هل من نصيحة لصديقتي ياحكيمات بلقيس. طلقها زوجها اليوم والله المستعان

[نورة66]

بسم الله



السلام عليكم ورحمة الله


اخواتي صديقتي تعاني من مشاكل كثيرة مع زوجها فهو باختصار يهجرها بالاشهر واحيان يباات برا البيت .

ويحرمها من المشاعر والعواطف وهو شمالي وكنت انصحها بكيفية طريقة التعامل مع الشمالي

وفي البداية نجحت فعلا بدا تغير بسيط ولكن رجع بات ليلتين برا البيت

وكنت نصحتها بان تكون قوية الشخصية لان هي ضعيفه جدا قدامه

قلت لها قولي له ما تخاف اهمالك هذا يدفعني للحرام او التفكير فيه ؟

انا احتاج مشاعر احتاج رجل الجوع العاطفي اشد على المرأه اشد من جوع البطن

و احس اني اضعف بهجرك . وقلت لها لا تكوني ضعيفه وقولي له اذا صدقك خلاص انت ماتهمني روح وعيش حياتك . وفعلا هذا ماحصل ولكن زوجها لانه متعود ضعفها ودموعها
انصدم من كلامها وموقفها خصوصا انها اصبحت تخاف على نفسها من شدة حاجتها العاطفيه
فقام بكل قسوة وقالها انتي طالق!
وقال لها ماطلعين من البيت لين تنتهي العدة وبعدها روحي بيت ابوك

انا بصراحه ابدا ماتوقعت ان يكون هذي ردة فعله مع اني اشعر انه يوم قال لها ابقي عدتك في البيت
لانه ندم على تسرعه في الطلاق مع انه هو هاجرها تماما جسديا ويبات برا البيت !

يا حكيمات بلقيس ارجوكن ايش تنصحونها ؟

هي تقول يمكن خيره واريح وبقوله بترك لك عيالي لاني خلاص احس اني بنهار نفسيا


خصوصا انها حاسه انه منزوج بالسر ولانه يبني لها بيت الحين وباجنبه يبني بيت مثله تماما ودايم يقول لعياله قبل هذا البيت لكم ولامكم وانا البيت اللي جنبه لي ولاصدقاءي!

واذا حضنها ابنها يقول لابنها خلاص الحين عيالك يقومون بالهادور عني والمهمه !

واحنا خلاص كبرنا على هالكلام وهالحركات !


مع العلم ان البنت جميله وفعلا لو تركته كثير يتمنونها وهي تقول حتى يعالي كرهت اربيهم !


ما راي الحكيمات ؟

 

[رازيا]

الله يفرج همها امين
كم طلقة طلقها
وكمم طفل عندها
وكم سنة صارلها متزوجة
وشو مؤهلاتها يعني شو دارسة
وكم عمرها
شو اخر مشكلة حصلت بينهم
هل يضربها ام فقط خيانات وهجر بالفراش وتهميش لشخصيتها
هل عندها دليل انه متزوج بالسر ما يجوز نتهم العالم بدون ادلة
متى بدأت حالة الهجر هل من سنة او سنتين او شهر

 

[حبيب قلبي123]

الله يفرج همها شكله شافها قوت شخصيتها قال اهددها بالطلاق مشان تتادب وماتتخانق معه مره ثانيه لانه قالها اجلسي ببيتك لو مايبيهاكان قال روحي لهلك من رايي خليه تادبه اهي وتترك له العيال وتروح لاهلها وان شاء الله انه يتوب ويرجع لها
وبعدين كيف مايخاف عليها يخليها لحالها ويبات برا البيت لازم تخبر اهلها والله يعنها

 

[رازيا]

حاليا خليها في بيتها لا تخرج منه لعل الله يحدث بعد ذلك امرا
وتمارس حياتها طبيعي لكن تهمل زوجها يعني تطنشه لا تعطيه
وجه وتزعل زعلة قوية
والله اذا ما كان قصده وطلقها في لحظة غضب فمكن انه يراجع تفسه
ويرجعها
واذا خلصت العدة وما رجعها خلاص تنهي كل شي معاه وتضمن حقوقها
حقوق اولادها
طبعا تستمر بالزينة واللبس حاليا
لكن جاوبيني اهم شي الين كم طلقة طلقها

 

[ام عبدالله7]

الله يفرج همها

 

[نورة66]

السلام عليكم

جزاكم الله خير على سرعة الرد ..

-كم طلقة طلقها

اول مره يطلقها مع انها مرتين قبل تزعل وتطلع بيت اوبها ولفترات طويله .

-وكمم طفل عندها

اربعه

_وكم سنة صارلها متزوجة

تقريبا 12 سنه .

-وشو مؤهلاتها يعني شو دارسة

اعتقد جامعية

-وكم عمرها

37 وهي اكبر منه باربع سنوات ولكن شكلها جدا صغير وكيوت وناعمه وهو شكله كأنه ابوها!


-شو اخر مشكلة حصلت بينهم

مشكلتها فقط انه يهجرها بالفراش لاشهر وقبل ان تكتمل الثلاث اشهر تقريبا يأتيها واظن فقط حتى لو فكرت تشكيه يكون هو ما اخل بالمدة شرعا! (هو ملتزم)

-هل يضربها ام فقط خيانات وهجر بالفراش وتهميش لشخصيتها

لا مايضربها ولكن دايما ينظر لها وكأنها مالها مشاعر وكأنها شيء رخيص مالها حق تحب او تفكر بكلام الحب ويقولها عيب ووو !

-هل عندها دليل انه متزوج بالسر ما يجوز نتهم العالم بدون ادلة

المره الاخيره لما طلعت بيت اهلها كان يبات احيان برا البيت ولكن كان مقل جدا وتشك فيه ولكن مره كانت معه في السياره وماسكه جواله الاي فون تطلع الرسايل على الشاشه وجاته رساله من وحده تقوله (حرام عليك انا احبك انت ماطلقتني الا طلقتين) وكانها تستعطفه حتى يرجع لها ! ولكن لما رجعن له هالمره وتقريبا صار لها عشر اشهر كان متغير كثيييير وجاااف ويهجرها فترات متباعده وعمل لع غرفه ثانيه في الطابق السفلي لحاله ويبات برا البيت ولا تطلع منه كلمه حلوه ابداااا ال انتقاد ويقنعها انها تنسى موضوع المشاعر والخرابيط على قولته انهم كبروا على هالامور والبنت عاطفيه جداااا ومرغوبه وجمله وهي تمسك نفسها فعلا عن ان تروح لطريق غلط حتى لو مجرد شات وهالامور ولكن تقول تعبت وضعفت وخلاص حتى لو تم الطلاق ورحت بيت ابوي مابي حتى اربي عيالي ماعندي طاقه لشي خله ياخذهم يربيهم وتقوله افكر اقوله هالكلام .

-متى بدأت حالة الهجر هل من سنة او سنتين او شهر

من رجعت له هالمره اقل من سنه كان في البدايه باارد جدا وكل مره يباعد في مرات المعاشره حتى صارت ثلاث شهور بين كل مره !


-حاليا خليها في بيتها لا تخرج منه لعل الله يحدث بعد ذلك امرا
وتمارس حياتها طبيعي لكن تهمل زوجها يعني تطنشه لا تعطيه
وجه وتزعل زعلة قوية


هي فعلا قالت ببقى وعلى الاقل باخذ حريتي هالايام من القيود اللي واضعها علي وبروح وباجي ول ابسال فيه .
وانا نصحتها انها تهتم في نفسها وتعدل غرفتها وتعمل لها جو حتى تغيظه وتعمل رجيم ورياضه وكانها تستعد لحياه جديده !
واذا فتح معاها الموضوع تقوله نعم انا ما اخطأت لما قلت لك اني صرت اخاف على نفسي من الخطا وانت اللي هجرتني وحرمتني الحلال حتى الكلمه حرمتني ليش تظن اني ممكن ما اضعف من ضغطق علي لو كنت مثل غيري كان سوت الغلط جاتك تضحك ولا اهتمت ولكن انا اخاف الله وهذا اللي خلاني احذرك من التمادي !
وانا اذا طلعت من هالبيت تأكد اني ماراح ابقى اندب حظي وببتدي حياه جديده وباذن الله بتكون حلوه.
وهي قالت بقوله اني بترك لك عيالك ربيهم انت وانا بدور لي وظيفه وببدا حياة جديده مافيها حرمان ولا حزن .


ايش رايك بكلامي وكلامها . وايش تنصحين اختي الحبيبه ؟

 

[مستشاره2010]

انا لله وانا اليه راجعون
حبيبتي حاولي توصينها بقراة سورة البقرة يوميا والاستغفار والصدقة وتحاول هذي الفترة تبقى في بيتها لكن تبتعد عنة ولا تحتك فية ابدولاتنسى قيام الليل

 

[نورة66]

اسال الله ان يفرج همها ..

 

[دلوعةزوجي]

شوفي يا قلبي
الزواج والطلاق مافيهم لعب ابداً
وزوجها لانه عارف انها ضعيفة قالها اجلسي ببيتك اللين تنتي العدة
المفروض ما تتهاون معاه ابداً
بأي حق يهجرها كل هالمدة
الزواج امساك بمعروف او تسريح بأحسان
الهجر فقط لو كانت الزوجه ناشز او اقترفت ذنب ويجب تأديبها
وينها من اول ما بدى يهجرها ليه تسكت له
لابد من وضع النقاط على الحروف
ان كان زوجها مخطي بحقها وهي مو مسويه شي يستاهل كل هالحركات
فالافضل تتأخذ اجراء يرد لها احترامها وكرامتها وثقتها بنفسها
فرج الله همك وهمها وهمي وهم كل البلقيسيات

 

[نورة66]

جزاك الله خي اختي دلوعة زوجها

هي كانت تطالب بحقوقها ولكن بضعف وبكاء

هو يرى انه مو مقصر عليها بما انه فاتح لها بيت ومصروف وو

ولكن هي كل ماحاولت تتقرب منه يصدها

تقول كل شيء اتحمله الا لما يبات برا احس بحرقة ولا اقدر اتحمل اللي يصير

 

[دلوعةزوجي]

ليش من الاساس يبات برى
ليه ماحلت هالمشكلة
شوفي انا عندي سوي اللي يبي
بس يبات برى خير سلامات
لا ياقلبي هي ضعيفة ولو بتتغير ما عاد بيعجب الباشا ومع ذلك ماعليها منه عجبه والا ماعجبه لانها حاولت تطيعه وما نفع معاه هاللحين خليها تسوي الشي اللي يرضي ربي ثم يريحها وهو تتركه اخر اهتماماتها
والله والله والله لو استحقرته وطنشته وتقوم بس بواجباته ان يرجع لها ذليل​

 

[غرشوب رعبوب]

يختي بقولك شي وخليها تحطه حلقه باذنها الرجال اذا حب زوجته راح يتمسك فيها ويقاتل عشان يستردها ويخاف من فقدانها ولكن لو كان اللي بينه وبينها جفاف او في زوجه ثانيه بحياته يحبها ومسيطره عليه حربها بهالطريقه اكبر غلط لانها راح تخسر كل شي !!!!

انا اقولك وابغيك توصلين لها هالكلام فالبدايه اخليه يتعلق وما يصبر وبعدين اساومه ولكن هو يهجرها بالشهور ومو سائل فيها اي مساومه منها راح يكون مصيرها الفشل مثل اللي صار !!

للاسف اللي سوته غلط واكبر غلط واذا استمرت اعتقد انها راح تخسر الا اذا احتفظ فيها لتربية عياله وللعشره اللي بينهم بس تتاكد انه راح يرجع نفس قبل ويمكن يصرح لها بان في وحده ثانيه بحياته !!!

اختي نصيحه قولي لصديقتك اقعدي في بيتك وخلي شوي مشاعرك على جنب استعيني بالله اولا واخيرا ووظفي كل هالمشاعر وهالكيد لاستعادة بيتك وللحفاظ على عيالك من التشتت !! ايش بخلي له عياله يربيهم وبشوف حياتي ؟؟!! بهالسهوله ؟؟؟ انتي تتكلمين عن عيالك لحمك ودمك في حريم يصبرن على الضرب والخيانه والتقصير والتعذيب عشان عيالهن وانتي خلاص عشان مشاعرك راح تتخلين عن كل شي !!! يختي ادري ان الوحده بحاجه للحب وللكلام الحلو وكم بكينا وترجينا عشان نسمع كلمه بس مو بهالطريقه !!!!

غيري من سلوكك وشخصيتك انتي تقولين ابينله اني قويه خليك قويه معنى وفعل !! غيري من شكلك وتصرفاتك عيشي حياتك واغرقي نفسك هالايام بين احضان عيالك وسجادتك واضحكي واطلعي ولما كان يقولك خلاص راحت علينا خلي عيالك يحضنونك كان يستفزك ويبي يشوف ردت فعلك ومو بعيده يكون احساس بالغيره او محاوله منه انه يخليك خلاص تنسين مشاعرك تجاهه لانه حاس نفسه راح يضعف قدامك !!! كان المفروض رديتي عليه رد يسكته رد يثير غيرته ويتمنى يكون بدل ولده

حبيبتي اللي صار صار ويمكن هو بدايه جديده لعلاقه صحيحه بينك وبين زوجك وخلي عندك يقين الرجال مو بحاجه للجمال فقط عشان يحبك والا كل واحد زوجته مب جميله راح يطلقها بس كثير بينا ازواج حريمهم مافيهم مسحة جمال وتلقين زوجها يموت فيها شو تعتقدين السبب فهالشي ؟؟؟ كيد النسا !!!! لو كل وحده عرفت مفاتيح زوجها واستخدمتهم صح كان كلنا ارتحنا ولكن نحن تغلب علينا العاطفه ونتعب بسرعه واللي يبي الشي يصبر هي نجحت في فترة واول مارجع وبات برا يومين نسفت كل اللي سوته بلحظه انتي لا تنسين انك شاكه ان في وحده في حياته وتقاتل نفس ماانتي تقاتلين عشان تسيطر عليه وتحتفظ فيه لها بروحها !!!!

اعرفي عدوتك في البدايه منو هي وهل هو متزوج او مجرد علاقه والعبي صح شوفي شو اللي تسوينه غلط وصححيه على حسب شخصية زوجك واذا كان شمالي مثل ما تقولين فالشمالي مايحب السيطره ويحب يعيش حر بس يموت فالانثى المغناج الواثقه من انوثتها المبادره اللي تخلي نفسها نفس العشيقه وتسيطر عليه وتكبح جماحه فالفراش فيتحول من اسد لقطو اليف !!!

اعتبري نفسك في فترة اعادة حسابات وفترة نقاههه وفترة استعداد لحرب انتي بعون الله راح تفوزين فيها استغلي حبه لعياله والعبي على اوتاره الحساسه خليه يضن انك قعدتي عشان مصلحة عيالك لان الشمالي يموت بعياله ويخاف على مستقبلهم هدي الامور وطلعي كل انوثتك واستغلي اسلحتك بالحلال ولا تقولين انا اضعف واخاف على نفسي من الحرام هذا باب للشيطان يدخلك منه يبي يثبط عزايمك ويخليك تحسين بالهزيمه والتعب

عندي كلام وايد بقوله لك بس ابي اشوف ردت فعلك على كلامي اول شي

 

[نورة66]

اختي غرشوب جزاك الله خير لي عوده للتعليق على كلامك ويرفع لتراه الاخت رزايا في انتظار ردها