من اكثر الاشياء العجيبة في الإنسان

[راجيه الرضا]

من أكتر الحاجات العجيبة في الإنسان هي حرصه الشديد على أشياء لا يعلم مآلها
يعني إنسان حريص إنه يدخل كلية معينة وهو ميعرفش هل الكلية دي هتكون حاجة جميلة ليه وهيستحملها
ولا ممكن تكرهه في عيشته
أو حرص حد إنه يعيش حياته مع حد وهو مش عارف هل حياته هتبقى جميلة وفيها سكينة وهدوء ولا هتكون حياة سيئة وصعبة
عشان كدة من أجمل الحاجات في الدين هي تربيتك على إنك تدرك مدى محدوديتك وجهلك
إحنا جهلة يا جماعة وكم الإختيارات الغلط اللى بنختارها في حياتنا أكبر شاهد على دة
فمن حقك تزعل لو الحاجة اللى نفسك فيها مجتش
لكن هيخفف ألمك إنك تدرك تمامًا إن مكنش شرط أبدًا إن سعادتك كانت هنا
ولا إنك من غير الحاجة دي هتضيع
تقبل مشاعر الحزن على الفقد عادي وتعايش معاها
لكن من غير ما تندم على فواتها
ولا تتخيل إنها نهاية الكون
وفي الحديث (واقدر لي الخير حيث كان ثم رضني به)
حيث كان لأني معرفش حقيقي فين الخير
لكن رب الخير يعلم السر وأخفى


محمد إبراهيم