ماذا يفعل الزوج في حال وجود خلافات بين زوجته وأهله

[راجيه الرضا]

قال : طب ايه التصرف الأمثل للزوج فى حالة وجود خلافات بين زوجته و أهله ؟

الرجل الى فى حالتك دى الله يكون فى عونه
كأنه عايش بين ضرتين بيكرهوا بعض و مستحيل هتعرف تخليهم يحبوا بعض فى يوم من الأيام

طالما النفوس شالت بتستمر العداوة الى ماشاء الله

الحل الوحيد انك تفصل القوات على أد ماتقدر
و يكون التعامل رسمى جدا و فى أضيق الحدود

و خد بالك من بعض الأمور :

احذر من انك تنقل كلامهم على بعض لبعض
يعنى ماتقولش لأهلك مراتى بتقول عليكم كذا
و ماتقولش لمراتك اهلى بيقولوا عليكى كذا
انت فاكر انك بتقولهم علشان يصلحوا نفسهم و تعاملهم
لكنك كدة بتولع الدنيا أكتر

من فضلك حياتك مع زوجتك و علاقتك بيها اسرار حربية ماينفعش تتنقل لأهلك
انا عارفة انك بتكون محتاج حد يطبطب عليك او يحن عليك
بتكون محتاج حد تستشيره و تاخد رأيه
بتكون محتاج حد تفضفض معاه
بس انت كدة بتوغر صدر أهلك ضد مراتك
و هتلاقى نفسك بتتصالح مع مراتك و تنسى الموضوع وهم قاعدين يهروا لسة فيما فعلته مراتك

لما ييجى حد من أهلك يشتكى مراتك راضيه و قوله حقك على و هى طبعا غلطانة و انا هكلمها
و لما تيجى مراتك تشتكى من أهلك قولها حقك علىّ و هم طبعا غلطانين و انا هكلمهم

خلى عندك قدرة على احتواء ألم كل طرف و الطبطبة عليه و انك تراضيه على أد ماتقدر
خليك "دبلوماسى" فى كسب الاطراف

و احذر من انك تقوم بدور "الحكم" لانك لو حكمت مين الصح و مين الغلط هتكون ظالم من أحد الطرفين و هتتقابل باتهامات لا حصر لها

المواقف الهايفة بتاعت بصت لى ازاى و عوجت بقها ازاى و قالت ايه و شغل ( اتكت على السين )
و قالت علىّ ايه ما تاخدش فيه موقف لان دى مواقف لن تنتهى

لكن لو حسيت ان فيه تصرف غلط بيّن وواضح من أحد الأطراف تدخل بصفتك الشخصية مش كمدافع عن الطرف المظلوم

بمعنى لو مراتك غلطت غلط واضح هتقولها بينك و بينها و تبين لها غلطها
و لو والدتك غلطت غلط واضح فى مراتك برده هتكلمهم بينك و بينهم
حاول تكون عادل فى الموضوع دا و ماتحملش طرف واحد دايما المسئولية

و فى النهاية
الغيرة بين النساء أمر حتمى
لكن فيه الى بتقدر تتعامل مع غيرتها و تحكمها بالعقل و فيه لأ

و طول ما انت بتعرف تراضى الأطراف المتصارعة و انك تفهم كل واحد فيهم ان له الأولوية عندك و انه فى مكانة كبيرة لا ينافسه عليه أحد هتقدر تطمن كل الأطراف و تتجنب الكثير من الصراعات

#دعاء_راجح