مشكلتي بدأت تقريبا من 7 سنوات

[مالي حظ بشي]

السلام عليكم ورحمة الله وبركاته



الله يخليكم ابي احد يساعدني يمسكني بيدي ويطلعني من اللي انا فيه




مشكلتي بدأت من 8 أو 7 سنوات من لما كان عمري 17 سنه صارت لنا ظروف بالبيت تعبت امي واضطريت اني احمل كل شي على ظهري كل اشغال البيت صرت الام والاخت والزوجه والشغاله مع العلم انو لي اخوات اصغر مني مابيني وبينهم الا سنه وسنتين بس كان كل شي علي انا لاني كنت من النوع اللي احب اشتغل بأي شي وبكل شي وتحملت مسئولية الكل لدرجة انو جات لي ايام ماصرت انام فيها الا 4 ساعات باليوم ويمكن اخذت شهرين على هالحال


حتى كنت بالجامعه وتركتها مع انو كنت احبها وكنت احلم اتخرج وآخذ شهادتي بس للأسف راحت علي وسنه ورا سنه وانا على هالحال ونسيت نفسي الين ماصار عمري 24 وكأني كنت نايمه وصحيت وقبل سنه تقريبا تقدم لخطبتي شخص من معارفنا مع اني ماكنت مقتنعه ابدا بس قلت مافيه حل الا اني اتزوج بعد الخطبه اخذت دورة حاسب آلي على اساس اني اتوظف فيها بعد زواجي وللاسف تزوجت وبعدها بأربع شهور بس طلبت الطلاق لاني ماحبيته ابدا ابدا وحسيته كأن اختياري له كان هروب

وبعد طلاقي رجعت حياتي زي ماهي قبل زواجي صرت امل من كل شي اليوم زي امس زي بكره زي السنه اللي فاتت واكيد زي السنه الجايه


احس اني ضايعه حياتي بدون هدف وانا ماحب اعيش على الهامش بالعكس احب اتميز بعلم او بأي شي وطموحي كان ماله حدود

صرت ماتحمل أي شي واتفه سبب يعصبني مع اني هااااااااديه مره واكثر الاوقات اجلس لوحدي وابكي ماني عارفه ايش اسوي كأني مربوطه ماني قادره اسوي أي شي


صرت اتحسر كثير على العمر اللي كان المفروض اني العب فيه واتدلع مثلي مثل أي بنت كنت المفروض اني ماأغلط حتى لو غلط بسيط واي غلط انا اللي اتحمل مسئوليته بكل نتايجه حتى لو ماكنت المذنبه

واحيانا اقول يمكن فيني ضعف بشخصيتي لاني مابي احد يزعل علي وأثر علي بشكل سلبي


ماني عارفه وش فيني طفشت من حياتي حتى صارت تجيني أفكار اني آكل أي شي عشان يذبحني وارتاح بس ارجع واستغفر ربي


والآن لي شهر تقريبا مو قادره انام من كثر التفكير ومو بشي محدد احس تفكيري مشوش واعصابي تعبانه
يئست من كل شي والله


آسفه عالاطاله
اتمنى من كل قلبي الاقي حل لمشكلتي وياليت ماتطولوا علي الله يخليكم لان ماعاد فيني صبر والله