الصورة ...

- فلو الغريزه والإباحية احتياج ... فكذلك اتساقك مع نفسك، واستقرار علاقتك بربك، ودخولك الجنة، احتياج!
- ولو العاطفة والخيانة الزوجية احتياج ... فكذلك حفظ الأمانة واحترامك لنفسك ومحافظتك على بيتك وأولادك، احتياج!
- ولو العربية الغالية احتياج ... فكذلك استقرارك المالي وبالك الرايق بدون ديون، احتياج!

فالشاهد ... إن مفيش احتياج انت هتحاول تلبيه ... إلا وهيبقى على حساب احتياج تاني برضه مهم بالنسبالك ... فقبل ما تعمل حاجة من باب إنها احتياج ... فكر الأول، ايه الاحتياجات التانية اللي هتدفعها كثمن لتلبية احتياجك ده ...

وصلت؟

#وبس_كده
#التفوق_النفسي


منقول بتصرف ...مصطفي حسان