ليله القدر الامس ام اليوم؟ ..فلنجعلها كلها كذلك

[راجيه الرضا]

النهاردة ليلة القدر ولا امبارح !

أنا هحكيلك حكايتي .. من 4 سنين وفي وقت زي دا تحديدًا كنت بقلب في الفيس عادي لاقيت بوست بيقول إن ليلة القدر كانت من يومين وإن يعتبر كده خلاص ضاعت عليا ..

بصراحة! منكرش إن أنا اضايقت جدًا من نفسي لإن أنا يعتبر قومت رمضان كله إلا الليلة دي ..

سبت كوباية الشاي اللي كُنت بشربها ونزلت أتمشى .. كنت بفكر في مليون حاجة .. مستقبلي وطريق ربنا وازاي هغير من نفسي .. وهل ربنا مقبلش رمضان مني عشان كده فاتتني ليلة القدر !
رمضان خلاص قرب ينتهي وأنا لسه صفر زي ما أنا ..

فضلت ساعة ونص بتمشى وبفكر في كذا حاجة ولما رجلي وجعتني قولت هدخل أقرب مسجد يقابلني وأقعد فيه شوية وبعدها هروح البيت عشان أنام شوية وأصحى بعدها أصلي قيام

دخلت وصليت ركعتين وقعدت في جمب سرحان ..

المسجد كان فيه ناس كتير اللي بيصلي واللي قاعد بيقرأ قرآن واللي اصلا كان معتكف في المسجد

في وسط السرحان اللي كنت فيه والغيبوبة ، لاقيت شيخ ربط على كتفي وقالي شايل هم الدنيا ليه بس ؟ ما تسيب هم الدُنيا للي خلق الدُنيا وهو قادر يحل كل دا

زي ما يكون طوق نجاه جالي لإن عاوز أفضفض مع حد ، حد ميقوليش متعقدهاش .. ولا يقولي انت عاملنا فيها عم الشيخ ولا حتى يقولي خلاص ضاعت عليك

اتعدلت في قعدتي وقولتله ممكن أحكي لحضرتك حاجة !

ضحك وبكل وجه بشوش قالي طبعًا سامعك ، احكي ..

- أنا مفيش فايدة فيا ، كل ما بقرب من ربنا خطوة برجع خطوات ، وكل ما بقول هانت أهو .. برجع أقع تاني ..
حتى ليلة القدر فاتتني ، الليلة المفروض أدعي فيها بكل اللي نفسي فيها وأولهم إن ربنا يغفرلي ويتولاني ...رمضان ضاع مني وأنا صفر .. بل أسوء !

" وبعدها اتنهدت وعيني دمعت وكإن الكلام خلص بس مش قادر أجمعه ولا عارف أرتب الكلام ولا عارف أقول ايه ، باصص في الأرض زي ما يكون طفل تايه بين ذنوبه وخايف يرفع عينه ..

- بص يابني ليلة القدر بتختلف بإختلاف البلدان ودا اللي أهل العلم قالوه .. " لكل بلد مطلعها الخاص " يعني صعب تعرف ليلة القدر ومش شرط انها مطرت في السعودية يبقى خلاص ليلة القدر ، وأي حد يقولك دي كانت امبارح أو أول امبارح قوله متشكر على المعلومة بس بالنسبالي كل يوم في العشر ليالي هي ليلة قدر ..

كُل يوم لله عتقاء من النار .. كُل يوم في دعوات بترفع وذنوب بتغفر وخطايا بتُمحى .. كل يوم في أرزاق بتُكتب كُل يوم بالنسبة ليك ليلة قدر

ولو رمضان خلص هو العُمر انتهى ؟

لسه فاضل في رمضان 5 أيام والله أعلم فاضل في عمرك قد ايه بس اللي أعرفه أن لو فاضل ثانية في عمرك فـ في الثانية دي لو استغفرت هيغفرلك .. لو دعيت هيستجيب .. لو اتمنيت هيحققلك .. لو طلبت سند هتلاقي ربنا السند اللي مش هيكسرك .. السنة فيها كام شهر هجري ؟

= 12شهر

- 12شهر بإيدك انك تخليهم رمضان ..مش قصدي انك تصومهم لا .. أقصد تعبد الله في باقي الشهور زي عبادتك ليه في رمضان وأفضل كمان
ملك الموت لما هيجي يقبض روحك وانت بتحاول ترضي الله وقتها هيطمئنك ويبشرك بالجنة لانه شايف محاولتك
مش شايفك يائس وقانت من رحمة ربنا ..
صلي وصوم واعمل كل اللي ربنا يحبه في كل دقيقة في عمرك مش في شهر واحد بس .. متحطش اليأس جواك وتقول إن رمضان قرب ينتهى وأنا لسه صفر ..

5 ايام لسه فاضلين في شهر رمضان ، خمس أيام بمثابة 5 جبال كل جبل فيهم القمة بتاعته عليها كنز .. عشان تلاقي الكنز لازم تطلع الجبل كله

اتعب في اللي فاضل يمكن تكون ليلة القدر يوم 29 مين عارف! وتكتشف بعد رمضان ان فعلا كانت ليلة 29 وإن يأسك وإحباطك دلوقت مالوش لازمة

ممكن تكون لسه ليلة 27

ولو افترضنا إنها كانت ليلة 21 فإنت معاك لسه 5 ليالي قدر

يابني ربنا موجود في الليالي كلها وبيعتق في الليالي كلها وبيستجيب في الليالي كلها وبيرزق في الليالي كلها وبيكفر الذنوب والخطايا دايمًا ، ولو انت زعلان عشان ضاع منك ليلة القدر زي ما بيقولوا فأنت المفروض تزعل إن أنت بتفكر تعبد الله عبادة صحيحة ليلة واحدة فقط كل عام
هتقولي بس أنا كنت عاوز أتهجد وأقيم الليل كله في ليلة القدر !؟
هقولك ومين قالك إنها فاتت ؟ إذا كان ربنا محطش ليها معاد محدد عشان متيأسش .. وعشان متعبدش الله ليلة واحدة
ما يمكن لسه في الليالي الجاية
تهجد وقيم الليل في باقي رمضان

كل لياليك قدر وكل أيامك رمضان

يومها خرجت من المسجد وأنا فعلا مقتنع إن كل الليالي قدر وكل الأيام رمضان

بقالي أربع سنين وكل رمضان بيجي بكون مش مستني أعرف أنهي ليلة في العشر ليالي هي ليلة القدر .. بعبد الله في العشر ليالي عبادة صحيحة ، فـ لو كانت إمبارح فـ الحمدلله على عبادتي واغفرلي تقصيري يارب
ولو كانت لسة بكرة فاللهم أعني أن أعبدك عبادة تُحبها وترضاها ?

منقول.