ممكن اقولك احبك

[نور الإسلام]

في المجلس عند (ام مازن) اللي كانت جالسه مع (ابو بدر )بجلالها بحكم انها كبيره في السن..
ابوبدر: مستحيل تجلس اكثر من كذا الناس وش بتقول..
خالد: وش بيقولون ، ارمله عايشه ببيتها وتربي اولاد اختها..
ابوبدر: والله البنت صغيره وماراح نتركها عشان تربي اولاد اختها ، واذا تكلموا عليها الناس مين بياخذها..
سادت فترة صمت ، بعدين قالت(ام مازن) : خلاص يابوبدر بكره نجيب المملك ويعقدلها على خالد..
خالد: يمه ،وش ذا الكلام؟
ام مازن: هذا افضل حل.
خالد: وزواجي؟
ام مازن: الرجَال يقدر يتزوج 4، وزواجك بيصير في وقته.
خالد: لكن يايمه..
ام مازن: برضاي عليك ياولدي ماتكسر كلمتي ، وانت لازم تفكر بأولاد اخوك..
خالد: انتي تامرين يمه وكلمتك على راسي..
ام مازن: إذا تم بكره الملكه..
ابوبدر: على بركة الله...

طلع (ابوبدر) عند (ساره)و(هند) اللي كانوا ينتظروا قراره ويتمنوا ان (ام مازن) اقنعته ..
لكن تفاجأوا من ابو بدر : بكره ان شاء الله ملكتك على خالد.
وقفت تناظر عمها وعيونها تدمع : ليـش..ليـش..حرام عليك..
مره ترميني لمازن ومره تورثني لخالد...لهدرجه انا ولا شي عندكم ..
ابوبدر: ساره...
ضغطت (هند) على يد (ابوبدر) عشان يهدى : معليش يابوبدر لكن البنت متفاجأه ، ماكملت يومين على انتهاء عدتها والحين بتتزوج..
ابو بدر: لكن هذا لمصلحة الجميع..
جلست (ساره) تبكي: حرام عليكم ..والله حرام..
شافوها اولاد اختها تبكي وجلسوا جنبها يبكون ، ضمتهم ومسحت دموعهم وهي تقول : مافي شي حبايبي ليش تبكون؟
قال حسن: انتي بتروحين وتتركينا مثل ماما وبابا..
بكت من كلامه اكثر ، وقالت : لاحبيبي انا بجلس معاكم مهما صار..
رفعت راسها لعمها وقالت: اللي تشوفه صح ياعمي سويه..
ابوبدر: الله يرضى عليك يابنتي..وصدقيني بتعرفين في النهايه انه لمصلحة الجميع..
ساره : الله يجزاك خير ياعمي.
استأذن العم وزوجته وخرجوا، وساره جلست تفكر بحياتها....قطع تفكيرها صوت مسج من (امل)[مناسب أزورك اليوم]
ارسلتلها (ساره) [مناسب الله يحييك ، واصلا انا محتاجتك]

 

[كــبرياء أنثى]

لا حراااام .. والله حزنت عليها ماتهنت:4: .

 

[نور الإسلام]

بعد المغرب كانت (امل) عندها: تعبت من الدوجه بالسوق كل يوم ، قلت بجلس معاك اليوم ويمكن انام عندك كمان..
ساره: الله يسعدك ياأمل والله بفقدك اذا تزوجتي..
امل : ابشرك بسكن في نفس الحي عندك ، يعني بتطفشين من زياراتي..
ابتسمت ساره وسرحت شوي..نادتها (امل) : هيه نحن هنا وين وصلتي؟..
ساره: امل عمي بيزوجني لخالد بكره
امل : خالد اخو مازن!!
ساره : ايه..يقول الناس بتتكلم عليَ..
امل : لكن الرجال مملك
ساره : عمي مو مقتنع فاما اتزوج خالد او اترك اولاد اختي وارجع لبيت عميز
امل: طيب..
ساره : طبعا وافقت على الزواج مع انه جاني يعطيني خبر مو يستشيرني..
بكت( ساره) وهي تقول:امل انا تعبانه حاسه كأني كوره يشوتوا فيها مثل مايبون...
ضمتها (امل): ياقلبي ياسارونه لاتقولي كذا ، كل شي يصير في حياتنا مكتوب لنا قبل ننولد .
تركتها تبكي على كتفها شوي، بعدين قالت لها: سارونه حبيبتي قومي صلي الإستخاره ، وإن شاء الله ربي بيسر لك الخير..(وعسى ان تكرهوا شيئا وهو خير لكم)..

كان لوجود (امل ) مع (ساره) اكبر الأثر في التخفيف عنها...

 

[نور الإسلام]

في اليوم الثاني ..وبعد الملكه والعشاء..راح (خالد) على شقته ، ودخلت (ساره) شقتها مع اولاد اختها...
نومتهم ووقفت عند شباك غرفتهم، سمعت صوت (خالد) يكلم(حنان) ...
خالد: والله ياعمري انتي حبي وحياتي..
...................................................
خالد : افهميني ياقلبي والله ماتزوجتها الا عشان تجلس مع اولاد اخوي..
.................................................
خالد: والله ياعيوني ماناظرتها عشان المسها.
............................................
خالد : ياحبيلهم اللي يغارون..تدرين اني اموت عليك وحشتيني..

عند هذا الحد خرجت من غرفة الأولاد وراحت غرفة مازن اللي صارت غرفتها..وقفت عند باب الغرفه اللي ماجمعتها مع زوجها الله يرحمه...وجلست على السرير اللي ماتهنت فيه كزوجه..
حضنت وسادتها وجلست تبكي لحد ماغفت عينها ، صحيت قبل الفجر على بكاء (حسين) اعطته قارورته ، وقامت تصلي وتدعي لغاية ما أذن الفجر..
الساعه 10 وبعد مافطرت مع الأولاد وجلست تلعب معاهم ..دق جوالها..
ساره : هلا خالتي
ام مازن: السلام عليكم ورحمة الله
ساره : وعليكم السلام ورحمة الله
ام مازن: وينك يابنتي انتي والعيال ودي اشوفهم..
ساره : ان شاء الله ياخالتي انا كنت بنزلهم لك العصر
ام مازن: ابيك تنزلين على الغدا معاهم ، تدرين مافي احد وخالد صار زوجك..
ساره : حاضر ياخالتي انتي تامرين..
ام مازن : الله يرضى عليك يابنتي..
قفلت (ساره) الجوال وهي حاسه بتوتر : ياربي وشلون بجلس معاه على طاوله وحده وهو واضح انه مو طايقني ...
طيب ماعلي منه انا نازله عشان امه طلبتني مو عشانه..
قامت اخذت شور ولبست تنوره بني وبلوزه سكري ازرارها بنيه ورفعت شعرها بشباصه كالعاده
ولبست اكسسوار ذهبي وتعطرت بمس ديور ..
لبست اولاد اختها ، ونزلت معاهم عند (ام مازن) قبل الظهر لقتها جالسه تصلي الضحى ، طلبت من (سوناتي) تجهز الشاي ، ورجعت عند (ام مازن) اللي كانت آخذه اولاد ولدها في حضنها وتبكي..
لما حست على (ساره) مسحت دموعها وقالت : تعالي يابنتي ..
ونادت على (سوناتي) تاخذ الأولاد يلعبوا في الحوش..
ساره : لكن ياخالتي شمس عليهم .
ام مازن: لا يابنتي فيه جهه مظلله نجلس فيها نتغدى ايام البرد..انتي الظاهر ماقد نزلتي الحوش..
ساره : لا والله ياخالتي غالبا في الشقه..
ام مازن : ليه يابنتي ، انا احسبك تنزلين الأولاد يلعبون في الحوش..شوفي حبيبتي هذي الأيام الجو زين وابيك تخلينهم ينزلون العصر لأن الشمس زينه لهم..
ساره : ان شاء الله ياخالتي..
سألتها (ام مازن) : عسى كل شي زين..
انحرجت ساره لكن ردت: ايه الحمدلله .
ام مازن كانت عارفه ان ولدها خالد كان رافض الزواج من ساره وكانت خايفه انه يكون بين هالشي لها، فعادت عليها السؤال : انتي متأكده ان كل شي زين؟
في هاللحظه دخل خالد وقال: ايه يمه كل شي زين..
وانحنى يسلم على راس امه ، ووقف بجنب(ساره) ومسكها بايده اليمين مع كتوفها وضمها له وسلم على خدها وقال : ريحي قلبك يمه كل شي زين ، صح ساره؟
انحرجت( ساره) ونزلت راسها للأرض ، وسحبت نفسها وهي تقول : بروح اشوف الأولاد..
ابتسم (خالد) وقال : يمه وش فيك احرجتي البنيه..
ناظرته امه وقالت : ما أدري ليش احس فيه شي ، لكن ياولدي تراها يتيمه وضعيفه..

 

[محبة الطاعات]

وعليه سارة عورت قلبي وايد الله يكون بعونها

و انصدمت يوم مات مازن حسيت روحي مو قادرة اكمل قراية

*~( نور الأسلام )~*

مشكورة على هالرواية الروووعة و متابعتج للنهاية

امس شفتج يوم تكتبين ان البارت انمسح

و الصراحة كان خاطري اقولج الله يكون بعونج صج هالحركة تقهر

بس ما شاء الله عليج كملتي

الله يعطيج العافية حبيبتي

و السموحة على الطوالة​

 

[نور الإسلام]

الله يسعدكم على المتابعه
حبيباتي انا هاليومين عندي مناسبه وبكون مره مشغوله
لكن بجتهد اني اكمل القصه لأنها قربت على النهايه

 

[نور الإسلام]

اما ساره فوقفت عند باب الحوش ماسكه قلبها اللي يرجف من تأثير مسكة (خالد) لكتفها
حست بدفى يسري بجسمها، لمست خدها اللي سلم عليه (خالد) وابتسمت بخجل..
(يارب يصير كل شي تمام)
شوي تسمع صوت (خالد) يكلمها بهمس لكن بقسوه: اسمعي ، اياك تينين للوالده أي شي فاهمه.
فاجأها كلامه لكن هزت راسها: ان شاء الله
خالد: يالله حبيبتي انا بروح اصلي الظهر
قال هالعباره بصوت عالي يوم لمح امه وقفت عند الباب تناظرهم
(ليش يسوي كذا، مازن الله يرحمه ماكان بيننا تواصل لكن كان يحترمني)
وهم جالسين على الغداء دق جوال( خالد) وكان ابو زوجته..
خالد : هلا عمي شلونك؟
العم: اسمع ياخالد نبيك ضروري اليوم بعد العصر
خالد: عسى ماشر ياعمي
العم: ابد لكن لازم نحط النقاط على الحروف ...الحين الوضع اختلف وانت صار عندك زوجه وبيت ثاني...
خالد. لكن ياعمي انت فاهم السبب..
ايه لكن البنت رافضه وتبي الطلاق
خالد : كيف؟
العم : انت تعال ويصير خير
خالد : ان شاء الله ياعمي
رمى الملعقه من ايده ، وناظر(ساره) بحقد ،وهي نزلت عيونها للأرض..
خالد : يمه بنروح العصر لبيت عمتي
ام مازن : ليش ياولدي فيه شي
خالد : حنان طالبه الطلاق لأني تزوجت
وقفت (ساره) وأخذت اولاد اختها وطلعت على الشقه، غيرت ملابسها ولبست برمودا بيضاء وبلوزه قطنيه كت حمراء
رفعت شعرها بشباصه وزينته باكسسوار فراشه حمراء...
جلست تلعب مع اولاد اختها، دخل عليهم بعد العصر يعطيعم المقاضي ، كان (حسان) جالس على ظهرها وهي تمشي على ايديها وركبها ، و(حسن) يمشي جنبها ويقول : امشي بسرعه ياحصان,,
وقف يتأملهم شوي ، انتبه (حسن) لعمه فناداه : عمي جا عمي جا..
تناولت منه الأغراض بدون ماتناظره او تتكلم معاه.

 

[start change]

كمللللللللللللي بليييييييييييييييييييييييييز ابا 3 بارتاااااااتززززززز ههههههههه

 

[قمة الانوثة]

بليييييييييييييييييييز كملي متحمسة مرررة

 

[start change]

مرررررررره والله متحمسه

 

[نرجس7]

يسلمو حبيبتي ع هالقصة والسرد الأكثر من رائع
والله إني دمعت عيني لما توفى مازن
ماكنت متوقعة القصة بتروح لها المنحى​

 

[start change]

كل شووووويات اشيك وما في بارت جديد و ربي قهررررررررررررررررررر

وبرررررضو بستنىى

 

[start change]

يا الله قد ايشش عمها متسرررع مدري كيف تفكيرو يمكن وجهة نظرو صعب افهمها بس اكيد كل شي يصير لنا هوا خير من الله لنا >>>>يااااارب لا تحرمنا رضاك عنا ..

 

[start change]

خالد كمان انظلم بس ساره مالها ذنب

يسلمووووو يا حلوووووه عالروايه وبليييييز تراني انتظركي يا قمررررر ويااااااارب اجي والقى بااارتاااات طوووويله هههههههه

 

[حلا شرقي]

بانتظارك عزيزتي طولتي علينا .......

 

[مسك الضحى]

ـــــــــــــــــــــــــــــــــــــ

 

[start change]

ياااااارب تكووووووني بخييييير ياااااااعسسسسسل

 

[نور الإسلام]

اهلين حبيباتي
وسامحوني على التأخير
كان عندنا مناسبة زواج وتعرفوا استعدادات ماقبل وتعب مابعد
لكن الحمدلله اللي تمم الزواج على خير الله يوفقهم ويوفق كل بنت بالزوج الصالح....
وابشروا حبيباتي ان شاء الله بكمل الليله

 

[نور الإسلام]

مر اسبوع على موضوع (خالد) و(حنان)، و(ام مازن) راحت معاه عشان تشرحلهم وضع اولاد مازن وانهلبلبليلم بحاجه لأحد يرعاهم وانه صعب وجود (ساره) بدون اي صفه في البيت...
وطلبوا فتره عشان البنت تفكر وتستخير...
فكرت (ساره) انها ممكن تقنع حنان فاتصلت على بيت العمه وطلبت ( حنان)...
ساره: السلام عليكم
حنان : وعليكم السلام...مين معاي؟
ساره : انا ساره
حنان : ساره!!...مين ساره؟!
ساره : ارملة مازن..
حنان: ولك وجه بعد تتصلين..خير ان شاء الله؟
ساره : حنان اسمعيني..انا وخالد متزوجين على الورق بس يعني مابيننا اي شي..
حنان : تقصدي انه من يوم تزوجتوا مانام معاك..
ساره: ايه..صدقيني نحنا متزوجين عشان الأولاد بس ... وانا متأكده ان خالد يحبك ومتمسك فيك...
حنان : طيب ..طيب..شكرا على اتصالك...مع السلامه.

قفلت (حنان ) السماعه وراحت تجري على امها وهي مبسوطه : ماما ساره كلمتني وقالتلي انها و(خالد) مابينهم علاقه وانهم عايشين مع بعض كذا بس..
ام حنان : ايش يعني عايشين مع بعض كذا بس؟
حنان : يعني زواجهم على الورق بس
ام حنان : ياويلي عليك يابنتي...
وراحت عند (ابوحنان): الَحق كنا بنزوج بنتنا لواحد عاجز..
ابوحنان : وانتي ايش عرفك ؟
ام حنان : اتصلت (ساره) زوجته وقالت ل(حنان) انهم عايشين مع بعض زي الأخوان وانه ماقربها..
ابوحنان : لاحول ولاقوة الا بالله ...الحمدلله انه انكشف على حقيقته قبل توقع الفاس في الراس..

اما (ساره) فبعد اتصالها ب(حنان) ، اتصلت على (امل) تحكيلها على اللي عملته..
امل: صاحيه انتي وشلون تقولين لها
ساره: حبيت انها تكون فاهمه الوضع صح عشان ماتغار مني بالعكس تعتبرني اخت..
امل : الله يستر عليك ياساره...
ساره: وش فيك تراك خوفتيني..
امل : والله انا اللي خايفه عليك منهم ، لأن عمته هذي مصيبه أخاف تقول انك رابطه الرجال..
ساره: وش رابطته ...اقول خلينا من هذي السالفه واحكيلي وش سويتي مع خطيبك...
امل : كل شي فيه يهبل ماعدا اسمه (عبدالرحمن) مثل المقرود اخوي..

 

[نور الإسلام]

بعد المغرب اتصل (ابوحنان ) على (خالد) وطلب منه يقابله في البيت....
فرح (خالد) وتروش وتشخص يظن انه بيقوله انها وافقت، دق على جوال ( حنان) لكن ماردت ، قال في نفسه : ياعمري عليها اكيد مستحيه تقول ماأقدر على بعدك..
دخل المجلس ولقى اخوان (حنان) وعمانها مجتمعين ، لكن نظراتهم ماكانت تطمن، فسلم وجلس...
ابو حنان: اسمع ياولدي احنا وافقنا عليك لأنك رجال ومن عايله طيبه..لكن ماكنا نظن انك بتخدعنا..
خالد: كيف؟
ابوحنان: اولا : زواجك بدون ماتعطينا خبر..
خالد: لكن ياعمي..
ابو حنان : اسمعني ولاتقاطعني..
وثانيا: ليش ماعلمتنا انك عاجز، ان كان ممكن تتعالج ليش مارحت،وان كان وضعك لايمكن علاجه فرجاءا مثل مادخلنا بالمعروف نخرج بالمعروف.
كانت صدمه لخالد اللي قال : ومين قال اني عاجز..
تدخل اخو حنان : متزوج من اسبوع وعايش مع زوجتك بدون ماتقربها ليش؟ اخوان مثلا..
ماعرف كيف يرد وخاصة ان المجلس فيه الصغير والكبير..
فتدخل عم حنان الكبير: اسمع ياولد قبل ماتطلع من هالمجلس تطلق البنت ..هي ماهي بايره..بنتنا الف واحد يتمناها ، واللي بيطلقها منك بيعقدلها على ولدي احمد..
طبعا (خالد) حس كل الشياطين قدام عيونه..فقام من المجلس وقال: بلغوها انها طالق وورقتها بتوصلها...