وضاقت علي الأرض بمارحبت ساعدوني وأحتسبوا الأجر لوجه الله تعالى...

أختي الله الله في نفسك،أناماأقولك افسخي أو إستمري مارح يعطكي أحد عمر ثاني.الصحةوالكرامة أغلي الغوالي.الله يفرج همك.
 
عزيزتي دموع مستغفرة انصحك بالتروي والتريث إنتي ممكن لسى ماتعافيت من تجربتك السابقة لذلك متخوفة من خوض تجربة جديدة مع شخص حسسك إنو نواياه غير ماكان عم يحكي ببداية ارتباطكم...وممكن إنتي عم تعملي عليه اسقاطات من زواجك السابق لذلك عم تحكمي عليه بأنه مستغل وضعك ...لذلك خذي فرصتك أكثر حتى تتمالكي نفسك أكثر وتخرجي من التجربة السابقة معافاة وقوية وقادرة على اتخاذ قرار لايظلمك ولايظلم خطيبك...واذا أنا بمكانك اذا لم يكن الزواج الثاني أفضل واكثر انصافا لي من زواجي السابق ومن وضعي الراهن ببيت أهلي لااااااااااااااا ارتبط ...لاتظلمي نفسك اذا شعرتي ولو للحظة أن مخاوفك في مكانها ...الله يخترلك الخير وينور بصيرتك للاختيار الصحيح.
 
متفائلة زمانها قال:
أول شي الخيرة عند الله
لكن بمنظورنا البشري أقول أنا ما عجبني دا الرجال
لعدة أمور:
1_ انه وافق في البداية ثم تراجع .... ما سبب التراجع ياترى ؟ هل كانت فكرة موافقته في البداية فقط لتتم الزواجة ثم يحاول الضغط عليك؟
أو أنه كان فعلا موافق ثم حصلت له ضغوط أجبرته على التراجع؟

2- الحلف بالطلاق شي سيء جدا , خاصة لو كان في فترة الملكة ( تو الناس لسه ما تزوجنا) ,وكمان على شيء تافه .
3- انه يزعل بشدة لما ما تردين , بصراحة كل انسان له مشاغله موكل وقت يقدر يستقبل مكالمات حتى لو زوجي إلا لو شي ضروري معليش بس لو شي عادي أو شي ممكن يتأجل ليش الدربكة والرجة والواحد مشغول ولا نايم .....( حسيت أنه أناني , لو هو مشغول أو نايم ما يبغ يكلم أحد)
4- الوعد اللي وعده انه يسويلك بيت مستقل بعد 3 سنين أنا ما أصدقه إلا لو كان قدام أهلك وأخوانك ( وبرضو ينخاف منه لأنه ممكن يماطل وتصير)
5- وجود أي شخص مع الزوجين في نفس المسكن شي مزعج جدا.

وأنت الآن مازلتي على البر ويبدو أنك لم تتعلقي به بشكل شديد , وما زال الخطاب يترددون عليك فلا تستعجلي

وبصراحة هذي الأمور ما ظهرت إلا بعد الملكة ولو أنك عرفتي من البداية أكيد ما كان قبلتي
ففكري من جديد بارك الله فيك ووفقك لكل خير حبيبتي
أنقر للتوسيع...
انا معاها في النقاط اللي ذكرتهم
هو اتمسكن لين مااتمكن
وبعدها بداء يلعب بالورقه الرابحه ( اقصد اللي هو مفكرها رابحه)
وبداء يستخدم معاكي طلاق ما طلاق على اساس بيمسك من يدك اللي توجعك
وهياثر عليكي وهترضخي لمطالبه
كان المفروض من اول مره قال لك يا نفصل يا تبطلي من البيت
تقولي له
اوك ننفصل انا وانت ما اتفقنا على كده من البدايه
وفيك توصل الكلام هذا لي اهلي لانه ما عاد في بيننا كلام
كان احترم نفسه وراجع حساباته وكنتي هتبيني له انه الطلاق ما يخوفك
حتى لو كان للمره الالف​

~أغلى الغاليات~ قال:
اختي الله يوفقج ويسخر لج زوجج..اسمحيلي اقولج اللي حسيته من كلامج واللي قريته من بين السطور..زوجج تزوجج لغرض في نفسه وهذا واضح والاغلب انج موظفه ..استخدام الطلاق كضغط عليج عشان توافقين على كل اللي يبيه وهذا شي لازم توقفينه لانه بيتدمادا فيه اذا سكتي وقمتي تسوين كل اللي يبيغيه ..حبيبتي موضوع البيت انتو تفاهمتو عليه من قبل بيني له انج اذا بتتنازلين مو عشان ضغطه عليج بالطلاق بس لانج مقدره ظروفه وقولي له يوقف عن اسطوانته المشروخه اللي هي بطلقج على اي شي بيرز هالكلمه ..حبيبتي الطلاق تجربه من تجارب الحياه وانا اللي اعرفه ان الضربه اللي ما تكيرك تقويك ..لا تخلينه يحس انج خايفه من الطلاق..واذا هو بيطلق على كل شي خل يطلق الحين قبل لا تجيبين طفل يربطج فيه ..فكري عدل لا تندمين بعدين وخلج حازمه وواضحه ..والله يوفقج
أنقر للتوسيع...

زي ما قالت الاخت وقفيه عند حده لو جاب لك سيرة الطلاق تاني
ولا تستهيني بالموضوع​
 
حبيبتي كلامك كله يدل على انكي مو مرتاحة....
وانا معك من خلال كلامك عنه يدل على انه يستغل نقطة كونك مطلقة... بعدين ماله حق بأن يحلف بالطلاق من أولها......
وانتي متخوفة من فكرة أن تعيشي مع بيت حماكي وبصراحة معكي حق .....
لايوجد احلى من الاستقلالية في الحياة وبلا وجع رأس
حبيتي نصيحة من أخت لاختها استخيري ولا تقدمي على خطوة وانتي خايفة منها.... انتي مستقلة مادياً وهذه نقطة لصالحك ..ادرسي الموضوع من كل الجوانب..خلكي واثقة من نفسك مو لكونك مطلقة تتنازلي ...... عن حقوقك....لااااا اتمنى لكي الخيرة والتوفيق
موفقة
 
دموع حبيبتي انتي ملكة جمال واخلاااق وجامعيه ومثقفه

صدق متضاااايقه عشان خاطرك وبكيييت بس خيره لك

وربي مايسوون اثرك مع الارض


الله يعوضك باللي احسن منه يااااااااارب
​
 
حبيبتي استخيري وشوفي وش يطلع معك
انتم اسالوا عنه زين وعن شغله
اما عن معاملته هذي كل وشخصيته تقدر الزوجه تغيرة نوعا ما
لكن بالنسبه للسكن مع الاهل ليش مافيها شي انا بصراحه ارحم الام تربي وتشقى وتبغى ولدهل جمبها وبالاخير يطلع وينسها ..
وفيه بنات ماتزوجوا سكنوا مع اهل زوجها مو معناتو انو انتي مطلقه ووحب يضغط عليك بهالشي لابالعكس اعتبريه نصيبك من عند ربك وربي عوضك بالشي الاحسن خليك متفائله ..
وكثري الاستغفار وتوكلي على الله اذا هو ملتزم ويخااف الله السكن مع الاهل ابدا مو مشكله
 
السلام عليكم
لله ييسر لك اللي فيه الخير
انا من خلال تجربتي مريت ببعض مامريت به بس الفرق انه كانت على عيوني غشاوة وما عندي خبرة في الزواج مع اني تزوجت في السابعة والعشرين (شخصيتي قوية عند اهلي وجيراني وفي عملي محبوبة مجدة ومخلصة ولااقف الا مع الحق ولا اخاف )
خطبني زوجي المتزوج باقتناع منه وبمساعدة اخته ووافقت مع اننا لانعرفهم كثيرا
ورضيت به من دينه واخلاقه وهم ناس ملتزمين
وبعد انتشار خبر الخطوبة وموافقته على كل شيء وتحديد الملكة قال ان السكن واحد الى ان يفرجها الله اعترضت وبعدها بفترة وافقت وعقدنا وشرط لي ابي سكن مستقل في حال الضرر
وبدا مشوار التنازلات والله يخلي اخته ورفضت اشياء كثيرة ومن ضمنها انه غير قادر على احضار غرفة نوم ولكني اعترضت ووقف معي ابي واحضرها وتم الزواج
كل مااذكره اني من عشر سنوات والى الان لم اجتمع مع زوجي تحت سقف واحد وفي بيت يخصني الا يوم الدخلة وبعده يومين
عشت مع شريكتي وثلاث من اخواته وشابين(وطبعا لم اكن
(اعلم)
حملت بسرعة وخرجت من عملي وتضررت كثيرا وصبرت لاني استحالة ارجع لبيت اهلي وانا عروس وفي بطني جنين
بس اللي كان مبرد علي تعامله واحترامه لي وصبرت لعل الايام القادمة احلى
ثلاث سنوات من العذاب خرجت وكاني هيكل عظمي وفقدت شخصيتي وهيبتي
وعدت لاهلي وهو من احضرني واعلم اني على حق وهو كذلك
وجاء يسكن معي عند اهلي وعشت والى الان عندهم على امل ان يفتح لي بيت
وزوجته مازالت في بيتها واخواته واخوانه تزوجوا

طبعا تحسنت صحتي ورزقت بولد واستعدت شخصيتي وثقتي بنفسي وخاصة بعد الولد
مازال الجميع يحترمني ماعدا اخته التي عاونته اصبحت عدوة لي ولابنتي التي سمتها بنفسها وحسب طلبها
كل ما فكرت في ما حصل لي وجدت ان زواجي من اساسه كان له غرض مخفي وهو التحدي الذي بينه وبين زوجته بان يتزوج عليها وان يحضر زوجته الى بيتها وطبعا ماعرفت الا متاخرة جدا جدا
والحمد لله اني استخرت الله وهو ايضا ولولا نيتي السليمة ولولا ان قذف الله بمحبتي في قلبه لكان الحال غير
ولولا دعائي ان يبرد الله على قلبي من شدة غيرة زوجته لكان حالي حال
وقع علي اشد انواع الظلم والاتهامات
كانت قوتي من الله ومن بعده زوجي الصامت خارج الغرفة المبرد على قلبي داخلها
صحيح الى الان ضايعة بدون بيت وصحيح ان هناك من يشخعه على الزواج علي
لكن املي في الله كبير ان ياخذ حقي وامام عيني


ذكرت لك قصتي حتى تضعي نفسك في مكاني صحيح انت لست زوجة ثانية لكن حكاية انه بعد الملكة غير كلامه مريبة قليلا
وحكاية المعيشة عند اهله توقعي كل شيء واستخيري الله
توقعي ان تكون السيطرة لامه او اخته حتى لو كانت اصغر منه
توقعي ان لايسامحك احد في تقصيرك في بيتك
توقعي ان تسمعي كلام جارح

هذه توقعات
ومثل ما قالت لك احدى الاخوات احضري ورقة وقلم واكتبي الايجابيات والسلبيات لهذا الزواج
واتمنى ان تكون موافقتك على الزواج ليست بسبب ان يسمع اهل طليقك انك خطبت لشاب
سامحيني ان كان كلامي جاف
شعرت بغصة وانا اقرا انك امراة عاملة وانك طيبة وانك اعجبت به كونه متمسك باهله
لااريد من احد ان يمر بما حدث لي
لولا ان البيت والا لاطلقت دموعي
اسأل الله انيكون حظك احسن من حظي
 
غاليتي الجائي لرب العالمين وادعي ربي يختار لك ماهو خير لك ولبناتك
اما انه كلمه الطلاق تكون على لسانه في اتفه الامور ضعي لها حد من البدايه فلا تسمحي لهده الكلمه ان ينطقها ادا كان بجد يريدك ووضحي له انها لاتنطق في اي وقت والا كل منا في طريق والقرار راجع لك
الله يساعدك على اتخادة
 
استخيري ثم استخيري ووكلي امرك لله فهو القادر سبحانه على ذلك
 
انا من رأيي انها جاتك فرصة من السما وحظ ربي عوضك سنين صبرك ولا تخافي توكلي على الله وعيشي وانبسطي وانسي انك تزوجتي قبله حتى هو قولي له لا تذكرني بليز اني تزوجت قبلك ابدا ..
واذا على كلمته علي الطلاق ترا كثيررر شباب في بداية زواجهم كذه يكونو مو مهتمين بس بعدين بيتغيروا..
وبالنسبة للسكن مع اهله مافي شي بكره بيتعلق فيكي وباسلوبك تغيريه وتخليه يحبك ويعطيك رغبتك..
ولا تسمعي كلام البنات الي ما جربو ولا عندهم خبرة بيقولولك كنسليه..؟؟انتبهي الفرصة تجي مررره وحده بس...
تزوجي ترا انا تزوجت مرتين ..والثاني انشاء الله يكون ربي عوضني فيه صبري...
 
حلو انه يتحمل مسؤولية أهله لكن اللي مو حلو ولا من شيم الرجال الغش اقول اي بسوي لها بيت وبعدين اقول مااقدر انا مسؤول عنهم ليش ماكان صريح من البدايه وموقفه واحد وبعدين لما يحب يتراجع عن كلامه قدام رجال مثله هو جا خطبك واتفاهم على شروطك مع رجال مثله مو لما وصل للي يبيه وعقد عليك جا يتفلسف وفوقها يحلف بالطلاق على مكالمات وكلام فاضي كل شي بين الزوجين بالتفاهم انا بصراحه ماارتحت له يمكن هو قال بنفسه مطلقه وماصدقت تلقى واحد يشيلها هي وبناتها بترضخ لكل شروطي وماتبي تكرر الطلاق مره ثانيه فاستغل هالشي والله اعلم بالنيات بس انا بصراحه ماارتحت لتصرفاته وكلامه استخيري الله وادعي ولا تستعجلين وربي يكتب لك اللي فيه الخير
 
شوفي ياغاليه :
بالنسبه للزواج استخيري والخيره فيما اختاره الله .....أما فيما يخص السكن مع أهله بقول لك شي والله ان ام زوجي ملتزمه كثييييييييييير رغم اني مو معاها بنفس البيت بس شقتي مقابل شقتها ومع ذلك كم مره تجرح وتلطش بالكلام وتستكثر متى جاب زوجي أغراض للبيت وتراقبنا على الروحه والجيه بشكل مستفز .... فأنتي احزمي قرارك إما تسكنين معهم وأنتي متوقعه الأسوأ وتتحملين ولا تنتظرين يمكن الله يرزقك بأحسن منه .... وباين الرجال فيه رعونه شوي وعسى الله يوفقك يارب .
 
حبيبتي اسمعيني هو ماقال لها سكن مستقل مقابل انكم تخفضون من المهر انتي فهميه هذا الشي وبعدين ياحبيبتي لاتقولين اخاف يطير مني صدقيني احس الزواجه هذي تخوف كيف شاب واههله بيزوجونه متزوجه من قبل ورب البيت ان يقعدون يعايرونك بكلام كبير وجارح وما ابي اعطيك امثله عن كلامهم المهم فكري بعقل انتي عشتي طول عمرك اهانات ونكد وانتي ادرى كيف عشتي مو تصومين تصومين وتفطرين على بصل بعدين قوليله خلني في بيت لحالي بيمديني على امك اذا تزوجو خواتك بس انك تخدمينهم وفي رجال بالبيت خواتهم يخدمونهم
شوفي هو اخذك عشان هذي الاسباب وقولي ما قلت لك
1-موظفه
2-مطلقه ولو اشرط عليها ما اشرط بتوافق
3- اعمر واستق طبعا كله من راتبك وبعدها بياخذ ثانيه من عمره
4-طبعا غير انك تصرفين عليه تخدمين اهله
5-عنده مرض نفسي او داشر واهله يبونه يعقل بس على حسابك
وانتي ادرى بالباقي انتي حطي قائمه بسياته وحسناته وشوفي وش يغلب ودااااااااااااايم صلي صلاة الاستخاره لين يخير ربي ولا تتنازلين عن بيتك ابد ابد وخلي اهلك يتفاهمون معه لانه اخل بشرط من شروط زواجك وزيدي شرط ما يلمس من راتبك شي خلاتص يابنت صحصحي لنفسك وابدي ابني مستقبلك ومستقل بناتك وقولي خلاااااااااااااص للاهانات والظلم وهظم حقي
بناتك بناتك ابني مستقبلهم لاتبنين مستقبل ولد الناس
ولو ما هو قد المسؤليه ماتزوج واخوانه يساعدونه الله لايهينهم


واعذريني ياقلبي كلامي مو مرتب بس انقهرت عليك والله ثم والله اني احس ان السالفه هذي صارت لوحد من خواتي عشان كذا تفاعلت بس لاتضيعين حقك واسمع ردك قريب انشالله
 
قسم بالله يالغاليات انكن ريحتن قلبي مره..
وربي شعرت ان لي خواااااااااااااااااااااااااااات هنااا
بارك الله فيكن وسدد خطاكن..
كل كلامكم حلو مره ومنطقي ...
باذن الله بستخير وارد لكم خبر ياغاليات...
 
شوفي ياقلبي استخيري وانا اقول عادي تسكني مع اهله اذا كان غرفتك بروحك لين ربي يفرجه استخيري وسوي الي ترتاحيله
وربي يوفقك ​
 
استخيري ربك .................. وعليك الدعاء بالثلث الاخير من الليل
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل