مشكلتها زوجة أخوها واللي بتصير أخت زوجها

[perfume]

السلام عليكم ورحمة الله وبركاته

مساكم الله بالخير خواتي

اليوم راح أخبركم عن مشكلة ربيعتي جزاها الله خير ويسر أمورها يارب
ربيعتي هذي مخطوبة من جريب جدا وكانت مترددة قبل ما توافق على سعيد الحظ بسبب أخته واللي تصير مرت أخوها
تقول لي انها شريرة وتسوي مشاكل ولسانها فالت يعني أبد ما تمسكه واذا زعلت من أحد أو مسكت عليه شي يا ويله من لسانها
وتقول لي انها تلاحظ انها حسودة وعليها عين حارة يعني ماتحط عينها على شخص تكرهه وما تسكت عن الرمسة من وراه لين ما يصيب ذاك الشخص السوء (أعوذ بالله)
حتى انها تقول لي انه يوم تقدم لها سعيد الحظ وتأخرت هي وأهلها عن الرد لمدة قامت مرت أخوها واحتشرت وقالت ليش ما يردون بسرعة اذا كانو ما يبون أخوي يقولون من الحين أحسن بنروح بنخطب له غيرها يعني ماشي بنات غيرها بالبلاد>>> شوفو الوقاحة كيف بلغت فيها مع العلم انه المدة كانت 3 أسابيع وانا أشوف انها مدة جيدة للتفكير قبل التسرع هذا زواج مو شي ينبني بيوم ويومين وبس
بس أول ما ردت ربيعتي بالموافقة انقلبت الأخت وصارت حبابة >> شوفو الحين النفاق كيف
أنا قلت لها طنشيها ولا تعطيها سالفة
ردت علي انها فعلا مطنشتها وماتعطيها سالفة بس تخاف من المستقبل من انه تثير مشاكل وبسبب انه مرت أخوها فالتة باللسان منافقة وكذابة مع العلم انه معاها أخوات نفس طينتها
أنا بصراحة ما صدقت لأنه باين عليها انها مرة كبيرة وعاقل عيالها طولها وبس ورا السواهي دواهي

الحين خواتي ادري طولت عليكم بس كنت أبي أخليكم تتصورو مكانكم مكان ربيعتي... اذا كنتي أنتي مكانها كيف راح تتصرفين؟؟ وهل ينفع التطنيش بهالحالات

 

[perfume]

نسيت أقول لكم ادعو لها ولي بالسعادة وراحة البال

 

[ملكه بكل معانيه]

الله يسعدك انتي وياها اما عن الاخت المفروض اذا الرجال كويس مالها دخل في اختو هي كذا وله كذا هي زوجت اخوها يعني دائمن بوجهها المفروض ماتفوت الفرصه اذا الرجال كويس وله كلمه يعني اختو ماتمشيه ومره ثانيه اقول الله يسعدكم دنيا واخره

 

[جناح فراشة]

ليه تحط الشر قدامها؟

لسه ماصار شي وهي متخوفة ,, وهذا الخوف حينكد عليها فرحها

هي لها حياتها وزوجة أخوها لها حياتها .. لاتسمح لها تتدخل فيها .. وأتخيل بما إنها زوجة أخوها قبل لاتصير حماتها فهي عارفة لها ومتعاملها معاها من قبل يعني مو جديدة عليها


لاتستبق الشر وخلها متفائلة​

 

[perfume]

هي ما رفضته ولا شي بالعكس تقول عنه انسان ملتزم وخلوق بس المشكلة بأخته كيف السبيل الى التعامل مع هالنوعية من الناس

 

[انوا رة الرياض]

تتوكل على الله ومادامها زوجت اخوها يعني خلاص تحاول تتفاداها وتكون رسميه وان شاء الله مايصير الاكل خير اهم شي الولد كويس وان شاء الله يوفقكها ويكتب لها الخير0

 

[نضوج أنثى]

طبعا أهم شي الاستخاره انا عن نفسي مااحب الزواجات المتداخله عشان لا يدخل شعبان برمضان على قولتهم يعني لما تتهاوش هي وزوجها تقلب زوجة اخوها على اخوها وهيك شغلات المهم مانآخذ إثم أحد باحد ثاني أهم شي يسألون عنه زين وفترة الملكه بتوضح كل شي لا تستعجل فيها خليها تآخذ وقتها وهي من خلالها بتعرف اذا زوجها بيوقف مع الحق وعلى طول بصف اخواته وبيتجيها مشاكل منهم ويحفظ اسرارهم ولا تطلع برا خليها تتمهل بالموضوع والله يكتب لها اللي فيه الخير ويرزقها ويرزقك وكل المسلمات راحة البال والسعاده

 

[بتــول]

أنا من رايي الشخصي بالموضوع انها تتعامل معاها عادي جدا وتتفادى المشاكل معاها
أما اذا كانت من النوع اللي تفتعل المشاكل فهذا شي ثاني بس أتمنى وانشالله ماتكون من هالنوع

 

[بتــول]

أنا من رايي الشخصي بالموضوع انها تتعامل معاها عادي جدا وتتفادى المشاكل معاها
أما اذا كانت من النوع اللي تفتعل المشاكل فهذا شي ثاني بس أتمنى وانشالله ماتكون من هالنوع بس هالناس المفروض تسكتيهم عند حدهم وتبعدين عنهم واياج تعطينهم شوي من أمورج وأسرارج

 

[قطـــــريه]

انا ما اايد زواجات البدل لانها تسبب المشاكل للكل .. هي مالها شغل في مرت اخوها لها في خطيبها بس هل بتقدر تتحمل لو صارت مشاكل تحريض للاخ ! لازم تتوقع الزين والشين

 

[بتــول]

أنا بعد ما أئيد زواج البدل لأنه كله مشاكل
بس اذا هو زين وماراح يسمع لكلام أخته ويحبها فراح يحترمها ومايطيع أخته