***مواقف وقصص من حياتي***

[لوز وسكر]

تصبحون على خير....
رايحه أنام.....
ولاتنسون.....

 

[لوز وسكر]

ليش كذا يامسلمين....؟؟؟؟

رحت المستشفى مره وتأخر موعدي وجلست في استراحة النساء....

وفجأه دخلت إمرأه ومعاها بنت صغيره عمرها تقريبا ثلاث سنوات.....

ملبستها تنوره قصيره وتي شيرت علاقي بدون أكمام البنت جدا عاريه....

جلست البنت على الكرسي جنب أمها وطول الوقت وهي تشد في هالتنوره مستحيه لا يبان منها شي....

استحت البنت من الناس والأم ما استحت تلبس بنتها مثل هاللبس....

حرام عليكم يامسلمات اتقوا الله في بناتكم هم مسؤوليه وأمانه في أعناقكم و والله راح تسألون عنهم يوم القيامه.....

وين ما اروح لازم اشوفهم بهذا المنظر....


بنات صغيرات في عمر الزهور لابسات عاري....


رحت السوق وشفت كم وحده والله خساره تكون أم بناتها يمشون وراها كل وحده عاريه أكثر من الثانيه...


لو البنت تربت على هذا الشي راح تكبر عليه وعمرها كله ماراح تتستر وراح تلبس بناتها مثل مالبستيها وراح تاخذين اثمها واثم بناتها....


مثل هذي الملابس تجيكم من الغرب الحقده الحاسدين اللي يبغون يخربون بناتنا حسبي الله عليهم.....


ولاتقولين الملابس المستره ماهي حلوه....


والله فيه ملابس ساتره وتجنن على الأطفال....


والمشكله يوم تشوفين أم معاها بنت و ولد البنت عاريه والولد مستر ماتشوفين الا وجهه واقدامه....


استغفر الله العظيم ليش قلبتوا المعادله.....

اللي استغربه إذا رضيت الأم تلبس بناتها كذا كيف يرضى الأب معقوله مايغار على بناته....
لاحول ولا قوة إلا بالله.....




الله يهدي كل أم تلبس بناتها كذا ويهدي كل أب ساكت على تصرفات زوجته والغيره صفر عنده.....

 

[لوز وسكر]

فكره حلوة.....وجاري التنفيذ

دائما أفكر كثير في طريقه حلوة تساعدني في حفظ القرآن الكريم وتكون الطريقه ممتعه....
ومرة خطرت في بالي فكره....
أنا عندي جهاز صوتيات ام بي ثري أقدر أحمل عليه أي صوتيات أنا أبغاها....
فقلت ليش مااستغله ويكون عون لي على حفظ القرآن....
وخاصة إنه فيه ميزه جدا رائعه وهي انك تقدري تعملي خاصية الإعاده ويصير كل ما انتهت السورة يعيدها مره ثانيه وهكذا حتى تحفظي السورة....

الجهاز سعته جدا كبيره واللي عندي 30 قيقا....
ويكفي تحملي عليه القرآن كامل ويبقى عندك مساحه كاااااااااااااااااافيه لأي شيء آخر....

والحلو في هذا الجهاز ان حجمه صغير يدخل في الجيب ويحمل معاه سماعه للإذن وتقدري تسمعي القرآن وين ماكنتي حتى وانتي تشتغلي في البيت...

وهذي صورة الجهاز اللي عندي:

ويمكنك أيضا إضافة صور وفيديو عليه....
وكمان فيه إذاعه وتقويم ومميزات أخرى جدا رائعه.....

أنا فكرت الآن أحمل عليه جزء عمى لأنه فيه صور ماني حافظتها من آخر الجزء واذا خلصت حفظ الجزء أبدأ بالجزء اللي بعده.....

أنا فكرت أدخل دار لتحفيظ القرآن بس هذي السنه ظروفي ماتسمح.....
بخليها السنه الجايه مره وحده وندخل انا واختي سوا منها نشجع بعض ونسمع لبعض كمان....

وعسى الله يتمم علي بحفظ القرآن كامل ان شاء الله ويرزق كل مسلم حفظه وتلاوته على أكمل وجه....

الفكره مازالت قيد التنفيذ وفي حال نجحت راح أخبركم بالنتائج إن شاء الله.....

طموحي تتغير حياتي........

 

[um_rqawy]

اللًٍُِه يعًٍَِطيًٍَِِك الًٍعااَِفيََهًٍَِ...
في ًٍَِ ميزااًٍَِن حسنًٍٍٍَِاااًٍَُِتكـًٍَِ انًٍ شاءًٍُِ اللًٍَِهًًِ.

انتظررر يووميااتكـ الجااايه...

 

[لوز وسكر]

اللًٍُِه يعًٍَِطيًٍَِِك الًٍعااَِفيََهًٍَِ...
في ًٍَِ ميزااًٍَِن حسنًٍٍٍَِاااًٍَُِتكـًٍَِ انًٍ شاءًٍُِ اللًٍَِهًًِ.

انتظررر يووميااتكـ الجااايه...

الله يعافيك ومشكوره على مشاركتك
ولاتحرمينا من طلتك.....

 

[لوز وسكر]

غير متعلمه ومثقفه أكثر مني...

جلوسي الكثير مع جدتي خلاني أكتشف فيها أشياء ماكنت أعرفها من قبل.....

كل يوم تفاجأني بمعلومه جديده أو حتى قصه مفيده وكلامها كله حكم ماشاء الله تبارك الله.....

قررت إني أبحث عن سبب ثقافة جدتي الجميله.....

وقررت إني أراقبها وأعرف مصدر ثقافتها.....

غريبه ماعمري لاحظت في يدها كتاب لأنها ببساطه لاتقرأ ولا تكتب.....

إذن ياترى ماهو مصدر ثقافتها؟؟؟؟؟

7
7
7
7
7
7
7
7
7
7
7
7
7
7
7
7
إذاعة القرآن الكريم هو مصدر ثقافتها....

فعلا يابنات الإذاعه شغاله عندها أربع وعشرين ساعه ماتقفل الإذاعه الا إذا بغت تجلس معنا أو تصلي.....

وفيه شيخ قال مقوله أعجبتني كثيرا....
قال : إذاعة القرآن جامعه إسلاميه كبيره تخرج على يديها كثير من المستمعين وبدون أي شهادات وبدون تحديد في العمر.......

العلم والثقافه عمرها ماكانت بالشهادات وكثير من الناس وصلوا إلى مستويات عاليه من الدراسه لكن والله لو تسألينه عن اتفه الأشياء مايجاوبك......

جدتي درست على يد جامعة إذاعة القرآن الكريم وبدون شهادات....
وثقافتها أعلى من ثقافتي رغم إني متخرجه من كلية التربيه ومعي شهاده بس ابدا مانفعتني....

من فتره بدأت بالإستماع لإذاعة القرآن الكريم وبكثره هي الجامعه الوحيده اللي راح تفيدني في الدنيا والآخره......

 

[لمـى عمري]

متابعه يومياتك الراااائعه

 

[لوز وسكر]

متابعه يومياتك الراااائعه

مشكوره على متابعتك
مرورك الأروع

 

[لوز وسكر]

انكسر خاطري

اتذكر مره وانا في الإبتدائي....
كان فيه حفل تكريم للمتفوقات من المدرسه....
وكانوا عازمين امهات الطالبات المتفوقات فقط....
واختاروا الثلاث الأوائل من كل فصل وللأسف انا كنت الرابعه وماكان لي نصيب من التكريم....
كنت حزينه مره لأنهم ماراح يكرموني ولا عزموا أمي.....
وقررت إني على الأقل أشارك في الحفل....

وحفظت انشوده ورحت عند المشرفه على الحفل وقلت لو سمحتي ابغى أشارك في الحفل....
قالت لي ايش عندك؟؟؟؟
قلت انشوده....
قالت قوليها أشوف....
وقعدت أنشد وألحن في النشيد علشان يعجبها وتقبلني....
وبعد ماخلصت من النشيد قالت لي......
7
7
7
7
7
7
7
7
7
7
7
7
7
7
7
7
7
7
7
7
7
7
7
وبكل برود حلو
بس خلاص روحي مانبغاك كفايه المشاركين مانبغى زياده.....

حرااااااااااااااااام عليها والله انها كسرت في خاطري وقعدت اسبوع حزينه....
ويوم الحفل خرجت من الفصل وقاعده بعييييييييييييييييييييد نهاية الساحه أراقب في البنات المشاركين في الحفل كيف كانوا مبسوطين وبعدين شفتهم كرموا المتفوقات وأنا أراقب فيهم من بعيد وكلهم مبسوطين وأنا في قمة الحزن....

ياشين كسر الخواطر وخاصة لما يكون خاطر طفل....

 

[لوز وسكر]

القراءة مع وقف التنفيذ

أحب القرآءة كثييييييييييييير.....
وأحب أقرأ الكتب وأقرأ من النت.....
بس فيه مشكله اكتشفتها في نفسي.....
إلى متى وأنا أقرأ ولا أستفيد مما أقرأه....

الصراحه حسيت إني أقرأ مع وقف التنفيذ....

لازم استفيد من اللي اقرأه وانفذه في حياتي...

بس مشكلتي أنسى اللي اقرأه....

بس في الفتره الأخيره صار كل موضوع يعجبني أحفظه في المفضله وأعيد أقراه كل فتره علشان تثبت المعلومه واتذكرها وأحاول أنفذها في حياتي.....

والكتب كمان أحاول إني أعيد قرائتها أكثر من مره علشان تثبت المعلومه وتصير فكره مميزه تأتيني وقت الحاجه....

أنا أقول لنفسي دائما إذا بتضيعين وقتك في القرآءه بدون ماتنفذين وتستفيدين من اللي قرأتيه لاتقرأين أحسن....

يعجبني الناس المثقفين واللي ماتصعب عليهم المشاكل وكل مشكله ولها حل عندهم...

في استشاري في العلاقات الإجتماعيه والأسريه.....
يقول:قبل لاتقعين في المشكله إقرأي وتثقفي كيف تحمين نفسك من الوقوع فيها لأن الوقايه خير من العلاج.....
يعني مثلا قبل لاتتزوجين إقرأي عن الزواج وعن الزوج وعن كيفية العلاقه بين الزوجين وكيفية تجنب المشاكل الزوجيه فهذا أفضل من إنك تتزوجين وتقعين في المشاكل وبعدين تروحين تقرأين عن كيفية حل هذه المشاكل....

وكمان بالنسبه للأطفال....
قبل لاتنجبين الأطفال إقرأي عن كيفية التربيه الصحيحه وثقفي نفسك عن كيفية التعامل معهم وخاصة في سن المراهقه وكيفية تجنب المشاكل اللي تحدث معهم....
وبكذا تسلمين من الوقوع في مشاكل التربيه أحسن من تتركين نفسك بدون ثقافه حتى يجون الأطفال وبعد ماتقعين في المشاكل تروحين تدورين على الحل وبعض الأحيان تتعقد المشكله ويصعب عليك حلها....

تصدقون إني من الآن أقرأ عن التربيه وعن الأطفال وأنا باقي ماحملت ولا عندي أطفال...
علشان لما يجون الأطفال أكون متدربه بما فيه الكفايه ومثقفه علشان ما اقع في المشاكل....

بصراحه القرأءه جزء من حياتي ولا أستطيع الإستغناء عنها.....

علمي أطفالك القراءة من الآن حتى لو كانوا في سن صغيره....
مافي أحلى من طفل مثقف و واعي ويحب القرآءة ويصير قادر على مواجهة الحياه بدون اتكال ومساعده من والديه.....

 

[um_rqawy]

يسلموووو ع الطرح

 

[لوز وسكر]

مين يحب الورد مثلي؟؟؟؟

الورد عندي سحر سحر سحر.....

أموت على الورد.....

أذكر أول باقة ورد جتني هديه في حفل تخرجي وكانت أكثر من باقه أحتفظت بها حتى جفت وخربت ولا رميتها الا بعد ماخربت وصار منظرها وحش.....

ثاني باقة ورد جتني في يوم الخطوبه يااااااااااااااااااااااااااااه قعدت أتأمل وأحاكي الورد واتغزل فيه طول اليوم.....

ثالث باقة ورد جتني يوم ملكتي (عقد القران) وربي من فرحتي نومت الورد هذيك الليله معي على السرير وكالعاده بعد ماتغزلت فيه وفي صاحب الورد.....

رابع باقة ورد في يوم زيارة خطيبي لي بعد الملكه في العيد وقال لي جمله روووووووووووووووعه:
دريت إنك تحبين الورد فجبت لك ورد يا أحلى من الورد....
ولولا الحيا كان أكلته وأكلت الورد معاه الله يسعدهم الإثنين.....

خامس باقة ورد في يوم زواجي هديه من خالتي وماكانت باقه كانت حديقه من الورد خالتي الله يسعدها ماخلت ورده في السوق إلا وجابتها وامتلت شقتي ورد في كل مكان والزايد خليته في الثلاجه....من جميع الأشكال والألوان....

ياورد يامهديني الورد .. شكرا على لطفك وذوقك
تسلم وتسلم هذه اليد .. لي بروزت حبك وشوقك
وان كان لي في خافقك ود .. والحب يجري في عروقك
سلم عليه وبلغه رد .. بلغ تحياتي خفوقك

ياورد يامزريني يافل .. داري على حسنك ولونك
لا تظهر بحسنك على الكل .. ياورد خايف يحسدونك
في خدك المضوي القمر هل .. والليل كله في عيونك
والناس تنظر لك ولا تمل .. أخاف مني ياخذونك


يا ورد كل عيونهم حب .. وانت الفرح يملي دروبك
كم قلب ميت فيك كم قلب .. وعيونهم يا ورد صوبك
توك صغير و طيب وعذب.. مع دوبهم لا تحط دوبك
عيبك من نظرة عين تنحب ..واخاف تسحرهم عيونك

 

[لوز وسكر]

يسلموووو ع الطرح

الله يسلم قلبك
نورتي

 

[um_rqawy]

:a200:وهذي الورده مني اتمنى تقبلينهااا

 

[لوز وسكر]

:a200:وهذي الورده مني اتمنى تقبلينهااا

تسلم الأيادي يا أحلى من الورد

 

[لوز وسكر]

منظر غير حضاري 1...


أشوف مثل هذا المنظر كثييييييييييييير......

وأسأل نفسي بالله ليش يسوون كذا؟؟؟؟؟

إيش الفايده من هذا؟؟؟؟؟

شوفوا الصور وراح تعرفون عن إيش أتكلم...

الله ياخذ ابليس ويش يستفيدون إذا شوهوا المنظر بهذا الشكل على بالهم بيشتهرون والا ايش السالفه.....
أعصب لما أشوف مثل هذا الشي في كل مكان...

وأحيانا والله يابنات يكتبون كلام ماينقال والله قليلين حياء...
يعني رجال كبار وشنبات ويسوون مثل هذي الحركات....

ليت السلطه بيدي أي واحد يكتب اصيده وهويكتب آخذه وأحطه في سجون جوانتانامو مدري ليش أعصب لما أشوف مثل هذي المناظر وجع إن شاء الله.....

مسكت زوجي مره وقلت له بعصبيه....
ياشنبات انت قد مره كتبت على الجدران اعترف؟؟؟؟؟
قال ايش ماعمري سويت هذي الحركه اعتبرها باااااااااااااااااايخه.....
والله صدقته أحس زوجي مؤدب مايسوي هذي الحركات......
إذا ايدينهم تحكهم ولابد يشخبطون يرسمون على الأقل ويزينون ذا الجدران:

منظر غير حضاري 2.....
كثير من الناس يرورحون يتمشون ويجلسون في مكان نظيف ومرتب ويفتح النفس وبعد مايقومون يخلون المكان وراهم كذا:

ماعمري رحت اتمشى مع اهلي والا مع زوجي ورحنا وتركنا المكان ورانا كذا بهذا المنظر لازم ننظف ورانا ونشيل كل شي....
والله زوجي حتى المنديل مايخليه يقولي عيب كيف يجون ناس ورانا ويجلسون على وساخه وبعدين اعتبري ان هذي حديقتك بترمين فيها مثل كذا.......

بس فيه ناس كثير والله يقومون والمكان وراهم يفشل ويسد النفس خلاص ماعاد ودك تجلسين مكانهم مهما كان المكان جميل.....

حافظوا على نظافة بلدكم واعتبروها مثل بيوتكم......

منظر غير حضاري 3....
مره كنا أنا وزوجي عند البحر وشويه جاء اثنين رجال ومعاه حرمه ما ادري زوجته والا أحد ثاني....

حطوا فرشتهم وقعدوا وشويه وينسدح الرجال ويحط راسه في حضن زوجته وهي قاعده تلعب في شعره قدام الناس وكل شويه يسوون حركات أنا الصراحه استحيت من المنظر....
وزوجي عصب منهم ويقول هذولي مايستحون قدام الناس والله إني شاك إنها زوجته أصلا لو كانت زوجته بيغار عليها مستحيل يسوي لها كذا قدام الناس......
وقعدنا الين رحنا وهم على هذا الحال عسى الله يلطف بهم ويعافيهم ولا يبتلينا....​

 

[لوز وسكر]

أزعل دقيقتين بس...

مره تناقشنا في موضوع أنا وزوجي....
وزعلت منه لأنه يقول أنا صح وانتي غلط وماترك لي مجال أفهمه قصدي فعصبت وقعدت زعلانه....
بس والله ماكملت دقيقتين واحس الجو مو حلو واحنا معصبين متكهرب جدا وكل واحد ساكت ويطالع في الثاني بغضب...
فقررت إني أرجع المياه لمجاريها بس ما أبغاها بهدوء أبغى أكشن هههههههه....

رحت وخليته في الصاله قاعد لحاله وأخذت المخده من على السرير وخرجت عليه وانا اصيح هجووووووووووووووووووووم واضرب فيه بالمخده وهو يقول وقفي وقفي وشفيك يابنت الحلال وشفيك شكله يموت من الضحك يحسب اني انهبلت.....
هههههههههههههههههههههههههه
وبعدين قلت يالله قول انتي صح والا والله أكمل ضرب وما أوقف قال: خلاص خلاص
انتي صح بس وقفي ضرب والله صدعتي راسي.......
وقعد يضحك وقال أعوذ بالله ماعاد بزعلك فجعتيني احسبتك انهبلتي اخاف المره الثانيه تجيبين المسدس تقتليني.....
وانتهت السالفه على خير.....
دائما زعلاتنا قصيره مهما كان كبر المشكله تدرون ليش؟؟؟؟
لأني دائما سواء أنا الغلطانه أو هو الغلطان أغير جو الزعل بمقلب فكاهي ونقعد نضحك وننسى الزعل ومافيه داعي لاهو يعتذر ولا أنا....

لاتطولون الزعل ترى كثر الزعل يجيب الجفا ويسحب الحب من القلب....

 

[لوز وسكر]

خبر سيء
كللي حزن لأخباركم بهذا الخبر.....
لن أستطيع إكمال هذا الموضوع معكم وساضطر للتوقف وسأكتفي بما كتبته.....

سامحوني فالظروف أقوى مني ولا أستطيع ذكرها ولن أستطيع مواصلة هذا الموضوع.....

أنا موجوده في المنتدى ومن تريدني في شيء تراسلني على الخاص ولن أتوقف عن كتابة أي موضوع في المنتدى لكن هذا الموضوع بالذات لن استطيع إكماله....

مع السلامه يا أحلى صديقات..........
على أمل اللقاء بكن في موضوع آخر.....​

 

[لمـى عمري]

يالله كنت استمتع جدا ب يومياتك
في حفظ الرحمن

 

[um_rqawy]

ليش والله كنت متحمسه كل مااجلس ع النت اروح لصفحتج ع العمووووووم يعطيج العاافيه