مشكلتي ماأحب نفسي

[حساسه جدا]

السلام عليكم ورحمه الله وبركاااته

انا اميرة جديدة في هذا المنتدى الاكثر من رااائع

إستفدت منه كثير ومن خلااال بعض محاضرات الدكتورة ناعمه بارك الله فيها

عندي مشكله وحبيت إنكم تفيدوني فيها

يمكن مشكلتي تضحك لكني فعلا أعاني منها ولم أكتشفها إلا قريب

مشكلتي إن ما أحب نفسي :icon1366:

أشرح لكم كيف

يعني إذا كنت في السوق أبي أشتري شئ ما أفكر في نفسي دائم أفكر في عيالي أشتري لهم اول شئ

وكل شئ وما أخلي يقصرهم شئ من ملابس وإكسسوارات للبنات وألعاب وأشتري لبيتي كل مارحت السوق
حتى لو حاجه بسيطه واشتري لأمي واخواتي

وإذا شفت أي غرض لي احاول اقنع نفسي إنه ماهو ضروري وحتى إذا إشتريت ما أشتري أشيائي كامله بعض الاحيان إذا إشتريت فستان اول بدله ما أكملها با الاكسسوارات والشنطه وخلافه

أشوفه ماهو ضروري حتى يجي وقت المناسبه الاقي نفسي في وضع محرج أطلب من بناتي او أختي حتى اكمل الناقص

يمكن تقولون عني إني بخيله ابدا ماني بخيله ومثل ما قلت لكم أشتري لبناتي واولادي كل شئ كامل
لدرجه إنهم احسن شئ من أقرانهم في المدرسه وفي العيد وفي المناسبات

وانا دائم منقصه على نفسي
وكل ما رحت السوق لازم اشتري شئ لبيتي وما استخسر شئ له ابد وعلى نفسي العكس

أشوف غيري ما يفكر غير في نفسه
يعني حتى لو كانو عياله ناقصين ما يهمه ابد المهم هو

ودي أصير مثلهم ما افكر غير في نفسي لكن ما اقدر ابد :icon1366:

ارجوكم ساعدوني في هذة المشكله ​

 

[المسك]

حبيبتي لما تحبين نفسك ما يعني انك ما تفكرين غير في نفسك لكن تعطينها حقها
انا رايي اللي يدلع نفسه يعطي اللي يحبونه فرصه انهم يدلعونه
لما تسمعين انك عسل ودمك خفيف وحبوبه انا اشوف هذا انعكاس لنظرتك لنفسك في البدايه
اتمنى اني قدرت أوضح لج
وبالنسبه لاحتياجات الأولاد حلو لما تفكرين فيهم وتشترين لهم احلى الملابس وتهتمين فيهم لأنهم يستاهلون وانتي بعد تستاهلين
وحاولي انك تخلي يوم تسوق بس لك ولك وحدك دلعي نفسك نفس لما كنتي عروسه تجهزين
تفكيرك بنفسك وزينتك
وصدقيني هذا راح ينعكس على كل شي يخص حياتك
ربي يخلي لك عيالك ويسعدك

 

[موزة خلفان]

اختي الكريمه تعلمي الموازنه
يعني اذا طلعتي واشتريتي لاولاد في ها اليوم حددي يوم لك انتي فقط ومهما رغبتي في شراء شيء لاولادك قاومي واشتري لنفسك فقط اشتري كل ما ترغين به
وبعدين هناك موضوع جميل في المنتدا للاخت سم ون عن كوني انانيه اقرئيه

 

[ام فوزية]

اهنئك اختي على هذه الصفه الحسنة فهذه صفة الإيثار قال تعالى ( يؤثرون على انفسهم ولو كان بهم خصاصه)

 

[الولهانة]

الله يهديج----
عزيزتي هذا مب معناه إنج ما تحبين نفسج--- كل إم جذي ---- تبا لبيتها واولادها احسن واحلا شي---

وتنسى نفسها---

الله يهديج لا تسوينها سالفه----

حاولي تسووين مثل ما قالت الإخت موزه---
ومب مهم لو تشتريين لليهال --- خليها رحلة تسوق عائليه---لج ولهم وللبيت---

 

[عنقود عنب]

والله اختي الحال من بعضة

انا مثلك بالضبط

اذا طلعت السوق .. اشتري واشتري للبنات والاولاد

وارجع البيت .. يقول لي زوجي وش شريتي لنفسك ...

اكتشف اني ما شريت شي وخلصت كل الفلوس على العيال

ا و مثل ما قلتي استخسر اشتري لنفسي اقول مو ضروري

حتى بناتي اذا طلعت السوق معاهم ..هم اللي يقولون لي ...يالله يمة اشتري لنفسك

يالله كلنا في الهوا سوا ...يعني مو بس انت

 

[الصبوره]

حبيبتي أنا بقولك رأيي في اللي تشتري لعيالها وتنسى نفسها هذه الإنسانه بعد فتره سوف تكتشف أنها نست نفسها خاصة بعد أن يكبر العيال وبتقولهم في يوم أنا اللي كنت أفضلكم على نفسي وانتوا اليوم مشغولين بحياتكم خسارة الوقت اللي ضيعته عليكم.ولكن أقول لهذه المرأة من طلب منك أن تقدمي وتقدمي دون التفكير في نفسك أنت من فعلت ذلك وانت من تتحملين مسؤولية ذلك .

ثم أن هذه المرأة تعلم عيالها الأنانيه وحب النفس وتقديم طلباتهم على طلبات أي شخص آخر حتى أمهم لأنهم ببساطه يعتقدون أن أمهم لا تحتاج.

أختي أنا أسلوبي إني ما أحرم عيالي من شئ هم بحاجه له ولكن دائما أفهمهم إني أنا أيضا انسانه وأحتاج لأمور كثيره مثلهم لذا يجب أن أن لا أنسى نفسي مثل ما إني ما أنساهم .لذا قد أذهب إلى السوق أحيانا وأشتري أغراض لي أنا فقط لأني بحاجه إليها ولا أشتري لعيالي إلا الحلاوه فقط وهم الحين تعودوا وعرفوا سياستي وأسلوبي فما أسمعهم يتذمرون بالعكس صاروا هم يختارولي أشياء من السوق ويقولولي ماما هذا حلو عليك وهذا ما يناسبك وهكذا يعني المحبة موجوده ما راحت!

 

[حبيبة الكويت]

أنا مثل الأخت حساسه جدا ....

أنا مطلقة وعندي ولد ودائماً لما أروح السوق أشتري لولدي كل شئ وحق أمي أيضاً لأن ما فيه أحد يصرف على الوالدة ودائماً خواتي ينصحوني لبسي تكشخي أشتري لك ذهب أو مكياج أرد عليهم أنا مطلقة من يشوفني أنا مليت من الحريم ومن كلامهم السام اعتزلت الحريم حتى ما أسمع الكلام الجارح بس من البيت للدوام ومن الدوام للبيت نادراً أروح لبيت إخواني إذا كان عندهم مناسبة حتى ممنوع علي آخذ سيارة وطلع ولدي حديقة أو مطعم أو سوق لما أشوف عيال خواني وفرحتهم لما أبوهم يطلعهم أقول الله يسعدهم ولدي عمره سبع سنين وإلى في عمره مستانسين أنا تعودت على هذي الحالة لكن ولدي شنو ذنبه حتى أبوه يا الله بالسنة يشوفه .....

 

[ام الدلوع]

بالظبط نفس مشكلتي

 

[حساسه جدا]

الحمد لله يعني مو بس انا إللي عندي هذة المشكله تصدقون إنكم هونتم علي كثير الله يجبر بخواطركم

مسك

كلامك صحيح

اما يا اخت موزة خلفان - أنا من اليوم بدأت اطبق قانون جديد وهو كوني أنانيه وإن شاء الله إني أنجح وما أتراجع :no: لأني بصراحه أشوف الكل هذة الايام ما يحب غير نفسه وما عليه في أحد إلا أمي أحسها مثلي واكثر زيادة يعني هذة وراثه الله يستر

الصبوره
إن شاء الله أتدارك الامر قبل فوات الاوان

حبيبة الكويت
حبيبتي والله مشكلتك حزنتني كثير الله يعوضك خير

عنقود عنب
ام الدلوع
يا الله شدو الهمه معاي وخليكم أنانيات

ام فوزيه
مشكورة حبيبتي

الولهانه
إن شاء الله اسوي مثل ما قالت الاخت موزةخلفان

مشكورين اخواتي ​

 

[نبراس الخير]

http://nuclearworldwarsite.com/beginning.html

حبيبتي البنات كفو وفو وعجبني الحل إللي قالوه لك خصصي يو م لك إنت وبس تشترين إللي تبين شيء طبيعي أنك تحبي أبناءك و تعطيهم كل ماتملكين لكن الإعثدال مطلوب الله يوفقك .

 

[ام مصعب]

وانا بعدنفس الكاتبه للموضوع الحال من بعضه وانا احاول اشتري لنفسي من مصروفي واخلي ابوهم يشتريههم من فلوسه بس الصراحه مايجعبني ذوقه فافضل اشتريلهم بودونه

 

[البنفسجية]

أنا مثلك اختي وعجبني كلام أختي الصبورة جددددا