لكل وحده تبغى تاخذ اجر فيني

[**الغضه**]

يابنات وياحريم انا وزوجي الحمد لله ماشين تمام وطبعا لازم فيه خلافات واكثر مشاكلنا الطلعات والتماشي تخيلو يقول لك مرتين او3 مرات بالشهر نطلع مع بعض مطعم او البحر او....الخ وانا مااتخيل كذا صحيح اروح مع خواتي واروح لهلي لاكن اقصد المطاعم والتمشيات محدده وانا بموت من القهر مااحب كذا مع انه ماشالله ماديا ماعنده عذر والله تعبت وكل طلعه لازم قبلها حنه وقومه وقعده واخر مره قبل يومين اقوله يالله يقول مالي نفس ومع اصحابه ع طول يطيرلهم قررت اخيرا انه اطنشه ومااطلب واذا قال يالله نطلع اقول ماابي واطنشه احس اني من كثر ما اطلبه ويرفض ارقت ماء وجهي والله ماني عارفه اش الحل؟؟ ارشدوني الله يوفقكم خصوصا اهل الخبره بسرعه ردو الله ينورلكم دروبكم ومشكورين مقدما

 

[**الفارسة**]

كلهم كذا انا لما اقولة خل نطلع يزعل كاني سابتة بنجن خاصة

اني ام الطلعات عند اهلي

 

[ام شوق]

الله يهدي لنا ازواجنا يارب العالمين

 

[salma_ahmed]

ليش تتنازلي .. غيري أسلوبك .. بس ما تتنازلي أبد عن حقوقك .. انبسطي .. وما يهمك ماء ويهك .. إشتري كرتون ماي وانتوا رادين وإشربي فيه للطلعه الجايه ..

الرياييل .. عادي .. يطنشون يوم إنتي تطنشين .. وعالبراد ..

فإنتي بعد إطلبي وبردي على قلبك بكوب عصير وإنتي رايحه .. وعادي .. جنه العيد..

 

[الكناري]

صباح الخير يالسحر الحلال
شخبار الطلعات
حبوبه انا كنت اموت ابي اطلع معاه ولما نطلع والله كأنه قاعدين على قلبه بس مهمه يبي يسويها وخلاص

وبعدها انا قمت ا سكت ما اطلب طلعات تدرين صار عنده عادي يعني بين الطلعه والثانيه اربع الى خمس شهور
يعني نفس الشيء ماكنه موجودين مع بعض
حبيبتي ونسي روحك بروحك لاتحرمين نفسك او تنطرين منه يحن عليك

 

[أترجة]

يا أختي غيرك ما يطول
أعرف حريم متزوجين من 10 سنين وأكثر
إذا طلعوا .. طلعوا حقائق قسم نساء فقط
يعني بالعربي يرميهم بالحديقه ويفل
ومو ناقصهم شي .. من مال وصحه
هذا حال الأغلبيه .. يعني أنتي بالنسبه لهم توب
والله يهدي لنا أزواجنا آمين

 

[عاشقة الاسحار]

اختي انا زوجي يطلعني بالشهر مره واحيانا بشهرين مره واكون مبسوطه لانه هو اللي طلب مو انا . ومره قال والله المفروض كل ثلاث شهور نطلع بروحنا بدون اطفال ننبسط مع اني ما اطلع مع اهلي حق اي مكان اكتفي بزيارات اهلي بس لاتخسرين زوجك على موضوع زي هذا كوني حكيمه ذكيه صابره ولا تكونين لحوحه واكتفي بطلعتين معاه والله كافي وانبسطي مع خواتك الله يسعدك مع زوجك والرجل يختلف عن طبيعتك وطبيعتي الرجل عنده مشاغل واصحاب وارتباطات والله خلقه اقل من المراه عاطفه الله يشرح صدرك وييسر امرك

 

[ميرانه]

اذا اتحبين الطلعات اطلعي مع خواتك صديقاتك خوانك
اهلــــــــــــــــــــــك مثلن
انا نفس الشي بس هذا ما يمنع اني اطلع مع غيرهبس لا تخسرين زوجك ابدن
لانهم نور هالدنيا

 

[روعة روح]

غيري اسلوبك معاه ..... اصحي يكون بحنه ورنه

وقت ماتبين تطلعين زيني له غداءزين وخلي لبسك حلو

بالوقت اللي تظمنين انه روق ابتعدي عنه وحسسيه انك مبتعده

اذا سالك ناظريه بحزن ونزلي دمعه

احس بطفش نفسي بطلعه .........>>>>>>>>وتنهدي

كذا بيحس ويطلعك من نفسه

واذا نفسك بمطعم استغلي وقت ماقبل النوم احضنيه بحب

وامدحيه بس بدون مايحس ان وراك شي

واذكري وحده مدحتلي مطعم نفسي فيه واسكتي

من نفسه بيطلعك

 

[دنيا الأمل]

ليش ما تحاولي تحددي أيام معينة أو تواريخ معينة للطلعة
يعني مثلاً أول جمعة من كل شهر يخرجك
صدقيني لو جربتي تعرضي عليه الفكرة أتوقع حيستسهلها ويوافق
كلميه وأقنعيه وحددي يوم أو عدد من الأيام حسب ما يناسبك
وخذي منه كلمة ما فيها تراجع أبداً
يصير لمن يجي اليوم المحدد لو تكاسل زني على راسه والبسي واتجهزي
هو من نفسه بيشوف ما في فايدة وبيقوم من نفسه
ولو عندك عيال خليهم يكونو معاكِ وقت تحديد الطلعة والتمشية
إلا إذا ما تبيهم معاكِ

 

[هدوء وآلـــم]

ياحياتي احمدي ربك انا لي خمس سنوات متزوجه
ماطلعت معاه الامره وحده بس!!!!!!!!!!ولا بعد بس بالسياره مانزلنا لمكان مع العلم اني عايشه مع اهله يعني مايحتاج اشرح الوضع والحمدلله على كل حال..
الله يسخرلي ولكم ازواجكم...

 

[الكونتيسه]

كلهم كذا انا لما اقولة خل نطلع يزعل كاني سابتة بنجن خاصة

اني ام الطلعات عند اهلي

اي والله كنك سابته هذا حالي معاه كل مره بس اذا مارضى اخليه يوديني السوبر ماركت " اغراض ضروريه" واقش اللي ابيه ومابيه اطلع حرتي هههههههه وهو ياعمري على نيته يدفع مايدري انه انتقام خخخخخخخ

الله المستعان

 

[مرمار]

عزيزتي مرتين او3 بالشهر حلوين ولا تسوي مشاكل مع زوجك لهذا السبب غيرك مايطلع بالسنة مرة

 

[أم سـعيـد]

الله يعينج
حاولي في طلعاتج تستانسين معاه واتونسينه علشان يكررها

ولا اتكبرين الموضوع وكل شي ينحل بالتفاهم

وغيري اسلوبج معاه في الطلب مثل ما ذكروا الاخوات

والله يسخره لج ان شاء الله ويكثر من طلعاتج معاه

 

[قمة التحدي]

الحمدلله ريلي لمن يرجع البيت يشوفي لابسه و كاشخة وقاعدة شاغلة روحي بشي مفيد اتفاجأ يقول لي يالله لبسي بنطلع وصار يحب يطلع وياي لو ما أبي صار يصر علي مع إنه بوقت ماضي زنييت عليه كثير أبي أطلعوقتها طنشني و قعدت شعر بالحبس ( أقصد بالبيت )

 

[Princes Of Ice]

انا بعد والله شراتج ..>_<

يوم ربعه يدقوله سيده بيربع يطلع وياهم ..!!

لا تحنين عليه ..

نفس ما قالوا البنات ..

رتبي نفسج و كل شيء ..

و اهم شيء يكون رايق ..

و سويله الشيء اللي يحبه

او يطلبه .. مثل يبا كوب عصير او شيء ..

و عقب طلبي منه .. و اذا ما رضى ..

خليه برايه .. لا اذلين عمرج ..:busted_red:

مصيره بيعرف منو انتي ..!!

و مصيره من نفسه بيي و بيظهرج ..

و طلعي ويا هلج .. و استانسي و لا عليج من حد ^___^

اوووووووووكي حبوبه ..​

 

[أم الأصيل]

اي والله كنك سابته هذا حالي معاه كل مره بس اذا مارضى اخليه يوديني السوبر ماركت " اغراض ضروريه" واقش اللي ابيه ومابيه اطلع حرتي هههههههه وهو ياعمري على نيته يدفع مايدري انه انتقام خخخخخخخ

الله المستعان

وانا بعد نفس الشي .. ماعندنا طريقة غيرها للانتقام:harhar1:

 

[عنقود عنب]

جيتي على الجرح يا اختي

والله ان زنيتي ...طلعك ...لكن اي طلعه ...تكرهين نفسك ..لانه مبوز و بس شغله ينتقد ...لو بكيفة كان انتقد حتى الهواء اللي يتنفسه

واذا سكتي ...ضاع حقك في الاستمتاع

ما ادري ليش اغلب الرجال يظنون ان المراة ما تحتاج للخروج والفسح ...يكفيها انها جالسة في البيت ...عندها التلفزيون وا لمكيف والمطبخ ...هذا في بالهم احلى ترفيه ..يعني مو ناقصها شي

بالنسبة لي ...انا اشوف ان وضعك تمام ..يعني حلو 3 او 4 مرات بالشهر ... على كم طلعة الى بيت اهلك او صديقاتك

لازم نراعي ان الرجال ما يحب طلعات مطاعم مع المراة بشكل متكرر

انا تقلصت الطلعات معاه الى مرة في السنه ...بطلنا انا والعيال نطلب نطلع ...اقلمنا انفسنا .... يعني صار العيال غايتهم واملهم انه يوديهم البقالة مرة كل خمسة اشهر ...

لكن في الاجاااااااازة ...شهرين كاملين سفرة نطلع حرتنا كلها... ما نخليه ينزل من السيارة ...بس حاطنا في السيارة ومن مكان الى مكان ..من اسواق الى مطاعم الى ملاهي ..

لكن بعد الواحد يحتاج ترفيه بين فترة وثانية

وكل عذرة الشغل ...وهو طبعة يحب جلسة البيت

واذا غلطنا وقلنا طلعنا ...قال وين اوديكم في هذه البلد ؟؟؟

الومة واعذرة

طولت عليكم ..لكن اختي لا تكبرين السالفة

تحياتي

 

[دلوعة نفسها!]

أنا خلاص تعودت
أحب اذا فيه طلعة يكون من نفسه وعلى روقااااان
اذا قال نطلع...أقول يللا

واذا ما قال...أشغل نفسي بشي ثاني

وعلى فكرة وصلت لمرحلة...اذا كنت طفشاااااانة مررررررررة ...ما أحب أطلع....

 

[حواء في ارض ادم]

عادي بالعكس كثير ثلاث مرات بالشهر
احسن من ولا شي
انتبهي لاتقولين له لا لما يقولك خلينا نطلع تالي بي طنشك
مره وحده وانتي الخسرانه بعدها