هل نفسي فيها ســوء .. ؟

[عربجية]

.
.

الســـلآام عليــــكمـ ،،

.
.

والله مادري من وين ابدا .. اليوم ضايق خلقي واحس طلعت كل الشغلات اللي تزعجني بنفسي

بس خلوني اقول مشكلتي الاساسية لانه من زمان مضايقتني

وتحسسني اني بنت مب زينه او نفسي فيها غلط ماعرفت شسوي

حاولت اتجاهلها بس مو قادره .. ويارب الاقي كلام يريحني عندكم

.
.
انا مشكلتي غالبا اتوقع اني اغار من اختي الصغيرة ولحد الضيق

بعيلتنا بكبرها كنت المتميزه فيهم بشغله معينه ( ماقدر احددها لانه اختي مشتركة بالمنتدى )

المهم

لي لمسات خاصة فيها واحس اني الاقي نفسي فيها دايما

يعني من صغري ادور على شي يميز شخصيتي واعرف اعبر من خلالها عن نفسي

وهالميزه هي اللي كنت ادور عليها من زمان وفرحت فيها

بس اجت اختي هي بعد ودها تتعلم ..

عادي علمتها بعد بالعكس فرحت انه حد مهتم مثلي بنفس الشغله

لكن اللي صار انها صارت تقلدني بافكاري .. اساسا انا وهي عندنا تفكير متشابه

فلما اسوي شي تراقبني وتسوي مثلي

بعدها صرت اشوفها تسوي شغلات بدورها وتحاول تكون احس

تبي تكون متميزه بهالمجال وقمت السعاده يوم تلاقي المدح

ونا هنا بديت انزعج .. انا مو قصدي احقد عليها ولا ابيها ما تفرح

لا ابدا والله .. هي مو اختي الصغيرة بس انما هي مثل بنتي وصديقتي الروح بالروح

حتى لدرجة بفترة كنت مستعده اضحي واتخلى عن واحد من الاقارب اللي احبه بصمت عشانها

لاني كنت احسها انها تميل ليه وما حبيت اكسر قلبها فكنت ابي اسكت انا وافسح لها المجال

( المهم مو هذي سالفتنا مابي ندخل فيها )

بس صرت احس انها تاخذ مني الشي الوحيد اللي يميزني كأنها تعدم وجودي

انا احاول اتقدم وهي تمشي وراي تراقبني تفهم وتحاول تطور

يعني اي باقي اهلي يعرفون هالشغله بعد مثل اخوي واختي الكبار

بس كل واحد ليه اسلوب ثاني مختلف وما يشبهوني .. فنا ماعندي مشكلة وياهم

بس اختي تقلدني وايد .. تسوي نفس افكاري ..

احاول اتجاهل ضيقي بس مب قادره

حتى اهلي صاروا يمدحونها .. انا ادري انها مو قصدها تقلدني

انما هي حبت اسلوبي اكثر عن باقي اخواني لهذا تحب تسوي مثلي ونا هالشي يسعدني

لكن هالضيق اللي بداخلي ابيه يطلع مني واكون طبيعية

.
.

يحسسني مثل ما قلت في البداية انه نفسي سيئة وفي شي غلط

هل انا جذي صج ... ؟

شو اسوي بحالتي ...؟

نوروني الله يخليكم :sad_1:​

 

[بردايس]

لا لا نفسك مب سيئه ابدا .. هذا شعور طبيعي يختي
هالمشاعر اي وحده في موقفك لازم تحس فيها .. ونحن مب ملائكه عزيزتي ..
وحب التميز موجود فينا كلنا .. وننقهر لما نشوف احد ينافسنا ..

بس في شغله حطيها في بالك ( لولا الله ثم انتي .. اختك ماتعلمت هالشغله
ولاتطورت فيها ..وبالعكس هذا دليل على ان قلبك كبير )

فانتي لما تعرض لك اشغالها قولي لها بعد ماتمدحينها ( هالشغله اللي احنا نسويها حلاتها لما نحط بصمات خاصه فينا .. ونعبر عنها بأسلوبنا .. فأنا اشوف
انك تطورتي كثير ماشاء الله عليك .. ووصلتي لمراحل حلووه فيها .. فعشان كذا
خلاص أبدأي طوري نفسك بنفسك عشان يكون لك ستايلك الخاص ويكون لي
ستايلي الخاص ولاتعتمدين علي اني بعلمك شي .. لانك ماتحتاجين
لاحد )

وبس .. المسأله سهله لاتشيلين هم ^_^ ..

 

[Ms Uae]

الحمدلله والشكر نفسج صافية وما فيها سوء

الله يخليج لها ويديم المحبة اللي بينكم

اذا هي كانت تقلدج وتستفيد منج وتشوفينها هي المميزة

شوفي شو اللي يميزها وابدي انتي الحقي وراها باشيا بسيطة

وخلي لج شي ..لج انتي بس..حاولي دايما تيبين اشيا يديدة ..

مثلا اقري مواضيع او الالعاب اطرحيها على اهلج وخواتج..منها بيستانسون وبيحسون انج متميزة بها الشي

واذا بدت هي تقلدج ..هم بيلاحظون ها الشي وبيحسون انه لج..وها شي من شخصيتج هي بدت تاخذه منج..وما بيتقبلونه..عشان شخصيتج ما تضيع بس..

ولو خذته ..ها اندوج خذيه..دوري على شي يديد..عجزيها..كل ما تركض وراج..ركضيها زيادة..

وسوي اشيا مفيدة خليها تتعلم منج

لانج بالنسبة لها قدوة .. خليها تستغل الاشيا الحلوة منج

ودايما بصماتج موجودة لو هي حاولت ما تقدر

ولا تزعلين ها شي عادي..

أما عن الانسان اللي حبيتيه حب صادق وصامت (معذب نفس الحال يا اختيه)

تستغنين عنه ليش!!!

ها نصيبج ونصيبها مكتوب..يمكن ما تاخذه وفي نفس الوقت بتكونين انتي بعد خسرتيه

شوفي حياتج حبيبتي وانسي اللي وراج

تقبلي مروري


‏Ms Uae
(اذا حابة ..اضغطي على اسمي لتتعرفي علي أكثر)

 

[مكان القمر]

وعليكم السلام

اولا احييك على اسلوبك الجميل في توصيل المشكله

لستِ سيئة إنما انتِ مثال للأخت الناصحة التي تعطي ثمارها لأختها بكل حب
لو كنتِ سيئة لناوعتيها ولسحبتي البساط من تحتها
وقلت للجميع دائما هي تقوم بتقليدي
ولكنكِ كنتِ شهمه

وبالعكس احساسك طبيعي كل منا يحب ان يكون له عمل منفصل عن غيره
حاولي ان تخاطبيها او ان تقومي بعمل جماعي معها
لتكوني في الصورة
وعليك بمدح نفسك
واظهار مواهبك للناس
هي لديها اسلوب اظهار موهبتها
فكوني مثلها

بالتوفيق​

 

[G o O o d Y]

يا قلبوو ..

عآدي جدا .. ابدا منتي سيئه .. محشومــه ..

انا اقولك على شي يضحك .. لان انا بعد عندي اخوات ..

انا وزني زايد واختي بعد .. قمت وسويت لنا برنامج خاص فينا ..

نزلنا 5 كيلو .. بي هي واااضح عليها وانا لاا ..

قمت وقفت الريجيم عليها وقلت لها انا مشغوله باختباراتي

انا ماني مشغوله لكني انقهرت يوم صارت انحف مني .. :tears::tears:

وصارت مسكينه تخبص يمين ويسار .. وكل يوم تبكي لانها ماتفهم بالريجيم :essen:

وانا ياسلام مبسوطه احسن خليها الدبيه مابساعدها .. مع اني احبهــا مررره

هذا طبيعي يا قلبــو احسآس طبيعي .. ابدا مو شــر .. هذي فطـره ..

وانا اقولك شي .. اذا انتي متميزة .. مستحيل احد يقدر عليكي والله لو قلد بصمه يدك بعد !!

اهم شي خلي عندك خصوصيه واستقلال .. بلاش تدمجو شخصياتكم في بعض ..

قوليلها يا عسـل انا مبسوطـه لانك صرتي متميزة .. بس انتبهي انك تقلديني في هالمواضيع

عشان الناس لا تقول هذي ورا اختهـا .. ترا الناس ماتحترم اللي مالها شخصيه مستقله ..

يعني اضحكي عليها بكلمتي حلوين بحيث انك توصلين لها انك ماتحبين التقليد ..

لكن دايما اتذكري

خصوصيه + استقلال + شخصيه قويه وواضحه = تميــــز

لاتسمحي لاحد ياخذ من حقك .. يا قلبو لا تتنازلين عن ابد .. هذا مو وقت الطيبه والسذاجه ..

لا تتنازلين عن شي ابد ابد .. هذا لك هذا حقك ..

واهم شي خليكي ريلآكس وعآدي جدا .. واذا قلدتك بشي اضحكي بصوت عآلي وقولي لها :

حركاااات والله اتعلمتي بسرعه ما تعبتيني !!

و ارمي عليها شويه كلام .. زي مثلا : اوووف من فلانه مره تقلدني مالها شخصيه ما باقي الا بصماتي ماقدلتني فيها .. ناس عجيبه !!

يعني انتي لمحي لها وان شالله تفهم .. ووسعي صدرررررررررك .. خليكي قويه و واااااثقـــه ..

واذا قلدتك لمحي لها بانها تقلدك :flex:

ومو لازم تعلمين كل الناس كل شي .. اهتمي بنفسك ..

ولاتحطين في بالك انك سيئه لاااااااااا ابدا .. انتي عسل ..

وانا شوفيني حنيت على اختي وقمت اعيد لها الريجيم مره ثانيه ..
خل البنت تنبسط ، وكمان انا يصير عندي داافع اني انتظم ومااخبص الاكل ..

وانتي كمان يصير لك دافع انك تتعلمي شي اكثر واكثر ..​

بــآيوو​

 

[عربجية]

مزااجي كلش معكر اليوم ضايق خلقي :tears:

ما رديت عليكم بسرعه سامحوني

والله والله حسستوني براحة كبيرة .. لانه هالسالفة كانت في بالي من زمااان

وانزعج من نفسي لاني افكر بهالطريقة .. كاني انانية او طماعه وشي من هالقبيل

بس هذي الصراحة ماقدر انكر هالشي ...

فعليا من بعد سالفة قريبي اللي حبيته وهي سالفة طويلة

زاد مستوى انزعاجي عن قبل .. صرت احس انه بتاخذ مني كل شي احبه

وهي نفسها فعليا تمر بمرحلة تدور على مميزاتها ... واختارت نفس طريقي

يعني هي من صغرها جذي

كل فترة تلصق بحد وتسوي نفس اللي يسويه

والحين الدور اجا علي لكن احسها عاجبها الجو :sad_1:

وشي ثاني بعد سنتين هي بتدخل وياااي نفس الجامعه .. لا ونفس تخصصي بعد

طول فترة دراستي بالمدرسة كلش ما كان لي شخصية ولا وجود

وابي اعوض هالشي بالجامعه خاصة اني تغيرت واايد

وهي شمالية .. وليها شعبية بالمدرسة وتقول ابي اكون اشهر وحده بتخصصي

حسيت انه قلبي عورني مو معقولة حتى بالجامعه ..

فهمتوا الحين ليش احس انها تاخذ مني كل شي احبه :tears:<< جنوبية الاخت

حاليا هي مو محتاجه مساعده مني لانها عرفت اشلون تتصرف

لهذا صرت انا اتقدم عنها واسوي شغلات يديدة سرية محد يعرف اشلون اسويها

وهي كل فترة تسألني اشلوون هذي ابي اتعلمها

ونا اقولها كمزاح .. ماااابي حررره عطيني مليون وبعملج :bleh:

لكن الصج اني مابي اعلمها وتبدى تقلد اسلوبي اليديد لانه بروحها تقدر تدور وتتعلم

الله المستعان

لي رجعه حتى ارد عليكم بس وراي حرب بالمطبخ :icon1366:
​