قصة" كبرياء رجل وشذوذ إمرأه"..>>> روايــه كـاملــه...

dr_dan300 قال:
ما شاء الله عليكي يا غروب تابعي
اتحفينا
صراحه تلعبين بمشاعرنا
بارت يبكي و بارت يضحك
الله يحفظك
أنقر للتوسيع...

حبيبتي والله..... يسلم لي قلبك غلااااي تحياتي لك .
 
لاااااااااااااااا بسم الله عليكي يا غروب لا تموتين
الله يحفظك ان شاء الله و يطول في عمرك في الاعمال الصالحه
منتظرين على ناااااااار
 
غرووووووب ويـــــــنك
من طولت الغيبات جاب الغنايم...
بالإنتظار
...
 
سلامي عليج عزيزتي

البارت عجيب

نوره + ماجد = شو النهاية؟

و الجده سحووره عجيبة لووووووووول

و في انتظارج

دمتي بود

الدلع
 





كبرياء رجل وشذوذ إمرأه


البارت التاسع

طارق" لااا وأنا أقدر....تفضلي جدتي
أم عبد الرحمن" وشو ذا ...
طارق".........
أم عبد الرحمن ترمي بالكيس على الأرض وتصرخ"
آآآآآآآآه أيا إبن ال.....
نواف يصرخ فيه " وش صار ... وش جايب إنت
طارق وهو يبتسم"؟؟؟؟؟؟؟؟؟؟؟؟؟؟؟؟؟؟؟؟؟؟؟
\\
//
\\
فوق في غرفة نوره
نوره" هلا
ماجد" هلا بقلبي وحياتي
ماجد" علومك؟
نوره" مو طيبه
ماجد" أفا بس ... بيعيني بالسوق
نوره" هاهاهاي ...يا واثق...تفكر بتجيب شي
ماجد" لو ما أجيب يكفي إني خليتك تضحكين
نوره تبتسم" ايي صحيح
ماجد" عشووووق
نوره" أمر
ماجد " ما راح تقولين لي اسمك... بجد دوختيني يا بنت
الناس
نوره بحيرة" وش يهم الاسم يا ماجد...
ماجد" خليني أعرف مني هذي البنت الي صوتها حارمني
من النوم
نوره" هاهاهاي .... يا رومانسي
ماجد بلهفه" أحبك وميت فيك وربي
نوره" .......
ماجد" عشوق.... تحبيني؟؟
نوره" ما أدري....أنا تعلقت فيك ...لكن حب؟؟
ماجد" لو سؤالي محرج لا تجاوبيني ... ولا تزعلين مني
نوره" أنا ما أزعل منك أبد
ماجد بشوق" يا حبي لك....أنا راسم لك صوره في مخيلتي
نوره" وشنو هذي الصورة
ماجد" أنا أعطيك 22 سنه وأتوقع إن بشرتك شفافة البياض
وشعرك لونه أسود وطويل وحريري مررررره
نوره" هاهاهاي .... مدري
ماجد" إلا ... قولي أي
نوره بدلع " أممممم .. بصراحة وكأنك شايفني وجالس
توصفني
ماجد" ياويل قلبي ويلاه .... طاح ومحد سم عليه
نوره" هاهاهاهاي
,,
تحت عند طارق ومصيبته
نواف" وشو هذا؟؟؟؟؟ أيا الخبل
أم عبد الرحمن تكورت على الكرسي " الله لا يبارك فيك
يا لأملح....هين علي
طارق يضحك" وش صار .... والله فكرتك تحبينه
نواف" ما أدري إنت مجنون ولا إنجنيت
طارق" هههههههه قسم بالله ما أدري إنك تخافين منه
أم عبد الرحمن" خوفك عزرائيل وهو يمصع
روحك.....يمييييييي شيلوه من يمي
صيته إلي كانت على الطاولة" طارق تكفى شيله ارميه بره
طارق" طيب طيب ....صحيح خوافين ...كلها ضب صغير
تناقزوا إلي على الطاولة والي حاضنه الكرسي
أم عبد الرحمن" عساه ياكل خشمك يا الدثوي
طارق وفي يده الضب" سحوره وش ها لرشاقه .... لا بالله
أراهن إنك تدربتي عند هيفا..( ماإلك إلا هيفا)
أم عبد الرحمن" يمـــــــــــــــه شيله بره
طارق باستعباط" عندك أم عايشه وما قلتي لي؟؟
نواف وهو يضحك" لا بالله إنك مو صاحي ...طلعه بره
طارق يغمز له" وش رايك نشويه وناكله
نواف بصرخة" طااااااارق.... صحيح مقرف
استسلم طارق وحط الضب بالقفص وصار نواف يهدي في
ام عبد الرحمن وهي ماضل فيها ولا نفس
\\
//
في بيت أم تركي
أم تركي" هلا والله شلونك يا خوي ...عساك طيب
بو راشد" هلا بإختي وش أحوالش
أم تركي " وش دعوه يا خوي وش هالغيبه الطويلة هذي
بو راشد" والله ياختي لو بعدت الدروب تراها القلوب
موصوله
أم تركي" إي بالله اكيد...بس بعد نبغي نسمع صوتك
بو راشد" سامحينا يختي والله مقصرين
أم تركي" ترى العتب على قد المحبة
بو راشد" إي والله ....إلا أقول
أم تركي " آمرنا يا الغالي
بو راشد" ما يامر عليك عدو ..... هذي تراها زهور زواجها إسبوع الجاي
أم تركي" لا بالله ..خلصتوا عليها ...ومنو بياخذها
بو راشد" والله بياخذها جاسم ولد ال.... من أصل طيب وهو
نعم الرجال
أم تركي " الله يبارك لها ... ويبلغك في راشد وطروب وحمد
بو راشد" وإنت معي يا ختي.... هاااا لا تخلون
أم تركي" لا أفا عليك جايين أكيد
بو راشد" ولا تنسين بيت بو نواف بعد ..
أم تركي" إن شاء الله يبلغ
بو راشد" في أمان الله
أم تركي" الله يحفظك
سكرت ام تركي من عند اخوها وهي تتحسب وتدعي على
تركي الي كان مسمى لها لكن بعد تصرفاته هذي...مافي
وحد عاقله بتقبل فيه
\\
//
في بيت بو نواف...
أم عبد الرحمن" آآآآآه يا يمه ...بغى يموتني ذا الخبل
نواف" هههه بسم الله عليك يمه
أم عبد الرحمن" والله لولا إنت و اختك و امك ...ما كنت
جلست بذا البيت ....يبغي يموتني هالحمار
أم نواف" لا يمه لا تقولين كذا ...إنت الخير والبركه
صيته" ههههه والله يا جدتي هذا طارق يحبك كثير بس
تدرين عنه مزوح
أم عبد الرحمن" مزح معه ملك الموت قول آمين
أم نواف" يوه يمه بسم الله على ولدي
أم عبد الرحمن بنظرة استصغار" يعني تفكرين حالك تحبينه
أكثر مني ؟؟؟ ما أدري منو مربيه على كتافه ....بس هو الله
يهديه يبغي يجنني وغصب عني اطلع من طوري
طارق يدخل عليها وهي باعترافها الخطير
طارق يصفر" يلعن على الرومانسيات
أم عبد الرحمن تلوي بفمها" ليتني طريت الجنة
طارق بنبره رومانسيه"ومتى بينصلح حالنا يا بعد الروح
أم عبد الرحمن توها بتدعي عليه مثل عادتها يقاطعها نواف
نواف" هدنه الله يخليكم نبغي نرتاح
أم عبد الرحمن " أقول يمه اليوم بروح مع امك ...نطلب لك
نوف... لازم ناخذ شي بيدنا ولا كيف؟؟
نواف اعتفس فوق تحت" لا يا جدتي مو وقته
الكل تفاجأ من ردة فعله؟؟
صيته" وش صار؟؟؟ غيرت رايك؟
نواف" لاااا بس أجلت الموضوع
أم عبد الرحمن باستغراب" وليه؟؟
نواف بيتركهم من غير ما يرد عليهم...لكن امه مسكته من
يده.. صار يطالعها بعيون حايره
أم نواف" وش صار يمه؟؟ وش ها لتغير المفاجئ
نواف بنبره حاده" وش تبغون مني هاااا ....أتزوج وأجيب
عيال حتى عيالي وزوجتي يشوفوني أنضرب من الوالد
قدامهم
طارق بحنان" لا تكبر الموضوع وانا اخوك
نواف" أي أكبر الموضوع ...أنا اليوم عمري 28 سنه وأبوي
جالس يمد يده علي .... والله خوش أنفع اصير مسؤول وأفتح
بيت ...هااااا
تركهم نواف وصعد غرفته وحالته حاله صاروا الكل
يطالعون ببعض ...تركتهم أم نواف وراحت المطبخ ...
صيته تبكي" مسكين أخوي حبيبي
أم عبد الرحمن بحده" مو بكيفه ...لين يصير كل شي على
هواه.... دام انه يحب نوف والله والله لآخذها له
طارق" لا بالله سحوره قولي قسم ....أجل بكيف منو؟؟
أم عبد الرحمن بحنان الأم المفقود بالنسبة لطارق" ولدي
حبيبي....عيوني انت
طارق بذهول" هاااااا
صيته تحول بكاها لضحك" ههههههههه
أم عبد الرحمن تتحايل عليه وتمسح على شعره" إلا أقول ...
طارق يتصنع التوتر" سحر أنا طارق مو بو عبد الرحمن
صيته تنزل دموعها من الضحك" هههههه
أم عبد الرحمن" الله يرحمه ...من خلف ما مات ...
طارق يطالعها وهي تترجاه ويتصنع الخوف" لا يكون
تفكريني نواف تراه صعد فوق يا سحر
أم عبد الرحمن" إنت ونواف واحد ....إثنينكم عيالي
طارق" وش له التمصلح سحوره
أم عبد الرحمن" أبغيك بشغله ...إذا مافي مانع
طارق يجلس ويحط رجل على رجل" والله ما أدري أشوف
جدولي شلون عندي شغل او فاضي وأرد عليك
أم عبد الرحمن ترجع لإسلوبها بعد ما نرفزها طارق
وتضربه على كتفه" لين قالت لك ام عبد الرحمن شي قول
تم.... سامع ولا لا
طارق يفز واقف " على هالخشم والله
صيته" ههههههه
\\
//
في بيت بو تركي
أم تركي " والله تو ما نور البيت يا خالتي
أم عبد الرحمن" ههههههه هذا نورك والله
أم تركي" وراها أم نواف ما جت
أم عبد الرحمن" والله تدرين عنها .... بو نواف دوم يتطلب
...وهي ما تقدر تخليه خصوصا في العصريات
أم تركي" إييييي بالله....إلا أقول
أم عبد الرحمن" سمي
أم تركي " سم الله عدوينك...هذا اخوي بو راشد دق علي
...يقول زواج زهور اسبوع الجاي وقالي اخبركم
أم عبد الرحمن" بالبركة ...والله يهنيها يا رب ...لكن روحه
والله ما اقدر ..رجيلاتي ماتشيلني
أم تركي" يوووه تبغين بو راشد يزعل منك تدرين إنت خالتنا
الوحيدة... والله يزعل لو ما تروحين
أم عبد الرحمن" خلينا ندرس الموضوع مع العيال ونشوف
ام تركي" على خير
نوف و ميثه" السلام عليكم
أم تركي" هلا والله ببناتي ..شلونكم
ميثه " طيبين والله ...وليه البنات ماجوا يا خالتي
أم عبد الرحمن" تدرين نوير ماعاد نشوفها ... وصيته بعد
عمري شاطه عمرها في العشا
نوف تجلس" ههههه وش جاها اليوم بتسوي عشا
أم عبد الرحمن " ههههه والله أنا قلت خاطري بثريد على
العشا ...قالت لي بتضبط لي الامور وبتسوي لي عشا على
الكيف هههه والله يستر بس
ميثه" يووووه والله بيجيكم تسمم
الكل" هههههه
أم عبد الرحمن" يالله كل وحده تقوم تشوف لها شغله...
وخلوني اجلس شوي مع نوف
الكل"؟؟؟؟؟؟؟؟؟
أم تركي" خير يا خالتي
ام عبد الرحمن " خير خير ...كل خير بس طلعوا منها انتوا
أم تركي" يالله بقوم أسوي لنا قهوه
\\
//
في الشرقية
مرام " والله من زمان ما تجمعنا
شيماء" ايي بالله وين ذيك الأيام
مرام " تدرين الأوضاع كلها مكهربه من بعد موت مسعود
شيماء" ايي والله الله يصبركم ....ويصبر اختي بعد
هذي أمي بعد خاطرها كثير ان شيخه تجي عندنا البيت
...تقول انها تحاتيها
مرام" لا تكفون لا تغلطون ها لغلطه ...كان تبغون امي
تروح فيها..يكفيها موت مسعود ....وحالة مالك
شيماء من جا طاري مالك فز قلبها من مكانه" ليش خير وش
به مالك؟؟؟
مرام" والله يا شيماء لو تشوفينه ما راح تعرفينه .... ما هو
مالك الاولاني حاله متغير
شيماء وكل تفكيرها فيه" الله يكون بعونكم
,,
في شقة مسعود
أم طلال" والله يا يمه ما اقدر أشوفك بذي الحالة
شيخه تمسح دموعها" غصب عني والله هذا شي فوق إرادتي
أم طلال" وموضوعنا
شيخه" مستحيل ...تبغين عمتي تنجن؟؟
أم طلال" يا بنتي الشي صعب بالبدايه لكن بعدين خلاص
شيخه" لا يمه تكفين ....ولا عاد تجيبين لي هالطاري
,,
يدخل مالك على البنات في الصاله
مالك" مرام....
مرام إيي لحظه لحظه
شيماء تتغطى بسرعه وقلبها يدق مليون دقه
مرام" حياك هلا والله
مالك" السلام عليكم
الكل" وعليكم السلام
مالك" مرام جيبي لي شاي الغرفه
شيماء" شلونك مالك ....عساك طيب
مالك مرتبك" هلا فيك والله
مرام " هذي شيوووم يا مالك نسيتها؟؟
مالك ببرود" هلا فيها .... بسرعه لا تتأخرين
مرام" بإذن الله
راحت مرام تجيب الشاي لمالك .... وشيماء دموعها متجمعه
بعينها ....بسبب طريقة مالك في السلام ورده الحاد
في غرفة مالك ....
مالك" هلا والله
ماجد" هلا فيك .... وش هالغيبه
مالك" أدري عنك ؟؟ شوف وش شاغلك عنا
ماجد" هههه ماحد يشغلني عنك
مالك " وش أخبار البنت؟؟
ماجد" أي بنت؟؟
مالك يمزح" الي بدون اسم
ماجد تضايق" مالك... لا تتدخل بشي ما يعنيك
مالك بضيق" أفااا أنا؟؟
ماجد" أنا عارف حركاتك هذي إنت خايف إني أرتبط
وانشغل عنك بحياتي
مالك" هههه أنا ....ياحبي لسعادتك
ماجد" هذاك اول اليوم إنت غير...
مالك تنرفز" وش قصدك؟؟
ماجد" دوم تحاول تنفرني من البنت ...لا يكون تغير منها
مالك" صاحي إنت ؟؟
ماجد" ..........
مالك" لا يكون بنت من الشارع تفرق بيننا وبين علاقتنا
ماجد تنرفز" إكل تبن ولا عاد تجيب طاريها بالشينه
مالك بذهول" ماجد؟؟
ماجد متندم" عذرا بس ...لا تغلط عليها
مالك متضايق كثير" يالله الله يهنيك.... مع السلامه
ماجد حس بغلطته" لا تسكر ما سمعت اخبارك
مالك بقهر" أخباري ؟؟؟ ممتازه الحمد لله ....يالله اشوفك
على خير
ماجد"...........
سكر مالك الخط وصفع الجوال على الجدار ورمى نفسه
على السرير وراح في سابع نومه
\\
//
أم عبد الرحمن" تعالي يمه يمي
نوف" ههه خير خالتي
أم عبد الرحمن تمسح على شعرها" كبرتي يا قمر
نوف"...........
أم عبد الرحمن" انا جايه أخطبك لولدي
نوف بذهول" نع.... نعم
أم عبد الرحمن" نعم الله عليك.... أقولك نواف يبيك عروسته
نوف فزت من مكانها" نوااااااااااف
أم عبد الرحمن تمسكها من يدها وتجلسها" إييي نواف....
وش رايك يمه
نوف".............
أم عبد الرحمن" والله يابنتي مو على شان نواف ولدي بس
لو صيته يجيها واحد مثله ما ترددت دقيقه عليه
نوف الدموع متجمعه بعينها" أنا ما ابغي اتزوج
أم عبد الرحمن" وليه يا بنيتي ...في بنت ما تبغي تتزوج
نوف إنهارت" إييي أنا ....وبالذات من نواف
أم عبد الرحمن بإستغراب" والسبب يمه؟؟
نوف تبكي"...........
أم عبد الرحمن " أنا ما بعتمد الرد .... بخلي لك مجال
تفكرين ... ولما توصلين لقرار بلغيني ...إتفقنا
نوف منزله راسها" إي بس....
أم عبد الرحمن" لا تبسبسين..... قولي صار
نوف بهدوء " صار يا خالتي
\\
//
نواف" وينك فيه .... سيارتي متعطله بالشارع...تعالي ولا
أرسل لي راجو
طارق" أنا ما أقدر أجيك الحين بودي جدتي البيت ولما
اوصلها امرك..
نواف" وينكم انتوا بعاد.... ما اقدر أنتظر في الشارع شكلي مو حليو
طارق" إحنا جنب بيت عمي الحين بنروح البيت
نواف إنقبض قلبه" وش تسوون هناك؟؟
طارق " هاااا ما أدري قالت لي سحر ودني ...ووديتها
نواف متضايق على الآخر" الوعد بالبيت
\\
//
على السفره ...كانت ام عبد الرحمن جالسه وحاطه يدها على
خدها وما نطقت بكلمه من رجوعها من بيت بو تركي
صيته" يمه هذا العشا الي طلبتيه ....وش بلاك ما تاكلين
أم عبد الرحمن تقوم من السفره" مالي خاطر بروح انام
الكل".................
يدخل نواف بسرعه" السلام عليكم
الكل" وعليكم السلام
نواف" وين جدتي
صيته"تريح بغرفتها ...خير؟
نواف يتركها ويروح لعند جدته ويدق الباب
نواف" يمه ....إنت نايمه
أم عبد الرحمن" لا يمه حياك
نواف" خير يمه وش فيك؟؟؟ لا يكون تعبانه
أم عبد الرحمن مو راضيه ترفع عينها بعينه" لا انا بخير
نواف" وين كنت يمه مع طارق
أم عبد الرحمن"............
نواف بحده" سويتي الي خاطرك فيه هااااا
ام عبد الرحمن تعطيه ظهرها" أنا ابغي سعادتك
نواف تضايق كثير" سعادتي؟؟؟ تخطبين لي من دون علمي
.... وتدبسيني بالموضوع
أم عبد الرحمن تطالعه" لا تخاف ما تدبست بشي ....
نواف متفاجئ" وش قصدك؟؟
أم عبد الرحمن" مافي نصيب
نواف مو مصدق " وشوووووووووووو




يتبع.....

​
 




كبرياء رجل وشذوذ إمرأه


البارت العاشر

أم عبد الرحمن تطالعه" لا تخاف ما تدبست بشي ....
نواف متفاجأ" وش قصدك؟؟
أم عبد الرحمن" مافي نصيب
نواف مو مصدق " وشوووووووووووو
\\
//
\\
في لبنان...
سلاف" يا صباح الورد والياسمين
تركي وهو فاتح فمه على الآخر و يتثاوب" صباح الحب
والجمال
سلاف" شووو حابب تفطر حبيبي
تركي" أي شي تطلبينه راح آكله
سلاف" هلأ بدق على الريسبشن وبطلب لنا احلى فطور
تركي" تسلمين لي يا الغلا
يدق جوال تركي
تركي" الووووووووو
سلمان" هلا هلا ...صباحيه مباركه يا عريس
تركي" هههه الله يبارك فيك
سلمان" والله إني ضعت بدونك البارح... شكلي بحجز على
أول طائره للرياض
تركي " والله تسوي خير
سلمان" ههههه وش عليك ...بايعها
تركي" يا لله ضف وجهك وما ابغي أشوفك إلا بالرياض
سلمان" ههههه خير خير .... يا لله تامر على شي
تركي سلامتك" بس هاااااا ما يحتاج أوصيك لسانك هذا
ربطه
سلمان " أفا عليك.... مربوط من زماااااااااان
تركي " يا لله سلام
سلمان" سلام
سلاف" شووو ما راح تقوم تغسل
تركي " هاا وصيتي على الفطور
سلاف" لا هلأ بدق
تركي" خليك من الفطور ... وتعالي خلينا ننام شوي
سلاف" شوووو ما تعبت من النومه
تركي" أحد يشبع من النوم وإنت معه؟؟؟
\\
//
في الشرقية.....وبالذات في غرفة مالك
كان جالس يتفرج على البوم الصور وقت ما كانوا صغار
ويشوف مسعود شلون كان يحرص عليه على طول ... وكل
صورهم كان مسعود لامه في حضنه وكأنه يبغى يحميه
وبعدها صور الجامعة مع ماجد .... وباين تلائمهم مع بعض
.... وحبهم الواضح من عيونهم .... كانت صورته مليانه
حياه مع انها مجرد صوره بعكس صورته الحين الي جالس
يطالعها با لمرايه وكأنه إنسان ميت بدون مسعود ...وبدون
ماجد إلي فضل البنت عليه ...ما حس بحاله إلا ينزع ملابسه
من عليه ويدخل تحت الشاور ويفتح الماي البارد ...وكأنه
يتمنى إن الأفكار الشينه تنزل مع الماي أو إنها تتجمد براسه
وما يعود يحس فيها مع برودة الماي الي جمد راسه مع
برودة الجو
,,
في الصالة ...كانت مرام جاهزة حتى تروح المشغل
مر من جنبهم مالك ..من غير ما يلتفت لهم ولا حتى يقول
لمرام تلحقه ..فصارت تناديه وهو كأنه بعالم ثاني ..وما
التفت لها أصلا
أم مسعود تبكي" يا لله بحقك...أنا مالي غيرك يارب
مرام وعيونها مليانه دموع" يمه ...وش فيه مالك ..مو مالك
الأولاني متغير كثير
أم مسعود" إلي صار يمه يفتت حتى الحجر ...فما بالك بمالك
الرقيق الحساس
تدخل عليهم شيخه بصوره مفاجئه....
شيخه" السلام عليكم
أم مسعود" وعليكم السلام يمه
شيخه متوترة" عمه ؟؟ تروحين مع طلال المستشفى ....شهد
تعبانه كثير
أم مسعود" يوه ...بسم الله عليها خير يمه
شيخه" شكلها نزله معوية ...ما نمت البارح معها
أم مسعود" لا حول الله.... تروح مرام معها
مرام ارتبكت" لا ..أنا ما أروح
أم مسعود".............
مرام تبعد نظرات أمها عنها" يمه عندي عرايس اليوم لازم
أروح المشغل .... ما أقدر أتأخر
أم مسعود تطالع بشيخه" متى بيجي طلال
شيخه" الحين يا عمه
أم مسعود" يا لله أنا بروح ألبس ....و انتي مرام جهزي
حالك ..حتى نوصلك
مرام؟؟؟؟؟؟؟؟؟؟؟<<< ما في مهرب..رايحه رايحه
\\
//
أم عبد الرحمن" ما في نصيب
نواف مو مصدق " وشوووووووووووو
أم عبد الرحمن" الحمد لله جات منها ...كان فشلتني
نواف مصدوم" نوف ..رفضتني؟؟ ليش؟؟
أم عبد الرحمن"مدري عنها .... بس لا تشيل هم عطيتها
فرصه تفكر فيها
في هذا الوقت شرد نواف وراح راسه لبعيد وصار يدور
براسه الف سؤال وسؤال يبغون تفسير ....
معقولة يا نوف ؟؟؟
ولييييه كل هذا .....لا يكون تفكر بأحد ثاني ....يصير ليش
لاااا ....
أنا ولا مره حاولت إني المح لها ...أو أصرح بحبي
كانت على طول المشوار تفسر اهتمامي فيها انه نوع من
أنواع الهزل وإني أحب اتغشمر معها ..
يصير نوف تحب واحد ثاني يصير؟؟؟؟
أم عبد الرحمن شافت نواف شقد انه مصدوم وشارد
...حاولت إنها تلم الموضوع
أم عبد الرحمن" لا تخاف يا ولدي أنا قلت لها تفكر مره ثانيه
وأكيد بتغير رايها
نواف مصدوم" لا ثانيه ولا ثالثه ....وزي ما قلتي الحمد لله
إن الرفض جا منها ...لأني لو كانت موافقة كنت بدق عليها
وبقول لها إني ما أبغاك
أم عبد الرحمن" أسمع كلامك أصدقك أشوف أمورك
استغرب.....وريني عيني بعينك أشوف
نواف مرتبك" إنتوا يا لشياب تصرفاتكم متهورة وغير
مدروسة وما تحسبون لها حساب...تكبرون وتخرفون
أم عبد الرحمن متفاجأه" أنا خرفت؟؟ والله لو جا ذا الكلام من
طارق ما زعلت لكن منك؟؟؟
نواف يعض على شفته وعيونه مليانه دموع" عذريني
يا لغالية والله طلعت غصب عني
أم عبد الرحمن"..............
نواف يبوس يدها" تدرين الصاحب السوء ...طارق أثر علي
أم عبد الرحمن تبتسم له"..........
نواف يبتسم لها" مو زعلانه؟؟
أم عبد الرحمن" مشكلتي ما أقدر لو أقدر كان زعلت
نواف يبوس راسها" يا بعدي والله
أم عبد الرحمن "هههههههههههه
,,
في غرفة النور...
ماجد"يا بعد هلي والله
نوره" هاهاي أقول .... إنت متهور صح
ماجد" والله مو مني من إلي فيني
نوره" إلي فيك؟؟؟ خير
ماجد بحب " حبك يا بعدي صار يسري بدمي ...ونشف لي
عروقي
نوره" هاهاهاي لا يكون تفكرني آكل من ذا الكلام
ماجد" والله والله ...إني أحبك بشكل لا يوصف
نوره بمكر" والقصد؟؟
ماجد بصدق" قصدي شريف ورب الكعبة....عطيني إسمك
وسكنك.... وغلاتك أهلي ثاني يوم يجونك خطاطيب لعيونك
نوره" إنســـــــــى
ماجد بخوف" ليــــــــه؟؟
نوره" أعرف حركاتكم تبغي عنواني حتى تشهر فيني....إنت
تدري ان البنت ....
ماجد يقاطعها" وربي ما فكرت بذا التفكير ...إنت بالنسبه لي
أغلى من الروح
نوره" أنا أهلي متعصبين ...ولو صدق تحبني لا تجيب لي
ذي السيره...على الأقل الحين ...لين أتأكد من شعورك
ماجد" طيب على أمرك.....إذا كان كذا مو مشكله
بس ممكن طلب؟؟
نوره بضحكتها المعتاده" هاهاي آمرني ياعسل
ماجد" آآآآآآآآآآه بتموتيني وربي..
نوره الفرحة مو سايعتها" بسم الله عليك
ماجد طاير في سما العشق" إسمك يابعدي....بس أبغي
تطرب إذني بإسمك إلي الكل يسميك فيه ...لكن أنا طايح بذي
العشوق
نوره تفكر".............
ماجد زعلان" خلاص براحتك ....إذا مو واثقة فيني
نوره باندفاع" اسمي .....أنا....أنا صيته<<<؟؟؟؟؟؟؟؟؟؟؟؟؟
ماجد بفرح" يا بعدهم كلهم والله
نوره" يا لله باي
ماجد بعشق" في حفظ الكريم يا صيته
نوره سكرت الخط وصارت تعض على شفافها ....ليش قلت
له إسم صيته ....لا يكون يسوي لي مشكله ولا شي
يالله على الأقل لو إنكشفت تاكلها صيتوه
....نواف يحبها وما راح يزعل منها لو صارت وانفضحت
...تطالع نوره با لساعه لقتها الساعه 9 قامت بسرعه لسريرها
بكره عندها محاضرات كثيرة..وما فكرت بصيته إلي تكون
ممكن طاحت بمشكله لها أول مالها آخر
\\
//
في الشرقية....
شيخه" يا لله يا عمه ...طلال بره ...وقولي للدكتور إنها
تطرش وما حطت شي بحلقها من البارح ..وإنها يدوب كملت
الخمس من شهر ... وعندها فقر بالدم وووو....
أم مسعود" بس يمه خلاص ....مية مره قلتي ذا الكلام
شيخه تبكي" خايفه عليها يا عمتي ....لا يكون يصيبها شي
والله أموت... مالي غيرهم بعد أبوهم
خذت أم مسعود شيخه بحضنها وصارت تبكي معها
...ومرام تحاول تفك بينهم ....
مرام" ما يصير الرجال بره ...وشهد تعبانه ...لين تطيب
سوو الي تبغونه
أم مسعود " لا تحاتينها يمه وهي معي .... تراها بنت الغالي
خذت مرام شهد ولفتها با لبطانية وحملتها ...وطلعوا بره .
..وكانت مرام مو قادرة تسيطر على قلبها إلي صار يدق
بشكل غريب...
لما شافهم طلال جايين نزل من السيارة يبغي
يشيل شهد لكن لما شافها عند مرام رجع لمكانه والتوتر
غالب عليه
أم مسعود" شلونك طلال
طلال" هلا عمه ...أنا طيب انتوا شلونكم
أم مسعود" آآآآآه الحمد لله يا وليدي...ربك ما يترك أحد
طلال يطالع بالمرايه" وشهد شلونها
أم مسعود" إن شاء الله طيبه .... والله هذا هي بهدلت أمها
معها
طلال يطالع با لمرايه" شلونك رغد <<<< مسوي حاله إنه
ما عرفها
أم مسعود" هذي مرام يا طلال .... نبغي نوديها المشغل
طلال" نوديها ليش لا ...
مرام صارت من خوفها تلم شهد لها أكثر ...يمكن تحس
بالأمان معها

\\
//
في شركة الإضائه الساحرة
وعلى المكتب ...موجود ومو موجود.....
صار يكلم نفسه معقوله ماحسبتها صح يا نواف ؟؟؟؟ يصير
نوف ما تكون من نصيبي ؟؟؟ معقولة نوف أحد يلمسها
غيري ؟؟؟استغفر الله وش ذا الكلام ...ما أدري جنيت أو
بجن ؟؟؟
أنا لازم أكلمها حتى أعرف وش صار ...وليه رفضتني
...معقوله ما تحبني وتتمنى أحد غيري ...آآآآآآه يا نوف
...تكفين يا لغلا تكفين
,,
..... ويــــــــــــنك نايم
نواف يتروع من الصوت" يبـــــــــــــــه
بو نواف" لا خياله.....لا يكون تفكر إن الشركة جايتنا هديه
ولا منحه من الحكومة هااااا
نواف متضايق" وش له هالكلام
بو نواف" صار لي ساعة أدق عليك وما ترد ...وأقوم واعني
نفسي و أجيك ...وأصوت لك ...وأبد لا حياة لمن تنادي
نواف" آمرني يبه
بو نواف" بكره بإذن الله في عندنا طلبيه لجده و أبغيك إنت
بنفسك إلي تروح تخلصها
نواف متملل" على أمرك... شي ثاني
بو نواف يطالعه من غير نفس" لااا ارجع نام ثانيه
ويطلع بو نواف ....ونواف فتح فمه على الآخر ...وصار
يفكر برحلة جده المفاجأة ...وصار يقول بحاله...أي زواج
وأي بطيخ يا نواف ...خليك عزوبي أحسن لك
\\
//
في الجامعة....
ميثه" ياربي ...متى تخلص الإختبارات
نوره" هاهاي يا مجده
ميثه" والله....أحسن من غيري ...إلي يشترون كل شي
بالفلوس حتى أصدقائهم يأجرونهم با الفلوس
نوره" هاهاي على الأقل يقدرون يأجرون لهم صديقات
...عليك بالي ما عندهم صديقات أصلا ....والكل يتنحش
منهم
ميثه متنرفزه" منو تقصدين بالله ؟؟؟؟هااا
نوره بهدوء" هدي أخلاقك يا بنت الناس لا يكون تفكريني
ولد ....حتى أقدر عليك يا مسترجله....أصلا منو إنت حتى
اعني نفسي علشانها
ميثه قامت قيامتها على نوره" إكلي تبن ...لا بالله يبغي لك
تربيه من جد وجديد .... انا مسترجله هااا
نوره تصرخ" آآآآآآي ...يا ولد إنت
الكل صار ملتم عليهم ويفككون بينهم ...وهم شعورهم
متطايرة... والحمد لله جت صيته وبعدت البنات عنهم
وصارت... تفكك بينهم لكن هيهات جتها ضربات مو هينه
منهم .... وبعدين جات الإدارية وبلغتهم إن العميدة تبغي
تشوفهم...طبعا نوره ولا اهتمت عدلت شعرها وراحت ...أما
ميثه فكانت ميته من الخوف ...و يا حرام جروها جر
للعميدة<<< ههه يا بعدي والله
\\
//
في بيت بو نواف وعلى سفرة الأكل
أم عبد الرحمن" شلون يمه منو بيروح معنا للإمارات
نواف ساكت".........
طارق" أنا ما عندي مانع.... خلينا نغير جووو
أم عبد الرحمن ولا كأنها تسمعه" نواف.... وين سرحان فيه
نواف يتنهد من قلب" أنا ماني رايح
نوره" لا بالله عليك ما تخرب علينا رحلتنا
نواف بنظره حادة" وش دخلني فيكم أنا .... إلي يبغي يروح
مع السلامة والقلب داعي له
نوره بفرح" اييييي الحمد لله
صيته" لا تكفى نواف الرحلة مو حلوه بدونك
نواف يتذكر رفض نوف له" مالي خلق اطلع برى الرياض
.... وثانيا انا عندي شغل بجده
نوره باستفزاز" يعني جده بالرياض
نواف بملل" والله مالك دخل فيني
نوره قامت من على السفرة" اوك
أم عبد الرحمن" تدري فيني يا ولدي انا ما أعرف بدونك
نواف" طارق موجود وفيه الخير و البركة
طارق مبسوط" قول قسم .... شفتي سحوره هذا جتك شهادة
لي....لا و مو من أي أحد... قلت شي انا
الكل"..............
يدخل بو نواف" سلام عليكم
الكل" وعليكم السلام
بو نواف" ها وين أكلي
أم نواف " دقيقه الحين يسخن وأجيبه
بو نواف " هااا بتروحون الإمارات؟؟
أم نواف" والله للحين ....إنت ما بتروح معنا
بو نواف باحتقار" أنا ؟؟؟ وش يوديني ...وثانيا إنت بعد مالك
روحه
أم نواف بزعل" براحتك يا بو نواف
نواف" يبه.... متى تبغيني أروح لجده
بو نواف" جده؟؟؟ إيييي ذكرتني ...لالالالا خلاص
نواف" ليه يبه
بو نواف" لأنك بتروح الإمارات
أم عبد الرحمن تطالعه بابتسامه وعلى كرهها لأبو نواف في
ذيك اللحظة كان ودها تاخذه بحضنها وتبوسه
نواف" ومنو قال إني بروح؟؟؟
بو نواف"؟؟؟؟؟؟؟؟
نواف بصوت واطي كله احترام " قصدي إني ....ما أبغى
أروح ... وإذا على خواتي وجدتي .....طارق معهم
بو نواف يطالعه" لا إنت بتروح....لأن بو تركي ما يبغي
يروح وتركي مسافر ... فقال يبغاك تروح معهم
نواف" يبه ...أنا مالي خلق ...أساسا جو الإمارات مثل جونا
...يعني اطلع من السعودية حتى أروح الإمارات... نفس
الناس ونفس الجو وووو.....
بو نواف" لا يكثر بس..... انت رايح بدون نقاش.... وحجزنا
لكم على طيارة الساعه 3 المسا فاهم
نواف بدون كلام ووجهه مليان غضب وحزن ....تركهم
بيصعد غرفته ...
رن التلفون ...لكن نواف تجاهله ولا كأنه يسمعه
بو نواف" ما انت سامع التلفون
نواف" إلا يبه
بو نواف" وليه بالله ما ترفعه...ولا لو الواحد زعلان من شي
يصب غضبه على إلي حواليه
نواف" ماهو لي إلي يبيني بيدق لي جوال
وقف التلفون .... وبو نواف سكت...بيصعد
نواف إلا ويدق التلفون مره ثانيه ..من غير ما يسمع نواف
كلام يسم بدنه فيه رفع وكلم
نواف" الووووووو
نوف بتردد" السلام عليكم
نواف عرفها ومو راضي النفس يصعد ...يبغي يرد السلام
لكن ما قدر...حس بقلبه ضايع ولقى الحين الي يدور عليه
,,
هاجس العشق

في هاجس با لحشا يصيح بلهفه ويلوم
يشكي زماني لي خيب بقلبي الضنون
ابكي عيون طيرت من عيني النوم
هو حبني يوم وأنا جنيت به جنون

*****
كل ما غفل عقلي ما نست عيني وجودك
تنفس با لهوا قلبي وصمتك للأزل عنوان
تمنيت الزمن يوقف وابوسك بين عيونك
يمكن لهفتي تهجد وترحم بقايا إنسان

******
لو يسمعوني بكلمتي ودمي ما يرحموني
بس هذي مصيبتي إن حبيت عميت
وبعدت كل البشر عن ناظري ما يهموني
لو أبي أعشق أعشق ولو موتي دريت

*****
كلمه قبل لا يغيب ناظرك عن عيوني
كلمة أحبك ما تليق فيك وحبك سكني
ولو قلت إني أعشقك ما وفت شجوني
انت مثل كاس الخمر كل ما كثر هلكني
تعالي أرشف شفافك وأرضي جنوني
والتمس خدك بيدي وأبوس نحر سلبني
يمكن هذي منيتي وصولك آخر شجوني
*غروب*
,,
نواف"........
نوف بضيق" أكلم صيته لو سمحت؟؟
بدون ما يرد يطالع بصيته " تلفون لك
صعد إلى فوق وهو يحس إن نظراتهم بتاكله أكل
دخل غرفته وأخذ شاور ....
وبعد كذا حط جسمه المتعب على سريره الدافي وصار يتذكر
صوتها .... وطريقة كلامها ....جلس يلوم حاله على
شخصيته المتساهله ... ولا وش صار إذا قال لأبوه انه
ما يبغي يروح الإمارات
و مو صحيح انه رافض الإمارات بحد ذاتها هو رافض فكره
إنه يشوف نوف قدامه لمدة إسبوع...نوف حلم جميل وصار
لازم يصحا منه<<<عين العقل
\\
//
في المستشفى ...كانوا طلال وأم مسعود ومرام ...عند
الدكتور.. وطبعا شهد تمسكت بعمتها وعيت تتركها فهذا
الشي خلى مرام تستسلم لرغبتها وتروح معهم المستشفى
الدكتور" البنت عندها نزله معوية شديدة وجفاف
أم مسعود" يا لله.... وش السبب
الدكتور" شي طبيعي من الجو ...لكن لازم نحط لها مغذي
...وإذا ما صارت أحسن ...راح ننومها عندنا
طلال" على خير ... سوو الي تشوفه
مرام" خلاص أنا بجلس عندها ... و إنت يمه روحي البيت
ارتاحي انت ما تقدرين على جلسة المستشفى
أم مسعود" يوووه ما يطاوعني قلبي ..وش أقول لأمها لما
أدخل بدونها ...والله تنجن
طلال بعصبيه" و منو قال إني بتركك هنا في المستشفى
لحالك هااا
مرام إنحرجت"............
طلال يصلح الموقف" يمكن تحتاجون تحاليل وروحه وجيه
...بعدين تتبهدلين معها
أم مسعود" اييي أحسن ننتظر ونشوف وش يصير
\\
//
في بيت بو نواف
نواف معصب على الآخر " يا لله وبعدين صيته نوره
صيته" يالله احنا جاهزين بس بروح أجيب وشاح جدتي
واجي
نواف" و إختك بالله وينها ..
نوره نازله من على الدرج" يا لله خلاص أنا جهزت
نواف" لا بالله خليك شوي ....لا يكون مفكره انك الأميرة
وإحنا الخدم عندك
طارق داخل عرض" قول قسم ....هي قالت كذا؟؟
نواف يزفر"أووووووووووف للحين ما خلصت ويا كشتك
انت بعد
طارق" هذا جل حركات للشعر
نواف" ما تقولي الى متى ؟؟ تدري الحين احنا الساعه 12
و ورانا مشوار للمطار و انت بتروح لبيت عمي
طارق يعدل بدلته" ما صار شي شوفني خالص ...الحين
اروح لسيارتي وحــــــــــــــــــن ...أشغلها وثواني أكون
عندهم
نواف يرمي حاله على الكنبة" الله يطولك يا روح
تطلع صيته مع الجدة واهم جاهزين
نواف "هاااا خلاص ولا بعد
أم عبد الرحمن" خلاص يمه
نوره" لحظه بس بلبس جزمتي ((يكرم السامعين))
نواف مل من كثر الانتظار وراح وجلس بالسيارة وتركهم
,,
عند بيت أم تركي
كان واقف طارق وصالح بره ينتظرونهم يطلعون حتى
يحركون للمطار...وطبعا نواف سبقهم
مع الجدة وصيته ونوره.... كان الوضع طبيعي وما فيه أي
سوء و با لنسبه لأهل نوف محد يدري عن قصة الخطبة لأن
أم عبد الرحمن طلبت منها تكتم الخبر لحد ما تتم الموافقة أو
الرفض ...لأن ولو درى بو تركي راح يرغمها على الموافقة
وهذا طبعا إلي كان صعب انه يصير.... وصلوا المطار
وكان نواف مجهز كل شي ومتابع العفش وطبعا ما يحتاج
إني أقولكم شقد كميه الشنط المهولة إلي ما خذينها البنات
معهم
\\
//
في جده وعلى السرير الخشبي إلي ما ضل فيه لا مفرش ولا
مخدة كلهم على الأرض وفوقهم ماجد...
أي مو قادر ينام بسبب الخبر إلي خبرته فيه نوره
عن رحلتها مع أهلها وإنها ما تقدر تكلمه بذي الفترة

شنو يعني إسبوع با لنسبه لمرتاحين البال
لكن با لنسبه لماجد فــــ إسبوع كثير كثير ...
إسبوع جدير بأنه يزرع الشيب برأسه <<<الحب وما أدراك




يتبع......

​
 

هلا بالغوالي.....عذروني على التقصير بس والله مو مني

على العموم انا عوضتكم ببارتين علشان الإنتظار

تحياتي لكم ولعيونكم .....خالص حبي غروب الشمس
 
يابعد قلبي غروووووووووب
تيلم يدك بارتي دسمين
رديت قبل لا أقراهم
لأنك تستاهلين شكر..
سلامي لك
رحيق
..
 
يارب يــــــــــارب يــارب
لايصير لتلك الملاك صيته شي...
أرجوك غروب لا يصير لها شي ودعي السحر ينقلب على الساحر..
 
رحيق قال:
يارب يــــــــــارب يــارب
لايصير لتلك الملاك صيته شي...
أرجوك غروب لا يصير لها شي ودعي السحر ينقلب على الساحر..
أنقر للتوسيع...

:sadwalk:

كلا و لا صيته رايي من رااي الأخت رحيق

و تسلم اناملج الغلا
 
رحيق قال:
يارب يــــــــــارب يــارب
لايصير لتلك الملاك صيته شي...
أرجوك غروب لا يصير لها شي ودعي السحر ينقلب على الساحر..
أنقر للتوسيع...


هلا بالغلا....... حياااااااك قلبي

إشتقت لك انا كثير

صيته؟؟؟؟؟خلينا نتابع القصه ونشوف وش راح يصير

تحياتي حبوبتي.
 


كبرياء رجل وشذوذ إمرأه

البارت الحادي عشر

في جده وعلى السرير الخشبي إلي ما ضل فيه لا مفرش ولا
مخدة كلهم على الأرض وفوقهم ماجد...
أي مو قادر ينام بسبب الخبر إلي خبرته فيه نوره
عن رحلتها مع أهلها وإنها ما تقدر تكلمه بذي الفترة

شنو يعني إسبوع بالنسبة لمرتاحين البال
لكن بالنسبة لماجد فــــ إسبوع كثير كثير ...
إسبوع جدير بأنه يزرع الشيب برأسه <<<الحب وما أدراك
\\
//
\\
في المطار .... وفي زحمة العالم ..ما حد جالس ببيته هذاك
الوقت
أم تركي" الحمد لله كل شي تم بسهاله
أم عبد الرحمن" الله يحسر ذا البنات هدوا حيل نواف من جا
وإحنا ما شفناه ...ماعدا ها لأملح يروح و يجي علينا
حتى صالح أخذه معه
نوره" يعني وش تبغين منا نروح بدون ملابس ؟؟
أم عبد الرحمن" الحين انتي يا مال البلا ..كم شنطه حاطه لك
نوره" كلهم شنطتين وعلبة مكياج و الاب توب تبعي
أم عبد الرحمن" اهاااا ...قلنا شي إحنا
ميثه بقهر" أفا عليكم الليدي نوره تبغونها تروح بدون بهرجه
ما يصير
نوره بدلع" أقول انتي ...لا يكون انكش كشتك زي امس ....
الظاهر ما كفاك حرمان من الجامعة ثلاث أيام
ميثه" انت أصلا ... ولا أقول إذا خاطبك الجاهلون فقل
سلاما
نوف" يا لله .... تونا اليوم أول يوم و انتوا كذا ...شحالنا بعد
يومين
صيته" مالك فيهم إحنا ناخذ غرفة نجلس سوا وهم براحتهم
ميثه تتصنع الخوف" تكفون ... وربي اصبر خدامه لكم
...والي تبغونه بيصير لكن لا تخلوني معها
البنات " هههههههه
نوره" اووووه أبركها من ساعة وربي
ميثه" ومن قال والله
ربع ساعة وما يشوفون إلا نواف جاي لعندهم وكان بكامل
وسامته وأناقته( كان شاب وسيم وملامحه مرسومه ...
عيونه واسعه وسوده ... وكان لابس شماغ وثوب رمادي )
نوف ودها تطالعه لكنها تعرف إن الأنظار عليها ...وبعد
الرفض وش حال نواف...
نواف" السلام عليكم
أم تركي" هلا وغلا والله.... شلونك يمه
نواف ببرود" الحمد لله... يا لله جاهزين ..الحين بينادون
أم عبد الرحمن" ايي يمه إحنا جاهزين بس تكفى ..بروح
دورة المياه بالأول
طارق جن جنونه" دورة المياه هالحزه.... هي في آخر الدنيا
وانتي تزحفين زحف... الحين بنركب الطائرة وروحي هناك
.... وش دعوه ما تقدرين تمسكين حالك ... تكفين جدتي
نواف بزعل" طارق .... وبعدين
أم عبد الرحمن..(ساعتها مباركه) "ظلت تصرخ بذا المطار
ما خلت هنود ولا أجانب ولا عرب إلا وصاروا يطالعونها
صيته تركض لها" جدتي تكفين خليه يولي ...نواف بيوديك
أم عبد الرحمن" خليني بربيه ها لتيس ... بقولي تحملي ...ما
أدري..؟؟؟؟؟؟؟؟
طارق بجد زعل هالمره" براحتكم وعساها تروح الطائرة
...وش لي شغل أنا
أم عبد الرحمن تطالع بطارق وهي تصرخ " طارت روح
ذا الطيار قبلها روحك.... ترانا دافعين فلوس إحنا مو دافعين
حصى .... يقول تمشي؟؟؟أجل خليها تمشي وأنا اوريك
...والله لأرفع شكوى للأمير
طارق يبتسم ويتمتم " الله عاد الأمير إلي فاضي لك
أم عبد الرحمن تتلفت لهم " شيقول ها لدثوي ؟؟
ما لقت رد عليها " تقولي رجال يالأملح ورني أشوف تخاف
منخش تحت ذا البنات و تتساسر
نواف تعبت نفسيته ...ما ينلام الكل صاير يطالعهم ...والكل
عرف إن ام عبد الرحمن تبغي تروح دورة المياه
بعد عنهم وجلس على الكراسي وحط يده على راسه ...
أم عبد الرحمن ترفع غطاها على جنب وطالع طارق"
اتفوووو عليك الله لا يربحك إن شاء الله ...لابس لي بدله
ها لأملح ... ينقال له بيكشخ ذا البنقالي
نوف" خلاص خاله على شاني شوفي شلون نفسية نواف ...
أم عبد الرحمن تلتفت على نواف" أعوذ بالله من شرك يا
بليس... كله من ذا اليهودي
طارق مو ما عطيها وجه" ويلتفت على خواته ... ما قلتوا
لي وش رايكم بكشختي مو صحيح البدله راح تنطق من
جمالي
نوره بدلع" إنت اصلا وسيم ... وش عليك منها ...ولا كأنك
تسمع..طنش تعش تنتعش
طارق ما عجبه كلامها و عطاها نظره سنعه" ضفي لسانك
اقول
أم عبد الرحمن تطنشهم وتروح لعند نواف" يالله يمه ....
خلاص انا ما ابغى اروح... أتحمل وشدعوه ...بزر انا
نواف يطالعها وعيونه حمره" بعد ايش؟؟؟؟وذا العالم الي
جالسين يطالعونا؟؟ خليتونا فرجه وربي
أم عبد الرحمن بصوت عالي" ما عاش من يسويك فرجه ...
وينهم خليني اشمخ عيونهم
نواف يقوم من مكانه" تكفين يا لغاليه .... يا لله ..يا لله
أم عبد الرحمن" على الله يا ولدي
\\
//
في لبنان ...
سلاف بزعل" لا مابدي ... تروح وتتركني لحالي
تركي" أروح فدوه لعيونك قلبي... بس لازم اروح السعوديه
سلاف" ايييي وأنا التلك لا تروح .... لكن انا بدي روح معك
تركي" يا قلبي " لازم اروح وأبلغ أهلي بالأول .. حتى
يستقبلونك أحلى استقبال.... شي يلوق فيك
سلاف" بتكزوب علي ... بدك تروح وتئول عدولي
تركي يلمها له" أفااا وأنا اقدر.... روحي عندك وربي
سلاف بدلع " اييي بس أجلها شوي منشان خاطري
تركي ضاع " صار يا حبي ..أأجلها وش عندي انا
سلاف تضحك" تئبر لي البي
تركي" هههه يا لله قومي لبسي خليني اوديك احلى
كبريه(إكملت)
\\
//
في المستشفى ....
الدكتور" أنا آسف لكن لازم ننومها ...ما يصير فقدت كيلو
من وزنها في خلال 3 أيام
أم مسعود" طيب قول لنا وش نسوي لها بالبيت وإحنا نرعاها
طلال" ما عليك منها يا دكتور سو إلي تشوفه مناسب
الدكتور" منو إلي بيتنوم معها....
مرام" أنا يا دكتور
الدكتور" خلاص يا خوي انت خلص الأوراق وخليهم
يصعدونها للتنويم
بعد ما خلص طلال من الأوراق....
ام مسعود" هااااا حرصي يمه لا يكون تطرش و انت نايمه
و مو حاسه بحالك
مرام " يوه ...كيف ما احس بحالي ...لا تخافين انتي
طلال رجع ومعه الأوراق" هااا جاهزين
أم مسعود" ايي جاهزين
طلال" مرام تبغين شي اجبيه لك....
مرام بخجل" لا مشكور
ام مسعود" تعال معي أنا برسل لها ملابس وأكل وإنت جيبهم
لها
طلال" خير إن شاء الله
\\
//
في جده...
دلع" خير .... مو عوايدك تجلس بالصالة...
ماجد متملل" بكيفي ... أجلس بالصالة بالغرفة والله براحتي
دلع " بسم الله علي .... كلتني بقشوري
ماجد" ما دري عنك.... تدورين متى الواحد يكون متضايق
حتى تكلمينه
دلع" اممممم ..... طيب آسفين
ماجد" تعالي وين؟؟
دلع" بروح غرفتي..... خير تبغي شي
ماجد" ايي .... تعالي هنا
دلع" مالي خلق بروح
ماجد بحده" قلت لك تعالي
دلع" طيب ... وهذي قعده
ماجد" بقولك سر .... و اياني و اياك تفضحينا
دلع بفرح" سرررر ...أفا عليك ... في بير
ماجد بعشق" أنا تعرفت على وحده
دلع" اييييييي
ماجد" ووو....أحبها كثير
دلع" وهي ؟؟؟
ماجد" ما اعرف بس شكلها تحبني...بس ما قالتها صريحة
دلع مبسوطة" أكيد ما بتقولها .... إذا بنت ناس ومتربية
ماجد متحمس" اييي والله كثير
دلع" طيب من وين هي ... ومن أي عايله؟؟
ماجد" إلي عرفته إنها من الرياض ... واسمها صيته
دلع" يا عيني على الدلع... وش ناوي عليه
ماجد" والله مختبص حدي ...أنتظرها لما ترجع من السفر
وأحط حل للموضوع
دلع" اممم هي مسافرة؟؟
ماجد" ايي والله تقول بتروح فرنسا اسبوع مع أهلها
دلع" اهااا وهذا إلي مزعلك؟؟
ماجد" تخيلي اسبوع ما اسمع صوتها ولا اعرف أخبارها
...أحس إني بنذبح
دلع" الله الله... و انت متأكد من مشاعرك
ماجد " مليون بالميه...
دلع" اذا كذا اتكل على الله .... وأنا بساعدك
ماجد يلم أخته" يا حبي لك يا قمر
ماجد حس براحه كبيره خصوصا إن دلع عاقله وفاهمه
وسابقه سنها ...يعني لما ما تعارضه على شي يحس انه
بالتأكيد صح
\\
//
في الطائرة ....كان نواف يتصنع النوم ...من دخلوا وهو
حاط نظاره سوده على عيونه ... وطارق ما غير يفرفر
بها لمجلات ...والي يشوفه يقول الثقافة موصله حدها ....
وبجنبه صالح نايم وفارش حاله عدل ولا كأنه إلا بس هو إلي
جالس على الكرسي
طبعا النور من جلست على كراسي الطائرة شالت لثامها من
على وجهها وقعدت تسمع موسيقى ...
أما نوف فكانت جالسه بجنب صيته والسوالف ماكلتهم على
الآخر ...
أما ميثه كانت جالسه بجنب أمها إلي كانت نايمه ومو حاسة
بالدنيا ...
أما أم عبد الرحمن فما هنا لها جلسه بذي الطائرة ...جالسه
تحوس وكل شوي تحاول تفتح الحزام تبع الطائرة وما تقدر
طارق يطالعها ويرفع لها حواجبه " وش فيك يا لغلا
أم عبد الرحمن ولا كأنها تسمه"........
طارق حب يتسلى معها شوي" أم عبدوووو ...وش بيك
أم عبد الرحمن تتحقرص وودها ترد عليه لكن خايفه على
نواف بعد عينها يكفي إلي سوته فيه بالمطار وبصراحة
نواف ما يستاهل
طارق" أقول يا حلووو .....من وين القمر؟؟
أم عبد الرحمن ترفع يدينها لربها وتدعي وتتحسب لكن
بدون صوت
وطارق طبعا بدوره ميت من الضحك" ممكن نتعرف
ياحلووو؟؟
نواف وهو حاط راسه على الكرسي" طارق ...ما تركد
طارق" مو أنا هذي جدتك الي جالسه تعرك بذا الكرسي
نواف رفع نظارته من على عيونه والتفت على جدته
أم عبد الرحمن ما صدقت انه التفت عليها وصارت تأشر له
نواف راح لها على طول" خير جدتي علامك
أم عبد الرحمن" ذا الحزام الله يحسره ...بلشونا فيه حاطه لي
مية واحد ..
وليه مسوينه مقاس صغير...ما يدرون إن إحنا بلد
الخير ..كان حطوا مقاسات ...إعنبوا ها لعالم ما يحسون
نواف يبتسم" طيب يا لغالية وش تبغين الحين؟؟
أم عبد الرحمن " شيل عني ذا الحزام خلني اتحرك
نواف" ما يصير يمه ... لازم يخلونه على شان السلامة
أم عبد الرحمن" يا مال البلى إلي يبلاهم ...
أي سلامه ؟؟؟ليش هم بيردون عنا شي كاتبه لنا ربك...شيله
بس شيله
نواف وهو يفتحه" على أمرك يمه وهذا فتحته ...شي ثاني
يا لغلااااا
أم عبد الرحمن" إيييه...الحين الواحد ارتاح الله يوسع لك في
رزقك يا وليدي ...
نواف ابتسم في وجهها ...وما رفع راسه إلا وطاحت عينه
بعين نوف ..إلي كانت تراقبه في كل حركه سواها من يوم
ركب الطائرة ...انتبهت فيه وعلى طول غطت نقابها ...طبعا
نواف تحولت الإبتسامه الجميلة إلي على وجهه إلى هم كسا
وجهه وكأن واحد شاف مصيبة قدامه ...رجع على طول
وجلس على الكرسي وغطى عيونه وتصنع النوم ....ومع
رجاء طارق له انه يجلس يتسامر معه ..إلا إن نواف ما
عطاه وجه ولا كأنه يسمعه
\\
//
في الشرقية....تدخل أم مسعود البيت وهي في حيرتها ..
وش بتقول الحين لأم محمد عن بنتها.... تلقتها شيخه
وصارت تطالعها ...
شيخه" عمه وين شهد ... وش قال الدكتور
أم مسعود" والله يا شيخه لما شاف الدكتور شهد .. قال لازم
تتنيم..لأن وزنها ناقص
شيخه صرخت" بنتي ...وي علي ...لا تقولين شهد صابها
شي والله أموت
أم مسعود" سمي بسم الله يا بنيتي... بنتك ما بها إلا العافية
شيخه" مستحيل ... أكيد صابها شي ولا مستحيل تخلونها
وتجوون
يدخل طلال وينقذ الموقف" وش بلاك يختي ...البنت زينه
شيخه" طيب أروح أشوفها
أم مسعود" ما يصير يمه انتي بالعدة
شيخه" أي عده يا عمتي ... وأنا قايله لك بروح عرس ...أنا
بروح اطمئن على بنتي
أم مسعود" بنتك بحفظ الله وهذي مرام معها ...وهي بتراعيها
شيخه" مالي دخل أروح أشوفها ...ولا تبغونها تموت وأنا
ما شفتها مثل أبوها
أم مسعود عصبت" لا تدعين على البنت ... الله لا يقوله
طلال" عمه خليها تروح تشوف بنتها دام هذا يريحها
أم مسعود" لا ما يجوز ..إلي بالعدة ما يصير تطلع برا البيت
طلال مستغرب" إنتوا بعدكم على حركاتكم ...أي شرع يقول
كذا ...تحبسون إلي ميت زوجها وتحكمون عليها بأشياء
ومعتقدات غريبة
أم مسعود" والله هذي عاداتنا من زمان ...أنا يوم مات بو
مسعود حتى الحوش ما اطلع فيه
طلال" إن لله معكم إنتوا.... شوفي حالتها وش لون صايره
ام مسعود كلها شهرين وتطلع من العدة
شيخه تبكي" ما اقدر إلا أشوف بنتي
طلال تضايق" عمه ...
أم مسعود" دق على مرام و عطها إياها تكلمها
شيخه وهي تبكي" إييييي تكفى يا خوي ...لو أسمع صوتها
\\
//
في احد المزارع....
مالك" أوووف ...إن لله
بو عبد الله" خير يا خوي وش فيها المهرة
مالك" والله المهرة .... ولادتها متعسرة
بو عبد الله" لا يكون يصير فيها شي
مالك" إن شاء الله مابها إلا العافية ..... بحاول فيها
بو عبد الله" والله لو قامت بالسلامة راح أعوضك على تعبك
معها
\\
//
في الإمارات .... مع وصول الطائرة تعطلوا العالم كلهم
على حساب نزلة أم عبد الرحمن من الطائرة ... ورجليها
إلي تجمدت فيها الدم من جلستها من غير حركه.....
,,
نواف" على مهلك يمه
أم عبد الرحمن" أفا عليك تفكرني عجزت ...أنا والله لولا
الكولسترول وألم المفاصل إلي برجلي وها لسكر إلي كل
ماله يعلى وما ادري وش السبب وضغطي إلي يرفعه أخوك
بكل حزه كنت اركض بذا المطار وما حد يوصل لي تخسي
المهرة توصل مواصيلي
نواف" ههههه الله يعطيك العافية
طارق" نواف ... أروح أنا للشنط وانت تجلس مع الحريم
نواف بحزم" لا ...تعال امسك جدتك وأنا بروح
طارق" على راحتك
يمسك طارق بيد جدته إلي عيت في البداية تعطيه إياها<<<
حركات يا بعدي
طارق يطالعها" هلا بالشحرورة
أم عبد الرحمن تقول بخاطرها ..شرحوك بجهنم".....
طارق" وش بلاه القمر زعلان مني.... وهذا إلي أنا جاي
وحاط يدي بيدك .... نسيتي عشرتنا
أم عبد الرحمن" الله لا يجيب الغلا .... افتح لي الجوال
أشوف
طارق" قولي قسم.... هذا وقته الحين يمه
أم عبد الرحمن" احتياط ... يمكن تضيعني بذا المطار ...
على الأقل اقدر أدق على نواف
اخذ طارق منها الجوال بدون ما يرد عليها"........<<<
وكأنه يؤيدها هههههه
البنات كانوا في دوره المياه وكل وحده جالسه تعدل بحالها
.... طبعا نوره لفت الغطا شكل بس أما صيته ونوف وميثه
فتلثموا
نوره تطالع بالبنات" هااا خلاص جاهزين؟؟
صيته " لا يكون بتطلعيين كذا؟؟
نوره تطالع بحالها " وش فيني؟؟
صيته بضيق" على الأقل غطي شعرك.... نواف لو يشوفك
كذا ما راح يصير لك طيب
نوره تنفخ" أوووووف ... عقد
\\
//
مالك" الحمد لله على سلامتها يا بو عبد الله
بو عبد الله" ههههه الله يسلمك يارب... والله ما قصرت
مالك" هذا واجبنا ...
يدق جوال مالك " عن إذنك يابو عبد الله
بو عبد الله " خذ راحتك
مالك" يا هلا والله
ماجد" ما بغيت ترد .... من أمس وأنا أحاول اتصل عليك
مالك ببرود" مشاغل والله
ماجد"من متى تنشغل عني؟؟؟ على العموم أنا ابغي أشوفك
مالك" حياك ...أهلا وسهلا
ماجد" لا أنت تعالي جده ...غير جو
مالك " لاااا .... تدري فيني ما اقدر اترك الأهل بروحهم
ماجد" خلاص أنا بجيك ....طيب
مالك" على خير وانتبه لحالك
\\
//
في المطار كان راشد ينتظرهم .... كان واقف في الاستقبال
وكان أنيق كثير لابس ثوب إماراتي وغتره وعقال وكان
ملتحي .... وملامحه ناعمة
طارق" الحين انتوا تعرفون شكل راشد
أم تركي"إي بالله نعرفه
صالح" يمه مو كأنه هذاك إلي ينتظر لوحده
أم تركي" إييي بالله هوو ....راااشد
انتبه راشد فيهم وجا لهم يركض ...وسلم على عمته وباس
راسها
أم تركي" هلا والله بالغالي ولد الغالي .....كبرت يمه
راشد" شحالك عمتي ..نورتي ديرتنا
أم تركي" دار زايد دوم منوره بأهلها
راشد يلتفت على ام عبد الرحمن" هلا خالتي شحالك
...عساك بخير
أم عبد الرحمن" والله طيبين ...أبوك شلونه وأمك
راشد" كلهم بخير ويحترونكم
صالح" هلا والله بولد خالي
راشد" هلا فيك والله كبرت عن آخر مره
صالح" أفا عليك ...أعجبك أنا
نواف" مساء الخير...أنا نواف وهذا اخوي طارق
راشد" يا مرحبا فيكم .... نورتونا ..حياكم تفضلوا
راحوا الكل معه ولقوا سيارتين ينتظرونهم وركب نواف مع
جدته وراشد وأم تركي وفيصل في سيارة... وطارق والبنات
في سيارة ثانيه ....
\\
//
في الشرقية
شيخه تبكي" هلا مرام ...بشريني عن شهد
مرام" والله طيبه ما بها إلا العافية
شيخه" أكيد ؟؟؟ ولا أقولك عطيني أكلمها
شهد" ماما شخبارك
شيخه" هلا بقلبي والله...شلونك انت كويسه
شهد" اييي يمه بس حطوا لي ابره بيدي ...توجعني
شيخه" ماعليه يمه لاتخافين بس هم بيطمنون عليك
شهد تهز براسها يعني اييي".......
\\
//
في الإمارات ...وفي سيارة راشد بالذات
راشد"يا حيا لله من سير علينا...أقبلتكم الديار بخير
نواف" الله يحيي أصلك ... الواحد يشوفك يتعلق فيك وربي
أم عبد الرحمن" الله يسلم يد ربتك يمه ....
راشد" الله يسلمك يا خالتي ....
أم تركي" وش أخبار العروس؟؟
راشد" والله شاطتن حالها تقولين ما حد بالبلد تزوج غيرها
ههههههه
أم عبد الرحمن" بالعافية عليها خلها تفرح وتستانس ...جعلها
تنسعد وتترس بيته بالذرية الصالحة
نواف " اللهم آمين
أم تركي" وانت متى بتقول يا هادي ... وبدور لك عروس
راشد" ههههه إلي اعرفه إن نواف اكبر مني إذا سواها لحقته
ولا وش رأيك يا بو الشباب
نواف"؟؟؟؟؟؟؟؟؟؟؟؟؟؟


يتبع......


​
 
سلامي عليج الغلاااو في انتظارج و ان شاء الله تصفى قلوب المحبين في دار المحبة (الإمارات)
 
ياسلام عليك والله ماقصرتي معانا ..............

اجزاء روعه مرررررررررررررررررة
 
تسلم لي اليد اللي تكتب..

عاد انا وربي علي أمووووت في السعوديه و في لهجتكم..
و انتي ما قصرتي دخلتي في القصة أهل بلادي (أقصد الإمارات)..لا بالله بتخليني على أحر من الجمر أنتظر التكمله..

يله حياتي كملي..
 
ننتظر جديدك....
وأتمنى أن لا تتعقد الأمور بين نوف ونواف....
حتى أسمائهم طقم ...
لايقين على بعض...
بانتظارك لنقطع الشك باليقين
.....
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل