قصتي الطويله ساعدوني في وضع نهايتها

[ياعاشقه الورد]

قصتي طويله من سنين وسبق وكتبت بعضها في المنتدي
اشياء كثيره تغيرت فيها وللامانه حتي زوجي تغير بس بعد اييييييش
باختصار حياتي مع زوجي من اول يوم في مشاكل تزوجت عشان اتخلص من ضغط اهلي للاسف ماكنت عارفه العواقب وكنت متخيله راح الاقي الحب والتفاهم عند زوجي الي فرشلي الارض ورد بكلاااااام له اول ماله اخر وطلع كله كلام

شفت منه كثير اهله ماقصرو تدخل ورمي كلام واستفزاز ماشفت لا احترام لا تقدير
وقفت مع زوجي كثير ما لقيت عنده غير الكذب والجرح حتي خصوصيه مالقيت وانا الي اعشق الخصوصيه حتي اهلي امنعهم يدخلو في حياتي
بنيت حياتي بنفسي تعبت وعاندت حتي خلصت دراستي الجامعيه في تخصص ممتاز
زوجي تعليمه ثانوي للاسف ماعنده طموح
خاني مرتين واجهته بكي واعتذر بس ماقدرت انسي
وقعنا في ديون ومصايب صار لنا سنيتن نعاني بسببها
اهله كل شي يعرفوه ويمشو وراه في كل خطوه وكل شي يتابعوه كانه طفل صغير
بالرغم من ظروفنا دايما يطلبوه المال وهو مستحيييل يقصر معاهم
تعبت تعبت تعبت
حاسه بالندم فوق ما تتخيلو
لاني تزوجت شحص مو مقتنعه فيه ولا قادره احبه ومؤخرا سرت اكرهه من كل قلبي
راح اكمل 4 سنوات زواج ماشفت يوم حلو
الكلام بينا كان قليل ومع الوقت توقف تماما لان مافي تفاهم بينا يتكلم يمين اجي شمال وتكبر المشكله بدون سبب ونجلس اسبوع مثلا ما نتكلم وعلي ه الحال
تكلمت معاه في مووضع اهله ومعرفتهم بكل تفاصيل حياتنا صار يقولي خلاص حتغير ويوهمني بكدا وبالصدفه يتكلمو قدامي او اشوف محادثه بالواتس اكتشف انه ما يتحرك بدون ما يعلمهم سوائ امه او ابوه
نزل من عيني اختار الكذب عشان يسكتني وما اختار يكون رجال وصاحب قرار
ما عدت حسيت معه باي شعور
عايشاه معاه عشان طفلي وبس وكل يوم اموت زياده وحده وفراغ وتجيني افكار اني لازم اخونه وانتقم منه او اختار لي صديق واهمله استغفر الله مجرد افكار من الشيطان عمري ما سويتها

 

[ياعاشقه الورد]

حتي علاقتنا الحميمه اكرها من كل قلبي من اول يوم ما حبيته وكنت اجامله وبعد ما انصدمت فيه كرهتها بزياده
اتهرب منه عشان بس ما يلمسني مااااطيقه حاولت وحاولت وكل مره اجلس ابكي لوحدي الله يكرمكم في دوره المياه من شده قرفي واشمئزازي منه
مجروووحه جرح كبير ماعدت اثق فيه ابدا خذلني كثير
ماعطيه ولا كلمه لاني اعرف ماراح تبات في فمه ولو بعد وقت مايقدر لازم يتكلم

زوجي تغير في اشياءكثير صار مداوم علي الصلاه يحاول يتجنب زعلي ويراضيني مو مثل اول
مايضغط علي حتي في زياره اهله اذا بحاطري اروح واذا مابغي خلاص
حنون علي طفلي جدااا
بس انا خلاص قلبي مات تجيني فترات ابكي من كل قلبي وانهار ومااقدر اكمل واجلس كم يوم مااطالعه ولا اتكلم معاه ماني قادره اناظر في وجهه
عصبيه جداا اقضي نهاري لوحدي واكلم نفسي واجد نفسي اصرخ من النار الي في قلبي وابكي بحرقه

كل يوم قبل مانام اطالع زوجي وابكي ماني قادره اتقبله ومو قادره احبه ومو مصدقه اقضي باقي عمري معاه

كلمته مره وطلبت منه الطلاق رفض وقالي مو حل عشان الطفل هذي حياتنا وخلاص نعيشها باي شكل
حاولت وقلت معلش احاول بس مافي شي تغير
نوبات البكاء دايما تجيني والظروف الماديه كثير تضغط علي اعصابي ويوم ما يجي يقولي اهلي طلبو مني فلوس هو يفضض من الضيق وانا امثل انه عادي عندي
وبس اسير لوحدي انفجر وابكي من قهري
احرم نفسي واقدر ظروفه وهم ولاااا حاسين لحالي اتعذب حتي اهلي ما يعرفو
زوجي مل وصار يقولي بداتي اطفشيني دايما متصدره وجه خشب
مو قادره اطالع فيه ولا ابتسم حتي اكرهه جدا
دلوني ايش الحل

 

[صعبة المراس]

الله يعينك ويفرج همك ، الظاهر والله اعلم عندك اكتئاب .

حافظي على اذكارك حبيبتي ، والتسبيح والاستغفار ، وامشي على برنامج رقية شرعية حتى يتم الشفاء بإذن الله .

فضفضي لصديقة ثقة ، واطلعي ، لا تضغطي نفسك الدنيا ما تسوى ، اعتقد انك تعبانه من قبل الزواج ، وتخيلتي الزواج مخرج ،

عالجي نفسك حبيبتي ، المشكلة الاساسية ليست زوجك ولا أهله ، المشكلة عندك ، اعرضي نفسك على طبيب اذا احتاج الامر ، ربي يعافيك ويصلح حالك يارب .

 

[ذو رصاف]

نوبات البكاء والاشمئزاز من العلاقة الزوجية ..يحتاج لك علاج نفسي وقرآني
اما موضوع يخبر أهله كل شي زوجك مو الوحيد اللي يسوي كذا وفيه حريم كثير ازواجهم ماعندهم خصوصية ..لاكن باسلوبها تغيره. .واظن أن الزوج اللي مثل زوجك ﻻزم يوصل لمرحلة الثقة والشغف بشخصينك وكلامك حتى تكوني انت بئر أسراره ومحط انظاره ...مو زي ماقال يلاقيك مثل الخشب
وزي ماتغير في أشياء باعترافك ..ممكن يتغير في الباقي
بس مو ذنبه انك ماتحبيه. .أظن اﻻصلاح يبدأ منك.

 

[طاهرة كالمطر؛]

أنا أشوف أن مشكلتك تكمن في قناعاتك اللي مو راضية تبدليها
انتي حاطة في بالك انك كارهة الشخص هذا ولا انتي قادرة تتقبليه
والعقل الباطن صار ينفذ الفكرة في افعالك
حاولي تتقبلي زوجك وانزعي نظارة الكره والاشمئزاز وتقبلي اي تصرف منه برحابة صدر وانظري له بحنان وكأنه طفلك ورح تتغير حياتك بإذن الله

 

[رندا كووول]

عزيزتي قبل لاتطلبي الطلاق وتنهي حياتك معه ..
ارجو ان ترقي نفسك بالرقيه الشرعيه .وتشربي ماء مقروء فيه ..وتسقي زوجك بدون مايعلم..
حالتك غير طبيعيه ...
الانسان مهما يكره شخص ورأى منه معروف وحسنات يدخل الحب الى قلبه بالتدريج .ويتسامح معه.

ياليت تبدأي بالرقيه وقراءة سورة البقره .والاستغفار والصدقه .وتشوفي الفرج بإذن الله من اول اسبوع ..وتتقبلي حياتك وتتحسن للافضل...لاتستسلمي للوساوس وانك تكرهيه وكل همك وتفكيرك الخلاص منه..فكري بايجابيه عزيزتي .

 

[مشاعر حزينه ..]

ألجئي الى خالقگ واشكي له همگ وماخاب من طلب ربه ..

 

[لووجي ..]

عليك بالدعاء والصلاه وقيام الليل والاستفغار << هذه اشيا جدا مهمه لتغير حياتك للاحسن
الله يهديكم ويصلح بالكم ويسعدكم واذا تقولي تغير معاك والحمدلله حاولي انتي كمان تتغيري معاه واذا مو عشانه علشان حياتك انتي وحيات ولدك فكري بنفسك كثير وحاولي بكل الطرق انك تسعدي نفسك وولدك والله يوفقكم ي رب

 

[جوهره مصريه]

انا مع الاخوات في اللي قالوه وازيد كمان انك شايفه انه اقل منك وخاصه من الناحيه العلميه لانه معاه ثانوي بس للأسف معظم اللي بيتفوقوا علي ازواجهم بيحسوا بنفس الإحساس بس لا تنسي اختي انك مهما عليتي عنه ومهما بلغتي من المناصب والمراكز تظلين في النهايه امراه وام تحتاجين لزوج لكي يصونك واب لابنك
شوفي ايجاياته وركزي عليها وتغاضي عن سلبياته تماما .....ربنا يفرج همي وهمك حبيبتي

 

[حياه عسل]

انا معهم فى النصاءح ولازم تعرفى ان زوجك ليس الوحيد الذى يعطى اهله فكرى ان هو بيحب ابنك وعيشى علشان صغيرك فى نساء تتمنى طفل من زوجها ولو مثل زوجك فى معاملته لك

 

[ياعاشقه الورد]

شكرا لكل الي ردو علي
الي صبرني 4 سنوات اني احط قدام عيني اي شي كويس سواه علي شاني
بس انا بشر عندي طاقه لما تيجي الحاجه الحلوه بعد تعب ومشاكل وخناق وتشوفي لاهله علي قلبه زي العسل
ولك مافي شي يجي بالساهل

زوجي جنوبي غربي وانا شماليه شرقيه
مافي اي نوع من التفاهم بينا
ومن اول يوم زواج ما حبيته وما دخل قلبي حاولت وحاولت بس الوضع كل ماله للاسوء ماعاد له في قلبي اي احترام او حب نزل من عيني وماعدت اثق فيه
الي يضحك في وجهك ويقلك احبك ومن وراكي يخونك ويضحك عليك ويكذب عليكي ماهو رجال تقدرين تحترمينه وتقدريه

اعتبرو كلامي فضفضه لان الوجع الي انا حاسه فيه راح يقتلني
فوضت امري لله هو اعلم بحالي

 

[طاهرة كالمطر؛]

الله يفتح لك ابواب الراحة والسعادة
وبإذن الله رح تكون حياتك حلوة وسعيدة
كل انسان لابد من النقص في حياته
ومهما اكتملت له النعم لابد من وجود شي ينقص سعادته
لأن الدنيا ماخلقنا فيها للراحة قال تعالى سورة البلد ( لقد خلقنا الانسان في كبد )
الجنة هي وطن السعادة المتناهية ووطن الراحة ووطن الامان
جمعنا الله في اعلى جنانه على سرر متقابلين
آمين