هل اوافق على من سيسكن ببيت العائلة ؟سؤال

[راجيه الرضا]

- السلام عليكم، أنا شفت لحضرتك كذا بوست قديم اتكلمت فيه عن مشاكل بيت العيلة، وأنا حاليا متقدملي واحد وشقته في بيت العيلة وأنا بصراحة متخوفة جدا، فرأي حضرتك أوافق ولا أرفض ؟

- لأ هى الأمور مش بتمشي كدة خالص وأنا دوري مش إني أختار بالنيابة عن السائل، أنا دوري بس هو التفكير معاه وتفصيص السؤال واستعراضه من جميع جوانبه، والإختيار في النهاية ليكي مش ليا ... فخليني أسألك كام سؤال
- أكيد اتفضل

- أنتي ساكنة في قرية كل إللي فيها سكان بيوت عيلة ولا مدينة؟
- هتفرق !
- أكيد هتفرق جدا، لأنك لو من سكان القرى وبيت العيلة عندكم أمر واقع، فسؤالك هنا لا محل له من الاعراب، لأنك لو رفضتي ده فإللي بعده برضه هتبقى شقته في بيت العيلة لأن ده المتاح بالنسبة لمكانك ، أما لو من سكان المدن والاختيارات متاحة فوقتها نشوف أبعاد الموضوع

- لا أنا ساكنة في القاهرة
- تمام، طيب عندك مشكلة لو حصل الزواج إنك تنزلي تخدمي أهل زوجك لو طلب منك ده ؟
- أنا بصراحة سألته في الموضوع ده وقالي إن شقتي مستقلة ومش هبقى ملزمة بحاجة

- هو عنده أخوة صبيان متجوزين في البيت؟
- أيوه اتنين
- زوجاتهما بينزلوا يخدموا عند حماتهم؟
- إللي عرفته أنهم بينزلوا يخدموا
- طيب إيه المميز عندك يعني علشان لو تزوجتي هما ينزلوا وأنتي لأ؟
- مش عارفة

- طيب خليني أفترض صدق نيته أنه فعلا مش ناوي يجبرك على النزول للخدمة، بس خليني أحكي معاكي في قصة مشابهة حصلت لواحدة أعرفها

"باختصار البنت دي خطبها واحد ووعدها أنها مش هتكون ملزمة غير بشقتها بس، ولما تزوجت هو فعلا حاول قدر المستطاع أنه يحافظ على وعده معاها ،بس المشكلة أنه كان له أخ متزوج في نفس البيت وكانت زوجته بتنزل تخدم
لما زوجة الأخ لقت أنها بتنزل والتانية لأ، بدأت تعمل مشاكل واشمعنى أنا وهى لأ، ومشاكلها خلت حماتها تعمل خناقة مع ابنها المتزوج حديثا وقالت له أنه لازم يخلي زوجته تنزل تخدم زي سلفتها
لما زوج البنت اللي بكلمك عنها لقى نفسه تحت ضغط من أمه، بدأ يحاول يجبر البنت على النزول للخدمة ، ولما رفضت لأنه وعدها بغير ذلك ... أنتهي الأمر بخناقة كبيرة ثم حصل الطلاق "
فخليني أرجع معاكي للسؤال
هل لو حصل الزواج عندك مشكلة إنك تنزلي تخدمي أهل زوجك لو طلب منك ده ؟

- بصراحة أيوه، أنا مش متعودة على كدة وكمان نفسي أعيش في شقتي براحتي وقت ما أحب ، ولو ده حصل مش هبقى مرتاحة في حياتي!

- طيب تمام، كدة كل التفاصيل واضحة قدام عينك، فاستخيري وفكري وشوفي الأنسب ليكي.

علي عبد الله