من معوقات المذاكرة

[راجيه الرضا]

من أشهر معوقات المذاكرة أو التعلم عموما، تشوه الـ Discounting أو "الازدراء" ...

إنك تزدري أو تقلل من قيمة المعلومة أو عملية المذاكرة اللي بتحاول تعملها ... وده بيظهر بأشكال كتير زي:

- أنا بنسى اللي بذاكره، يبقى المذاكرة مالهاش لازمة.
- المعلومة دي مش هي المعلومة اللي أنا بدور عليها، يبقى مالهاش لازمة.
- الكتاب ده مش متأكد إن كان هيفيدني ولا لأ، يبقى مالهوش لازمة.
- الكورس ده مش مباشر وواضح كفاية، يبقى مالهوش لازمة
- إلخ ...

والتشوه ده عموما، بيكون وراه تشوه أعمق، وهو تشوه "التفكير بالأبيض والأسود" أو Black & White Thinking ... وهو إنك تبقى شايف الأمور يا أبيض يا أسود، يا صح يا غلط، يا مفيدة يا غير مفيدة ... وكأن مفيش درجات في النص ...

والعلاج هنا، إنك تدرب نفسك على رؤية الدرجات اللي في النص دي ... يعني مثلا:

- لو كنت بتنسى اللي بتذاكره ... فده مش معناه إن اللي ذاكرته مالهوش لازمة، وإنما هي خطوة انت أخدتها، هتساعدك لما تيجي تراجع اللي ذاكرته ده بعدين ...

- ولو كانت المعلومة دي مش هي المعلومة اللي بتدور عليها ... فممكن المعلومة دي تساعدك توصل للمعلومة اللي بتدور عليها، أو تساعدك تفهمها أكتر لما تلاقيها مع الوقت ...

- ولو كنت مش متأكد إن كان الكتاب ده هيفيدك ... فده مش معناه إنه غير مفيد إطلاقا ... وإنما غالبا هيفيدك بدرجة ما، أو هيديك معلومة تانية كنت بتدور عليها برضه ...

- ولو الكورس اللي بتاخده مش مباشر وواضح كفاية ... فده مش معناه إنه مالهوش لازمة ... وإنما ممكن يساعدك تطور في مهارات تفكير ما، أو يديك نصف معلومة تساعدك في البحث عن بقية المعلومة ...

- وهكذا ...

فالشاهد، إن "الاستفادة" اللي احنا بنبحث عنها في عملية المذاكرة أو التعلم عموما ... مش شرط خالص تكون استفادة كاملة بلا نقص، وصافية بلا كدر ... بل غالبا أي استفادة انت هتحصل عليها، هيكون فيها جوانب نقص وجوانب كدر لأن دي طبيعة الدنيا ...

فلو هتتجنب أي استفادة ناقصة أو مكدرة، بحجة إنك كده بتوفر وقتك ومجهودك للاستفادة الكاملة الصافية ... فانت غالبا مش هتتعلم حاجة خالص، لأن مفيش حاجة في الدنيا بالشكل ده ...

والبديل، إنك تتدرب على رؤية درجات الاستفادة المختلفة وتقديرها، لأن هي دي طبيعة عملية التعلم ... إنها بناء، بيتم بناؤه تدريجيا على مدار الوقت ... مش كتلة واحدة كاملة بتتاخد على جرعة واحدة ...

وبس كده، لو وصلت قول وصلت

#الكوتش_الأسبوعي
#أنماط_أفضل


صفحة الاستاذ محمد حسان فيس بوك ​