نظامي في النفاس...

[الدميلة الدمال]

السلام عليكم...

هذا نظامي في النفاس اللي تسويه لي أمي الله يخليها لي ويطول في عمرها, وهذا النظام سويته في طفلي السابق:11: وكانت النتيجة رائعة ولله الحمد وطلعت من الأربعين ووزني كان نفس وزني قبل ما احمل ماشاء الله, يعني اهتميت بنفسي واكلي واستخدمت الادويه الشعبيه وبنفس الوقت نزلت الوزن اللي زاد خلال حملي :c014::22:...

اتمنى منكم تدعوا لأمي:23: وتدعوا لي بالولاده الطبيعية السهلة والميسرة والبيبي السليم :13:,,,

ولا أحلل من تنقله للمنتديات الثانيه بدون ماتذكر اسمي عليه واسم منتدى مملكة بلقيس...

يــلــه نبدأ,,,,

أول 20 يوم:


*على الريق:
ملعقة عسل + 7 حبات حبة سوداء.
*الصباح {الساعة 7 تقريبا}:
نينخه(طريقتها تخلطي مسبقا في علبه كأس نينخه+ ربع كأس ينسون+ ربع كأس شمر+ملعقتين كبار زنجبيل+ ملعقة كبيره قرفه+ شوي مسمار تأخذي شوي و تطبخيها مثل طريقة القهوة العادية) مع تمر+ سمن
*الفطور{الساعة 10 تقريبا}:
- مصابيب أو
- ساندويتش بر محشي بيض مسلوق أو مقلي أو
- توست بر محشي جبن مع خيار وطماطم.
مع كأس حليب +حبه سوداء + فلفل أسود+ زنجبيل أو
قشر قهوة مع شوي سكر ويشرب مثل الشاي
*الغداء:
- مرقه دجاج مع قطع دجاج أو مرقه لحم مع قطع لحم أو
- مطازيز(قبوط) +لحم +خضار أو
- شوربة جريش أو كويكر+ لحم أو دجاج.
يضاف لأي من خيارات الغداء وقت الطبخ: كمون+ حبه سوداء+ فلفل أسود+ حلبه أو ماش.
*العشاء:
نفس خيارات الغداء أو أي شئ تشتهيه لكن يفضل يكون بر...
*بين الوجبات:
- عصير برتقال أو عصير مانجو لأنه ممتاز لإدرار الحليب أو
- حنيني أو
- حليب+ قرفه+ زنجبيل


آخر 20 يوم:
*على الريق: ملعقة عسل + 7 حبات حبه سوداء.
*الصباح: نينخه مع تمر + سمن+ رشاد .
* الفطور: نفس أول 20 يوم.
*الغداء والعشاء: نفس أول 20 يوم لكن بدون حلبه أو ماش.
*بين الوجبات:
- عصير برتقال أو عصير مانجو مع ملعقة صغيره قشر رمان أو
- حليب +قرفه +زنجبيل أو
- حنيني

إذا شفت ردود حلوه وتفاعل منكم بنزل طريقة الاهتمام بالجرح ونصائح عامة ...

مره تعبت وأنا اكتب لكم لكن كل شئ لعيونكم يهون :icon31:....

 

[مدام فلمبان]

ماشالله
الل يخليها لكي يارب
ويقومك بالسلامه ويسهل ولادتك ياارب

 

[اشواااقه]

مشكوووووووووووووووووورة
تكفين كملي الله لايحرمك الاجر والله ادور مثل هذي المواضيع محتاجتها بكريه وامي ماتعرف شي وانا بالثامن الله يعين بس
شكل نظامك مره حلو وسهل
الله يجزاك خير انتي وامك يارب​

 

[رنين الحياه]

تسلمي ياعسل الله يعطيكي العافيه

 

[انتوا سموني]

مشكووووووووره اختي على النظام

الله يخلي لك أمك ويطول لكم بعمرها

والله يرزقك بالولاده الطبيعيه الميسره

بس في عندي شوي اعتراض ........... اذا ممكن ؟؟؟؟

في النظام لاحظت بعض من المكونات تمنع منها النفاس واللي عليها الدوره بحكم انها تسبب

لها خراب في الأرحام :

(( الجبن / الخيـــــــــار / الطماطم / المانجو ))

واذا أنه يدر الحليب على قولتك : فيه بدائل له مثل :

مرقة اللحم أو الدجاج / الطحينيه <<<<< خطيييييييره وحده بوحده

وبرضوا استغربت شي في نظامك ::

وهو :::

انك ماذكرتي الرشااااااااااااااااااااااااد (( الثفاء )) أبد أبد

مع انه معرووووووووووف في تنظيف الرحم ويقولون الحريم الكبار : انه يكنس الرحم كنس:15:​

 

[الدميلة الدمال]

شاكره لكم حبيباتي على الردود والدعاوي الحلوه...

اختي انتوا سموني بالنسبه لاستفسارك عن الجبن والخيار والطماط أنا كنت آكلها في نفاسي ولاجاني الا العافيه يعني مستحيل انصحكم في شئ ماجربته او ضرني, عموما كمية الجبن قليله في الساندوتش ومااتوقع تسبب خراب على قولتك وبالنسبه للخيار والطماط بتكون مقطعه شرايح يعني نفس الشئ كميتها قليله...

ونفس الشئ بالنسبه لعصير المانجو أنا كنت اشرب كل يومين او 3 كوب.

أما الاشياء المدره للحليب انا كاتبتها من ضمن النصائح العامه اللي راح انزلها بكره بإذن الله.

وبالنسبه للرشاد موجود حبيبتي في النظام لكن من ضمن ال20 يوم الاخيره,شكلك مو مركزه في الدرس, هههههههههههه....

 

[omreef]

جزاااااااااااااك الله خير
ان شاءالله بس احمل واولد بجرب هالنظام

 

[وتين قلبي]

مشكووورة جعل الله في ميزان حسناتك

 

[احساس الدنيا]

مشكوووورة ياقلبي حلو نظامك تقريبا زي بس انتي في زيادات


والله يخليلك الوالدة

 

[الفتاة الوحيده]

مشكوره حبيبتي على النظام بس للاسف انا ما اعرف النينخه

وربي يخلي لك امك

انا ولادتي قريب :11:يعني احتمال هذا الاسبوع فياريت تنزلي موضوع الاهتمام بالجرح

واذا على قولتك بنتتظري الردود وما عليك كلافه رسليه على الخاااص >>> آآآوت:24:

 

[عزف الامنيات]

تسلمين يالغالية
بس لو سمحتي انا اعرف ان الرشاد يستخدم في الاسابيع الاولى بس ماادري كم يوم الي مع معبوط التمر
امهاتنا من زمان كانو يستخدمونه على هذي الطريقة

 

[أمة البارئ]

الله يعطيك العافية ويجزااااااااك كل خير

 

[غلآك روحي]

الله يعطيك الف مليوون عافية
(ويخلي لك امك الغالية)
بس ياحياتي ابي كيفية الهتماام بالجرح
انا بكرية بشهرى الخاامس
الله يهووون عليك وعلى حبيبتيي...​

 

[ربي احفظ امي]

والله انا شايله هم نفاسي لأنه بيكون في بيتي ولا أعرف شي بالأدويه رحت للعطار وماخلى شي إلا وعطاني منه
لا وفوق هذا ماعندي شغاله وطفلين صغار يارب برحمتك أستغيث>>>>> تقولين الشغالات أنقرظو من الرياض

 

[الدميلة الدمال]

مرحبا بالغوالي....

الله يسهل علي وعليكم حملنا وييسر لنا ولاداتنا, ويخلي لكم كل غالي....

ان شاء الله تستفيدوا من النظام لاني والله مانزلته الا عشان افيدكم واكسب من وراكم أجر...

 

[الدميلة الدمال]

غاليتي عزف الامنيات:smile:...

بالنسبه للرشاد معروف انه ينظف الرحم لكن مايستخدم اول الايام لانه ينشف الدم ويقطعه بسرعه, فالمفروض اول الايام تخلي الدم والمويات كلها تطلع وال 20 يوم الاخيره تستخدمي الرشاد عشان يوقف الدم ويخليك تطهري بسرعه( هذا الكلام كله بنزله من ضمن النصائح العامه)...

تحياتي:a194:...

 

[الدميلة الدمال]

حبيباتي دقايق وانزل طريقة الاهتمام بالجرح والنصائح العامه...

انتظروني....

 

[الدميلة الدمال]

النظافة والاهتمام بالجرح:

*من أول يوم استخدمي مرهم ميبو + أي كريمات أو غسول تصرفه لكي الدكتورة.

*من أول يوم تشطفي ب: ملح + قشر رمان + ارطا(طريقته يطبخ بماء على النار في قدر ويضاف له كسرة مره)ملاحظه: كل يومين سوي ارطا جديدة لأنه يخرب ويعفن بسرعة خصوصا في الحر.

*بعد سقوط الخيوط: ممكن استخدام المره في التشطيف.

*بعد سقوط الخيوط: استخدمي خواجوا(مطبوخ بزيت زيتون) على الجرح ومكان الخياط باستخدام القطن, ممتاز لإلتام الجروح وإزالة اثر الخياط.

*آخر 10 أيام: قبل النوم

-تحاميل:
تسويها أنتي في البيت(مره مطحونة + شوي ملح فارسي+ محلب مطحون)تعجن بعسل وتشكل مثل نوى التمر وتوزع بصينيه كبيره وتترك حتى تنشف كم يوم ثم توضع في الفريزر, هذه التحاميل تستخدم يوم وراء يوم.
ملاحظه: لا تستغربي لما تحرك شوي لما تحطيها هذا شئ طبيعي بسبب الملح.

-كــبــو:
تستخدميه في اليوم اللي ماراح تحطي التحميله, مرتين أو ثلاث تكفي خلال الأربعين كله وهو عبارة عن( قشر بصل+ مره+ كمون+ حبه سوداء+ فلفل هوا) تحطيها على الفحم وتتبخري فيها من تحت, لما تسوي الكبو احرصي على انك تتدفي زين وابعدي عن أي تيار هواء.

 

[الدميلة الدمال]

نصائح عامه:

1/ الحرص على الورقيات وعصير المانجو ومرقه اللحم أو الدجاج لإدرار الحليب, ممكن تأكلي حلاوة طحينية لكني ما أفضلها لأنها تسمن بشكل مو طبيعي.

2/ ممكن تستخدمي المره مع قهوتك أول الأيام عن الشمم لكن بشرط ماتكوني تستخدمي مضادات حيوية.

3/ الحرص على البنطلون الداخلي أو الشورت + الشراب.

4/ حركتك أول الأيام تكون خفيفة ورقيقة عشان الخيوط.

5/ابعدي قد ماتقدري عن الخبز الأبيض والرز والمعجنات لأنها تسبب الإمساك, وممكن تستخدمي ملين من الصيدلية أول الأيام عشان ما تتأثر الخياط.

6/ ابعدي عن التشوكلت لأنها تنفخ على غير سنع.

7/ ابتعدي عن الحوامض مثل الليمون واللبن وعن الأشياء اللزجة مثل الباميا والملوخية والموز وعن الفواكه اللي مليانه ماء مثل الحبحب والشمام, وابتعدي عن السمك لان عمتي نصحتني ابتعد عنه أيام النفاس والدورة.

8/ استخدمي الحلبة أو الماش أول 20 يوم فقط مثل ماذكرت في نظامي لأنها تسبب كثرت الإفرازات ولا تطهري بسرعة (الحلبة والماش نفس المفعول لكن الفرق أن الماش مايخلي لكي ريحه مثل الحلبة,وطبعا كلها تسمن, الماش افضل من الحلبه لان الحلبه تسبب مويات وافرازات في الرحم عشان كذا أنا افضل الماش)

9/ احرصي على استخدام الرشاد آخر 20 يوم مثل ماذكرت في نظامي لأنه ينظف الرحم وينشف الدم ويساعدك تطهري بسرعة.

10/ اشربي الماء بشكل معتدل وبدرجة حرارة الغرفة وابتعدي عن المشروبات الباردة واشربيه على دفعات وليس دفعة واحده, وترى الأجانب يشربون الماء بالمزاز(سترو) بعد ولادتهم وعلى دفعات.

11/ ممكن تبدئي تلبسي المشد بعد 10 أيام من الولادة

12/ممكن تبدئي بالمشي والرياضات الخفيفة بعد 25 يوم تقريبا,عن نفسي أنا بديت امشي بعد ماكملت 3 أسابيع تقريبا وكنت امشي لمدة ساعة يوميا لحد ماطلعت من النفاس.

13/ممكن تبدأ الخيوط بالسقوط بعد 7 أيام وممكن تزيد المدة الى 25 على حسب نوع الخيوط وطريقة الخياط وطبيعة جسم المرأة وتعافي الجسم.

14/ ابتعدي عن المشروبات الغازيه والايسكريم.

15/ إذا ضايقتك الغازات اشربي ينسون أو نعناع.

16/ احرصي على السمن البلدي سواء مع التمر الصباح او مع اكلك,لان السمن ربيب الارحام على قولة أمي.

17/ انتبهي من الجوع, لانه ابد مو زين وقت النفاس او الدوره.

18/ احرصي على الورد والتحصين لك ولطفلك,ودائما استودعيه الله, وياليت تشغلي سورة البقرة(ممكن تحمليها على جوالك أسهل لك)عندك أي وقت لكن أنا افضلها وقت النوم مره تريح وتهدي نفسيتك ونفسية البيبي.

19/ احرصي على الرضاعة الطبيعية أولا لأنها مفيده لطفلك وثانيا لانها تساعد على عودة الرحم الى مكانه وحجمه الطبيعي...


اتمنى انكم تستفيدوا من الكلام اللي كتبته لكم :c014:,,,

تحياتي :a200:...

 

[mmgmr]

تسلمين على هالنظام الروووعة واشكري الوالدة وان شاءالله تقومين بالسلامة