كيف يكون العدل بين الزواجات اذا كانت احدهما موظفه ,,,,,,,,,

[الحياة دراما]

اذا كان الزوج متزوج من زوجتين ... زوجته الأولى موظفه و ماشاء الله راتبهااا عالي أكثر من 15000 ,,,, وقبل زواجه من الثانيه اتفقو على انه هو يصرف على البيت و هي تصرف على نفسها و اولأدها ( شغلات لسوق .. الملابس و الكماليات ) الزوجه الأولى عندها شغاله وسواق وهي تدفع لهم ... وماشاء الله عيالها شباب يودونها ويجيبونها و كمان السواق وكمان زوجها في بعض الأحيان (بس بحكم ان فيه اللي يساعده في مشاوير البيت الأول مو كل المشاوير يوديهم )

المشكله ان لما تزوج الرجل بزوجته الثانيه ... بعد مرور اكثر من 8 شهور اخلت الزوجه الأولى بالأتفاق .. و الحين تقول اصرف عليه وعلى الأولاد وتوديني وتجيبني ..... طبعا الزوجه الثانيه مالها بعد الله غير هذا الزوج من ناحية المصروف والمشاوير و اي اختلال في ميزانية الشهر يأثر على الثانيه ( تاكل هواء طوال الشهر :23 مايأثر على الأولى بحكم ان مصرفهم ثابت يصرف من اول يوم ينزل الراتب و تستلمه الزوجه الأولى بيدهااااا

بين الرجل والزوجته الأولى و مشاكل بسبب انها رجعة في كلامهااا ,,,, ولأنها اصلا دايماً تختلق مشاكل وهي في غنى عن كل المشاكل اللي تصير

اتمنى تشاركوني بأرائكم وبحكم اني اول مرهـ اطرح مشاركه في حياتي ارجو المعذره :5:على اي ارتباك او تقصير في طرح الموضوع :36: :36:

 

[شوق الجنون]

بصــرآحـه ألتصــرف بيــد ألرجاال

مو بيدك أنتي
واذا نها ترااجعت بكلامها ومو راضيه تررجع ابد

عليه نو يصرف الشغاله والسواق واذا اعترضت يقولا انا ما اقدر على مصاريفهم غير مصااريف البيتين

ويشد عليها شووي يمكن تررجع لعقلها وعل المشااوير الله يخلي اولادها لها
هذا لي طلع من رااسي اللحين اذاا طلع شي ثااني رااح ارج لموضووعك

بالتووفيق يااقلبي

 

[عبره]

حبيبتي من شروط العدل في زوج المعدد الانفاق والمبيت ... واذا هي رجعت بكلامها ... ما يغير شي ان الشرع بصفها ... والله المستعان ... والزوج لازم يكون قد فتح بيتين لما يتزوج ثانية لان المسؤولية في الاول والاخير تقع عليه

 

[الحياة دراما]

تدروون انا جنوبيه غربيه و زوجي جنوبي شرقي و زوجته الأولى شماليه

وش الحل معاها .... هي مقتنعه انه من حقه يتزوج لكن مو راضيه تخفف من حدة المشاكل اللي بينهم ,,, تحب تنكد على نفسها

يشهد الله اني منعته من طلاقهاااا اكثر من مره ,,,, والله ما ارضى عليها و لأ على اولادها بس ... اتمنى نعيش مرتاحين

بس احس احياناً ودي اذبحهااا ماشاء زوجي طيب والله مو من النوع اللي يحسسها انو تزوجت عليك لأن فيك شي ( لأنها هي عارفه ظرفهم ) وبيدها تهدي الأمور .... يعني متخانقه هي و زوجي وله يومين وهو مكشر وتضايق حتى معاي بسببها... واذا جينا للجد الحمل الأكبر عليه ... يعني اذا زوجها ماجار عليها حتى لونه تزوج ولأ يكسر بخاطرها ومعاملته ممتازه المفروض لو حطت بالكثير 5000 ماهي خسرانه شي قدام راحتها ... شكلها بتخربهااا معه على الأخر

وانا مالي ذنب انو تزوج عليها ,, اقل للجيران لو ماتزوجي تزوج غيري ( وانا والله أخاف الله في نفسي وفي اللي حولي )

 

[تفاااااؤل]

الله يكون في عونك لكن مسألة النفقه ما يبغا لها كلام عليه ولو عندها أموال قارون ومن وجهة نظري صدقيني لا تطالب الابحقها وانتي الله يوفقك ويسعدك خليهم بكيفهم يز علو يتراضو ما لك شغل لانك بتتعبين ولازم من المشاكل في بداية زواج الزوج يعني اول سنه وبعدها تهداء الامور

 

[أم البيان]

انا سمعت الشيخ يقول يعدل في كل شي حتى لواحدى زوجته موظفه
ماله حق بفلوسها الااذاهي حبت تساعده
الله يعينه فتح بيتين يتحمل المسئوليه وعياله المفروض هو يصرفهم ماهو امهم
وعليك بلاستغفاروالرزق من الله
واذا هي عندها خيرذلك فضل الله يؤتيه من يشاء

 

[الامل السامي]

أختي السلام عليكم
من ناحية الشرع يجب على الزوج النفقه لكل الزوجتين حتى لو كانت غنيه هذا مبداء العدل بين الزوجات وايضا ولينفق من سعته
أختي حطي نفسك في مكانها وشوفي كيف هي ايضا تعاني من زواجه بك
هدي نفسك واهتمي بذاتك
ولا تشغلي نفسك بأمور الرجل يستطيع ان يحلها بكل سهولة
وهذه معانات زوجات المعدد خففي على نفسك وربي يسهل لك الامور

 

[zaxs]

اي لازم ياقلبي لو يصرف عليك فلس يعطيها مثله


وهذا العدل بغض النضر عن راتبا وفلوسها هي


ونفس الشي لو كانت الثنيه موضفه يصرف عليها مثل الاولى بكل صغيره وكبيره وعساه يعدل

 

[الحياة دراما]

المساله ماهي مسالة مصاريف وروحه ومشاوير ... هي تبيني اتطلق

تضغط عليه بس

دايماً تقولون حطي نفسك مكانها .... ليه هي ماتحط نفسهااا مكاني ... والله الزواج من زوجه ثانيه مباح ... وكل البنات بيون الستر

ومشكلة زواج زوجهااا عليها هذي بينها وبينه انا مالي علاقه هو اللي خطبني مو انا اللي خطبته ... نصيب مثل مالله كتب لها نصيب فيه الله كتبي انا بعد نصيب في هذا الرجل

الله يرحم كل مراءة تخاف الله في بنت الناس ... والله لو كانت بنتها و او اختها اللي متزوجه من واحد متزوج ماكان فكرت باهذي البشاعه

لكن انا سويت اللي عليه وشكلها هي مستعجله على النهاية السيئه ,,, على قولت السوريين ( اللي من ايدو الله يزيدو )

ياليت كل زوجه سواء اولى او ثانيه تشوف وش قصرت فيه ووش خلى زوجها يتزوج ,,, وتشوف وش اللي حلل الشرع وايش اللي حرامه ... وتقراء سيرة الرسول عليه الصلاة والسلام مع زوجاته امهات المؤمنين ( تسع زوجات في بيت واحد مو ثنتين بس ) بعدين تفكر بينها وبين نفسها

شكرا لكم

 

[الملكة الراقية]

حبيبتي سبق وقلت لك مشكلتي نفس مشكلتك

لكن أطمني أنتي متزوجه رجل شرقي تزوجك عشان الهدوء والراحه وعشان يهرب من مشاكلة مع الأولى

اذا كنتي شاطرة وكننتي زوجه مثل ما تخيلها راح تكسبيه ولا يمكن أنو يفرط فيكي

والزواج والطلاق بيد الله موبيدها ولو أجتمع الناس كلهم عشان يمنعوا هذا ماراح يصير الى أرادة الله

أشغلي نفسك بأمور أخرى ولاتدخلي في مشاكل زوجك

وأنتي بعدك متزوجه قريب لسه محتاجه وقت أنك تتعودي وزوجته الأولى على الوضع

الله يسخر لك زوجك ويجعلك قرة عينه

 

[اسيرة فكري]

عشان تكوني زوجة معدد ناجحه سواء اولى او ثانيه او رابعه لازم تمسحين من ذاكرتك وجود اخرى ولاتشيلين هم اذا هي تبي تطلقك او لا الي له رزق ماحد يقدر يقطعه ولا لك في طبيعة العلاقه بينهم ابدا لك حقك كامل وبس صفي بالك ولاتشيلين هم انت منتى ملزومه فيه الله يصلح الحال

 

[غريبة في بلادي]

يا أختي حددي

انتي تقولين عندها مال ( تعبها ورزقها من الله) ماهي ملزومة تحط قرش واحد لزوجها وهي حرة والشرع كفل لها هالحق مثل ماكفل لزوجها حق التعدد امره بالعدل في كل الامور

وبعدين تقولين ليش ماتحط 5000 ( طيب ليش ما انتي تتنازلين عن بعض حقوقك ) بيعي ذهبك وشاركيه هالشئ شئ يخصها هي واياه اعطته هي حرة ما اعطته هي حرة انتي هالشئ مالك علاقة فيه ابدا

وبعدين تقولين تبيني اتطلق

يا اختي انتي اللي جيتي عليها مو هي جت عليك صح نصيبك ورزقك والله كاتبه لك فاذا تبين تتوفقين بحياتك لاتتدخلين بين الرجال وزوجته تعرفه قبلك وبينهم عشرة عمر وعيال

ومن قال لك ان كل المتزوجين حريمهم مقصرين عليهم ( لايغرك انك الثانية ) اللي ياخذ الثانية ياخذ الثالثة والرابعه

فنصيحتي لك وكلامي مافيه مجاملة لاتتدخلين بين الرجل وزوجته وام عياله هو رجل ويعرف يتصرف مع زوجته وبعدين ماشاء الله عليك وش خليتي حتى شخصيتها بديتي تكتبين عنها

اخذتي الرجال على سنة الله ورسوله مالك علاقة باي شئ ثاني الا زوجك وهو يتصرف مع زوجته

عندها شغالة وعندها سواق حبيبتي هي بدات معه حياته وبنت معه هالحياة وماتعرفين قد ايش تعبت معه عشان يأسسون هالاسرة

وتجين انتي تقولين ليش ماتحط 5000 هالشئ مالك علاقة فيه واصلا مجرد هالكلمة لو تقولينها لزوجك معناته انتي تحرضينه على ام عياله وبعدين تقولين الرسول عليه الصلاة والسلام وسيرة الرسول

حبيبتي الرسول عليه الصلاة والسلام تعامل معهم جميعا بالعدل وعاش مع خديجة وهي اكبر منه ولاتزوج عليها ومارضي انه علي بن ابي طالب يتزوج على فاطمة الزهراء

فياحبيبتي انا من رائي انه ازوجك يقرأ في امور العدل

اتفقوا والا ما اتفقوا هذا شئ بينهم هي حرة بقراراتها

وارجعي وحطي نفسك مكانها مهما كانت ( تكرفين وتتعبين وتعبك يروح لغيرك لا ويروح لشريكتي في زوجي )

لاتزعلين بس كلمة الحق لازم تنقال

 

[لااارا]

ليش تحط نفسها مكانك وش دخلها فيك ؟؟؟؟؟؟؟ انتي الي دخلتي عليها تتحملين الوضع الي انتي اخترتيه
والشرغ في صفها بعد مو معقوله تتولى مصاريفها ومصاريف عيالها وزوجك مسؤل عنك بس هي بعد زوجته مثلك بالضبط وعياله لهم حق بعد
وعلى اي اساس قلتي انو تضغط على زوجك عشان يطلقك ؟؟؟؟
وكيف تاكلين هوا باقي الشهر يجوعك مثلا ؟؟؟؟ وش الشي الي ينقص عليك اذا صرف عليها ؟؟؟؟؟؟؟؟؟؟؟

 

[ممنوع من الصرف]

جقها وهي موب ملزومه تصرف هو الملزوم وهو عارف امكانيته ليش يتزوج والثانيه عارفه امكانيته راتب الاولى تعبها وجهدها وعرق جبينها واكيد عانت اول ايام الزواج تجي الثانيه وتعيش مرتاحه على حساب الاولى لالالالا لو كان راتبها مليوون حقهاااا

 

[رياميس]

عشان تكوني زوجة معدد ناجحه سواء اولى او ثانيه او رابعه لازم تمسحين من ذاكرتك وجود اخرى ولاتشيلين هم اذا هي تبي تطلقك او لا الي له رزق ماحد يقدر يقطعه ولا لك في طبيعة العلاقه بينهم ابدا لك حقك كامل وبس صفي بالك ولاتشيلين هم انت منتى ملزومه فيه الله يصلح الحال

كلام سليم وعين العقل
ونفقته عليها واجبة حتى لو مليارديره
وظني فيها ظن حسن و
طبيعي تغار منك وتحب نفسها وتتمنى زوالك
ياختي امهات المؤمنين سوو مواقف كبيرة كلها بسبب الغيرة مثل الغيبة وكسر الاواني والاتفاق على النبي وعمل خطة
تقبلي الوضع انتي اللي جيتيها حتى لوغصب عنك يعني وش تتوقعين منها
وشرها دايما قولي حسبي الله ونعم الوكيل يكفيك شرها
ولا تحاولي تكرهينه فيها مهما سوت ترا النية مطية ولا ينجوالا ذو القلب السليم
ربي يصلح اموركم اجمعين

 

[حلمي صعب]

يصرف عليها لكن بالمعقول يعني اذا كان راتبه متوسط وهي مصاريفها كثيرة وعندها شغاله وسواق وروحاتها للاسواق كثيره مو ملزوم بالكماليات
لايكلف الله نفسا الا وسعه وعلى كذا يجيب للثانيه شغاله وسواق مثلها محد احسن من احد
الله يهدي هالحريم تبي تكسر ظهر الرجال علشانه تزوج عليها

 

[انوا رة الرياض]

راي من راي غريبه في بلادي والله يوفقكم جميعن

 

[بكيت انا]

شوفي ياحياني لو كانت مليونيرة لازم يصرف عليها زيك زيها
السواق والشغالة ممكن يخليها تدفع راتبهم لانه صعبة يجيب لك ماتحتاجين لهم كثرها بس ممكن تقول عطني قيمة راتبهم لو انت راح تدفع الراتب وممكن تنازلين عن هالشئ مقابل انه يعوضك باشياء ثانية انا زوجته الاولى سواق وشغالة ويعوضني عن رواتبهم باشياء مادية ثانية
اما المشاوير لصار يومها مالك علاقة مين يوديها بس يومك مو من حقها انه يوصلها فيه

 

[مابقى لي اسم]

اما بقاحت عين ؟؟؟ خذت زوجها وتبي تاخذ من راتبها ...

تقول ليش ماتحط 5000 .... ياختي يوم خطبك كان القرار بيدك ممكن توافقي وممكن ترفضي ...
والزواج مو لعبه مسيرة حياة
وليش ماخترتي عزوبي يصرف عليك لحالك ويتفرغ لك ولك مشاويرك ..غير لان تصحي ..وتفهمي ..
خلي اللي نصحك ينفعك ..ومالك دخل بينهم هي تصرف هو .. من ليلتك ومصروفك وبس

 

[لااارا]

ماتو الي يستحون استغفر الله ماخذه زوجها ابو عيالها وتبين تصرف من راتبها 5000 عليكم
الله لا يبلانا والله يصبرها على بلواها