والله إني أحبكم في الله...مملكتي..أستاذتي الغاليه ناعمه..أخوااتي ماذا أفعل؟

[غلا رووحي]

بسم الله الرحمن الرحيم​

"لا إله إلا أنت سبحانك إني كنت من الظالمين"​

أخواتي البلقيسيات أستاذتي ناعمتي...لقد أحببتكم من كل قلبي وحفظت أسمائكم وأعجبت بكم


ريمانوفا


بنت الطيب


بدار


مسك نادر


عاشقة الأسحار


والكثييير من البلقيسيات الرائعات A7LA​

دلتني على المنتدى إنسانه أعزها وأحترمها في العمل ودلتني ف البدايه علا قصة برود ومطر لقد أحببت برود ومطر وعالم بلقيس بأكمله​

أحب القراءه وأحب ان استفيد واتعلم ف كنت يوميا ادخل المنتدى لأرى مالجديد ولأروي شووقي إلى صديقاتي اللاتي أقرأ لهن وأعذروني لم أكن أرد لما أحس به من عدم الخبره في مجال الزواج والله أعلم إني كنت أدعي لهن داائما وخاصة ل عاشقة الأسحار لقد أبكتني كثيرا وتأثرت لحالها ودعوت ربي ان يفرج همها...​

واليوم أنا بحاجه لكن لكل ماللكلمه من معنى بحاجه لأرائكن ودعواتكن وأريد المشوره أرجوووكم لاتبخلو علي ف ليس لي أخوات بجانبي أخواتي الكبيرات متزوجات في السعوديه كل وحده في منطقه للأسف هذا النصيب ولاأحب أن أضايقهن بمشكلتي وأتصل بهن لأطمئن على أحوالهم مع إني بأمس الحاجه لهن​

لكني لم أنساكن أنتن أخوااتي وحبيباتي وكلي ثقه بأرائكن وبأستاذتي ومثلي الأعلى أحب أن أدعوها ناعمتي​

نعم لقد أحببتها وحلمت بها دائما وكنت أقول لها بالحلم أنا أحبك وأريد أن أكون مثلك ولكني لم أرى وجهها كانت منقبه في الحلم ولا أعلم هل هي في الحقيقه منقبه أم لا؟​

وسأعرف قريبا لأني سأراها في دولتي الحبيبه قطر وسألتقي بها وسأسمعها وأراها إنني فعلا متلهفه لرؤية هذه الأنسانه الرقيقه والجميله والراقيه والخلوقه والناااااعمه أنا متأكده إنها تمتلك كل هذه الصفات والله يشهد إنني أفكر أن أسمي أبنتي ناعمه وينادونني أم ناعمه وأتذكرها دائما بأسم أبنتي​

وأذكر إنني مره في العمل كنت أمتدح المنتدى والأستاذه ناعمه وكيف إنها تعلمنا أن نتعرف على الشخصيات وكيفية التعامل أقصد البوصله الشخصيه فردت واحده من الزميلات تعليقا على كلامي وقالت هذه ساحره !!! ف ثرت عليها ووصفتها بالغباء أسمحو لي وقلت لها ماالذي تقولين؟ هل أنتي متعلمه ألم تسمعي عن علم تفرس الوجوه؟ علم النفس؟ إنه علم وهي متفوقه فيه ونحن نستفيد منها وايضا هناك دورات إن أردتي التعلم ولكن لااااااا لاأسمح لك بأن تتهمي أستاذتي ف أعتذرت وقالت دليني على المنتدى وكيف أستفيد وأفدتها بما تريد وكلي ثقه إنها ستدمن المنتدى لما فيه من فائده وعبره.....جزا الله القائمين عليه حسن الجزاء وبارك لهم بأزواجهم وأهلهم​

من أنا بنت أم متزوجه؟ أين مشكلتي؟​

أنا بنت عمري حاليا 24 سنه جامعيه معلمه خلوقه جميله ولله الحمد من عايله لها سمعتها ومكانها وابوي رجل طيب وحنون ويعمل بمنصب مرموق والكل يعتمد عليه نظرا لرجاحة عقله ويعتبر تقريبا شيخ قبيلتنا.....وأنا شخصيا أفتخر ف أبوي وأحبه وأحب أخوااني وخواتي جدا جدا مع العلم إن أبوي رجل معدد وله عدد من الزوجات وأمي الزوجه الثانيه ولله الحمد صحيح إن الحياه ماتخلى من المشاكل لكن لم يحدث مايفرق بيننا ولله الحمد احب جميع أخواني وخواتي من أبوي وأتواصل دايما معاهم وهم بعد ونعتبر نفسنا دايما عيله وحده ومانخلي بعض وهذا كله طبعا بفضل الوالد الله يحفظه وامهاتنا الله لايحرمنا منهم​

وابوي من النوع اللي يخاف حيل عالبنت واهم شي عنده انها تتزوج وترضي زوجها وتستر على بيتها وزوجها وهذا طبع البدو وأحنا من البدو وكلي فخر بهالشي وأبوي شخص دارس ومتعلم لكن تظل العادات والتقاليد موجوده​

بدأت مشكلتي لما تخرجت من الثانويه بنسبه عاليه وانا جدا طموحه وكان طلبي اني اكمل جامعه وابوي مااعترض علا هالشي مع العلم ان فوقي اربع خوات كلهم زوجهم بعد الثانويه علا طول ونظرا لمكانة ابوي الكل يتمنى يناسبه "تنكح المرأه لأربع لحسبها ونسبها.....الخ"وأنا انخطبت بعد الثانويه علا طول لكن أنا كان عمري صغير كنت توني 16 سنه تخرجت بدري لأني كنت أدرس صيفي​

وافق ابوي إني اكمل جامعه نظرا لقوة طموحي وبنفس الوقت ماحب يخليني من غير زواج وللأسف وافق علا واحد قريبي من غير مايرجع لي بعذر اني صغيره ومااعرف اقرر وفعلا انا كنت ماافهم ومااقدر اقرر بس كنت رافضه بحجة الدراسه ولما عرف ابوي قال مايخالف تكمل دراسه وقريبي هذا مو من ديرتنا وووو​

وتمت الخطبه وصارت الملكه وانا جدا متضاايقه واصيح واقوول لامي ماابي يقولون صغيره ماتعرف مصلحتها وشرط ابوي إني اكمل دراسه ووافقو هم طبعا مو عشااني لان المعرس اساسا مو كفو زواج وهالشي حسيته من اول ماشفته في التلبيسه​

حاولت اتناسى اللي صار وأبدأ في دراستي وبما انه بديره وانا بديره ماكنت اتذكره وانشغلت بالجامعه وصديقاتي واذكر مره وحده سألتني ماانخطبتي لو وحده مكاني بتفرح انا بالعكس كنت احس بضيقه واكره السؤال هذا بالذات واجاوب اقول انا متملكه يتخرعون اللي حولي وليش ماتقولين مايبين اقولهم ليش؟ يقولون ماتجيبين طاري خطيبج قلت بقلبي أي خطيب ويسألوني متى العرس؟ أقول بعد الجامعه لأنه هو يدرس مع العلم انه حتى ثانويه ماخلص ودايما اسأل نفسي ليش ابوي وافق عليه مع العلم ازواج خواتي كلهم مناصب ثلاثه مهندسين وواحد دكتور


قلت يمكن انا عن العين ​

وقلت بنفسي يمكن وافق عليه لانه قريبه وفعلا هو قريب ابوي حيل المهم حاولت اكمل حياتي وانسى شي اسمه زواج وصرت عصبيه جداا في البيت ومااحب حد يناقشني ونفسيتي صارت زفت ومحد عارف السبب ​

السبب اني كرهت مستقبلي وفي العيد كنت جالسه في الصاله دق التليفون ورد ابوي الا الأخ(الخطيب) متصل يعايد علا امي وابوي وقاله ابوي خذ كلم خطيبتك وتخيلو ابووي عطاني السماعه مع العلم انه ابوي ماكان يخلي خواتي يكلمون فترة الملكه ومايحب هالسوالف ابد​

لا وقال لي خذي التليفون داخل وانا بطبعي جريئه وفضوليه وقلت بجرب ووكلمته وتوالت المكالمات كان للأسف العكس تماما لفارس أحلامي حاولت اتقبل وادور اشيا تعجبني بس للأسف كان إنسان هاااادي وصااامت وخجول وماافي طموح ابدا الحياه عنده ماشيه قاعد في البيت ياخذ من امه مصروف اليوم لأن ابوه متوفي الله يرحمه بس انا اللي اتكلم واسولف كنت احاول اتعرف عليه وهو صاااامت ولما اكلمه عن طموحه ومستقبله يقول ماادري طيب ناوي تكمل يقول اشوف طيب شلون بتتزوج يقول امي وخواتي واخواني مايقصرون!! شلون بنعيش يقول عاادي تخيلو وانا طموحي غييييييييير اصلا طموحي مو الزواج واذا بتزوج ابي رجل بكل ماللكلمه من معنى​

مرت الايام وانا دايما اقول له الدراسه لازم عالاقل الثانويه وسمع كلامي وسجل ودرس واذكر يوم النتيجه انا متلهفه واسأله يقوول نجحت واستانست وقلت بكافئه وقلت له احبك​

مع العلم اني كرهت الحب وتقبلت حياتي من غير حب بس ليش ماامثل عشان حياتي وامثل احساس الحب عشان يشد حيله اكثر..تقبلت حياتي عشان ابوي اولا وعشان اهلي وعشان كلام الناس​

بعد ماقال لي انه تخرج كلمتني اخته تسأل عني والا تقول فلان عنده دور ثااني انصدمت شنوو؟ شلون هو قال لي نجح قالت مادري والله وانحرجت سكرت ولما اتصل قام يعتذر ويقول خفت اقوول لج ليش انا اخووف​

انا ماانكر اني قدرت بذكائي وطيبتي اني املكه واخليه يمووت فيني وداايما هو يعترف لي بهالشي بس مااقدرت احبه​

وفي يوم كنت متضاايقه سألني شفيج قلت بقول له يمكن يفهمني قلت له تدري ابوي مااخذ رايي بهالزواج والملكه صارت وانا ماادري (وهذا اللي صار فعلا انا نفسي تفاجأت بالملكه حتى ماطلبو حضوري ولا فحوص ولاااشي)​

تخيلو​

قال صج؟ حتى انا كنت نايم واصلا امي كانت خاطبتج لاخوي فلان( وانا ادري بهالشي قبل) واخوي فلان رافض الزواج قامت امي جات عندي وسألتني اذا موافق وقلت لها زواج يلا اكيد موافق ولبست ورحت وشفتج وصارت الملكه​

انصدمت من كلامه حسيت اني رخيصه ومالي قيمه وانهم توهقو فيني ولزقوني بولدهم اللي ابد مو قد الزواج وللامانه انا كنت احبه مثل اخوي وعمري ماتخيلته زوج لي ابداااا​

كنت اسولف وياه اضحك معاه وانصحه لكن كأخ مو كزوج وهو اصلا هادي وخجول ونادر مايقول كلام حب وغزل ولما يتغزل دايركت اغير السالفه من غير مايحس والكلمه الوحيده اللي يقولها احبج​

وارد عليه احبك وفعلا احبه ومازلت لكن كأخ​

ومرت الايام والسنين ونفسي تعبت اكثر وصارت ترفض الزواج (العرس) اكثر واكثر ​

وبين فتره وفتره تقريبا كل سنه كنت اقول له خلينا ننفصل احنا مانناسب بعض يقول لااااا ليييش انا احبج وامووت فيج ومااقدر اخليج وانا قلبي طيب كاان يعور قلبي ويزعل مايكلمني عقب يرجع يكلمني بعد شهر يقول انسي السالفه ولاتعيدينها واسكت واكمل​

وبديت اقرب من ربي اكثرر واكثرر مع العلم اني من اول سنه وانا افكر بالانفصال واستخيير داايما واللي يخليني متردده ابوي واخواني ماابي اضايقهم ومااتوقع بيتقبلون قراري​

وطبعا هو من خلص ثانويه خليته يسجل بكليه بما اني ادرس ابيه يدرس وبس نخلص يصير العرس كنت احاول افكر بعقلي داايما وانسى الحب والخرابيط​

ومرت السنين وباقي لي عالتخرج كورس وعطوني المهر اجهز علا اساس في الصيف الزواج وكان صار لنا متملكين اربع سنوات ونص وماقدرت احبه للأسف بس كنت امني نفسي ان الحب بعد المعاشره ​

وسبحان الله بديت اجهز وقلبي يعورني واحس اني مااقدر اكمل واهلي حاسين فيني لاني بديت المح اني مااقدر اكمل وهم ساكتين والمفروض هو باقي له كورس ويتخرج لانه كليه وانا طبعا قلت للكل امي وابوي واخواني فلان يدرس في كلية كذا وماباقي له شي يتخرج​

وفي يوم كنت اكلم اخته وسألتها فلان أي تاريخ يتخرج بالضبط الأخت أستغربت السؤال قالت يتخرج من شنوووو؟


قلت من كليته وانا كلي ثقه قالت ليييش هو يدرس اصلااا؟؟؟؟؟؟؟؟؟؟؟؟؟؟؟؟


تعالو شوفو وجهي لحظتها مااقدرت استوعب الموقف قلت لها ليش هو مايدرس؟


قالت علا حد علمي هو مايدرس قااعد في البيت


قلت لها بلا هو مسجل في كلية كذا من تخرج من الثانوي يعني من ثلاث سنين وتخصص كذا؟؟؟؟؟؟


قالت ماادري شقول لج بس هو اخوي وانا مادري شنو قايل لج بس هو من تخرج قاعد في البيت ولايدرس ولاسجل بكليه ولاهم يحزنون


قلت لها وماتوظف قالت لااااا هو مايفكر بس الحين اتوقع بيتوظف عشان الزواج​

بكييييييييييييييييت بكل ماللكلمه من معنى واتخذت القراااااار


لا للزواج هذا ماراح يتم


ووصلت قراري للوالده وقلت لها اسمحو لي مااقدر اكمل ووصل الخبر لابوي واخوااني وخوااتي والكل حااول يقنعني وكنت ادري بداخلهم يبووني اظل علا موقفي وانفصل​

كلمته وواجهته بكذبته وقاال انا اسف ..................فقط لاغير وانا احبج قلت وانا اسفه مااقدر اكمل معاااك خلينا ننفصل وبكى عالتليفون ودعييييت له من كل قلبي ان الله يوفقه مع بنت حلال زينه وينساني​

وتخيلو​

راحو اهله ملكو له علا وحده وانا علا ذمته واذكر يومها جا ابوي يتعذر لي يقول لي لاتزعليين يابنيتي انتي اللي عفتيه مو هو اللي عافج ضحكت من كل قلبي قلت الله يوفقه وانا فرحااااااانه اني خلاص ماراح اكون له والكل كان مستغرب من ردة فعلي​

ياااااااااااه حسيت اني انولدت من جديد ولا فكرت بورقة الطلاق كونه ملك خلاااص مالي دخل كيفهم اليوم بكره بيطلق مو مستعجله​

وتوظفت والكل من حولي يحبني ويحترمني وصرت قريبه من ربي وداايما احمد ربي علا نعمه واخوااني وخوااتي كلهم من ابوي ومن امي وابوي متعلقين فيييني ويحبووني ونفسيتي صاارت حلوه وصرت هااديه​

وبعد مرور سنه ونص مالذي حصل؟ وهذا اللي انا محتاجتكم فيه


انفصلت بعد مرور 5 سنوات ونص ووصلتني الورقه ولله الحمد​

وأنا كنت منشغله بوظيفتي وفرحانه باستقلاليتي لكن اهلي متضايقين ويفكرون بمستقبلي وهل بتزوج؟ وامي تخيلو أي حد يخطبني تقول لي وافقي يابنيتي وخاصه بجماعتنا كثيييير بنات بسن الزواج ماتزوجو وفي كبار بعد بس انا اثق انه كل شي نصيب واللي لها نصيب بتاخذه خطبوني من السعوديه كثير ورفضت ماابي اتغرب وف نفسي كنت انتظر حد من ديرتنا ومن جماعتنا لان ابوي مايزوج بره جماعتنا واذكر خطبني واحد مو من الجماعه عن طريق العمل وخبرت اخوي وفاتح ابوي وللاسف ابوي عصب وطلب من اخوي مايفتح السالفه ابد وانه مستحييل يطلع بناته بره........​

مرت الايام محد من ديرتي خطبني مع اني كنت اتمنى اكون جنب امي واخواني وخواتي الصغار وخاصه ان امي من ديره ثانيه وماتختلط في الناس وانطوائيه ونظرا لان ابوي معدد ف مو كل يوم نشوفه وكنت انا دايما معاها ارجع من الدوام القاها تنتظرني ومجهزه القهوه والشاي والغدا لي نقعد مع بعض وقبل نادر مانطلع بعد ماتوظفت صرت دايما اطلع خواتي وامي والعب اخواني الصغار لان ابوي مو فاضي ولانه صار يعتمد علي ويثق فيني وانا بصراحه دايما احب اكون قد ثقة اخواني واهلي فيني واحب يعتمدون علي اني اخلص شغل خوااتي والبيت.......​

وسافرنا لديرة امي إجازه عند خوالي وهناك فاتحت خالتي امي انها تبيني حق ولدها وجات عندي وكلمتني وقلت لها خيير انا نفسي استغربت من ردة فعلي ليش مارفضت علا طول لانه مو بديرتي نفس اللي خطبوني قبل...​

رجعنا من الإجازه وحبيت اني اوكل امري لله وصرت استخير وكثرت من الدعاء ومن انفصلت كنت دايما ادعي ان الله يرزقني الزوج الصالح والذريه الصالحه​

ظليت 3 شهور استخيير وامي كالعاده موافقه بس تبيني اتزوج واستقر وكانت خايفه من رفض ابوي وانا بعد الاستخاره صرت مااعرف اقرر يوم اقول زين ويوم اقول لا واللي كان عاجبني ان خالتي هي بتكون ام زوجي وانا اعزها وهو محترم واخلاق وبيكون لي بيت مستقل وواتوظف براحتي وهذا كلامه واللي كان مضايقني انه مو مكمل دراسته نظرا لظروف ومامعاه الثانويه ودش الشرطه وانا كنت اتمنى اخذ واحد مو منصب بس عالأقل يكون معاه ثانويه..​

طموحي في الرجل دينه واخلاقه ورقيه في التعامل واسلوبه هذا اكثر ماكان يهمني ودراسته وابداااا ماكنت اهتم للشكل واعتبره شي ثانوي ومااهتم فيه​

أخوااني كان رايهم دامه شاريج وافقي الزواج مهم للمره واحنا خايفين تظلين جذي ومحد دايم لج وكنت اخاف من كلامهم وانا وحده اخاف من العنوسه واخاف من الوحده واحب الاطفال وداايما يكسرون خااطري البنات الكبار وماتزوجو ودايما ادعي الله يرزقهم ​

وابوي تخيلو واافق وقال خل يتفضلون (مع العلم انهم قبل اخطبو وحده من خوااتي ورفض)


المهم اخطبو رسمي وصارت الملكه وشرطت ابوي في العقد بيت مستقل والوظيفه ووافقو​

وتمت الملكه وماشافني وانا بعد ماطلبت اشوفه​

وانا الحين متملكه ويكلمني خطيبي دايما بس ماشفنا بعض للحين وللامانه عجبتني شخصيته الظاهريه لان عن طريق التليفون وانا بعد تجربتي الاولى مااثق بالتليفون المهم في تطابق بينا وفي تفاهم وفي احترام ويحبني حيييييل اما انا حبيته أي بس​

خاااايفه وساعات احس اني غلطت شلوون وافقت وشلون مافكرت بشهادته وانه مامعاه شهاده ثانويع عالاقل شلون رخصت نفسي وشلون اخلي امي واهلي وخوااتي واخوااني مااقدر ابعد عنهم ووشغلي حبيته مااقدر اخليه ​

وهو يداوم ودوامه متعب حيل ويقول انه قاعد يتحمل عشاني وفي الفتره الاخيره صارت له مشكله في الدوام وجاني خوف انهم يطلعونه ساعتها وين يروح لاشهاده ولاشي واخاف يكون حاط في باله يعتمد علي في المستقبل مع العلم انه صار يطلب مني اني اتصل فيه مكالمات دوليه لانه ماعنده رصيد وناقشته بهالشي ويقول عاادي انا مشتاق لج شسوي اتصلت مره مرتين بعدين قطعت وصار يقول لي اتصلي بمسج قلت له اسفه ماعندي رصيد وزعل​

انا عارفه من البدايه ان مستواي اعلى من مستواه المادي والاجتماعي والعلمي بس مو لهدرجه وهذا اللي مخوفني ​

توقعت انه وظيفته حلوه بس للاسف ومااحس فيه طموح انه يصبر ويترفع لااا للاسف وانصدمت بعد بصلاته يوم سألته يقول احيانا اصلي واحاول اداوم عليها وهذاا ضااااااااااايقني حييييل كنت اتمنى واحد ملتزم يمكن تلوموني علا ليش ماسألت من البدايه والله قلت حق ابوي اسأل عنه سفهوني قالو ماعليه اذا مايصلي تعلمينه؟؟؟؟؟؟؟؟؟؟؟ ​

باقي عالعرس كم شهر وانا متضاااايقه مالي نفس اجهز واحس اني غلطت لما وافقت وافكر انفصل وخايفه من كلام الناس وبعد ماابي اضايق اهلي واخوااني​

ونا احب امي حييييييييييل وافكر فيها اذا رحت من يقعد معاها من يسمعها من يطلعها امي تعتمد علي كثييير واحس اني ضحيت باهلي ووظيفتي عشان شي مايستاهل اعذروني علا هالكلمه ​

ماأعرف شسوي وهذا انا مواظبه عالأستغفاار يوميا وقراءة البقره والدعاء ومازلت أستخير وأمي خاايفه علي تقول يمكن عين؟؟؟؟؟؟​

وانا كل يوم اقعد عالمنتدى هي جنبي واقولها علا كل شي القصص اللي اقراها والعبر اللي فيه وهي وااجد حبتكم وهي اللي اقترحت علي اكتب لكم مشكلتي واسمع راايكم​

وانا بأنتظاركم حبيباتي لاتبخلون علي بالرد أرجوووكم فهمووني وين الغلط انا ماضايقت احد واحب كل الناس ونيتي صافيه واحب ربي واحب اهلي واحب الخير لكل الناس وووووو​

وأحبكم في الله​

 

[غلا رووحي]

أسفه نزلت الموضوع مرتين أرجو من المشرفات حذف المكرر
ولكم مني جزيل الشكر
وأبي راايكم أرجووكم لاتتأخرون علي

 

[فريدة من نوعي]

إله إلا الله صدق مافي أحلى من الأخوة في الله_عزيزتي نحنا نحبك في الله ونسأله يوفقك و يختارلك الخير ياحبيبتي.أنا يظهر لي والله أعلم إنك شمالية طموحةاسم الله عليكي وتفكيرك ماشاءالله حكيم..صراحةماعندي خبرة بس إلي أقدر أقوله لكي استمري في الدعاء والإستغفار..وإن حصل لك نصيب مع ولد خالتك فحاولي0تنزلين نفسك لمستواه ببمعنى إنو لاتحرجيه بعلمك ومستواكي المادي..وأتمنى الأستاذةموزة الله يحفظها تدخل وتدلي بدلوها__أما بالنسبةلخوفك من الغربة سبحان الله كل مشاعرك مريت بها تماما وتزوجت من رجل من غير بلد_الحمدلله أنا سعيدةومستقرة لكن طبيعي بين فترة وفترة أحن لأمي وأبوي حياتي السابقة_ ربنا يوفقك باين إنك طيبة وقلبك أبيض_سلامي للوالدةالله يحفظها وقولي لها تدعي لنا

 

[احلاهم]

الله يكتب لك الي قيه الخير
ما دمتي تستخيرين فوكلي امرك لله وهو بيكفيك ما اهمك

بالنسبه للشهادته مو مهم بس فيه حركه احسها مو حلوه وهي انه يطلب منك انتي تتصلي بحجه انه ما معاه رصيد

بعدين لا يهمك كلام الناس اذا ما زلتي تستخيرين وارتحتي خلاص كملي اذا ما ارتحتي انفصلي ولا عليك من احد محد متحسر بعدين الا انتي
واذا كتب الله لك نصيب معاه من البدايه لا تعوديه انك تعطيه من فلوسك خاصه في البدايه يمكن تتعبن في البدايه لا كن اذا تعود بعدين بترتاحين

واضح انك حساسه جدا بدليل انك قاعده تفكرين في ترك اموك واخوانك وشايله همهم
حبيبتي هاذي سنه الحياة لا تشيلي هم ولا شي اللي خلقهم ما رح يضيعهم فكري في نفسك في الوقت الحالي وهل تقدرين تستمرين مع هالانسان او لا
الله يكتب لك الي فيه خير

 

[مشاااارق]

عزيزتي ... الله يختار لك الطيب ... رفضك لزوجك السابق معاكي حق فيه لأنه بلا وظيفة وإنتي ماكنتي مرتاحة له نفسيا... بالنسبة لزوجك الثاني ... مادامه ولد خالتك ...أكيد عارفته وعارفة طريقة تربيته... وعارفة اهله ...
موضوع الشهادة ...أنا شايفة إنك ماتهتمي فيه كثير لانه أنا أعرف كثير من الزميلات أزواجهم متعلمين ودكاترة جامعة وأخلاقهم سيئة مع زوجاتهم...وفي رجال تعليمهم متوسط ومع ذلك يكونوا على قدر من الأخلاق ورقي في التعامل...
حسن الخلق له علاقة بالتربية والبيئة اللي نشأ فيها بلإضافة إلى الإستعداد الفطري ....ونصيحتي لكي لاتلحين عليه بإكمال تعليمه عشان مايشعر بنقص ...
ومسألة إنه يعتمد عليكي مستقبلاً... ما أعتقد إنه في رجل يترك وظيفته ويعتمد على زوجته في الإنفاق ... ولو حصل الشئ هذا تتوقعين أهلك راح يسكتون؟؟... الرجل بعد الزوا ج يحس بالمسؤولية...
بس في أسئلة حابة أستفسر عنها.. لما يطلب منك تتصلي عليه دوليا ويقول لك ماعندي رصيد... ماتسأليه ليه؟؟؟فين راتبك...
بالنسبة للمادة ...فهميه من البداية وفي الفترة هذه إنه مصاريفك كثيرة وإن راتبك يادوب على قدك... وجسي نبضه وردة فعله...لا يكون بخيل؟؟؟
بتكلم معاكي بصراحة بس هذه كلها آرائي الشخصية واتمنى ما تأثر على قرارك... بس إحنا بنتشاور
عزيزتي ...لما يقول لك إن شغله صعب وإنه متحمل عشانك... وإنه حصلت له مشكلة في العمل ... إستفسري عن السبب لا يكون من الرجال المعقدين اللي يفتعلون المشاكل...
هل هو رجل مدلل عند أمه...هل هو سريع الغضب والإنزعاج...
لما تتكلمين معاه تحسينه يتكلم عن بعض الأمور بيأس ولا روحه متفائلة...
عموما طبيعي إنك تفكرين وتوسوسين في هذه الفترة... بس أدعي الله دايما إنه يختار لك الطيب...

 

[غلا رووحي]

ياهلا وغلا فييكم حبيباتي والله فرحت فييكم وبردودكم عسااني ماأخلا منكم والله تأثرت حييييل بالردود ودمعت عيني عند اول رد فديتج حبيبتي فريده من نوعي واتوقع انج فعلا فريده واشكرج ياقلبي والوالده قريت لها رايج وفرحت بسلامج ووصيتها تدعي لج وللبلقيسيات كلهم​

​

فريده من نوعي​

​

لك مني جزيل الشكر وإنشاالله بستمر ف الدعاء والأستغفار​

​

أحلاهم​

​

أشكرج حبيبتي ويسلملي رايج وهذا اللي انا خايفه منه يعتمد علي وانا وحده مااقدر اقول لااا استحي ومتعوده مااخلي شي بخاطري وشكلي بكره انا بصرف علا نفسي والله اعلم​

​

أم شووق​

​

تسلمين ياقلبي عالرد والله يحفظ لج زوجج وعيالج يااارب وانا قنوعه ولله الحمد بس بعد الحياه صعبه وانا خايفه علا مستقبلي معاه ومستقبل عيالي في المستقبل دعوااتج لي​

​

مشااااارق​

​

شكرا حبيبتي لأهتمامج ولردج وبجاوبج علا اسئلتج​

أستحي أسأله عن راتبه بصرااحه وهو مايقول لي بس يقول الحاله ناشفه وماعندي رصيد دقي علي دقيت مره مرتين بس لما شفت السالفه مطوله بديت اتعذر واقول اسفه انا بعد جوال بينقطع وبصراحه اتضايق انا مو عشان الفلوس بس ليش مايتصل هذول صديقاتي ازواجهم(طبعا هم متملكات بس) يسدون فواتيرهم؟؟؟ ماقلت شي بس عالأقل هو يتصل​

هو مايسألني عن راتبي وهو عارف اني مرفهه ولله الحمد ويسمع من خالتي عني اني ماالبس الا الماركات واصرف راتبي كله علا نفسي وخوااتي وامي وابداا ماأوفر وللأسف ماأعرف أوفر ابداااا​

هو مو مدلل بس متعلق بأمه وأبوه حييييل وأنا أحب هالصفه فيه اللي فيه خير لأهله فيه خير للناس وللأمانه عشان ماأظلمه ماأعتقد إنه بخيل من فتره جات أمه ديرتنا وجابت لي هديه منه عطور فرنسيه غاليه وساعه لو بخيل كان جاب عطر واحد بس كان جايب تقريبا 4 عطور وجاب لأمي وأبوي هدايا العيد ​

ولاااا أبداا مو عصبي وهااادي حتى لو عصبته يكلمني بهدوء ويتناقش معاي انا ماانكر انه وااعي بس مافيه طموح للمستقبل مايفكر ش راح يسوي بعدين مايفكر يرتقي بعمله وبعد اخاف عند أي غلط يطلعونه من الدوام وهو يقول لي دايما انتي متشائمه ومافيج تفاؤل واحسه دايما متفائل وبصراحه احسده علا هالصفه فيه واتمنى اكون جاوبتج علا أسئلتج وجزااج الله الف خير وجعله بميزان حسناتج وانتظر ردج​

​

​

 

[غلاء 2008]

الله يوفقك حبيبتي
من استخار الله ماخاب

 

[اللولو الغالي]

توكلي على ربك ومافيه انسان كامل وتذكري اختي اذا كان فيه عيوب كمان انتي منتي كامله لانه الكمال لله

 

[غلا رووحي]

أهلا حبيباتي​

​

غلا 2008​

​

همس الحنان​

​

اللولو الغالي​

​

​

تسرني ردودكم وأشكركم جزيل الشكر وكلي ثقه بأن الكمال لله وحده عزوجل بس ماادري حاسه بضيييييقه وخووف واقول يمكن هالأحاسيس نتيجة صلاة الأستخاره لأني مازلت أستخير وان هذا معناته اني لازم ماأكمل وماأخفيكم واللي له تأثير علي للأسف اللي حولي في العمل وصديقاتي المقربات كلهم يقولون لي شلون وافقتي ليييش توج صغيره وبيجيج أحسن منه ....الخ وأتضايق من كلامهم مو لأني علا قولتهم تسرعت لا انا كلي ثقه انه كل شي نصيب بالدنيا بس تضايقت يحسسوني كأني رخصت نفسي وإني أبي أتزوج وخلاص ومره تناقشنا وقلت لهم يابنات مهما كان يظل الزواج هو الهدف الأساسي لأي بنت ويظل هاجس لها والعمر يمر وأحنا جميلات ومتعلمات وخلوقات مع العلم (انا اصغر وحده فيهم) لكن لاتنسون اللي حولنا ياما مثلنا وأحسن وللحين بنات ماتزوجوا وكنت واضحه معاهم قلت لهم أخاف أرفض من غير سبب ومن غير أستخاره ردت وحده قالت نستخير إذا اقتنعنا ومن صجج بتخلين ديرتج وتطلعين بره مع العلم (إني ماقلت لهم مامعاه الثانويه ش بيقولون ساعتها)​

​

​

وأنتظر باقي اخوااتي يشاركووني أرائهم ترا والله لها تأثير كبير علي لاتبخلون علي وجزاكم الله كل خير ​

 

[غلا رووحي]

حبيباااتي وينكم وين أرائكمأترجى كل وحده تدخل تعطيني رايها والله كل ساعه أدخل المنتدى أبي اشوف ردودكم......وين أخوااتي؟ريمانوفابنت الطيبمسك نادرملوووك وفروووحأرجوووكم متلهفه لأرائكم ويييييييينكم أنتظركم بفارغ الصبر أترجااااكم من كل قلبي أنا أختكم ساعدووني الله يساعدكم قولو لي شسوي أختي تقول لي أجلي العرس بحكم إنه قريب وأنتظري لما نشوف ونتأكد من وظيفته وهل هو قادر يتحمل مسؤلية زواج ام لا؟ووفقكم الله إلا مايحبه ويرضاه" سبحان الله وبحمده عدد خلقه ورضى نفسه وزنة عرشه ومداد كلماته "

 

[امووووواج]

حياتي التفاهم والاحترام مع الحب كفيلللللللللللله بان تزيل كل عقبه اماااام الزوجين انا متزوجه اكبر مني باكثر من عشرين سنه وتعليمي اكثر ومو من ديرتي لكن بصراااااااحه وماشاالله اموووووووووووت فيه ولو يطلب عيووني ما اقوله لا
دام مستخيره اتوكلي على ربك وهو بيختار لك الي فيه الخير

 

[احلاهم]

حبيبتي ما عليك من كلام ربعك ومن رايي لا تدخلينهم في خصوصياتك
وضيقه الخلق الي فيك صدقيني من كلام الي حولك لا تهتمين له وترى يا قلبي مو كل الناس يصلحون لاستشارتهم والاخذ برايهم خاصه من اللي حولك حبيبتي استمرى على الاستخاره وابعدي عنهم وعن كلامهم وحكمي قلبك وعقلك في الانسان اللي وافقتي عليه
واصدقي مع الله وربي بيعطيك على نيتك
وبشرينى باخبارك
وفقك الله لما فيه خير في دينك ودنياك

 

[(A7LA)]

أنا أرى أنك قد جربتِ التعامل مع شخص يختلف عن الخطيب الحالي و مع ذلك كنت راضية بنصيبك معه بالرغم من كرهك الشديد له ...

و أنا مع أني أرى أن الصلاة شيء مهم جداً في حياتنا و الفرق بيننا و بين المشركين ... و لكنك استخرت ربك و الله وفقك لهذا الرجل ... و أنت بنفسك رأيت الفرق كيف أن ابوك وافق عليه بالرغم من رفضه لهم مسبقا... و هذه كلها تساهيل من رب العالمين ...

و بنفس الوقت أراكِ أعجبتِ بأخلاق هذا الرجل و أرى أنه يصدق معكِ بأموره و هذا ايضا شيء جميل ..

ابدئي عزيزتي بالتجهيز لعرسك ولو كان لك الخير في هذا الرجل سيكتبه الله لك و سيوفقك معه ... ولو لم يكن نصيبك فسيبعده عنك ...

واصلي الدعاء و قراءة القران عسى الله ان يريح بالك و يرضيك بما قسم لك ...

وفقك الله

 

[فريدة من نوعي]

ياحياتي إنتي اش حالج؟والوالدة؟سبحان الله أنا لما خبرت ربيعاتي عن خطوبتي والله إنهم زعلوا مني شهووور لأني حغترب وحبتعد عنهم حسيا وكنت أتأثر من كلامهم وأبكي والله وأقول في نفسي شو إلي خلاني أوافق عليه؟ألحين شلون أرفض؟ووو يعني كأنك تحكين عني والله ولدرجةإني قعدت أستخير يمكن إلى قبل يوم العرس خخخ وأفكر بأمي وتعلقنا الشديد ببعض وأخواني إلي كنهم عيالي ههه وربيعاتي إلي زعلانين لأني كنت محبوبةالشعب ههه بس سبحانه الأمور كانت سهلةوتتيسر دليل على الخيرة والحمدلله أنا سعيدة جدا الان اللهم لك الحمد وموقاصر إلا إنه أشوف أهلي بس الزين مايكمل..فاستخيري واطلبي رضا الوالدةوالوالدة ودعواتهم تغنيكي عن كل شي ياقلبي__وادعي إن كان هو خير لكي ربي يحببه لكي وإن كان غير ذلك ربي يصرفه عنك_وسلامي للوالدة فديتها الله يحفظها

 

[غلا رووحي]

هلا حبايبي ​

شكري الجزيل لكل من ردت علي والله إني أقرا ردودكم أكثر من مره وأرتاااح لكم حيييل عساني ماانحرم منكم ومن دعوااتكم​

​

أحلاهم​

​

أشكرج حبيبتي علا نصيحتج وهذا انا احاول اوزن الامور وأريح قلبي من الوساوس وألجأ لربي ​

ويااارب ييسر لي أموري وأمور المؤمنات لما فيه خير ​

والله يوفقج ياحلا بلقيس إنتي ​

​

​

A7LA​

​

أشكرج علا مرورج وردج وعلا فكره لج مكانه عندي وأحترم رايج كثييير وهذا مواصله قراءة القرأن والدعاء بس خايفه أبدأ أجهز وأصرف فلوسهم وبعدين أغير رايي وأنفصل نفس الحكايه الأولى وأبوي يدفع من عنده مااني عارفه شفييني وسبب الخوف اللي فيني تدرين ساعات أتمنى أختفي ولا أضايق أحد ماأبي أضايق أهلي أخوااني وأبوي بالذات وخالتي وولدها .........ساعات أتمنى أموت وأرتاح بس لما أفكر بالحساب أخاف وأقول ياااربي أرحمني ​

وأحيانا أفكر أترك الزواج وأظل عند امي علا طول واشيل فكرة الزواج من بالي؟؟؟​

​

​

فريده من نوعي ​

​

هلا ياقلبي تدرين حبيتج والله ترفعين معنويااتي حييل جعله الله في ميزان حسناتج والله يحفظ لج زوجج وعيالج ويقر عينج بأهلج وماازلت علا الأستخاره والدعاء ودي أرتاح تعبت من كثر التفكير وضعفت حيييل ومااحب حد يسألني عن الزواج او جهازي لاني مابديت اساسا وتقريبا باقي أقل من ثلاث شهور الله يعيين​

من لهجتج حسيتج إماراتيه؟؟؟ ومتزوجه في الدوحه مو؟؟؟؟؟ فضول فقط لا أكثر ​

والله يسلمج يوصل السلام ولاتقطعين وإنشاالله بخبرج بالمستجدات​

​

​

​

دعواتكم لي يالغالييين وأنتظر رد باقي الأخوات وياااريت ريمانوفا تعطيني رايها أتمنى؟؟؟؟؟؟؟؟​

 

[نــقـــــاء]

هلا بك أختي الريم

أسعد الله أيامك ووفقك للخير

قرأت مشكلتك وحسيت بكل حرف قلتيه ...... وحسيتك بشكل عام مرتاحه للرجال بس عندك مشكلتين

1- الصلاه وهذا أترك الشور فيها لأهل العلم

2- الطموح

وهالمشكله مش كبيره بالقدر اللي تتصورينه ،، أذكر أن الاستاذه ناعمه تقدم تدريبات للزوجات يدربون عليها أزواجهم الجنوبيين _ أصحاب الطموح المحدود_ ومشى حالهم وتحسنت أحوالهم

فبإمكانك طلب الاستشاره من الأستاذه وهي ماتقصر الله يحفظها


الله يقدر لك الخير ويرضيك فيه :cupidarrow:ِ

 

[~كل الوفا~]

أنا من رأي أحلا

 

[الاميره الدلوعه]

الله يوفقك عيوووووووووووووووووووني ويكتب لك الخيييييييييييير

 

[تاج راسه]

السلام عليكم ورحمة الله
احبكي الله الذي احببتينا فيه
اولاً : بارك الله لكما وبارك عليكما وجمع بينكما بخير
ثانياً : احب اقولك انه انت اعرف منا بظروفك واحنا نعطيك آراء وانت تختاري
انا مع قول الرسول صلى الله عليه وسلم { اذا جاءكم من ترضون دينه وخلقه فزوجوه }
هذا الحديث لم يقله الرسول صلى الله عليه وسلم عبث بل قاله ليدلنا على الطريقة الصحيحة لإختيار الزوج
انت الآن زوجته انتهى الأمر وفي نظري ان الطلاق للمرة الثانية صعب
تقولي انه يصلي احياناُ ( يعني فيه خير ) لا اعرف الحكم الشرعي في هالحالة
اذا شايفة انك غير مرتاحة فقط لأجل الصلاة قولي لأمك واخوانك يقولون له هالشي او انت تقوليله ولكن بأسلوب قوي حتى يعرف ان موضوع الصلاة مهم
انا شايفة ان موضوع الدراسة ايضا مهم عندك وهذا الموضوع ممكن يأثر على حياتك معه ما دام ان نظرتك له ان مستواه اقل منك
لي ملاحظة ( ليش ما طلب يشوفك ؟ )

 

[غلا رووحي]

أهلا بكم أخواتي أسعدني مروركم وأعجبتني أرائكم وأسعدكم الله دنيا وأخره



حبيباتي......

نقاء

Lamar

الاميره الدلوعه

تاج راسه

أشكركم غالياتي وأفرحتني ردودكم واحس بكم أخوات فعلا أشكر الله العلي العظيم علا نعمه وعلا هذا المنتدى الرائع وعلا وجودكم ووقفتكم معي
جزاكم الله خير الجزاء

أختي تاج راسه انا في اول مكالمه سألته عن الصلاه وأنحرج وقال والله أصلي أحيانا وساعات أنسى وانشاالله اذا كنتي جنبي ماراح انسى وبتذكريني وبتساعديني عالصلاه وهذا رده لي وانا زعلت حيييل لأن كنت أتمنى ملتزم وقلت له هالشي وصار يقول لي انشاالله وفي رمضان كل مايكلمني اول شي اسأله عن الصلاه لدرجة احس زهقته ولما يكلمني وتمر صلاه اقول يلا بروح اصلي روح صل وهكذاا.........ولما يكلمني يقول والله توني صليت واشك اقول ليكون بس جذي يقول لي هالكلام
اما ليييش ماطلب يشوفني سألته هالسؤال مع العلم للحين ماشافني.....فقال لي ماحبيت اطلب من عمي اني اشوفج واحرجه وامي سألته اذا تبي تشوفها قال ياخاله لو انها شنو باخذها يعني باخذها؟؟؟؟؟؟؟؟؟؟؟؟؟؟؟ويقول وانا ابيج من زماان وماصدقت ابوج وافق ويقول انا شفتج قبل بالصدفه كنتي ف بيتنا وشفتج وعجبتيني بس كنتي متملكه مع اني مااذكر اني شفت احد؟؟؟؟؟؟؟؟؟؟؟؟
وللأمااانه انا ماعمري شفته ولا فكرت فيه ولاأعرف شكله ولاشفته ابدااا الا بعد الملكه ارسل لي صورته عالايميل؟؟؟؟؟