ملابسك القديمه تلاعبي فيها بقليل من الافكار لتصبح عالموضه،، بالصور
المثل يقول الحاجه أم الاختراع ،،، وعلشان الصيفيه كلها عزايم وطلعات وزيارات ،، يبي لنا لبس حلو وعالموضه وبنفس الوقت نوفر شوي ،، لان الميزانيه بالصيفيه تطير ويصيبها عجز
انك تقدرين تسوين حركات بسيطه تحولين ملابسك من قديمه الى جديده وعالموضه
انا جمعت أفكار كثير واخذت التنانير والبلايز والجلابيات الي راحت موضتها ،،، وقمت اعدل وأبدل واقص واشيل واحط
بالبدايه أجمعي كل ملابسك القديمه واللي تحسين انتهت موضتها وكرفتيها كرف
اجمعي
العبابات القديم
الطرح والشالات
الايشاربات
التنانير والبلايز
البنطلونات
الجلابيات وحتى القمصان
الشراشف والملايات
فساتين السهره
فساتين البيت
أعديهن لعمليات التجميل والترقيع اللي بنقوم فيها وجهزي افكارك
طبعا انا بشرح لكم بالصور اللي ساعدتني واقتبست من أفكارها،،،
والحين الموضه الترقيع وهالشي بيساعد كثير
مثلا شوفوا هالصوره
عباره عن أقمشه متنوعه وملونه
هاتي كل الملابس اللي بترمينها وقصصيها مربعات متساويه وعطيها الخياط يركبها لك جنب بعض وبعدين يقصها ويصلحها تنوره
وحاولي انتي تنسقين له الشكل والالوان ،،، وتقدرين تسوين المربعات بشكل كبير ،، مثل ماشفت وحده بمنتدى مجمعه الايشاربات المربعه جنب بعض ومصلحتها تنوره ترقييع.
فكره ثانيه بالترقيع
هاتي تنوره واسعه ،،، ونسقي معها أقمشه من عندك ،، وقصيها مربعات كبيره وركبيها على جنب التنوره
وبيتغير شكل التوره مررررررررررره وكأنك شاريتها جديده
ولا تستهلكين كل القماش اللي قصيتيه ،،، حاولي انك تبقين واحد من الاقمشه حتى تسوينه (بدي) او بلوزه قصيره حتى تلبسينه مع البلوزه
عاد انتي وافكارك بالنسبه للبلوزه
فكره اخرى
هذي عاااااااااااااااد تنورتي اللي رفضت خواتي يخيطون مثلها
وش رايكم تهبل صح؟
والله يابنات انها بكل الاسواق منتشره وسعرها ب 130 و 150 ريال ،،،،
بس لاحظت ان اللي بالسوق يصير لونين او ثلاث بس وحتى القماش مو ذاك الزين
ترا فكرتها بسيطه ،، وفيه مجال واااااااااااااااااااسع للأبداع
حصلت عندي بدولابي القديم ،،، شيفونات كثييييييييييير ،، كنت البسها شالات مع الفساتين ،، ايام موضة الشال
يجي طوله وعرضه بالضبط مثل مقاس الشيله اللي نلفها عالراس
حصلت كثير وبالوان مختلفه ،،، وديت الصوره للخياط وسالته كم تحتاج متر قال متر من كل قماش
والحمدلله طلع نفس المقاس اللي يبي ،،،عندي نفس الالوان الموجوده بالصوره الاخضر والعنابي والبني والاخضر الفاتح
بس المشجر اللي بالاخير ماحصلته وجبت قماش مشجر ثاني وحرصت يكون فيه لونين من الالوان الساده حتى تصير الالوان متنااااااااااسقه
عاد هالتنوره ماعندي صبربصلحها بأسرع وقت ،،،،جمعت كل الاقمشه وان شالله بوديها قريب
وعلى فكره تقدرين تجمعين الطرح والشيل اللي عندك وتخلين الخياط يسويها لك تنوره واسعه وكل طبقه بتطلع بشكل
اتوقع بتصير خباااااااااال
شوفوا هذي صوره ثانيه لنفس الفكره
هذي عاد أسسسسسسسسسسسهل فكره شفتها
اذا عندك تنوره قصيره ،، سواء كانت قصير للركبه او قصيره شانيل ،، وتبين تطولين فيها وبنفس الوقت تغيرين شكلها
هاتي قماش فيه شغل حلو وخلي الخياط يقص التنوره من الوسط ،،، ويركب القماش الجديد وبكذا بتصير التنوره طويله وبشكل جديد
اهم شي يكون القماش الموصول شكله حلو وفيه شغل ملحوظ
وتقدرين تركيب من نفس القماش على البلوزه ،،، بأي شكل تبين
مثلا تقصين مربعين وسط وتخيطينهم عالبلوزه ،،، او تخيطين بدي من القماش التوصيل وبكذا تتناسق مع التنوره
نجي الحين للبلايز والبديهات والتوبات
يا سهل التلاعب فيهم
بعطيكم اسهل فكره
عندي بلوزه احبها مره ولها اكثر من 6 سنين عندي ،،، قماشها حلو وماسكه عالجسم لونها اسود ساده وكمها قصير يجي ربع
قررت اغير فيها مثل هالصوره
سهله صح؟
تقريبا الكم نفس طول كم اللي بالصوره ،، بس ماراح احط نركيبه مثل اللي عالصدر لانها تبي خياط وانا مابي اخيط عليها شي عشان كذا بجيب بروش حلو ونفس اللون بركب من تحت شريطة ساتان
طبعا بالاول راح اشوف لها تنوره تركب مع الالوان اللي بركبها عالبلوزه عشان ماتوهق بالتنوره بعدين
وطبعا مع بعض الاكسسوار والشنطه والجزمه وروج بتطلعين روووعه
عندي نفس البلوزه هذي بس بكم طويل وسااااااااااده
بقص الاكمام واخليها قصيره واركب لها مغاط حتى تتكرمش وعلى الصدر بركب لها وردات مثل الصوره بالضبط
وش رايكم ؟
بالنسبه لهذي تقدرين تحولين البدي الى بلوزه بكم
كيف؟
اذا عندك بدي قديم ،،، هاتي قماش نوعيه ثاني مثلا تل او دانتيل ويكون نفس اللون وخلي الخياط يوصل القماش الجديد بالبدي القديم ويسوي له يدين وياقه من نفس قماش البدي القديم.
حلو الكلام والا مش.؟؟؟؟!!!
او تلبسين بلوزه مخرمه ونفس اللون تلبسين بدي ضيق يعني من غير ماتخيطينهم
اذا عندك بلوزه قديمه ضيقه وتكون ساتان او تفته ،،، قصيها من عند الصدر وركبي لها شيفون مشجر بدون كم
وطوق حول الرقبه نفس لون البلوزه اللي قصيتيها
ترا يابنات لها طوق حول الرقبه بس انا قصيته من غير مانتبه
عجبتني الفكره مره بس مقدر البسها كذا بدون كم ،،، واذا لبست شي داخلي بيخرب الموديل
وش رايكم ؟؟ وش يصلح معها؟
أي بدي قصي سيوره وخليه توب ،،،وركبي له تعليقه حول الرقبه نفس الصوره
انا عندي تنوره سترتش ،،، بسويها توب وبركب له تعليقه من قماش مشكوك
بس انا عكس ،،، البدي ساده وقماش التعليقه شك الوانه كثير
وتلبسينه فوق بلوزه او تلبسين فوقه جاكيت قصييييييير
هذا البدي عجبني مررررررررررررره
هذي سههههههههههههههههههههههله وبسيطه مره وماتبي شغل
هاتي بلوزه بيضاء اذا كانت طويله قصي الكم بس مو كله لا خليه نفس طول الصوره وكمليه بلون اسود
وروحي محل الكلف وهاتي ستراس باي شكل تبين وركبيه على الصدر او باي طريقه تعجبك
مو شرط ابيض واسود
اذا عندك بلوزه ورديه ركبي لها كم فوشي
واذا عندك بني ركبي معها بيج
تنسيق الالوان شي راجع لك ،،،واذا عندك بنطلون اسود
ماتبينه تقدرين تسوين فيه نفس الحركه وبطلع عندك طقم كامل
هااااااااااه ترا للحين ما شترينا شي
كل اللي طلع معنا جديد من ملابسنا القديمه
الحين الجلابيات
ماعندي أفكار كثير بخصوص تغيير الجلابيات الا فكره وحده
وهي انك تحولين الجلابيه الى بنجابي
بما ان الجلابيه تجي واسعه ،،يمكنك قصها الى قطعتين
بشرح لكم بالصور
هاتي جلابيتك القديمه وياليت تكون شيفون او تل وخلي الخياط يقص الاكمام كلها ويقص الجلابيه من تحت لين الركبه او اطول شوي
اختاري احد الطريقتين اللي بالصور
يا اما قصه عاديه او قصة دائريه مثل الصوره الثانيه ( انا عجبتني الثانيه)
هاتي بنطلون قديم عندك ويفضل يكون سترتش وقصيه من فوق الركبه ،،،
شفتي الاكمام حقات الجلابيه اللي قصيتي ركبيها توصيله للبنطلون الاسترتش ،،، ويكون عندك بنجابي من قطعتين القطعه اللي فوق والبنطلون اللي تحت
واذا كانت الاكمام ضيقه وما تكفي ساقك ،،، خلي الخياط يوصل البنطلون بالقماش الباقي من الجلابيه
طبعا ماراح تلبسين البنجابي من غير كم ،،، هاتي شيفون او تل نفس لون جلابيتك وصلحيه شال طويل مره
ليش طويل؟
حتى تغطين فيه يدينك وترجعينه على ورا وتربطينه بشكل خفيف ،،،او تضمين الشال على جنب وتثبتينه ببروش
عاد ماتطوف عليكم حركات لبس الشال ،،،، البسيه بأي شكل بس المهم تسترين يدينك
واذا بغيتي البنجابي بكم نص او ربع لاتقصينه كله خلي شوي.
فكره ثانيه
وهي انك تلبسين البنطلون والشال نفس اللون بس يكون من درجات لون الجلابيه بس افتح شوي
هذي صوره ثالثه
شوفوا هالصورتين
البلوزه طريقتها سسسسسسسسسسهله وتقدرين تسوينها من غير خياط
هاتي قماش وقصيه مستطيلين متساوين وخيطي مع الجنبين بس ومن فوق ركبي لهم سيور
هاتي من محل الكلف ،،، حبل كرستال او سلسله حلقات او أيييييي شي تحصلينه بمحل الكلف ينفع تعليقه
وركبي واحد يمين والثاني يسار ،،، والبسي البلوزه وبالعافيه
اختي اشترت وحد بنفس الطريقه وعاااديه جدا ب 200 ريال
يعني لو عندك قماش شيفون ماتحتاجينه قصيه بنفس الشكل وركبي له سيور
هذا فكره السيور اللي اقصد
ممكن تطبقين نفس الفكره من اي قماش عندك زايد او من قماش فستان سهره فكيه وخيطيه
من غير ماتشترين
هذا توب اسود مع بروش بالصدر
اذا عندك بلوزه ماسكه عالجسم ،،،قصيها من عند الصدر وقصي الاكمام وركبي معها بروش
والبسي تحتها بدي بكم قصير مره ويكون لون مخالف
او البسي فوقها البلوزه القصيره مره اللي تجي فوق على حد الصدر
انا بسوي نفس الحركه ،،، البدي لونه وردي غامق والقطعه الداخليه وردي فاتح وبركب تعليقه فخمه بدل البروش وسلسلة التعليقه
تربط على الرقبه
ممكن تلبسين لون ساده والقطعه الثانيه مشجره
هذي بعد سسسسسسسسسسسهله
هاتي بدي بأي قماش وبأي لون ،،،واشتري من محل الكلف شريط عريض يكون شريط شك او ترتر وخلي الخياط يركبه بالوسط
وخليه يكرمشه شوي من تحت ،،، تقدرين تلبسين تحته بدي بكم قصير يكون لونه مكرر بالشريط اللي بالوسط
او تركيب قماش من نفس قماش البلوزه
بالنسبه هالصوره
هاتي تنوره قديمه يكون قماشها تل او شيفون تكون ساده او ملونه وقصيها من فوق وركبي لها تعليقه مثل اللي بالصوره
وخلي الخياط يضمها شوي مع الوسط حتى يتكرمش
مثل منتو شايفين التعليقه ممكن تكون من اكسسواراتك القديمه وتستفيدي منها
اذا قصرتي التوب البسيه كفستان سهره عن زوجك
او طوليه شوي لتحت الركبه والبسي نحته بلوزه بكم حاير وبنطلون سترتش
ويكون لبس بيت عند ابو عيالك
ومن غير ماتشترين جديد وتكلفين عليه
اذا عندك فساتين زواجات ناعمه وماتبين تلبسينها مره ثانيه ولا تبين ترمينها ،، استفيدي من اقمشتها وحوليها الى توبات او فساتين بيت نعومع او فساتين سهره لزوجك
بعطيكم الصور وهي تشرح نفسها ،،، مجرد حركة بسيطه قص وتركيب تعليقه عالصدر وتقصير من تحت او تركيب شريطه ساتان عالصدر او عالبطن ويطلع بعدها ياسلااااااااااام لبس جديد
طبعا موديل القصه هذي دارج مررررره بالاسواق ،،اذا عندك فستان نفسه ،،،قصيه قصير وركبي له شريطه ساتان ويصير فستان جديد
هذا سهل واضح مايبي شرح ونفس اللي قبل
نجي عاد للاستفاده من فساتين السهره او فساتين البنوتات الصغار
اذا عندك فستان سهر من الموديلات القديمه المنفوش والقماش تفته او تل او اي نوع لااااااااااااااا ترمينه قصيه
بالنسبه للاسود
عندي قماش ساتان اسود بفصله نفس هالفستان لاختي وبركب له شريطه ليموني او فوشي وبخليها تلبس بنطلون سترتش لنص الساق بلون فوشي او ليموني وطبعا بلوزه داخليه نص كم بنفس لون الشريط
وش رايكم ،، كيووووت صح؟
على فكره
فساتين الزواجات مانلبسها الا مره او مرتين ومحد يتذكرها ابدددددددد ولا يتذكر قماشها
عشان كذا تقدرين تسوين منها توبات او فساتين بيت او تنانير او حتى بناطيل ،،،مع شوي تنسيق لقطعه اخرى
ومع شوي اكسسوارات يطلع لك لبس جديد وعالموضه
ومع شوي اكسسوارات يطلع لك لبس جديد وعالموضه
وماتوقع ان فيه احد بيقول هذا فستانها الفلاني مغيرته
اصلن بالزواج محد يدقق
شوفوا فكرة هالبلوزه القصير اللي مع الفستان ،، عاجبتني مررررررررررره
فيه نوعيه من الاقمشه ماعرف اسمها بس اعرفها بالشكل والملمس ،،تكون ماسكه عالجسم وبنفس الوقت كأنها قطن خفيف
شفت وحده لابس نفس موديل اللي بالصوره بس مقفله من قدام ،،،لابستها مع بدي ساده والبلوزه مشجره بس اطول شوي حتى تغطي الابط
ياليت اذا وحده عندها صور لموديلات قريبه من موديل البلوزه تنزلها لي
شوووووووووووفوا موديل هالبلوزه اللي فوق الفستان
روووووووووووووووعه
بس المشكله اذا رفعتي ايدك يبان الإبط
ودي افصلهم مشبوكين بس اخاف يخرب الموديل
طبعا كل اللي شرحته تقدرين تسوينه من قماش فساتين سهره شك
عجبتني مرررررررررره فكره هالبدي
اذا عندك فستان سهره قصة سنتيان وفيه شك ،،، قصي الفستان من حد السنتيان وهاتي قماش من نوعيه حلوه ويكون لونه من درجات لون السنتيان ( لازم نراعي تناسق الالوان) وخيطيه تحت السنتيان وحطي له خيوط تربط من ورا الرقبه
تلبسينه في سهره عند زوجك ،،، او اذا بتلبسينه في مناسبه ،،، البسي فوقه جاكيت قصير نفس الفكر اللي بالفستان
ويكون الجاكيت من نفس قماش ولون الجزء السفلي من البدي.
حلوه فكره هالتوب
هاتي بدي ساده وبدي مشجر او جيشي او حتى يكون تايقر
طبعا شغلنا كله على بلايز وبديهات قديييييييييييييييييمه
قصي البدي من عند الصدر ،،، ونفس الطريقه بالنسبه للبدي المشجر قصيه من عند الصدر وخلي الخياط يخيطهم على بعض
والبسي تحتهم بلوزه قطن كم قصير.
أفكار متفرقه بدون صور
رتبت دولابي القديم وحصلت عدد من العبايات اللي ما عاد البسها وبحاله جيييييده وخامتها ممتااااااااازه وسوادها روعه
عندي عبايه من تويلا ،،خربها علي الخياط وطلع شكلها نكته وماتنلبس ابد
فكرت اسويها تنوره وبدي او بنطلون وبدي
بصراحه خامتها تهبل وقلت اسويها تنوره لانه ماعندي تنوره سودا بس للحين ماحصلت موديل ناعم يتناسب مع خامتها
فيه نوعيه قماش عند تويلا يجي ثقيل وطايح القماش وفيه شوي خشونه
ماودي افصلها ساده لان القماش كثير وينفع اسوي منها موديل
ياليت اللي عندها موديل ناعم وحلو تنزل لي الصور
الزبده
انك تحولين عباياتك القديمه الى بناطيل او بلايز او تنانير او حتى بديهات ،،،وتعرفون دايما اقمشة العبايات حلووه وسوادها روعه
وبالسبه للشيل مثل ماقلت قبل فصليها تنوره ترقيع او تسوين منها فستان بيتي نعووووم
حتى الشيل الملونه تصلح نفس الطريقه وبتطلع احلى
ممكن تسوين الملابس لاطفالك ،،،صحيح انه سهل وتطبيق مبتدئه بس يوضح ويقرب الفكره
وفيه وحده سوت من ملاية السرير ،،طقم مطبخ حلووو
صلحت ماسكات قدور ،،مريله ،،سله،،،مفرش لطاولة المطبخ
كل هالافكار من ملابسنا القديمه
وياليت محد يرمي ملابسه لانه محاسب عليها يوم الحساب ،،،نحاول قدر مانقدر نستفيد منها
رجااااااء ابي تفاعل منكم مثل مااشوف في باقي المواضيع وابي استفيد من افكاركم والصور الموجوده عندكم ،،،، واللي تقدر تطبق أي فكره ،، ياليت تسويها وتنزل لنا الصوره حتى نشوف كيف تغير لبسها ويمكن تضيف شي ماخطر على بالنا
اسم الموضوع : ملابسك القديمه تلاعبي فيها بقليل من الافكار لتصبح عالموضه،، بالصور
|
المصدر : الأناقة والجاذبية
