وقد يكون فرض عليك الحج وأنت لا تدري

[راجيه الرضا]

خلي بالك انت ممكن يكون اتفرض عليك الحج فرضًا عينيا كذا مرة في حياتك وانت مش واخد بالك !!
مشكلة الناس مع الفروض المُوسعة - زي الحج - إنه بيبقى فاكرها هاتيجي لوحدها في آخر العمر على التراخي كدة !! رغم إن النبي صلى الله عليه وسلم قال في حديث أركان الإسلام : وحج البيت لمن استطاع إليه سبيلا !! يعني مجرد ما تتوفر الاستطاعة = اتفرض عليك الحج !!
شوف كام مرة بقا على مدار السنوات اللي فاتت اتوفر لك المال والوقت والظروف كانت تسمح ؟؟ لكن انت عشان مش حاطط الموضوع في بالك ولا في أولوياتك ضيعت الفرصة !!
وممكن تلاقي الفلوس راحت في سفرية ولا فسحة ولا تجديد عربية ولا أي حاجة تانية خارج احتياجاتك الأساسية !! ده غير بقا الناس اللي محوشين الفلوس وشايلينها على جمب ، ويقوللك : أهو نشيلها للزمن !! زمن مين ياعم !! فيه "ركن" من أركان الإسلام مفروض عليك دلوقتي !!
ياريت الناس اللي مش واخدة بالها تنتبه للموضوع ده ، وتلحق نفسها قبل ما التضييقات تزيد على الحج سنة بعد سنة في ظل الظروف العجيبة اللي بنشوفها دي !
انوي الحج ، ووالله لو صدقت هتلاقي الظروف اتيسرت لوحدها ، الكلام ده عن تجربة ناس كتير جدا جدا .. وزي ما واحد من الأفاضل قال لي مرة : تروح الحج تلاقي أغلب الناس اللي هناك هم الفقراء مش الأغنياء ! الموضوع في النية والله !!
اللهم ارزقنا حج بيتك الكريم يارب العالمين ?