كنت احسب اني خبيرة بالشمالي ..طلعت محتاجه لخبيرات ودكاترة الشمالي

[أم غالي]

السلام عليكم ورحمة الله

أنا عضوة قديمة جديدة يعني مسجلة من زمان وادخل اقرى المواضيع واخذ المفيد واطبقه على حياتي واستفيد
صارلي 3سنين مسجلة في المنتدى ..كنت اظن اني اصبحت بلقيسية ..كنت اظن اني افهم الفاهمين ..واحكم الحكيمين..واني قادرة على ادارة حياتي وحل مشاكلي ..واني صرت محنكة وصاحبة دهاء...:33:
لكن كل انسان بالحياة لازم يجي عليه وقت ويحتاج لغيره..يحس بالضعف ..مايقدر يوقف لحاله ..محتاج من يوقف بجنبه ويمسك يده...وماكنت اتوقع بيجي اليوم اللي اكتب فيه عن مشكلة بهذا القسم ..لسبب بسيط ..اني قادرة على الامساك بزمام الامور..:8:
طبعا أنا شخصيتي شمالية غربية.عمري 29..:1:
زوجي شمالي شرقي.عمره40...كنت اظن اني فاهمة الشمالي ...كنت اظن اني مالكه مفاتيحه...كنت اظن اني خابزته وعاجنته...لكــــــــــــــــــــــــــــــــــــــــــــــن

آآآآآآآآآآآآآآآآآآآآآآآآآآآآآآآآآهـ من الشمالي...:santa_1:

لابد يجي وقت ويبكيكي الشمالي...لابد يجي وقت ويحسسك بالهزيمة هالشمالي...
مخنوقة ..والله اكتب والعبرة بحلقي واقفة...

نجي للمشكلة:
طبعا الكل عارف كيف شخصية الشمالي الظاهرية(الجافة القليل الكلام العديم الرومانسية المتزمت برأيه .الصعب التغيير)..
متزوجة من 7سنين ..زوجي الحمد لله طيب خلوق ماعنده سب ولا لعن ولاضرب.صحيح عصبي موووووت وتحتها مليون خط...لكن الحمد لله على النعمة....لكن معاملته جـــــــــــــــــافة , احس انه عايش حياته لحاله بمعنى الكلمة, لايشاور ولايتكلم ولا يحاور,طيب والانسانة اللي عايشة معاك!! قطعة كنب ولا مزهرية!

اذا راح يعمل شغلة تخصنا وجيت اسأله مايحب يجاوب..طيب انا ابغى اعرف اش صار اش النتيجة ,,يعني لازم يقول اش صار معاه ,

اكثر مايضايقني انه عايش حياته لحاله..يعني يتصرف كأنه عزوبي ماعنده شريكة لازم يسألها يتشاور معاها يتكلم معاها لااااااامافي ابدااا..طبعا مافي اظهار لاي مشاعر ابداااااااااا..
حياتي معاه بيت وزوجة واطفال ويجيب لنا نواقصنا ويروح الدوام ويجي ويطلع يقضي اموره وماله اصحاب ويرجع وينام وخلاص....الرومانسية معدووووووووومة ..انا عارفة بتقولو شمالي شرقي..لكن لهذه الدرجة!!:busted_red:

حتى الكلام بيننا عادي جدا كأنه يكلم صاحب عادي بالنسبة له..كيف الاولاد حطي الغداء واش ناقصكم اغراض وفين رايحة والكلام العادي...حاسة بملل من هالعيشة ..ماابغاه يمسيني بكلام معسول ويصبحني بكلام معسول او وردة لاااااااا..ابغى نتناقش في حياتنا ..
اللي مضايقني حياتنا روتين فظيـــــــــــــــــــــــــع وملل...:frown:

في اشياء كثير في طبعه ماتعجبني ..يعصب من اتفه شي ..تخيلو يانااااااااااااااس اذا سألته اي سؤال اي سؤال لو تافه لو اقوله الجو بارد برى؟ جوابه دايماااااااااااااا ((ليش)) ياناااااااس اي سؤال اسأله يكون الجواب (ليش) قلت له يااخي جاوب اذا الجو بارد عشان ألبس الولد لبس ثقيل من البرد.. عجزت افهمه صح..مثلا اذا حطيت عصير مع الغذا يقولي مو على كيفك تشربينا عصير حطي لبن واذا سألته اش بتشرب على الغذا يقول حتى الشرب تسألي خلاص حطي اي شي...ياناس هذا وضع طبيعي؟؟

لكن حاولت اتأقلم مع الوضع..وطنشته واهتميت بنفسي ودراستي وحياتي وصديقاتي ورشاقتي وجمالي بالعربي حبيـــــــــــــــــــــــــت نفسي مرة..:26:.لكن في اوقات لازم يغير الطبع اللي فيه لأنه يأثر على حياتنا...ماحس ابدا اننا مثل الناس المتزوجين ..اشوف ناس وامثلة قدامي ..سبحان الله مااتمنى احسدهم على حياتهم..
احس مافي ألفة بيننا...في فجوة كبيرة بيننا :tears::tears::tears:يمكن تكون فجوة عاطفية وهذا وارد كثير وزيادة فجوة عائلية ..حتى اذا طلعنا مكان نتمشى مع الاولاد مااااااااحس اننا مثل باقي الزوجين اللي اشوفهم قدامي...احنا تمشيتنا نلعب الصغار واوقف انا معاهم وهو يروح مع واحد من الاولاد يلبعو ويرجعو ونطلب عشا ونرجع وخلاص ولا اي كلمة ولا اي مودة ولا رحمة ولا ألفه
مجرد زوج وزوجة واولاد وبيت وخلاص...

المشكلة اللي مسببة لي ازمة نفسية اني انا من بيئة وهو من بيئة ثانية يعني انا حضرية وهو قبيلي..اشياء كثثثثثثثثثثثثثثثثثثثثير مانتفق فيها ..انا اشوف انها طبيعية وهو يشوف انها غير معقولة...دايما اندب حظي اني اتزوجت واحد مو من بيئتي...بصراحة انا شمالية غربية يعني قيادية وصعب علي ارضى اتطبع بأطباعه واقتنع بافكاره..واتوقع هو نفس الشي..وهنا صارت النتيجة(((كل واحد عايش لحاله))

طيب انا عارفة ((لايغير الله مابقوم حتى يغيرو مابأنفسهم))
طيب انا مستعدة اتغير :surrender: عشان حياتنا تمشي..لكن مو معناتو اتخلى عن مشاعري واعيش لحالي مثله ..اتغير لكن مو معناتو اوافق على افكاره اللي غلط في نظري ونظر اهلي وناسي وصحباتي وبيئتي..انا مستعدة اتغير عشان نعيش...لكن مو مستعدة اضحي بنفسي..:icon1366:

 

[أم غالي]

السلام عليكم ورحمة الله

الغريب ان الموضوع صار له يوم كامل ومحد رد ليــــه!!!!!!

أنا عارفة يمكن بتقولو موضوعك عادي وتافه يصير بين كل اثنين لكن يهمني انا كوني انا صاحبة المشكلة

يعني لازم يكون زوجي يضربني او سكير او خائن علشان تردو على الموضوع...

صحيح اقراى مواضيع اقول الحمد لله الذي عافانا مما ابتلاهم ..وصحيح اللي يشوف مصيبة غيره تهون عليه مصيبته....

لكن برضو محتاجة حل.....

حاليا انا من امس ماأتكلم معاه نهائيا غير في الضرورة ..لاني طفشانة منه وابغى اخذ فترة نقاهه منه ومن الكلام معه...

زعلانه ان حياتي وصلت لهذه المرحلة...لكن هو سبب الفجوة ...سبب الجفا ...وسبب البعد..

 

[روحي أنت]

حبيبتي انتي لازم تتكلمين معااه حل من طرفك بس مستحييل يحل القضيه
جربي سوي جوو رايق واخذي الأولاد عند اختك او اخته واقضوا يوم كانه يوم من ايام شهر العسل
جلسي معااه جلسة مصارحه
كلميه وقولي له كل اللي في خاطرك
كلامك هذا اللي قلتيه في المنتدى قوليه له بحذافيره
خليه يحس بغلطه
بس مو بطريقة اتهاام يعني خلي الجوو بينكم راييق قد ماتقدري ..
والله يصلح حآآلكم ..
ويسخر لك زووجك يارب ..

 

[أم غالي]

شكرا حبيبتي على النصيحة ...:a200:
لكن يمووووووووووت لو اني اطلع الاطفال من البيت واسوي جو رايق معاه....
مااايحب ابدا.....ويظل قلقان متى بتيرجعو الاولاد ...ويقول هذه حركات مالها داعي
واحنا كبرنا على الاشياء هذه...يعني بالعربي فاصل سلك المشاعر ابدااا..

مافي مشاعر ماعدا وقت رغبته وحقه الشرعي يبين شي بسيط وعلى طول يشتغل..

اوقات احس انه يخاف يبين حبه يخاف نجلس بجو رومانسي رغم اني ماراح اعضه مثلا

انسان غريب غريب...

مجرد روح ودم ولحم وعظم وجلد...فقط.

 

[M.A.R.Y.A.M]

كل شي بيدك بعد عون الله تصلحيه الشمالي الشرقي عيبه العصبية ومو متعود ع الكلام الحلو الجفاف يعني

بس لاحظي ايجابياته وفي بيتوتي مهتم باحتياجاتكم يعني هو يحبك ياغالية بس بافعاله مو باقواله لكن في امل يتعدل اكيد في طرق شوفي الخبيرات هنا بالشمالي وتواصلي معاهم

انا شمالية شرقية وزوجي شمالي غربي العكس يعني بس لاني مرأة فيني عواطف ومشاعر وكلام حلووو بس الرجال لان طبيعة التربية والبيئة وكونه رجل تعود ع الجفاف العاطفي يعني تاثر

بس العصبية صفة مشتركة بين الشمالي الشرقي رجل وامرأة..

قصة يحب كل شي لحاله هذا طبع لكن صحيح هو مفروض يغير شوي من طبعه ليحسن علاقتكم لكن كيف مدري حقيقة الخبيرات اكيد يفيدوكي

حبيت ابديلك رايي والله يألف بين قلوبكم وياررب يصييير رومانسي هههههه

 

[هذا رأيي]

السلام عليكم ورحمة الله وبركاته

غاليتي ..تشتكين من شيء بسيط من المفترض أن تكوني تعرفين حله مادمت خبيره بالشمالي.!!!!

غناتي, الشمالي يحمل في داخله وأعماق أعماقه قلباً محباً عطوفاً مخلصاً خدوماً لمن يحبه ,,

لكنه لايعرف كيفية التعبير عن هذا الحب سوى بأفعاله..

لايتقن من أبجديات الود سوى العمل بكد وكدح لإعالة أسرته وحمايتها من صروف الزمن وغدر الدنيا..

هذه لغته التي يعرفها...وتخلى عنها باقي الأنماط لأنها مكلفه ومتعبه..

وتمسكوا بسياسة أقل جهداً وأحب لقلب الأنثى..وهي الكلام المعسول..

غلاتي..
ماذا ستستفيدين من زوج يصبحك بغزل ويمسيك بأمل ولكن لاترين شيئا واقعا..كله كلااااااااااام ..؟؟.!!!!!

أنا لا أقول أن ترضي بجفافه ولكني أردت تذكيرك بالنعمة التي أغفلك الشيطان

عنها ليعظم عيوبه في عينيك وينسيك أن الحل بيدك ولكن هي النفس الطماعه..!!

أيتها الملكه..ألست الأنثى ؟؟

ألست الزوجه؟؟

ألست منبع الرومانسية والحنان؟

ألست مكمن الدلع وقمر الزمان؟

زوجك قام بدوره على أكمل وجه فحماك من قسوة الزمن وتكفل لك بحياة كريمه
أفلا تقومين بدورك أنت وتردين له الجميل ..فتعيشينه في عالم الحب وجو العشق مكافأة له على تعبه من أجلك..؟؟؟؟؟؟؟؟

أليس من حقه أن تصبري على جهله وتتحملي جفافه وتعلميه بصبر وحكمه أبجديات الحب والرومانسيه؟؟؟؟؟؟

لماذا تطالبين زوجك بدوره ودورك؟؟؟؟؟؟؟؟؟

لماذا لاتتعلمي كيف تسعدين نفسك وتسعدينه وتتمتعين بما حباك الله من نعم..
بدل أن تضيعي وقتك في التألم على حالك والبكاء على نصيبك..

أنا لا ألومك على بحثك عن حل بالعكس هذه إيجابيه أحييك عليها لكن أقصد

لماذا لما تكون شكوانا عن شمالي نذكر كل ألفاظ الجفاف والجفاء والقسوة
وكأنهم عارون من الفضل؟؟.!!!!!




حبيبتي إذا أردت رومانسيه وكلمات حب من الشمالي فيجب عليك إنتزاعها منه ليس بالغصب ولكن بالكيد والدلع ..



إذا لبست ملابس جديده فتمايلي كطفلة صغيره وإبتسمي بشقاوه وإسأليه بكل ثقه وغنج أسألك بالله مالقى زهاه؟؟



إذا طبخت طبخة لذيذه فاكتبي سعر لكل طبق ..
مثلا صحن السلطه: بوستين على الخد
الكبسه ليله غييييييييير
اللحم تكرار كلمة أحبك ثلاث مرات لمدة يوم


أو قولي الغدا لذيذ؟؟ وقربي خدك وقولي بدلع وين بوستي؟؟




وغيرها من الأمثلة كثيييييير ..تفنني وإبتكري وحتما ستجدين ..ولاتنسي أنك غربيه نمط الإبداع والإبتكار..



المهم لاتنتظري منه غزلاً ,,ولاتستجدي قطرات الحب التي يقطر بها عليك



فقد تموتين من العطش وهو لايدري عنك..



أخبريه بحاجاتك...علميه برغباتك...تفنني في إخراج كلمات الغزل منه..



وخصوصا وقت العلاقة الخاصه..

صدقيني لن يستغرق هذا وقتاً طويلاً حتى يتقن هذا الفن فالشمالي سريع التعلم.. وسيريك من صنوف الحب المزيد..المهم أن ترضيه وتبادري لإشباعه وسترين من مايعجبك..

وفقك الله وأعانك....

 

[chorook]

الله العالم كيف يفكر وكيف يحس هو كمان زيك ما يحب يتغير هو طبيعته هكذا فلا تحاولي تغييره بل حاولي الاقتراب منه لا تظني انه سعيد انه مثلك بقدر صلابته ولا مبالاته ولكنه يحمل قلبا من ذهب ليتك تقتربين منه ليتك تغيرين طريقتك ليتك تسقينه الحنان قطرة قطرة صدقيني ان ما بداخله لن تستطيعي تصوره ولكنه مع الزمن اعتلاه الصدا فحاولي تنضيفه وتلميعه فقط افهميه اقلبي موازين تفكيرك وحاولي ولكن بالمقلوب وسوف ترين

 

[أم غالي]

السلام عليكم ورحمة الله

الاخت M.A.R.Y.A.M
مشكورة حبيبتي وبعقب على ردك...انا عارفة ان الشمالي يبين حبه بالافعال وبصراحة عارفة انه يحبني ربي مايغير علينا ويكفينا شر الحساد ...لكن انا انثى ..اشتهي الكلام الحلو ...لو كلمة وحدة في الشهر.:32:..كنت استخدم معاه طريقة انه انا اقول الكلام الحلو وانا اللي امدح عشان يتعلم مني ويقول ...لكن مافي فايدة:8: مايقول مايعلق ابداااااااا على شكلي رغم ان كل اللي حولي يمدحو شكلي واناقتي واني متميزة لكن هو مايمدح اي شي فيني ولاني شمالية طبعا احب المدح>>هذه شخيصيتي من بيدي..خصوصا هو ابغاه يعلق يتغزل لكن ماااافي..
وصلت لمرحلة اني طفشت .:34:..انا اللي اقول الكلام الحلو وانا اللي امدح وانا اللي امزح وانا اسوي كل شي لانسان جدار ...خلاص مليت واتوقفت:40: . الله المستعان

 

[أم غالي]

الاخت هذا رأي: جزاك الله ألف خير
بأقولك كيف اشتركت بالمنتدى...كنت زعلانه ببيت اهلي لمدة 15 يوم والف في النت والاقي المنتدى العظيم وجلست اقرى وعرفت الانماط ...قبل المنتدى كنت اقول ان الحياة مستحيلة مع هذا الرجل...واقول ياويلي برجع بيت اهلي مطلقة هذا مايتعاشر...لكن لما فمهت...ندمت الف مرة ومرة اني طلعت من بيتي .:e136:..والحمد لله شوفيني من 3سنين ماعمري رحت بيت اهلي بعد ماعرفت هذا المنتدى..طبعا تصير مشاكل ياكثرهاااااااا لكن مستحيل اطلع من البيت.ومستحيل ادخل اي مخلوق في حياتي..وعرفت كيف اتصرف معاه...

يمكن مشكلتي حلها بسيط ويمكن اعرفه ...لكن احس انها فترة الفتور وفترة الملل اللي تجتاح اي زواج...وخليها تكون سحابة صيف وتعدي...
يمكن ايضا لاني مضغوطة من اشياء كثير فوق بعضها...:e076:
ادرس بالجامعة وعندي 3اولاد وهو عصبي وانا عصبية...
وخصوصــــــــــــــــــــــــــا هذه الفترة لاحظت عليه قلة العطاء بحجة ان عليه اقساط...طبعا انا مرررررررررررة مضايقني هذا الموضوع...لانه معودني اني اللي احتاجه اشتريه ..حاليا حتى احتياجاتي صار يتذمر منها....عشان كذا قلت انه صار مايحبني..:dunno:

انا ماابغاه يمسيني بكلام حلو ويصبحني بكلام حلو...ابغى احس اني انسانة اني انثى في نظره..وهذه الكلمة اللي تعبت اوصله هي..انا بنت يعني انثى يعني كتلة مشاعر...
واللي مزعلني بزيادة يلاحظ على المذيعات التغيير ويقول مغيرة لون شعرها وناحفة ومتمكيجة وانا ماقد عللق على تغيير اسويه..:8:

صدقيني يمكن كل الاجابات انا اعرفها ومرت علي ...لكن لاني تعبانة نفسيا ومضغوطة ومو شايفة شي لاحلول ولا خبرة..:33:

المشكلة لما اسوي واسوي واسوي واعطي وادلع وامدح ومالاقي تجاوب ..اطفش واتوقف..هو بطريقة سكوته وعدم تجاوبه ومايعير رومانسيتي اي اهتمام اعطاني فكرة عنه انه(((انا لااحب الرومانسية ومااطيقها ولايهمني الكلام الفاضي اللي تسوي واحنا كبرنا على هذه الحركات)):crazy:

اوقات لما اكون صابغة شعري اجي ادلع عليه واقوله كيف احلويت بهذا اللون ؟؟ يقول طيب
يسد نفسي..
طبعا شي واااااااااااحد فقط اللي دايما يمدحه ويعلق عليه ويعجبه ..اني جنسية و مشبعته جنسيا..لدرجة لاحظت انه يدور في النت عن صفات الشبق الجنسي عند الزوجة>>ياويلي ..
الله يهديه ويسخره لي ويهديني للصح...والحمد لله على كل حال.:8:

 

[أم غالي]

الاخت chorook: جزاك الله خير..
راح احاول اتغيير . راح احاول ابتدي معه من جديد ...تصدقي اني مسجلته في جوالي ((ابتدي عمري معك)) من يوم الملكة ماغيرتها>>>هههه:1:
يمكن اني تعبت اعطي ولا القى مقابل ..مو مقابل بالكلام ..طبعا شمالي كل شي بالافعال ..يمكن حتى الافعال ماصرت اشوفها...وهذا اللي خلاني انفجر..:8:
المشكلة مو معطيني فرصة اني اسقيه حب او حنان ..طول اليوم معصب وطول اليوم قرفان وطفشان واذا جيت اكلمه وقت يكون شبه رايق ..يكلمني بوجه عابس.:30:..تلقيني انسحب وامشي في طريقي.مايعجبني الحال المايل..
ربي يعين ويساعد ويعطيني القوة والحكمة ..يااارب

 

[أم غالي]

عندي سؤااااااااااااااااااااال يمكن اكون اعرف اجابته لكن عيوني حاليا معمية مااشوف شي...استغفر الله ..

ليش يخاف من الجو الرومانسي ..ليش يتلاشى اي جلسة حب بيننا...ليش يكره نطلع سوى لمطعم ..ليش يخاف يبين لي حبه..اوكي هو يبين بالافعال لكن الكلمة الطيبة صدقة....ليش يخاف يحط عينه بعيني وينظرلي بحب وبعطف..ليش يتلاشى اي لمسة دافئة بيننا....

كيف اقنعه ان لازم نطلع لحالنا لو يوم في الشهر عشان نخفف ضغط الدوام عليه وضغط دراستي وضغط الاطفال ومشاكلهم ...

 

[Love Secret]

والله حاسه
بيكي

وانا جنوبيه غربيه
تخيلي اخذت فتره اجيلو عند الباب قبل مايخرج الدوام عشان يخضني
وانا نفسي اعودو عليها من زماااان حضني مرتين واليوم التالت عصصصصصصصب وقالي بصراحه الحضن دا مره مالو دااعي....تخيلي وانا فعلا اكون محتاجاه

ولمن البس لبس جديد مااااااايعلق ومدري يلاحظ ولا لا بس لما اقوله ايش رايك في ستايلي..يقولي طيب مش بطال...اقول نطق الحمد لله

وفعلا الحب عنده بالافعال..اول ماتزوجت تخاصمنا لانو كان جااااااااااااااااااف وما يعطيني وجه معايا والله ماحسيت اني عروسه مدلعه ولا حب..فقلتلو انت ماتحبني..قااال كيف ماااحبك وانا مستاجر لك شقه ب2000 ريال في الشهر

طلباتي الخاصه وما ادراك ماطلباتي من لبس ومكياج واشياء دلع والله يتعبني حتى يشتريلي الاابغاء


خذي نصيحة الاخت هذا رائي
ماشاء الله افكارها رووووعه وكلامها مرره اقنعني

 

[Love Secret]

عندي اجوبه متوقعه لاسئلتك

هو يتحاشى الجو الرومانسي لانو يرمز له ببدايه علاقه جنسيه
وهو شمالي مايحب الجنس كتير

ومايخب يطلع عشان مايصرف ولانو مش اجتماعي مايحب الاماكن المزدخمه

 

[أم غالي]

هلا بك اختي:

جزاك الله خير.

الله اكبر يموووت لو احضنه يمكن يتخيل اني بأشفط الاكسجين اللي بصدره ويموت

تخيلي انا مجرد اني كل يوم لما يخرج للدوام الصباح اجي عند الباب واودعه صار يتضايق..
صرت والله ماعلي منه يخرج حتى مع السلامة مااقولها ..لانه دائما يصحى على جنبه اليسار ومكشر..خلاص روح بتكشيرتك ..ليش انكد على نفسي..

الله المستعان
بالنسبة لاجوبتك مدري اعذريني ماحسيتها صح وباقولك ليش

انه الجو الرومانسي يرمز لبداية علاقة جنسية ..طيب انا مااعمل الجو الا اذا حسيت انه عنده رغبة جنسية واوقات يكون ملمح انه يبغى شي الليلة فأقوم اسوي الجو...
وبالنسبة اللي عندي شمالي صح لكنه جنسي ..مدري كيف تجي...

بالنسبة انه مايطلع عشان لا يصرف..الشمالي كريم جدااا وملاحظة مع زوجي هذا الشي...واوقات اقوله نطلع انا وانت لو نشنري ايسكريم فقط ونرجع يقول طيب خذي الاولاد معانا !!!!!!!!!!!!
ماادري عنه بصراحة اوقات احس اني خابزته وعاجنته لكن اوقات احس اني مكتوفة الايدي مااقدر اتصرف معاه ولا افهمه..

 

[المفارقة]

ياقلبي عليك ياأم غالي كأنك تتكلمين عن معاناتي وأنا توي لي سنتين بس وعندي ولد عمره 6شهور
الله يسخرهم لنا ويسخرنا لهم يارب

 

[أم غالي]

اكيد معاناتنا وحدة طالما ان رجالنا شخصيتهم وحدة>>>شمالي شرقي:santa_1:

الله يهديهم ويسخرهم لنا ويهدينا لهم ...

 

[thel]

هلا قموره

تكلمتي عن نقطه انا ملاحظتها ب شوشو حقي وما عمري شفتها هنا مكتوبه بصراحه
وهي كلمة ليش على كللللللللللللللللللل شي ليش ليش ليش

تدري انا صرت اجهز رد ليش قبل ما اسال او اتكلم === طبعا مو دايم يكون الرد صريح
لكن غالبا اكون مجهزته

وبعدين اذا تبينه يتكلم سولي معه عن شغله ........جربي اساليه عن شغله وبتلقين ما يسرك

انا مثلك شماليه غربيه ..... الله يسخرهم ويسخرنا

 

[سآرآ]

مدري شقولك غير ربي يسخرلك اقوئ منك ويكون في عونك يارب

 

[بنت النشاااما]

صدقيني يااختي انه يموت فيك دليل انه ساكت انه مرتاح معك لوتفارقينه راح يموت لانه تعود عليك وانتي حاولي تلطفين الجو تتكلمين حتى لو هوكان ساكت اتمنى لك التوفيق

 

[أم غالي]

الاخت THEL
تصدقي كلمة ليش تكون جواب لأي سؤال بالدنيا ..وانا عشان ابين له ان هذا الرد غلط تلقيني عمري ماارد على كلمة ((ليش))...

عشان يبطل يقولها...بجد كلمة مالها داعي...لازم يغيير من اسلوبه ..خصوصا اللي يتعامل فيه معايا...

لكن اسلوبه هو برى واسلوبه مع غيري مالي دخل فيه...

لكن المثل يقول (( اظهر للمجنون قرصه يعقل)) لوتعرفيه..
الله يعين.