نحن والانفلونسرز

[راجيه الرضا]

من كام سنة كده كنت حضرت ايفينت من الايفنتات إللي بيكون فيها (influencers) أو مؤثرين على مواقع التواصل الإجتماعي.. الايفنت كان كل المتحدثين فيه من أصحاب الاكوانتات إللي عندها متابعين فوق الـ 200.000 متابع.. واحد بيطلع ترافيل بلوجر وبيتكلم عن تأثيره في إنه يحبب الناس في السفر.. وواحدة فاشون بلوجر.. اتكلمت عن إنها إزاي بتساعد الناس إنهم يلبسوا كويس وتأثر عليهم في اذواقهم.. وواحدة ميكب ارتست اتكلمت عن إنها بتأثر على البنات وتخليهم يحافظوا على بشرتهم ويستخدموا منتجات عناية بالبشرة..

طبعاً كل إللي قاعدين - ومنهم أنا - متأكدين إن الناس دي مش " بتأنفلونس" جدعنة كده.. اللي بسافر بياخد فلوس من فيديوهات اليوتيوب.. ومن أصحاب الأماكن السياحية ويطلع في الإعلانات.. وإللي بتتكلم عن الفاشون دي بتلبس ببلاش وبتاخد فلوس مقابل الإعلانات.. و الميكب ارتست حدث ولا حرج.. مش عيب.. لكن يقولوا إن ده شغل ميحسسوناش إنهم بيعملوا كده من أجل الإنسانية المعذبة..

متحدثين كتير وانفلونسيرز كتار.. وأنا كنت زهقت وقربت امشي.. لغاية ما طلع حد - الله يباركله - هدم المعبد بشياكة.. وشد انتباه الناس من اول ما اتكلم.. الراجل كان بيتكلم عن مفهوم التأثير من الأساس.. الـ social influence.. هل معناه اننا نوجّه الناس ونأثر عليهم ؟ هل المفروض اننا بنطلع على الناس ونقولهم قلدونا واسمعوا كلامنا بس؟

بعدين قال آية قرآنية " الذين إن مكنّاهم في الأرض اقاموا الصلاة واتو الزكاة وامروا بالمعر9ف ونهوا عن المنـ كر".. قال إن التمكين ده نوع من أنواع الشهرة والتأثير.. وطالما ربنا هو إللي مكنّي فهو في الغالب كلّفني بالتكليف إللي في الآية .. يعني انا مطالب إني ادعوا الناس لكل معر9ف واحذرهم كمان من كُل مُنـ كر..

مش بس كده.. التأثير ده مش حكر عليا.. التأثير ده لازم انقله للناس بحيث إن كل واحد فيهم وإن لم يكن عنده متابعين.. فهو يقدر يأثر في الدايرة إللي حواليه.. يقدر يفيد ويقدر ينفع.. وتأثيره ده أهم من تأثيري مليون مرة لأني بأثر في عالم افتراضي وهو بيأثر في عالم حقيقي..

أنا وقفت كتير عند كلامه.. ويمكن من بعدها مبقتش اتابع غير إللي عنده فِكر.. اللي عنده قضية.. إللي بيعتبر نفسه بيؤدي دور ربنا وفقه وكرمه وأنعم عليه بشهرة وتأثير ولو في فاشون ولا ترافيل بلوجر ولا فود بلوجر.. المهم إن عنده مبدأ لنفع الناس ولوجه الله .. الرقص والمقالب والفيديوهات إللي دمها خفيف مينفعش يبقى دور ناس في الحياة.. ولا تنفع يتقاس عليها "التأثير".. إنما إللي يتقال عليه مؤثر فعلا في واقع افتراضي .. هو إللي يأمر بمعر9ف وينهى عن مُنـكر..


عمر الإسكندراني