"Rain Drops"
New member
- إنضم
- 2009/04/05
- المشاركات
- 10
السلام عليكم
بنات انا عندي مشكله كبيره .. انا وايد اتضارب ويا امي .. من فتره صار هالشي يوميا و اكثر من مره في اليوم .. انا مشكلتي مب مثل باقي البنات اللي عندهم مشاكل ويا امهاتهم تكون الام متسلطه و تفرض رايها عليهم .. انا العكس .. انا المتسلطه وامي ابرد منها ماشي .. بتقولون وين المشكله برودها يضايقني او يمكن هو ما يضايق انا اللي ابالغ و فيني مشكله ماعرف انتو احكمو .. مثلن ما تهتم لأكلنا يعني نحن يوميا عشانا من برع امي طبعن ما تاكل ما برع تتعشى نفس الغدا تصخنه و تتعشاه ويوم نبا نطلب لها ما اطيع تقول انتو اطلبو وادريبكم ما بتاكلونه كله انا باكل وياكم انا ما احب جي احسها مول مهمله عمرها ومخليه نفسها عالهامش واذا طلبنالها تقول اشحقه تخسرون و تطلبون انا يوم اسويلكم ما تاكلون ..انزين ما نحب ناكل الغدا نفسه .. مثلن تمرض عادي طاف ما تسير المستشفى و لا تهتم وعادي اتم في البيت شهووور و لا تشبر برع البيت و لا اطلعنا و لا هي تطلع واي شي نباه تقول سيرو خذولكم ماتي ويانا .. امي تراها مب عوده امي في اواخر الثلاثينات 37 ومعرسه وهي صغيرة وايد وانا البجر وابوي متوفي .. هي قبل لا يتوفى ابويه كانت انسانه ثانيه وكان في بيتنا نظام وكل شي مرتب . الغدا والعشا والريوق في وقت محدد و محد يتاخر برع البيت وايد و و و و .... والحين غيييييييييير كل شي عكس قبل حتى يت فتره حتى غدا ما تسويلنا و اذا سوته تحطه و ما تشله لين ثاني يوم الغدا يعني الغدا يتم في الصاله طووول اليوم .. ابويه توفا من 4 سنوات وهالشي وايد أثر علينا .. هذا قضاء و قدر وهالشي بعد خلانا نكون اقوى و علمنا وايد اشيا.. احس كل المسؤوليه على راسي انا اداوم و ادرس وانا اسوق وامي بعد عندها ليسن بس الحين موووول ما تسوق لانها ما تطلع اصلن واذا بتطلع تقول وصلوني والا بروح مشي .. وانا مستويه جبريت من الضغط على كل شي اعصب و يوم اقوللها سوي كذا و كذا و اعلمها تقول انتي الام و الا انا .. انتي تعرفين كل شي وانا ما اعرف شي؟ والا تضايق من كلامي وانا ما احب اضايقها ..
مثلن ابا اسير المول اخذلي شي اقوللها يلا بنسير المول تقول لا .. ليش؟ .. عقب تقول باجر بنسير و ايلس اقنعها و يوم تنتقع اسير ابدل و اطلع القاها وفي نفس المكان .. تقول عقب صلاة المغرب بنسير .. اقوولها اووكي . امي فيها الوسواس القهري يعني تتوظأ اكثر من مره تصلي اكثر من مره المهم عقب ما تخلص صلاه تطلع لها اشغال ثانيه وعالساعه 8 ونص والا 9 تيني تقولي بعدج تبين تسيرين والا خلاص .. وهي تكون تترياني اقول لا عسب ما تسير وانا اكون يالسه متلبسه و معصبه و جي يعني
وكل نقاشاتنا تنتهي بحرب .. لاني احسها مقصره وايلس اقوللها الاشيا اللي مقصره فيه و هي تبررلي و اخر شي تضايق وانا اضايق .. ما يهون علي كل مره اتم اضايقها .. انا سالفتي طويله بتعب لوبكتبها كلها .. انا للحين ماعرف وين المشكله ساعات احس انا السبب و ساعات احس امي اللي تخليني اصير جي .. بتريا ردودكم عسب اكتب التفاصيل
حتى كلامي ها احسه مخربط .. سامحوني
و بليز ماريد كلام يجرح .. انا ادري في مشكله و اريد حل واريد ارضي ربي و امي و نفسي
على فكره امي جنوبية شرقية وانا شماليه غربيه :shutup:
