مفهوم العوض في حياتنا

[راجيه الرضا]

أسوأ حاجه بتفسد عليك علاقاتك .. لما تتعامل مع إللي قدامك على أساس إنه (العوض ) !
هو ده إللي هيبدِّلك حياتك ..
ويعوضك عن كل نقص ويمسح كل وجع ويغير أفكارنا عن كل حاجه سيئه ويحببنا في الدنيا .. وجوده يطبطب ويراضي .. وجوده بيعوضك عن كل إللي قصّروا في حياتك .. كل إللي شمتوا فيك .. وعايز تتمنظر بعوض ربنا ليك .. عن كل إحساس إفتقدته .. إتمنيته .. حلمت بيه !

كارثه لو بقت دي حساباتك عن مفهوم العوض !!
وكإنك علشان إتوجعت ولا تعبت وإتئذيت مستني حقك تالت ومتلت ?
نسيت إنك لسه هنا ( في الدنيا ) ونسيت إن العوض ده لسه ( بشر ) !

إنك تطلب من ربنا العوض :
ده مش معناه إنك تشترط مواصفات جواك وتتحكم في عطاء ربنا ليك وإنت مش مدرك !

علشان كده في حاجه مهمه تفرق كتير لو فرقنا بينها :
إنك تطلب عوض عن حاله كنت عايشها مش عن شخص !
بمعنى :
الأشخاص في حياتنا هدفهم السكن والموده مش حتى الدعم المباشر وده الحكمه منه إستقرارك النفسي فتطلع أفضل ما فيك من قدرات وإنجاز ..
في أشخاص وجودهم بيقتل قدراتك والبعد عنهم ضروره ..

فساعتها بتطلب العوض عن حاله تقدر فيها تعيش مستقر وسوي .. مش فكرة شخص بمواصفات خاصه يعوضك عن كل التفاصيل إللي كانت موجوده في أشخاص تانيه وتجارب تانيه !

المعنى ده هيخليك واقعي .. متقبل عيوب العوض ده .. مش بتشيله شيله مش شيلته .. متفهم إنها ( الدنيا ) يعني مفيش عوض أصلاً بمفهوم ومعتقد إنك خلاص كده خلصت إبتلاء !
هيتغير شكل الإبتلاء بس مش أكتر وهتتعلم دروس جديده .. أو هيتكرر هو هو لو متعلمتش !

الخلاصه ..
إنك متشترطش على ربنا شكل للعوض .. لانك ممكن تبقى متعوض فعلاً لكن مش حاسس ولا راضي وبالعكس بتظلم وبتعَجَّز ..
ومتنساش إن في فرق كبير بين إنسان يبقى عبء نفسي على حياتك و بين آخر وجوده علاقه سويه وهدوء فيعينك على رحلة الحياه .. بالبساطه دي .. ده قمة العوض !

وجايز العوض يبقى في صورة إن ربنا يغنيك أصلاً عن إحتياجك للعوض !
كله وارد ..


#ساره_أسامه



منقول بتصرف